ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠨᠡᠶᠢᠭᠡᠮ ᠰᠡᠳᠬᠦᠯ
ᠮᠢᠨᠤ ᠭᠡᠷ ᠤᠨ ᠡᠩᠬᠦᠷᠡᠢ ᠠᠮᠢᠲᠠᠳ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/9/27
                          ᠪᠤᠷᠤᠨᠤᠳ ᠲᠠᠶᠢᠴᠢᠨ ᠵᠤᠬᠢᠶᠠᠪᠠ     ᠮᠠᠨ ᠤ ᠬᠦᠲᠡᠭᠡ ᠳᠤ ᠠᠶᠢᠯ ᠬᠤᠲᠠ ᠪᠠᠨ ᠰᠠᠬᠢᠭᠤᠯᠬᠤ ᠬᠤᠲᠠᠴᠢ ᠨᠤᠬᠠᠢ᠂ ᠠᠪᠠ ᠰᠢᠪᠠᠭᠤᠨ ᠳᠤ ᠠᠪᠴᠤ ᠶᠠᠪᠤᠬᠤ ᠠᠪᠠ ᠶᠢᠨ ᠨᠤᠬᠠᠢ ᠭᠡᠵᠦ ᠲᠡᠵᠢᠭᠡᠲᠡᠭ ᠶᠤᠮ᠃ ᠨᠠᠮ᠎ᠠ ᠶᠢ ᠪᠠᠭ᠎ᠠ ᠳᠤ ᠮᠠᠨ ᠤ ᠬᠢᠨ ᠨᠢᠭᠡ ᠴᠠᠭᠠᠨ ᠨᠤᠬᠠᠢ᠂ ᠦᠨᠡᠰᠦᠨ ᠬᠦᠬᠡ ᠦᠰᠦᠲᠡᠢ ᠨᠢᠭᠡ ᠬᠦᠭᠰᠢᠨ ᠮᠤᠤᠷ ᠲᠡᠵᠢᠭᠡᠲᠡᠭ ᠪᠠᠶᠢᠬᠰᠠᠨ ᠢ ᠰᠠᠨᠠᠵᠤ ᠪᠠᠶᠢᠨ᠎ᠠ᠃ ᠨᠢᠭᠡ ᠰᠠᠶᠢᠨ ᠨᠢ ᠮᠠᠨ ᠤ ᠲᠡᠷᠡ ᠨᠤᠬᠠᠢ ᠭᠡᠵᠦ ᠵᠠᠭᠤᠲᠠᠭ ᠨᠤᠬᠠᠢ ᠪᠢᠰᠢ᠂ ᠲᠠᠨᠢᠯ ᠪᠤᠰᠤ ᠬᠦᠮᠦᠨ ᠢᠷᠡᠪᠡᠯ ᠠᠯᠪᠠ ᠶᠢᠨ ᠲᠡᠲᠦᠢ ᠬᠤᠴᠠᠭᠠᠳ ᠯᠡ ᠦᠡᠭᠭᠡᠷᠡᠲᠡᠭ᠃ ᠮᠤᠤᠷ ᠪᠤᠯ ᠬᠤᠯᠤᠭᠠᠨ᠎ᠠ ᠰᠠᠶᠢᠨ ᠪᠠᠷᠢᠨ᠎ᠠ᠃ ᠨᠤᠬᠠᠢ ᠬᠠᠰᠢᠶ᠎ᠠ ᠬᠤᠷᠢᠶᠠᠨ  ᠤ ᠡᠭᠡᠪᠦᠷ ᠲᠤ ᠬᠡᠪᠲᠡᠬᠦ ᠪᠠᠷ ᠢᠶᠠᠨ ᠬᠡᠪᠲᠡᠨ᠎ᠡ᠃ ᠮᠤᠤᠷ ᠬᠤᠯᠤᠭᠠᠨ᠎ᠠ ᠪᠠᠷᠢᠬᠤ ᠪᠠᠷ ᠢᠶᠠᠨ ᠪᠠᠷᠢᠨ᠎ᠠ᠂ ᠪᠢ ᠪᠠᠭ᠎ᠠ   ᠳᠤ ᠪᠠᠨ ᠴᠤ ᠭᠡᠳ ᠲᠡᠭᠡᠵᠦ ᠨᠤᠬᠠᠢ ᠮᠤᠤᠷ ᠲᠠᠢ ᠨᠤᠤᠷᠠᠯᠳᠤᠭᠠᠳ ᠪᠠᠶᠢᠲᠠᠭ ᠦᠭᠡᠢ᠃ ᠨᠡᠩ ᠴᠤ ᠠᠩᠬ᠎ᠠ ᠲᠤᠮᠲᠠᠳᠤ ᠳᠤ ᠤᠷᠤᠵᠤ ᠰᠤᠷᠭᠠᠭᠤᠯᠢ ᠲᠡᠪᠰᠢᠭᠡᠳ ᠶᠠᠪᠤᠬᠰᠠᠨ ᠬᠤᠶᠢᠨ᠎ᠠ᠂ ᠨᠤᠬᠠᠢ᠂ ᠮᠤᠤᠷ ᠬᠡᠵᠢᠶ᠎ᠡ ᠠᠯᠠᠭ᠎ᠠ ᠪᠤᠯᠤᠬᠰᠠᠨ ᠢ ᠴᠤ ᠠᠩᠵᠠᠭᠠᠷᠠᠬᠰᠠᠨ ᠦᠭᠡᠢ᠃     ᠤᠳᠤ ᠶᠢᠨ ᠬᠤᠲᠠ ᠶᠢᠨ ᠬᠦᠮᠦᠰ ᠨᠤᠬᠠᠢ᠂ ᠮᠤᠤᠷ ᠭᠡᠬᠦ ᠮᠡᠲᠦ ᠶᠢᠨ ᠡᠩᠭᠦᠷᠡᠢ ᠠᠮᠢᠲᠠᠳ ᠲᠡᠵᠢᠭᠡᠭᠰᠡᠳ ᠵᠦᠡᠭᠳᠡᠭᠡᠨ᠂ ᠭᠠᠲᠠᠭᠠᠳᠤ ᠶᠢᠨ ᠵᠠᠷᠢᠮ ᠨᠢ ᠮᠤᠭᠠᠢ᠂ ᠮᠡᠯᠡᠬᠡᠢ ᠶᠢ ᠬᠦᠷᠲᠡᠯ᠎ᠡ ᠡᠩᠭᠦᠷᠡᠶᠢᠯᠡᠵᠦ ᠲᠡᠵᠢᠭᠡᠲᠡᠭ ᠶᠤᠮ ᠭᠡᠨ᠎ᠡ᠃ ᠫᠢ᠂ ᠫᠢ᠂ ᠪᠤᠯᠠᠢ᠂ ᠪᠦᠦ ᠦᠵᠡᠭᠲᠡ ᠴᠠᠭᠠᠰᠢ ᠪᠠᠨ︕ ᠪᠢ ᠭᠡᠲᠡᠭ ᠬᠦᠮᠦᠨ ᠶᠡᠭᠡ ᠤᠯᠲᠤᠢ ᠬᠦᠮᠦᠨ᠂ ᠶᠠᠭᠠᠬᠢᠬᠰᠠᠨ ᠬᠤᠸᠠᠷ ᠴᠡᠴᠡᠭ ᠲᠡᠵᠢᠭᠡᠬᠦ᠂ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠲᠡᠵᠢᠭᠡᠬᠦ᠂ ᠨᠡᠩ ᠢᠯᠠᠩᠭᠤᠶ᠎ᠠ ᠮᠤᠤᠷ ᠨᠤᠬᠠᠢ ᠲᠡᠵᠢᠭᠡᠬᠦ ᠰᠤᠨᠢᠷᠬᠠᠯ ᠪᠠᠶᠢᠬᠤ ᠦᠭᠡᠢ᠃ ᠭᠡᠲᠡᠯ᠎ᠡ ᠰᠡᠬᠦᠯ ᠤᠨ ᠵᠢᠯ ᠤᠳ ᠲᠤ ︽ᠰᠠᠨᠠᠭᠠᠴᠢᠯᠠᠭ᠎ᠠ ᠪᠤᠰᠤ︾ ᠪᠠᠷ ᠮᠤᠤᠷ ᠂ ᠨᠤᠬᠠᠢ ᠲᠡᠵᠢᠭᠡᠭᠰᠡᠨ ᠦᠯᠢᠭᠡᠷ ᠲᠠᠢ᠃     ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠᠭᠠᠳ ᠤᠨ ᠤ ᠡᠬᠢ ᠪᠠᠷ ᠪᠢ ᠠᠵᠢᠯ ᠠᠯᠪᠠ ᠪᠠᠷ ᠤᠯᠠᠭᠠᠬᠠᠲᠠ ᠬᠤᠲᠠ ᠳᠤ ᠨᠡᠬᠦᠵᠦ ᠢᠷᠡᠭᠡᠳ ᠠᠮᠢᠲᠤᠷᠠᠵᠤ ᠪᠠᠶᠢᠬᠰᠠᠨ ᠶᠤᠮ᠃ ᠮᠢᠨᠤ ᠬᠤᠶᠠᠷ ᠬᠦᠦ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠯ᠎ᠠ᠃ ᠨᠢᠭᠡ ᠤᠲᠠᠭ᠎ᠠ ᠪᠢ ᠬᠦᠲᠡᠭᠡ ᠪᠠᠭᠤᠭᠠᠳ ᠬᠠᠷᠢᠵᠤ ᠢᠷᠡᠬᠦ ᠳᠤ᠂ ᠲᠡᠷᠡ ᠬᠤᠶᠠᠭᠤᠯᠠ ᠪᠠᠨ ᠲᠤᠩ ᠴᠤ ᠬᠦᠭᠡᠷᠦᠬᠦᠨ ᠨᠢᠭᠡ ᠠᠯᠠᠭ ᠮᠤᠤᠷ ᠤᠨ ᠵᠤᠯᠵᠠᠭ᠎ᠠ ᠠᠪᠴᠢᠷᠠᠭᠠᠳ ᠪᠠᠶᠢᠵᠠᠢ᠂ ᠵᠠᠪᠠᠯ ᠲᠡᠵᠢᠭᠡᠬᠦ ᠶᠤᠮ ᠭᠡᠨ᠎ᠡ᠃ ᠬᠡᠦᠬᠡᠳ ᠭᠡᠵᠦ ᠵᠢᠵᠢᠭ ᠠᠮᠢᠲᠠᠨ ᠳᠤ ᠲᠤᠷᠠᠲᠠᠢ᠂ ᠪᠢ ᠬᠡᠳᠦ᠋ᠢᠪᠡᠷ ᠲᠤᠷ᠎ᠠ ᠦᠭᠡᠢ ᠪᠤᠯᠪᠠᠴᠤ ᠠᠷᠭ᠎ᠠ ᠦᠭᠡᠢ ᠵᠦᠪᠰᠢᠶᠡᠷᠡᠪᠡ᠃ ᠲᠡᠷᠡ ᠦᠶᠡᠰ ᠲᠤ ᠪᠢᠲᠡ ᠠᠰᠠᠷ ᠤᠨ ᠨᠢᠭᠡᠲᠦᠭᠡᠷ ᠲᠠᠪᠬᠤᠷᠯᠢᠭ ᠲᠤ ᠰᠠᠭᠤᠵᠤ ᠪᠠᠶᠢᠬᠰᠠᠨ ᠪᠤᠯᠬᠤᠷ᠂ ᠬᠠᠭᠠᠯᠭᠠᠨ  ᠳᠤ ᠪᠠᠨ ᠮᠤᠤᠷ ᠤᠨ ᠤᠷᠤᠵᠤ ᠭᠠᠷᠬᠤ ᠨᠦᠭᠡ ᠴᠤᠭᠤᠯᠤᠭᠠᠳ ᠦᠭᠪᠡᠯ ᠪᠤᠯᠴᠢᠬᠠᠨ᠎ᠠ᠂ ᠮᠤᠤᠷ ᠭᠡᠲᠡᠭ ᠠᠮᠢᠲᠠᠨ ︽ᠡᠵᠡᠨ ᠢᠶᠠᠨ ᠲᠠᠨᠢᠬᠤ ᠦᠭᠡᠢ᠂ ᠭᠡᠷ ᠢᠶᠠᠨ ᠲᠠᠨᠢᠲᠠᠭ︾ ᠭᠡᠲᠡᠭ ᠶᠤᠮ᠃ ᠮᠤᠤᠷ ᠡᠲᠦᠷ ᠴᠤ ᠭᠡᠰᠡᠨ᠂ ᠰᠦᠨᠢ ᠴᠤ ᠭᠡᠰᠡᠨ ᠪᠢᠴᠢᠬᠠᠨ ᠨᠦᠬᠡ ᠪᠠᠷ ᠢᠶᠠᠨ ᠭᠠᠷᠴᠤ ᠶᠠᠪᠤᠭᠠᠳ ᠲᠤᠷ᠎ᠠ ᠪᠠᠷ ᠢᠶᠠᠨ ᠬᠠᠮᠢᠭ᠎ᠠ ᠬᠠᠮᠢᠭᠠᠭᠤᠷ ᠶᠠᠪᠤᠲᠠᠭ ᠢ ᠪᠤᠤ ᠮᠡᠲᠡ᠂ ᠶᠠᠭᠤ ᠴᠤ ᠭᠡᠰᠡᠨ ᠲᠤᠭᠤᠷᠢᠵᠤ ᠲᠤᠭᠤᠷᠢᠭᠠᠳ ᠬᠠᠷᠢᠭᠠᠳ ᠢᠷᠡᠴᠢᠬᠡᠨ᠎ᠡ᠃ ᠨᠢᠭᠡ ᠰᠠᠶᠢᠨ ᠨᠢ ᠮᠤᠤᠷ ᠭᠡᠰᠡᠨ ᠠᠮᠢᠲᠠᠨ ᠬᠤᠪᠢ ᠪᠠᠨ ᠬᠦᠭᠡᠭᠡᠳ ᠶᠠᠪᠤᠨ᠎ᠠ᠂ ᠢᠲᠡᠵᠦ ᠤᠤᠭᠤᠬᠤ ᠨᠢ ᠲᠦᠬᠦᠮ᠂ ᠲᠡᠵᠢᠭᠡᠬᠦ ᠳᠤ ᠠᠮᠠᠷᠬᠠᠨ᠃ ᠲᠡᠷᠡ ᠦᠶᠡᠰ ᠲᠤ ᠶᠠᠭᠠᠬᠢᠬᠰᠠᠨ ︽ᠮᠤᠤᠷ ᠤᠨ ᠬᠤᠭᠤᠯᠠ︾ ᠭᠡᠵᠦ ᠬᠤᠲᠠᠯᠳᠤᠲᠠᠭ ᠦᠭᠡᠢ᠂ ᠦᠯᠡᠲᠡᠵᠦ ᠲᠤᠰᠤᠬᠰᠠᠨ ᠪᠤᠲᠠᠭ᠎ᠠ ᠨᠤᠭᠤᠭ᠎ᠠ ᠶᠢᠨ ᠰᠢᠪᠬᠠᠷᠠᠤ ᠪᠠᠨ  ᠴᠡᠷ᠎ᠡ ᠲᠤᠲᠤᠷ᠎ᠠ ᠨᠢ ᠬᠢᠭᠡᠳ ᠦᠭᠪᠡᠯ ᠪᠤᠯᠤᠭ᠎ᠠ᠃ ᠬᠤᠶᠠᠷ ᠬᠦᠦ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠲᠠᠷᠠᠵᠤ ᠢᠷᠡᠪᠡᠯ ᠮᠤᠤᠷ ᠢᠶᠠᠷ ᠢᠶᠠᠨ ᠵᠢᠭᠠᠬᠠᠨ ᠲᠤᠭᠯᠠᠵᠤ ᠵᠤᠭ᠎ᠠ ᠪᠤᠯᠭᠠᠨ᠎ᠠ᠃   ᠢᠡᠭᠭᠢᠭᠡᠳ ᠯᠡ ᠵᠢᠯ ᠢᠯᠡᠬᠦᠦ ᠬᠤᠶᠠᠷ ᠵᠢᠯ ᠪᠤᠯᠤᠬᠰᠠᠨ ᠶᠤᠮ ᠳ᠋ᠠ᠃ ᠭᠡᠨᠡᠳᠲᠡ ᠨᠢᠭᠡ ︽ᠬᠡᠷᠡᠭ︾ ᠭᠠᠷᠪᠠ᠃ ᠨᠢᠭᠡ ᠰᠦᠨᠢ ᠪᠢᠯᠡ᠂ ᠬᠦᠮᠦᠰ ᠪᠦᠷ ᠨᠦᠢᠷ  ᠲᠤ ᠪᠠᠨ ᠲᠤᠬᠵᠢᠷᠠᠵᠤ ᠪᠠᠶᠢᠬᠰᠠᠨ ᠦᠶᠡᠰ ᠰᠢᠷ᠎ᠠ ᠠᠯᠠᠭ ᠮᠤᠤᠷ ᠭᠡᠨᠡᠳᠲᠠ ᠬᠠᠴᠢᠨ ᠮᠠᠭᠤᠬᠠᠢ ᠲᠠᠭᠤᠨ ᠳᠤ ᠰᠤᠴᠢᠨ ᠰᠡᠷᠡᠭᠡᠳ ᠦᠵᠡᠭᠰᠡᠨ ᠴᠢᠨᠢ᠂ ᠪᠢᠴᠢᠬᠠᠨ ᠠᠯᠠᠬ ᠮᠤᠤᠷ ᠡᠬᠦᠷ ᠠᠴᠠ ᠪᠠᠨ ᠭᠠᠷᠴᠤ ᠢᠷᠡᠨ ᠬᠦᠰᠡᠷ ᠲᠤ ᠤᠷᠪᠠᠵᠤ ᠬᠦᠷᠪᠡᠨ ᠪᠦᠭᠡᠯᠵᠢᠵᠤ  ᠴᠠᠶᠢᠯᠵᠠᠭᠠᠳ ᠰᠦᠢᠳ ᠪᠤᠯᠪᠠ᠃ ᠡᠨᠡ ᠶᠠᠭᠠᠬᠢᠴᠢᠪᠠ︖ ᠪᠢᠲᠡᠨ ᠤ ᠦᠵᠡᠬᠦ ᠪᠠᠷ᠂ ᠡᠨᠡ ᠮᠤᠤᠷ ᠯᠠᠪᠲᠠᠢ ᠬᠤᠤᠷ᠎ᠠ ᠢᠲᠡᠭᠰᠡᠨ ᠬᠤᠯᠤᠭᠠᠨ᠎ᠠ ᠶᠢ ᠪᠠᠷᠢᠵᠤ ᠢᠲᠡᠭᠡᠳ ᠦᠪᠡᠰᠦᠪᠡᠨ ᠬᠤᠤᠷᠠᠲᠠᠬᠲᠠᠬᠰᠠᠨ ᠪᠠᠶᠢᠨ᠎ᠠ᠃ ᠪᠢᠲᠠ ᠮᠤᠤᠷ ᠤᠨ ᠠᠲᠠᠪᠠᠯᠵᠠᠵᠤ ᠲᠠᠲᠠᠪᠠᠯᠵᠠᠬᠤ ᠶᠢ ᠬᠠᠷᠠᠭᠠᠳ ᠠᠷᠭ᠎ᠠ ᠪᠠᠨ ᠪᠠᠷᠠᠵᠤ ᠠᠯᠠᠭ᠎ᠠ ᠪᠠᠨ ᠮᠠᠭᠠᠵᠢᠪᠠ᠃ ᠰᠦᠨᠢ ᠲᠤᠮᠲᠠ ᠶᠤᠮ ᠪᠢᠯᠡ᠂ ᠮᠦᠨ ᠲᠡᠭᠡᠭᠡᠳ ᠲᠡᠷᠡ ᠦᠶᠡᠰ ᠲᠤ ᠡᠩᠬᠦᠷᠠᠢ ᠠᠮᠢᠲᠠᠨ ᠤ ᠡᠮᠨᠡᠯᠭᠡ ᠮᠡᠮᠨᠡᠯᠭᠡ ᠭᠡᠵᠦ ᠪᠠᠶᠢᠬᠤ ᠦᠭᠡᠢ᠂ ᠲᠡᠭᠡᠵᠦ ᠬᠠᠷᠠᠵᠤ ᠪᠠᠶᠢᠬᠰᠠᠭᠠᠷ ᠮᠤᠤᠷ ᠢᠶᠠᠨ ᠦᠬᠦᠭᠦᠯᠵᠡᠢ᠃ ︽ᠰᠠᠨᠠᠴᠢᠬᠠᠪᠠᠯ ᠰᠠᠮᠵᠠ ᠪᠠᠰᠠ ᠰᠠᠶᠢᠬᠠᠨ ᠶᠤᠮ︾ ᠭᠡᠲᠡᠭ᠂ ᠬᠤᠶᠠᠷ ᠵᠢᠯ ᠲᠡᠵᠢᠭᠡᠭᠰᠡᠨ ᠠᠮᠢᠲᠠᠨ ᠶᠤᠮ᠂ ᠬᠠᠶᠢᠷᠠᠲᠠᠢ ᠪᠤᠯᠴᠢᠬᠠᠬᠰᠠᠨ ᠪᠠᠶᠢᠨ᠎ᠠ᠂ ᠲᠤᠲᠤᠷ᠎ᠠ ᠬᠠᠴᠢᠨ ᠡᠪ ᠦᠭᠡᠢ ᠪᠤᠯᠪᠠ᠂ ᠨᠡᠩ ᠴᠤ ᠬᠤᠶᠠᠷ ᠬᠦᠦ ᠮᠢᠨᠢ ᠪᠦᠷ ᠨᠢᠲᠤᠨ ᠨᠢᠯᠪᠤᠰᠤ ᠤᠷᠤᠰᠤᠭᠤᠯᠤᠬᠰᠠᠨ ᠪᠢᠯᠡ᠃ ᠮᠠᠷᠭᠠᠰᠢ ᠨᠢ ᠶᠠᠭ ᠰᠠᠶᠢᠬᠠᠨ ᠭᠠᠷᠠᠭ ᠤᠨ ᠡᠲᠦᠷ ᠲᠠᠭᠠᠷᠠᠬᠰᠠᠨ ᠲᠤᠯᠠ ᠨᠦᠬᠦᠭᠡ ᠮᠤᠤᠷ ᠢᠶᠠᠨ ᠵᠢᠭᠠᠬᠠᠨ ᠴᠠᠭᠠᠰᠤᠨ ᠬᠠᠶᠢᠷᠴᠠᠭ ᠲᠤ ᠬᠠᠶᠢᠷᠴᠠᠬᠯᠠᠨ ᠲᠤᠭᠤᠢ  ᠳᠤ ᠪᠠᠨ ᠠᠴᠢᠭᠠᠳ ᠬᠤᠶᠠᠷ ᠬᠦᠦ ᠲᠠᠢ ᠪᠠᠨ ᠭᠤᠷᠪᠠᠭᠤᠯᠠ ᠬᠤᠲᠠ ᠶᠢᠨ ᠡᠮᠦᠨᠡᠲᠡᠢ ᠠᠭᠤᠯᠠ ᠶᠢᠨ ᠤᠭ ᠲᠤ  ᠮᠤᠳᠤ ᠲᠠᠢ ᠭᠠᠵᠠᠷ ᠨᠦᠬᠡ ᠤᠬᠤᠵᠤ ᠪᠤᠯᠠᠰᠢᠯᠠᠵᠤ ᠤᠷᠬᠢᠯ᠎ᠠ᠃ ᠶᠠᠭᠤ ᠴᠤ ᠭᠡᠰᠡᠨ ᠪᠠᠰᠠ ᠨᠢᠭᠡ ᠠᠮᠢ ᠪᠢᠰᠢ ᠤᠤ ᠳ᠋ᠠ᠃     ᠬᠠᠷᠢᠵᠤ ᠢᠷᠡᠭᠡᠳ ᠬᠡᠨ ᠨᠢ ᠴᠤ ᠦᠭᠡ ᠲᠠᠭᠤ ᠦᠭᠡᠢ  ᠲᠦᠩᠰᠦᠭᠡᠷ᠃ ︽ᠡᠨᠡ ᠬᠠᠷᠢᠨ ᠠᠮᠠᠷ ᠦᠭᠡᠢ᠃ ᠬᠤᠵᠢᠮ ᠲᠠᠬᠢᠵᠤ ᠲᠠᠬᠢᠵᠤ ᠡᠯᠲᠡᠪ ᠠᠮᠢᠲᠠᠨ ᠢ ᠪᠢᠲᠡᠬᠢ ᠲᠡᠵᠢᠭᠡ︕︾ ᠭᠡᠵᠦ ᠪᠢ ᠬᠡᠦᠬᠡᠳ ᠲᠤ ᠶᠤᠮ ᠰᠢᠭ᠂ ᠪᠡᠶ᠎ᠡ ᠳᠤ ᠪᠠᠨ ᠴᠤ ᠶᠤᠮ ᠰᠢᠭ ᠬᠡᠯᠡᠪᠡ᠃ ᠲᠡᠬᠦᠨ ᠠᠴᠠ ᠬᠤᠶᠢᠰᠢ᠂ ᠠᠷᠪᠠᠭᠠᠳ ᠵᠢᠯ ᠮᠤᠤᠷ ᠨᠤᠬᠠᠢ ᠭᠡᠵᠦ ᠲᠡᠵᠢᠭᠡᠭᠰᠡᠨ ᠦᠭᠡᠢ ᠰᠠᠨᠠᠭ᠎ᠠ ᠨᠢᠭᠡ ᠠᠮᠠᠷ᠃      ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠᠭᠠᠳ ᠤᠨ ᠤ ᠰᠡᠬᠦᠯᠴᠢ ᠪᠠᠷ ᠪᠢᠲᠡ ᠭᠡᠷ ᠢᠶᠠᠷ ᠢᠶᠠᠨ ᠬᠦᠬᠡᠬᠤᠲᠠ ᠳᠤ ᠨᠡᠬᠦᠵᠦ ᠢᠷᠡᠭᠰᠡᠨ ᠶᠤᠮ᠃  ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠶᠡᠷᠡᠨ ᠬᠡᠲᠦᠨ ᠤᠨ ᠤ ᠦᠶ᠎ᠡ ᠪᠠᠷ᠂ ᠮᠢᠨᠤ ᠶᠡᠭᠡ ᠬᠦᠦ ᠭᠡᠨᠡᠳᠲᠡ ᠨᠢᠭᠡ ᠡᠲᠦᠷ ᠵᠢᠭᠠᠬᠠᠨ ︽ᠪᠡᠭᠡᠵᠢᠩ ᠪᠠᠭᠠᠯ︾ ᠤᠨ ᠭᠦᠯᠦᠭᠡ ᠶᠢ ᠠᠪᠤᠭᠠᠳ ᠢᠷᠡᠵᠠᠢ᠂ ᠪᠢ ᠬᠠᠷᠠᠮᠠᠬᠴᠠ ᠠᠭᠤᠷᠯᠠᠭᠠᠳ᠄ ︽ᠮᠤᠤᠷ᠂ ᠨᠤᠬᠠᠢ ᠡᠨᠡ ᠲᠡᠷᠡ ᠶᠢ ᠪᠢᠲᠡᠬᠢ ᠲᠡᠵᠢᠭᠡ ᠭᠡᠰᠡᠨ  ᠪᠢᠰᠢ ᠦᠦ︖︾ ᠭᠡᠵᠦ ᠲᠠᠭᠤ ᠭᠠᠷᠤᠯ᠎ᠠ᠃ ᠪᠢᠴᠢᠬᠠᠨ ᠭᠦᠯᠦᠭᠡ ᠶᠢ ᠠᠵᠢᠪᠠᠯ ᠦᠪᠴᠢ ᠪᠡᠶ᠎ᠡ ᠰᠢᠷᠠᠪᠳᠤᠷ ᠦᠡᠭᠭᠡ ᠶᠢᠨ ᠰᠠᠬᠰᠠᠭᠠᠷ ᠦᠰᠦ ᠲᠠᠢ᠂ ᠬᠤᠨᠭ᠍ᠰᠢᠶᠠᠷ ᠨᠢ ᠦᠨᠡᠭᠡ ᠰᠢᠭ ᠵᠢᠭᠠᠬᠠᠨ ᠱᠤᠪᠤᠭᠤᠷ᠂ ᠲᠤᠮᠤ ᠬᠤᠶᠠᠷ ᠨᠢᠲᠤ ᠨᠢ ᠭᠢᠯᠠᠯᠵᠠᠭᠠᠳ ᠲᠤᠩ ᠬᠦᠭᠡᠷᠦᠬᠦᠨ᠂ ᠪᠤᠤ ᠲᠡᠵᠢᠭᠡ ᠭᠡᠵᠦ ᠲᠠᠭᠤ ᠭᠠᠷᠤᠬᠰᠠᠨ ᠪᠤᠯᠪᠠᠴᠤ ᠲᠤᠲᠤᠷ᠎ᠠ ᠪᠠᠨ ᠬᠠᠷᠢᠨ  ᠰᠡᠮᠬᠡᠨ ᠲᠤᠭᠤᠴᠢᠬᠠᠪᠠ᠃ ᠪᠢᠴᠢᠬᠠᠨ ᠬᠦᠯᠦᠭᠡ ᠮᠠᠰᠢ ᠴᠤᠪᠤᠭᠤᠯᠢᠭ ᠲᠡᠭᠵᠢᠨ᠂ ᠬᠦᠲᠡᠯᠵᠤ ᠪᠠᠷᠢᠬᠤ ᠨᠢ ᠪᠤᠰᠢᠭᠤ ᠲᠦᠷᠭᠡᠨ᠃ ᠲᠡᠭᠡᠭᠡᠳ ︽ᠨᠢᠰᠭᠡ︾ ᠭᠡᠰᠡᠨ ᠨᠡᠷ᠎ᠡ ᠦᠭᠬᠦ ᠪᠠᠷ ᠪᠤᠯᠵᠤ᠂ ᠴᠢᠬᠢᠨ ᠠᠴᠠ ᠨᠢ ᠲᠡᠯᠲᠡᠶᠢᠲᠡᠯ᠎ᠡ ᠲᠠᠲᠠᠵᠤ ᠲᠡᠭᠡᠭᠰᠢ ᠡᠷᠬᠦᠵᠦ ᠪᠠᠶᠢᠭᠠᠳ᠄ ︽ᠨᠢᠰᠭᠡ᠂ ᠨᠢᠰᠭᠡ᠂ ᠨᠢᠰᠭᠡ︾ ᠭᠡᠵᠦ ᠭᠤᠷᠪᠠᠨᠲᠠ ᠲᠠᠭᠤᠲᠠᠯ᠎ᠠ᠃ ᠲᠡᠭᠡᠪᠡᠯ ᠨᠤᠬᠠᠢ ᠨᠡᠷ᠎ᠡ ᠪᠠᠨ ᠴᠡᠭᠡᠵᠢᠯᠡᠴᠢᠬᠡᠲᠡᠭ ᠶᠤᠮ ᠭᠡᠨ᠎ᠡ᠃ ᠶᠠᠭᠤ ᠴᠤ ᠭᠡᠰᠡᠨ ︽ᠨᠢᠰᠭᠡ︾ ︽ᠨᠢᠰᠭᠡ︾ ᠭᠡᠵᠦ ᠲᠠᠭᠤᠲᠠᠭᠰᠠᠭᠠᠷ ᠪᠠᠶᠢᠲᠠᠯ᠎ᠠ ᠨᠡᠷ᠎ᠡ ᠪᠠᠨ ᠮᠡᠲᠡᠬᠦ ᠪᠤᠯᠪᠠ᠂ ᠨᠡᠷ᠎ᠡ ᠪᠠᠷ ᠨᠢ ᠲᠠᠭᠤᠲᠠᠬᠤ ᠳᠤ ᠯᠡ ᠦᠬᠡᠲᠡ ᠠᠴᠠ ᠭᠦᠶᠦᠭᠡᠳ ᠢᠷᠡᠨ᠎ᠡ᠃ ᠪᠢᠴᠢᠬᠠᠨ ᠨᠤᠬᠠᠢ ᠶᠡᠭᠡ ᠶᠠᠭᠤᠮ᠎ᠠ ᠮᠡᠲᠡᠨ᠎ᠡ᠂ ᠬᠡᠨ ᠲᠡᠬᠦᠨ ᠳᠤ ᠰᠠᠶᠢᠨ ᠢ ᠲᠡᠷᠡ ᠮᠡᠲᠡᠨ᠎ᠡ᠃ ᠮᠠᠨ ᠤ ᠬᠦᠮᠦᠨ ᠲᠡᠬᠦᠨ ᠢ ᠲᠡᠵᠢᠭᠡᠨ᠎ᠡ᠂ ᠤᠬᠢᠶᠠᠨ᠎ᠠ᠂ ᠠᠷᠠᠴᠢᠯᠠᠵᠤ ᠲᠤᠲᠤᠮᠲᠠᠨ᠎ᠠ᠂ ᠭᠠᠷᠬᠤ ᠳᠤ ᠪᠠᠨ ᠲᠡᠪᠡᠷᠢᠭᠡᠳ ᠭᠠᠷᠬᠤ ᠪᠤᠶᠤ ᠲᠠᠭᠠᠭᠤᠯᠤᠭᠠᠳ ᠭᠠᠷᠤᠨ᠎ᠠ᠂ ᠲᠡᠭᠡᠬᠦ ᠳᠡᠭᠡᠨ ᠡᠨᠡ ᠠᠮᠢᠲᠠᠨ  ᠶᠡᠷᠦ ᠨᠢ ᠲᠡᠬᠦᠨ ᠢ ᠰᠠᠯᠤᠯ ᠦᠭᠡᠢ ᠲᠠᠭᠠᠵᠤ ᠶᠠᠩᠵᠤ ᠪᠠᠷ ᠠᠯᠢᠶᠠᠯᠠᠵᠤ ︽ᠪᠢᠯᠲᠠᠤᠴᠢᠯᠠᠨ᠎ᠠ︾᠃ ᠨᠤᠬᠠᠢ ᠶᠢᠨ ᠠᠮᠢᠲᠤ ᠪᠤᠲᠠᠰ ᠤᠨ ᠴᠠᠭ ᠤᠨ  ᠣᠨᠣᠪᠴᠢᠲᠠᠢ ᠭᠡᠲᠡᠭ  ᠢ ᠶᠠᠭᠠᠬᠢᠨ᠎ᠠ᠃ ᠦᠷᠯᠦᠭᠡ ᠴᠠᠭ ᠨᠢ ᠪᠤᠯᠤᠮᠠᠬᠴᠠ ᠲᠡᠷᠡ ᠭᠤᠲᠤᠮᠵᠢᠨ ᠤ ︽ᠡᠬᠦᠷ︾ ᠠᠴᠠ ᠪᠠᠨ ᠭᠠᠷᠴᠤ ᠢᠷᠡᠭᠡᠳ ᠮᠠᠨ ᠤ ᠤᠨᠲᠠᠬᠤ ᠦᠷᠦᠭᠡᠨ ᠳᠤ ᠤᠷᠤᠵᠤ ᠢᠷᠡᠭᠡᠳ ᠬᠦᠨᠵᠢᠯᠡ ᠠᠴᠠ ᠵᠠᠭᠤᠵᠤ ᠴᠢᠩᠭᠠᠭᠠᠵᠤ ᠲᠠᠲᠠᠭᠠᠳ ᠰᠦᠢᠳ ᠪᠤᠯᠤᠨ᠎ᠠ᠃ ᠪᠢᠲᠡ ᠵᠤᠷᠢᠭᠤᠲᠠ ᠤᠨᠲᠠᠬᠰᠠᠨ ᠢᠶᠠᠷ ᠤᠪᠯᠠᠵᠤ ᠤᠷᠤᠨ ᠠᠴᠠ ᠪᠠᠨ ᠪᠤᠰᠬᠤ ᠦᠭᠡᠢ ᠪᠤᠯ ᠤᠷᠤᠨ ᠲᠡᠭᠡᠷ᠎ᠡ ᠦᠰᠦᠷᠴᠦ ᠭᠠᠷᠴᠤ ᠢᠷᠡᠭᠡᠳ ᠨᠢᠭᠤᠷ ᠴᠢᠷᠠᠢ ᠶᠢ ᠦᠨᠦᠷᠯᠡᠵᠤ ᠲᠤᠯᠢᠶᠠᠭᠠᠳ᠂ ᠡᠰᠡᠬᠦᠯ᠎ᠡ ᠭᠢᠨᠭᠰᠢᠨ ᠬᠤᠴᠠᠵᠤ ᠡᠵᠡᠨ ᠢᠶᠠᠨ ᠪᠤᠰᠬᠤ ᠦᠭᠡᠢ ᠪᠤᠯ ᠪᠠᠶᠢᠬᠤ ᠦᠭᠡᠢ᠃ ᠦᠲᠡ᠂ ᠤᠷᠤᠢ ᠮᠠᠨ ᠤ ᠬᠦᠮᠦᠨ ᠠᠵᠢᠯ ᠠᠴᠠ ᠪᠠᠭᠤᠭᠠᠳ ᠬᠠᠷᠢᠵᠤ ᠢᠷᠡᠬᠦ ᠴᠠᠭ ᠢ ᠶᠠᠭᠠᠬᠢᠵᠤ ᠮᠡᠲᠡᠲᠡᠭ ᠢ ᠪᠤᠤ ᠮᠡᠲᠡ᠂ ᠴᠤᠩᠬᠤᠨ  ᠲᠠᠶᠢᠰᠠᠨ ᠤ ᠲᠡᠭᠡᠷ᠎ᠡ ᠭᠠᠷᠴᠤ ᠰᠠᠭᠤᠭᠠᠳ ᠲᠤᠷᠤᠬᠰᠢ ᠠᠵᠢᠬᠯᠠᠵᠤ ᠰᠠᠭᠤᠬᠤ ᠨᠢ ᠲᠡᠷᠡ᠂ ᠮᠠᠨ ᠤ ᠬᠦᠮᠦᠨ ᠲᠤᠭᠤᠢ ᠪᠠᠨ ᠤᠨᠤᠭᠠᠳ ᠠᠰᠠᠷ ᠢ ᠤᠷᠢᠶᠠᠭᠠᠳ ᠤᠷᠤᠵᠤ ᠢᠷᠡᠬᠦ ᠶᠢ ᠬᠠᠷᠠᠮᠠᠬᠴᠠ ᠭᠡᠷ ᠤᠨ ᠬᠠᠭᠠᠯᠭᠠᠨ ᠳᠤ ᠬᠦᠷᠦᠭᠡᠳ ᠬᠤᠴᠠᠭᠠᠳ ᠠᠮᠠᠷᠠᠭᠤᠯᠬᠤ ᠦᠭᠡᠢ᠂ ᠬᠠᠭᠠᠯᠭ᠎ᠠ ᠨᠡᠬᠡᠬᠡᠭᠡᠳ ᠦᠭᠭᠦᠮᠡᠭᠴᠡ ᠠᠰᠠᠷ ᠤᠨ ᠱᠠᠳᠤ ᠪᠠᠷ ᠬᠦᠶᠦᠵᠦ ᠪᠠᠭᠤᠭᠠᠳ ᠡᠵᠡᠨ ᠢᠶᠠᠨ ᠤᠬᠲᠤᠨ ᠠᠪᠴᠤ ᠪᠠᠶᠠᠷᠲᠠᠢ ᠨᠢ ᠠᠷᠭ᠎ᠠ ᠦᠭᠡᠢ᠃ ᠨᠢᠭᠡ ᠤᠲᠠᠭ᠎ᠠ ᠮᠠᠨ ᠤ ᠬᠦᠮᠦᠨ ᠨᠤᠬᠠᠢ ᠪᠠᠨ ᠲᠠᠭᠠᠭᠤᠯᠵᠤ ᠭᠠᠷᠤᠭᠠᠳ ᠰᠠᠨᠠᠮᠰᠠᠷ ᠦᠭᠡᠢ ᠭᠡᠭᠡᠴᠢᠬᠡᠭᠡᠳ ᠰᠦᠨᠡᠰᠦ ᠪᠠᠨ ᠭᠡᠭᠡᠭᠰᠡᠨ ᠰᠢᠭ ᠬᠡᠲᠦᠨ ᠡᠲᠦᠷ ᠵᠤᠪᠠᠵᠠᠢ᠃ ᠭᠠᠲᠠᠭ᠎ᠠ ᠨᠤᠬᠠᠢ ᠬᠤᠴᠠᠬᠤ ᠶᠢ ᠤᠯᠵᠤ ᠰᠤᠨᠤᠰᠮᠠᠬᠴᠠ ᠴᠤᠩᠬᠤ ᠪᠠᠷ ᠠᠵᠢᠬᠯᠠᠵᠤ ᠬᠠᠷᠠᠨ᠎ᠠ᠃ ᠬᠡᠲᠦᠨ ᠡᠲᠦᠷ ᠤᠨ ᠰᠡᠬᠦᠯᠡᠷ᠂ ᠪᠠᠷᠠᠭᠤᠨ  ᠬᠤᠷᠢᠶᠠᠨ ᠤ ᠨᠢᠭᠡ ᠠᠶᠢᠯ ᠤᠨ ᠬᠢ ᠮᠠᠨ ᠤ ᠨᠤᠬᠠᠢ ᠶᠢ ᠤᠯᠵᠤ ᠠᠪᠤᠭᠠᠳ ᠪᠠᠶᠢᠬᠤ ᠴᠢᠮᠡᠭᠡ ᠶᠢ ᠬᠦᠷᠰᠢ ᠶᠢᠨ ᠬᠡᠦᠬᠡᠳ ᠬᠡᠯᠡᠵᠦ ᠦᠭᠪᠡ᠃ ᠤᠴᠢᠭᠠᠳ ᠦᠵᠡᠬᠦᠯᠡᠷ ᠲᠡᠷᠡ ᠠᠶᠢᠯ ᠤᠨ ᠪᠦᠲᠦᠬᠦᠨ ᠲᠡᠭᠡᠰᠦ ᠪᠠᠷ ᠬᠦᠵᠦᠬᠦᠨ ᠠᠴᠠ ᠨᠢ ᠤᠶᠠᠴᠢᠬᠠᠭᠠᠳ ᠰᠢᠩᠭᠡᠨ ᠪᠤᠲᠠᠭ᠎ᠠ ᠪᠠᠷ ᠲᠡᠵᠢᠭᠡᠵᠦ ᠪᠠᠶᠢᠪᠠ᠃ ᠪᠢ ᠲᠠᠪᠢᠨ ᠲᠦᠬᠦᠷᠢᠭ ᠭᠠᠷᠭᠠᠵᠤ ᠲᠠᠯᠠᠷᠬᠠᠬᠤ ᠰᠡᠳᠬᠢᠯ ᠢᠶᠠᠨ ᠢᠯᠡᠳᠭᠡᠶ᠎ᠡ ᠭᠡᠬᠦᠯᠡᠷ᠂ ᠲᠡᠷᠡ ᠠᠶᠢᠯ ᠤᠨ ᠡᠵᠡᠨ ᠠᠪᠤᠬᠰᠠᠨ ᠦᠭᠡᠢ᠃    ᠬᠤᠵᠢᠮ ᠨᠢ ᠪᠤᠯᠤᠭᠠᠳ᠂ ᠬᠦᠬᠡᠬᠤᠲᠠ ᠶᠢᠨ ᠬᠢᠨᠢ ᠨᠤᠬᠠᠢ ᠲᠡᠵᠢᠭᠡᠬᠦ ᠬᠠᠮᠢᠶᠠᠷᠤᠯᠲᠠ ᠶᠢ ᠴᠢᠩᠭᠠᠳᠬᠠᠬᠤ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠭᠠᠷᠭᠠᠵᠤ᠂ ︽ᠨᠤᠬᠠᠢ ᠲᠡᠵᠢᠭᠡᠬᠦ ᠦᠨᠡᠮᠯᠡᠬᠦ︾ ᠬᠢᠯᠭᠡᠬᠦ ᠶᠤᠮ ᠭᠡᠨ᠎ᠡ᠂  ᠬᠢᠵᠢᠭ ᠤᠨ ᠲᠠᠷᠢᠯᠭ᠎ᠠ ᠬᠢᠯᠭᠡᠬᠦ ᠶᠤᠮ ᠭᠡᠨ᠎ᠡ ᠭᠡᠳ ᠪᠤᠲᠤᠵᠤ ᠦᠵᠡᠪᠡᠯ ᠵᠢᠯ ᠳᠤ ᠬᠡᠲᠦᠨ ᠮᠢᠩᠭᠠᠨ ᠲᠦᠬᠦᠷᠢᠭ ᠤᠨ ᠵᠠᠷᠤᠲᠠᠯ ᠭᠠᠷᠤᠨ᠎ᠠ᠃ ᠴᠠᠯᠢᠩ ᠢᠶᠠᠨ ᠲᠦᠰᠢᠵᠤ ᠠᠮᠢᠲᠤᠷᠠᠵᠤ ᠪᠠᠶᠢᠭ᠎ᠠ ᠤᠯᠤᠰ ᠲᠤ ᠬᠡᠲᠦᠨ ᠮᠢᠩᠭᠠᠨ ᠲᠦᠬᠦᠷᠢᠭ ᠴᠢᠨᠢ ᠪᠠᠭ᠎ᠠ ᠵᠤᠭᠤᠰ ᠪᠢᠰᠢ᠃ ᠪᠤᠯᠢᠶ᠎ᠠ︕ ᠨᠤᠬᠠᠢ ᠲᠡᠵᠢᠭᠡᠬᠦ ᠪᠠᠨ ᠪᠤᠯᠢᠶ᠎ᠠ︕ ᠭᠡᠳ ᠵᠤᠷᠢᠭ ᠰᠢᠭᠤᠳᠴᠤ ᠬᠠᠶᠢᠷᠠᠲᠠᠢ ᠨᠤᠬᠠᠢ ᠪᠠᠨ ᠰᠢᠯᠢᠩᠬᠤᠲᠠ ᠶᠢᠨ  ᠨᠠᠶᠢᠵᠠ ᠳᠤ ᠪᠠᠨ  ᠬᠦᠷᠭᠡᠵᠦ ᠦᠭᠭᠦᠭᠰᠡᠨ ᠪᠢᠯᠡ᠃ ᠵᠢᠯ ᠤᠨ  ᠬᠢ ᠨᠢ ᠲᠠᠷᠠᠭ᠎ᠠ᠂ ᠪᠢ ᠡᠬᠡᠨᠡᠷ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠰᠢᠯᠢᠩᠬᠤᠲᠠ ᠳᠤ  ᠭᠦᠷᠦᠭᠡᠳ ᠨᠠᠶᠢᠵᠠ ᠶᠢᠨ ᠳᠤ ᠪᠠᠨ ᠠᠶᠢᠯᠴᠢᠯᠠᠵᠤ ᠤᠴᠢᠬᠰᠠᠨ ᠶᠤᠮ᠃ ᠨᠤᠬᠠᠢ ᠮᠠᠨᠢ ᠮᠠᠨ ᠤ ᠲᠠᠭᠤ ᠶᠢ ᠰᠤᠨᠤᠰᠮᠠᠬᠴᠠ ᠲᠠᠨᠢᠴᠢᠬᠠᠵᠤ᠂ ᠰᠡᠬᠦᠯ ᠢᠶᠠᠨ ᠰᠢᠷᠪᠠᠯᠵᠠᠭᠤᠯᠤᠨ ᠭᠦᠶᠦᠵᠦ ᠢᠷᠡᠭᠡᠳ ᠦᠨᠦᠷᠯᠡᠵᠦ ᠨᠢᠭᠡ ᠦᠵᠡᠨ᠎ᠡ᠂ ᠦᠮᠦᠲᠦᠨ ᠰᠢᠷᠬᠤᠨᠠᠭ ᠠᠴᠠ ᠵᠠᠭᠤᠵᠤ ᠨᠢᠭᠡ ᠦᠵᠡᠨ᠎ᠡ᠂ ᠴᠢᠩᠭᠢᠭᠡᠳ ᠯᠡ ᠭᠡᠷ ᠲᠤᠲᠤᠷ᠎ᠠ ᠨᠠᠭᠠᠰᠢ ᠴᠠᠭᠠᠰᠢ ᠤᠮ ᠲᠤᠮ ᠦᠭᠡᠢ ᠲᠤᠭᠯᠠᠵᠤ ᠬᠦᠶᠦᠬᠦ ᠨᠢ ᠡ᠃ ᠶᠡᠭᠡ ᠵᠤᠬᠢᠶᠠᠯᠴᠢ ᠾᠦᠢᠭᠤ᠋᠄ ︽ᠨᠤᠬᠠᠢ ᠭᠡᠲᠡᠭ ᠠᠳᠤᠭᠤᠰᠤ ᠰᠡᠬᠦᠯ ᠢᠶᠠᠷ ᠢᠶᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠬᠡᠯᠡ ᠪᠠᠷ ᠢᠶᠠᠨ ᠬᠦᠯᠦᠰᠦ ᠪᠠᠨ ᠰᠡᠪᠬᠢᠭᠡᠨ᠎ᠡ︾ ᠭᠡᠵᠦ ᠬᠡᠯᠡᠵᠦ ᠦᠡᠭᠭᠡᠷᠡᠭᠰᠡᠨ᠃ ᠰᠡᠬᠦᠯ ᠢᠶᠠᠷ ᠢᠶᠠᠨ ᠢᠨᠢᠶᠡᠨ᠎ᠡ ᠭᠡᠲᠡᠭ ᠨᠢ ᠰᠡᠬᠦᠯ ᠢᠶᠠᠨ  ᠰᠢᠷᠪᠠᠯᠵᠠᠭᠤᠯᠵᠤ ᠪᠠᠶᠠᠷᠯᠠᠬᠰᠠᠨ ᠰᠡᠳᠬᠢᠯ ᠢᠶᠠᠨ ᠢᠯᠡᠳᠭᠡᠵᠦ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠂ ᠦᠭᠡ ᠬᠡᠯᠡᠵᠦ ᠴᠢᠲᠠᠲᠠᠭ ᠦᠭᠡᠢ ᠠᠮᠢᠲᠠᠨ ᠯᠠ ᠶᠤᠮ ᠬᠤᠶᠢᠨ᠎ᠠ ᠦᠭᠡᠷ᠎ᠡ ᠶᠠᠭᠠᠬᠢᠨ᠎ᠠ ᠪᠤᠢ᠃ ᠮᠡᠨ ᠤ ᠬᠦᠮᠦᠨ ᠨᠤᠬᠠᠢ ᠪᠠᠨ ᠲᠡᠪᠷᠢᠵᠤ ᠠᠪᠤᠭᠠᠳ ᠡᠪᠦᠷ ᠲᠡᠭᠡᠷ᠎ᠡ ᠪᠠᠨ ᠠᠪᠴᠤ ᠰᠠᠭᠤᠯᠭᠠᠬᠤ ᠳᠤ ᠦᠭᠡᠲᠡ ᠠᠴᠠ ᠨᠢ ᠬᠠᠷᠠᠭᠠᠳ ᠪᠦᠲᠦᠬᠦᠨ ᠨᠢᠲᠤᠨ ᠠᠴᠠ ᠪᠠᠨ ᠨᠢᠯᠪᠤᠰᠤ ᠪᠦᠮᠪᠦᠷᠢᠬᠦᠯᠵᠦ ᠪᠠᠶᠢᠯ᠎ᠠ᠃     ᠨᠤᠬᠠᠢ ᠭᠡᠲᠡᠭ ᠠᠮᠢᠲᠠᠨ ᠡᠵᠡᠨ ᠳᠤ ᠪᠠᠨ ᠡᠶᠢᠮᠦ ᠯᠡ ᠠᠮᠠᠷᠠᠭ᠃ ᠲᠡᠲᠡᠨ ᠤ ᠬᠢ ᠠᠴᠠ ᠪᠢᠲᠠ ᠨᠤᠬᠠᠢ ᠠᠴᠠ ᠨᠢᠭᠤᠵᠤ ᠪᠠᠶᠢᠭᠠᠳ ᠭᠠᠷᠴᠤ ᠢᠷᠡᠭᠰᠡᠨ ᠪᠢᠯᠡ᠃ ︽ᠪᠢ ᠨᠤᠬᠠᠢ ᠪᠠᠨ ᠲᠡᠪᠡᠷᠢᠵᠤ ᠠᠪᠤᠭᠠᠳ ᠭᠠᠷᠴᠤ ᠢᠷᠡᠶ᠎ᠡ ᠭᠡᠵᠦ ᠰᠠᠨᠠᠬᠰᠠᠨ︾ ᠭᠡᠵᠦ ᠡᠬᠡᠨᠡᠷ ᠮᠢᠨᠢ ᠵᠠᠮ  ᠳᠤ ᠪᠠᠨ ᠬᠡᠯᠡᠵᠦ ᠪᠠᠶᠢᠪᠠ᠃ ᠭᠡᠪᠡᠴᠦ ︽ᠲᠠᠬᠢᠭᠠᠳ ᠲᠠᠬᠢᠭᠠᠳ ᠨᠤᠬᠠᠢ ᠲᠡᠵᠢᠭᠡᠬᠦ ᠪᠠᠨ ᠪᠤᠯᠢᠶ᠎ᠠ︾ ᠭᠡᠵᠦ ᠲᠦᠷᠦᠬᠦᠦ ᠠᠮᠠ ᠠᠯᠲᠠᠬᠰᠠᠨ ᠤᠴᠢᠷ ᠪᠠᠶᠢᠬᠤ ᠶᠤᠮ ᠴᠢᠨᠢ᠃      ︽ᠤᠴᠢᠬᠤ ᠦᠭᠡᠢ ᠭᠡᠰᠡᠨ ᠭᠠᠵᠠᠷ ᠭᠤᠷᠪᠠ ᠤᠴᠢᠨ᠎ᠠ᠂ ᠤᠷᠤᠬᠤ ᠦᠭᠡᠢ ᠭᠡᠰᠡᠨ ᠡᠬᠦᠲᠡᠨ ᠳᠤ ᠭᠤᠷᠪᠠ ᠤᠷᠤᠨ᠎ᠠ︾ ᠭᠡᠰᠡᠨ ᠦᠭᠡ ᠪᠠᠶᠢᠲᠠᠭ᠃ ᠨᠤᠬᠠᠢ ᠲᠡᠵᠢᠭᠡᠬᠦ ᠪᠠᠨ ᠪᠤᠯᠢᠨ᠎ᠠ︕ ᠭᠡᠵᠦ ᠪᠢᠲᠡ ᠪᠠᠰᠠ ᠬᠡᠯᠡᠵᠦ ᠦᠡᠭᠭᠡᠷᠡᠭᠰᠡᠨ ᠪᠤᠯᠪᠠᠴᠤ᠂ ᠬᠤᠶᠢᠨ᠎ᠠ ᠨᠢ ︽ᠬᠡᠯᠡᠭᠰᠡᠨ ᠢᠶᠠᠨ ᠮᠡᠯᠵᠢᠵᠤ᠂ ᠬᠡᠭᠡᠷᠡᠭᠰᠡᠨ ᠢᠶᠠᠨ ᠵᠠᠯᠬᠢᠬᠰᠠᠨ︾ ᠶᠠᠪᠤᠲᠠᠯ ᠡᠬᠦᠰᠪᠡ᠃ ᠪᠠᠰᠠ ᠠᠷᠪᠠᠨ ᠬᠡᠲᠦᠨ ᠵᠢᠯ ᠦᠡᠭᠭᠡᠷᠡᠭᠡᠳ ᠮᠢᠨᠤ ᠤᠮᠪᠤᠯᠤ ᠦᠬᠢᠨ ᠭᠡᠲᠡᠭ ᠨᠢᠭᠡ ᠶᠠᠭᠤᠮ᠎ᠠ ᠦᠰᠦᠭᠡᠳ ᠭᠠᠷᠤᠭᠠᠳ ᠢᠷᠡᠯ᠎ᠡ᠃ ᠪᠠᠰᠠ ᠯᠠ ᠮᠤᠤᠷ ᠨᠤᠬᠠᠢ ᠳᠤ ᠠᠷᠭ᠎ᠠ ᠦᠭᠡᠢ ᠲᠤᠷᠠᠲᠠᠢ ᠠᠮᠢᠲᠠᠨ᠃ ᠡᠬᠢᠯᠡᠭᠡᠳ ᠮᠤᠤᠷ ᠨᠤᠬᠠᠢ ᠲᠡᠵᠢᠭᠡᠨ᠎ᠡ ᠭᠡᠬᠦᠯᠡᠷ ᠡᠮᠡᠭᠡ ᠨᠢ  ᠶᠡᠷᠦ ᠨᠢ ᠵᠦᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ ᠲᠦᠷᠦᠬᠦᠦ ᠨᠢ ᠮᠤᠤᠷ᠂ ᠨᠤᠬᠠᠢ ᠲᠡᠵᠢᠭᠡᠵᠦ ᠦᠬᠦᠭᠦᠯᠦᠭᠰᠡᠨ ᠪᠤᠶᠤ ᠠᠯᠲᠠᠵᠤ ᠭᠡᠭᠡᠭᠡᠭᠰᠡᠨ᠂ ᠬᠦᠮᠦᠨ ᠳᠤ ᠦᠭᠭᠦᠭᠰᠡᠨ ᠮᠡᠲᠦ ᠶᠢᠨ ᠭᠠᠰᠢᠭᠤᠨ ᠦᠡᠭᠭᠡᠷᠭᠡᠯᠲᠡ ᠲᠠᠢ ᠪᠤᠯᠬᠤᠷ᠂ ᠮᠠᠨ ᠤ ᠬᠦᠮᠦᠨ ᠤ  ᠵᠢᠷᠦᠬᠡᠨ ᠳᠤ ᠨᠢ ᠰᠢᠷ᠎ᠠ ᠤᠰᠤ ᠲᠤᠨᠵᠠᠢ᠃ ᠮᠠᠨ ᠤ ᠶᠡᠭᠡ ᠬᠦᠦ ᠭᠡᠵᠦ ᠬᠡᠷᠡᠭ ᠲᠤ ᠲᠤᠷᠠᠲᠠᠢ ᠠᠮᠢᠲᠠᠨ ᠪᠠᠶᠢᠲᠠᠭ᠃ ︽ᠨᠤᠬᠠᠢ ᠲᠡᠵᠢᠭᠡᠨ᠎ᠡ︾ ᠭᠡᠳ ᠦᠬᠢᠨ ᠨᠢ ᠴᠢᠬᠢᠨ ᠤ ᠬᠤᠨᠭ᠍ᠬᠤ ᠪᠤᠯᠤᠭᠠᠳ ᠪᠠᠶᠢᠬᠤᠯᠠᠷ᠂ ︽ᠲᠠᠶᠢᠳᠢ︾  ᠭᠡᠬᠦ ᠤᠲᠤᠮ ᠤᠨ ᠮᠠᠰᠢ ᠦᠨ᠎ᠡ ᠲᠠᠢ ᠭᠦᠯᠦᠭᠡ ᠠᠪᠤᠭᠠᠳ ᠦᠭᠴᠢᠬᠡᠪᠡ᠃ ᠨᠢᠭᠡ ᠤᠲᠠᠭ᠎ᠠ ᠤᠮᠪᠤᠯᠤ ᠮᠢᠨᠢ ᠪᠢᠴᠢᠬᠠᠨ ︽ᠲᠠᠶᠢᠳᠢ︾ ᠪᠠᠨ ᠬᠦᠲᠦᠯᠦᠭᠡᠳ ᠮᠠᠨ ᠤ ᠳᠤ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠳᠤ ᠂ ᠡᠮᠡᠭᠡ ᠨᠢ ᠦᠵᠡᠮᠡᠭᠴᠡ ᠠᠭᠤᠷᠯᠠᠵᠤ ︽ᠬᠦᠢ ᠲᠦᠢ︾ ᠨᠢ ᠠᠯᠲᠠᠷᠠᠭᠠᠳ ᠭᠡᠷ  ᠲᠤ ᠪᠠᠨ ᠤᠷᠤᠭᠤᠯᠤᠬᠰᠠᠨ ᠦᠭᠡᠢ ᠃ ᠲᠡᠬᠦᠨ ᠠᠴᠠ ᠬᠤᠶᠢᠰᠢ ᠬᠡᠲᠦᠨ ᠵᠢᠯ ᠪᠤᠯᠲᠠᠯ᠎ᠠ ᠤᠮᠪᠤᠯᠤ ᠮᠠᠨᠢ ︽ᠲᠠᠶᠢᠳᠢ︾ ᠶᠢ ᠮᠠᠨ ᠤ  ᠳᠤ ᠲᠠᠭᠠᠭᠤᠯᠵᠤ ᠢᠷᠡᠬᠦ ᠶᠢ ᠵᠤᠷᠢᠬᠯᠠᠭ᠎ᠠ ᠦᠭᠡᠢ᠃     ᠤᠲᠠᠯ ᠦᠭᠡᠢ᠂ ᠡᠬᠡᠨᠡᠷ ᠲᠠᠢ ᠪᠠᠨ ᠪᠢᠲᠠ ᠬᠤᠶᠠᠭᠤᠯᠠ ᠠᠷᠤ ᠠᠷᠤ ᠠᠴᠠ ᠪᠠᠨ ᠠᠵᠢᠯ ᠠᠴᠠ ᠪᠠᠨ ᠲᠠᠷᠬᠠᠯᠠᠬᠲᠠᠵᠤ ᠲᠡᠳᠬᠦᠪᠦᠷᠢ ᠳᠤ ᠭᠠᠷᠤᠯ᠎ᠠ᠃ ᠤᠮᠪᠤᠯᠤ ᠮᠢᠨᠢ ᠴᠤ ᠲᠤᠮᠲᠠᠳᠤ ᠰᠤᠷᠭᠠᠭᠤᠯᠢ ᠳᠤ ᠲᠡᠪᠰᠢᠭᠡᠳ ᠰᠤᠷᠤᠯᠭ᠎ᠠ ᠶᠢᠨ ᠲᠠᠷᠤᠭᠠᠰᠤ ᠬᠦᠨᠲᠦ᠂ ᠲᠠᠰᠬᠠᠯ ᠲᠠᠭᠠᠭᠠᠯᠭᠠᠪᠤᠷᠢ ᠠᠷᠪᠢᠨ᠂ ᠨᠤᠬᠠᠢ ᠪᠠᠷ ᠲᠤᠬᠯᠠᠬᠤ ᠵᠠᠪ ᠴᠢᠯᠦᠭᠡ ᠬᠤᠮᠰᠠ᠃ ︽ᠡᠪᠦᠭᠡ ᠡᠮᠡᠭᠡ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠭᠠᠳ ᠲᠠᠩᠴᠤ ᠡᠯᠡᠢ ᠬᠤᠯᠠᠢ ᠰᠠᠨᠠᠬᠲᠠᠵᠤ ᠪᠠᠶᠢᠬᠤ ᠪᠠᠶᠢᠯᠬᠦᠢ᠃ ᠲᠠ ᠬᠤᠶᠠᠭᠤᠯᠠ ᠶᠢᠨ ᠰᠡᠳᠬᠢᠯ ᠢ ᠠᠷᠭᠠᠲᠠᠶ᠎ᠠ︾ ᠭᠡᠰᠡᠨ ᠰᠠᠶᠢᠬᠠᠨ ᠨᠡᠷ᠎ᠡ ᠪᠠᠷ ᠤᠮᠪᠤᠯᠤ ᠮᠠᠨᠢ ᠨᠦᠬᠦᠭᠡ ︽ᠲᠠᠶᠢᠳᠢ ︾ ᠪᠠᠨ ᠠᠪᠴᠢᠷᠠᠵᠤ ᠦᠭᠭᠦᠭᠰᠡᠨ ᠳᠤ᠂ ᠮᠠᠨ ᠤ ᠬᠦᠮᠦᠨ ᠴᠤ ᠲᠠᠲᠠᠭᠠᠯᠵᠠᠵᠤ ᠴᠢᠲᠠᠬᠰᠠᠨ ᠦᠭᠡᠢ᠃ ᠬᠡᠯᠡᠪᠡᠴᠤ ︽ᠲᠠᠶᠢᠳᠢ︾ ᠭᠡᠵᠦ ᠲᠤᠩ ᠬᠦᠭᠡᠷᠦᠬᠦᠨ ᠠᠮᠢᠲᠠᠨ᠂ ᠮᠠᠰᠢ ᠨᠤᠮᠤᠬᠠᠨ᠂ ᠠᠲᠡ ᠲᠡᠨᠲᠡ  ᠲᠦᠢᠳᠳᠡᠭ ᠦᠭᠡᠢ᠂ ᠬᠡᠷᠡᠭ ᠵᠤᠷᠢᠭ ᠭᠠᠷᠭᠠᠲᠠᠬ ᠦᠭᠡᠢ᠂ ᠬᠠᠮᠤᠭ ᠤᠨ ᠰᠠᠶᠢᠨ ᠨᠢ ᠭᠡᠪᠡᠯ ᠭᠡᠷ ᠲᠤ ᠪᠠᠭᠠᠵᠤ ᠰᠢᠭᠡᠲᠡᠭ ᠦᠭᠡᠢ᠂ ᠴᠠᠭ ᠨᠢ ᠪᠤᠯᠪᠠᠯ ᠭᠦᠶᠦᠵᠦ ᠢᠷᠡᠭᠡᠳ ᠬᠦᠯ ᠭᠠᠷ ᠠᠴᠠ ᠴᠢᠨᠢ ᠲᠠᠲᠠᠵᠤ ᠴᠢᠩᠭᠠᠭᠠᠳ ᠭᠠᠷᠬᠤ ᠭᠡᠰᠡᠨ ᠰᠠᠨᠠᠭ᠎ᠠ ᠪᠠᠨ ᠢᠯᠡᠳᠭᠡᠨ᠎ᠡ᠂ ᠨᠤᠬᠠᠢ ᠨᠠᠶᠠᠨ ᠬᠡᠲᠦᠨ ᠲᠠᠩ ᠦᠭᠡ ᠶᠢ ᠮᠡᠲᠡᠨ᠎ᠡ ᠭᠡᠵᠦ ᠠᠯᠢ ᠨᠢᠭᠡ ᠨᠤᠮ ᠳᠤ ᠪᠢᠴᠢᠭᠰᠡᠨ ᠢ ᠪᠢ ᠤᠡᠭᠰᠢᠬᠰᠠᠨ᠃ ᠮᠠᠨ ᠤ ︽ᠲᠠᠶᠢᠳᠢ︾ ᠴᠤᠬᠤᠮ ᠲᠡᠲᠦᠢ ᠲᠠᠩ ᠦᠭᠡ ᠮᠡᠲᠡᠲᠡᠭ ᠡᠰᠡᠬᠦ ᠶᠢ ᠪᠢ ᠰᠢᠨᠵᠢᠯᠡᠭᠡ ᠬᠢᠵᠦ ᠴᠢᠲᠠᠬᠤ ᠦᠭᠡᠢ᠂ ᠭᠡᠪᠡᠴᠦ ᠢᠲᠡᠵᠦ ᠤᠤᠭᠤᠬᠤ᠂ ᠭᠠᠷᠴᠤ ᠤᠷᠤᠬᠤ ᠭᠡᠬᠦ ᠮᠡᠲᠦ ᠶᠢᠨ ᠲᠤᠬᠢᠶᠠᠨ ᠤ ᠦᠭᠡ ᠶᠢ ᠨᠡᠯᠢᠶᠡᠳ ᠮᠡᠲᠡᠨ᠎ᠡ᠃ ᠬᠦᠲᠦᠯᠦᠭᠡᠳ ᠭᠠᠷᠤᠶ᠎ᠠ ᠭᠡᠳ ᠲᠡᠭᠡᠰᠦ ᠶᠢ ᠨᠢ ᠠᠪᠤᠭᠠᠳ ᠢᠷᠡᠬᠦ ᠳᠤ ᠲᠡᠷᠭᠡᠲᠡ ᠢᠷᠡᠭᠡᠳ ᠵᠤᠬᠰᠤᠵᠤ ᠦᠭᠲᠡᠭ︔ ᠭᠠᠲᠠᠨ᠎ᠠ ᠠᠴᠠ ᠤᠷᠤᠵᠤ ᠢᠷᠡᠭᠡᠳ ᠬᠦᠯ ᠢ ᠨᠢ ᠤᠬᠢᠶᠠᠵᠤ ᠵᠦᠯᠬᠦᠵᠦ ᠦᠭᠭᠦᠶ᠎ᠡ ᠭᠡᠬᠦ ᠳᠤ ᠤᠬᠢᠶᠠᠯᠭ᠎ᠠ ᠶᠢᠨ ᠦᠷᠦᠭᠡᠨ ᠳᠤ ᠲᠠᠭᠠᠵᠤ ᠤᠷᠤᠲᠠᠭ᠃ ᠨᠢᠭᠡ ᠮᠠᠭᠤ ᠨᠢ ︽ᠬᠤᠪᠳᠤᠭ︾ ᠨᠢ ᠬᠡᠴᠡᠬᠦᠦ᠂ ᠬᠦᠮᠦᠨ ᠤ ᠶᠠᠭᠤᠮ᠎ᠠ ᠢᠲᠡᠬᠦ ᠶᠢ ᠬᠠᠷᠠᠮᠠᠬᠴᠠ ᠭᠦᠶᠦᠭᠡᠳ ᠢᠷᠡᠨ᠎ᠡ᠂ ᠢᠲᠡᠰᠢᠨ ᠳᠤ ᠲᠤᠷᠠᠯᠠᠵᠤ ᠭᠤᠷᠢᠯᠠᠬᠰᠠᠨ ᠲᠡᠷᠡ ᠬᠠᠷᠠᠴᠠ ᠶᠢ ᠨᠢ ᠦᠵᠡᠪᠡᠯ ᠶᠠᠭ ᠲᠡᠰᠬᠦ ᠦᠭᠡᠢ᠂ ︽ᠠᠳᠢᠰ︾ ᠲᠡᠲᠦᠢ ᠦᠭᠴᠦ ᠢᠲᠡᠬᠦᠯᠦᠨ᠎ᠡ᠃ ︽ᠬᠦᠮᠦᠨ ᠤ ᠢᠲᠡᠲᠡᠭ ᠬᠤᠭᠤᠯᠠ ᠦᠭᠴᠦ ᠢᠲᠡᠬᠦᠯᠦᠭᠡᠳ ᠨᠤᠬᠠᠢ ᠶᠢ ᠲᠠᠷᠭᠤᠯᠠᠭᠤᠯᠴᠢᠬᠠᠯ᠎ᠠ︾ ᠭᠡᠵᠦ ᠤᠮᠪᠤᠯᠤ ᠬᠠᠶᠠ ᠨᠢᠭᠡ  ᠭᠢᠯᠠᠰᠤᠭᠤᠯᠵᠤ ᠢᠷᠡᠭᠡᠳ ︽ᠲᠤᠩᠭᠤᠲᠤᠯᠭ᠎ᠠ︾ ᠲᠠᠯᠪᠢᠭᠠᠳ ᠶᠠᠪᠤᠨ᠎ᠠ᠃ ᠤᠳᠤ ᠬᠤᠲᠠ ᠳᠤ ᠡᠩᠬᠦᠷᠡᠢ ᠠᠮᠢᠲᠠᠨ ᠲᠡᠵᠢᠭᠡᠬᠦ ᠳᠤ ᠵᠠᠷᠤᠲᠠᠯ ᠶᠡᠭᠡ ᠤᠷᠤᠨ᠎ᠠ᠂ ᠨᠤᠬᠠᠢ ᠲᠡᠵᠢᠭᠡᠬᠦ ᠲᠤᠰᠬᠠᠢ ᠬᠤᠭᠤᠯᠠ ᠬᠦᠨᠡᠰᠦ ᠵᠠᠬᠢᠶᠠᠯᠠᠵᠤ ᠠᠪᠤᠨ᠎ᠠ᠂ ᠦᠰᠦ ᠨᠢ ᠤᠷᠭᠤᠪᠠᠯ ᠲᠤᠰᠬᠠᠢ ᠲᠡᠯᠭᠡᠭᠦᠷ ᠲᠤ ᠤᠴᠢᠵᠤ ᠤᠬᠢᠶᠠᠯᠭᠠᠨ᠎ᠠ᠂ ᠦᠰᠦ ᠶᠢ ᠨᠢ ᠶᠠᠩᠵᠤᠯᠠᠨ᠎ᠠ᠂ ᠪᠠᠭ᠎ᠠ ᠰᠠᠭ᠎ᠠ ᠭᠡᠮᠨᠡᠪᠡᠯ ︽ᠡᠩᠬᠦᠷᠡᠢ ᠠᠮᠢᠲᠠᠨ ᠤ ᠡᠮᠨᠡᠯᠭᠡ︾ ᠳᠤ ᠠᠪᠠᠴᠢᠵᠤ ᠲᠠᠷᠢᠯᠭ᠎ᠠ ᠵᠠᠰᠠᠯᠭ᠎ᠠ ᠬᠢᠯᠭᠡᠨ᠎ᠡ᠃ ᠪᠠᠭ᠎ᠠ ᠴᠤ ᠦᠭᠡᠢ ᠮᠦᠡᠭᠭᠦ ᠲᠦᠬᠦᠷᠢᠭ ᠤᠷᠤᠨ᠎ᠠ᠃ ᠭᠡᠪᠡᠴᠦ ᠶᠠᠭᠠᠬᠢᠨᠠᠮ︖ ᠬᠡᠲᠦᠨ ᠵᠢᠯ ᠲᠡᠵᠢᠭᠡᠭᠡᠳ ᠨᠢᠭᠡᠨᠲᠡ ᠲᠠᠰᠴᠢᠬᠠᠬᠰᠠᠨ ᠬᠤᠶᠢᠨ᠎ᠠ ᠠᠷᠭ᠎ᠠ ᠦᠭᠡᠢ᠂ ᠤᠳᠤ ᠠᠪᠤᠭᠠᠳ ᠶᠠᠪᠤᠬᠤ ᠭᠡᠬᠦᠯᠡᠷ ᠪᠦᠷ ᠦᠭᠴᠦ ᠶᠠᠪᠤᠭᠤᠯᠬᠤ ᠲᠤᠷ᠎ᠠ ᠦᠭᠡᠢ ᠪᠤᠯᠪᠠ᠃ ᠡᠩᠬᠦᠷᠡᠢ ᠠᠮᠢᠲᠠᠨ ᠲᠡᠵᠢᠭᠡᠬᠦ ᠨᠢ ᠬᠦᠮᠦᠰ ᠲᠤ᠂ ᠢᠯᠠᠩᠭᠤᠶ᠎ᠠ ᠭᠡᠷ ᠤᠨ ᠮᠤᠬᠤᠷ ᠢᠶᠠᠨ ᠰᠠᠬᠢᠵᠤ ᠰᠠᠭᠤᠬᠰᠠᠨ ᠨᠠᠰᠤᠲᠠᠶᠢᠴᠤᠳ ᠲᠤ ᠶᠡᠭᠡ ᠰᠠᠶᠢᠨ ᠶᠤᠮ ᠭᠡᠵᠦ᠂ ᠤᠷᠮ᠎ᠠ ᠵᠤᠷᠢᠭ ᠢ ᠨᠢ ᠰᠡᠷᠬᠦᠭᠡᠨ᠎ᠡ᠂ ᠤᠢᠢᠳᠬᠠᠢ ᠭᠠᠨᠭ᠍ᠰᠠᠷᠠᠯ ᠢ  ᠨᠢ ᠲᠠᠶᠢᠯᠤᠨ᠎ᠠ᠂ ᠤᠶᠠᠨ ᠰᠠᠨᠠᠭᠠᠨ ᠤ ᠬᠠᠨᠢ ᠪᠤᠯᠤᠨ᠎ᠠ ᠭᠡᠵᠦ ᠨᠤᠮ ᠳᠤ ᠪᠢᠴᠢᠭᠰᠡᠨ ᠢ ᠪᠢ ᠤᠡᠭᠰᠢᠬᠰᠠᠨ᠃ ᠤᠲᠤ ᠪᠢ ᠡᠬᠦᠨ ᠢ ᠮᠡᠰᠢ ᠦᠨᠡᠮᠰᠢᠬᠦ ᠪᠤᠯᠪᠠ᠃ ᠵᠠᠷᠢᠮ ᠳᠤ ᠪᠠᠨ ᠬᠤᠭ ᠤᠨ ᠰᠠᠪᠠ ᠶᠢ  ᠠᠭᠤᠳᠠᠯᠤᠭᠠᠳ᠂ ᠬᠤᠷᠤᠳ ᠠᠭᠠᠷᠤᠤᠯ ᠢ  ᠬᠤᠯᠠᠭᠤᠭᠠᠳ ︽ᠠᠯᠲᠠᠭ᠎ᠠ︾ ᠭᠠᠷᠭᠠᠴᠢᠬᠠᠪᠠᠴᠤ᠂ ᠵᠢᠭᠠᠬᠠᠨ ᠠᠭᠤᠷᠯᠠᠵᠤ ᠵᠠᠩᠨᠠᠬᠤ ᠠᠴᠠ ᠪᠢᠰᠢ᠂  ᠶᠡᠷᠦ ᠨᠢ ᠵᠤᠲᠤᠵᠤ ᠴᠤᠬᠢᠲᠠᠭ ᠦᠭᠡᠢ᠃ ᠰᠠᠶᠢ ᠠᠪᠤᠭᠠᠳ ᠢᠷᠡᠬᠦ ᠳᠤ ᠨᠢᠲᠤᠷᠭᠠᠨ ᠬᠢᠷᠢ ᠵᠢᠵᠢᠭ ᠠᠮᠢᠲᠠᠨ ᠪᠠᠶᠢᠬᠰᠠᠨ ᠶᠤᠮ᠂ ᠮᠠᠨᠤᠰ ᠲᠤ ᠠᠷᠪᠠᠨ ᠬᠡᠲᠦᠨ ᠵᠢᠯ ᠬᠠᠨᠢ ᠪᠤᠯᠵᠤ ᠠᠮᠢᠲᠤᠷᠠᠬᠤ ᠬᠤᠪᠢ ᠢᠷᠦᠭᠡᠯ ᠲᠠᠢ ᠠᠮᠢᠲᠠᠨ ᠰᠢᠦ᠂ ᠬᠦᠭᠡᠷᠦᠬᠦᠢ︕        ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶ᠋ᠢᠭ᠄  ᠦᠪᠦᠷ ᠮᠣᠩᠭᠤᠯ ᠤᠨ ᠡᠳᠦᠷ ᠤᠨ ᠰᠣᠨᠢᠨ ᠤ ᠬᠤᠷᠢᠶ᠎ᠠ 
  
ᠢᠷᠡᠯᠲᠡ᠄ ᠦᠪᠤᠷ ᠮᠤᠩᠭᠤᠯ ᠤᠨ ︽ᠨᠡᠶᠢᠬᠡᠮ︾ ᠰᠡᠳᠬᠦᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠳᠤᠮᠳᠠᠳᠤ ᠶᠢᠨ ᠰᠢᠯᠢᠳᠡᠭ ᠤᠯᠠᠮᠵᠢᠯᠠᠯᠲᠤ ᠰᠣᠶᠤᠯ ᠤᠨ ᠦᠯᠢᠭᠡᠷ  ᠤᠨ ᠰᠢᠨ᠎ᠡ ᠣᠷᠴᠢᠭᠤᠯᠭ᠎ᠠ᠄ ᠠᠯᠢᠮ᠎ᠠ ᠪᠠᠨ ᠁
ᠠᠷᠠᠳ ᠤᠨ ᠶᠠᠪᠤᠳᠠᠯ ᠤᠨ ᠲᠢᠩᠬᠢᠮ ᠤᠨ ᠨᠠᠮ ᠤᠨ ᠤᠳᠤᠷᠢᠳᠬᠤ ᠳᠤᠭᠤᠶᠢᠯᠠᠩ ᠤᠨ ᠣᠨᠣᠯ ᠰᠤᠷᠤᠯᠴᠠᠯᠭ᠎ᠠ ᠶᠢᠨ ᠁
ᠴᠢ ᠪᠠᠲᠤ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠶᠠᠪᠤᠳᠠᠯ ᠤᠨ ᠲᠢᠩᠬᠢᠮ ᠳᠤ ᠲᠤᠰᠬᠠᠢ ᠰᠡᠳᠦᠪᠲᠦ ᠨᠠᠮ ᠤᠨ ᠁
︽ᠰᠡᠳᠬᠢᠯ ᠢᠶᠠᠨ ᠨᠢᠭᠡᠳᠬᠡᠨ ᠰᠦᠭ ᠰᠦᠨᠡᠰᠦ ᠶᠢ ᠱᠤᠭᠤᠵᠤ᠂ ᠦᠨᠳᠦᠰᠦ ᠶᠢ ᠪᠠᠲᠤᠳᠬᠠᠨ ᠦᠨᠡᠨᠴᠢ ᠰᠢᠳᠤᠷᠭᠤ᠂ ᠁
ᠲᠢᠩᠬᠢᠮ ᠤᠨ ᠰᠢᠰᠲ᠋ᠧᠮ ᠤᠨ ︽︿7 · 1﹀ ᠢ ᠤᠬᠳᠤᠬᠤ︾ ᠲᠡᠷᠢᠭᠦᠨ ᠤ ᠬᠠᠮᠲᠤ‌ᠨᠡᠶᠢᠲᠡ᠂ ᠰᠢᠯᠢᠳᠡᠭ ᠬᠤᠪᠢ ᠁
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号