ᠳᠤᠯᠠᠢ᠌ᠶ᠎ᠠ ᠵᠤᠬᠢᠶᠠᠪᠠ  
    ᠨᠦᠬᠦᠷ ᠮᠢᠨᠢ ᠪᠠᠭᠰᠢ ᠬᠦᠮᠦᠨ ᠪᠢᠰᠢ ᠂ ᠬᠡᠲᠡᠯ᠎ᠡ ᠮᠠᠰᠢ ᠤᠯᠠᠨ ᠬᠦᠮᠦᠰ ᠲᠡᠭᠦᠨ᠎ᠢ ᠪᠠᠭᠰᠢ ᠬᠡᠮᠡᠨ ᠳᠠᠭᠤᠳᠠᠳᠠᠭ᠃
     ᠠᠷᠪᠠᠭ᠋ᠠᠳ ᠵᠢᠯ  ᠬᠡᠴᠢᠨᠡᠬᠡᠨ ᠤᠯᠠᠨ ᠰᠤᠷᠤᠭᠴᠢ᠂ ᠭᠡᠷ᠎ᠤᠨ ᠠᠬᠠᠮᠠᠳ ᠵᠶ᠋ᠠᠷ ᠪᠠᠭᠰᠢ ᠬᠡᠮᠡᠨ ᠳᠠᠭᠤᠳᠠᠭᠤᠯᠵᠤ ᠶᠠᠪᠤᠬᠤ᠎ᠳᠤ᠎ᠪᠠᠨ ᠪᠠᠭᠰᠢ ᠭᠡᠳᠡᠭ ᠡᠨᠡ ᠬᠦ᠌ ᠳᠠᠭᠤᠳᠠᠯᠭ᠎ᠠ ᠵᠢᠨ ᠳᠤᠬᠠᠢ  ᠨᠠᠷᠢᠨ ᠠᠩᠬᠠᠷᠴᠤ ᠴᠤ᠌ ᠦᠵᠡᠭᠰᠡᠨ ᠦᠬᠡᠢ ᠪᠢᠯᠠ᠃ ᠵᠦᠬᠡᠷ ᠯᠨ ᠠᠵᠢᠯ᠎ᠤᠨ ᠳᠤᠳᠤᠳᠬᠠᠯ ᠳᠠᠭᠤᠳᠠᠯᠭ᠎ᠠ ᠲᠡᠳᠦᠢ᠎ᠪᠠᠷ ᠪᠤᠳᠤᠵᠤ ᠠᠪᠤ᠎ᠠᠴᠠ ᠤᠯᠤᠭᠰᠠᠨ ᠨᠡᠷ᠎ᠡ᠎ᠪᠠᠨ ᠠᠵᠢᠭ ᠴᠤ᠌ ᠦᠬᠡᠢ ᠤᠷᠤᠯᠠᠭᠤᠯᠵᠤ ᠶᠠᠪᠤᠳᠠᠭ ᠃ ᠲᠡᠢ᠌ᠮᠦ᠎ᠠᠴᠠ ᠪᠠᠭᠰᠢ ᠵᠢᠨ ᠠᠯᠪᠠᠨ᠎ᠳᠤ ᠠᠵᠢᠯᠯᠠᠳᠠᠭ ᠦᠬᠡᠢ ᠨᠦᠬᠦᠷ᠎ᠢ ᠮᠢᠨᠢ ᠬᠦᠮᠦᠰ 《ᠪᠠᠭᠰᠢ》 ᠬᠡᠵᠦ ᠳᠠᠭᠤᠳᠠᠭ᠋ᠠᠳ ᠪᠠᠢ᠌ᠬᠤ᠎ᠳᠤ᠎ᠨᠢ ᠲᠠᠡᠭᠴᠤ ᠳᠠᠳᠬᠤ ᠦᠬᠡᠢ ᠂ ᠵᠠᠷᠢᠮ᠎ᠳᠤ᠎ᠪᠠᠨ ᠪᠦᠷ ᠴᠤ᠌ ᠬᠠᠴᠢᠨ ᠰᠡᠳᠬᠢᠭᠳᠡᠯ ᠲᠦᠷᠦᠭᠳᠡᠳᠡᠭ᠃ ᠲᠡᠷᠡ ᠴᠢᠨᠢ ᠮᠠᠨᠤᠰ ᠰᠢᠭ᠋ ᠰᠤᠷᠭ᠋ᠠᠭᠤᠯᠢ᠎ᠳᠤ ᠬᠢᠴᠢᠶᠡᠯ ᠵᠢᠭ᠋ᠠᠳᠠᠭ ᠬᠦᠮᠦᠰ᠎ᠤᠨ ᠠᠵᠢᠯ᠎ᠤᠨ ᠴᠤᠯᠠ ᠰᠢᠦ ᠳ᠋ᠠ᠃
     ᠨᠢᠬᠡ ᠤᠳᠠᠭ᠎ᠠ ᠪᠢ ᠨᠦᠬᠦᠷ᠎ᠲᠤ᠎ᠪᠠᠨ᠄ 《ᠴᠢᠮ᠎ᠠ ᠵᠢ ᠬᠦᠮᠦᠰ ᠰᠢᠯᠦᠭᠴᠢ᠂ ᠵᠤᠬᠢᠶᠠᠯᠴᠢ᠂ ᠡᠰᠡᠬᠦᠯ᠎ᠡ ᠶᠠᠮᠠᠷ ᠨᠢᠬᠡᠨ ᠵᠠᠩ ᠦᠢ᠍ᠯᠡ ᠵᠢᠨ ᠡᠷᠳᠡᠮᠳᠡᠨ ᠭᠡᠵᠦ ᠳᠠᠭᠤᠳᠠᠭᠰᠠᠨ ᠴᠤ᠌  ᠶᠠᠭ᠋ᠠᠬᠢᠮᠠᠢ᠂ ᠪᠠᠭᠰᠢ ᠬᠡᠵᠦ ᠳᠠᠭᠤᠳᠠᠬᠤ ᠯᠡ ᠳᠤᠬᠢᠷᠠᠮᠵᠢ ᠦᠬᠡᠢ》 ᠭᠡᠵᠦ ᠮᠠᠷᠭᠤᠵᠤ ᠦᠩᠬᠡᠷᠡᠭᠰᠡᠨ ᠶᠤᠮ᠃ ᠲᠡᠭᠡᠭᠦ᠎ᠳᠤ ᠲᠡᠷᠡ ᠮᠠᠨᠢ᠄ 《ᠲᠠᠳᠠ ᠨᠠᠷ ᠦᠬᠡᠷ᠎ᠡ ᠳᠠᠭᠤᠳᠠᠯᠭ᠎ᠠ ᠤᠯᠬᠤ ᠦᠬᠡᠢ ᠶᠤᠮ ᠴᠢᠨᠢ᠃ ᠴᠢᠮ᠎ᠠ  ᠰᠢᠭ᠋ 〈ᠬᠠᠨᠢ ᠮᠢᠨᠢ〉 ᠭᠡᠵᠦ ᠳᠠᠭᠤᠳᠠᠵᠤ ᠪᠤᠯᠬᠤ ᠦᠬᠡᠢ ᠪᠢᠵᠠ ᠳ᠋ᠠ》 ᠬᠡᠵᠦ ᠳᠤᠭᠯᠠᠭ᠋ᠠᠮ ᠪᠤᠯᠭ᠋ᠠᠭ᠋ᠠᠳ ᠯᠡ ᠦᠩᠬᠡᠷᠡᠭᠰᠡᠨ ᠳ᠋ᠠ᠃ ᠪᠢ ᠬᠡᠳᠤ ᠬᠤᠨᠤᠭ ᠪᠤᠳᠤᠯᠬᠢᠯᠠᠭ᠋ᠠᠳ᠄ 《ᠴᠢᠮ᠎ᠠ᠎ᠳᠤ ᠪᠠᠭᠰᠢ ᠭᠡᠳᠡᠭ ᠳᠠᠭᠤᠳᠠᠯᠭ᠎ᠠ ᠵᠤᠭᠢᠷᠠᠬᠤ ᠦᠬᠡᠢ᠃ ᠬᠠᠷᠢᠨ ᠶᠠᠮᠠᠷ ᠶᠠᠮᠠᠷ ᠰᠤᠳᠤᠯᠭ᠋ᠠᠳᠠᠨ ᠭᠡᠪᠡᠯ ᠵᠤᠬᠢᠨ᠎ᠠ᠃ ᠪᠠᠭ᠎ᠠ ᠰᠤᠷᠭ᠋ᠠᠭᠤᠯᠢ ᠪᠤᠶᠤ ᠴᠡᠴᠡᠷᠯᠢᠭ᠎ᠤᠨ ᠪᠠᠭᠰᠢ᠎ᠢ ᠴᠤ᠌ ᠬᠦᠮᠦᠰ ᠪᠠᠭᠰᠢ ᠭᠡᠳᠡᠭ  ᠪᠢᠰᠢ ᠦᠦ》 ᠭᠡᠪᠡ᠃ 《ᠪᠢ ᠪᠠᠭ᠎ᠠ ᠰᠤᠷᠭ᠋ᠠᠭᠤᠯᠢ᠎ᠳᠤ ᠴᠦ᠍ ᠪᠠᠭᠰᠢᠯᠠᠵᠤ ᠦᠩᠭᠡᠷᠡᠭᠰᠡᠨ ᠦᠬᠡᠢ ᠪᠠᠢ᠌ᠭ᠋ᠠᠳ ᠪᠠᠭᠰᠢ  ᠭᠡᠵᠦ ᠳᠠᠭᠤᠳᠠᠭᠤᠯᠬᠤ ᠴᠢᠨᠢ ᠪᠤᠶᠠᠨ ᠳ᠋ᠠ》 ᠭᠡᠳ ᠲᠡᠷᠡ ᠮᠦᠨ ᠯᠡ ᠳᠤᠭᠯᠠᠭ᠋ᠠᠮ ᠪᠤᠯᠭ᠋ᠠᠭ᠋ᠠᠳ ᠦᠩᠬᠡᠷᠡᠪᠡ᠃  ᠪᠢ  ᠰᠦᠨᠢᠵᠢᠨ ᠨᠤᠢ᠌ᠷ ᠬᠤᠯᠵᠢᠪᠠ᠃ ᠮᠠᠷᠭ᠋ᠠᠰᠢ᠎ᠨᠢ᠄ 《ᠶᠠᠮᠠᠷ ᠠᠵᠢᠯ ᠬᠢᠵᠦ ᠪᠠᠢ᠌ᠪᠠᠯ ᠲᠡᠷᠡ ᠠᠵᠢᠯ᠎ᠤᠨ ᠴᠤᠯᠠ᠎ᠪᠠᠷ᠎ᠨᠢ ᠳᠠᠭᠤᠳᠠᠪᠠᠯ  ᠵᠦᠢ᠍ᠲᠡᠢ᠃ ᠲᠠᠭᠤᠳᠠᠯᠭ᠎ᠠ ᠭᠡᠳᠡᠭ ᠴᠢᠨᠢ ᠬᠦᠮᠦᠨ ᠬᠦᠮᠦᠨ᠎ᠢ ᠬᠤᠭᠤᠷᠤᠨᠳᠤ᠎ᠨᠢ ᠢᠯᠭ᠋ᠠᠵᠤ ᠳᠤᠳᠤᠳᠬᠠᠬᠤ ᠵᠢᠨ ᠲᠦᠯᠦᠬᠡ ᠪᠤᠢ ᠪᠤᠯᠤᠭᠰᠠᠨ ᠶᠤᠮ ᠴᠢᠨᠢ》 ᠬᠡᠵᠦ ᠨᠦᠬᠦᠷ᠎ᠠᠴᠠ᠎ᠪᠠᠨ ᠦᠷᠢ ᠨᠡᠬᠡᠬᠦ ᠰᠢᠭ  ᠭᠡᠯᠡᠪᠡ᠃ 《ᠦ᠂ ᠬᠦᠬᠡᠷᠦᠬᠦᠢ！ ᠡᠨᠡ ᠤᠴᠢᠷ᠎ᠲᠤ ᠰᠦᠨᠢᠵᠢᠨ ᠨᠤᠢ᠌ᠷ ᠦᠬᠡᠢ ᠬᠤᠨᠤᠭᠰᠠᠨ ᠤᠤ？》 ᠭᠡᠵᠦ ᠨᠦᠬᠦᠷ ᠮᠢᠨᠢ ᠨᠡᠮ᠎ᠡ ᠵᠢ ᠱᠤᠭᠯᠠᠭ᠋ᠠᠳ᠄ 《ᠪᠢ ᠪᠠᠭᠰᠢ ᠬᠦᠮᠦᠨ᠎ᠤ ᠨᠦᠬᠦᠷ ᠪᠤᠯᠬᠤᠷ ᠬᠦᠮᠦᠰ ᠨᠡᠮ᠎ᠡ ᠵᠢ ᠴᠢᠮ᠎ᠠ᠎ᠲᠠᠢ ᠠᠳᠠᠯᠢ᠎ᠪᠠᠷ ᠦᠵᠡᠵᠦ 〈ᠪᠠᠭᠰᠢ〉 ᠭᠡᠵᠦ ᠳᠠᠭᠤᠳᠠᠳᠠᠭ ᠪᠠᠢ᠌ᠬᠤ ᠦᠬᠡᠢ ᠤᠤ》 ᠭᠡᠪᠡ᠃ ᠨᠡᠬᠡᠷᠡᠨ ᠲᠡᠢ᠌ᠮᠦ ᠴᠤ᠌ ᠶᠤᠮ ᠤᠤ ᠭᠡᠵᠦ ᠪᠢ ᠪᠤᠳᠤᠭ᠋ᠠᠳ ᠵᠢᠭ᠋ᠠᠬᠠᠨ ᠲᠠᠢ᠌ᠪᠤᠰᠢᠷᠠᠪᠠ᠃ ᠨᠦᠬᠦᠷ ᠮᠢᠨᠢ ᠶᠠᠮᠠᠷ᠎ᠲᠤ᠎ᠪᠠᠨ 《ᠠᠷᠢᠬᠢᠨ ᠴᠢᠳᠬᠦᠷ》 《ᠨᠤᠪᠰᠢ》 ᠭᠡᠵᠦ ᠨᠡᠷᠡᠯᠡᠭᠳᠡᠭᠰᠡᠨ ᠴᠤ᠌ ᠪᠢᠰᠢ ᠳ᠋ᠠ ᠭᠡᠵᠦ ᠪᠤᠳᠤᠭ᠋ᠠᠳ ᠲᠤᠳᠤᠷ ᠤᠡᠭᠭᠤᠢ᠌ᠪᠠ᠃ ᠨᠢᠬᠡ ᠬᠡᠷ ᠪᠦᠯᠢ᠎ᠳᠤ ᠴᠢᠨᠢ ᠬᠡᠨ᠎ᠨᠢ ᠭᠤᠤᠯᠯᠠᠵᠤ ᠪᠠᠢ᠌ᠬᠤ᠎ᠪᠠᠷ 《ᠭᠡᠨ ᠭᠡᠨ᠎ᠤ᠎ᠬᠢ》 ᠭᠡᠵᠦ ᠢᠯᠭ᠋ᠠᠳᠠᠭ  ᠪᠢᠰᠢ ᠦᠦ ᠬᠡᠵᠦ  ᠪᠤᠳᠤᠭ᠋ᠠᠳ  ᠪᠠᠶᠠᠰᠤᠯ᠎ᠠ ᠃ ᠢᠩᠬᠢᠵᠦ ᠪᠤᠳᠤᠪᠠᠯ  ᠪᠠᠭᠰᠢ ᠭᠡᠳᠡᠭ ᠴᠢᠨᠢ ᠠᠵᠢᠯ᠎ᠤᠨ ᠢᠯᠭ᠋ᠠᠯ ᠎ᠳᠤ  ᠰᠠᠭᠤᠷᠢᠯᠠᠭᠳᠠᠭᠰᠠᠨ ᠳᠠᠭᠤᠳᠠᠯᠭ᠎ᠠ ᠪᠤᠯᠬᠤ᠎ᠨᠢ ᠢᠯᠡᠷᠬᠡᠢ ᠳᠤᠯᠠ ᠪᠢ ᠠᠭ᠋ᠠᠵᠢᠮ᠎ᠳᠤ᠎ᠪᠠᠨ ᠡᠨᠡ ᠳᠤᠬᠠᠢ ᠪᠤᠳᠤᠬᠤ᠎ᠪᠠᠨ ᠪᠤᠯᠢᠪᠠ ᠂ ᠨᠡᠡᠭᠳᠡ ᠨᠤᠢ᠌ᠷ ᠬᠤᠯᠵᠢᠬᠤ᠎ᠪᠠᠨ ᠪᠤᠯᠢᠵᠠᠢ᠃
      ᠲᠦᠷᠤᠬᠦᠤ ᠭᠠᠷᠠᠭ ᠠᠯᠢ ᠨᠢᠬᠡ ᠰᠤᠷᠭ᠋ᠠᠭᠤᠯᠢ ᠵᠢᠨ᠎ᠬᠢᠨ ᠨᠦᠬᠦᠷ᠎ᠢ ᠮᠢᠨᠢ ᠪᠠᠰᠠ ᠯᠡ  ᠶᠠᠷᠢᠶ᠎ᠠ ᠢᠯᠡᠳᠬᠡᠯ ᠬᠢᠯᠬᠡᠬᠦ᠎ᠪᠠᠷ ᠤᠷᠢᠪᠡ᠃  ᠪᠦᠳᠤᠨ ᠰᠠᠢ᠌ᠨ ᠲᠠᠭ᠋ᠠᠷᠠᠯᠳᠤᠭᠰᠠᠨ ᠳᠤᠯᠠ ᠪᠢ ᠴᠤ᠌ ᠨᠦᠬᠦᠷ ᠵᠶ᠋ᠠᠨ ᠲᠠᠭ᠋ᠠᠵᠤ ᠤᠴᠢᠨ᠂  ᠲᠡᠷᠡ ᠰᠤᠷᠭ᠋ᠠᠭᠤᠯᠢ ᠵᠢᠨ ᠪᠠᠭᠰᠢ ᠨᠠᠷ᠎ᠲᠠᠢ ᠶᠠᠷᠢᠶ᠎ᠠ ᠢᠯᠡᠳᠭᠡᠯ᠎ᠢ᠎ᠨᠢ ᠰᠤᠨᠤᠰᠴᠠᠢ᠃
      ᠨᠦᠬᠦᠷ ᠮᠠᠨᠢ ᠰᠤᠷᠤᠭᠴᠢᠳ᠎ᠢ ᠬᠡᠷᠭᠢᠨ ᠵᠠᠩ ᠦᠢ᠍ᠯᠡ᠎ᠪᠠᠨ ᠲᠡᠭᠡᠳᠦᠯᠡᠳᠡᠭ ᠬᠦᠮᠦᠨ ᠪᠤᠯᠭ᠋ᠠᠨ ᠬᠦᠮᠦᠵᠢᠬᠦᠯᠬᠦ ᠬᠢᠬᠡᠳ ᠨᠤᠮ ᠪᠢᠴᠢᠭ᠎ᠢ᠎ᠨᠢ ᠢᠯᠡᠭᠦᠦ  ᠣᠩᠰᠢᠭᠤᠯᠬᠤ  ᠳᠤᠬᠠᠢ ᠪᠠᠭᠰᠢ ᠨᠠᠷ᠎ᠲᠤ ᠵᠤᠷᠢᠭᠤᠯᠤᠭᠰᠠᠨ ᠶᠠᠷᠢᠶ᠎ᠠ ᠢᠯᠡᠳᠭᠡᠯ ᠬᠢᠵᠠᠢ᠃
     《ᠴᠠᠭ ᠦᠶ᠎ᠡ ᠨᠡᠢ᠌ᠬᠡᠮ ᠬᠦᠭᠵᠢᠬᠡᠳ ᠬᠦᠮᠦᠨ ᠪᠦᠬᠦᠨ ᠰᠦᠯᠵᠢᠶᠡᠨ᠎ᠠᠴᠠ ᠪᠦᠬᠦ ᠬᠡᠷᠡᠭᠴᠡᠭᠡᠲᠡᠢ ᠵᠦᠢ᠍ᠯ ᠵᠶ᠋ᠠᠨ ᠱᠦᠬᠦᠨ ᠤᠯᠵᠤ ᠪᠤᠯᠬᠤ ᠪᠤᠯᠤᠮᠵᠢᠲᠠᠢ ᠰᠠᠢ᠌ᠬᠠᠨ ᠴᠠᠭ ᠪᠤᠯᠵᠤ ᠪᠠᠢ᠌ᠨ᠎ᠠ᠃ ᠶᠠᠭ ᠡᠬᠦᠨ᠎ᠢ ᠲᠠᠭ᠋ᠠᠭ᠋ᠠᠳ ᠲᠡᠭᠦᠨ᠎ᠤ ᠰᠦᠬᠡᠷᠭᠦ ᠨᠦᠯᠦᠬᠡ ᠶᠠᠪᠤᠵᠤ ᠪᠠᠢ᠌ᠳᠠᠭ᠃ ᠪᠢᠲᠠ ᠶᠠᠭᠤ ᠪᠦᠬᠦᠨ ᠵᠶ᠋ᠠᠨ ᠲᠸᠭᠨᠢᠭ᠎ᠲᠤ ᠨᠠᠢ᠌ᠳᠠᠭᠰᠠᠨ᠎ᠠᠴᠠ ᠵᠠᠯᠬᠠᠭᠤ ᠲᠡᠭᠡᠷ᠎ᠡ᠎ᠪᠠᠨ ᠮᠠᠷᠳᠠᠮᠠᠭ᠋ᠠᠢ ᠪᠤᠯᠤᠭ᠋ᠠᠳ ᠶᠠᠪᠤᠵᠤ ᠪᠠᠢ᠌ᠭ᠎ᠠ᠃ ᠡᠪᠦᠬᠡᠴᠦᠦᠯ ᠮᠢᠨᠢ ᠠᠯᠢ ᠵᠠᠯᠠᠭᠤ᠎ᠳᠤ᠎ᠨᠢ ᠪᠤᠯᠤᠭᠰᠠᠨ ᠬᠤᠷᠢᠮ᠎ᠳᠤ ᠬᠠᠮᠢᠭ᠎ᠠ ᠵᠢᠨ ᠬᠡᠨ ᠢᠷᠡᠭᠡᠳ ᠭᠡᠳᠦᠢ ᠤᠤᠭᠤᠵᠤ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ᠎ᠳᠤ ᠭᠦᠷᠲᠡᠯ᠎ᠡ  ᠴᠡᠭᠡᠵᠢᠯᠡᠵᠦ ᠪᠠᠢ᠌ᠬᠤ᠎ᠳᠤ ᠪᠢᠲᠠᠨ᠎ᠤ ᠭᠡᠦᠭᠡᠳ ᠦᠴᠦᠭᠡᠳᠦᠷ ᠦᠨᠦᠳᠦᠷ ᠵᠶ᠋ᠠᠨ ᠮᠠᠷᠳᠠᠨ ᠬᠤᠳᠬᠤᠬᠤ ᠬᠡᠮᠵᠢᠶᠡᠨ᠎ᠳᠤ ᠬᠦᠷᠴᠦ ᠪᠠᠢ᠌ᠨ᠎ᠠ᠃ ᠦᠨᠦᠳᠦᠷ ᠴᠡᠬᠡᠵᠢᠨ᠎ᠳᠤ᠎ᠪᠠᠨ ᠨᠤᠮ᠎ᠲᠠᠢ ᠡᠪᠦᠬᠡᠴᠦᠦᠯ᠎ᠤᠨ ᠮᠢᠨᠢ ᠤᠯᠠᠡᠭᠭᠢ᠎ᠨᠢ ᠦᠨᠡᠨ᠎ᠤ ᠭᠠᠵᠠᠷ᠎ᠢ ᠵᠤᠷᠢᠵᠠᠭ᠋ᠠᠬᠰᠠᠨ ᠪᠦᠬᠡᠳ ᠪᠢᠲᠠ ᠴᠤ᠌ ᠦᠪᠯᠡᠵᠦ ᠠᠪᠤᠭᠰᠠᠨ ᠴᠡᠬᠡᠵᠢᠯᠡᠬᠦ ᠴᠢᠳᠠᠪᠤᠷᠢ᠎ᠪᠠᠨ ᠠᠯᠳᠠᠵᠤ ᠪᠠᠢ᠌ᠭ᠎ᠠ ᠤᠴᠢᠷ᠎ᠠᠴᠠ ᠵᠠᠪᠠᠯ ᠨᠤᠮ ᠤᠩᠰᠢᠬᠤ ᠴᠢᠬᠤᠯᠲᠠᠢ ᠪᠤᠯᠤᠭᠰᠠᠨ᠃ ᠡᠪᠦᠬᠡᠴᠦᠦᠯ᠎ᠤᠨ ᠵᠶ᠋ᠠᠨ ᠪᠢᠴᠢᠵᠦ ᠦᠯᠡᠳᠡᠭᠡᠭᠰᠡᠨ ᠠᠮᠢᠳᠤᠷᠠᠬᠤ ᠤᠬᠠᠭ᠋ᠠᠨ᠎ᠢ ᠤᠩᠰᠢᠨ ᠰᠤᠷᠬᠤ ᠯᠡ ᠴᠢᠬᠤᠯᠲᠠᠢ ᠪᠤᠯᠤᠭᠰᠠᠨ᠃  ᠨᠤᠮ ᠪᠢᠴᠢᠭ ᠪᠤᠯ ᠲᠡᠦᠬᠡᠨ ᠬᠦᠮᠦᠰ᠎ᠤᠨ ᠦᠪᠡᠷ᠎ᠤᠨ ᠠᠯᠳᠠᠵᠤ ᠤᠯᠤᠭᠰᠠᠨ ᠵᠶ᠋ᠠᠨ ᠲᠡᠮᠳᠡᠭᠯᠡᠭᠰᠡᠨ ᠳᠤᠷᠰᠢᠯᠭ᠎ᠠ ᠶᠤᠮ᠃ ᠲᠡᠭᠦᠨ᠎ᠢ ᠤᠩᠰᠢᠬᠤ᠎ᠪᠠᠷ ᠪᠢᠲᠡ ᠪᠡᠶ᠎ᠡ᠎ᠪᠠᠷ ᠵᠶ᠋ᠠᠨ ᠶᠠᠪᠤᠵᠤ ᠪᠠᠢ᠌ᠵᠤ᠂ ᠪᠦᠳᠦᠷᠢᠵᠦ ᠪᠠᠢ᠌ᠵᠤ ᠤᠢ᠌ᠯᠠᠭ᠋ᠠᠨ ᠭᠡᠷᠰᠡᠦᠵᠢᠬᠦ ᠴᠠᠭ ᠵᠶ᠋ᠠᠨ ᠠᠷᠪᠢᠯᠠᠨ ᠰᠢᠨᠡᠴᠢᠯᠡᠯᠲᠡ ᠬᠦᠭᠵᠢᠯᠲᠡ᠎ᠳᠤ᠎ᠪᠠᠨ  ᠵᠠᠷᠤᠴᠠᠭᠤᠯᠵᠤ ᠴᠢᠳᠠᠬᠤ ᠶᠤᠮ ᠁》
ᠨᠦᠬᠦᠷ᠎ᠤᠨ ᠮᠢᠨᠢ ᠶᠠᠷᠢᠶ᠎ᠠ ᠪᠦᠬᠦᠯᠢ ᠬᠤᠶᠠᠷ ᠴᠠᠭ ᠦᠷᠬᠦᠯᠵᠢᠯᠡᠪᠡ᠃ ᠤᠨᠤᠭ᠋ᠠᠵᠤ ᠶᠠᠷᠢᠭᠰᠠᠨ ᠡᠳᠡᠭᠡᠷ ᠶᠠᠷᠢᠶᠠᠨ᠎ᠳᠤ ᠤᠯᠠᠨ ᠭᠦᠮᠦᠨ
ᠦᠶ᠎ᠡ ᠦᠶ᠎ᠡ ᠠᠯᠠᠭ᠎ᠠ ᠳᠠᠰᠢᠵᠤ ᠤᠤᠬᠠᠢ᠌ᠯᠠᠨ᠂ ᠪᠢ ᠴᠤ᠌ ᠡᠳᠦᠷᠵᠢᠨ ᠬᠠᠮᠳᠤ ᠠᠮᠢᠳᠤᠷᠠᠵᠤ ᠪᠠᠢ᠌ᠭ᠋ᠠᠳ ᠴᠤ᠌ ᠠᠩᠬᠠᠷᠳᠠᠭ ᠦᠬᠡᠢ ᠨᠦᠬᠦᠷ ᠵᠶ᠋ᠠᠨ  ᠠᠩᠬ᠎ᠠ ᠮᠡᠳᠡᠭᠰᠡᠨ ᠰᠢᠭ ᠭᠠᠢ᠌ᠬᠠᠰᠢᠷᠠᠵᠤ ᠭᠠᠷᠪᠠ᠃
    ᠤᠳᠠᠭ᠎ᠠ ᠪᠤᠯᠭ᠋ᠠᠨ ᠶᠠᠷᠢᠶ᠎ᠠ ᠢᠯᠡᠳᠭᠡᠯ᠎ᠳᠤ ᠤᠷᠢᠭᠳᠠᠭ᠋ᠠᠳ ᠤᠴᠢᠬᠤ᠎ᠳᠤ᠎ᠨᠢ ᠲᠡᠮᠢ ᠠᠩᠬᠠᠷᠳᠠᠭ ᠦᠬᠡᠢ ᠮᠦᠷᠲᠡᠭᠡᠨ ᠡᠳᠦᠷ ᠳᠤᠳᠤᠮ᠎ᠤᠨ  ᠶᠠᠷᠢᠳᠠᠭ᠂ ᠰᠤᠷᠳᠠᠯᠴᠢᠯᠠᠳᠠᠭ ᠵᠦᠢ᠍ᠯ᠎ᠢ᠎ᠨᠢ ᠦᠨᠡᠭᠡᠷ ᠠᠷᠭ᠋ᠠᠯ᠎ᠤᠨ ᠬᠢᠷᠢ ᠦᠨ᠎ᠡ ᠦᠬᠡᠢ  ᠭᠡᠮᠡᠨ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠪᠠᠢ᠌ᠵᠠᠢ ᠪᠢ᠃ ᠨᠦᠬᠦᠷ ᠮᠢᠨᠢ ᠤᠤᠯ ᠎ᠳᠤ᠎ᠪᠠᠨ ᠰᠢᠯᠦᠭ ᠵᠤᠬᠢᠶᠠᠯ᠎ᠤᠨ ᠨᠤᠮ ᠯᠡ ᠪᠢᠴᠢᠳᠡᠭ ᠪᠠᠢ᠌ᠭᠰᠠᠨ ᠵᠶ᠋ᠠᠨ ᠬᠤᠵᠢᠮ᠎ᠨᠢ ᠶᠠᠭᠤᠨ᠎ᠳᠤ  ᠵᠠᠩ ᠦᠢ᠍ᠯᠡ᠎ᠪᠠᠨ ᠴᠢᠬᠤᠯᠠᠴᠢᠯᠠᠨ ᠰᠤᠳᠤᠯᠵᠤ᠂ ᠶᠠᠭᠤᠨ᠎ᠳᠤ ᠨᠡᠷ᠎ᠡ ᠬᠦᠨᠳᠦ ᠬᠠᠷᠠᠮᠵᠢ ᠮᠦᠩᠬᠦ᠎ᠪᠠᠨ ᠱᠤᠯᠤᠭᠤᠯᠵᠤ ᠪᠠᠢ᠌ᠭᠰᠠᠨ ᠴᠦ᠍ ᠬᠡᠳᠦᠨ ᠵᠢᠯ ᠵᠶ᠋ᠠᠷ ᠡᠳᠦᠷ ᠰᠦᠨᠢ ᠦᠬᠡᠢ ᠵᠢᠳᠬᠦᠵᠦ  ᠵᠠᠩ ᠦᠢ᠍ᠯᠡ ᠵᠢᠨ ᠳᠤᠯᠢ ᠨᠠᠢ᠌ᠷᠠᠭᠤᠯᠤᠭᠰᠠᠨ ᠵᠢᠴᠢ ᠨᠠᠢ᠌ᠷᠠᠭᠤᠯᠵᠤ ᠳᠠᠭᠤᠰᠴᠢᠬᠠᠭ᠋ᠠᠳ ᠪᠠᠰᠠ ᠶᠠᠭᠤᠨ᠎ᠳᠤ  ᠰᠤᠷᠤᠭᠴᠢᠳ᠎ᠲᠤ ᠲᠡᠷᠡ ᠪᠦᠬᠦᠨ ᠵᠶ᠋ᠠᠨ ᠤᠯᠠᠮᠵᠢᠯᠠᠨ ᠲᠡᠯᠬᠡᠷᠡᠭᠦᠯᠬᠦ ᠬᠡᠵᠦ ᠶᠠᠷᠢᠶ᠎ᠠ ᠢᠯᠡᠳᠬᠡᠯ ᠬᠢᠵᠦ ᠶᠠᠭ᠋ᠠᠷᠠᠳᠠᠭ᠎ᠢ᠎ᠨᠢ ᠪᠢ ᠡᠨᠡ ᠤᠳᠠᠭ᠎ᠠ ᠲᠠᠭ᠋ᠠᠵᠤ ᠢᠷᠡᠭᠡᠳ ᠰᠠᠶᠢ ᠭᠦᠢ᠍ᠴᠡᠳ ᠤᠢ᠌ᠯᠠᠭ᠋ᠠᠯ᠎ᠠ᠃
    ᠶᠠᠷᠢᠶ᠎ᠠ ᠢᠯᠡᠳᠬᠡᠯ ᠳᠠᠭᠤᠰᠬᠤ᠎ᠳᠤ ᠮᠠᠰᠢ ᠤᠯᠠᠨ ᠬᠦᠮᠦᠨ ᠶᠠᠷᠢᠶᠠᠨ᠎ᠤ ᠲᠠᠪᠴᠠᠩ ᠵᠦᠭ ᠰᠢᠬᠠᠯᠳᠤᠨ ᠨᠦᠬᠦᠷ ᠵᠶ᠋ᠠᠷ ᠮᠢᠨᠢ ᠭᠠᠷ᠎ᠤᠨ ᠦᠰᠦᠭ ᠵᠢᠷᠤᠭᠤᠯᠤᠨ᠂ ᠬᠠᠶᠢᠭ᠎ᠢ᠎ᠨᠢ ᠦᠯᠡᠳᠡᠭᠡᠵᠦ᠄ 《ᠪᠠᠭᠰᠢ ᠡ᠂ ᠨᠠᠳᠠ᠎ᠳᠤ ᠨᠢᠬᠡ᠂ ᠨᠠᠳᠠ᠎ᠳᠤ ᠨᠢᠬᠡ》 ᠭᠡᠵᠡᠭᠡᠨ ᠴᠢᠬᠢᠯᠳᠤᠨ᠎ᠠ᠃ ᠬᠠᠷᠠᠵᠤ ᠵᠤᠭᠰᠤᠭᠰᠠᠨ ᠮᠢᠨᠦ ᠰᠡᠳᠬᠢᠯ  ᠶᠡᠷᠦ ᠪᠤᠰᠤ᠎ᠪᠠᠷ ᠳᠤᠭᠳᠤᠯᠤᠯ᠎ᠠ᠃ ᠨᠦᠬᠦᠷ ᠮᠢᠨᠢ ᠪᠠᠭᠰᠢ ᠪᠢᠰᠢ ᠪᠠᠢ᠌ᠳᠠᠯ᠎ᠠ ᠬᠦᠮᠦᠰ ᠶᠠᠭᠤᠨ᠎ᠳᠤ ᠪᠠᠭᠰᠢ ᠭᠡᠵᠦ ᠳᠠᠭᠤᠳᠠᠭ᠋ᠠᠳ ᠪᠠᠢ᠌ᠳᠠᠭ᠎ᠤᠨ  ᠨᠢᠭᠤᠴᠠ᠎ᠨᠢ ᠢᠩᠬᠢᠬᠡᠳ ᠯᠡ ᠲᠠᠢ᠌ᠯᠤᠭᠳᠠᠵᠠᠢ᠃ ᠪᠢ ᠪᠠᠭᠰᠢ ᠭᠡᠳᠡᠭ ᠳᠠᠭᠤᠳᠠᠯᠭ᠎ᠠ ᠵᠢ ᠢᠩᠬᠢᠵᠦ ᠯᠡ ᠤᠤᠯ ᠤᠳᠬ᠎ᠠ᠎ᠪᠠᠷ᠎ᠨᠢ ᠤᠢ᠌ᠯᠠᠭ᠋ᠠᠵᠤ ᠠᠪᠤᠯ᠎ᠠ᠃ ᠪᠠᠭᠰᠢ ᠭᠡᠳᠡᠭ ᠦᠬᠡ ᠵᠦᠪᠬᠡᠨ ᠠᠵᠢᠯ ᠠᠯᠪᠠᠨ᠎ᠤ ᠨᠡᠷᠡᠢ᠌ᠳᠦᠯ ᠪᠢᠰᠢ ᠬᠠᠷᠢᠨ ᠶᠠᠭᠤ᠎ᠪᠠᠷ ᠴᠤ᠌ ᠵᠦᠢ᠍ᠷᠡᠯᠡᠰᠢ ᠦᠬᠡᠢ ᠤᠶᠤᠨ᠎ᠤ ᠲᠡᠭᠡᠳᠦ ᠬᠦᠨᠳᠦᠳᠬᠡᠯ ᠪᠠᠢ᠌ᠵᠠᠢ᠃
    ᠪᠢ ᠨᠦᠬᠦᠷ᠎ᠲᠤ᠎ᠪᠠᠨ ᠡᠷᠭᠡᠯᠡᠨ ᠠᠭ᠋ᠠᠰᠢᠯᠠᠵᠤ ᠪᠠᠭᠰᠢ ᠳᠠᠭᠤᠳᠠᠯᠭ᠎ᠠ᠎ᠪᠠᠨ ᠬᠠᠷᠠᠮᠨᠠᠵᠤ᠂ ᠪᠠᠰᠠ ᠪᠠᠰᠤᠵᠤ ᠪᠠᠢ᠌ᠭᠰᠠᠨ ᠵᠶ᠋ᠠᠨ ᠪᠤᠳᠤᠭ᠋ᠠᠳ ᠬᠠᠴᠠᠷ ᠨᠢᠭᠤᠷ ᠬᠠᠯᠠᠭᠤ ᠳᠦᠦᠭᠡᠬᠦ ᠰᠢᠭ ᠪᠤᠯᠪᠠ᠃ ᠮᠦᠨ ᠴᠤ᠌ ᠨᠦᠬᠦᠷ ᠮᠢᠨᠢ ᠲᠡᠷᠡ ᠬᠢᠷᠢ ᠨᠡᠳᠡ ᠎ᠳᠤ ᠲᠡᠢ᠌ᠮᠦ ᠬᠠᠯᠠᠭᠤᠨ ᠡᠬᠡᠯᠢᠲᠡᠢ ᠬᠠᠨᠳᠤᠵᠤ ᠳᠤᠭᠯᠠᠭ᠋ᠠᠮ ᠪᠢᠰᠢ ᠪᠤᠯ ᠠᠷᠭ᠋ᠠᠳᠠᠯ ᠵᠶ᠋ᠠᠷ ᠢᠯᠪᠢᠵᠦ ᠪᠠᠢ᠌ᠭᠰᠠᠨ᠎ᠢ᠎ᠨᠢ ᠪᠤᠳᠤᠭ᠋ᠠᠳ ᠵᠢᠷᠦᠬᠡᠨ᠎ᠳᠤ ᠬᠠᠢ᠌ᠯ ᠪᠠᠭᠤᠯ᠎ᠠ᠃ ᠲᠡᠭᠡᠲᠡᠯ᠎ᠡ ᠠᠷᠤ᠎ᠳᠤ᠄ 《ᠴᠸᠨ ᠪᠠᠭᠰᠢ ᠠᠮᠤᠷ》 ᠬᠡᠬᠦ ᠬᠠᠯᠠᠭᠤᠬᠠᠨ ᠳᠠᠭᠤᠨ ᠪᠤᠳᠤᠯ᠎ᠠᠴᠠ ᠮᠢᠨᠢ ᠰᠡᠷᠡᠭᠡᠪᠡ᠃ ᠡᠷᠬᠢᠵᠦ ᠬᠠᠷᠠᠪᠠᠯ ᠮᠢᠨᠦ ᠠᠷᠪᠠᠭ᠋ᠠᠳ ᠵᠢᠯ᠎ᠤᠨ ᠡᠮᠦᠨ᠎ᠡ ᠡᠷᠬᠢᠯᠡᠵᠦ ᠪᠠᠢ᠌ᠭᠰᠠᠨ ᠠᠩᠬᠢ ᠵᠢᠨ ᠮᠢᠨᠢ ᠬᠤᠶᠠᠷ ᠰᠤᠷᠤᠭᠴᠢ᠃ ᠲᠡᠲᠡ ᠨᠡᠷ ᠮᠢᠨᠢ ᠴᠤ᠌ ᠪᠠᠭᠰᠢ ᠪᠤᠯᠴᠢᠬᠠᠭ᠋ᠠᠳ ᠳᠤᠰ ᠰᠤᠷᠭ᠋ᠠᠭᠤᠯᠢ᠎ᠳᠤ ᠪᠠᠭᠰᠢᠯᠠᠵᠤ ᠪᠠᠢ᠌ᠭᠰᠠᠨ ᠠᠵᠢ᠃ ᠪᠦᠬᠦᠯᠢ ᠠᠷᠪᠠᠨ ᠵᠢᠷᠭᠤᠭ᠋ᠠᠨ ᠵᠢᠯ ᠰᠤᠷᠤᠭᠴᠢ᠂ ᠠᠬᠠᠮᠠᠳ ᠪᠦᠬᠦᠨ ᠵᠶ᠋ᠠᠷ ᠳᠠᠭᠤᠳᠠᠭᠤᠯᠵᠤ ᠯᠡ ᠶᠠᠪᠤᠭ᠋ᠠᠳ ᠶᠡᠷᠦ᠎ᠨᠢ ᠡᠩ᠎ᠤᠨ ᠯᠡ ᠪᠤᠯᠵᠤ ᠳᠠᠳᠤᠭᠰᠠᠨ ᠪᠠᠭᠰᠢ ᠭᠡᠳᠡᠭ ᠡᠨᠡ ᠬᠦ᠌ ᠳᠠᠭᠤᠳᠠᠯᠭ᠎ᠠ ᠦᠨᠦᠳᠦᠷ ᠬᠦᠨᠳᠦ ᠵᠢᠨ ᠵᠢᠩ᠎ᠲᠠᠢ ᠰᠠᠨᠠᠭᠳᠠᠭᠰᠠᠨ᠎ᠢ ᠶᠠᠭ᠋ᠠᠭᠢᠨ᠎ᠠ？
    ᠪᠠᠭᠰᠢ ᠬᠦᠮᠦᠰ ᠶᠡᠷᠦ᠎ᠨᠢ ᠦᠪᠡᠷ᠎ᠢ᠎ᠪᠠᠨ ᠪᠠᠭᠰᠢ ᠬᠡᠵᠦ ᠮᠡᠳᠡᠳᠡᠭ ᠦᠬᠡᠢ᠂ ᠬᠠᠷᠢᠨ ᠪᠠᠭᠰᠢ ᠵᠢᠨ ᠵᠶ᠋ᠠᠨ ᠤᠶᠤᠨ᠎ᠢ ᠬᠦᠬᠦᠵᠦ ᠦᠰᠦᠭᠰᠡᠨ ᠬᠦᠮᠦᠰ ᠯᠡ ᠲᠡᠭᠦᠨ᠎ᠢ ᠪᠠᠭᠰᠢ ᠬᠡᠮᠡᠨ ᠵᠢᠷᠦᠬᠡ ᠰᠡᠳᠬᠢᠯ ᠵᠶ᠋ᠠᠷ ᠵᠶ᠋ᠠᠨ ᠵᠢᠩᠬᠢᠨᠢ ᠮᠡᠳᠡᠷᠡᠳᠡᠭ ᠶᠤᠮ ᠪᠠᠢ᠌ᠨ᠎ᠠ᠃ 《ᠨᠢᠬᠡ ᠲᠦᠷᠦᠯ᠎ᠤᠨ ᠡᠵᠢ ᠠᠪᠤ᠂ ᠠᠷᠪᠠᠨ ᠲᠦᠷᠦᠯ᠎ᠤᠨ ᠪᠠᠭᠰᠢ》 ᠭᠡᠳᠡᠭ ᠦᠬᠡ ᠵᠢ ᠵᠢᠷᠦᠬᠡᠨ᠎ᠳᠤ᠎ᠪᠠᠨ ᠪᠠᠭᠰᠢ᠎ᠲᠠᠢ ᠬᠦᠮᠦᠨ ᠯᠡ ᠮᠦᠩᠬᠡᠯᠡᠵᠦ ᠦᠯᠡᠳᠡᠭᠡᠭᠰᠡᠨ ᠶᠤᠮ ᠪᠠᠢ᠌ᠵᠢ ᠳ᠋ᠠ᠃
    ᠬᠤᠶᠠᠷ ᠰᠤᠷᠤᠭᠴᠢ ᠮᠢᠨᠢ᠄ 《ᠪᠠᠭᠰᠢ ᠡ᠂ ᠲᠠ ᠮᠠᠨᠤᠰ ᠵᠶ᠋ᠠᠨ ᠴᠤ᠌ ᠪᠠᠭᠰᠢ ᠪᠤᠯᠳᠠᠯ᠎ᠠ ᠬᠦᠮᠦᠵᠢᠬᠦᠯᠴᠢᠬᠡᠭᠡᠳ ᠵᠤᠭᠰᠤᠭᠰᠠᠨ ᠪᠢᠰᠢ᠂ ᠮᠦᠨ ᠬᠦᠮᠦᠨ ᠶᠠᠪᠤᠬᠤ ᠵᠢᠨ ᠶᠤᠰᠤ ᠵᠢ ᠨᠡᠩ ᠬᠦᠨ  ᠤᠢ᠌ᠯᠠᠭ᠋ᠠᠭᠤᠯᠳᠠᠭ ᠡᠢ᠌ᠮᠤᠷᠬᠦᠤ ᠪᠠᠭᠰᠢ᠎ᠲᠠᠢ ᠵᠤᠯᠭ᠋ᠠᠭᠤᠯᠤᠭᠰᠠᠨ᠎ᠳᠤ ᠮᠠᠰᠢ ᠪᠠᠶᠠᠷᠯᠠᠯ᠎ᠠ᠃ ᠲᠠ ᠨᠠᠷ᠎ᠲᠤ᠎ᠪᠠᠨ ᠠᠵᠠ ᠵᠢᠷᠭ᠋ᠠᠯ ᠬᠦᠰᠡᠶ᠎ᠡ》 ᠭᠡᠪᠡ᠃ ᠵᠢᠷᠦᠬᠡᠨ᠎ᠤ ᠮᠢᠨᠢ ᠬᠠᠢ᠌ᠯ ᠰᠡᠳᠬᠢᠯ᠎ᠢ ᠮᠢᠨᠢ ᠠᠷᠢᠭᠤᠰᠬᠠᠵᠤ ᠨᠢᠳᠦᠨ᠎ᠳᠤ  ᠴᠢᠢ᠍ᠯᠡᠭᠡᠨᠡᠯ᠎ᠡ ᠁
     ᠪᠠᠭᠰᠢ ᠬᠦᠮᠦᠨ ᠰᠠᠢ᠌ᠬᠠᠨ ᠡ！