12 ᠳ᠋ᠤᠭᠠᠷ ᠰᠠᠷᠠᠶᠢᠨ 16ᠤ ᠡᠳᠦᠷ᠂ ᠰᠤᠷᠪᠤᠯᠵᠢᠯᠠᠭ᠍ᠴᠢ ᠮᠠᠨᠵᠤᠤᠷ ᠪᠣᠭᠣᠮᠲᠠᠡᠴᠡ ᠣᠢᠯᠠᠭᠠᠭᠰᠠᠨᠢᠶᠠᠷ᠄ ᠡᠨᠡ ᠵᠢᠯᠦᠨ ᠲᠦᠷᠦᠭᠦᠸ᠋ 11 ᠰᠠᠷᠠᠳᠤ᠂ ᠮᠠᠨᠵᠤᠤᠷ ᠬᠢᠯᠢᠶᠢᠨ ᠪᠣᠭᠣᠮᠲᠠᠪᠠᠷ ᠣᠷᠣᠵᠤ ᠭᠠᠷᠤᠭᠰᠠᠨ ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡ 4377 ᠴᠤᠪᠤᠭᠠ ᠪᠠᠢᠵᠤ᠂ 45.7 ᠲᠦᠮᠡᠨ ᠪᠠᠷᠢᠮᠵᠢᠶᠠᠲᠤ ᠴᠢᠩᠭᠡᠯᠢᠭ ᠬᠠᠢᠷᠴᠠᠭ ᠠᠴᠢᠶᠠᠯᠠᠨ᠂ ᠠᠳᠠᠯᠢ ᠬᠤᠭᠤᠴᠠᠭᠠᠨᠤ ᠬᠢᠡᠴᠡ ᠲᠣᠰ ᠲᠣᠰ 8.4%᠂ 6.2%ᠢᠶᠠᠷ ᠨᠡᠮᠡᠭᠳᠡᠵᠡᠢ᠃ ᠡᠭᠦᠨᠳᠦ᠂ ᠣᠷᠣᠵᠤ ᠢᠷᠡᠭᠰᠡᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡ 2705 ᠴᠤᠪᠤᠭᠠ ᠪᠠᠢᠵᠤ᠂ 19.1 ᠲᠦᠮᠡᠨ ᠪᠠᠷᠢᠮᠵᠢᠶᠠᠲᠤ ᠴᠢᠩᠭᠡᠯᠢᠭ ᠬᠠᠢᠷᠴᠠᠭ ᠠᠴᠢᠶᠠᠯᠠᠨ᠂ ᠲᠡᠭᠡᠭᠡᠪᠦᠷᠢᠶᠢᠨ ᠬᠡᠮᠵᠢᠶᠡ ᠨᠢ 11 ᠰᠠᠷᠠ ᠳᠠᠷᠠᠭᠠᠯᠠᠨ ᠪᠥᠬᠥ ᠤᠯᠤᠰᠤᠨ ᠲᠡᠷᠢᠭᠦᠨ ᠪᠠᠢᠷᠢᠨᠳᠤ ᠪᠠᠢᠷᠢᠯᠠᠵᠠᠢ᠃
ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡᠶᠢᠨ 《ᠵᠡᠭᠦᠨ ᠵᠠᠮ》ᠳᠡᠬᠢ ᠴᠢᠬᠤᠯᠠ ᠵᠠᠩᠭᠢᠯᠠᠭᠠᠶᠢᠨ ᠬᠢᠯᠢᠶᠢᠨ ᠪᠣᠭᠣᠮᠲᠠ ᠪᠣᠯᠤᠭᠰᠠᠨᠤ ᠬᠤᠪᠢᠳᠤ᠂ ᠮᠠᠨᠵᠤᠤᠷ ᠬᠢᠯᠢᠶᠢᠨ ᠪᠣᠭᠣᠮᠲᠠᠪᠠᠷ ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡᠶᠢ ᠨᠡᠪᠲᠡᠷᠡᠭᠦᠯᠦᠭᠡᠳ 12 ᠵᠢᠯ ᠪᠣᠯᠵᠠᠢ᠂ ᠤᠯᠠᠨ ᠤᠯᠤᠰᠤᠨ ᠪᠠᠷᠠᠭᠠᠨᠤ ᠭᠦᠢᠯᠭᠡᠭᠡᠨᠦ ᠶᠡᠬᠡ ᠨᠡᠪᠲᠡᠷᠡᠯᠤᠨ ᠭᠣᠣᠯ ᠵᠠᠮᠢ ᠥᠷᠭᠡᠳᠬᠡᠭᠰᠡᠨᠢᠶᠡᠷ ᠪᠠᠷᠠᠬᠤ ᠦᠭᠡᠢ᠂ ᠨᠡᠩ ᠴᠤ᠌ ᠠᠷᠠᠯᠵᠢᠶᠠ ᠶᠠᠪᠤᠯᠴᠠᠭᠠᠶᠢ ᠠᠬᠢᠭᠤᠯᠬᠤ ᠬᠦᠴᠦᠲᠦ ᠬᠥᠳᠡᠯᠭᠡᠭᠦᠷ ᠪᠣᠯᠵᠤ᠂ ᠥᠪᠥᠷ ᠮᠣᠩᠭᠣᠯᠤᠨ ᠥᠨᠳᠥᠷ ᠲᠦᠪᠰᠢᠨ ᠪᠦᠬᠦᠢ ᠭᠠᠳᠠᠭᠠᠳᠤ ᠨᠡᠭᠡᠭᠡᠯᠲᠡᠶᠢ ᠥᠷᠭᠡᠳᠬᠡᠬᠦ᠂ 《ᠨᠢᠭᠡ ᠪᠦᠰᠡ ᠨᠢᠭᠡ ᠵᠠᠮ》ᠢ ᠴᠢᠨᠠᠷ ᠰᠠᠢᠲᠠᠢ ᠪᠥᠭᠡᠳ ᠬᠠᠮᠲᠤᠪᠠᠷ ᠪᠦᠲᠦᠭᠡᠨ ᠪᠠᠶ᠋ᠢᠭᠤᠯᠬᠤᠳᠤ ᠰᠢᠨᠡ ᠬᠥᠳᠡᠯᠭᠡᠭᠴᠢ ᠡᠨᠧᠷᠭᠢ ᠨᠡᠮᠡᠷᠢᠯᠡᠵᠡᠢ᠃ ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡᠶᠢᠨ ᠬᠤᠷᠳᠤᠴᠠᠶᠢ ᠳᠡᠭᠡᠭᠰᠢᠯᠡᠭᠦᠯᠦᠨ ᠦᠷᠡ ᠠᠰᠢᠭ᠋ᠢ ᠨᠢ ᠨᠡᠮᠡᠭᠳᠡᠭᠦᠯᠬᠦᠶᠢ ᠪᠠᠲᠤᠯᠠᠬᠤᠶᠢᠨ ᠲᠥᠯᠥᠭᠡ᠂ ᠮᠠᠨᠵᠤᠤᠷ ᠪᠣᠭᠣᠮᠲᠠᠶᠢᠨ ᠬᠢᠨ ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡᠶᠢᠨ ᠪᠤᠴᠠᠵᠤ ᠢᠷᠡᠬᠦ ᠵᠠᠮᠤᠨ ᠬᠢᠯᠢ ᠳᠣᠲᠣᠷᠠᠬᠢ ᠬᠡᠰᠡᠭᠲᠠᠬᠢ ᠲᠡᠭᠡᠭᠡᠪᠦᠷᠢᠶᠢᠨ ᠵᠠᠷᠤᠳᠠᠯᠢ ᠨᠢ ᠬᠠᠰᠤᠵᠤ ᠬᠡᠯᠲᠦᠷᠢᠭᠦᠯᠬᠦᠪᠡᠷ ᠠᠵᠤ ᠠᠬᠤᠢᠯᠠᠯᠳᠤ ᠠᠰᠢᠭ᠋ ᠬᠦᠷᠲᠡᠭᠡᠬᠦ ᠠᠷᠭᠠ ᠬᠡᠮᠵᠢᠶᠡᠶᠢ ᠪᠥᠬᠥ ᠲᠠᠯᠠᠪᠠᠷ ᠬᠡᠷᠡᠭᠵᠢᠭᠦᠯᠵᠦ᠂ ᠲᠦᠷᠦᠭᠦᠸ᠋ 11 ᠰᠠᠷᠠᠳᠤ ᠠᠵᠤ ᠠᠬᠤᠢᠯᠠᠯᠤᠨ ᠭᠠᠢᠯᠢᠶᠢᠨ ᠵᠣᠭᠣᠰᠢ 187.45 ᠲᠦᠮᠡᠨ ᠲᠥᠭᠥᠷᠢᠭ ᠬᠠᠰᠤᠵᠤ ᠬᠡᠯᠲᠦᠷᠢᠭᠦᠯᠪᠡ᠃ ᠡᠭᠦᠨᠦ ᠬᠠᠮᠲᠤ᠂ ᠮᠠᠨᠵᠤᠤᠷ ᠪᠣᠭᠣᠮᠲᠠᠶᠢᠨ ᠬᠢᠨ 《ᠲᠡᠮᠦᠷ ᠵᠠᠮᠢ ᠲᠦᠷᠭᠡᠨ ᠨᠡᠪᠲᠡᠷᠡᠭᠦᠯᠬᠦ》 ᠲᠤᠬᠠᠢᠯᠠᠭᠰᠠᠨ ᠠᠵᠢᠯᠤᠨ ᠬᠡᠪ ᠵᠠᠭᠪᠤᠷᠢ ᠳᠡᠯᠭᠡᠷᠡᠭᠦᠯᠵᠦ᠂ ᠡᠨᠡ ᠬᠦ᠌ ᠬᠡᠪ ᠵᠠᠭᠪᠤᠷᠤᠨ ᠠᠵᠢᠯᠯᠠᠭᠠᠨᠢᠶᠠᠷ ᠠᠵᠤ ᠠᠬᠤᠢᠯᠠᠯᠤᠳ ᠨᠢ ᠬᠢᠯᠢᠶᠢᠨ ᠪᠣᠭᠣᠮᠲᠠᠳᠤ ᠳᠠᠬᠢᠨᠲᠠ ᠭᠤᠶᠤᠴᠢᠯᠠᠨ ᠮᠡᠳᠡᠭᠦᠯᠬᠦ ᠪᠠ ᠪᠣᠭᠣᠮᠲᠠ ᠰᠢᠯᠵᠢᠭᠦᠯᠬᠦ᠂ ᠬᠠᠷᠭᠤᠭᠤᠯᠤᠨ ᠦᠭᠡᠢᠰᠬᠡᠬᠦ ᠵᠡᠷᠭᠡ ᠭᠠᠷᠳᠠᠮᠢ ᠭᠦᠢᠴᠡᠳᠬᠡᠬᠦ ᠴᠢᠬᠤᠯᠠ ᠦᠭᠡᠢ ᠪᠠᠢᠵᠤ᠂ ᠮᠠᠨᠵᠤᠤᠷ ᠬᠢᠯᠢᠶᠢᠨ ᠪᠣᠭᠣᠮᠲᠠᠶᠢᠨ ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠡᠨᠦ ᠭᠠᠯᠲᠤ ᠲᠡᠷᠭᠡᠶᠢᠨ ᠪᠦᠬᠦᠯᠢ ᠴᠣᠭᠴᠠᠶᠢᠨ ᠠᠶᠠᠯᠠᠯᠤᠨ ᠴᠠᠭᠢ 1ᠠᠴᠠ 2 ᠡᠳᠦᠷ ᠪᠣᠭᠣᠨᠢᠰᠬᠠᠪᠠ᠃
ᠰᠤᠷᠪᠤᠯᠵᠢᠯᠠᠭ᠍ᠴᠢᠶᠢᠨ ᠣᠢᠯᠠᠭᠠᠭᠰᠠᠨᠢᠶᠠᠷ᠂ ᠣᠢᠷᠠᠶᠢᠨ ᠵᠢᠯᠦᠳᠲᠦ ᠮᠠᠨᠵᠤᠤᠷ ᠬᠢᠯᠢᠶᠢᠨ ᠪᠣᠭᠣᠮᠲᠠᠶᠢᠨ ᠪᠣᠭᠣᠮᠲᠠᠪᠠᠷ ᠥᠩᠭᠡᠷᠡᠭᠦᠯᠬᠦᠶᠢ ᠳᠥᠭᠥᠮᠴᠢᠯᠡᠬᠦ ᠬᠢᠷᠢ ᠲᠦᠪᠰᠢᠨᠢᠶᠠᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠡᠭᠡᠭᠰᠢᠯᠡᠭᠦᠯᠬᠦᠶᠢ ᠳᠠᠭᠠᠯᠳᠤᠨ᠂ ᠮᠠᠨᠵᠤᠤᠷ ᠬᠢᠯᠢᠶᠢᠨ ᠪᠣᠭᠣᠮᠲᠠᠳᠤ ᠨᠠᠩ ᠣᠯᠠᠨ ᠭᠠᠳᠠᠭᠠᠳᠤᠠᠴᠠ ᠣᠷᠣᠭᠤᠯᠵᠤ ᠭᠠᠳᠠᠭᠠᠳᠤᠳᠤ ᠭᠠᠷᠭᠠᠬᠤ ᠲᠤᠬᠠᠢᠯᠠᠭᠰᠠᠨ ᠠᠵᠢᠯ ᠲᠠᠲᠠᠨ ᠬᠤᠷᠠᠭᠤᠯᠵᠠᠢ᠃ ᠡᠭᠦᠨᠦ ᠲᠤᠯᠠᠳᠠ᠂ ᠮᠠᠨᠵᠤᠤᠷ ᠪᠣᠭᠣᠮᠲᠠᠶᠢᠨ ᠬᠢᠨ ᠤᠶᠤᠨᠲᠤ ᠬᠢᠨᠠᠯᠲᠠ ᠬᠠᠮᠢᠶᠠᠷᠤᠯᠲᠠᠶᠢᠨ ᠥᠭᠡᠷᠡᠴᠢᠯᠡᠯᠲᠡᠪᠠᠨ ᠦᠷᠭᠦᠯᠵᠢᠯᠡᠨ ᠭᠦᠨᠵᠡᠭᠡᠢᠷᠡᠭᠦᠯᠵᠦ᠂ ᠮᠡᠳᠡᠭᠡ ᠵᠠᠩᠭᠢᠶᠢ ᠬᠠᠮᠲᠤᠪᠠᠷ ᠬᠦᠷᠲᠡᠬᠦ᠂ ᠪᠠᠴᠢᠮ ᠪᠠᠢᠳᠠᠯᠢ ᠠᠷᠭᠠᠴᠠᠭᠠᠨ ᠰᠢᠢᠳᠪᠦᠷᠢᠯᠡᠬᠦ᠂ ᠶᠡᠷᠦᠩᠬᠡᠢᠯᠡᠭᠰᠡᠨ ᠵᠠᠳᠠᠯᠤᠯᠲᠠ ᠬᠢᠵᠦ ᠳᠡᠭᠡᠭᠰᠢ ᠮᠡᠳᠡᠭᠦᠯᠬᠦ 《ᠭᠤᠷᠪᠠᠨ ᠵᠦᠢᠯᠦᠨ ᠲᠣᠭᠲᠠᠴᠠ》ᠶ᠋ᠢ ᠠᠰᠢᠭ᠍ᠯᠠᠨ᠂ ᠲᠡᠮᠦᠷ ᠵᠠᠮᠤᠨ ᠬᠢᠯᠢᠶᠢᠨ ᠪᠣᠭᠣᠮᠲᠠᠶᠢᠨ ᠪᠠᠷᠠᠭᠠᠨᠤ ᠭᠦᠢᠯᠭᠡᠭᠡᠶᠢᠨ ᠤᠶᠤᠨᠲᠤ ᠬᠢᠨᠠᠯᠲᠠ ᠬᠠᠮᠢᠶᠠᠷᠤᠯᠲᠠᠶᠢᠨ ᠲᠠᠪᠴᠠᠩᠢ ᠪᠠᠢᠭᠤᠯᠵᠤ᠂ ᠪᠦᠬᠦ ᠲᠠᠯᠠᠪᠠᠷ᠂ ᠪᠦᠬᠦᠯᠢ ᠡᠳᠦᠷᠦᠨ ᠳᠦᠷᠢᠮᠢᠶᠡᠷ ᠬᠢᠯᠢᠶᠢᠨ ᠪᠣᠭᠣᠮᠲᠠᠶᠢᠨ ᠥᠷᠲᠡᠭᠡᠨᠦ ᠬᠠᠳᠠᠭᠠᠯᠠᠯᠲᠠ᠂ ᠪᠠᠷᠠᠭᠠᠨᠤ ᠭᠦᠢᠯᠭᠡᠭᠡᠶᠢᠨ ᠪᠠᠢᠳᠠᠯᠢ ᠬᠢᠨᠠᠨ ᠰᠢᠨᠵᠢᠵᠦ᠂ ᠰᠢᠢᠳᠪᠦᠷᠢᠯᠡᠬᠦ ᠠᠷᠭᠠ ᠬᠡᠮᠵᠢᠶᠡ᠂ ᠴᠤᠪᠤᠷᠠᠯᠢ ᠲᠦᠷᠦᠯ ᠬᠤᠪᠢᠶᠠᠨ ᠲᠣᠬᠢᠷᠠᠭᠤᠯᠵᠤ᠂ ᠳᠤᠮᠳᠠᠳᠤ ᠡᠸᠦ᠋ᠷᠦᠫᠡᠶᠢᠨ ᠵᠢᠰᠢᠶᠠᠨᠤ ᠭᠠᠯᠲᠤ ᠲᠡᠷᠭᠡᠶᠢᠨ ᠪᠣᠭᠣᠮᠲᠠᠪᠠᠷ ᠰᠠᠭᠠᠳ ᠦᠭᠡᠢ ᠥᠩᠭᠡᠷᠡᠬᠦᠶᠢ ᠪᠠᠲᠤᠯᠠᠪᠠ᠃
