ᠣᠷᠢ ᠳᠤᠯᠠᠭᠠᠨ ᠬᠠᠪᠤᠷ ᠤᠨ ᠡᠬᠢ ᠨᠡᠬᠡᠭᠡᠭᠰᠡᠨ ᠬᠠᠩᠰᠢ ᠪᠣᠯᠬᠤ ᠲᠠᠢ ᠵᠡᠷᠭᠡ ᠪᠠᠷ ᠠᠷᠠᠴᠢᠯᠠᠭᠠ ᠮᠠᠯᠯᠠᠭᠠ ᠳᠤ | ᠬᠤᠯᠪᠤᠭᠳᠠᠬᠤ ᠠᠯᠢ ᠤᠯᠠᠨ ᠮᠠᠯᠵᠢᠯ ᠤᠨ ᠠᠵᠢᠯ ᠦᠷᠨᠢᠭᠦᠨ ᠬᠦᠭᠵᠢᠶᠡᠨ ᠲᠠᠢ ᠪᠠᠷ ᠡᠬᠢᠯᠡᠳᠡᠭ ᠪᠢᠯᠡ᠃ ᠤᠷᠭᠠ | ᠲᠤᠬᠤᠶᠢᠯᠠᠭᠰᠠᠨ ᠠᠳᠤᠭᠤᠴᠢᠳ ᠨᠠᠭᠠᠰᠢ ᠴᠠᠭᠠᠰᠢ ᠳᠠᠪᠬᠢᠯᠳᠤᠨ ᠶᠠᠭᠠᠬᠢᠬᠤ ᠶᠢᠨ ᠠᠷᠭᠠ ᠦᠭᠡᠢ ᠶᠠᠭᠠᠷᠠᠯᠲᠠᠢ | ᠪᠠᠶᠢᠳᠠᠭ ᠨᠢ ᠬᠦᠮᠦᠰ ᠤᠨ ᠰᠡᠳᠭᠢᠯ ᠢ ᠪᠠᠶᠠᠰᠬᠠᠨᠠ᠃ ᠤᠯᠠᠨ ᠤ ᠮᠡᠳᠡᠭᠡᠵᠢ ᠪᠠᠷ ᠬᠠᠩᠰᠢ ᠪᠤᠯᠤᠭᠰᠠᠭᠠᠷ ᠬᠢᠵᠠᠭᠠᠯᠠᠩ | ᠦᠷᠢᠶᠡ ︵ᠳᠦᠷᠪᠡᠨ ᠨᠠᠰᠤᠲᠠᠢ ᠡᠷᠡ ᠮᠤᠷᠢ︶ ᠶᠢ ᠠᠵᠢᠷᠭᠠ ᠲᠠᠯᠪᠢᠬᠤ ᠠᠴᠠ ᠪᠣᠰᠣᠳ ᠢ ᠨᠢ ᠬᠦᠩᠭᠡᠯᠡᠨ ᠵᠠᠰᠠᠳᠠᠭ᠃ | ᠪᠠᠰᠠ ᠦᠷᠢᠶᠡ ᠡᠰᠭᠡᠬᠦ ᠭᠡᠬᠦ ᠪᠤᠶᠤ ᠦᠷᠢᠶᠡ ᠬᠠᠭᠠᠷᠢᠬᠤ ᠭᠡᠳᠡᠭ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠦᠷᠢᠶᠡ ᠳᠤ ᠰᠠᠪᠰᠠᠭᠠ | ᠬᠢᠬᠦ ᠭᠡᠵᠦ ᠬᠡᠯᠡᠬᠦ ᠴᠤ ᠪᠣᠢ᠃ | ᠦᠷᠢᠶᠡ ᠶᠢ ᠬᠦᠩᠭᠡᠯᠡᠬᠦ ᠳᠡᠭᠡᠨ ᠤᠰᠤ ᠪᠡᠯᠴᠢᠭᠡᠷ ᠲᠤᠬᠢᠲᠠᠢ᠂ ᠠᠭᠤᠳᠠᠮ ᠲᠠᠯᠠ ᠭᠠᠵᠠᠷ ᠪᠤᠶᠤ ᠴᠢᠭᠢᠭᠯᠢᠭ | ᠭᠠᠵᠠᠷ ᠢ ᠰᠤᠩᠭᠤᠨ᠂ ᠲᠤᠭᠲᠠᠭᠰᠠᠨ ᠪᠠᠶᠢᠷᠢ ᠲᠠᠯᠠᠪᠠᠢ ᠪᠠᠶᠢᠭᠤᠯᠤᠭᠰᠠᠨ ᠴᠤ ᠪᠤᠯᠳᠠᠭ᠃ ᠭᠡᠬᠦ ᠳᠡᠭᠡᠨ ᠡᠯᠡᠰᠦ | ᠮᠠᠩᠬᠠᠨ ᠠᠴᠠ ᠵᠠᠶᠢᠲᠠᠢ᠂ ᠮᠤᠳᠤ ᠰᠢᠭᠤᠢ ᠨᠢ ᠵᠤᠵᠠᠭᠠᠨ ᠦᠭᠡᠢ ᠪᠣᠯ ᠨᠡᠩ ᠰᠠᠶᠢᠨ ᠪᠠᠶᠢᠳᠠᠭ᠃ | ᠦᠷᠢᠶᠡ ᠬᠦᠩᠭᠡᠯᠡᠬᠦ ᠠᠶᠢᠯ ᠤᠨ ᠬᠢᠨ ᠬᠠᠩᠰᠢ ᠶᠢᠨ ᠡᠮᠦᠨᠡ ᠡᠳᠦᠷ ᠠᠴᠠ ᠡᠬᠢᠯᠠᠨ ᠠᠶᠢᠯ ᠬᠤᠲᠠᠨ ᠤ ᠪᠠᠨ | ᠠᠳᠤᠭᠤ ᠮᠠᠯ ᠳᠤ ᠳᠡᠮᠲᠡᠢ᠂ ᠬᠦᠴᠦ ᠲᠤᠷᠪᠢᠲᠡᠢ ᠵᠠᠯᠠᠭᠤᠴᠤᠳ ᠲᠠᠭᠠᠨ ᠴᠢᠮᠡᠭᠡ ᠲᠠᠷᠬᠠᠭᠠᠨ ᠬᠠᠪᠰᠤᠷᠤᠨ | ᠳᠡᠮᠵᠢᠭᠦᠯᠬᠦ ᠪᠠᠷ ᠵᠠᠯᠠᠳᠠᠭ ᠪᠦᠭᠡᠳ ᠪᠠᠰᠠ ᠨᠤᠲᠤᠭ ᠤᠨ ᠲᠤᠮᠤᠭᠠᠲᠠᠳ ᠢ ᠤᠷᠢᠵᠤ ᠦᠷᠢᠶᠡ ᠡᠰᠭᠡᠬᠦ ᠠᠵᠢᠯ ᠳᠠᠭᠠᠨ | ᠦᠩᠭᠡ ᠨᠡᠮᠡᠭᠳᠡᠭᠦᠯᠳᠡᠭ ᠪᠢᠯᠡ᠃ | ᠮᠠᠯᠴᠢᠳ ᠦᠷᠢᠶᠡ ᠪᠠᠨ ᠴᠤᠭᠯᠠᠭᠠᠵᠤ ᠪᠠᠷᠠᠭᠰᠠᠨ ᠤ ᠳᠠᠷᠠᠭᠠ ᠦᠷᠢᠶᠡ ᠡᠰᠭᠡᠬᠦ ᠭᠠᠵᠠᠷ ᠢ ᠴᠡᠪᠡᠷᠯᠡᠨ᠂ | ᠳᠦᠷᠪᠡᠨ ᠦᠨᠴᠦᠭ ᠲᠤᠨᠢ ᠬᠦᠵᠢ᠂ ᠠᠷᠴᠠ᠂ ᠠᠭᠠᠷᠣ ᠵᠡᠷᠭᠡ ᠰᠠᠶᠢᠬᠠᠨ ᠦᠨᠦᠷᠲᠦ ᠤᠷᠭᠤᠮᠠᠯ ᠢ ᠠᠰᠠᠭᠠᠨ ᠦᠨᠳᠦᠷ | ᠰᠠᠩ ᠲᠠᠯᠪᠢᠵᠤ᠂ ᠪᠠᠰᠠ ᠲᠠᠯᠠᠪᠠᠢ ᠶᠢᠨ ᠳᠤᠮᠳᠠ ᠤᠷᠴᠢᠮ ᠳᠤ ᠲᠤᠯᠭᠠ ᠲᠠᠯᠪᠢᠨ ᠠᠷᠭᠠᠯ ᠤᠨ ᠭᠠᠯ ᠬᠦᠭᠵᠢᠭᠡᠨᠡ᠃ | ᠦᠷᠢᠶᠡ ᠬᠦᠩᠭᠡᠯᠡᠨ ᠵᠠᠰᠠᠭᠴᠢ ᠬᠦᠮᠦᠨ ᠬᠢᠲᠤᠭᠠ᠂ ᠰᠠᠪᠰᠠᠯᠭᠠ᠂ ᠢᠯᠢᠭᠦᠷ ᠵᠡᠷᠭᠡ ᠪᠠᠭᠠᠵᠢ ᠪᠠᠨ ᠤᠷᠢᠳ ᠢᠶᠠᠷ ᠬᠦᠵᠢ᠂ | ᠠᠷᠴᠠ ᠪᠠᠷ ᠠᠷᠢᠭᠤᠳᠬᠠᠨ᠂ ᠳᠠᠷᠠᠭᠠ ᠨᠢ ᠲᠤᠯᠭᠠ ᠭᠠᠯ ᠤᠨ ᠳᠡᠭᠡᠭᠦᠷ ᠭᠤᠷᠪᠠᠨᠲᠠ ᠡᠷᠭᠢᠭᠦᠯᠦᠨ ᠡᠨᠡ ᠡᠳᠦᠷ ᠤᠨ | ᠦᠷᠢᠶᠡ ᠡᠰᠭᠡᠬᠦ ᠠᠵᠢᠯ ᠤᠨ ᠤᠷᠤᠭᠰᠢᠲᠠᠢ ᠪᠠᠶᠢᠬᠤ ᠶᠢ ᠵᠦᠩᠨᠡᠨ ᠪᠡᠯᠭᠡᠳᠡᠳᠡᠭ᠃ | ᠳᠠᠷᠠᠭᠠ ᠨᠢ ᠬᠦᠩᠭᠡᠯᠡᠬᠦ ᠦᠷᠢᠶᠡ ᠢ ᠰᠠᠩ ᠤᠨ ᠤᠲᠤᠭᠠᠨ ᠤ ᠬᠠᠵᠠᠭᠤ ᠪᠠᠷ ᠬᠦᠲᠦᠯᠦᠨ ᠠᠪᠴᠤ ᠢᠷᠡᠭᠡᠳ᠂ | ᠦᠷᠢᠶᠡ ᠡᠰᠭᠡᠬᠦ ᠲᠠᠯᠠᠪᠠᠢ ᠶᠢᠨ ᠳᠤᠮᠳᠠ ᠤᠷᠴᠢᠮ ᠢᠶᠠᠷ ᠬᠦᠷᠴᠦ ᠦᠷᠢᠶᠡ ᠶᠢᠨ ᠴᠤᠯᠪᠤᠭᠤᠷ ᠢ ᠵᠦᠪ ᠲᠠᠯᠠ ᠠᠴᠠ ᠨᠢ | ᠪᠤᠷᠤᠭᠤ ᠲᠡᠶᠢᠰᠢ ᠡᠷᠭᠢᠭᠦᠯᠦᠨ ᠶᠠᠭ ᠦᠷᠢᠶᠡ ᠶᠢᠨ ᠬᠠᠮᠠᠷ ᠤᠨ ᠬᠢᠨᠢ ᠳᠡᠭᠡᠭᠦᠷ ᠪᠤᠷᠤᠭᠤ ᠲᠠᠯᠠ ᠵᠦᠭ ᠨᠢ ᠬᠦᠴᠦᠯᠡᠨ | ᠲᠠᠲᠠᠵᠤ ᠲᠤᠯᠤᠭᠠᠢ ᠶᠢ ᠨᠢ ᠪᠤᠷᠤᠭᠤ ᠲᠠᠯᠠ ᠵᠦᠭ ᠨᠢ ᠬᠠᠨᠳᠤᠭᠤᠯᠵᠤ᠂ ᠳᠠᠷᠠᠭᠠ ᠨᠢ ᠪᠠᠷᠠᠭᠤᠨ ᠭᠠᠷ ᠤᠨ | ᠲᠤᠬᠤᠢ ᠪᠠᠷ ᠢᠶᠠᠨ ᠦᠷᠢᠶᠡ ᠶᠢᠨ ᠪᠤᠷᠤᠭᠤ ᠲᠠᠯᠠ ᠶᠢᠨ ᠮᠤᠨᠳᠠᠭᠠ ᠶᠢ ᠪᠡᠶᠡ ᠶᠢᠨ ᠵᠦᠭ ᠢᠶᠠᠨ ᠢᠳᠡᠯᠡᠨ ᠳᠠᠷᠤᠬᠤ ᠳᠤ | ᠦᠷᠢᠶᠡ ᠵᠤᠭᠰᠤᠵᠤ ᠳᠡᠶᠢᠯᠬᠦ ᠦᠭᠡᠢ ᠶᠠᠭ ᠬᠡᠪᠲᠡᠬᠦ ᠪᠠᠶᠢᠳᠠᠯ ᠳᠤ ᠤᠷᠤᠬᠤ ᠳᠤ ᠪᠣᠰᠣᠳ ᠵᠠᠯᠠᠭᠤᠴᠤᠳ ᠬᠦᠵᠦᠭᠦᠦ | ᠰᠡᠭᠦᠵᠢ ᠶᠢ ᠨᠢ ᠳᠤᠷᠤᠭᠰᠢ ᠳᠠᠷᠤᠵᠤ ᠦᠷᠢᠶᠡ ᠶᠢ ᠤᠨᠠᠭᠠᠳᠠᠭ ︵ᠡᠭᠦᠨ ᠢ ᠦᠷᠢᠶᠡ ᠤᠨᠠᠭᠠᠬᠤ ᠭᠡᠳᠡᠭ︶᠃ | ᠦᠷᠢᠶᠡ ᠪᠠᠨ ᠤᠨᠠᠭᠠᠭᠰᠠᠨ ᠤ ᠬᠤᠶᠢᠨᠠ ᠲᠤᠯᠤᠭᠠᠢ ᠶᠢ ᠨᠢ ᠬᠤᠶᠢᠰᠢ ᠬᠠᠨᠳᠤᠭᠤᠯᠤᠨ ᠨᠦᠷᠤᠭᠤᠨ ᠳᠤᠤᠷᠠ | ᠨᠢ ᠪᠠᠭ᠋ᠠᠨ ᠬᠤᠲᠤᠭᠤᠷ ᠰᠢᠭ᠋ ᠪᠤᠯᠭᠠᠵᠤ ᠳᠦᠷᠪᠡᠨ ᠬᠦᠯ ᠢ ᠨᠢ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠬᠡᠪᠲᠡᠭᠦᠯᠦᠨᠡ᠃ ᠳᠠᠷᠠᠭᠠ | ᠨᠢ ᠦᠷᠦᠭᠡᠯ ᠤᠨ ᠠᠯᠠᠭᠠ ᠪᠠᠷ ᠳᠦᠷᠪᠡᠨ ᠬᠦᠯ ᠢ ᠨᠢ ᠳᠡᠪᠲᠦᠭᠡᠵᠦ᠂ ᠳᠠᠬᠢᠨ ᠤᠷᠲᠤ ᠳᠡᠭᠡᠰᠦ ᠶᠢ ᠦᠷᠦᠭᠡᠯ ᠤᠨ | ᠠᠯᠠᠭᠠ ᠳᠤ ᠵᠠᠯᠭᠠᠨ ᠬᠤᠶᠢᠲᠤ ᠬᠤᠶᠠᠷ ᠬᠦᠯ ᠢ ᠨᠢ ᠲᠤᠯᠤᠭᠠᠢ ᠵᠦᠭ ᠨᠢ ᠬᠦᠴᠦᠲᠡᠢ ᠲᠠᠲᠠᠵᠤ ᠪᠠᠶᠢᠪᠠᠯ ᠪᠣᠯᠴᠢᠬᠠᠨᠠ᠃ | ᠡᠨᠡ ᠦᠶᠡ ᠳᠤ ᠭᠡᠷ ᠤᠨ ᠡᠵᠡᠨ ᠴᠠᠭᠠᠨ ᠢᠰᠡᠭᠡᠢ ᠠᠪᠴᠢᠷᠠᠨ ᠦᠷᠢᠶᠡ ᠶᠢᠨ ᠬᠤᠶᠠᠷ ᠭᠤᠶᠠ ᠶᠢᠨ ᠳᠤᠤᠷᠠ | ᠳᠡᠪᠢᠰᠴᠦ ᠲᠠᠯᠪᠢᠨᠠ᠃ ᠵᠠᠰᠠᠭᠴᠢ ᠬᠦᠮᠦᠨ ᠰᠠᠪᠠᠨ ᠳᠤ ᠪᠦᠯᠢᠶᠡᠨ ᠤᠰᠤ ᠬᠢᠵᠦ ᠠᠪᠴᠢᠷᠠᠨ ᠦᠷᠢᠶᠡ ᠶᠢᠨ | ᠪᠦᠭᠡᠷᠡ ᠶᠢᠨ ᠬᠠᠪᠳᠠᠭ ᠢ ᠰᠠᠶᠢᠲᠤᠷ ᠤᠬᠢᠶᠠᠨ ᠴᠡᠪᠡᠷᠯᠡᠭᠡᠳ ᠳᠠᠪᠤᠰᠤ ᠲᠠᠢ ᠤᠰᠤ ᠪᠠᠷ ᠱᠠᠪᠰᠢᠵᠤ᠂ ᠵᠡᠭᠦᠨ | ᠭᠠᠷ ᠢᠶᠠᠷ ᠢᠶᠠᠨ ᠦᠷᠢᠶᠡ ᠶᠢᠨ ᠪᠦᠭᠡᠷᠡ ᠶᠢᠨ ᠬᠠᠪᠳᠠᠭ ᠢ ᠬᠦᠴᠦᠯᠡᠨ ᠠᠳᠬᠤᠵᠤ ᠬᠤᠶᠠᠷ ᠪᠦᠭᠡᠨᠰᠦᠭ ᠢ ᠨᠢ ᠢᠯᠡ | ᠪᠣᠯᠭᠠᠭᠰᠠᠨ ᠤ ᠳᠠᠷᠠᠭᠠ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠪᠦᠭᠡᠨᠰᠦᠭ ᠤᠨ ᠳᠡᠭᠡᠷᠡ ᠲᠠᠯᠠ ᠳᠤ ᠭᠤᠯᠳᠤ ᠪᠠᠷ ᠠᠳᠠᠯᠢ ᠤᠷᠲᠤ | ᠡᠰᠭᠡᠨᠡ ︵ᠡᠭᠦᠨ ᠢ ᠦᠷᠢᠶᠡ ᠡᠰᠭᠡᠬᠦ ᠭᠡᠳᠡᠭ︶᠃ ᠳᠠᠷᠠᠭᠠ ᠨᠢ ᠦᠷᠢᠶᠡ ᠶᠢᠨ ᠪᠦᠭᠡᠷᠡ ᠶᠢᠨ ᠬᠠᠪᠳᠠᠭ ᠢ ᠬᠦᠴᠦᠲᠡᠢ | ᠰᠢᠬᠠᠵᠤ ᠬᠤᠶᠠᠷ ᠲᠠᠯᠠ ᠶᠢᠨ ᠪᠦᠭᠡᠨᠰᠦᠭ ᠢ ᠬᠠᠪᠳᠠᠭ ᠠᠴᠠ ᠨᠢ ᠰᠢᠬᠠᠵᠤ ᠭᠠᠷᠭᠠᠭᠠᠳ ᠰᠠᠪᠰᠠᠯᠭᠠ ᠪᠠᠷ ᠬᠤᠶᠠᠷ | ᠪᠦᠭᠡᠨᠰᠦᠭ ᠤᠨ ᠳᠤᠤᠷᠠ ᠲᠠᠯᠠ ᠶᠢᠨ ᠭᠤᠤᠷᠰᠤ ᠶᠢ ᠴᠢᠩᠭᠠ ᠬᠠᠪᠴᠢᠨ᠂ ᠰᠠᠪᠰᠠᠯᠭᠠ ᠶᠢᠨ ᠬᠤᠶᠠᠷ ᠦᠵᠦᠭᠦᠷ ᠤᠨ | ᠴᠦ᠋ ᠶᠢ ᠴᠢᠩᠭᠠ ᠴᠦᠳᠡᠵᠦ᠂ ᠲᠤᠯᠭᠠᠨ ᠳᠤ ᠤᠯᠠᠶᠢᠯᠭᠠᠵᠤ ᠪᠠᠶᠢᠭᠰᠠᠨ ᠢᠯᠡᠭᠦᠷ ᠢᠶᠠᠷ ᠰᠠᠪᠰᠠᠯᠭᠠ ᠳᠤ ᠬᠠᠪᠴᠢᠭᠳᠠᠵᠤ | ᠪᠠᠶᠢᠭᠠ ᠪᠦᠭᠡᠨᠰᠦᠭ ᠤᠨ ᠤᠷᠲᠤ ᠭᠤᠤᠷᠰᠤ ᠶᠢ ᠬᠠᠭᠠᠷᠢᠨᠠ ︵ᠡᠭᠦᠨ ᠢ ᠦᠷᠢᠶᠡ ᠬᠠᠭᠠᠷᠢᠬᠤ ᠭᠡᠳᠡᠭ︶᠃ ᠲᠡᠭᠡᠭᠡᠳ | ᠬᠤᠶᠠᠷ ᠲᠠᠯᠠ ᠶᠢᠨ ᠪᠦᠭᠡᠨᠰᠦᠭ ᠬᠠᠭᠠᠷᠢᠭᠳᠠᠨ ᠲᠠᠰᠤᠷᠠᠵᠤ ᠤᠨᠠᠭᠰᠠᠨ ᠤ ᠳᠠᠷᠠᠭᠠ ᠵᠠᠰᠠᠭᠴᠢ ᠠᠴᠠ ᠦᠷᠢᠶᠡ ᠶᠢᠨ | ᠪᠦᠭᠡᠷᠡ ᠶᠢᠨ ᠬᠠᠪᠳᠠᠭ ᠪᠠ ᠭᠤᠤᠷᠰᠤ ᠶᠢᠨ ᠦᠵᠦᠭᠦᠷ ᠢ ᠳᠠᠪᠤᠰᠤ ᠲᠠᠢ ᠤᠰᠤ ᠪᠠᠷ ᠰᠠᠶᠢᠲᠤᠷ ᠱᠠᠪᠰᠢᠵᠤ ᠳᠠᠷᠠᠭᠠ | ᠨᠢ ᠦᠷᠢᠶᠡ ᠶᠢᠨ ᠬᠢᠯᠭᠠᠰᠤᠨ ᠰᠡᠭᠦᠯ ᠢ ᠴᠠᠭᠠᠨ ᠱᠠ ᠪᠦᠰ ᠢᠶᠠᠷ ᠴᠢᠩᠭᠠ ᠤᠷᠢᠶᠠᠵᠤ ᠤᠶᠠᠭᠠᠳ ᠦᠷᠢᠶᠡ ᠪᠠᠨ | ᠪᠤᠰᠬᠠᠨᠠ᠃ ᠦᠷᠢᠶᠡ ᠪᠣᠰᠴᠣ ᠵᠤᠭᠰᠤᠭᠠᠳ ᠤᠷᠤᠭᠰᠢ ᠠᠯᠬᠤᠬᠤ ᠦᠶᠡ ᠳᠤ ᠵᠠᠰᠠᠭᠴᠢ ᠬᠦᠮᠦᠨ ᠦᠷᠢᠶᠡ ᠶᠢᠨ | ᠰᠡᠭᠦᠯ ᠤᠨ ᠦᠵᠦᠭᠦᠷ ᠠᠴᠠ ᠠᠳᠬᠤᠨ ᠠᠪᠴᠤ ᠭᠤᠷᠪᠠᠨᠲᠠ ᠴᠢᠩᠭᠠᠭᠠᠭᠠᠳ ︽ᠲᠦᠮᠡᠨ ᠠᠭᠲᠠ ᠶᠢᠨ ᠲᠦᠷᠦᠭᠦᠦ᠂ | ᠮᠢᠩᠭᠠᠨ ᠠᠭᠲᠠ ᠶᠢᠨ ᠮᠠᠩᠯᠠᠢ᠂ ᠡᠵᠡᠨ ᠤ ᠪᠠᠨ ᠰᠠᠶᠢᠨ ᠬᠦᠯᠦᠭ ᠪᠤᠯᠲᠤᠭᠠᠢ︾ ᠭᠡᠵᠦ ᠢᠷᠦᠭᠡᠭᠡᠳ ᠲᠠᠯᠪᠢᠵᠤ | ᠶᠠᠪᠤᠭᠤᠯᠤᠨᠠ᠃ ᠦᠷᠢᠶᠡ ᠶᠢᠨ ᠰᠡᠭᠦᠯ ᠢ ᠴᠢᠩᠭᠠᠭᠠᠬᠤ ᠨᠢ ᠪᠠᠰᠠ ᠤᠴᠢᠷ ᠲᠠᠢ᠃ ᠡᠭᠦᠨ ᠳᠤ ᠨᠢᠭᠡ ᠲᠠᠯᠠ ᠪᠠᠷ | ᠦᠷᠢᠶᠡ ᠶᠢᠨ ᠴᠢᠳᠠᠯ ᠲᠤᠷᠪᠢ ᠶᠢ ᠦᠵᠡᠳᠡᠭ᠂ ᠨᠦᠭᠦᠭᠡ ᠲᠠᠯᠠ ᠪᠠᠷ ᠵᠠᠷᠢᠮ ᠦᠷᠢᠶᠡ ᠲᠦᠷᠦᠯᠬᠢ ᠶᠠᠰᠤᠨ ᠰᠡᠭᠦᠯ ᠨᠢ | ᠪᠠᠭᠠ ᠮᠤᠷᠤᠢ ᠪᠠᠶᠢᠳᠠᠭ᠂ ᠬᠦᠩᠭᠡᠯᠡᠨ ᠵᠠᠰᠠᠭᠰᠠᠨ ᠤ ᠳᠠᠷᠠᠭᠠ ᠵᠠᠰᠠᠭᠴᠢ ᠠᠴᠠ ᠡᠪ ᠵᠦᠢᠲᠡᠢ ᠲᠠᠲᠠᠵᠤ | ᠦᠭᠭᠦᠭᠰᠡᠨ ᠠᠴᠠ ᠦᠷᠢᠶᠡ ᠶᠢᠨ ᠡᠰᠭᠡᠭᠰᠡᠨ ᠰᠢᠷᠬᠠ ᠴᠢᠮᠳᠠᠭᠠ ᠨᠢ ᠡᠳᠡᠭᠡᠷᠡᠬᠦ ᠶᠢᠨ ᠬᠠᠮᠲᠤ ᠰᠡᠭᠦᠯ ᠨᠢ ᠪᠠᠰᠠ | ᠠᠰᠬᠠᠨ ᠪᠤᠯᠤᠭᠠᠳ ᠵᠠᠰᠠᠷᠠᠳᠠᠭ᠃ | ᠦᠷᠢᠶᠡ ᠬᠦᠩᠭᠡᠯᠡᠬᠦ ᠠᠵᠢᠯ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭᠠ ᠲᠤᠰ ᠠᠶᠢᠯ ᠤᠨ ᠬᠢᠨ ᠪᠣᠯᠣᠨ ᠴᠤᠭᠯᠠᠷᠠᠨ | ᠢᠷᠡᠭᠰᠡᠨ ᠬᠦᠮᠦᠰ ᠪᠠᠶᠢᠨ ᠳᠠᠬᠢᠨ ᠦᠨᠳᠦᠷ ᠰᠠᠩ ᠳᠤ ᠬᠦᠵᠢ᠂ ᠠᠷᠴᠠ᠂ ᠠᠭᠠᠷᠣ ᠵᠡᠷᠭᠡ ᠶᠢ ᠨᠡᠮᠡᠵᠦ ᠠᠯᠲᠠᠨ | ᠰᠠᠩ ᠤᠨ ᠠᠩᠭᠢᠯᠤᠮᠠ ᠦᠨᠦᠷ ᠢ ᠠᠭᠠᠷ ᠲᠡᠭᠷᠢ ᠳᠤ ᠮᠠᠨᠳᠤᠭᠤᠯᠵᠤ ᠪᠠᠶᠢᠳᠠᠭ ᠪᠦᠭᠡᠳ ᠨᠠᠰᠤᠲᠠᠶᠢᠴᠤᠳ ᠲᠤᠯᠭᠠ | ᠲᠤᠭᠤᠷᠢᠨ ᠰᠠᠭᠤᠵᠤ ᠭᠠᠯ ᠨᠠᠮᠠᠬᠦ ᠶᠢᠨ ᠬᠠᠮᠲᠤ ᠦᠷᠢᠶᠡ ᠶᠢᠨ ᠬᠦᠭᠡᠨᠰᠦᠭ ᠢ ᠰᠢᠷᠠᠵᠤ ᠢᠳᠡᠨ᠂ ᠠᠮᠲᠠᠲᠤ | ᠰᠠᠷᠬᠤᠳ ᠢᠶᠠᠨ ᠪᠠᠯᠭᠤᠬᠤ ᠶᠢᠨ ᠬᠠᠮᠲᠤ ᠤᠷᠳᠤ ᠶᠢᠨ ᠳᠠᠭᠤᠤ ᠪᠠᠨ ᠬᠠᠩᠭᠢᠨᠠᠭᠤᠯᠤᠨᠠ᠃ | | ︵ᠢᠷᠡᠯᠲᠡ᠄ ᠪᠤᠷᠵᠤᠤ᠂ ᠤᠯᠠᠭᠠᠨᠪᠠᠭᠠᠲᠤᠷ᠂ ᠲᠠᠨᠠ ᠶᠢᠨ ᠨᠠᠶᠢᠷᠠᠭᠤᠯᠤᠭᠰᠠᠨ ︽ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ | ᠠᠷᠠᠴᠢᠯᠠᠭᠠ ᠶᠢᠨ ᠰᠤᠶᠤᠯ︾ ᠭᠡᠬᠦ ᠨᠤᠮ ᠠᠴᠠ ᠰᠤᠩᠭᠤᠨ ᠰᠡᠶᠢᠷᠡᠭᠦᠯᠪᠡ᠃︶ | | |