ᠨᠠᠰᠤᠲᠠᠨ ᠭᠠᠳᠠᠭ᠍ᠰᠢ ᠭᠠᠷᠴᠤ ᠶᠠᠪᠤᠵᠤ ᠰᠠᠭᠤᠬᠤᠳᠤ ᠳᠥᠭᠥᠮ ᠦᠭᠡᠢ ᠪᠣᠯ ᠦᠷᠡ ᠬᠡᠦᠬᠡᠳ ᠨᠢ ᠬᠡᠷᠬᠢᠨ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠢ ᠬᠡᠷᠡᠭᠯᠡᠨ ᠲᠡᠳᠡᠨᠳᠦ ᠡᠮᠦᠨ ᠵᠣᠷ ᠪᠢᠴᠢᠭᠦᠯᠬᠦ ᠪᠣᠢ？ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠳᠠᠬᠢ ᠮᠥᠩᠭᠥᠪᠡᠨ ᠨᠠᠰᠤᠲᠠᠨᠳᠤᠪᠠᠨ ᠬᠡᠷᠡᠭᠯᠡᠭᠦᠯᠵᠦ ᠪᠣᠯᠣᠨᠠ ᠤᠤ？ ᠣᠢᠷᠠᠳᠤ ᠤᠯᠤᠰᠤᠨ ᠡᠮᠴᠢᠯᠡᠭᠡᠨᠦ ᠪᠠᠲᠤᠯᠠᠭᠠᠶᠢᠨ ᠲᠣᠪᠴᠢᠶᠠ ᠬᠠᠷᠢᠭᠤᠯᠲᠠ ᠥᠭᠪᠡ᠃
ᠬᠠᠷᠢᠭᠤᠯᠤᠭᠰᠠᠨᠢ ᠦᠨᠳᠦᠰᠦᠯᠡᠪᠡᠯ᠂ ᠨᠠᠰᠤᠲᠠᠨ ᠬᠥᠳᠡᠯᠵᠦ ᠪᠠᠷᠢᠬᠤ ᠨᠢ ᠳᠥᠭᠥᠮ ᠦᠭᠡᠢ ᠵᠡᠷᠭᠡ ᠣᠨᠴᠠᠭᠠᠶ ᠪᠠᠢᠳᠠᠯᠳᠤ᠂ ᠦᠷᠡ ᠬᠡᠦᠬᠡᠳ ᠨᠢ ᠲᠡᠳᠡᠨᠢ ᠣᠷᠣᠯᠠᠨ ᠡᠮ ᠬᠤᠳᠠᠯᠳᠤᠨ ᠠᠪᠴᠤ ᠥᠭᠴᠦ ᠪᠣᠯᠣᠨᠠ᠃ ᠬᠡᠷᠪᠡ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠡᠯᠧᠺᠲᠷᠣᠨ ᠢ ᠬᠡᠷᠡᠭᠯᠡᠬᠦᠳᠦ ᠬᠦᠷᠪᠡᠯ᠂ 《ᠰᠠᠳᠤᠨ ᠲᠥᠷᠥᠯᠦᠨ ᠳᠠᠩᠰᠠᠨ ᠡᠷᠦᠬᠡ》ᠪᠡᠷ ᠨᠠᠰᠤᠲᠠᠨᠤ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠢ ᠬᠣᠯᠪᠣᠭᠠᠳ ᠡᠮᠨᠡᠯᠭᠡᠳᠦ ᠳ᠋ᠤᠭᠠᠷ ᠠᠪᠬᠤ ᠦᠶᠡᠳᠦᠪᠠᠨ ᠨᠠᠰᠤᠲᠠᠨᠤ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠢ ᠭᠠᠷᠭᠠᠵᠤ ᠦᠵᠡᠭᠦᠯᠪᠡᠯ ᠪᠣᠯᠴᠢᠬᠠᠨᠠ᠃ ᠬᠡᠷᠪᠡ ᠺᠠᠷᠲᠢ ᠨᠢ ᠬᠡᠷᠡᠭᠯᠡᠬᠦᠳᠦ ᠭᠦᠷᠪᠡᠯ᠂ ᠨᠠᠰᠤᠲᠠᠨᠤ ᠨᠡᠢᠭᠡᠮᠦᠨ ᠳᠠᠭᠠᠳᠬᠠᠯᠤᠨ ᠺᠠᠷᠲᠢ ᠠᠪᠴᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ᠂ ᠨᠠᠰᠤᠲᠠᠨᠤ ᠨᠡᠷᠡᠪᠡᠷ ᠳ᠋ᠤᠭᠠᠷ ᠠᠪᠬᠤᠶᠢᠨ ᠬᠠᠮᠲᠤ ᠥᠪᠡᠷᠦᠨ ᠪᠡᠶᠡᠶᠢᠨ ᠦᠨᠡᠮᠯᠡᠯ᠂ ᠨᠡᠢᠭᠡᠮᠦᠨ ᠳᠠᠭᠠᠳᠬᠠᠯᠤᠨ ᠺᠠᠷᠲ ᠵᠡᠷᠭᠡ ᠪᠡᠶᠡᠶᠢᠨ ᠦᠨᠡᠮᠯᠡᠯᠦᠨ ᠮᠠᠲᠧᠷᠢᠶᠠᠯᠢᠶᠠᠨ ᠠᠪᠴᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃
ᠣᠳᠣᠬᠠᠨᠳᠤ᠂ ᠠᠵᠢᠯᠲᠠᠨ ᠠᠵᠢᠯᠴᠢᠨ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠬᠤᠪᠢ ᠬᠥᠮᠥᠨᠦ ᠲᠠᠩᠰᠠᠨ ᠡᠷᠦᠬᠡᠳᠡᠬᠢ ᠦᠯᠡᠳᠡᠪᠦᠷᠢ ᠮᠥᠩᠭᠥᠪᠠᠨ ᠭᠡᠷ ᠪᠦᠯᠢᠶᠢᠨ ᠲᠤᠰᠠᠯᠠᠯᠴᠠᠭᠠᠶᠢᠨ ᠠᠷᠭᠠ ᠪᠠᠷ ᠭᠡᠷᠦᠨ ᠬᠥᠮᠥᠰᠲᠤᠪᠠᠨ ᠬᠡᠷᠡᠭᠯᠡᠭᠦᠯᠵᠦ ᠪᠣᠯᠣᠨᠠ᠃ ᠭᠡᠬᠦᠳᠦᠪᠡᠨ ᠠᠩᠬᠠᠷᠤᠭᠤᠰᠢᠲᠠᠢ ᠨᠢ᠂ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠮᠥᠩᠭᠥᠶᠢ ᠬᠠᠮᠲᠤᠪᠠᠷ ᠬᠡᠷᠡᠭᠯᠡᠵᠦ ᠪᠣᠯᠣᠨᠠ᠂ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ （ᠺᠠᠷᠲ）ᠢ ᠬᠠᠮᠲᠤᠪᠠᠷ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠶᠠᠮᠠᠷᠪᠠ ᠪᠠᠢᠳᠠᠯᠳᠤ ᠴᠤ᠌ ᠭᠡᠰᠡᠨ᠂ ᠡᠮᠴᠢᠯᠡᠭᠦᠯᠵᠦ ᠡᠮ ᠬᠤᠳᠠᠯᠳᠤᠨ ᠠᠪᠬᠤᠳᠤᠪᠠᠨ ᠡᠷᠬᠡᠪᠰᠢ ᠡᠪᠡᠳᠴᠢᠲᠡᠨ ᠲᠣᠰ ᠬᠥᠮᠥᠨᠦ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠪᠤᠶᠤ ᠨᠡᠢᠭᠡᠮᠦᠨ ᠳᠠᠭᠠᠳᠬᠠᠯᠤᠨ ᠺᠠᠷᠲᠢ ᠬᠡᠷᠡᠭᠯᠡᠵᠦ᠂ ᠲᠣᠭᠲᠠᠭᠠᠯ ᠶᠣᠰᠣᠭᠠᠷ ᠲᠤᠬᠠᠢᠶᠢᠨ ᠬᠥᠮᠥᠨᠦ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠤᠨ ᠬᠠᠷᠠᠭᠠᠯᠵᠠᠯᠢ ᠭᠥᠷᠳᠡᠬᠦ ᠬᠡᠷᠡᠭᠲᠡᠢ᠃
ᠤᠯᠤᠰᠤᠨ ᠡᠮᠴᠢᠯᠡᠭᠡᠨᠦ ᠪᠠᠲᠤᠯᠠᠭᠠᠶᠢᠨ ᠲᠣᠪᠴᠢᠶᠠᠶᠢᠨ ᠰᠠᠨᠠᠭᠤᠯᠤᠭᠰᠠᠨᠢᠶᠠᠷ᠂ ᠥᠪᠡᠷᠦᠨᠢᠶᠡᠨ ᠡᠮᠴᠢᠯᠡᠭᠡᠨᠦ ᠳᠠᠭᠠᠳᠬᠠᠯᠢ ᠬᠡᠷᠡᠭᠯᠡᠬᠦ ᠦᠭᠡᠢᠪᠡᠷ ᠳ᠋ᠤᠭᠠᠷ ᠠᠪᠴᠤ ᠡᠮᠴᠢᠯᠡᠭᠦᠯᠬᠦ ᠪᠤᠶᠤ ᠡᠮ ᠬᠤᠳᠠᠯᠳᠤᠨ ᠠᠪᠬᠤ ᠪᠣᠯ 《 ᠪᠤᠰᠤᠳᠤᠨ ᠨᠡᠷᠡᠪᠡᠷ ᠡᠮᠴᠢᠯᠡᠭᠦᠯᠵᠦ 》 ᠪᠠᠢᠬᠤ ᠶᠠᠪᠤᠳᠠᠯ ᠮᠥᠨ᠂ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠬᠠᠤᠯᠢ ᠴᠠᠭᠠᠵᠠᠶᠢᠨ ᠲᠣᠭᠲᠠᠭᠠᠯ ᠶᠣᠰᠣᠭᠠᠷ ᠪᠣᠯ᠂ ᠬᠥᠩᠭᠡᠨ ᠪᠣᠯ ᠲᠤᠬᠠᠢᠶᠢᠨ ᠬᠥᠮᠥᠨᠦ ᠡᠮᠴᠢᠯᠡᠭᠡᠨᠦ ᠵᠠᠷᠤᠳᠠᠯᠢ ᠰᠦᠯᠵᠢᠶᠡᠨᠳᠦ ᠬᠣᠯᠪᠣᠨ ᠲᠡᠰᠦᠯᠦᠨ ᠪᠤᠳᠤᠬᠤᠶᠢ ᠲᠦᠷ ᠵᠣᠭᠰᠣᠭᠠᠵᠤ᠂ ᠬᠦᠨᠳᠦ ᠪᠣᠯ ᠬᠠᠤᠯᠢᠶᠢ ᠵᠥᠷᠢᠴᠡᠭᠰᠡᠨ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠪᠣᠯᠣᠨᠠ᠃
