《 ᠡᠨᠡ ᠤᠳᠠᠭᠠᠨᠤ ᠳᠠᠳᠤᠯᠭᠠᠶᠢᠨ ᠥᠩᠭᠡᠷᠡᠯᠲᠡ ᠨᠢ ᠨᠠᠳᠠ ᠰᠢᠭ᠋ ᠡᠢᠮᠦ ᠠᠵᠢᠯᠤᠨ ᠲᠤᠷᠰᠢᠯᠭᠠ ᠦᠭᠡᠢ ᠲᠡᠭᠦᠰᠦᠭᠰᠡᠨ ᠰᠤᠷᠤᠭ᠍ᠴᠢᠳᠲᠤ ᠦᠢᠯᠡᠳᠦᠯᠭᠡᠶᠢᠨ ᠡᠷᠬᠢᠮ ᠨᠠᠨᠳᠢᠨ ᠲᠣᠬᠢᠶᠠᠯ ᠣᠯᠭᠣᠵᠤ ᠂ ᠮᠢᠨᠤ ᠠᠵᠢᠯᠤᠨ ᠪᠠᠢᠷᠢᠶᠢᠨ ᠣᠷᠴᠢᠨ ᠲᠣᠭᠣᠷᠢᠨᠳᠤ ᠲᠦᠷᠭᠡᠨ ᠵᠣᠬᠢᠴᠠᠵᠤ ᠂ ᠠᠵᠢᠯᠤᠨ ᠪᠠᠢᠷᠢᠶᠢᠨ ᠥᠷᠢᠰᠦᠯᠳᠦᠬᠦ ᠬᠦᠴᠦᠨᠢ ᠨᠡᠮᠡᠭᠳᠡᠭᠦᠯᠦᠭᠰᠡᠨ ᠪᠠᠢᠨᠠ 》 ᠭᠡᠵᠦ 8 ᠰᠠᠷᠠᠶᠢᠨ 19ᠦ ᠡᠳᠦᠷ᠂ ᠣᠷᠳᠣᠰᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠠᠴᠠ ᠲᠡᠭᠦᠰᠦᠭᠰᠡᠨ ᠰᠣᠷᠣᠭ᠍ᠴᠢ ᠦ᠋ ᠰᠢᠤᠸᠠᠨ ᠵᠢᠩ ᠬᠡᠯᠡᠪᠡ᠃
ᠡᠨᠡ ᠵᠢᠯᠦᠨ ᠲᠡᠭᠦᠰᠬᠦ ᠤᠯᠠᠷᠢᠯᠳᠤ᠂ ᠦ᠋ ᠰᠢᠤᠸᠠᠨ ᠵᠢᠩ ᠬᠥᠮᠥᠨᠦ ᠬᠦᠴᠦᠨᠦ ᠡᠬᠢ ᠪᠠᠶᠠᠯᠢᠭ᠋ ᠪᠠ ᠨᠡᠢᠭᠡᠮᠦᠨ ᠪᠠᠲᠤᠯᠠᠭᠠᠶᠢᠨ ᠰᠦᠯᠵᠢᠶᠡᠨ ᠳᠡᠭᠡᠷᠡᠡᠴᠡ ᠳᠠᠳᠤᠯᠭᠠᠶᠢᠨ ᠲᠤᠰᠬᠠᠢ ᠲᠠᠯᠠᠪᠠᠢᠶᠢᠨ ᠠᠵᠢᠯᠲᠠᠨ ᠡᠯᠰᠡᠬᠦ ᠴᠤᠭᠯᠠᠭᠠᠨᠤ ᠮᠡᠳᠡᠭᠡ ᠵᠠᠩᠭᠢᠶᠢ ᠣᠯᠵᠤ ᠦᠵᠡᠭᠡᠳ᠂ ᠲᠤᠷᠰᠢᠵᠤ ᠦᠵᠡᠬᠦ ᠪᠤᠳᠤᠯ ᠰᠡᠳᠬᠢᠯᠭᠡᠶᠢ ᠡᠪᠦᠷᠯᠡᠨ ᠣᠴᠢᠵᠠᠢ᠃ ᠲᠡᠷᠡ ᠠᠵᠢᠯᠲᠠᠨ ᠡᠯᠰᠡᠬᠦ ᠴᠤᠭᠯᠠᠭᠠᠨ ᠳᠡᠭᠡᠷᠡ ᠸᠠᠨ ᠵᠧᠩ ᠪᠡᠯᠡ ᠣᠷᠣᠭᠤᠯᠤᠯᠲᠠᠶᠢᠨ ᠪᠦᠯᠦᠭᠯᠡᠯᠦᠨ ᠨᠢᠭᠤᠷᠲᠠᠨ ᠰᠢᠯᠭᠠᠯᠲᠠᠶᠢ ᠥᠩᠭᠡᠷᠡᠭᠡᠵᠦ᠂ 3 ᠰᠠᠷᠠᠶᠢᠨ ᠬᠤᠭᠤᠴᠠᠭᠠᠨᠤ ᠴᠡᠪᠡᠷ ᠤᠰᠤᠨᠤ ᠠᠵᠢᠯᠯᠠᠭ᠍ᠴᠢᠶᠢᠨ ᠠᠵᠢᠯᠤᠨ ᠪᠠᠢᠷᠢᠶᠢᠨ ᠳᠠᠳᠤᠯᠭᠠᠪᠠᠨ ᠡᠬᠢᠯᠡᠭᠦᠯᠵᠡᠢ᠃
ᠠᠵᠢᠯᠤᠨ ᠪᠠᠢᠷᠢᠳᠤ ᠠᠩᠬᠠ ᠬᠦᠷᠬᠦ ᠦᠶᠡᠳᠦ᠂ ᠤᠨᠤᠯ ᠪᠣᠯᠣᠨ ᠪᠣᠳᠠᠲᠤ ᠪᠠᠢᠳᠠᠯᠤᠨ ᠵᠥᠷᠢᠶᠡᠡᠴᠡ ᠪᠣᠯᠵᠤ᠂ ᠦ᠋ ᠰᠢᠤᠸᠠᠨ ᠵᠢᠩ ᠦᠨᠳᠦᠰᠦᠨ ᠮᠡᠳᠡᠭᠦᠯᠦᠯᠲᠡᠶᠢᠨ ᠬᠦᠰᠦᠨᠦᠭᠲᠦᠶᠢ ᠵᠣᠬᠢᠶᠠᠬᠤᠳᠠᠭᠠᠨ ᠴᠤ᠌ ᠪᠣᠯᠪᠠᠰᠤᠷᠠᠩᠭᠤᠢ ᠪᠢᠰᠢ ᠪᠠᠢᠵᠠᠢ᠃ ᠠᠵᠤ ᠠᠬᠤᠢᠯᠠᠯᠤᠨ ᠬᠢᠨ ᠲᠡᠭᠦᠨᠳᠦ ᠰᠢᠰᠲᠧᠮᠲᠠᠢ ᠬᠥᠮᠥᠵᠢᠭᠦᠯᠬᠦ ᠲᠥᠯᠥᠪᠯᠡᠭᠡ ᠲᠣᠭᠲᠠᠭᠠᠨ ᠥᠭᠴᠦ ᠂ ᠠᠬᠠᠮᠠᠳ ᠠᠵᠢᠯᠲᠠᠳᠢ ᠳᠠᠭᠠᠭᠤᠯᠤᠨ ᠰᠤᠷᠭᠠᠬᠤ ᠠᠵᠢᠯᠢ ᠲᠣᠬᠢᠷᠠᠭᠤᠯᠵᠠᠢ ᠃ 《 ᠪᠠᠭ᠍ᠰᠢ ᠨᠠᠳᠠᠳᠤ ᠦᠯᠢᠭᠡᠷ ᠠᠪᠴᠤ ᠰᠢᠯᠭᠠᠨ ᠪᠠᠢᠴᠠᠭᠠᠵᠤ᠂ ᠲᠣᠭᠠ ᠪᠠᠷᠢᠮᠲᠠᠶᠢ ᠵᠠᠳᠠᠯᠤᠨ ᠰᠢᠨᠵᠢᠯᠡᠬᠦᠶᠢ ᠵᠢᠭᠠᠵᠤ᠂ ᠨᠠᠳᠠᠳᠤ ᠦᠢᠯᠡᠳᠪᠦᠷᠢᠯᠡᠯᠦᠨ ᠲᠠᠰᠤᠭᠤᠨ ᠴᠡᠪᠡᠷ ᠤᠰᠤᠨᠤ ᠠᠵᠢᠯᠯᠠᠭᠠᠨᠤ ᠶᠠᠪᠤᠴᠠᠶᠢ ᠣᠢᠯᠠᠭᠠᠭᠤᠯᠤᠭᠰᠠᠨᠠᠴᠠ ᠪᠢ ᠡᠳᠦᠷ ᠪᠦᠷᠢ ᠲᠠᠪᠰᠢᠯᠳᠠᠲᠠᠢ ᠪᠣᠯᠤᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠪᠠ᠃ 》 ᠦ᠋ ᠰᠢᠤᠸᠠᠨ ᠵᠢᠩ ᠬᠡᠯᠡᠬᠦᠳᠡᠭᠡᠨ ᠂ ᠪᠠᠭ᠍ᠰᠢᠶᠢᠨ ᠵᠢᠯᠣᠭᠣᠳᠤᠯᠭᠠᠳᠤ ᠲᠦᠰᠢᠭᠯᠡᠵᠦ ᠪᠠᠢᠭᠰᠠᠨᠠᠴᠠᠪᠠᠨ ᠬᠡᠰᠡᠭ ᠰᠢᠯᠭᠠᠨ ᠪᠠᠢᠴᠠᠭᠠᠯᠲᠠ ᠪᠠ ᠴᠡᠪᠡᠷ ᠤᠰᠤᠨᠤ ᠠᠵᠢᠯᠯᠠᠭᠠᠶᠢ ᠪᠡᠶᠡᠪᠡᠨ ᠳᠠᠭᠠᠭᠠᠨ ᠪᠡᠶᠡᠯᠡᠭᠦᠯᠵᠦ ᠳᠡᠶ᠋ᠢᠯᠬᠦ ᠪᠣᠯᠵᠤ ᠂ ᠥᠪᠡᠷᠦᠨ ᠲᠤᠰᠬᠠᠢ ᠮᠡᠷᠭᠡᠵᠢᠯᠦᠨ ᠤᠷᠠ ᠴᠢᠳᠠᠪᠤᠷᠢ ᠨᠢ ᠢᠯᠡᠳᠲᠡ ᠳᠡᠭᠡᠭᠰᠢᠯᠡᠵᠡᠢ ᠃
ᠲᠦᠷᠦᠭᠦᠬᠡᠨ ᠂ ᠦ᠋ ᠰᠢᠤᠸᠠᠨ ᠵᠢᠩ ᠳᠠᠳᠤᠯᠭᠠᠶᠢᠨ ᠬᠤᠭᠤᠴᠠᠭᠠᠨᠳᠠᠬᠢ ᠰᠢᠯᠢᠳᠡᠭ ᠢᠯᠡᠷᠡᠯ ᠪᠠ ᠪᠠᠷᠢᠮᠵᠢᠶᠠᠳᠤ ᠬᠦᠷᠬᠦ ᠤᠷᠠ ᠴᠢᠳᠠᠪᠤᠷᠢᠪᠠᠷᠢᠶᠠᠨ ᠸᠠᠨ ᠵᠧᠩ ᠪᠡᠯᠡ ᠣᠷᠣᠭᠤᠯᠤᠯᠲᠠᠶᠢᠨ ᠪᠦᠯᠦᠭᠯᠡᠯᠳᠦ ᠵᠢᠩᠬᠢᠨᠢ ᠠᠵᠢᠯᠲᠠᠨᠢᠶᠠᠷ ᠡᠯᠰᠡᠭᠳᠡᠪᠡ ᠃ 《 ᠡᠨᠡ ᠤᠳᠠᠭᠠᠨᠤ ᠳᠠᠳᠤᠯᠭᠠᠶᠢᠨ ᠲᠣᠬᠢᠶᠠᠯᠢᠶᠠᠷ ᠪᠢ ᠲᠤᠷᠰᠢᠯᠭᠠ ᠦᠭᠡᠢ ᠠᠵᠢᠯᠴᠢᠨᠠᠴᠠᠪᠠᠨ ᠪᠡᠶᠡᠪᠡᠨ ᠳᠠᠭᠠᠭᠠᠵᠤ ᠠᠵᠢᠯᠯᠠᠬᠤ ᠠᠵᠢᠯᠲᠠᠨ ᠪᠣᠯᠵᠤ ᠂ ᠮᠡᠷᠭᠡᠵᠢᠯᠦᠨ ᠠᠵᠢᠯᠤᠨ ᠪᠠᠢᠷᠢ ᠳᠡᠭᠡᠷᠡᠪᠡᠨ ᠬᠥᠯ ᠲᠣᠭᠲᠠᠵᠤ ᠴᠢᠳᠠᠵᠠᠢ ᠂ ᠡᠢᠮᠦᠡᠴᠡ ᠪᠢ ᠣᠨᠴᠠᠭᠠᠢᠯᠠᠨ ᠲᠠᠯᠠᠷᠬᠠᠵᠤ ᠪᠠᠢᠨᠠ ᠃ 》
ᠦ᠋ ᠰᠢᠤᠸᠠᠨ ᠵᠢᠩ ᠪᠣᠯ ᠮᠠᠨᠤ ᠣᠷᠣᠨᠤ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠳᠠᠳᠤᠯᠭᠠᠶᠢᠨ ᠲᠦᠷᠦᠶᠢᠨ ᠪᠣᠳᠣᠯᠭᠠᠪᠠᠷ ᠳᠠᠮᠵᠢᠨ ᠠᠵᠢᠯ ᠣᠯᠭᠣᠯᠲᠠᠶᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠨᠡᠢᠲᠡᠯᠢᠭ ᠵᠢᠱ᠌ᠢᠶᠡ ᠪᠣᠯᠣᠨᠠ᠃ ᠡᠨᠡ ᠵᠢᠯ ᠂ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠬᠥᠮᠥᠨᠦ ᠬᠦᠴᠦᠨᠦ ᠡᠬᠢ ᠪᠠᠶᠠᠯᠢᠭ᠋ ᠪᠠ ᠨᠡᠢᠭᠡᠮᠦᠨ ᠪᠠᠲᠤᠯᠠᠭᠠᠶᠢᠨ ᠰᠠᠯᠠᠭᠠ ᠮᠥᠴᠢᠷ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠳ ᠵᠡᠷᠭᠡ ᠵᠠᠯᠠᠭᠤᠴᠤᠳᠤᠨ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠬᠡᠷᠡᠭᠴᠡᠭᠡᠳᠦ ᠠᠩᠬᠠᠷᠤᠯᠢᠶᠠᠨ ᠲᠥᠪᠯᠡᠷᠡᠭᠦᠯᠵᠦ ᠂ ᠣᠯᠠᠨ ᠵᠦᠢᠯᠦᠨ ᠠᠷᠭᠠ ᠬᠡᠮᠵᠢᠶᠡᠶᠢ ᠵᠡᠷᠭᠡᠪᠡᠷ ᠬᠡᠷᠡᠭᠯᠡᠨ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠳᠠᠳᠤᠯᠭᠠᠶᠢᠨ ᠠᠵᠢᠯᠢ ᠲᠦᠯᠬᠢᠨ ᠠᠬᠢᠭᠤᠯᠵᠤ ᠂ ᠠᠵᠤ ᠠᠬᠤᠢᠯᠠᠯ ᠪᠣᠯᠣᠨ ᠵᠠᠯᠠᠭᠤᠴᠤᠳᠤᠨ ᠨᠡᠪᠲᠡᠷᠡᠯᠴᠡᠬᠦ ᠬᠥᠭᠥᠷᠭᠡᠶᠢ ᠴᠣᠭᠴᠠᠯᠠᠪᠠ ᠃ 7 ᠰᠠᠷᠠᠶᠢᠨ ᠰᠡᠭᠦᠯᠴᠢ ᠪᠣᠯᠲᠠᠯᠠ᠂ ᠪᠦᠬᠦ ᠣᠷᠣᠨᠳᠤ ᠨᠢᠭᠡᠨᠲᠡ 1.2 ᠲᠦᠮᠡᠨ ᠳᠠᠳᠤᠯᠭᠠᠶᠢᠨ ᠠᠵᠢᠯᠤᠨ ᠪᠠᠢᠷᠢ ᠡᠯᠰᠡᠵᠦ᠂ 5050 ᠬᠥᠮᠥᠨᠢ ᠳᠠᠳᠤᠯᠭᠠᠶᠢᠨ ᠠᠵᠢᠯᠤᠨ ᠪᠠᠢᠷᠢᠳᠤ ᠭᠠᠷᠭᠠᠵᠤ᠂ ᠵᠠᠯᠠᠭᠤᠴᠤᠳᠢ ᠬᠠᠪᠰᠤᠷᠤᠨ ᠠᠵᠢᠯ ᠣᠯᠬᠤ ᠴᠢᠳᠠᠪᠤᠷᠢᠶᠢ ᠨᠢ ᠳᠡᠭᠡᠭᠰᠢᠯᠡᠭᠦᠯᠵᠦ᠂ ᠠᠵᠤ ᠠᠬᠤᠢᠯᠠᠯᠳᠤ ᠰᠢᠯᠢᠳᠡᠭ ᠪᠡᠯᠡᠳᠬᠡᠯ ᠴᠢᠳᠠᠪᠤᠷᠢᠲᠠᠨᠢ ᠨᠥᠭᠡᠴᠡᠯᠡᠵᠦ ᠥᠭᠴᠡᠢ᠃
ᠣᠢᠯᠠᠭᠠᠭᠰᠠᠨᠢᠶᠠᠷ ᠂ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠳᠠᠳᠤᠯᠭᠠᠶᠢᠨ ᠠᠵᠢᠯᠢ ᠦᠨᠡᠨ ᠬᠦ᠌ ᠰᠠᠢᠲᠤᠷ ᠬᠢᠬᠦᠶᠢᠨ ᠲᠥᠯᠥᠭᠡ᠂ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠬᠥᠮᠥᠨᠦ ᠬᠦᠴᠦᠨᠦ ᠡᠬᠢ ᠪᠠᠶᠠᠯᠢᠭ᠋ ᠪᠠ ᠨᠡᠢᠭᠡᠮᠦᠨ ᠪᠠᠲᠤᠯᠠᠭᠠᠶᠢᠨ ᠲᠢᠩᠬᠢᠮᠡᠴᠡ ᠵᠢᠯᠦᠨ ᠡᠬᠢᠨᠳᠦ ᠳᠠᠷᠤᠮᠠᠯᠯᠠᠨ ᠲᠠᠷᠬᠠᠭᠠᠭᠰᠠᠨ ᠠᠵᠢᠯ ᠣᠯᠭᠣᠯᠲᠠᠶᠢ ᠠᠬᠢᠭᠤᠯᠬᠤ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠳᠠᠳᠤᠯᠭᠠᠶᠢᠨ ᠨᠥᠬᠥᠪᠦᠷᠢᠶᠢᠨ ᠪᠠᠷᠢᠮᠵᠢᠶᠠᠶᠢ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠨᠢᠭᠡᠳᠦᠭᠡᠷ ᠲᠥᠷᠥᠯᠦᠨ ᠭᠠᠵᠠᠷ ᠣᠷᠣᠨᠤ ᠨᠠᠭᠠᠲᠤ ᠵᠠᠬᠠᠶᠢᠨ ᠴᠠᠯᠢᠩᠤᠨ ᠪᠠᠷᠢᠮᠵᠢᠶᠠᠶᠢᠨ 70%ᠠᠴᠠ ᠳᠣᠣᠷᠠ ᠦᠭᠡᠢ ᠪᠣᠯᠲᠠᠯᠠ ᠳᠡᠭᠡᠭᠰᠢᠯᠡᠭᠦᠯᠵᠦ ᠂ ᠳᠠᠳᠤᠯᠭᠠᠶᠢᠨ ᠬᠤᠭᠤᠴᠠᠭᠠ ᠨᠢ ᠳᠦᠭᠦᠷᠦᠭᠡᠳ ᠦᠯᠡᠳᠡᠭᠡᠨ ᠬᠡᠷᠡᠭᠯᠡᠬᠦ ᠨᠣᠷᠮᠠ ᠨᠢ 50%ᠠᠴᠠ ᠳᠡᠭᠡᠭᠰᠢᠳᠦ ᠬᠦᠷᠦᠭᠰᠡᠨ ᠨᠢᠭᠡᠴᠢᠳᠦ ᠨᠥᠬᠥᠪᠦᠷᠢᠶᠢᠨ ᠪᠠᠷᠢᠮᠵᠢᠶᠠᠶᠢ 100%ᠳᠤ ᠬᠦᠷᠲᠡᠯᠡ ᠳᠡᠭᠡᠭᠰᠢᠯᠡᠭᠦᠯᠵᠦ ᠂ ᠳᠠᠳᠤᠯᠭᠠᠶᠢᠨ ᠬᠤᠭᠤᠴᠠᠭᠠ ᠨᠢ ᠳᠦᠭᠦᠷᠦᠭᠡᠳᠦᠢ ᠪᠣᠯ ᠳᠠᠳᠤᠯᠭᠠᠶᠢᠨ ᠬᠥᠮᠥᠰ ᠯᠦ᠍ᠭᠡ ᠬᠥᠳᠡᠯᠮᠦᠷᠢᠶᠢᠨ ᠭᠡᠷᠡ ᠲᠣᠭᠲᠠᠭᠰᠠᠨ ᠪᠠᠢᠪᠠᠯ ᠂ ᠦᠯᠡᠳᠡᠭᠰᠡᠨ ᠬᠤᠭᠤᠴᠠᠭᠠᠨᠤ ᠳᠠᠳᠤᠯᠭᠠᠶᠢᠨ ᠨᠥᠬᠥᠪᠦᠷᠢ ᠣᠯᠭᠣᠨᠠ᠃
ᠡᠭᠦᠨᠦ ᠬᠠᠮᠲᠤ ᠂ ᠳᠠᠳᠤᠯᠭᠠᠶᠢᠨ ᠠᠵᠢᠯᠤᠨ ᠪᠠᠢᠷᠢᠶᠢᠨ ᠴᠤᠭᠯᠠᠭᠤᠯᠬᠤ ᠲᠥᠯᠥᠪᠯᠡᠭᠡᠶᠢ ᠵᠣᠬᠢᠶᠠᠨ ᠪᠠᠢᠭᠤᠯᠤᠨ ᠬᠡᠷᠡᠭᠵᠢᠭᠦᠯᠵᠦ ᠂ ᠣᠯᠠᠨ ᠡᠰᠢᠪᠡᠷ ᠴᠤᠭᠯᠠᠭᠤᠯᠬᠤ ᠂ ᠲᠣᠭᠠ ᠬᠡᠮᠵᠢᠶᠡ ᠶᠠᠰᠤ ᠴᠢᠨᠠᠷᠢ ᠵᠡᠷᠭᠡᠪᠡᠷ ᠴᠢᠬᠤᠯᠠᠴᠢᠯᠠᠬᠤ ᠵᠠᠷᠴᠢᠮ ᠶᠣᠰᠣᠭᠠᠷ ᠂ ᠬᠥᠲᠥᠴᠢ ᠠᠵᠤ ᠠᠬᠤᠢᠯᠠᠯ ᠂ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠰᠤᠳᠤᠯᠭᠠᠨᠤ ᠬᠦᠷᠢᠶᠡᠯᠡᠩ ᠭᠠᠵᠠᠷᠤᠨ ᠨᠡᠭᠡᠭᠡᠨ ᠬᠥᠭᠵᠢᠭᠦᠯᠬᠦ ᠬᠠᠮᠢᠶᠠᠷᠤᠯᠲᠠᠶᠢᠨ ᠲᠥᠷᠥᠯ ᠂ ᠮᠡᠷᠭᠡᠵᠢᠯᠦᠨ ᠲᠥᠷᠥᠯ ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠰᠤᠳᠤᠯᠭᠠᠨᠤ ᠲᠥᠷᠥᠯᠦᠨ ᠠᠵᠢᠯᠤᠨ ᠪᠠᠢᠷᠢᠳᠤ ᠬᠠᠨᠳᠤᠭᠤᠯᠤᠨ ᠂ ᠠᠵᠢᠯ ᠣᠯᠭᠣᠯᠲᠠ ᠂ ᠨᠡᠢᠭᠡᠮᠦᠨ ᠪᠠᠲᠤᠯᠠᠭᠠᠶᠢᠨ ᠬᠦᠷᠢᠶᠡᠨᠳᠡᠬᠢ ᠨᠡᠭᠡᠭᠡᠨ ᠬᠥᠭᠵᠢᠭᠦᠯᠬᠦ ᠲᠤᠰᠠᠯᠠᠬᠤ ᠲᠥᠷᠥᠯᠦᠨ ᠳᠠᠳᠤᠯᠭᠠᠶᠢᠨ ᠠᠵᠢᠯᠤᠨ ᠪᠠᠢᠷᠢᠳᠤ ᠬᠠᠨᠳᠤᠭᠤᠯᠤᠨ ᠂ ᠠᠵᠢᠯᠤᠨ ᠪᠠᠢᠷᠢᠶᠢᠨ ᠨᠥᠭᠡᠴᠡᠶᠢ ᠭᠦᠢᠴᠡᠳ ᠬᠢᠨᠡ᠃
ᠵᠠᠯᠭᠠᠭᠠᠳ ᠂ ᠥᠪᠥᠷ ᠮᠣᠩᠭᠣᠯ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠳᠦᠨ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠳᠠᠳᠤᠯᠭᠠᠶᠢᠨ ᠠᠵᠢᠯᠢ ᠦᠷᠭᠦᠯᠵᠢᠯᠡᠨ ᠠᠬᠢᠭᠤᠯᠵᠤ ᠂ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠳᠠᠳᠤᠯᠭᠠᠶᠢᠨ ᠦᠢᠯᠡᠴᠢᠯᠡᠭᠡᠨᠦ ᠪᠠᠲᠤᠯᠠᠭᠠᠶᠢᠨ ᠴᠢᠳᠠᠪᠤᠷᠢᠶᠢ ᠪᠥᠬᠥ ᠲᠠᠯᠠᠪᠠᠷ ᠲᠡᠭᠦᠯᠳᠡᠷᠵᠢᠭᠦᠯᠦᠨ ᠂ ᠳᠠᠳᠤᠯᠭᠠᠶᠢᠨ ᠰᠠᠭᠤᠷᠢᠨ ᠭᠠᠵᠠᠷᠤᠨ ᠬᠥᠳᠡᠯᠦᠩᠭᠦᠢ ᠬᠠᠮᠢᠶᠠᠷᠤᠯᠲᠠᠶᠢ ᠴᠢᠩᠭᠠᠳᠬᠠᠵᠤ ᠂ ᠳᠠᠳᠤᠯᠭᠠᠶᠢᠨ ᠠᠵᠢᠯᠤᠨ ᠪᠠᠢᠷᠢᠶᠢ ᠥᠷᠭᠡᠨᠢᠶᠡᠷ ᠴᠤᠭᠯᠠᠭᠤᠯᠤᠨ ᠂ ᠰᠤᠷᠭᠠᠭᠤᠯᠢ ᠠᠵᠤ ᠠᠬᠤᠢᠯᠠᠯᠤᠨ ᠬᠠᠩᠭᠠᠯᠭᠠ ᠬᠡᠷᠡᠭᠴᠡᠭᠡᠶᠢᠨ ᠬᠥᠭᠥᠷᠭᠡᠶᠢ ᠪᠠᠢᠭᠤᠯᠵᠤ ᠂ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠳᠦᠨ ᠠᠵᠢᠯ ᠣᠯᠭᠣᠯᠲᠠᠶᠢᠨ ᠵᠠᠮᠢᠶᠠᠷ ᠯᠠᠪᠳᠠᠭᠤᠨ ᠵᠠᠮᠨᠠᠬᠤᠳᠤ ᠬᠦᠴᠦᠨ ᠨᠡᠮᠡᠷᠢᠯᠡᠵᠦ ᠂ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠴᠢᠨᠠᠷ ᠰᠠᠢᠲᠠᠢ ᠬᠥᠭᠵᠢᠯᠲᠡᠳᠦ ᠴᠢᠳᠠᠪᠤᠷᠢᠲᠠᠨᠤ ᠲᠤᠯᠭᠠᠭᠤᠷᠢᠯᠠᠯ ᠬᠠᠩᠭᠠᠨᠠ᠃