10 ᠳ᠋ᠤᠭᠠᠷ ᠰᠠᠷᠠᠶᠢᠨ 22ᠤᠨ ᠣᠷᠣᠢ᠂ ᠪᠤᠭᠤᠲᠤ ᠬᠤᠳᠠᠶᠢᠨ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠣᠯᠪᠣᠭᠠᠲᠤ ᠬᠣᠰᠢᠭᠤᠨᠤ ᠨᠠᠮᠤᠨ ᠬᠣᠷᠢᠶᠠᠶᠢᠨ ᠨᠢᠭᠡᠳᠦᠮᠡᠯ ᠹᠷᠣᠨᠲᠤᠨ ᠬᠡᠯᠲᠡᠰᠡᠴᠡ ᠲᠦᠷᠦᠭᠦᠯᠡᠨ ᠵᠣᠬᠢᠶᠠᠭᠰᠠᠨ ᠲᠣᠮᠣ᠌ ᠬᠡᠯᠪᠡᠷᠢᠶᠢᠨ ᠳᠠᠭᠤᠤ ᠪᠥᠵᠢᠭ ᠰᠢᠯᠦᠭᠯᠡᠯᠲᠦ ᠵᠦᠴᠦᠭᠡ 《ᠤᠭᠰᠠᠭᠠ ᠨᠢᠭᠡᠲᠡᠨ》ᠢ ᠪᠤᠭᠤᠲᠤ ᠬᠣᠲᠠᠶᠢᠨ ᠵᠦᠴᠦᠭᠡᠶᠢᠨ ᠲᠢᠶᠠᠲᠷᠲᠤ ᠠᠩᠬᠠ ᠲᠣᠭᠯᠠᠪᠠ᠃ ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠣᠯᠪᠣᠭᠠᠲᠤ ᠬᠣᠰᠢᠭᠤᠨᠤ ᠲᠡᠦᠬᠡ ᠰᠣᠶᠣᠯ ᠪᠠ ᠦᠨᠳᠦᠰᠦᠲᠡᠨᠦ ᠪᠦᠯᠬᠦᠮᠳᠡᠯᠦᠨ ᠦᠯᠢᠭᠡᠷᠢᠶᠡᠷ ᠰᠡᠳᠦᠪᠯᠡᠭᠰᠡᠨ ᠲᠣᠰ ᠪᠦᠲᠦᠭᠡᠯ ᠨᠢ ᠤᠶᠤᠨ ᠰᠠᠨᠠᠭᠠᠨᠤ ᠤᠯᠠᠮᠵᠢᠯᠠᠯᠢ ᠨᠠᠷᠢᠯᠢᠭ᠋ ᠢᠯᠡᠷᠡᠭᠦᠯᠬᠦᠪᠡᠷ ᠳᠠᠮᠵᠢᠭᠤᠯᠵᠤ᠂ ᠦᠵᠡᠭᠴᠢᠳᠢ ᠴᠠᠭ ᠣᠷᠣᠨ ᠵᠠᠢ ᠳᠠᠪᠠᠭᠤᠯᠤᠨ ᠰᠣᠶᠣᠯᠤᠨ ᠤᠭ ᠦᠨᠳᠦᠰᠦᠪᠠᠨ ᠬᠠᠢᠨ ᠮᠥᠷᠳᠡᠬᠦ ᠠᠶᠠᠨᠳᠤ ᠮᠣᠷᠳᠠᠭᠤᠯᠪᠠ᠃
ᠵᠦᠴᠦᠭᠡ 《ᠤᠭᠰᠠᠭᠠ ᠨᠢᠭᠡᠲᠡᠨ》ᠳᠦ ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠣᠯᠪᠣᠭᠠᠲᠤ ᠬᠣᠰᠢᠭᠤᠨᠤ ᠣᠨᠴᠠᠯᠢᠭᠢ ᠠᠭᠤᠰᠬᠠᠭᠰᠠᠨ ᠳᠤᠮᠳᠠᠳᠤᠶᠢᠨ ᠰᠣᠶᠣᠯᠤᠨ ᠲᠡᠮᠳᠡᠭ ᠪᠠ ᠳᠦᠷᠢ ᠲᠥᠷᠬᠦᠶᠢ ᠠᠮᠵᠢᠯᠲᠠᠲᠠᠢ ᠪᠦᠲᠦᠭᠡᠪᠡ᠃ ᠡᠷᠲᠡᠨᠦ ᠣᠷᠳᠣ᠌ ᠴᠠᠭᠠᠨ ᠬᠡᠷᠡᠮ ᠨᠢ ᠳᠤᠮᠳᠠᠳᠤᠶᠢᠨ ᠦᠨᠳᠦᠰᠦᠲᠡᠨᠦ ᠰᠣᠯᠢᠯᠴᠠᠭᠠ ᠠᠭᠤᠰᠤᠯᠴᠠᠯᠤᠨ ᠭᠡᠷᠡᠴᠢᠯᠡᠯ᠂ ᠣᠯᠠᠨ ᠰᠦᠮᠡ ᠡᠷᠲᠡᠨᠦ ᠬᠣᠲᠠ ᠨᠢ ᠣᠯᠠᠨ ᠡᠰᠢᠲᠦ ᠰᠣᠶᠣᠯ ᠰᠣᠯᠪᠢᠴᠠᠯᠤᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠣᠨᠠ᠂ 《 ᠤᠯᠤᠰᠤᠨ ᠬᠡᠦᠬᠡᠳ 》 ᠨᠢ ᠬᠠᠷᠢᠨ ᠲᠡᠦᠬᠡᠶᠢ ᠪᠡᠶᠡᠪᠡᠷᠢᠶᠡᠨ ᠥᠩᠭᠡᠷᠡᠭᠦᠯᠦᠭᠴᠢ ᠪᠣᠯᠬᠤ ᠮᠥᠷᠲᠡᠭᠡᠨ ᠥᠨᠥᠳᠥᠷᠲᠠᠬᠢ ᠵᠠᠯᠭᠠᠮᠵᠢᠯᠠᠭ᠍ᠴᠢ ᠪᠣᠯᠬᠤ ᠶᠤᠮ᠃ ᠲᠡᠳᠡᠨᠦ ᠦᠯᠢᠬᠡᠷ ᠨᠢ 《ᠳᠤᠮᠳᠠᠳᠤᠶᠢᠨ ᠦᠨᠳᠦᠰᠦᠲᠡᠨᠦ ᠬᠠᠮᠲᠤᠶᠢᠨ ᠴᠣᠭᠴᠠᠶᠢᠨ ᠤᠬᠠᠮᠰᠠᠷᠢ ᠪᠠᠲᠤ ᠴᠣᠭᠴᠠᠯᠠᠬᠤ》ᠶ᠋ᠢ ᠤᠬᠠᠭᠳᠠᠬᠤᠨᠠᠴᠠ ᠪᠣᠳᠠᠲᠠᠢ ᠬᠠᠢᠷᠠ ᠰᠡᠳᠬᠢᠯᠭᠡ ᠪᠣᠯᠭᠠᠨ ᠤᠯᠠᠷᠢᠭᠤᠯᠵᠤ᠂ 《ᠤᠭᠰᠠᠭᠠ ᠨᠢᠭᠡᠲᠡᠨ》ᠢ ᠰᠢᠯᠦᠭᠯᠢᠭ ᠵᠦᠢᠷᠯᠡᠯᠡᠴᠡ ᠪᠣᠳᠠᠲᠤ ᠵᠢᠷᠤᠭᠯᠠᠯ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃
ᠣᠢᠯᠠᠭᠠᠭᠰᠠᠨᠢᠶᠠᠷ᠂ 《ᠤᠭᠰᠠᠭᠠ ᠨᠢᠭᠡᠲᠡᠨ》 ᠵᠦᠴᠦᠭᠡᠶᠢᠨ ᠲᠣᠭᠯᠠᠭ᠍ᠴᠢᠳ ᠠᠵᠢᠯᠴᠢᠳ ᠨᠢ ᠴᠥᠮ ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠣᠯᠪᠣᠭᠠᠲᠤ ᠬᠣᠰᠢᠭᠤᠨᠳᠤ ᠨᠤᠲᠤᠭ ᠲᠠᠢ ᠬᠥᠮᠥᠰ ᠪᠣᠯᠣᠨᠠ᠂ 70 ᠭᠠᠷᠤᠢ ᠲᠣᠭᠯᠠᠭ᠍ᠴᠢᠳᠤᠨ ᠳᠣᠲᠣᠷᠠ ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠣᠯᠪᠣᠭᠠᠲᠤ ᠬᠣᠰᠢᠭᠤᠨᠤ ᠤᠯᠠᠭᠠᠨᠮᠥ᠋ᠴᠢᠷᠤᠨ ᠲᠣᠭᠯᠠᠭ᠍ᠴᠢ᠂ ᠳᠠᠶᠠᠩ ᠨᠠᠢᠷᠠᠯ ᠳᠠᠭᠤᠤᠶᠢᠨ ᠪᠦᠯᠬᠦᠮᠦᠨ ᠲᠣᠭᠯᠠᠭ᠍ᠴᠢ ᠪᠠᠢᠬᠤᠪᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠠᠵᠢᠯᠠᠴᠠᠪᠠᠨ ᠪᠠᠭᠤᠵᠤ ᠠᠮᠠᠷᠠᠭᠰᠠᠨ ᠨᠠᠮᠤᠨ ᠭᠡᠰᠢᠭᠦᠨ ᠺᠠᠳ᠋ᠷ ᠵᠢᠴᠢ ᠦᠨᠳᠦᠰᠦᠨ ᠱᠠᠲᠤᠨᠤ ᠣᠯᠠᠨ ᠲᠦᠮᠡᠨ ᠪᠠᠢᠵᠤ᠂ ᠬᠣᠷᠢᠭᠠᠳ ᠨᠠᠰᠤᠨᠤ ᠵᠠᠯᠠᠭᠤᠴᠤᠳᠠᠴᠠ ᠳᠠᠯᠠ ᠭᠠᠷᠤᠭᠰᠠᠨ ᠨᠠᠰᠤᠲᠠᠢᠴᠤᠳ ᠴᠤ᠌ ᠪᠣᠢ᠃ ᠠᠳᠠᠯᠢ ᠪᠤᠰᠤ ᠬᠦᠷᠢᠶᠡᠨᠡᠴᠡ ᠢᠷᠡᠭᠰᠡᠨ ᠡᠳᠡᠭᠡᠷ ᠲᠣᠭᠯᠠᠭ᠍ᠴᠢᠳ ᠨᠠᠮᠤᠨ ᠪᠠᠢᠭᠤᠯᠤᠯᠲᠠᠶᠢᠨ ᠳᠠᠭᠠᠭᠤᠯᠭᠠᠪᠠᠷ ᠪᠦᠲᠦᠭᠡᠯᠴᠢ ᠴᠢᠳᠠᠪᠤᠷᠢᠲᠠᠢ ᠤᠷᠠᠯᠢᠭ᠋ᠤᠨ ᠬᠠᠮᠲᠤ ᠨᠡᠢ᠍ᠢᠳᠡ ᠪᠣᠯᠣᠨ ᠨᠢᠭ᠍ᠲᠠᠷᠠᠪᠠ᠃
