ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠠᠮᠢ ᠠᠬᠤᠢ ᠪᠠ ᠪᠡᠯᠴᠢᠭᠡᠷ ᠨᠤᠲᠤᠭ ᠶᠢ ᠳᠠᠨᠢᠬᠤ ᠦᠨᠳᠦᠰᠦᠨ ᠮᠡᠳᠡᠭᠦᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/7/26
     ᠬᠤᠪᠢ ᠶᠢᠨ ᠪᠦᠲᠦᠭᠡᠯ  ᠵᠣᠬᠢᠶᠠᠭᠴᠢ᠄   ᠤᠷᠢᠶᠠᠩᠬᠠᠨ ᠤ᠂ ᠶᠤᠨᠳᠤᠨ      ᠪᠡᠯᠴᠢᠭᠡᠷ ᠤᠨ ᠠᠮᠢ ᠠᠬᠤᠢ ᠶᠢᠨ ᠤᠬᠠᠭᠠᠨ ᠪᠤᠯ ᠮᠠᠨ ᠤ ᠦᠪᠦᠷ ᠮᠤᠩᠭᠤᠯ ᠤᠷᠤᠨ ᠤ ᠲᠠᠯ᠎ᠠ ᠨᠤᠲᠤᠭ ᠤᠨ ᠰᠤᠶᠤᠯ ᠰᠤᠳᠤᠯᠤᠯ ᠤᠨ ᠭᠤᠤᠯ ᠠᠭᠤᠯᠠᠭᠳᠠᠬᠤᠨ ᠪᠠᠶᠢᠵᠦ᠂ ᠨᠡᠭᠦᠳᠡᠯ ᠮᠠᠯᠵᠢᠯ ᠢ ᠰᠤᠳᠤᠯᠬᠤ ᠳᠤ ᠦᠨᠳᠤᠰᠤᠨ ᠭᠤᠭᠴᠤᠭ᠎ᠠ ᠪᠤᠯᠤᠨ᠎ᠡ᠃      ᠶᠠᠭᠤ ᠶᠢ ᠪᠡᠯᠴᠢᠭᠡᠷ ᠤᠨ ᠠᠮᠢ ᠠᠬᠤᠢ ᠭᠡᠬᠦ ᠪᠤᠢ︖ ᠪᠡᠯᠴᠢᠭᠡᠷ ᠤᠨ ᠠᠮᠢ ᠠᠬᠤᠢ ᠭᠡᠳᠡᠭ ᠪᠤᠯ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠦᠨᠳᠦᠰᠦᠨ ᠬᠡᠷᠡᠭᠴᠡᠭᠡ ᠶᠢ ᠬᠠᠩᠭᠠᠳᠠᠭ ᠲᠡᠯ᠎ᠡ ᠨᠤᠲᠤᠭ ᠤᠨ ᠤᠯᠠᠨ ᠲᠦᠷᠦᠯ ᠤᠨ ᠡᠪᠡᠰᠤ ᠤᠷᠭᠤᠮᠠᠯ ᠵᠢᠴᠢ ᠤᠰᠤᠨ ᠰᠢᠰᠲ᠋ᠧᠮ ᠢᠶᠠᠷ ᠭᠤᠤᠯᠯᠠᠭᠰᠠᠨ ᠦᠷᠭᠡᠨ ᠠᠭᠤᠳᠠᠮ ᠭᠠᠵᠠᠷ ᠤᠷᠤᠨ ᠤ ᠠᠭᠤᠯᠠ ᠨᠢᠷᠤᠭᠤ᠂ ᠲᠠᠯ᠎ᠠ ᠰᠢᠯᠢ᠂ ᠡᠯᠡᠰᠤ ᠮᠠᠩᠬ᠎ᠠ᠂ ᠭᠤᠪᠢ ᠬᠤᠭᠤᠯᠠᠢ᠂ ᠬᠦᠷᠦᠰᠤ ᠰᠢᠷᠤᠢ ᠲᠡᠭᠡᠷᠡᠬᠢ ᠤᠷᠭᠤᠮᠠᠯ ᠪᠤᠳᠠᠰ ᠪᠠ ᠤᠢ ᠰᠢᠭᠤᠢ ᠶᠢᠨ ᠪᠦᠷᠬᠦᠴᠡ ᠶᠢᠨ ᠬᠤᠴᠢᠯᠭ᠎ᠠ ᠤᠩᠭᠤᠨ ᠬᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠬᠤ ᠭᠠᠵᠠᠷ ᠤᠨ ᠶᠡᠷᠦᠩᠬᠡᠢ ᠨᠡᠷᠡᠶᠢᠳᠤᠯ ᠭᠡᠵᠦ ᠤᠶᠢᠯᠠᠭᠠᠭᠳᠠᠵᠦ ᠪᠠᠶᠢᠨ᠎ᠠ᠃ ︽ᠪᠡᠯᠴᠢᠭᠡᠷ︾ ᠭᠡᠬᠦ ᠦᠭᠡ ᠤᠨᠴᠠᠯᠢᠭᠳᠠᠵᠦ ᠪᠠᠶᠢᠬᠤ ᠪᠠᠷ ᠦᠵᠡᠪᠡᠯ ᠪᠠᠶᠢᠭᠠᠯᠢ ᠪᠠᠨ ᠠᠰᠢᠭᠯᠠᠭᠰᠠᠨ ᠬᠦᠮᠦᠨ ᠪᠠ ᠠᠮᠢᠳᠠᠨ ᠪᠠᠶᠢᠬᠤ ᠲᠤᠯᠠ ᠲᠤᠰ ᠤᠷᠭᠤᠮᠠᠯ ᠤᠨ ᠠᠮᠢ ᠠᠬᠤᠢ ᠳᠤ ᠠᠮᠢᠳᠤᠷᠠᠳᠠᠭ ᠨᠡᠭᠦᠳᠡᠯᠴᠢᠨ ᠮᠠᠯᠴᠢᠳ᠂ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ ᠴᠠᠭᠠᠨ ᠵᠡᠭᠡᠷ᠎ᠡ᠂ ᠪᠤᠷᠤ ᠬᠦᠷᠦᠭᠡᠰᠦ᠂ ᠠᠷᠭᠠᠯᠢ ᠶᠠᠩᠭᠢᠷ᠂ ᠬᠤᠯᠠᠨ ᠴᠢᠬᠢᠳᠡᠢ᠂ ᠪᠤᠭᠤ ᠰᠤᠭᠤ ᠵᠡᠷᠭᠡ ᠪᠡᠯᠴᠢᠭᠡᠷᠯᠡᠬᠦ ᠠᠮᠢᠳᠠᠳ ᠤᠨ ᠲᠦᠷᠦᠯ ᠵᠦᠢᠯ ᠢ ᠪᠠᠭᠳᠠᠭᠠᠬᠤ ᠨᠢ ᠶᠡᠷᠢᠶᠡᠨ ᠦᠭᠡᠢ ᠶᠤᠮ᠃      ᠶᠠᠭᠤ ᠶᠢ ᠪᠡᠯᠴᠢᠭᠡᠷ ᠨᠤᠲᠤᠭ ᠭᠡᠬᠦ ᠪᠤᠢ︖ ᠪᠡᠯᠴᠢᠭᠡᠷ ᠨᠤᠲᠤᠭ ᠭᠡᠳᠡᠭ ᠪᠤᠯ ᠭᠠᠵᠠᠷ ᠤᠨ ᠬᠦᠷᠦᠰᠦᠨ ᠳᠡᠭᠡᠷᠡᠬᠢ ᠤᠷᠭᠤᠮᠠᠯ ᠤᠨ ᠬᠤᠴᠢᠯᠭ᠎ᠠ ᠤᠩᠭᠤᠨ ᠰᠠᠬᠤᠯᠠᠭ ᠢᠶᠠᠷ ᠢᠶᠠᠨ ᠪᠠᠶᠢᠭ᠎ᠠ ᠮᠠᠯ ᠰᠦᠷᠦᠭ ᠤᠨ ᠢᠳᠡᠰᠢᠯᠡᠬᠦ ᠭᠠᠵᠠᠷ ᠤᠨ ᠡᠵᠡᠯᠡᠭᠦᠨ ᠤ ᠤᠷᠤᠨ ᠵᠠᠢ ᠶᠢ ᠬᠡᠯᠡᠳᠡᠭ᠃ ᠪᠠᠯᠴᠢᠭᠡᠷ ᠤᠨ ᠤᠷᠤᠰᠢᠴᠠ ᠳᠤ᠂ ᠭᠠᠵᠠᠷ ᠤᠨ ᠪᠠᠶᠢᠴᠠ᠂ ᠠᠭᠤᠷ ᠠᠮᠢᠰᠬᠤᠯ᠂ ᠬᠦᠷᠦᠰᠤ ᠰᠢᠷᠤᠢ᠂ ᠤᠰᠤᠨ ᠰᠤᠷᠪᠤᠯᠵᠢ᠂ ᠤᠷᠭᠤᠮᠠᠯ ᠤᠨ ᠬᠤᠴᠢᠯᠭ᠎ᠠ  ᠂ ᠠᠭᠤᠷᠬᠠᠢ ᠶᠢᠨ ᠭᠠᠷᠤᠯᠳᠠ ︵ᠬᠤᠵᠢᠷ᠂ ᠱᠠᠤ᠂ ᠲᠠᠪᠤᠰᠤ︶᠎ ᠲᠠᠢ ᠰᠢᠭᠤᠳ ᠤᠶᠠᠯᠳᠤᠵᠦ ᠨᠢᠭᠡᠨ ᠪᠦᠬᠦᠯᠢ ᠴᠤᠭᠴᠠ ᠪᠤᠯᠤᠨ ᠤᠷᠤᠰᠢᠳᠠᠭ᠃      ᠪᠡᠯᠴᠢᠭᠡᠷ ᠤᠨ ᠠᠮᠢ ᠠᠬᠤᠢ ᠶᠢᠨ ᠬᠠᠮᠤᠭ ᠶᠡᠭᠡ ᠴᠢᠳᠠᠪᠬᠢ ᠨᠢ ᠶᠠᠭᠤ ᠪᠤᠢ︖ ᠡᠨᠡ ᠪᠤᠯ ᠡᠷᠳᠡᠮᠳᠡᠳ ᠪᠠ ᠵᠠᠰᠠᠭ ᠲᠦᠷᠦ ᠶᠢᠨ ᠡᠷᠬᠡ ᠪᠠᠷᠢᠭᠴᠢᠳ ᠤᠨ ᠭᠤᠤᠯ ᠰᠤᠳᠤᠯᠤᠭᠳᠠᠬᠤᠨ ᠪᠤᠯᠤᠨ ᠬᠡᠷᠡᠭᠯᠡᠭᠳᠡᠬᠦᠨ ᠪᠤᠯᠤᠨ᠎ᠠ᠃ ᠪᠡᠯᠴᠢᠭᠡᠷ ᠤᠨ ᠠᠮᠢ ᠠᠬᠤᠢ ᠨᠢ ᠵᠦᠪᠬᠡᠨ ᠴᠦᠭᠡᠨ ᠲᠤᠭᠠᠳᠤ ᠦᠨᠳᠦᠰᠦᠳᠡᠨ ᠤ ᠮᠠᠯ ᠮᠠᠯᠵᠢᠳᠠᠭ ᠭᠠᠵᠠᠷ ᠤᠷᠤᠨ ᠯᠡ ᠪᠠᠶᠢᠵᠦ᠂ ᠲᠡᠭᠦᠨ ᠢᠶᠠᠷ ᠠᠮᠢ ᠵᠢᠭᠤᠬᠤ ᠤᠬᠠᠭᠠᠨ ᠢᠶᠠᠨ ᠪᠤᠯᠭᠠᠬᠤ ᠲᠡᠳᠦᠢ ᠪᠢᠰᠢ ᠶᠤᠮ᠂ ᠬᠠᠷᠢᠨ ᠭᠠᠵᠠᠷ ᠤᠨ ᠲᠤᠷᠭᠠᠨ ᠬᠦᠷᠦᠰᠦ ᠶᠢ ᠬᠠᠮᠠᠭᠠᠯᠠᠬᠤ ᠪᠠ ᠪᠠᠳᠤᠯᠠᠬᠤ᠂ ᠡᠯᠡᠰᠦ ᠮᠠᠩᠬ᠎ᠠ ᠶᠢ ᠲᠤᠭᠳᠠᠪᠤᠷᠢᠵᠢᠭᠤᠯᠬᠤ᠂ ᠠᠭᠤᠷ ᠠᠮᠢᠰᠬᠤᠯ ᠢ ᠲᠤᠬᠢᠷᠠᠭᠤᠯᠬᠤ᠂ ᠤᠰᠤ ᠴᠢᠬᠢᠭ ᠢ ᠬᠠᠳᠠᠭᠠᠯᠠᠬᠤ᠂ ᠠᠭᠠᠷ ᠢ ᠴᠡᠪᠡᠷᠰᠢᠭᠦᠯᠬᠦ ᠵᠡᠷᠭᠡ ᠠᠮᠢ ᠠᠬᠤᠢ ᠶᠢᠨ ᠤᠯᠠᠨ ᠵᠦᠢᠯ ᠤᠨ ᠴᠢᠳᠠᠪᠬᠢᠳᠦ ᠮᠦᠩᠬᠡ ᠶᠢᠨ ᠦᠢᠯᠡᠳᠦᠯ ᠲᠠᠢ ᠶᠤᠮ᠃ ᠡᠨᠡ ᠨᠢ ᠮᠠᠨ ᠤ ᠤᠯᠤᠰ ᠲᠤ ᠠᠪᠴᠤ ᠬᠡᠯᠡᠪᠡᠯ᠂ ᠪᠦᠬᠦ ᠲᠤᠮᠳᠠᠳᠤ ᠤᠷᠤᠨ ᠤ ᠪᠠᠶᠢᠭᠠᠯᠢ ᠶᠢᠨ ᠨᠠᠮ ᠲᠤᠭᠳᠠᠭᠤᠨ ᠤᠷᠴᠢᠨ ᠲᠤᠭᠤᠷᠢᠨ ᠢ ᠪᠠᠳᠤᠯᠠᠵᠦ᠂ ᠦᠷᠭᠡᠨ ᠲᠤᠮᠤ ᠠᠮᠢ ᠠᠬᠤᠢ ᠶᠢᠨ ᠬᠠᠯᠬᠠᠪᠴᠢ ᠪᠤᠯᠤᠨ ᠨᠦᠮᠦᠷᠢᠯᠡᠵᠦ ᠪᠠᠶᠢᠳᠠᠭ᠃ ᠡᠨᠡᠬᠦ ᠪᠠᠶᠢᠭᠠᠯᠢ ᠶᠢᠨ ᠦᠪᠡᠷᠳᠡᠭᠡᠨ ᠲᠤᠬᠢᠷᠠᠭᠤᠯᠬᠤ ᠴᠢᠳᠠᠪᠬᠢ ᠨᠢ ᠲᠤᠩ ᠰᠤᠷᠭᠤᠭ ᠪᠤᠯᠪᠠᠴᠤ ᠮᠠᠰᠢ ᠬᠡᠪᠡᠷᠡᠭ ᠮᠦᠷᠳᠡᠭᠡᠨ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠡᠭᠦᠨ ᠢ ᠶᠠᠭᠤ ᠪᠠᠷ ᠴᠤ ᠤᠷᠤᠯᠠᠭᠤᠯᠵᠦ ᠴᠢᠳᠠᠬᠤ ᠦᠭᠡᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠦᠨ᠎ᠡ ᠦᠷᠳᠡᠭ ᠎ ᠲᠠᠢ ᠡᠷᠬᠢᠮ ᠨᠠᠨᠳᠢᠨ ᠪᠠᠶᠢᠳᠠᠭ᠃ ᠲᠠᠯ᠎ᠠ ᠨᠤᠲᠤᠭ ᠤᠨ ᠪᠡᠯᠴᠢᠭᠡᠷ ᠤᠨ ᠤᠷᠭᠤᠮᠠᠯ ᠨᠢ᠂ ᠭᠡᠷᠡᠯ ᠤᠨ ᠨᠡᠶᠢᠯᠡᠯᠢᠭ ᠢᠶᠠᠷ ᠳᠠᠮᠵᠢᠨ ᠠᠭᠠᠷ ᠲᠤᠳᠤᠷᠠᠬᠢ ᠨᠡᠭᠦᠷᠡᠰᠦᠳᠦ᠋ᠷᠦᠭᠴᠢ ᠶᠢᠨ ᠲᠠᠪᠬᠤᠷ ᠢᠰᠦᠯ ᠢ ᠰᠢᠩᠭᠡᠭᠡᠵᠦ᠂ ᠦᠷᠭᠡᠨ ᠠᠭᠤᠳᠠᠮ ᠠᠭᠠᠷ ᠢ ᠲᠤᠩᠭᠠᠨ ᠴᠡᠪᠡᠷᠰᠢᠭᠦᠯᠳᠡᠭ ᠪᠦᠷᠢᠨ ᠴᠢᠳᠠᠪᠬᠢ ᠲᠠᠢ ᠨᠡᠭᠦᠷᠡᠰᠦᠳᠦ᠋ᠷᠦᠭᠴᠢ ᠶᠢᠨ ᠶᠡᠷᠦᠩᠬᠡᠢ ᠬᠤᠷᠢᠶᠠᠭᠤᠷ ᠪᠤᠯᠬᠤ ᠶᠤᠮ᠂ ᠬᠡᠷᠪᠡ ᠲᠤᠷ᠎ᠠ ᠲᠠᠪᠠ ᠪᠠᠷ ᠢᠶᠠᠨ ᠡᠪᠳᠡᠵᠦ ︽ᠲᠠᠳᠠᠯᠳᠤᠬᠤ ᠵᠢᠮ᠎ᠡ ᠲᠡᠩᠴᠡᠯᠳᠦᠬᠦ ᠶᠤᠰᠤ︾᠎ ᠶᠢ ᠨᠢ ᠠᠯᠳᠠᠭᠳᠠᠭᠤᠯᠪᠠᠯ ᠪᠠᠶᠢᠭᠠᠯᠢ ᠶᠡᠭᠡ ᠬᠡᠮᠵᠢᠶ᠎ᠡ ᠪᠠᠷ ᠬᠠᠷᠢᠭᠤ ᠠᠪᠬᠤ ᠪᠤᠯᠤᠨ᠎ᠠ᠃      ᠪᠡᠯᠴᠢᠭᠡᠷ ᠨᠤᠲᠤᠭ ᠢᠶᠠᠨ ᠲᠠᠨᠢᠬᠤᠢ ᠳᠤ᠂ ᠭᠠᠵᠠᠷ ᠤᠰᠤᠨ ᠢᠶᠠᠨ ᠮᠡᠳᠡᠵᠦ ᠲᠤᠭᠳᠠᠭᠠᠬᠤ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠢᠶᠠᠨ ᠳᠠᠨᠢᠵᠦ ᠨᠡᠷᠡᠯᠡᠬᠦ᠂ ᠵᠦᠭ ᠴᠢᠭᠯᠡᠯ ᠢᠶᠠᠨ ᠲᠤᠳᠤᠷᠠᠬᠠᠢ ᠴᠡᠭᠡᠵᠢᠯᠡᠬᠦ᠂ ᠭᠠᠵᠠᠷ ᠤᠨ ᠬᠡᠮᠵᠢᠶ᠎ᠡ ᠲᠤᠮᠵᠢᠶ᠎ᠡ ᠪᠠᠨ ᠮᠡᠳᠡᠬᠦ ᠵᠡᠷᠭᠡ ᠤᠯᠠᠨ ᠠᠭᠤᠯᠭ᠎ᠠ ᠪᠦᠬᠦᠢ ᠦᠨᠳᠦᠰᠦᠨ ᠮᠡᠳᠡᠯᠭᠡ ᠶᠢ ᠨᠡᠭᠦᠳᠡᠯᠴᠢᠨ ᠮᠠᠯᠴᠢᠳ ᠡᠵᠡᠨ ᠬᠦᠮᠦᠨ ᠤ ᠶᠤᠰᠤᠭᠠᠷ ᠵᠠᠪᠠᠯ ᠡᠵᠡᠮᠰᠢᠭᠰᠡᠨ ᠪᠠᠶᠢᠳᠠᠭ᠃      ⒈ ᠭᠠᠵᠠᠷ ᠤᠰᠤᠨ ᠢᠶᠠᠨ ᠮᠡᠳᠡᠵᠦ ᠲᠤᠭᠳᠠᠭᠠᠬᠤ᠃ ᠠᠬᠠᠮᠠᠳ ᠳᠡᠭᠡᠳᠦ ᠠᠴᠠ ᠨᠢ ᠦᠷ᠎ᠡ ᠬᠡᠤᠬᠡᠳ ᠲᠡᠭᠡᠨ ᠪᠡᠯᠴᠢᠭᠡᠷ ᠤᠰᠤᠨ ᠢᠶᠠᠨ ᠳᠠᠨᠢᠭᠤᠯᠵᠦ ᠮᠡᠳᠡᠭᠦᠯᠬᠦ ᠰᠠᠶᠢᠬᠠᠨ ᠤᠯᠠᠮᠵᠢᠯᠠᠯ ᠲᠠᠢ ᠪᠠᠶᠢᠳᠠᠭ ᠶᠤᠮ᠂ ᠮᠤᠷᠢ ᠤᠨᠤᠵᠦ ᠴᠢᠳᠠᠯ ᠲᠤᠷᠪᠢ ᠤᠷᠤᠬᠤ ᠠᠴᠠ ᠡᠬᠢᠯᠡᠵᠦ᠂ ᠬᠤᠨᠢ ᠮᠠᠯ ᠳᠤ ᠲᠠᠭᠠᠭᠠᠤᠯᠤᠨ ᠶᠠᠪᠤᠬᠤ ᠳᠠᠭᠠᠨ ᠠᠭᠤᠯᠠ ᠤᠰᠤᠨ ᠤ ᠨᠡᠷ᠎ᠡ ᠶᠢ ᠬᠡᠯᠡᠵᠦ ᠦᠭᠭᠦᠨ᠂ ᠶᠠᠮᠠᠷ ᠭᠤᠤᠯ ᠤᠰᠤᠨ ᠳᠤ ᠰᠦᠷᠦᠭ ᠢᠶᠠᠨ ᠤᠰᠤᠯᠠᠬᠤ᠂ ᠬᠠᠮᠢᠭ᠎ᠠ ᠠᠴᠠ ᠠᠮᠠᠨ ᠤ ᠤᠰᠤ ᠲᠡᠭᠡᠭᠡᠬᠦ᠂ ᠲᠦᠷᠪᠡᠨ ᠤᠯᠠᠷᠢᠯ ᠤᠨ ᠨᠤᠲᠤᠭ ᠨᠢ ᠬᠠᠮᠢᠭ᠎ᠠ ᠬᠠᠮᠢᠭ᠎ᠠ ᠪᠠᠶᠢᠳᠠᠭ᠂ ᠶᠠᠭᠤ ᠶᠢ ᠵᠤᠤ ᠨᠢᠷᠤᠭᠤ᠂ ᠭᠤᠪᠢ ᠱᠠᠤ᠂ ᠪᠤᠯᠠᠭ ᠱᠠᠩᠳᠠ ᠭᠡᠳᠡᠭ ᠢ ᠮᠡᠳᠡᠭᠦᠯᠳᠡᠭ᠃ ᠡᠶᠢᠮᠦ ᠠᠴᠠ ᠮᠠᠯᠴᠢᠳ ᠪᠠᠭ᠎ᠠ ᠨᠠᠰᠤᠨ ᠠᠴᠠ ᠪᠠᠨ ᠭᠠᠵᠠᠷ ᠤᠰᠤᠨ ᠢᠶᠠᠨ ᠴᠡᠭᠡᠵᠢᠯᠡᠨ ᠲᠤᠭᠳᠠᠭᠠᠬᠤ ᠶᠢ ᠴᠢᠬᠤᠯᠠᠴᠢᠯᠠᠳᠠᠭ ᠪᠦᠭᠡᠳ ᠡᠳᠦᠷ ᠤᠨ ᠮᠠᠷᠭᠠᠰᠢ ᠨᠤᠲᠤᠭ ᠤᠰᠤᠨ ᠤ ᠰᠠᠶᠢᠬᠠᠨ ᠲᠠᠢ ᠵᠤᠯᠭᠠᠳᠠᠭ ᠪᠤᠯᠬᠤᠷ ᠭᠠᠵᠠᠷ ᠤᠨ ᠪᠠᠶᠢᠷᠢ ᠪᠠᠶᠢᠴᠠ ᠪᠠᠨ ᠮᠠᠷᠳᠠᠯ ᠦᠭᠡᠢ ᠲᠤᠭᠳᠠᠭᠠᠳᠠᠭ ᠤᠴᠢᠷ ᠨᠢ ᠲᠡᠷᠡ ᠪᠢᠯᠡ᠃      ᠪᠠᠰᠠ ᠨᠤᠲᠤᠭ ᠤᠰᠤᠨ ᠳᠠᠭᠠᠨ ᠨᠠᠷ᠎ᠠ ᠬᠠᠶᠢᠷᠠᠯᠠᠬᠤ᠂ ᠤᠩᠭᠤᠯᠠᠨ ᠲᠠᠷᠬᠠᠯᠠᠬᠤ ᠪᠤᠯ ᠨᠤᠲᠤᠭ ᠤᠰᠤᠨ ᠢᠶᠠᠨ ᠳᠠᠨᠢᠵᠦ ᠮᠡᠳᠡᠬᠦ ᠶᠢᠨ ᠦᠨᠳᠦᠰᠦᠨ ᠨᠦᠬᠦᠴᠡᠯ ᠪᠤᠯᠳᠠᠭ᠂ ᠲᠡᠭᠡᠷᠡᠬᠢ ᠪᠦᠯᠦᠭ ᠲᠤ ᠠᠭᠤᠯᠠ ᠨᠢᠷᠤᠭᠤ ᠶᠢᠨ ᠪᠦᠯᠦᠭᠯᠡᠯ 21᠂ ᠭᠤᠤᠯ ᠪᠤᠯᠬᠤ ᠤᠰᠤᠨ ᠰᠢᠰᠲ᠋ᠧᠮ 18 ︵ᠵᠢᠵᠢᠭ ᠭᠤᠤᠯ ᠤᠷᠤᠰᠬᠠᠯ ᠤᠨ ᠨᠡᠷ᠎ᠡ ᠮᠠᠰᠢ ᠤᠯᠠᠨ ᠪᠤᠢ︶᠂ ᠨᠠᠭᠤᠷ ᠲᠤᠭᠤᠷᠢᠮ 154 ᠪᠠ ᠤᠨᠳᠤᠷᠤᠮᠠᠯ ᠪᠤᠯᠠᠭ 101᠎ ᠶᠢ ᠨᠠᠷᠠᠰ ᠢᠶᠠᠷ ᠨᠢ ᠵᠢᠭᠰᠠᠭᠠᠭᠰᠠᠨ ᠶᠠᠪᠤᠳᠠᠯ ᠪᠤᠯ ᠨᠤᠲᠤᠭ ᠤᠰᠤᠨ ᠢᠶᠠᠨ ᠳᠠᠨᠢᠵᠦ ᠮᠡᠳᠡᠬᠦᠢ ᠶᠢᠨ ᠲᠡᠤᠬᠡᠨ ᠬᠤᠷᠢᠶᠠᠩᠭᠤᠢ ᠪᠤᠯᠬᠤ ᠶᠤᠮ᠂ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠳᠠᠬᠢᠯᠭᠠᠳᠤ ᠤᠪᠤᠭ᠎ᠠ ᠪᠠᠷ ᠨᠡᠷᠡᠯᠡᠭᠰᠡᠨ ᠭᠠᠵᠠᠷ ᠤᠰᠤᠨ ᠲᠠᠪᠤᠨ ᠵᠠᠭᠤ ᠭᠠᠷᠤᠢ ᠨᠡᠷ᠎ᠡ ᠳᠡᠮᠳᠡᠭᠯᠡᠭᠳᠡᠵᠦ ᠪᠤᠢ᠃      ⒉ ᠵᠦᠭ ᠴᠢᠭ ᠢ ᠮᠡᠳᠡᠭᠦᠯᠬᠦ᠃ ᠦᠵᠦᠮᠦᠴᠢᠨ ᠨᠤᠲᠤᠭ ᠪᠤᠯ ᠦᠷᠭᠡᠨ ᠲᠡᠨᠢᠭᠡᠷ᠂ ᠮᠠᠯᠵᠢᠯ ᠤᠨ ᠤᠷᠤᠨ ᠪᠠᠶᠢᠷᠢ ᠲᠠᠷᠬᠠᠢ ᠪᠤᠳᠠᠷᠬᠠᠢ ᠪᠤᠯᠬᠤᠷ ᠠᠯᠤᠰ ᠬᠤᠯᠠ ᠶᠢᠨ ᠮᠠᠯ ᠰᠦᠷᠦᠭ᠂ ᠠᠶᠢᠯ ᠤᠶᠢᠷᠨᠯᠴᠠᠭ᠎ᠠ ᠳᠠᠭᠠᠨ ᠪᠠᠭᠤᠬᠤ᠂ ᠡᠷᠢᠯ ᠰᠤᠷᠠᠭ ᠬᠢᠬᠦ ᠵᠡᠷᠭᠡ ᠶᠠᠮᠠᠷᠪᠠ ᠦᠢᠯᠡ ᠶᠠᠪᠤᠳᠠᠯ ᠳᠤ ᠶᠠᠪᠤᠬᠤ ᠳᠤ ᠵᠦᠪᠬᠡᠨ ᠵᠦᠭ ᠴᠢᠭᠯᠡᠯ ᠢᠶᠠᠷ ᠪᠠᠷᠢᠮᠵᠢᠶ᠎ᠠ ᠪᠤᠯᠭᠠᠳᠠᠭ᠃ ᠰᠦᠨᠢ ᠤᠷᠤᠢ ᠴᠤ ᠲᠦᠭᠡᠷᠢᠯ ᠦᠭᠡᠢ ᠶᠠᠪᠤᠵᠦ ᠵᠠᠩᠰᠢᠭᠰᠠᠨ ᠪᠠᠶᠢᠳᠠᠭ ᠶᠤᠮ᠂ ᠲᠡᠭᠷᠢ ᠶᠢᠨ ᠤᠷᠤᠨ ᠤ ᠠᠯᠳᠠᠨ ᠭᠠᠳᠠᠰᠤ ᠤᠳᠤ ᠪᠠᠷ ᠪᠤᠯ ᠭᠠᠵᠠᠷ ᠤᠨ ᠵᠢᠷᠤᠭ ᠲᠤ ᠠᠰ ᠬᠤᠶᠢᠨ᠎ᠠ ᠪᠠᠷ ᠪᠠᠷᠢᠮᠵᠢᠶᠠᠯᠠᠳᠠᠭ ᠪᠤᠯ ᠦᠵᠦᠮᠦᠴᠢᠨ ᠤ ᠵᠦᠭ ᠬᠠᠷᠠᠭᠠᠰᠤ ᠪᠠᠷ ᠭᠡᠪᠡᠯ ᠲᠡᠷᠡ ᠨᠢ ᠵᠡᠭᠦᠨ ᠬᠤᠶᠢᠳᠦ ᠵᠦᠭ ᠪᠤᠯᠳᠠᠭ ᠲᠤᠭᠳᠠᠭᠤᠨ ᠤᠳᠤᠨ ᠭᠠᠷᠠᠭ ᠪᠤᠯᠤᠨ᠎ᠠ᠃ ᠲᠡᠭᠡᠪᠡᠯ ᠠᠰ ᠬᠤᠶᠢᠳᠦ ᠵᠦᠭ ᠪᠤᠯ ᠠᠯᠳᠠᠨ ᠭᠠᠳᠠᠰᠤ ᠠᠴᠠ ᠪᠠᠷᠠᠭᠤᠨᠰᠢ ᠨᠢᠭᠡ ᠲᠡᠯᠢᠮ ︵ᠬᠠᠭᠠᠰ ᠠᠯᠳᠠ︶᠎ ᠤᠨ ᠪᠠᠷᠤᠭ ᠲᠤ ᠠᠰ ᠬᠤᠶᠢᠳᠤ ᠴᠢᠭᠯᠡᠯ ᠤᠨ ᠪᠠᠷᠢᠮᠵᠢᠶ᠎ᠠ ᠪᠤᠯᠭᠠᠵᠦ᠂ ᠲᠦᠷᠪᠡᠨ ᠵᠦᠭ ᠢ ᠬᠡᠮᠵᠢᠨ ᠲᠤᠭᠳᠠᠭᠠᠳᠠᠭ᠃ ᠡᠪᠦᠯ ᠭᠤᠤᠯᠯᠠᠭᠰᠠᠨ ᠦᠷᠯᠦᠭᠡ ᠶᠢᠨ ᠨᠠᠷᠠ ᠠᠰ ᠡᠮᠦᠨ᠎ᠡ ᠵᠦᠭ ᠠᠴᠠ ᠪᠠᠭ᠎ᠠ ᠯᠠ ᠵᠡᠭᠦᠨ ᠲᠠᠯ᠎ᠠ ᠪᠠᠷ ᠭᠠᠷᠳᠠᠭ᠃ ᠡᠨᠡᠬᠦ ᠴᠢᠭᠯᠡᠯ ᠢᠶᠠᠷ ᠪᠠᠷᠢᠮᠵᠢᠶᠠᠯᠠᠨ ᠮᠤᠩᠭᠤᠯ ᠭᠡᠷ ᠢᠶᠠᠨ ᠠᠰ ᠡᠮᠦᠨ᠎ᠡ ᠵᠦᠭ ᠲᠤ ᠬᠠᠨᠳᠤᠭᠤᠯᠤᠨ ᠪᠠᠷᠢᠵᠦ ᠪᠤᠰᠬᠠᠳᠠᠭ᠃ ᠲᠤᠰ ᠵᠦᠭ ᠴᠢᠭ ᠤᠨ ᠪᠠᠷᠢᠮᠵᠢᠶᠠᠯᠠᠯ ᠢᠶᠠᠷ ᠲᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠤᠪᠬᠢᠰ ᠢ ᠴᠡᠭᠡᠵᠢᠯᠡᠳᠡᠭ ᠢᠶᠠᠷ ᠡᠳᠦᠷ ᠪᠤᠤ ᠬᠡᠯᠡ ᠬᠠᠷᠠᠩᠭᠤᠢ ᠰᠦᠨᠢ ᠶᠠᠪᠤᠭᠰᠠᠨ ᠴᠤ ᠲᠦᠭᠡᠷᠢᠵᠦ ᠡᠭᠡᠷᠡᠬᠦ ᠶᠠᠪᠤᠳᠠᠯ ᠦᠭᠡᠢ ᠪᠠᠶᠢᠳᠠᠭ ᠪᠦᠭᠡᠳ ᠵᠤᠷᠢᠭᠰᠠᠨ ᠭᠠᠵᠠᠷ ᠢᠶᠠᠨ ᠠᠰᠯᠠᠨ ᠬᠦᠷᠴᠢᠬᠡᠳᠡᠭ᠂  ᠤᠯᠠᠩᠬᠢ ᠳᠠᠭᠠᠨ ᠤᠭᠳᠠᠷᠭᠤᠢ ᠶᠢᠨ ᠨᠠᠷᠠ ᠵᠡᠭᠦᠨ ᠡᠮᠦᠨ᠎ᠡ ᠠᠴᠠ ᠭᠠᠷᠴᠤ ᠪᠠᠷᠠᠭᠤᠨ ᠬᠤᠶᠢᠨ᠎ᠡ ᠰᠢᠩᠭᠡᠳᠡᠭ ᠭᠡᠵᠦ ᠶᠡᠷᠦᠩᠬᠡᠶᠢᠯᠡᠨ ᠤᠶᠢᠯᠠᠭᠠᠵᠦ᠂ ᠵᠤᠨ ᠡᠪᠦᠯ ᠤᠨ ᠡᠳᠦᠷ ᠰᠦᠨᠢ ᠶᠢᠨ ᠤᠷᠳᠤᠳᠴᠤ ᠪᠤᠭᠤᠨᠢᠰᠬᠤ ᠪᠠᠶᠢᠳᠠᠯ ᠢ ᠦᠨᠳᠦᠰᠦᠯᠡᠨ ᠵᠦᠭ ᠴᠢᠭᠯᠡᠯ ᠤᠨ ᠢᠶᠠᠨ ᠪᠠᠶᠢᠩᠭᠤ ᠶᠢᠨ ᠬᠡᠷᠡᠭᠯᠡᠳᠡᠭ ᠪᠠᠷᠢᠮᠵᠢᠶ᠎ᠠ ᠪᠠᠨ ᠡᠵᠡᠮᠰᠢᠴᠢᠳᠡᠭ ᠶᠤᠮ᠃ ᠡᠳᠦᠷ ᠪᠤᠯ ᠨᠠᠷᠠ ᠬᠡᠳᠦᠢ ᠴᠠᠭ ᠤᠨ ᠪᠠᠷᠤᠭ ᠲᠤ ᠬᠠᠮᠢᠭ᠎ᠠ ᠬᠦᠷᠴᠤ ᠪᠠᠶᠢᠬᠤ ᠶᠢ ᠮᠡᠳᠡᠬᠦ ᠬᠡᠷᠡᠭᠳᠡᠢ ᠪᠠᠷ ᠦᠯᠦ ᠪᠠᠷᠠᠮ ᠨᠡᠩ ᠢᠯᠠᠩᠭᠤᠷ᠎ᠠ ᠪᠦᠷᠭᠦᠭ ᠡᠭᠦᠯᠡ ᠎ ᠲᠠᠢ ᠪᠤᠶᠤ ᠰᠢᠭᠤᠷᠭ᠎ᠠ ᠲᠠᠢ ᠡᠳᠦᠷ ᠵᠠᠪᠠᠯ ᠲᠤᠭᠳᠠᠭᠠᠬᠤ ᠴᠢᠬᠤᠯᠠ ᠲᠠᠢ ᠶᠤᠮ᠃ ᠰᠦᠨᠢ ᠪᠤᠯᠬᠤ ᠳᠤ᠂ ᠶᠠᠮᠠᠷ ᠴᠠᠭ ᠲᠤ ᠶᠠᠮᠠᠷ ᠤᠳᠤᠳ ᠠᠯᠢ ᠵᠦᠭ ᠲᠤ ᠪᠠᠶᠢᠳᠠᠭ ᠢ ᠠᠨᠳᠠᠭᠤᠷᠠᠯ ᠦᠭᠡᠢ ᠴᠡᠭᠡᠵᠢᠯᠡᠳᠡᠭ ᠤᠴᠢᠷ ᠲᠠᠢ᠃ ᠵᠢᠱᠢᠶᠡᠯᠡᠪᠡᠯ᠄ ᠰᠠᠷᠠ᠂ ᠠᠯᠳᠠᠨ ᠭᠠᠳᠠᠰᠤ᠂ ᠲᠤᠯᠤᠭᠠᠨ ᠪᠤᠷᠬᠠᠨ ︵ᠲᠤᠬᠢᠭᠤᠷ ᠲᠤᠯᠤᠭᠠᠨ ᠤᠳᠤ︶᠂ ᠪᠦᠭᠡᠮ ᠤᠳᠤ ︵ᠮᠡᠴᠢᠳ ᠵᠢᠷᠭᠤᠭᠠᠨ ᠤᠳᠤ︶᠂ ᠭᠤᠷᠪᠠᠨ ᠨᠤᠬᠠᠢ᠂ ᠴᠤᠯᠮᠤᠨ ᠤᠳᠤ ᠭᠡᠬᠦ ᠵᠡᠷᠭᠡ ᠮᠠᠰᠢ ᠤᠯᠠᠨ ᠤᠳᠤᠳ ᠤᠨ ᠲᠦᠷᠪᠡᠨ ᠤᠯᠠᠷᠢᠯ ᠳᠤ ᠠᠯᠢ ᠵᠦᠭ ᠲᠤ᠂ ᠬᠡᠳᠦᠢ ᠴᠠᠭ ᠤᠨ ᠪᠠᠷᠤᠭ ᠲᠤ ᠬᠠᠮᠢᠭ᠎ᠠ ᠬᠦᠷᠴᠤ ᠪᠠᠶᠢᠳᠠᠭ ᠵᠡᠷᠭᠡ ᠢ ᠮᠠᠯᠴᠢᠳ ᠲᠤᠳᠤᠷᠬᠠᠢ ᠴᠡᠭᠡᠵᠢᠯᠡᠨ ᠲᠤᠭᠳᠠᠭᠠᠳᠠᠭ ᠶᠤᠮ᠃ ᠪᠦᠷᠭᠦᠭ ᠰᠦᠨᠢ ᠪᠤᠯ ᠡᠪᠡᠰᠦᠨ ᠲᠤᠯᠤᠭᠠᠢ ᠬᠠᠮᠢᠭᠠᠰᠢ ᠪᠦᠬᠦᠶᠢᠵᠦ ᠪᠠᠶᠢᠬᠤ ᠶᠢ ᠮᠡᠳᠡᠬᠦ ᠬᠡᠷᠡᠭᠳᠡᠢ᠂ ᠤᠯᠠᠩᠬᠢ ᠤᠯᠠᠷᠢᠯ ᠤᠨ ᠰᠠᠯᠬᠢ ᠨᠢ ᠪᠠᠷᠠᠭᠤᠨ ᠬᠤᠶᠢᠨ᠎ᠡ ᠠᠴᠠ ᠰᠠᠯᠬᠢᠯᠠᠳᠠᠭ ᠠᠴᠠ ᠡᠪᠡᠰᠦᠨ ᠲᠤᠯᠤᠭᠠᠢ ᠨᠡᠶᠢᠳᠡᠮ ᠳᠡᠭᠡᠨ ᠵᠡᠭᠦᠨ ᠤᠷᠤᠭᠰᠢ ᠪᠦᠬᠦᠶᠢᠵᠦ ᠪᠠᠶᠢᠳᠠᠭ ᠠᠴᠠ ᠠᠯᠢ ᠵᠦᠭ ᠲᠤ ᠶᠠᠪᠤᠵᠦ ᠪᠠᠶᠢᠬᠤ ᠪᠠᠨ ᠮᠡᠳᠡᠳᠡᠭ ᠪᠦᠭᠡᠳ ᠠᠭᠤᠯᠠ ᠤᠷᠤᠶᠢᠳ ᠲᠠᠢ ᠭᠠᠵᠠᠷ ᠪᠤᠯ ᠤᠷᠤᠢ ᠲᠤᠯᠤᠭᠠᠢ ᠪᠠᠨ ᠠᠵᠢᠭᠯᠠᠵᠦ ᠶᠠᠪᠤᠬᠤ ᠵᠡᠷᠭᠡ ᠨᠢ ᠮᠠᠯᠴᠢᠳ ᠤᠨ ᠪᠠᠶᠢᠭᠠᠯᠢ ᠶᠢᠨ ᠠᠰᠢᠭᠳᠠᠢ ᠨᠦᠬᠦᠴᠡᠯ ᠢᠶᠠᠷ ᠴᠢᠭᠯᠡᠯ ᠢᠶᠠᠨ ᠡᠵᠡᠮᠰᠢᠵᠦ ᠶᠠᠪᠤᠬᠤ ᠡᠩ ᠤᠨ ᠦᠨᠳᠦᠰᠦᠨ ᠮᠡᠳᠡᠯᠭᠡ ᠤᠳ ᠪᠤᠯᠤᠨ᠎ᠠ᠃      ⒊ ᠭᠠᠵᠠᠷ ᠤᠨ ᠬᠡᠮᠵᠢᠶ᠎ᠡ ᠲᠤᠮᠵᠢᠶ᠎ᠠ ᠬᠢᠭᠡᠳ ᠴᠠᠭ ᠤᠨ ᠲᠤᠭᠳᠠᠯᠴᠠᠭ᠎ᠠ ᠶᠢ ᠮᠡᠳᠡᠬᠦ᠃ ᠪᠡᠯᠴᠢᠭᠡᠷ ᠤᠨ ᠬᠤᠯᠠ ᠤᠶᠢᠷ᠎ᠠ ᠶᠢ ᠮᠡᠳᠡᠬᠦ ᠳᠤ ᠵᠠᠪᠠᠯ ᠬᠡᠮᠵᠢᠶ᠎ᠡ ᠲᠤᠮᠵᠢᠶ᠎ᠠ ᠶᠢᠨ ᠪᠠᠷᠢᠮᠵᠢᠶᠠᠨ ᠤ ᠬᠡᠯᠡᠯᠭᠡ ᠶᠢ ᠡᠵᠡᠮᠰᠢᠬᠦ᠂ ᠡᠳᠦᠷ ᠰᠦᠨᠢ ᠶᠢ ᠪᠠᠷᠢᠮᠵᠢᠶᠠᠯᠠᠬᠤ ᠳᠤ ᠴᠠᠭ ᠤᠨ ᠲᠤᠭᠳᠠᠯᠴᠠᠭ᠎ᠠ ᠶᠢ ᠮᠡᠳᠡᠬᠦ ᠴᠢᠬᠤᠯᠠ ᠲᠠᠢ᠃ ᠡᠨᠡ ᠲᠤᠬᠠᠢ ᠦᠵᠦᠮᠦᠴᠢᠨᠴᠤᠳ ᠤᠨ ᠭᠠᠵᠠᠷ ᠤᠨ ᠬᠡᠮᠵᠢᠶ᠎ᠡ ᠲᠤᠮᠵᠢᠶ᠎ᠠ ᠶᠢᠨ ᠦᠪᠡᠷ ᠤᠨ ᠦᠪᠡᠷᠮᠢᠴᠡ ᠬᠡᠯᠡᠯᠭᠡ ᠪᠠᠶᠢᠳᠠᠭ᠂ ᠡᠨᠡ ᠨᠢ ᠲᠠᠷᠤᠢ᠄      ᠭᠠᠵᠠᠷ ᠤᠨ ᠬᠤᠯᠠ ᠤᠶᠢᠷ᠎ᠠ ᠶᠢᠨ ᠬᠡᠮᠵᠢᠭᠳᠡᠯ ᠤᠨ ᠲᠤᠬᠠᠢ᠂ ᠦᠵᠦᠮᠦᠴᠢᠨᠴᠤᠳ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠠᠮᠢᠳᠤᠷᠠᠯ ᠲᠤᠮᠳᠠ ᠪᠠᠨ ᠨᠢᠳᠤᠨ ᠬᠠᠷᠠᠭ᠎ᠠ ᠪᠤᠶᠤ ᠮᠤᠷᠢᠨ ᠤ ᠶᠠᠪᠤᠭ᠎ᠠ ᠪᠠᠷ ᠬᠡᠮᠵᠢᠭᠳᠡᠯ ᠪᠤᠯᠭᠠᠵᠦ᠂ ᠪᠠᠷᠢᠮᠵᠢᠶᠠᠯᠠᠨ ᠶᠠᠷᠢᠯᠴᠠᠳᠠᠭ ᠶᠤᠮ᠄      ᠡᠭᠦᠳᠡ ᠬᠤᠶᠢᠮᠤᠷ ᠤᠨ ᠡᠳᠦᠢ ︵2 —3 ᠮᠧᠲᠷ ᠤᠨ ᠤᠷᠴᠢᠮ︶      ᠠᠷᠭᠠᠮᠵᠢᠶ᠎ᠠ ᠶᠢᠨ ᠬᠢᠷᠢ ︵ᠠᠷᠪᠠᠨ ᠠᠯᠳᠠ ᠶᠢᠨ ᠪᠠᠷᠤᠭ︶      ᠠᠶᠢᠯ ᠤᠨ ᠬᠢᠷᠢ ︵30 — 50 ᠮᠧᠲᠷ ᠤᠨ ᠤᠷᠴᠢᠮ︶      ᠰᠠᠭᠠᠬᠠᠯᠳᠠ ᠶᠢᠨ ᠬᠢᠷᠢ ︵500 — 1000 ᠮᠧᠲᠷ ᠤᠨ ᠪᠠᠷᠤᠭ︶      ᠨᠢᠳᠦᠨ ᠦᠵᠦᠭᠦᠷ ᠤᠨ ᠭᠠᠵᠠᠷ ︵ᠨᠢᠳᠦᠨ ᠬᠠᠷᠠᠭᠠᠨ ᠤ ᠬᠠᠮᠤᠭ ᠬᠤᠯᠠ ᠦᠵᠡᠬᠦ ᠭᠠᠵᠠᠷ︶      ᠨᠡᠭᠦᠳᠡᠯ ᠤᠨ ᠬᠢᠷᠢ ᠭᠠᠵᠠᠷ ︵30 ᠭᠠᠵᠠᠷ ᠤᠷᠴᠢᠮ︶      ᠰᠤᠨᠤᠮ᠎ᠠ ᠨᠡᠭᠦᠳᠡᠯ ᠤᠨ ᠭᠠᠵᠠᠷ ︵50 ᠭᠠᠵᠠᠷ ᠤᠨ ᠤᠷᠴᠢᠮ︶      ᠬᠡᠳᠦᠨ ᠨᠡᠭᠦᠳᠡᠯ ᠤᠨ ᠭᠠᠵᠠᠷ      ᠮᠤᠷᠢᠳᠠᠢ ᠬᠦᠮᠦᠨ ᠤ ᠨᠢᠭᠡ ᠡᠳᠦᠷ ᠤᠨ ᠵᠠᠮ ︵300 ᠤᠷᠴᠢᠮ ᠭᠠᠵᠠᠷ︶      ᠮᠤᠷᠢᠳᠠᠢ ᠬᠦᠮᠦᠨ ᠤ ᠬᠡᠳᠦᠨ ᠡᠳᠦᠷ ᠤᠨ ᠵᠠᠮ      ᠦᠬᠡᠷ ᠲᠡᠷᠭᠡᠨ ᠤ ᠰᠠᠷ᠎ᠠ ᠶᠢᠨ ᠵᠠᠮ ᠭᠡᠬᠦ ᠵᠡᠷᠭᠡ ᠪᠠᠷ ᠬᠡᠯᠡᠯᠴᠡᠨ ᠪᠠᠶᠢᠳᠠᠭ᠃      ᠴᠠᠭ ᠳᠡᠮᠳᠡᠭ ᠤᠨ ᠪᠠᠷᠢᠮᠵᠢᠶᠠᠳᠤ ᠬᠡᠯᠡᠯᠭᠡ ᠶᠢᠨ ᠲᠠᠯ᠎ᠠ ᠪᠠᠷ᠂ ᠦᠵᠦᠮᠦᠴᠢᠨᠴᠤᠳ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠤᠷᠳᠤ ᠤᠳᠠᠭᠠᠨ ᠤ ᠶᠠᠪᠤᠴᠠ ᠪᠠ ᠰᠠᠨᠰᠠᠷ ᠪᠠᠶᠢᠭᠠᠯᠢ ᠶᠢ ᠰᠢᠨᠵᠢᠬᠦ ᠳᠡᠭᠡᠨ᠂ ᠦᠨᠢ ᠮᠦᠩᠬᠡ ᠡᠷᠭᠢᠯᠳᠦᠬᠦ ᠡᠳᠦᠷ ᠰᠦᠨᠢ ᠶᠢᠨ ᠡᠭᠡᠯᠵᠢ ᠶᠢᠨ ᠴᠠᠭ ᠳᠡᠮᠳᠡᠭ ᠤᠨ ᠪᠠᠷᠢᠮᠵᠢᠶᠠᠳᠤ ᠬᠡᠯᠡᠯᠭᠡ ᠶᠢ ᠡᠭᠦᠳᠦᠨ ᠪᠦᠳᠦᠭᠡᠭᠰᠡᠨ ᠶᠤᠮ᠃ ᠭᠡᠬᠦ ᠳᠡᠭᠡᠨ ᠴᠠᠭ ᠳᠡᠮᠳᠡᠭ ᠤᠨ ᠪᠠᠷᠢᠮᠵᠢᠶ᠎ᠠ ᠶᠢ ᠡᠳᠦᠷ ᠰᠦᠨᠢ ᠶᠢᠨ ᠬᠤᠷᠢᠨ ᠲᠦᠷᠪᠡᠨ ᠴᠠᠭ ᠢ ᠪᠠᠶᠢᠭᠠᠯᠢ ᠰᠠᠨᠰᠠᠷ ᠤᠨ ᠦᠩᠬᠡ ᠪᠠᠶᠢᠳᠠᠯ ᠢᠶᠠᠷ ᠰᠢᠨᠵᠢᠵᠦ ᠨᠠᠷᠡᠰᠢᠭᠦᠯᠦᠨ ᠲᠤᠭᠳᠠᠭᠠᠵᠦ᠂ ᠠᠮᠢᠳᠤᠷᠠᠯ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠪᠦᠬᠦᠶᠢᠯᠡ ᠠᠵᠢᠯᠯᠠᠭᠠᠨ ᠳᠠᠭᠠᠨ ᠲᠤᠤᠱᠯᠠᠭᠤᠯᠵᠦ ᠪᠠᠶᠢᠳᠠᠭ᠃ ᠡᠭᠦᠨ ᠢᠶᠠᠷ ᠢᠶᠠᠨ ᠠᠵᠢᠯ ᠶᠠᠪᠤᠳᠠᠯ ᠢ ᠬᠢᠬᠦ ᠪᠠᠷᠢᠮᠵᠢᠶᠠᠳᠤ ᠴᠠᠭ ᠪᠤᠯᠭᠠᠳᠠᠭ ᠪᠠᠶᠢᠵᠠᠢ᠃ ᠡᠨᠡ ᠨᠢ ᠲᠠᠷᠤᠢ᠄      ᠦᠷ ᠴᠠᠶᠢᠬᠤ ᠠᠴᠠ ᠡᠮᠦᠨ᠎ᠡ ︵ᠦᠬᠡᠷ ᠴᠠᠭ ᠤᠨ ᠰᠡᠭᠦᠯᠴᠢ ᠪᠠᠷᠰ ᠴᠠᠭ ᠤᠨ ᠡᠬᠢ︶      ᠦᠷ ᠤᠨ ᠳᠡᠮᠳᠡᠭ ᠤᠷᠤᠬᠤ ︵ᠦᠷ ᠤᠨ ᠭᠤᠵᠤᠩ ᠤᠷᠤᠬᠤ︶      ᠦᠷ ᠤᠨ ᠬᠠᠷᠠᠩᠭᠤᠢ ︵ᠦᠨᠡᠭᠡᠨ ᠬᠠᠷᠠᠩᠭᠤᠢ︶      ᠦᠷ ᠴᠠᠶᠢᠬᠤ ︵ᠦᠷ ᠤᠨ ᠪᠦᠷᠤᠩ ᠪᠠᠷᠤᠩ︶      ᠦᠷ ᠭᠡᠭᠡᠷᠡᠬᠦ ︵ᠦᠷ ᠮᠠᠩᠬᠠᠶᠢᠬᠤ︶      ᠨᠠᠷᠠᠨ ᠤ ᠦᠶ᠎ᠡ       ᠨᠠᠷᠠ ᠳᠡᠭᠡᠷ᠎ᠡ ᠭᠠᠷᠭᠠᠭᠠᠳ ︵ᠨᠠᠷᠠ ᠪᠠᠷᠤᠭ ᠠᠯᠳᠠ ᠲᠡᠭᠡᠭᠡᠰᠢ ᠭᠠᠷᠤᠭᠰᠠᠨ ᠪᠠᠶᠢᠬᠤ︶      ᠪᠠᠭ᠎ᠠ ᠦᠳᠡ ︵10 ᠴᠠᠭ ᠤᠨ ᠤᠷᠴᠢᠮ︶      ᠦᠳᠡ ᠲᠤᠮᠳᠠ ︵ᠵᠢᠩ ᠦᠳᠡ ᠮᠤᠷᠢ ᠴᠠᠭ᠂ 12 ᠴᠠᠭ︶      ᠦᠳᠡ ᠠᠴᠠ ᠬᠤᠶᠢᠰᠢ ︵ᠦᠳᠡ ᠭᠤᠳᠤᠶᠢᠬᠤ᠂ 14 ᠴᠠᠭ ᠤᠨ ᠪᠠᠷᠤᠭ︶      ᠬᠤᠨᠢᠨ ᠤᠭᠳᠤᠭᠤᠯ ᠨᠠᠷᠠ ᠲᠠᠢ ︵ᠨᠠᠷᠠ ᠰᠢᠩᠭᠡᠬᠦ ᠠᠴᠠ ᠬᠤᠶᠠᠷ ᠠᠯᠳᠠ ᠶᠢᠨ ᠵᠠᠢ ᠪᠠᠷ ᠪᠠᠷᠤᠭᠯᠠᠬᠤ︶      ᠨᠠᠷᠠ ᠰᠢᠩᠭᠡᠬᠦ ᠦᠶ᠎ᠡ      ᠰᠢᠷ᠎ᠠ ᠪᠦᠷᠦᠢ ᠶᠢᠨ ᠦᠶ᠎ᠡ ︵ᠨᠡᠷᠡ ᠰᠢᠩᠭᠡᠭᠰᠡᠨ ᠤ ᠨᠡᠯᠢᠶᠡᠳ ᠲᠠᠷᠠᠭ᠎ᠠ ᠭᠡᠭᠡ ᠲᠠᠢ ᠪᠠᠶᠢᠬᠤ ᠦᠶ᠎ᠡ︶      ᠬᠠᠷ᠎ᠠ ᠪᠦᠷᠦᠢ ᠶᠢᠨ ᠦᠶ᠎ᠡ ︵ᠭᠡᠭᠡ ᠲᠠᠢ ᠪᠤᠯᠪᠠᠴᠤ ᠨᠡᠯᠢᠶᠡᠳ ᠬᠠᠷᠠᠩᠭᠤᠢ ᠪᠤᠯᠤᠭᠰᠠᠨ ᠦᠶ᠎ᠡ︶      ᠦᠳᠡᠰᠢ ︵ᠤᠷᠤᠢ ᠶᠢᠨ 10 ᠴᠠᠭ ᠤᠨ ᠪᠠᠷᠤᠭ ᠲᠤ︶      ᠰᠦᠨᠢ ᠲᠤᠮᠳᠠ ᠶᠢᠨ ᠦᠶ᠎ᠡ ︵ᠬᠤᠯᠤᠭᠠᠨ᠎ᠠ ᠴᠠᠭ ᠪᠠᠷᠤᠭ᠂ 0 ᠴᠠᠭ︶      ᠰᠦᠨᠢ ᠲᠤᠮᠳᠠ ᠠᠴᠠ ᠬᠤᠶᠢᠰᠢ ︵ᠦᠬᠡᠷ ᠴᠠᠭ ᠤᠨ ᠤᠷᠴᠢᠮ︶      ᠴᠠᠭ ᠳᠡᠮᠳᠡᠭ ᠤᠨ ᠪᠠᠷᠢᠮᠵᠢᠶᠠᠳᠤ ᠬᠡᠯᠡᠯᠭᠡ ᠨᠢ ᠲᠦᠷᠪᠡᠨ ᠤᠯᠠᠷᠢᠯ ᠤᠨ ᠡᠳᠦᠷ ᠰᠦᠨᠢ ᠶᠢᠨ ᠡᠭᠡᠯᠵᠢᠯᠡᠯ ᠤᠨ ᠤᠷᠳᠤᠳᠴᠤ ᠪᠤᠭᠤᠨᠢᠰᠬᠤ ᠬᠤᠪᠢᠷᠠᠯᠳᠠ ᠶᠢ ᠲᠠᠭᠠᠵᠦ ᠤᠯᠠᠷᠢᠭᠤᠯᠤᠨ ᠬᠡᠯᠡᠯᠴᠡᠬᠦ ᠠᠴᠠ ᠪᠢᠰᠢ᠂ ᠤᠳᠤ ᠶᠢᠨ ᠬᠡᠷᠡᠭᠯᠡᠵᠦ ᠪᠠᠶᠢᠭ᠎ᠠ ᠲᠤᠭᠳᠠᠮᠠᠯ ᠴᠠᠭ ᠤᠨ ᠪᠠᠷᠢᠮᠵᠢᠶ᠎ᠠ ᠪᠠᠷ ᠬᠡᠮᠵᠢᠵᠦ ᠪᠤᠯᠳᠠᠭ ᠦᠭᠡᠢ ᠶᠤᠮ᠃ ᠡᠭᠦᠨ ᠳᠤ ᠲᠤᠭᠳᠠᠮᠠᠯ ᠴᠠᠭ ᠤᠨ ᠪᠠᠷᠢᠮᠵᠢᠶ᠎ᠠ ᠳᠤ ᠲᠤᠬᠢᠷᠠᠬᠤ ᠨᠢ ᠦᠳᠡ ᠲᠤᠮᠳᠠ ᠪᠠ ᠰᠦᠨᠢ ᠲᠤᠮᠳᠠ ᠶᠢᠨ ᠲᠤᠭᠳᠠᠮᠠᠯ ᠴᠠᠭ ᠤᠨ ᠪᠠᠷᠢᠮᠵᠢᠶ᠎ᠠ ᠳᠤ ᠲᠤᠬᠢᠷᠠᠬᠤ ᠠᠴᠠ ᠭᠠᠳᠠᠨ᠎ᠠ ᠪᠤᠰᠤᠳ ᠴᠠᠭ ᠳᠡᠮᠳᠡᠭ ᠨᠢ ᠴᠠᠭ ᠤᠨ ᠦᠩᠭᠡ ᠪᠠᠷ ᠲᠤᠭᠳᠠᠭᠠᠭᠳᠠᠨ᠎ᠠ᠃      ᠭᠡᠷ ᠲᠤ ᠲᠤᠰᠬᠤ ᠨᠠᠷᠠᠨ ᠤ ᠬᠡᠮᠵᠢᠶ᠎ᠡ ᠪᠠᠷ ᠴᠠᠭ ᠢ ᠪᠠᠷᠢᠮᠵᠢᠶᠠᠯᠠᠬᠤ ᠨᠢ᠄      ᠲᠤᠭᠤᠨᠤᠨ ᠳᠤ ᠨᠠᠷᠠ ᠲᠤᠰᠬᠤ      ᠤᠨᠢᠨ ᠲᠤᠯᠤᠭᠠᠢ ᠳᠤ ᠨᠠᠷᠠ ᠲᠤᠰᠬᠤ      ᠨᠠᠷᠠ ᠤᠨᠢ ᠲᠤᠮᠳᠠᠯᠠᠬᠤ      ᠨᠠᠷᠠ ᠬᠠᠨ᠎ᠠ ᠶᠢᠨ ᠲᠤᠯᠤᠭᠠᠢ ᠳᠤ ᠰᠠᠭᠤᠬᠤ ︵ᠪᠠᠭ᠎ᠠ ᠦᠳᠡ︶      ᠨᠠᠷᠠ ᠬᠠᠨ᠎ᠠ ᠲᠤᠮᠳᠠᠯᠠᠬᠤ      ᠨᠠᠷᠠ ᠪᠠᠭᠤᠬᠤ ︵ᠰᠢᠷᠳᠡᠭ ᠳᠡᠭᠡᠷ᠎ᠡ ᠲᠤᠰᠬᠤ᠂ ᠦᠳᠡ ᠪᠤᠯᠬᠤ︶      ᠨᠠᠷᠠ ᠪᠤᠴᠠᠬᠤ      ᠨᠠᠷᠠ ᠳᠡᠭᠳᠡᠶᠢᠬᠦ ︵ᠵᠡᠭᠦᠨ ᠤᠨᠢ ᠲᠤᠮᠳᠠᠯᠠᠬᠤ︶      ᠤᠨᠢᠨ ᠲᠤᠯᠤᠭᠠᠢ ᠳᠤ ᠨᠠᠷᠠ ᠰᠠᠭᠤᠬᠤ      ᠨᠠᠷᠠ ᠲᠤᠭᠤᠨᠤᠨ ᠳᠤ ᠰᠠᠭᠤᠬᠤ      ᠨᠠᠷᠠ ᠭᠡᠷ ᠠᠴᠠ ᠵᠢᠷᠭᠠᠬᠤ ᠵᠡᠷᠭᠡ ᠴᠠᠭ ᠪᠠᠷᠢᠮᠵᠢᠶᠠᠯᠠᠨ ᠬᠡᠯᠡᠯᠴᠡᠳᠡᠭ ᠶᠤᠮ᠃      ⒋ ᠡᠪᠡᠰᠦ ᠪᠡᠯᠴᠢᠭᠡᠷ ᠢᠶᠠᠨ ᠢᠯᠭᠠᠨ ᠲᠠᠨᠢᠬᠤ᠃ ᠡᠪᠡᠰᠦ ᠪᠡᠯᠴᠢᠭᠡᠷ ᠢ ᠲᠠᠭᠠᠵᠦ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠳᠠᠭ ᠦᠵᠦᠮᠦᠴᠢᠨ ᠮᠠᠯᠴᠢᠳ ᠤᠨ ᠪᠡᠯᠴᠢᠭᠡᠷ ᠤᠨ ᠢᠶᠠᠨ ᠡᠪᠡᠰᠦ ᠤᠷᠭᠤᠮᠠᠯ ᠢ ᠨᠡᠷᠡᠯᠡᠨ ᠳᠠᠨᠢᠬᠤ ᠪᠠ ᠦᠯ ᠰᠢᠮ᠎ᠡ ᠶᠢᠨ ᠰᠢᠨᠵᠢᠯᠡᠭᠡ ᠰᠤᠳᠤᠯᠤᠯ ᠴᠤ ᠶᠡᠬᠡᠳᠡ ᠬᠦᠭᠵᠢᠵᠦ ᠢᠷᠡᠭᠰᠡᠨ ᠶᠤᠮ᠃ ᠡᠪᠡᠰᠦ ᠶᠢ ᠢᠯᠭᠠᠨ ᠳᠠᠨᠢᠬᠤ ᠳᠤ ᠦᠵᠡᠵᠦ ᠳᠠᠨᠢᠬᠤ᠂ ᠨᠡᠷᠡᠯᠡᠵᠦ ᠮᠡᠳᠡᠬᠦ᠂ ᠠᠮᠳᠠᠯᠠᠵᠦ ᠳᠠᠨᠢᠬᠤ᠂ ᠴᠢᠨᠠᠷ ᠢᠶᠠᠷ ᠲᠠᠨᠢᠬᠤ ᠵᠡᠷᠭᠡ ᠪᠠᠭᠳᠠᠨ᠎ᠠ᠃ ᠡᠪᠡᠰᠦ ᠳᠠᠨᠢᠬᠤ ᠳᠤ ᠡᠷᠬᠡᠪᠰᠢ ᠨᠢᠳᠤᠯᠠᠵᠦ ᠳᠠᠨᠢᠬᠤ ᠬᠡᠷᠡᠭᠳᠡᠢ᠂ ᠡᠪᠡᠰᠦ ᠪᠦᠷᠢ ᠶᠢᠨ ᠤᠷᠭᠤᠯᠳᠠ ᠶᠢ ᠠᠵᠢᠭᠯᠠᠵᠦ᠂ ᠶᠠᠩᠵᠦ ᠲᠦᠷᠰᠦ ᠶᠢᠨ ᠪᠠᠶᠢᠳᠠᠯ ᠢ ᠨᠢ ᠦᠵᠡᠵᠦ ᠲᠤᠭᠳᠠᠭᠠᠨ᠂ ᠤᠷᠭᠤᠵᠦ ᠪᠠᠶᠢᠭ᠎ᠠ ᠨᠤᠭᠤᠭᠠᠨ ᠦᠶ᠎ᠡ ᠳᠡᠭᠡᠨ ᠶᠠᠮᠠᠷ ᠪᠠᠶᠢᠬᠤ︔ ᠬᠠᠳᠠᠵᠦ ᠰᠢᠷᠠᠯᠠᠵᠦ ᠪᠠᠶᠢᠭ᠎ᠠ ᠦᠶ᠎ᠡ ᠳᠡᠭᠡᠨ ᠶᠠᠮᠠᠷ ᠪᠤᠯᠬᠤ︔ ᠠᠯᠤᠰ ᠠᠴᠠ ᠪᠤᠶᠤ ᠮᠤᠷᠢᠨ ᠳᠡᠭᠡᠷ᠎ᠡ ᠠᠴᠠ ᠬᠠᠷᠠᠭᠰᠠᠨ ᠴᠤ ᠳᠠᠨᠢᠵᠦ ᠮᠡᠳᠡᠭᠰᠡᠨ ᠪᠠᠶᠢᠬᠤ᠃ ᠡᠪᠡᠰᠦ ᠤᠷᠭᠤᠮᠠᠯ ᠤᠨ ᠲᠦᠷᠦᠯ ᠵᠦᠢᠯ ᠢᠶᠠᠨ ᠨᠡᠷᠡᠯᠡᠵᠦ ᠵᠦᠪ ᠳᠠᠨᠢᠬᠤ ᠬᠡᠷᠡᠭᠳᠡᠢ᠂ ᠨᠠᠷᠠᠯᠠᠵᠦ ᠲᠤᠭᠳᠠᠭᠠᠬᠤ ᠪᠤᠯ ᠪᠤᠰᠤᠳ ᠲᠠᠢ ᠤᠶᠢᠯᠠᠭᠠᠯᠴᠠᠬᠤ ᠳᠤ ᠲᠤᠰᠠᠳᠠᠢ᠂ ᠦᠨᠳᠦᠰᠦᠨ ᠮᠡᠳᠡᠯᠭᠡ ᠶᠢᠨ ᠬᠤᠪᠢ ᠳᠤ ᠬᠡᠷᠡᠭᠯᠡᠬᠦ ᠳᠤ ᠲᠦᠬᠦᠮ ᠪᠠᠶᠢᠳᠠᠭ᠃ ᠠᠮᠳᠠᠯᠠᠵᠦ ᠳᠠᠨᠢᠬᠤ ᠳᠤ ᠦᠵᠡᠬᠦ ᠪᠢᠰᠢ ᠳᠡᠮᠳᠡᠷᠢᠬᠦ ᠴᠤ ᠪᠢᠰᠢ ᠬᠠᠷᠢᠨ ᠲᠤᠷ᠎ᠠ ᠶᠢᠨ ᠨᠢᠭᠡᠨ ᠡᠪᠡᠰᠦ ᠶᠢ ᠠᠮᠠᠨ ᠳᠠᠭᠠᠨ ᠬᠢᠵᠦ ᠵᠠᠵᠢᠯᠠᠨ ᠠᠮᠳᠠᠯᠠᠪᠠᠯ ᠶᠠᠮᠠᠷ ᠡᠪᠡᠰᠦ ᠶᠢ ᠮᠡᠳᠡᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ ᠲᠤᠰ ᠡᠪᠡᠰᠦᠨ ᠤ ᠦᠯ ᠰᠢᠮ᠎ᠡ ᠤᠨ ᠰᠠᠶᠢᠨ ᠮᠠᠭᠤ ᠶᠢ ᠴᠤ ᠮᠡᠳᠡᠵᠦ ᠪᠤᠯᠳᠠᠭ᠃ ᠡᠪᠡᠰᠦᠨ ᠤ ᠵᠢᠯ ᠤᠨ ᠤᠷᠭᠤᠯᠳᠠ ᠶᠢ ᠴᠢᠨᠠᠷ ᠢᠶᠠᠷ ᠲᠠᠨᠢᠬᠤ ᠳᠤ ᠡᠪᠡᠰᠦᠨ ᠤ ᠦᠩᠭᠡ ᠪᠤᠶᠤ ᠦᠷᠡᠯᠡᠬᠦ ᠪᠠᠷ ᠨᠢ ᠦᠵᠡᠵᠦ ᠰᠢᠨᠵᠢᠳᠡᠭ ᠪᠠᠶᠢᠨ᠎ᠠ᠃ ᠪᠡᠯᠴᠢᠭᠡᠷ ᠤᠨ ᠡᠪᠡᠰᠦᠨ ᠤ ᠦᠯ ᠰᠢᠮ᠎ᠡ ᠶᠢ ᠰᠢᠨᠵᠢᠬᠦ ᠲᠡᠭᠡᠨ᠂ ᠵᠤᠨ ᠨᠠᠮᠤᠷ ᠤᠨ ᠤᠯᠠᠷᠢᠯ ᠳᠤ ᠪᠤᠯ ᠪᠡᠯᠴᠢᠭᠡᠷ ᠤᠨ ᠨᠡᠶᠢᠳᠡᠮ ᠤᠨ ᠦᠩᠭᠡ ᠪᠠᠷ ᠠᠵᠢᠭᠯᠠᠨ ᠰᠢᠨᠵᠢᠳᠡᠭ᠂ ᠪᠡᠯᠴᠢᠭᠡᠷ ᠤᠨ ᠦᠩᠭᠡ ᠨᠢ ᠭᠦᠨ ᠨᠤᠭᠤᠭᠠᠨ ᠦᠩᠭᠡ ᠲᠠᠢ ᠪᠠᠶᠢᠪᠠᠯ ᠦᠯ ᠰᠢᠮ᠎ᠡ ᠪᠠᠷ ᠦᠳᠭᠡᠨ ᠪᠠᠶᠢᠭ᠎ᠠ ᠶᠢᠨ ᠳᠡᠮᠳᠡᠭ᠂ ᠬᠡᠷᠪᠡ ᠰᠢᠩᠭᠡᠨ ᠨᠤᠭᠤᠭᠠᠨ ᠴᠡᠩᠬᠡᠷ ᠦᠩᠭᠡ ᠲᠠᠢ ᠪᠠᠶᠢᠪᠠᠯ ᠰᠢᠮᠡᠯᠢᠭ ᠪᠤᠰᠤ ᠪᠠᠶᠢᠭ᠎ᠠ ᠶᠢᠨ ᠰᠢᠨᠵᠢ ᠪᠠᠶᠢᠳᠠᠯ ᠪᠤᠯᠤᠨ᠎ᠠ᠃ ᠪᠡᠯᠴᠢᠭᠡᠷ ᠢ ᠰᠢᠨᠵᠢᠬᠦ ᠳᠡᠭᠡᠨ ᠵᠠᠪᠠᠯ ᠦᠳᠡ ᠲᠤᠮᠳᠠ ᠳᠤ ᠠᠭᠤᠯᠠ ᠬᠤᠸᠠ ᠨᠤᠭᠤᠳ ᠤᠨ ᠠᠷᠤ ᠦᠪᠦᠷ᠂ ᠵᠤᠤ ᠰᠢᠯᠢ ᠶᠢᠨ ᠤᠷᠤᠢ ᠶᠢ ᠠᠵᠢᠭᠯᠠᠬᠤ ᠳᠤ ᠦᠪᠴᠢ ᠭᠦᠨ ᠨᠤᠭᠤᠭᠠᠨ ᠪᠠᠶᠢᠪᠠᠯ ᠡᠨᠡ ᠪᠡᠯᠴᠢᠭᠡᠷ ᠤᠨ ᠡᠪᠡᠰᠦ ᠨᠤᠭᠤᠭ᠎ᠠ ᠶᠢᠨ ᠤᠷᠭᠤᠴᠠ ᠬᠡᠯᠡᠯᠭᠡᠨ ᠦᠭᠡᠢ ᠰᠠᠶᠢᠨ ᠭᠡᠳᠡᠭ ᠢ ᠮᠡᠳᠡᠵᠦ ᠪᠤᠯᠤᠨ᠎ᠠ᠃ ᠡᠪᠦᠯ ᠬᠠᠪᠤᠷ ᠤᠨ ᠤᠯᠠᠷᠢᠯ ᠳᠤ ᠡᠪᠡᠰᠦᠨ ᠤ ᠬᠠᠳᠠᠭᠰᠠᠨ ᠬᠡᠯᠪᠡᠷᠢ᠂ ᠮᠠᠯ ᠤᠨ ᠲᠤᠭᠳᠠᠪᠤᠷᠢ ᠬᠢᠷᠢ ᠵᠡᠷᠭᠡ ᠪᠠᠶᠢᠬᠤ ᠶᠢ ᠦᠵᠡᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ ᠡᠪᠡᠰᠦ ᠶᠢ ᠰᠢᠳᠠᠭᠠᠵᠦ ᠦᠵᠡᠬᠦ ᠪᠤᠶᠤ ᠠᠮᠳᠠᠯᠠᠵᠦ ᠦᠵᠡᠬᠦ᠂ ᠡᠪᠡᠰᠦᠨ ᠤ ᠦᠷ᠎ᠡ ᠶᠢᠨ ᠤᠯᠠᠨ ᠴᠦᠭᠡᠨ ᠢᠶᠠᠷ ᠦᠵᠡᠵᠦ ᠰᠢᠨᠵᠢᠳᠡᠭ᠃ ᠡᠪᠡᠰᠦᠨ ᠤ ᠦᠩᠭᠡ ᠶᠢ ᠬᠤᠯᠠ ᠠᠴᠠ ᠦᠵᠡᠬᠦ ᠪᠤᠶᠤ ᠮᠤᠷᠢᠨ ᠳᠡᠭᠡᠷ᠎ᠡ ᠠᠴᠠ ᠠᠵᠢᠭᠯᠠᠬᠤ ᠳᠤ ᠬᠦᠷᠡᠩ ᠤᠯᠠᠭᠠᠨ ᠪᠠᠶᠢᠪᠠᠯ ᠦᠯ ᠰᠢᠮ᠎ᠡ ᠲᠠᠢ ᠪᠠᠶᠢᠬᠤ ᠶᠢᠨ ᠳᠡᠮᠳᠡᠭ᠂ ᠴᠠᠶᠢᠪᠤᠷ ᠰᠢᠷ᠎ᠠ ᠦᠵᠡᠭᠳᠡᠪᠡᠯ ᠦᠯ ᠰᠢᠮ᠎ᠡ ᠪᠠᠷ ᠠᠨᠠᠢ ᠶᠢᠨ ᠰᠢᠨᠵᠢ ᠢᠯᠡᠷᠡᠯ ᠪᠤᠯᠤᠨ᠎ᠡ᠃ ᠡᠪᠦᠯ ᠬᠠᠪᠤᠷ ᠤᠨ ᠬᠠᠳᠠᠭᠰᠠᠨ ᠡᠪᠡᠰᠦ ᠨᠢ ᠡᠷᠴᠢᠯᠡᠨ ᠬᠤᠶᠢᠯᠠᠷᠠᠭᠰᠨ᠋ᠠ ᠨᠢ ᠴᠢᠩᠭ᠎ᠠ ᠪᠤᠯ ᠪᠡᠯᠴᠢᠭᠡᠷ ᠤᠨ ᠦᠯ ᠰᠢᠮ᠎ᠡ ᠲᠠᠢ ᠪᠠᠶᠢᠬᠤ ᠶᠢ ᠬᠠᠷᠠᠭᠤᠯᠤᠨ᠎ᠠ᠂ ᠬᠡᠷᠪᠡ ᠡᠷᠴᠢ ᠨᠢ ᠰᠤᠯᠠ ᠰᠡᠯᠪᠡᠭᠡᠷ ᠪᠠᠶᠢᠪᠠᠯ ᠰᠢᠮ᠎ᠡ ᠮᠠᠭᠤᠳᠠᠢ ᠶᠢᠨ ᠰᠢᠨᠵᠢ᠃ ᠮᠠᠯ ᠰᠦᠷᠦᠭ ᠲᠤᠭᠳᠠᠪᠤᠷᠢᠳᠠᠢ᠂ ᠦᠷᠯᠦᠭᠡ ᠪᠤᠰᠬᠤ ᠳᠤ ᠬᠡᠪᠡᠯᠢ ᠨᠢ ᠲᠦᠭᠦᠷᠡᠩ᠂ ᠰᠠᠯᠬᠢ ᠰᠦᠷᠦᠬᠦ ᠳᠤ ᠵᠤᠷᠢᠭᠳᠠᠢ ᠪᠠᠶᠢᠪᠠᠯ ᠪᠡᠯᠴᠢᠭᠡᠷ ᠤᠨ ᠡᠪᠡᠰᠦᠨ ᠤ ᠰᠢᠮ᠎ᠡ ᠰᠠᠶᠢᠨ ᠪᠠᠶᠢᠬᠤ ᠶᠢᠨ ᠳᠡᠮᠳᠡᠭ᠂ ᠪᠡᠯᠴᠢᠭᠡᠷ ᠲᠡᠭᠡᠨ ᠲᠤᠭᠳᠠᠪᠤᠷᠢ ᠠᠯᠳᠠᠨ ᠭᠦᠶᠦᠬᠦ ᠪᠤᠶᠤ ᠦᠷᠯᠦᠭᠡ ᠶᠢᠨ ᠬᠡᠪᠡᠯᠢ ᠨᠢ ᠲᠤᠮᠳᠠᠭᠤᠷ ᠪᠤᠯᠬᠤ᠂ ᠤᠷᠤᠭᠤᠳᠠᠨ ᠭᠦᠶᠦᠬᠦ ᠮᠡᠳᠦ ᠶᠢᠨ ᠢᠯᠡᠷᠡᠯ ᠲᠠᠢ ᠪᠤᠯ ᠪᠡᠯᠴᠢᠭᠡᠷ ᠤᠨ ᠰᠢᠮ᠎ᠡ ᠠᠨᠠᠢ ᠪᠠᠶᠢᠬᠤ ᠶᠢᠨ ᠰᠢᠨᠵᠢ ᠪᠤᠯᠬᠤ ᠶᠤᠮ᠃ ᠡᠪᠡᠰᠦ ᠶᠢ ᠰᠢᠳᠠᠭᠠᠬᠤ ᠳᠤ ᠨᠤᠴᠤᠬᠤ ᠨᠢ ᠤᠳᠠᠭᠠᠨ᠂ ᠭᠠᠯ ᠤᠨ ᠰᠤᠷ ᠨᠢ ᠤᠯᠠᠭᠠᠨ ᠰᠢᠷ᠎ᠠ ᠦᠩᠭᠡ ᠲᠠᠢ᠂ ᠤᠳᠤᠭ᠎ᠠ ᠨᠢ ᠬᠠᠷᠠᠪᠳᠤᠷ ᠪᠠᠶᠢᠪᠠᠯ ᠦᠯ ᠰᠢᠮ᠎ᠡ ᠲᠠᠢ ᠶᠢᠨ ᠳᠡᠮᠳᠡᠭ᠂ ᠬᠡᠷᠪᠡ ᠨᠤᠴᠤᠬᠤ ᠨᠢ ᠲᠦᠷᠭᠡᠨ᠂ ᠭᠠᠯ ᠤᠨ ᠰᠤᠷ ᠨᠢ ᠴᠠᠭᠠᠨ ᠰᠢᠷᠠᠪᠳᠤᠷ᠂ ᠤᠳᠤᠭ᠎ᠠ ᠨᠢ ᠰᠢᠩᠭᠡᠨ ᠴᠠᠶᠢᠪᠤᠷ ᠪᠠᠶᠢᠪᠠᠯ ᠦᠯ ᠰᠢᠮ᠎ᠡ ᠦᠭᠡᠢ ᠶᠢᠨ ᠰᠢᠨᠵᠢ᠃ ᠡᠪᠡᠰᠦ ᠶᠢ ᠵᠠᠵᠢᠯᠠᠵᠦ ᠦᠵᠡᠬᠦ ᠳᠤ᠂ ᠭᠠᠰᠢᠭᠤᠨ ᠨᠤᠯᠤᠭᠤᠨ ᠨᠤᠭᠤᠭ᠎ᠠ ᠶᠢᠨ ᠠᠮᠳᠠ ᠎ ᠲᠠᠢ ᠪᠦᠭᠡᠳ ᠵᠠᠵᠢᠯᠤᠭᠰᠠᠨ ᠡᠪᠡᠰᠦ ᠪᠠᠨ ᠨᠢᠯᠪᠤᠵᠦ ᠦᠵᠡᠪᠡᠯ ᠡᠭᠡᠬᠦᠨ ᠴᠠᠢ ᠲᠠᠢ ᠠᠳᠠᠯᠢ ᠪᠤᠳᠤᠭ ᠰᠠᠭᠤᠭᠰᠠᠨ ᠪᠠᠶᠢᠪᠠᠯ ᠦᠯ ᠰᠢᠮ᠎ᠡ ᠲᠠᠢ ᠶᠢᠨ ᠳᠡᠮᠳᠡᠭ᠂ ᠬᠡᠷᠪᠡ ᠵᠠᠵᠢᠯᠤᠭᠰᠠᠨ ᠡᠪᠡᠰᠦ ᠨᠢ ᠳᠠᠮᠠᠢ ᠠᠮᠳᠠ ᠦᠭᠡᠢ ᠪᠦᠭᠡᠳ ᠨᠢᠯᠪᠤᠬᠤ ᠳᠤ ᠦᠩᠭᠡ ᠨᠢ ᠬᠤᠪᠢᠷᠠᠬᠤ ᠦᠭᠡᠢ ᠪᠠᠶᠢᠪᠠᠯ ᠦᠯ ᠰᠢᠮ᠎ᠡ ᠦᠭᠡᠢ ᠶᠢᠨ ᠰᠢᠨᠵᠢ ᠪᠤᠯᠤᠨ᠎ᠠ᠃  
 
ᠢᠷᠡᠯᠲᠡ᠄ ᠴᠢᠩᠬᠢᠰ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠦᠵᠦᠮᠦᠴᠢᠨ ᠨᠡᠬᠦᠳᠡᠯᠴᠢᠣᠨ ᠤᠨ ᠲᠦᠯᠡᠰᠢ ᠲᠣᠯᠠᠭᠠᠯᠠᠭ᠎ᠠ ᠶᠢᠨ ᠢᠷᠡᠯᠳᠡ — ᠠᠷᠭᠠᠯ ᠬᠤᠷᠭᠤᠯ — ᠁
ᠲᠡᠮᠡᠭᠡ ᠲᠠᠢ ᠬᠤᠯᠪᠤᠭᠳᠠᠬᠤ ᠴᠠᠭᠡᠷ ᠪᠡᠯᠭᠡᠳᠡᠯ ᠤᠨ ᠶᠣᠰᠣ ᠵᠠᠩᠰᠢᠯ
ᠵᠤᠨ ᠤ ᠦᠵᠡᠮᠵᠢ
ᠡᠷᠳᠡᠨ ᠤ ᠪᠠᠶᠢᠪᠠᠯᠢᠭ ᠬᠤᠳᠠ
ᠨᠤᠳᠤᠭ ‍ᠤᠨ ᠬᠦᠮᠦᠰ ᠤᠰᠤᠨ ‍ᠤ ᠬᠡᠮᠵᠢᠶ᠎ᠡ ᠁
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号