ᠵᠢᠷᠦᠬᠡᠨ ᠳᠤ ᠬᠡᠪᠯᠡᠭᠳᠡᠭᠰᠡᠨ ︽ᠲᠣᠪᠴᠢᠶᠠᠨ︾
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/8/21
                       ᠪᠤᠣ ᠰᠠᠷᠠᠩᠭᠤᠸ᠎ᠠ ᠵᠣᠭᠢᠶᠠᠪᠠ    ᠣᠨ ᠵᠢᠯ ᠤᠨ ᠤᠷᠤᠰᠬᠠᠯ ᠳᠤ ᠣᠯᠠᠨ ᠣᠯᠠᠨ ᠤᠴᠢᠷ ᠶᠠᠪᠤᠳᠠᠯ ᠮᠠᠷᠲᠠᠭᠳᠠᠵᠤ᠂ ᠣᠯᠠᠨ ᠣᠯᠠᠨ ᠬᠡᠷᠡᠭ ᠪᠣᠳᠠᠰ ᠬᠠᠭᠤᠴᠢᠷᠠᠳᠠᠭ ᠴᠤ ᠳᠤᠷᠠᠰᠤᠯ ᠮᠥᠷᠥᠭᠡᠳᠦᠯ ᠨᠢ ᠶᠢᠷᠲᠢᠨᠴᠦ ᠶᠢᠨ ᠮᠦᠩᠭᠡ ᠪᠣᠰᠤ ᠶᠢ ᠦᠵᠡᠭᠦᠯᠦᠭᠰᠡᠨ ᠬᠦᠮᠦᠰ ᠢ ᠡᠷᠢᠨ ᠰᠠᠨᠠᠭᠠᠯᠵᠠᠵᠤ᠂ ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠳᠠᠭ ᠳᠠᠯᠳᠠ ᠴᠢᠳᠠᠪᠬᠢ ᠲᠠᠢ ᠪᠠᠶᠢᠳᠠᠭ ᠠᠴᠠ ᠶᠡᠷᠦ ᠨᠢ ᠪᠠᠯᠠᠷᠠᠳᠠᠭ ᠦᠭᠡᠢ᠂ ᠬᠠᠷᠢᠨ ᠶᠠᠷᠢᠬᠤ ᠳᠤᠲᠤᠮ ᠶᠠᠰᠤᠯᠢᠭ᠂ ᠬᠡᠯᠡᠬᠦ ᠳᠤᠲᠤᠮ ᠬᠦᠴᠦᠯᠢᠭ ᠣᠢ ᠤᠬᠠᠭᠠᠨ ᠤ ᠱᠦᠯᠲᠦ ᠪᠣᠯᠳᠠᠭ ᠰᠠᠨ᠃     ᠶᠠᠭ ᠲᠡᠶᠢᠮᠦ ᠠᠴᠠ ᠪᠢ ᠠᠪᠤ ᠪᠠᠨ ᠦᠷᠭᠦᠯᠵᠢ ᠳᠤᠷᠠᠰᠳᠠᠭ᠃ ᠠᠪᠤ ᠶᠢᠨ ᠢᠶᠠᠨ ᠲᠣᠬᠠᠢ ᠬᠡᠯᠡᠬᠦ ᠬᠠᠮᠤᠭ ᠤᠨ ᠳᠤᠷᠠᠲᠠᠢ ᠪᠠᠶᠢᠳᠠᠭ᠃ ᠪᠣᠰᠣᠳ ᠬᠥᠮᠥᠨ ᠬᠡᠷᠪᠡ ᠮᠢᠨᠤ ᠠᠪᠤ ᠪᠠᠶᠠᠨ᠂ ᠪᠠᠩᠬᠢ ᠳᠤ ᠬᠠᠳᠠᠭᠠᠯᠠᠮᠵᠢ ᠲᠠᠢ ᠭᠡᠵᠦ ᠪᠠᠷᠳᠠᠮ ᠶᠠᠷᠢᠳᠠᠭ ᠪᠠᠶᠢᠭᠰᠠᠨ ᠪᠣᠯ ︽ᠮᠢᠨᠤ ᠠᠪᠤ ᠮᠡᠷᠭᠡᠨ ᠬᠥᠮᠥᠨ᠂ ᠮᠦᠩᠬᠡ ᠦᠯᠡᠳᠡᠬᠦ ᠴᠠᠳᠢᠭ ᠲᠠᠢ ᠬᠥᠮᠥᠨ︾ ᠭᠡᠵᠦ ᠪᠢ ᠮᠠᠰᠢ ᠵᠣᠷᠢᠭᠲᠠᠢ ᠮᠠᠭᠲᠠᠵᠤ ᠳᠡᠶᠢᠯᠬᠦ ᠶᠤᠮ᠃ ᠠᠪᠤ ᠮᠢᠨᠢ ᠬᠡᠳᠦᠶᠢᠪᠡᠷ ᠳᠠᠷᠤᠭ᠎ᠠ ᠬᠡᠷᠬᠡᠮᠲᠡᠨ ᠶᠠᠪᠤᠭᠰᠠᠨ ᠦᠭᠡᠢ᠂ ᠳᠠᠭᠠᠭᠠᠮᠠᠯ ᠨᠣᠶᠠᠨ ᠪᠣᠯᠣᠭᠰᠠᠨ ᠦᠭᠡᠢ ᠴᠤ ᠵᠢᠷᠭᠤᠭᠠᠨ ᠬᠡᠥᠬᠡᠳ ᠢᠶᠠᠨ ᠵᠠᠪᠠᠯ ᠪᠢᠴᠢᠭ ᠦᠵᠡᠭᠦᠯᠵᠦ ᠰᠣᠶᠣᠯᠵᠢᠭᠤᠯᠬᠤ ᠪᠠᠷ ᠴᠢᠷᠮᠠᠶᠢᠭᠰᠠᠨ ᠵᠢᠳᠬᠦᠯᠲᠡᠨ᠃ ᠲᠡᠷᠡ ᠦᠶ᠎ᠡ ᠳᠤ ᠬᠤᠷᠢ ᠬᠦᠷᠭᠡᠭᠡᠳ ᠬᠤᠶᠠᠷ ᠬᠥᠪᠡᠭᠦᠨ ᠢᠶᠠᠨ ᠴᠢᠳᠠᠯ ᠬᠦᠴᠦᠨ ᠲᠠᠢ ᠪᠣᠯᠣᠯ᠎ᠠ ᠭᠡᠳ ᠰᠤᠷᠭᠠᠭᠤᠯᠢ ᠠᠴᠠ ᠭᠠᠷᠭᠠᠵᠤ ᠬᠦᠳᠡᠯᠮᠦᠷᠢ ᠬᠢᠯᠭᠡᠵᠦ ᠪᠣᠯᠬᠤ ᠪᠠᠶᠢᠭᠰᠠᠨ᠂ ᠬᠦᠷᠭᠡᠨ ᠳᠤ ᠥᠭᠬᠦ ᠨᠠᠰᠤ ᠲᠤᠯᠭᠠᠭᠠᠳ ᠳᠦᠷᠪᠡᠨ ᠥᠬᠢᠨ ᠢᠶᠠᠨ ᠬᠠᠷᠢ ᠳᠤ ᠮᠣᠷᠳᠠᠭᠤᠯᠤᠨ ᠶᠡᠬᠡᠬᠡᠨ ᠬᠡᠮᠵᠢᠶᠡᠨ ᠤ ᠪᠡᠯᠡᠭ ᠰᠡᠯᠲᠡ ᠠᠪᠴᠤ ᠴᠤ ᠪᠣᠯᠬᠤ ᠪᠠᠶᠢᠭᠰᠠᠨ᠃ ᠶᠡᠷᠦ ᠨᠢ ᠲᠡᠭᠡᠭᠡ ᠦᠭᠡᠢ  ᠳ᠋ᠠ᠂ ᠮᠢᠨᠤ ᠠᠪᠤ᠃ ᠪᠦᠭᠦᠳᠡ ᠶᠢ ᠪᠢᠴᠢᠭ ᠰᠣᠶᠣᠯ ᠤᠨ ᠮᠦᠷ ᠬᠦᠭᠡᠯᠭᠡᠵᠦ᠂ ᠡᠪᠦᠯ ᠤᠨ ᠬᠦᠢᠲᠡᠨ᠂ ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠴᠤ ᠬᠦᠨᠡᠰᠦ ᠵᠣᠭᠤᠰ ᠬᠦᠷᠭᠡᠨ᠎ᠡ ᠭᠡᠵᠦ ᠯᠠ ᠵᠠᠮᠨᠠᠳᠠᠭ ᠪᠠᠶᠢᠭᠰᠠᠨ ᠡ᠃     ᠬᠥᠭᠡᠷᠦᠬᠦᠢ ᠳ᠋ᠠ᠂ ᠮᠢᠨᠤ ᠠᠪᠤ᠃ ᠬᠡᠥᠬᠡᠳ ᠤᠨ ᠢᠶᠠᠨ ᠨᠡᠷ᠎ᠡ ᠨᠢᠭᠤᠷ ᠲᠤ ᠪᠦᠦ ᠯᠠ ᠨᠦᠯᠦᠭᠡ ᠪᠣᠯᠣᠶ᠎ᠠ ᠭᠡᠵᠦ ᠪᠣᠳᠣᠳᠠᠭ ᠴᠦ ᠪᠢᠯᠡ ᠦᠦ᠂ ᠰᠤᠷᠭᠠᠭᠤᠯᠢ ᠶᠢᠨ ᠡᠭᠦᠳᠡᠨ ᠭᠡᠷ ᠤᠨ ᠠᠵᠢᠯᠲᠠᠨ ᠠᠪᠤ ᠪᠠᠷ ᠨᠠᠮ᠎ᠠ ᠶᠢ ᠳᠠᠭᠤᠳᠠᠭᠤᠯᠵᠤ ᠬᠦᠨᠡᠰᠦ ᠵᠣᠭᠤᠰ ᠥᠭᠳᠡᠭ  ᠪᠠᠶᠢᠭᠰᠠᠨ ᠃ ᠪᠢ ᠠᠪᠤ ᠪᠠᠨ ᠦᠵᠡᠭᠡᠳ ᠪᠠᠶᠠᠷᠯᠠᠨ᠎ᠠ ᠭᠡᠵᠢ᠂  ᠶᠡᠭᠡ ᠯᠠ ᠬᠤᠯᠠ ᠶᠠᠪᠤᠭᠰᠠᠨ ᠬᠥᠮᠥᠨ ᠰᠢᠭ ᠡᠵᠢ  ᠳᠡᠭᠦᠦ  ᠨᠠᠷ ᠢᠶᠠᠨ ᠠᠰᠠᠭᠤᠳᠠᠭ᠂ ᠲᠡᠭᠡᠭᠡᠳ ᠪᠠᠶᠢᠷᠢ ᠶᠢᠨ ᠭᠡᠷ ᠲᠤ ᠪᠠᠨ ᠶᠠᠪᠤᠬᠤ  ᠦᠶ᠎ᠡ ᠳᠤ ᠰᠠᠯᠵᠤ ᠶᠠᠳᠠᠨ ᠬᠡᠯᠡᠵᠦ ᠭᠠᠷᠤᠰᠢ ᠦᠭᠡᠢ ᠰᠡᠳᠬᠢᠯᠭᠡ ᠤᠷᠭᠤᠨ ᠣᠬᠢᠯᠠᠮᠠᠷ ᠰᠠᠨᠠᠭᠳᠠᠳᠠᠭ᠃ ᠬᠡᠳᠦᠨ ᠬᠠᠮᠲᠤ ᠰᠤᠷᠤᠭᠴᠢ ᠢᠪᠢᠷ ᠰᠢᠪᠢᠷ ᠶᠠᠷᠢᠯᠳᠤᠨ᠂ ᠨᠠᠮ᠎ᠠ ᠶᠢ ᠬᠠᠷᠠᠭᠠᠳ ᠨᠠᠮ ᠵᠢᠮ ᠪᠣᠯᠣᠨ᠎ᠠ᠃ ᠠᠪᠤ ᠶᠢ ᠮᠢᠨᠢ ᠳᠣᠭᠤᠬᠢᠯᠠᠵᠤ ᠪᠠᠶᠢᠭ᠎ᠠ ᠶᠢ ᠪᠢ ᠮᠡᠳᠡᠨ᠎ᠡ᠂ ᠬᠡᠥᠬᠡᠳ ᠪᠣᠯᠬᠤᠷ ᠪᠢ ᠲᠡᠳᠡ ᠨᠠᠷ ᠲᠤ ᠲᠤᠩ ᠭᠤᠮᠣᠳᠠᠨ᠎ᠠ᠃ ᠠᠪᠤ ᠮᠢᠨᠢ ᠠᠯᠵᠠᠭᠤ ᠬᠤᠶᠢᠷᠭᠤ ᠪᠠᠶᠢᠵᠤ ᠤᠯᠤᠰ ᠢᠶᠠᠷ ᠲᠡᠳᠬᠦᠭᠦᠯᠵᠦ ᠠᠮᠢᠳᠤᠷᠠᠭ᠎ᠠ ᠦᠭᠡᠢ᠂ ᠵᠢᠷᠠᠨ ᠭᠷᠠᠳᠦ᠋ᠰ ᠤᠨ ᠰᠫᠢᠷᠲ ᠲᠠᠢ ᠤᠰᠤᠨ ᠳᠤ ᠳᠡᠪᠲᠦᠵᠦ ᠲᠦᠰᠢᠭᠦᠯᠵᠦ ᠶᠠᠪᠤᠭ᠎ᠠ ᠴᠤ ᠦᠭᠡᠢ᠂ ᠠᠵᠢᠯ ᠤᠨ ᠬᠦᠨᠳᠦ ᠳᠤ ᠵᠦᠳᠡᠷᠡᠨ᠂ ᠴᠢᠭᠢᠭ ᠨᠣᠶᠢᠲᠠᠨ ᠳᠤ ᠬᠤᠨᠣᠵᠤ ᠬᠡᠪᠲᠡᠭᠰᠡᠨ ᠢᠶᠠᠷ ᠢᠶᠠᠨ ᠨᠢᠷᠤᠭᠤ ᠨᠢ ᠪᠥᠭᠲᠥᠷ ᠪᠣᠯᠣᠭᠰᠠᠨ ᠬᠥᠮᠥᠨ ᠳ᠋ᠠ᠃ ᠮᠢᠨᠤ ᠠᠪᠤ ᠦᠷ᠎ᠡ ᠳᠤ ᠪᠠᠨ ᠨᠥᠮᠥᠷᠢ ᠪᠣᠯᠳᠠᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠡᠬᠡᠨᠡᠷ ᠲᠤ ᠪᠠᠨ ᠴᠤ ᠦᠮᠦᠭ ᠲᠦᠰᠢᠭ ᠪᠣᠯᠵᠤ ᠶᠠᠪᠤᠭᠰᠠᠨ᠃ ᠡᠵᠢ ᠮᠢᠨᠢ ᠣᠯᠠᠨ ᠡᠪᠡᠳᠳᠡᠭ ᠪᠠᠶᠢᠵᠠᠢ᠂ ᠠᠪ᠊ ᠮᠢᠨᠢ ᠡᠵᠢ ᠶᠢ ᠠᠪᠤᠭᠠᠳ ᠴᠢᠪᠠᠭ᠎ᠠ ᠪᠠᠯᠭᠠᠰᠤ᠂ ᠯᠢᠨᠳᠦ᠋ᠡᠭ᠂ ᠺᠠᠶᠢᠯᠤ ᠭᠡᠳ ᠰᠠᠶᠢᠨ ᠡᠮᠴᠢ ᠬᠠᠮᠢᠭ᠎ᠠ ᠰᠣᠨᠣᠰᠳᠠᠪᠠᠯ ᠲᠡᠨᠳᠡ ᠡᠯᠵᠢᠭᠡᠨ ᠲᠡᠷᠭᠡ ᠪᠠᠷ ᠢᠶᠠᠨ ᠲᠠᠯᠪᠢᠭᠠᠳ ᠬᠦᠷᠳᠡᠭ ᠪᠠᠶᠢᠭᠰᠠᠨ᠃  ︽ᠠᠪᠤ ᠴᠢᠨᠢ ᠪᠠᠶᠢᠭᠰᠠᠨ ᠳᠤ ᠪᠠᠨ ᠪᠢ ᠳᠠᠯᠠ ᠬᠦᠷᠴᠦ ᠪᠠᠶᠢᠭ᠎ᠠ ᠰᠢᠦ︾ ᠭᠡᠵᠦ ᠡᠵᠢ ᠮᠢᠨᠢ ᠪᠠᠶᠠᠷᠯᠠᠵᠤ ᠲᠠᠯᠠᠷᠬᠠᠨ ᠶᠠᠷᠢᠳᠠᠭ ᠰᠠᠨ᠃     ︽ᠰᠡᠳᠬᠢᠯ ᠤᠨ ᠭᠡᠭᠡ ᠲᠠᠢ ᠬᠥᠮᠥᠨ ᠣᠷᠴᠢᠨ ᠲᠣᠭᠤᠷᠢᠨ ᠢᠶᠠᠨ ᠭᠡᠶᠢᠭᠦᠯᠳᠡᠭ ᠶᠤᠮ︾ ᠪᠠᠶᠢᠵᠠᠢ᠃ ᠠᠪᠤ ᠮᠢᠨᠢ ᠠᠶᠢᠯ ᠤᠨ ᠭᠡᠷᠯᠡᠭᠡ ᠦᠭᠡᠢ ᠵᠠᠯᠠᠭᠤᠴᠤᠳ ᠲᠤ ᠤᠷᠤᠭ ᠬᠡᠯᠡᠯᠴᠡᠵᠦ ᠦᠭᠭᠦᠨ᠎ᠡ ᠭᠡᠳ ᠥᠪᠡᠷ ᠢᠶᠠᠨ ᠠᠷᠢᠬᠢ ᠭᠤᠸᠠᠨᠲᠸᠦ ᠳᠡᠭᠦᠵᠢᠯᠡᠭᠡᠳ ᠶᠠᠪᠤᠳᠠᠭ᠂ ᠶᠠᠪᠤᠳᠠᠯ ᠤᠴᠢᠷ ᠨᠢ  ᠪᠦᠲᠦᠴᠢᠬᠡᠪᠡᠯ ᠪᠠᠶᠠᠷᠯᠠᠵᠤ᠂ ᠬᠥᠬᠡ ᠡᠷᠢᠶᠡᠨ ᠬᠤᠸᠠᠷ ᠲᠠᠢ ᠬᠤᠪᠢᠩ ᠢᠶᠠᠷ ᠨᠢᠭᠡ ᠶᠢ ᠪᠠᠯᠭᠤᠴᠢᠬᠠᠳᠠᠭ᠃    — ᠲᠡᠳᠡᠨ ᠤ ᠳᠤ ᠶᠠᠭᠠᠬᠢᠭᠠᠳ ᠪᠤᠳᠠᠭ᠎ᠠ ᠢᠳᠡᠭᠰᠡᠨ ᠦᠭᠡᠢ ᠪᠣᠢ ᠭᠡᠬᠦᠯᠡᠷ ︽ᠬᠥᠮᠥᠨ ᠳᠤ ᠲᠤᠰᠠ ᠬᠢᠪᠡᠯ ᠬᠠᠷᠢᠭᠤ ᠪᠦᠦ ᠬᠦᠰᠡ᠂ ᠰᠠᠶᠢᠨ ᠦᠢᠯᠡ ᠳᠤ ᠰᠠᠶᠢᠨ ᠯᠠᠪ ᠢᠷᠡᠴᠢᠬᠡᠬᠦ ᠶᠤᠮ︾ ᠭᠡᠨ᠎ᠡ᠃ ᠬᠠᠪᠢ ᠲᠥᠰᠥᠷ ᠤᠨ ᠤᠯᠠᠭᠠᠨ ᠴᠠᠭᠠᠨ ᠤ ᠶᠠᠪᠤᠳᠠᠯ ᠳᠤ ᠪᠦᠷ ᠯᠠ ᠭᠦᠶᠦᠳᠡᠭ᠃ ᠲᠡᠶᠢᠮᠦ ᠳᠤ ᠪᠠᠨ ᠪᠢᠵᠡ᠂ ᠪᠠᠷᠤᠭ ᠦᠶᠡᠴᠦᠦᠯ ᠨᠢ ᠬᠦᠷᠲᠡᠯ᠎ᠡ ︽ᠪᠦᠦ ᠠᠪᠤ︾ ᠭᠡᠵᠦ ᠬᠦᠨᠳᠦᠳᠬᠡᠨ ᠳᠠᠭᠤᠳᠠᠳᠠᠭ ᠪᠠᠶᠢᠯ᠎ᠠ᠃     ᠬᠥᠮᠥᠨ ᠬᠡᠷᠪᠡ ᠬᠥᠮᠥᠨ ᠤ ᠨᠢᠯᠪᠤᠰᠤ ᠶᠢ ᠭᠠᠷ ᠢᠶᠠᠷ ᠠᠷᠴᠢᠳᠠᠭ ᠪᠠᠶᠢᠭᠰᠠᠨ ᠪᠣᠯ ᠮᠢᠨᠤ ᠠᠪᠤ ᠦᠭᠡ ᠪᠠᠷ ᠬᠠᠲᠠᠭᠠᠳᠠᠭ᠃ ᠨᠢᠭᠡ ᠤᠳᠠᠭ᠎ᠠ ᠠᠪᠤ ᠠᠮᠤ ᠪᠤᠳᠠᠭᠠᠨ ᠤ ᠦᠷᠲᠡᠭᠡᠨ ᠳᠤ ᠶᠠᠪᠤᠭᠠᠳ ᠢᠷᠡᠬᠦ ᠳᠤ ᠭᠡᠵᠢᠭᠡ ᠤᠶᠠᠬᠤ ᠲᠣᠷᠭ᠎ᠠ ᠡᠰᠡᠭᠦᠯ᠎ᠡ ᠪᠣᠷᠣ ᠴᠠᠭᠠᠰᠤᠨ ᠪᠠᠭᠯᠠᠭ᠎ᠠ ᠲᠠᠢ ᠪᠣᠣᠪᠤ ᠠᠪᠴᠢᠷᠠᠵᠤ ᠥᠭᠭᠦᠨ᠎ᠡ ᠭᠡᠳ ᠰᠠᠨᠠᠳᠠᠭ ᠤᠨ ᠬᠢ ᠴᠤ ᠶᠤᠮ ᠤᠤ᠂ ᠥᠭᠡᠳᠡ ᠠᠴᠠ ᠨᠢ ᠭᠦᠶᠦᠭᠡᠳ ᠬᠥᠯ ᠤᠨ ᠬᠤᠷᠤᠭᠤ ᠪᠠᠨ ᠰᠢᠷᠬᠠᠲᠤᠭᠤᠯᠵᠤ ᠡᠭᠡᠭ ᠳᠠᠭᠤ ᠲᠠᠯᠪᠢᠵᠠᠢ᠃ ᠠᠪᠤ ᠨᠠᠮ᠎ᠠ ᠶᠢ ᠲᠡᠪᠡᠷᠢᠵᠦ ᠠᠪᠤᠭᠰᠠᠨ ᠦᠭᠡᠢ ᠵᠦᠭᠡᠷ ᠯᠠ ᠢᠨᠢᠶᠡᠮᠰᠦᠭᠯᠡᠵᠦ ︽ᠤᠬᠠᠭᠠᠨ ᠲᠠᠢ ᠬᠡᠥᠬᠡᠳ ᠣᠬᠢᠯᠠᠳᠠᠭ ᠦᠭᠡᠢ︾ ᠭᠡᠰᠡᠨ᠃ ᠪᠢ ᠦᠨᠡᠨ ᠤᠬᠠᠭᠠᠨ ᠲᠠᠢ ᠬᠥᠮᠥᠨ ᠪᠣᠯᠣᠶ᠎ᠠ ᠭᠡᠰᠡᠨ ᠪᠢᠵᠡ᠂ ᠣᠬᠢᠯᠠᠬᠤ ᠪᠠᠨ ᠪᠣᠯᠢᠪᠠ᠃ ᠲᠡᠷᠡ ᠨᠢᠭᠡ ᠤᠳᠠᠭ᠎ᠠ ᠶᠢᠨ ᠠᠪᠤ ᠶᠢᠨ ᠦᠭᠡ ᠨᠠᠳᠠ ᠳᠤ ᠨᠠᠰᠤᠨ ᠲᠤᠷᠰᠢ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠬᠢᠴᠢᠶᠡᠯ ᠪᠣᠯᠵᠠᠢ᠃ ᠠᠶᠢᠯ ᠤᠨ ᠡᠵᠡᠭᠳᠡᠢ ᠪᠣᠯᠵᠤ ᠠᠮᠢᠳᠤᠷᠠᠯ ᠤᠨ ᠨᠤᠭᠤᠴᠠᠭᠠᠨ ᠢ ᠦᠩᠭᠡᠷᠡᠭᠦᠯᠬᠦ ᠳᠤ ᠪᠠᠨ ᠨᠡᠭᠡᠷᠡᠨ ᠣᠬᠢᠯᠠᠭᠰᠠᠨ ᠦᠭᠡᠢ᠂ ᠳᠣᠭᠳᠣᠯᠬᠤ ᠳᠤ ᠪᠠᠨ ᠬᠠᠷᠢᠨ ᠶᠡᠭᠡ ᠣᠬᠢᠯᠠᠭᠰᠠᠨ ᠂ ᠲᠡᠷᠡ ᠨᠢ ᠪᠠᠰᠠ ᠯᠡ ᠠᠪᠤ ᠳᠤ ᠪᠠᠨ ᠡᠷᠬᠡᠯᠡᠵᠦ ᠣᠬᠢᠯᠠᠵᠤ ᠥᠭᠭᠦᠭᠰᠡᠨ ᠬᠡᠷᠡᠭ ᠶᠤᠮ᠃ ᠪᠢ ᠬᠤᠶᠠᠳᠤᠭᠠᠷ ᠬᠦᠪᠡᠭᠦᠨ ᠢᠶᠠᠨ ᠬᠦᠩᠭᠡᠵᠢᠭᠡᠳ ᠰᠠᠷ᠎ᠠ ᠳᠤ ᠪᠠᠶᠢᠭᠰᠠᠨ ᠦᠶ᠎ᠡ  ᠳᠤ ᠪᠢᠯᠡ᠃ ᠲᠡᠷᠡ ᠡᠪᠦᠯ ᠤᠨ ᠬᠦᠢᠲᠡᠨ ᠭᠡᠳᠡᠭ ᠨᠢ᠃ ᠠᠪᠤ ᠮᠢᠨᠢ ᠡᠵᠢ ᠶᠢᠨ ᠣᠶᠣᠭᠰᠠᠨ ᠬᠡᠥᠬᠡᠳ ᠤᠨ ᠬᠦᠪᠦᠩ ᠣᠯᠣᠩᠳᠠᠢ ᠦᠮᠦᠳᠦ᠂  ᠨᠠᠳᠠ ᠳᠤ ᠪᠠᠰᠠ ᠬᠥᠪᠥᠩ ᠱᠠᠬᠠᠢ ᠡᠭᠦᠷᠴᠦ ᠳᠡᠭᠦᠷᠦᠭᠡᠳ ᠢᠷᠡᠵᠡᠢ᠃ ᠪᠢ ᠠᠪᠤ ᠪᠠᠨ ᠦᠵᠡᠭᠡᠳ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠤᠷᠤᠰᠬᠠᠯ᠎ᠠ᠃ ᠪᠣᠰᠤᠭ᠎ᠠ ᠪᠦᠳᠦᠭᠦᠨ ᠬᠥᠮᠥᠨ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠲᠠᠯ᠎ᠠ ᠪᠣᠰᠣᠳ ᠤᠨ ᠭᠡᠷ ᠤᠨ ᠠᠵᠢᠯ ᠮᠣᠳᠣ ᠶᠢ ᠬᠢᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠬᠠᠶᠠᠭᠠᠳ ᠡᠨᠡ ᠬᠦᠢᠲᠡᠨ ᠳᠤ ᠡᠷᠭᠢᠵᠦ ᠪᠣᠯᠭᠤᠭᠠᠵᠤ ᠦᠵᠡᠳᠡᠭ ᠨᠢ᠃     — ᠪᠢᠲᠡᠬᠡᠢ ᠣᠬᠢᠯᠠ᠂ ᠰᠠᠷ᠎ᠠ ᠳᠤ ᠰᠠᠭᠤᠭ᠎ᠠ ᠬᠥᠮᠥᠨ ᠣᠬᠢᠯᠠᠳᠠᠭ ᠦᠭᠡᠢ ᠭᠡᠨ᠎ᠡ᠃     ᠰᠠᠷ᠎ᠠ ᠵᠢᠯ ᠢᠶᠠᠷ ᠣᠬᠢᠯᠠᠭᠠᠳ ᠴᠤ ᠠᠪᠤ ᠶᠢᠨ ᠢᠶᠠᠨ ᠰᠠᠬᠠᠯ ᠨᠢ ᠬᠦᠷᠲᠡᠯ᠎ᠡ ᠴᠠᠩᠲᠤᠭᠠᠳ ᠢᠷᠡᠭᠰᠡᠨ ᠰᠡᠳᠬᠢᠯ ᠢ ᠬᠡᠷᠬᠢᠨ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠠᠵᠢ᠃ ᠠᠪᠤ ᠶᠢᠨ ᠢᠶᠠᠨ ᠠᠴᠢ ᠶᠢ ᠵᠠᠪᠠᠯ  ᠬᠠᠷᠢᠭᠤᠯᠠᠬᠤ ᠶᠤᠮᠰᠠᠨ᠂ ᠬᠠᠷᠢᠭᠠᠳ ᠬᠠᠷᠢᠭᠠᠳ ᠣᠴᠢᠶ᠎ᠠ᠂ ᠬᠤᠭᠤᠯᠠᠨ ᠤ ᠳᠡᠭᠡᠵᠢ ᠪᠠᠨ ᠪᠠᠷᠢᠶ᠎ᠠ᠂ ᠡᠷᠭᠢᠭᠡᠳ ᠡᠷᠭᠢᠭᠡᠳ ᠬᠦᠷᠦᠶ᠎ᠡ᠂ ᠦᠩᠰᠢᠭᠰᠡᠨ ᠬᠤᠪᠴᠠᠰᠤ ᠶᠢ ᠨᠢ ᠤᠭᠢᠶᠠᠶ᠎ᠠ ᠭᠡᠵᠦ ᠰᠡᠮ ᠪᠣᠳᠣᠭᠰᠠᠨ᠃ ᠭᠡᠲᠡᠯ᠎ᠡ ᠪᠢ ︽ᠰᠠᠶᠢᠨ ᠶᠠᠭᠤᠮ᠎ᠠ ᠰᠠᠨᠠᠭ᠎ᠠ ᠪᠠᠷ ᠦᠭᠡᠢ ︾ ᠭᠡᠳᠡᠭᠴᠢᠯᠡᠨ ᠠᠮᠢᠳᠤᠷᠠᠯ ᠰᠠᠶᠢᠵᠢᠷᠠᠭᠠᠳ᠂ ᠠᠵᠤ ᠠᠬᠤᠢ ᠵᠦᠭᠡᠷ ᠪᠣᠯᠬᠤ ᠦᠶ᠎ᠡ ᠳᠤ ᠲᠦᠷᠬᠦᠮᠯᠡᠬᠦ ᠴᠢᠮᠡᠭᠡᠨ ᠤ ᠵᠠᠬᠢᠳᠠᠯ ᠢ ᠣᠯᠣᠮᠠᠭᠴᠠ ᠠᠪᠤ ᠮᠢᠨᠢ ᠬᠥᠯ ᠨᠢ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠪᠠᠶᠠᠷᠯᠠᠵᠤ᠂ ᠡᠵᠢ ᠪᠠᠷ ᠮᠢᠨᠤ ᠳᠤᠷᠠᠲᠠᠢ ᠭᠤᠯᠢᠷ ᠪᠤᠳᠠᠭ᠎ᠠ ᠶᠢ ᠪᠠᠵᠠᠭᠠᠯᠭᠠᠵᠤ᠂ ᠶᠡᠭᠡ ᠬᠠᠭᠠᠯᠭ᠎ᠠ ᠶᠢᠨ ᠵᠡᠭᠦᠨ ᠲᠠᠯ᠎ᠠ ᠳᠤ ᠪᠠᠷᠠᠭᠤᠨᠰᠢ ᠪᠠᠨ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠶᠠᠩᠵᠤ ᠪᠠᠷ ᠢᠶᠠᠨ ᠦᠨᠢᠳᠡ ᠶᠢᠨ ᠠᠮᠠᠷᠠᠯᠲᠠ ᠪᠠᠨ ᠠᠪᠴᠢᠬᠠᠯ᠎ᠠ᠃    ︽ᠠᠪᠤ ᠡ︾ ᠭᠡᠵᠦ ᠳᠡᠭᠡᠭᠰᠢ ᠬᠠᠷᠠᠭᠠᠳ ᠬᠠᠰᠬᠢᠷᠤᠭᠰᠠᠨ ᠳᠤ ᠲᠡᠭᠷᠢ ᠳᠤᠪ ᠳᠤᠭᠤᠢ᠂ ᠳᠤᠰᠤᠯᠠᠨ ᠰᠢᠩᠭᠡᠬᠦ ᠨᠢᠯᠪᠤᠰᠤᠨ ᠳᠤ ᠭᠠᠵᠠᠷ ᠳᠤᠪ ᠳᠤᠭᠤᠢ ᠡ᠃ ᠮᠠᠰᠢᠨ ᠲᠧᠭᠨᠢᠭ ᠬᠦᠭᠵᠢᠭᠡ ᠦᠭᠡᠢ ᠲᠡᠷᠡ ᠦᠶ᠎ᠡ ᠳᠤ ᠮᠠᠯ ᠲᠠᠷᠢᠶᠠᠨ ᠳᠤ ᠪᠠᠨ ᠶᠠᠭᠠᠷᠠᠵᠤ ᠵᠦᠳᠡᠷᠡᠭᠰᠡᠨ ᠨᠠᠷᠠᠨ ᠤ ᠬᠦᠯᠦᠰᠦ ᠲᠠᠢ ᠠᠤᠭ᠎ᠠ ᠬᠥᠮᠥᠨ᠃ ᠠᠪᠤ ᠲᠠᠢ ᠪᠠᠨ ᠪᠠᠶᠢᠬᠤ ᠳᠤ ᠨᠠᠷᠠ ᠪᠠᠷ ᠳᠤᠲᠠᠬᠤ ᠦᠭᠡᠢ᠂ ᠬᠤᠷ᠎ᠠ ᠪᠠᠷ ᠬᠤᠮᠰᠠᠳᠠᠬᠤ ᠦᠭᠡᠢ ᠵᠤᠨ ᠤ ᠦᠵᠡᠰᠭᠦᠯᠡᠩ ᠪᠠᠶᠢᠵᠤ ᠰᠢᠦ᠃  ᠲᠡᠷᠡ ᠬᠦ ᠰᠢᠵᠢᠷ ᠠᠯᠲᠠ ᠠᠴᠠ ᠦᠨᠡᠲᠡᠢ ᠨᠠᠨᠳᠢᠨ ᠰᠠᠶᠢᠬᠠᠨ ᠴᠠᠭ ᠮᠦᠴᠡ ᠶᠢ ᠨᠠᠷᠢᠯᠢᠭ ᠵᠢᠷᠤᠬᠤ ᠳᠤ ᠪᠣᠳᠤᠭ ᠳᠤᠲᠠᠨ᠎ᠠ᠂ ᠨᠢᠮᠪᠠᠢ ᠪᠢᠴᠢᠬᠦ ᠳᠤ ᠴᠠᠭᠠᠰᠤ ᠳᠤᠲᠠᠨ᠎ᠠ᠃ ᠬᠤᠷᠤᠭᠤ ᠬᠢᠷᠢᠲᠡᠢ ᠭᠡᠵᠦ ᠡᠮᠵᠢᠯ ᠦᠭᠡᠢ ᠬᠠᠭᠤᠳᠠᠰᠤ ᠠᠷᠪᠢᠨ ᠬᠤᠭᠤᠴᠠᠭ᠎ᠠ ᠭᠡᠵᠦ ᠲᠣᠭᠲᠠᠭᠠᠯ ᠦᠭᠡᠢ ᠦᠷᠬᠦᠯᠵᠢᠯᠡᠯ᠂ ᠮᠢᠨᠤ ᠵᠢᠷᠦᠬᠡᠨ ᠤ ᠲᠣᠪᠴᠢᠶᠠᠨ—  ᠠᠪᠤ ᠮᠢᠨᠢ︕ 
 
ᠢᠷᠡᠯᠲᠡ᠄ ᠦᠪᠤᠷ ᠮᠤᠩᠭᠤᠯ ᠤᠨ ︽ᠨᠡᠶᠢᠬᠡᠮ︾ ᠰᠡᠳᠬᠦᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
 
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号