ᠣᠩᠨᠢᠭᠤᠳ ᠬᠣᠰᠢᠭᠤ ᠪᠣᠯ ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠤᠯᠠᠭ᠋ᠠᠨᠬᠠᠳᠠ ᠬᠣᠲᠠ ᠵᠢᠨ ᠳᠤᠮᠳᠠ ᠪᠡᠶᠡ᠂ ᠶᠡᠬᠡ ᠬᠢᠩᠭ᠋ᠠᠨ ᠳᠠᠪᠠᠭ᠋ᠠᠨᠤ ᠪᠠᠷᠠᠭᠤᠨ ᠡᠮᠦᠨᠡ ᠦᠵᠦᠭᠦᠷ ᠪᠣᠯᠣᠨ ᠴᠢᠯᠠᠭᠤᠲᠤ ᠠᠭᠤᠯᠠ ᠨᠢᠷᠤᠭᠤᠨᠤ ᠬᠣᠶ᠋ᠢᠲᠤ ᠦᠵᠦᠭᠦᠷᠤᠨ ᠠᠭᠤᠯᠵᠠᠷ᠂ ᠪᠠᠷᠠᠭᠤᠨ ᠯᠢᠶᠣᠤ ᠾᠧ ᠭᠣᠣᠯᠤᠨ ᠳᠡᠭᠡᠳᠦ ᠤᠷᠤᠰᠬᠠᠯ᠂ ᠬᠣᠷᠴᠢᠨᠤ ᠡᠯᠡᠰᠦᠷᠬᠡᠭ ᠭᠠᠵᠠᠷᠤᠨ ᠪᠠᠷᠠᠭᠤᠨ ᠵᠠᠬᠠᠳᠤ ᠪᠠᠶ᠋ᠢᠷᠢᠰᠢᠳᠠᠭ᠃ ᠨᠤᠲᠤᠭ ᠳᠡᠪᠢᠰᠬᠡᠷᠤᠨ ᠶᠡᠷᠦᠩᠬᠡᠢ ᠲᠠᠯᠠᠪᠠᠢ 1.2 ᠲᠦᠮᠡᠨ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲᠷ᠂ 16 ᠰᠤᠮᠤ ᠰᠢᠶᠠᠩ ᠪᠠᠯᠭ᠋ᠠᠰᠤ ᠵᠡᠭᠡᠯᠢ ᠭᠤᠳᠤᠮᠵᠢ᠂ 48.6 ᠲᠦᠮᠡᠨ ᠬᠥᠮᠦᠨ ᠠᠮᠠᠲᠠᠢ ᠣᠯᠠᠨ ᠦᠨᠳᠦᠰᠦᠲᠡᠨ ᠲᠥᠪᠯᠡᠷᠡᠨ ᠰᠠᠭᠤᠷᠢᠰᠢᠭᠰᠠᠨ ᠭᠠᠵᠠᠷ ᠪᠣᠯᠣᠨᠠ᠃ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠠᠮᠢ ᠠᠬᠤᠢ ᠰᠠᠶ᠋ᠢᠨ ᠣᠷᠣᠰᠢᠨ ᠰᠠᠭᠤᠷᠢᠰᠢᠬᠤᠳᠤ ᠲᠠᠭ᠋ᠠᠲᠠᠢ ᠰᠢᠶᠠᠨᠤ ᠬᠣᠲᠠ ᠵᠢᠨ ᠵᠢᠱ᠌ᠢᠶᠡ ᠦᠵᠡᠭᠦᠯᠬᠦ ᠬᠣᠰᠢᠭᠤ ᠰᠢᠶᠠᠨ᠂ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠦᠨᠳᠦᠰᠦᠲᠡᠨᠤ ᠪᠦᠯᠬᠦᠮᠳᠡᠯ ᠳᠠᠪᠰᠢᠯᠲᠠ ᠵᠢᠨ ᠵᠢᠱ᠌ᠢᠶᠡ ᠦᠵᠡᠭᠦᠯᠬᠦ ᠬᠣᠰᠢᠭᠤ ᠵᠡᠷᠭᠡ ᠢᠷᠠᠭᠤ ᠠᠯᠳᠠᠷᠢ ᠤᠷᠢᠳ ᠬᠣᠵᠢᠳ ᠬᠦᠷᠲᠡᠵᠡᠢ᠃
ᠣᠩᠨᠢᠭᠤᠳ ᠬᠣᠰᠢᠭᠤᠨᠤ ᠲᠡᠦᠬᠡ ᠰᠣᠶᠣᠯᠨᠢ ᠤᠷᠲᠤ ᠤᠳᠠᠭ᠋ᠠᠨ ᠭᠡᠷᠡᠯ ᠰᠠᠴᠤᠷᠠᠩᠭᠤᠢ ᠪᠢᠯᠡ᠃ 《ᠣᠩᠨᠢᠭᠤᠳ》 ᠭᠡᠳᠡᠭ ᠨᠡᠷᠡᠨᠢ ᠮᠣᠩᠭᠣᠯ ᠦᠭᠡ᠂ ᠬᠢᠲᠠᠳᠴᠢᠯᠠᠪᠠᠯ 《ᠸᠠᠩᠨᠤᠭᠤᠳᠤᠨ ᠴᠢᠭᠤᠯᠳᠠᠭ ᠭᠠᠵᠠᠷ》 ᠬᠡᠮᠡᠬᠦ ᠤᠳᠬᠠᠲᠠᠢ᠃ ᠬᠣᠰᠢᠭᠤᠨᠤ ᠬᠢᠯᠢ ᠳᠣᠲᠣᠷᠠᠠᠴᠠ ᠤᠯᠤᠰᠤᠨ ᠡᠷᠳᠡᠨᠢ ᠵᠢᠨ ᠳᠠᠰᠤᠨ ᠲᠡᠦᠬᠡᠨ ᠳᠤᠷᠠᠰᠬᠠᠯᠲᠤ ᠡᠳ᠋ 《ᠳᠤᠮᠳᠠᠳᠤ ᠵᠢᠨ ᠠᠩᠬᠠᠳᠠᠭᠴᠢ ᠯᠤᠤ — ᠨᠣᠮᠢᠨ ᠬᠠᠰ ᠯᠤᠤ》 ᠪᠣᠯᠣᠨ 《ᠳᠤᠮᠳᠠᠳᠤ ᠵᠢᠨ ᠠᠩᠬᠠᠳᠠᠭᠴᠢ
ᠭᠠᠷᠤᠳᠢ — ᠸᠠᠭ᠋ᠠᠷᠤᠨ ᠭᠠᠷᠤᠳᠢ ᠴᠣᠮᠣ》 ᠢᠯᠡᠷᠡᠭᠰᠡᠨᠠᠴᠠ 《ᠯᠤᠤ ᠭᠠᠷᠤᠳᠢ ᠵᠢᠨ ᠨᠤᠲᠤᠭ》 ᠬᠡᠮᠡᠨ ᠠᠯᠳᠠᠷᠰᠢᠵᠠᠢ᠃ ᠴᠦᠨ ᠴᠢᠦ ᠵᠢᠨ ᠦᠶᠡᠠᠴᠠ ᠰᠦᠢ ᠤᠯᠤᠰ ᠬᠦᠷᠲᠡᠯᠡ᠂ ᠤᠷᠢᠳ ᠬᠣᠵᠢᠳ ᠳ᠋ᠦᠩᠬᠤ᠂ ᠦᠬᠤᠸᠠᠨ᠂ ᠰᠢᠶᠠᠨᠪᠧᠢ᠂ ᠺᠦᠮᠦᠰᠢ᠂ ᠬᠢᠳᠠᠨ ᠵᠡᠷᠭᠡ ᠦᠨᠳᠦᠰᠦᠲᠡᠨᠤ ᠨᠡᠭᠦᠳᠡᠯ ᠮᠠᠯᠵᠢᠯᠤᠨ ᠭᠠᠵᠠᠷ ᠨᠤᠲᠤᠭ ᠪᠠᠶ᠋ᠢᠵᠤ ᠥᠩᠭᠡᠷᠡᠭᠰᠡᠨ ᠪᠢᠯᠡ᠃ ᠯᠢᠶᠣᠤ ᠬᠠᠭ᠋ᠠᠨᠲᠤ ᠲᠥᠷᠥ ᠵᠢᠨ ᠰᠢᠶᠣᠣ ᠲᠠᠶ᠋ᠢᠬᠡᠦᠪᠠᠷ ᠣᠩᠨᠢᠭᠤᠳ ᠬᠣᠰᠢᠭᠤᠨᠤ ᠬᠢᠯᠢ ᠳᠣᠲᠣᠷᠠ ᠤᠷᠢᠳ ᠬᠣᠵᠢᠳ ᠶᠦᠩ ᠵᠸᠦ ᠬᠣᠲᠠ᠂ ᠹᠤᠩ ᠵᠸᠦ ᠬᠣᠲᠠ ᠵᠢ ᠪᠠᠶ᠋ᠢᠭᠤᠯᠵᠤ ᠥᠩᠭᠡᠷᠡᠵᠡᠢ᠃ ᠶᠤᠸᠠᠨ ᠤᠯᠤᠰᠤᠨ ᠦᠶᠡᠳᠤ᠂ ᠬᠣᠩᠭᠢᠷᠠᠳ ᠠᠶ᠋ᠢᠮᠠᠭᠤᠨ ᠡᠵᠡᠮᠰᠢᠯ ᠭᠠᠵᠠᠷ ᠪᠣᠯᠣᠨ ᠯᠦ᠍ ᠸᠠᠩᠤᠨ ᠬᠤᠪᠢᠳᠠᠯ ᠭᠠᠵᠠᠷ ᠪᠠᠶ᠋ᠢᠵᠤ᠂ ᠳᠤᠮᠳᠠᠳᠤ ᠤᠯᠤᠰᠤᠨ ᠲᠡᠦᠬᠡᠨᠳᠠᠬᠢ ᠬᠠᠮᠤᠭᠤᠨ ᠠᠩᠬᠠᠨᠤ ᠡᠮᠡᠭᠲᠡᠢ ᠬᠣᠷᠢᠶᠠᠨ ᠬᠠᠳᠠᠭ᠋ᠠᠯᠠᠭᠴᠢ ᠪᠣᠯᠬᠤ ᠶᠤᠸᠠᠨ ᠤᠯᠤᠰᠤᠨ ᠡᠭᠡᠴᠢᠮᠡᠳ ᠭᠦᠩᠵᠦ ᠰᠡᠩᠭᠡ ᠷᠠᠭᠢ ᠡᠨᠳᠡ ᠮᠣᠷᠳᠠᠵᠤ ᠢᠷᠡᠭᠰᠡᠨ ᠪᠢᠯᠡ᠃ ᠶᠤᠸᠠᠨ ᠵᠸᠨᠤ ᠲᠡᠷᠢᠭᠦᠨ ᠣᠨᠳᠤ ᠣᠳᠣ ᠵᠢᠨ ᠪᠣᠷᠣᠬᠣᠲᠠ ᠵᠢᠨ ᠪᠠᠷᠠᠭᠤᠨ ᠬᠣᠶ᠋ᠢᠲᠤ ᠵᠠᠬᠠᠳᠤ ᠪᠠᠶ᠋ᠢᠭᠤᠯᠤᠭᠰᠠᠨ ᠴᠢᠤᠸᠠᠨ ᠨᠢᠩ ᠬᠣᠲᠠᠨᠢ ᠲᠤᠬᠠᠢ ᠵᠢᠨ ᠦᠶᠡᠳᠤ ᠮᠠᠨᠤ ᠤᠯᠤᠰᠤᠨ ᠤᠮᠠᠷᠠᠲᠤ ᠣᠷᠣᠨᠳᠠᠬᠢ ᠴᠢᠬᠤᠯᠠ ᠪᠠᠯᠭ᠋ᠠᠰᠤ ᠪᠣᠯᠵᠤ ᠪᠠᠶ᠋ᠢᠭᠰᠠᠨ ᠶᠤᠮ᠃ ᠣᠳᠣᠬᠠᠨᠳᠤ᠂ ᠬᠠᠭᠤᠴᠢᠨ ᠴᠢᠯᠠᠭᠤᠨ ᠵᠡᠪᠰᠡᠭᠤᠨ ᠦᠶᠡ ᠵᠢᠨ ᠡᠷᠲᠡᠨᠤ ᠬᠥᠮᠦᠨ ᠲᠥᠷᠥᠯᠬᠢᠲᠡᠨᠤ ᠠᠮᠢᠳᠤᠷᠠᠵᠤ ᠪᠠᠶ᠋ᠢᠭᠰᠠᠨ ᠱᠠᠩ ᠶᠣᠣ ᠠᠭᠤᠢ ᠵᠢᠨ ᠪᠠᠭᠤᠷᠢ᠂ ᠯᠢᠶᠣᠤ ᠤᠯᠤᠰᠤᠨ ᠶᠦᠩ ᠵᠸᠦ ᠬᠣᠲᠠ ᠵᠢᠨ ᠪᠠᠭᠤᠷᠢ᠂ ᠶᠤᠸᠠᠨ ᠤᠯᠤᠰᠤᠨ ᠵᠢᠢ ᠭᠦᠸᠸ ᠭᠦᠩ ᠵᠠᠩ ᠶᠢᠩ ᠷᠦᠢ ᠵᠢᠨ ᠣᠩᠭᠣᠨ᠂ ᠲᠡᠭᠷᠢ ᠲᠡᠳᠬᠦᠭᠴᠢ ᠬᠠᠭ᠋ᠠᠨᠤ ᠵᠡᠭᠦᠨᠰᠢ ᠵᠤᠭ᠋ᠠᠴᠠᠷᠠ ᠶᠠᠪᠤᠬᠤᠳᠤᠪᠠᠨ ᠪᠢᠴᠢᠭᠰᠡᠨ ᠰᠢᠶᠠᠩ ᠱᠦᠢᠳᠠᠬᠢ ᠬᠠᠳᠠᠨ ᠰᠡᠶ᠋ᠢᠯᠦᠮᠡᠯ ᠰᠢᠯᠦᠭ᠂ ᠴᠢᠩ ᠤᠯᠤᠰᠤᠨ ᠦᠶᠡ ᠵᠢᠨ ᠡᠰᠡᠷᠸᠠ ᠵᠢᠨ ᠰᠦᠮᠡ ᠵᠡᠷᠭᠡ ᠡᠯᠡ ᠲᠥᠷᠥᠯᠤᠨ ᠲᠡᠦᠬᠡ ᠵᠢᠨ ᠳᠤᠷᠠᠰᠬᠠᠯᠲᠤ ᠵᠦᠢ᠍ᠯᠡᠰ ᠬᠠᠭᠤᠴᠢ ᠦᠯᠡᠳᠡᠭᠳᠡᠯ 413 ᠪᠠᠶ᠋ᠢᠵᠤ᠂ ᠡᠭᠦᠨᠤ ᠳᠣᠲᠣᠷᠠᠠᠴᠠ 3ᠨᠢ ᠤᠯᠤᠰᠤᠨ ᠳᠠᠰᠤᠨ ᠭᠣᠣᠯᠳᠠᠯᠭ᠋ᠠᠲᠤ ᠲᠡᠦᠬᠡᠨ ᠳᠤᠷᠠᠰᠬᠠᠯᠲᠤ ᠵᠦᠢ᠍ᠯᠤᠨ ᠬᠠᠮᠠᠭ᠋ᠠᠯᠠᠯᠲᠠ ᠵᠢᠨ ᠨᠢᠭᠡᠴᠢ᠂ 7ᠨᠢ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠳᠠᠰᠤᠨ ᠲᠡᠦᠬᠡᠨ ᠳᠤᠷᠠᠰᠬᠠᠯᠲᠤ ᠵᠦᠢ᠍ᠯᠤᠨ ᠬᠠᠮᠠᠭ᠋ᠠᠯᠠᠯᠲᠠ ᠵᠢᠨ ᠨᠢᠭᠡᠴᠢ᠂ 14ᠨᠢ ᠬᠣᠲᠠ ᠵᠢᠨ ᠳᠠᠰᠤᠨ ᠲᠡᠦᠬᠡᠨ ᠳᠤᠷᠠᠰᠬᠠᠯᠲᠤ ᠵᠦᠢ᠍ᠯᠤᠨ ᠬᠠᠮᠠᠭ᠋ᠠᠯᠠᠯᠲᠠ ᠵᠢᠨ ᠨᠢᠭᠡᠴᠢ᠂ 66ᠨᠢ ᠬᠣᠰᠢᠭᠤᠨᠤ ᠳᠠᠰᠤᠨ ᠲᠡᠦᠬᠡᠨ ᠳᠤᠷᠠᠰᠬᠠᠯᠲᠤ ᠵᠦᠢ᠍ᠯᠤᠨ ᠬᠠᠮᠠᠭ᠋ᠠᠯᠠᠯᠲᠠ ᠵᠢᠨ ᠨᠢᠭᠡᠴᠢ ᠪᠣᠯᠣᠭᠰᠠᠨ ᠪᠠᠶ᠋ᠢᠨᠠ᠃
ᠣᠩᠨᠢᠭᠤᠳ ᠬᠣᠰᠢᠭᠤ ᠪᠣᠯ ᠭᠡᠰᠡᠷ ᠰᠣᠶᠣᠯᠤᠨ ᠡᠭᠦᠰᠦᠯᠤᠨ ᠣᠷᠣᠨᠤ ᠨᠢᠭᠡᠨᠢ ᠪᠣᠯᠣᠨᠠ᠃ ᠭᠡᠰᠡᠷᠨᠢ ᠡᠨᠳᠡ ᠬᠡᠳᠦᠨ ᠵᠠᠭᠤᠨ ᠵᠢᠯ ᠵᠶ᠋ᠠᠷ ᠤᠯᠠᠮᠵᠢᠯᠠᠭᠳᠠᠵᠤ ᠲᠡᠩᠨᠡᠭᠦᠷᠤᠨ ᠭᠣᠣᠯᠤᠨ ᠲᠠᠯᠠ ᠨᠤᠲᠤᠭᠠᠴᠠ ᠰᠢᠷᠠᠮᠥ᠋ᠷᠡᠨᠤ ᠳᠠᠨᠵᠢ ᠬᠦᠷᠲᠡᠯᠡ᠂ ᠪᠥᠭᠡᠷᠡᠩᠬᠡᠢ ᠠᠭᠤᠯᠠᠠᠴᠠ ᠬᠠᠷᠠ ᠵᠢᠨ ᠠᠭᠤᠯᠠᠨᠤ ᠬᠠᠳᠠᠨ ᠵᠢᠷᠤᠭ ᠬᠦᠷᠲᠡᠯᠡ ᠪᠦᠷ ᠭᠡᠰᠡᠷᠤᠨ ᠤᠯᠠ ᠮᠥᠷ ᠵᠶ᠋ᠠᠷ ᠳᠦᠭᠦᠷᠴᠦ ᠬᠥᠮᠦᠨ ᠠᠷᠠᠳᠨᠢ ᠭᠡᠰᠡᠷᠤᠨ ᠪᠠᠭ᠋ᠠᠲᠤᠷᠯᠢᠭ ᠳᠦᠷᠢ ᠵᠢ ᠰᠡᠳᠬᠢᠯ ᠵᠢᠷᠦᠬᠡᠨᠳᠤᠪᠠᠨ ᠰᠢᠩᠭᠡᠭᠡᠨ ᠠᠪᠤᠭᠰᠠᠨ ᠪᠠᠶ᠋ᠢᠨᠠ᠃ 20 ᠳ᠋ᠤᠭ᠋ᠠᠷ ᠵᠠᠭᠤᠨᠤ ᠳᠥᠴᠢᠭᠡᠳ ᠣᠨ ᠪᠣᠯᠲᠠᠯᠠ ᠪᠣᠷᠤᠬᠣᠲᠠ ᠪᠠᠯᠭ᠋ᠠᠰᠤᠨᠳᠤ ᠭᠡᠰᠡᠷᠤᠨ ᠰᠦᠮᠡ （ᠭᠤᠸᠠᠨ ᠯᠣᠣᠶᠸ ᠵᠢᠨ ᠰᠦᠮᠡ） ᠪᠠᠢ᠌ᠭᠰᠠᠨ ᠪᠥᠭᠡᠳ ᠲᠡᠨᠳᠡᠬᠢ ᠬᠥᠮᠦᠨ ᠠᠷᠠᠳ ᠬᠤᠷᠠ ᠪᠣᠷᠣᠭ᠋ᠠᠨ ᠭᠣᠶᠣᠬᠤ ᠮᠠᠯ ᠰᠦᠷᠦᠭ ᠵᠶ᠋ᠠᠨ ᠬᠢᠵᠢᠭ ᠲᠠᠬᠤᠯᠠᠴᠠ ᠵᠠᠢ᠌ᠯᠠᠭᠤᠯᠬᠤᠪᠠᠷ ᠡᠷᠭᠦᠯ ᠲᠠᠬᠢᠯ ᠵᠶ᠋ᠠᠨ ᠠᠪᠤᠭ᠋ᠠᠳ ᠭᠡᠰᠡᠷᠤᠨ ᠰᠦᠮᠡᠳᠤ ᠬᠦᠷᠴᠦ ᠲᠠᠬᠢᠯᠭᠠ ᠬᠢᠳᠡᠭ ᠪᠠᠶ᠋ᠢᠯᠠ᠃
ᠣᠩᠨᠢᠭᠤᠳ ᠬᠣᠰᠢᠭᠤᠨᠳᠤ ᠭᠡᠰᠡᠷᠤᠨ ᠳᠣᠮᠣᠭ ᠪᠣᠯᠣᠨ ᠬᠠᠭᠤᠴᠢ ᠦᠯᠡᠳᠡᠭᠳᠡᠯ ᠶᠡᠬᠡ ᠣᠯᠠᠨ ᠪᠠᠶ᠋ᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ ᠭᠤᠤᠷᠰᠤ᠂ ᠠᠰᠢᠬᠠᠨ᠂ ᠬᠠᠶ᠋ᠢᠯᠠᠰᠤ᠂ ᠰᠢᠨᠡ ᠰᠦᠮᠡ᠂ ᠤᠳᠠᠨ ᠬᠤᠸᠠ᠂ ᠪᠣᠷᠤᠬᠣᠲᠠ ᠵᠢᠨ ᠬᠠᠪᠢᠪᠠᠷ ᠡᠷᠳᠡᠨᠢ ᠠᠭᠤᠯᠠ᠂ ᠭᠡᠷ ᠴᠢᠯᠠᠭᠤ ᠬᠠᠳᠠ᠂ ᠵᠢᠷᠦᠬᠡ ᠠᠭᠤᠯᠠ᠂ ᠭᠡᠰᠡᠷᠤᠨ ᠮᠣᠷᠢᠨᠤ ᠮᠥᠷ᠂ ᠱᠠᠬᠠᠢ ᠬᠠᠳᠠ᠂ ᠭᠡᠰᠡᠷᠤᠨ ᠮᠣᠷᠢᠨ ᠤᠶᠠᠭᠠ ᠵᠡᠷᠭᠡ ᠭᠡᠰᠡᠷᠤᠨ ᠳᠣᠮᠣᠭᠲᠠᠢ ᠠᠭᠤᠯᠠ ᠤᠰᠤ 90 ᠭᠠᠷᠤᠢ ᠪᠠᠶ᠋ᠢᠳᠠᠭ᠃ ᠡᠳᠡᠭᠡᠷ ᠦᠯᠢᠭᠡᠷ ᠳᠣᠮᠣᠭᠨᠢ ᠲᠡᠨᠳᠡᠬᠢ ᠬᠥᠮᠦᠨ ᠠᠷᠠᠳ ᠡᠨᠡ ᠬᠦ᠌ ᠪᠠᠭ᠋ᠠᠲᠤᠷᠯᠢᠭ ᠳᠦᠷᠢ ᠵᠢ ᠪᠢᠰᠢᠷᠡᠨ ᠰᠢᠲᠦᠳᠡᠭᠢ ᠭᠦᠢ᠍ᠴᠡᠳ ᠬᠠᠷᠠᠭᠤᠯᠵᠤ ᠪᠠᠶ᠋ᠢᠨᠠ᠃ ᠵᠤᠳ ᠰᠢᠭᠤᠷᠭᠠ ᠪᠣᠯᠵᠤ ᠮᠠᠯ ᠤᠨᠤᠭᠠᠳᠤ ᠡᠪᠡᠳᠴᠢᠨ ᠬᠢᠵᠢᠭ ᠳᠡᠯᠭᠡᠷᠡᠵᠦ ᠭᠠᠢ ᠪᠠᠷᠴᠢᠳ ᠪᠣᠯᠬᠤ ᠪᠦᠷᠢ ᠮᠠᠯᠴᠢᠳ 《ᠭᠡᠰᠡᠷᠤᠨ ᠲᠤᠭᠤᠵᠢ》 ᠵᠢ ᠳᠠᠭᠤᠳᠠᠭᠤᠯᠵᠤ ᠪᠦᠭᠦᠳᠡᠭᠡᠷ ᠲᠣᠭᠣᠷᠢᠨ ᠰᠠᠭᠤᠭ᠋ᠠᠳ ᠡᠨᠡ ᠬᠦ᠌ ᠮᠠᠯ ᠤᠨᠤᠭᠠ ᠵᠢ ᠭᠠᠢ ᠭᠠᠮᠰᠢᠭᠠᠴᠠ ᠵᠠᠶ᠋ᠢᠯᠠᠭᠤᠯᠵᠤ ᠥᠨᠢᠷ ᠥᠭᠡᠳᠡ ᠥᠰᠭᠡᠳᠡᠭ ᠪᠠᠭ᠋ᠠᠲᠤᠷᠤᠨ ᠦᠯᠢᠭᠡᠷᠢ ᠰᠦᠵᠦᠭᠯᠡᠨ ᠰᠣᠨᠣᠰᠳᠠᠭ ᠪᠠᠶ᠋ᠢᠯᠠ᠃ ᠣᠩᠨᠢᠭᠤᠳ ᠬᠣᠰᠢᠭᠤᠨᠳᠤ ᠡᠷᠲᠡ ᠦᠶᠡᠠᠴᠠ ᠠᠪᠤᠭ᠋ᠠᠳ ᠭᠡᠰᠡᠷᠴᠢ ᠣᠯᠠᠨ ᠪᠠᠢ᠌ᠳᠠᠭ᠃ ᠳᠡᠭᠡᠷᠡ ᠵᠠᠭᠤᠨᠤ ᠲᠠᠪᠢᠭ᠋ᠠᠳ ᠣᠨᠳᠤ᠂ ᠪᠦᠯᠢᠶᠡᠨ ᠰᠤᠮᠤ ᠵᠢᠨ ᠥᠪᠥᠷᠪᠤᠯᠠᠭᠲᠤ ᠮᠢᠯᠲᠠᠩ ᠭᠡᠭᠴᠢ ᠬᠣᠯᠠ ᠣᠶ᠋ᠢᠷᠠᠳᠤ ᠠᠯᠳᠠᠷᠲᠠᠢ ᠭᠡᠰᠡᠷᠴᠢ ᠪᠠᠶ᠋ᠢᠭᠰᠠᠨ ᠪᠢᠯᠡ᠃ ᠣᠳᠣ ᠣᠩᠨᠢᠭᠤᠳ ᠬᠣᠰᠢᠭᠤᠨᠳᠤ ᠳ᠋ᠠᠮᠪᠠ᠂ ᠣᠳᠣᠨᠪᠠᠭ᠋ᠠᠲᠤᠷ᠂ ᠰᠠᠢ᠌ᠨᠸᠴᠢᠷ᠂ ᠭᠡᠨᠳᠦᠨ᠂ ᠮᠠᠨᠳᠤᠬᠤ᠂ ᠮᠥᠷᠡᠨ᠂ ᠡᠷᠬᠡᠮᠠᠨᠳᠤᠯᠠ ᠵᠡᠷᠭᠡ 20 ᠰᠢᠬᠠᠭᠤ ᠭᠡᠰᠡᠷᠴᠢ ᠪᠣᠢ᠃ ᠠᠮᠠᠨ ᠤᠯᠠᠮᠵᠢᠯᠠᠯᠤᠨ 《ᠭᠡᠰᠡᠷ》ᠠᠴᠠ ᠭᠠᠳᠠᠨᠠ᠂ 《ᠭᠡᠰᠡᠷ》 ᠪᠠᠰᠠ ᠪᠢᠴᠢᠭᠤᠨ ᠬᠡᠯᠪᠡᠷᠢᠪᠠᠷ ᠤᠯᠠᠮᠵᠢᠯᠠᠭᠳᠠᠨ ᠢᠷᠠᠵᠠᠢ᠃ ᠪᠢᠴᠢᠭᠤᠨ ᠬᠡᠯᠪᠡᠷᠢ ᠵᠢᠨ 《ᠭᠡᠰᠡᠷ》ᠨᠢ ᠬᠠᠭᠤᠳᠠᠰᠤ ᠬᠡᠮᠵᠢᠶᠡ ᠠᠪᠤᠷᠭᠤ ᠲᠣᠮᠣ ᠮᠥᠷᠲᠡᠭᠡᠨᠪᠠᠷ ᠬᠡᠪᠯᠡᠯ （ᠪᠢᠴᠢᠮᠡᠯ） ᠣᠯᠠᠨ ᠵᠦᠢ᠍ᠯ ᠪᠠᠶ᠋ᠢᠳᠠᠭ᠃ ᠣᠩᠨᠢᠭᠤᠳ ᠬᠣᠰᠢᠭᠤᠨᠤ ᠭᠡᠰᠡᠷ ᠰᠣᠶᠣᠯᠤᠨ ᠣᠷᠳᠣᠨ 1716 ᠣᠨ （ᠡᠩᠬᠡ ᠠᠮᠤᠭᠤᠯᠠᠩᠤᠨ ᠲᠠᠪᠢᠨ ᠲᠠᠪᠤᠳᠤᠭ᠋ᠠᠷ ᠣᠨ）ᠤ ᠪᠡᠭᠡᠵᠢᠩ ᠮᠣᠳᠣᠨᠪᠠᠷᠤᠨ 《ᠠᠷᠪᠠᠨ ᠵᠦᠭᠤᠨ ᠡᠵᠡᠨ ᠭᠡᠰᠡᠷ ᠬᠠᠭ᠋ᠠᠨᠤ ᠲᠤᠭᠤᠵᠢ》 ᠵᠢ ᠪᠦᠷᠢᠨ ᠪᠦᠲᠦᠨ ᠵᠶ᠋ᠠᠷᠨᠢ ᠬᠢᠮᠳᠠᠭ᠋ᠠᠨ ᠬᠠᠳᠠᠭ᠋ᠠᠯᠠᠵᠤ ᠪᠣᠢ᠃
ᠣᠩᠨᠢᠭᠤᠳ ᠬᠣᠰᠢᠭᠤᠨᠤ ᠭᠡᠰᠡᠷᠤᠨ ᠣᠷᠳᠣᠨᠳᠤ ᠬᠠᠳᠠᠭ᠋ᠠᠯᠠᠭᠳᠠᠵᠤ ᠪᠠᠶ᠋ᠢᠭᠠ ᠪᠡᠭᠡᠵᠢᠩ ᠮᠣᠳᠣᠨᠪᠠᠷᠤᠨ 《ᠠᠷᠪᠠᠨ ᠵᠦᠭᠤᠨ ᠡᠵᠡᠨ ᠭᠡᠰᠡᠷ ᠬᠠᠭ᠋ᠠᠨᠤ ᠲᠤᠭᠤᠵᠢ》
ᠣᠷᠴᠢᠭᠤᠯᠤᠭᠴᠢ᠄ ᠭᠡᠷᠡᠯᠲᠦ
ᠬᠢᠨᠠᠨ ᠣᠷᠴᠢᠭᠤᠯᠤᠭᠴᠢ᠄ ᠠᠳᠢᠶᠠ ᠰᠠᠴᠤᠷᠠᠯ
ᠶᠡᠷᠦᠩᠬᠡᠢ ᠬᠢᠨᠠᠨ ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠸᠠᠩ ᠰᠢᠦᠸᠠᠢ ᠳ᠋ᠦᠩ
