ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠨᠣᠲᠠᠯᠠᠯᠲᠠ᠄ ᠨᠦᠬᠡᠰᠤᠨ ᠭᠣᠣᠯ
ᠴ᠊· ᠴᠣᠯᠮᠣᠨ ᠵᠤᠬᠢᠶᠠᠪᠠ
ᠨᠦᠬᠡᠰᠤᠨ ᠭᠣᠣᠯ ᠪᠣᠯ ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠰᠢᠯᠢ ᠵᠢᠨ ᠭᠣᠣᠯ ᠠᠢ᠌ᠮᠠᠭᠤᠨ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠪᠠᠶᠠᠨᠨᠠᠭᠤᠷ ᠪᠠᠯᠭ᠋ᠠᠰᠤᠨᠤ ᠵᠢᠪᠬᠤᠯᠠᠩᠲᠤ ᠭᠠᠴᠠᠭᠠ ᠵᠢᠨ ᠨᠤᠲᠤᠭ ᠂ ᠵᠡᠭᠦᠨ ᠤᠷᠳᠤᠷᠢᠭᠤᠨ114。51' 50'' ᠂ ᠤᠮᠠᠷᠠᠲᠤ ᠥᠷᠭᠡᠷᠢᠭᠤᠨ 43。13' 57.8'' ᠵᠶ᠋ᠡᠷ ᠤᠷᠤᠰᠤᠨ ᠥᠩᠭᠡᠷᠡᠵᠦ᠂ ᠬᠦᠷ ᠴᠠᠭ᠋ᠠᠨ ᠨᠠᠭᠤᠷᠲᠤ ᠴᠢᠳᠬᠤᠳᠠᠭ᠃ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠨᠡᠷᠡᠲᠦ ᠪᠠᠢ᠌ᠭ᠋ᠠᠯᠢ ᠵᠢᠨ ᠦᠵᠡᠮᠵᠢᠲᠦ ᠭᠠᠵᠠᠷᠤᠨ ᠨᠢᠭᠡ ᠶᠤᠮ᠃
ᠨᠦᠬᠡᠰᠤᠨ ᠭᠣᠣᠯ ᠰᠢᠯᠤᠭᠤᠨ ᠬᠥᠬᠡ ᠬᠣᠰᠢᠭᠤᠨᠤ ᠵᠢᠭ᠋ᠠᠰᠤᠲᠠᠢ ᠰᠤᠮᠤ ᠵᠢᠨ ᠪᠠᠶᠠᠨᠨᠠᠭᠤᠷ ᠭᠠᠴᠠᠭ᠋ᠠᠨᠤ ᠬᠠᠷᠭ᠋ᠠᠨᠠᠲᠠᠢ ᠣᠪᠣᠭᠠ ᠵᠢᠨ ᠬᠠᠷᠭ᠋ᠠᠨᠠᠲᠠᠢ ᠭᠣᠣᠯᠠᠴᠠ ᠡᠬᠢ ᠠᠪᠴᠤ᠂ ᠤᠮᠠᠷᠠᠰᠢ ᠮᠠᠩᠬᠠᠨ ᠳᠤᠮᠳᠠᠭᠤᠷ ᠮᠤᠷᠤᠯᠵᠠᠨ ᠤᠷᠤᠰᠴᠤ᠂ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠡᠩᠭᠡᠷ ᠨᠠᠮᠤᠭᠤᠨ ᠬᠥᠨᠳᠡᠢᠳᠤ ᠢᠷᠡᠳᠡᠭ᠃ ᠥᠷᠭᠡᠨ ᠵᠶ᠋ᠡᠷ ᠵᠶ᠋ᠡᠨ ᠭᠤᠷᠪᠠᠨ ᠮᠸᠲᠷ᠂ ᠤᠷᠲᠤᠪᠠᠷ ᠵᠶ᠋ᠠᠨ46 ᠺᠢᠯᠣᠮᠧᠲᠷ ᠪᠠᠢ᠌ᠵᠤ᠂ ᠤᠷᠤᠰᠬᠠᠯᠤᠨ ᠶᠡᠷᠦᠩᠬᠡᠢ ᠲᠠᠯᠠᠪᠠᠢᠨᠢ 2125 ᠪᠣᠰᠣᠭᠠ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲᠷ ᠪᠠᠢ᠌ᠳᠠᠭ᠃
ᠨᠦᠬᠡᠰᠤᠨ ᠭᠣᠣᠯᠤᠨ ᠨᠡᠷᠡ ᠵᠢᠨ ᠢᠷᠠᠯ ᠭᠠᠷᠤᠯᠤᠨ ᠲᠤᠬᠠᠢ ᠶᠠᠩᠵᠤ ᠪᠦᠷᠢ ᠵᠢᠨ ᠬᠠᠭᠤᠴᠢ ᠶᠠᠷᠢᠶᠠ ᠪᠠᠢ᠌ᠳᠠᠭ ᠪᠥᠭᠡᠳ ᠳᠠᠭᠤᠳᠠᠯᠭᠠ ᠪᠢᠴᠢᠯᠭᠡᠨᠢ ᠠᠳᠠᠯᠢ ᠪᠤᠰᠤᠪᠠᠷ ᠤᠯᠠᠮᠵᠢᠯᠠᠭᠳᠠᠵᠤ ᠪᠤᠢ᠃
ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠪᠦᠷᠢᠳᠬᠡᠯ 《ᠮᠥᠩᠬᠡ ᠨᠤᠲᠤᠭ》 ［1］ ᠨᠣᠮ ᠮᠥᠨ 《ᠨᠥᠬᠦᠰᠤᠨ ᠭᠣᠣᠯ》 ᠭᠡᠵᠦ ᠲᠡᠮᠳᠡᠭᠯᠡᠭᠡᠳ 《ᠴᠢᠩ ᠤᠯᠤᠰᠤᠨ 〈ᠮᠣᠩᠭᠣᠯᠤᠨ ᠨᠡᠭᠦᠳᠡᠯ ᠮᠠᠯᠵᠢᠯᠤᠨ ᠲᠡᠮᠳᠡᠭᠯᠡᠯ〉ᠢ ᠦᠨᠳᠦᠰᠦᠯᠡᠪᠡᠯ᠂ ᠮᠠᠯᠵᠢᠬᠤ ᠭᠠᠵᠠᠷ ᠠᠨᠤ ᠭᠤᠷᠪᠠᠨ ᠤᠰᠤ ᠪᠣᠯᠪᠠᠰᠤ ᠶᠡᠷᠦᠩᠬᠡᠢ ᠨᠡᠷᠡ ᠪᠣᠯᠠᠢ》 ᠭᠡᠬᠦ ᠦᠭᠡ ᠵᠢ ᠡᠰᠢᠯᠡᠨ 《ᠭᠤᠷᠪᠠᠨ ᠤᠰᠤ ᠭᠡᠳᠡᠭᠨᠢ ᠨᠥᠬᠦᠰᠤᠨ ᠭᠣᠣᠯ᠂ ᠤᠷᠲᠤ ᠭᠣᠣᠯ᠂ ᠪᠡᠷᠬᠡ ᠵᠢᠨ ᠭᠣᠣᠯ ᠭᠡᠳᠡᠭᠠᠴᠠ ᠡᠭᠦᠰᠦᠯᠲᠡᠢ》 ᠭᠡᠵᠦ ᠲᠠᠢ᠌ᠯᠪᠤᠷᠢᠯᠠᠵᠠᠢ᠃ 《ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠨᠡᠷᠡᠰᠤᠨ ᠳᠣᠮᠣᠭ》 ［2］ᠲᠤ 《ᠨᠥᠬᠦᠰᠤᠨ ᠭᠣᠣᠯ》 ᠬᠡᠮᠡᠨ ᠪᠢᠴᠢᠵᠦ ᠪᠣᠢ᠃
《ᠨᠦᠬᠡᠰᠤᠨ ᠭᠣᠣᠯᠤᠨ ᠨᠡᠷᠡᠢ᠌ᠳᠦᠯᠤᠨ ᠨᠤᠲᠤᠭᠤᠨ ᠠᠷᠠᠳᠤᠨ ᠬᠠᠭᠤᠴᠢᠯᠠᠬᠤᠪᠠᠷ ᠨᠦᠬᠡᠰᠤᠨ ᠭᠣᠣᠯᠨᠢ ᠬᠠᠷᠭ᠋ᠠᠨᠠᠲᠠᠢ ᠵᠢᠨ ᠪᠤᠯᠠᠭᠠᠴᠠ ᠡᠬᠢ ᠠᠪᠤᠨ᠂ ᠤᠷᠤᠰᠬᠤ ᠵᠠᠮᠳᠠᠭᠠᠨ ᠲᠣᠭᠣᠷᠢᠬᠤ ᠵᠢᠨ ᠪᠤᠯᠠᠭ᠂ ᠪᠤᠬᠠᠨᠤ ᠪᠤᠯᠤᠩᠤᠨ ᠪᠤᠯᠠᠭ᠂ ᠳᠡᠷᠡᠰᠦᠲᠠᠢ ᠵᠢᠨ ᠪᠤᠯᠠᠭ᠂ ᠤᠷᠲᠤ ᠵᠢᠨ ᠪᠤᠯᠠᠭ᠂ ᠯᠠᠮᠠ ᠵᠢᠨ ᠪᠤᠯᠠᠭ᠂ ᠬᠠᠷᠠᠵᠠ ᠪᠤᠯᠠᠭ ᠵᠡᠷᠭᠡ108 ᠪᠤᠯᠠᠭᠤᠨ ᠤᠨᠳᠤᠷᠤᠯ ᠵᠶ᠋ᠠᠷ ᠨᠥᠬᠥᠭᠳᠡᠵᠦ （ᠰᠡᠯᠪᠢᠭᠳᠡᠵᠦ） ᠤᠷᠤᠰᠳᠠᠭ ᠪᠣᠯᠬᠣᠷ ᠨᠥᠬᠥᠭᠡᠰᠦ ᠵᠢᠨ ᠭᠣᠣᠯ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠭᠡᠳᠡᠭ᠃ ᠨᠥᠬᠥᠵᠦ ᠰᠡᠯᠪᠢᠬᠦ ᠵᠢᠨ ᠨᠥᠬᠥᠭᠡᠰᠦ ᠭᠡᠰᠡᠨ ᠦᠭᠡᠨᠢ ᠰᠡᠭᠦᠯᠳᠡᠭᠡᠨ ᠬᠤᠪᠢᠷᠠᠭ᠋ᠠᠳ 〈ᠨᠦᠬᠡᠰ〉 ᠪᠣᠯᠣᠭᠰᠠᠨ ᠭᠡᠵᠦ ᠨᠤᠲᠤᠭᠤᠨ ᠠᠷᠠᠳ ᠬᠠᠭᠤᠴᠢᠯᠠᠳᠠᠭ᠃ ᠪᠠᠰᠠ ᠵᠠᠷᠢᠮᠨᠢ ᠨᠤᠭᠤᠰᠤ ᠵᠢᠨ ᠭᠣᠣᠯ ᠭᠡᠰᠡᠨ ᠦᠭᠡᠨᠢ ᠬᠤᠪᠢᠷᠠᠭ᠋ᠠᠳ ᠨᠦᠬᠡᠰᠤᠨ ᠭᠣᠣᠯ ᠪᠣᠯᠣᠭᠰᠠᠨ ᠭᠡᠵᠦ ᠶᠠᠷᠢᠳᠠᠭ》 ［3］᠃ ᠡᠨᠳᠡ ᠡᠨᠡ ᠭᠣᠣᠯᠤᠨ ᠨᠡᠷᠡᠨᠢ 《ᠨᠥᠬᠥᠭᠡᠰᠦ》 ᠪᠤᠶᠤ 《ᠨᠤᠭᠤᠰᠤ》 ᠭᠡᠬᠦ ᠦᠭᠡᠠᠴᠠ ᠤᠯᠠᠷᠢᠨ ᠨᠡᠷᠡᠰᠢᠭᠰᠡᠨ ᠭᠡᠬᠦ ᠬᠣᠶᠠᠷ ᠵᠦᠢ᠍ᠯᠤᠨ ᠠᠳᠠᠯᠢ ᠪᠤᠰᠤ ᠬᠡᠯᠡᠯᠭᠡ ᠭᠠᠷᠴᠤ ᠪᠠᠢ᠌ᠨᠠ᠃
1979 ᠣᠨᠳᠤ ᠬᠡᠪᠯᠡᠭᠦᠯᠦᠭᠰᠡᠨ ᠥᠪᠥᠷ ᠮᠣᠩᠭᠣᠯᠤᠨ ᠮᠣᠩᠭᠣᠯ ᠭᠠᠵᠠᠷᠤᠨ ᠵᠢᠷᠤᠭᠲᠤ 《ᠨᠤᠭᠤᠰᠤ ᠭᠣᠣᠯ》 ［4］᠂1987 ᠣᠨᠳᠤ ᠬᠡᠪᠯᠡᠭᠦᠯᠦᠭᠰᠡᠨ ᠮᠣᠩᠭᠣᠯ ᠭᠠᠵᠠᠷᠤᠨ ᠵᠢᠷᠤᠭ ᠳᠡᠭᠡᠷᠡ 《ᠨᠤᠭᠤᠰᠤ ᠵᠢᠨ ᠭᠣᠣᠯ》［5］ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠣᠢ᠃
《ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠨᠡᠷᠡᠰ》 ᠲᠤ 《ᠨᠦᠬᠡᠰᠤᠨ ᠭᠣᠣᠯ》 ［6］ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠠᠢ᠌ᠨᠠ᠃
ᠡᠮᠦᠨᠡ ᠡᠰᠢᠯᠡᠭᠰᠡᠨ ᠣᠷᠣᠨ ᠨᠤᠲᠤᠭᠤᠨ ᠰᠣᠶᠣᠯ ᠲᠡᠦᠬᠡ ᠵᠢᠨ ᠮᠠᠲ᠋ᠧᠷᠢᠶᠠᠯᠠᠴᠠ ᠦᠵᠡᠬᠦᠳᠤ ᠡᠨᠡ ᠬᠦ᠌ ᠭᠣᠣᠯᠤᠨ ᠨᠡᠷᠡᠢ᠌ᠳᠦᠯᠤᠨ ᠢᠷᠠᠯ ᠭᠠᠷᠤᠯᠨᠢ 《ᠨᠥᠬᠦᠰ》᠂ 《ᠨᠤᠭᠤᠰᠤ》᠂ 〈ᠨᠦᠬᠡᠰ》 ᠵᠡᠷᠭᠡ ᠭᠤᠷᠪᠠᠨ ᠵᠦᠢ᠍ᠯᠤᠨ ᠠᠳᠠᠯᠢ ᠪᠤᠰᠤ ᠬᠡᠯᠡᠯᠭᠡᠲᠠᠢ ᠪᠠᠢ᠌ᠭᠠ ᠪᠥᠭᠡᠳ ᠡᠳᠡᠭᠡᠷᠤᠨ ᠠᠯᠢᠨᠢ ᠵᠢᠩᠬᠢᠨᠢ ᠭᠠᠷᠪᠠᠯᠢ ᠪᠣᠯᠬᠤ ᠲᠤᠬᠠᠢ ᠦᠵᠡᠯᠲᠡ ᠨᠢᠭᠡᠳᠦᠭᠰᠡᠨ ᠨᠤᠲᠠᠯᠠᠭᠠ ᠭᠠᠷᠤᠭᠠ ᠦᠭᠡᠢ ᠪᠠᠢ᠌ᠨᠠ᠃ ᠲᠡᠢ᠌ᠨ ᠬᠦ᠌ ᠭᠠᠷᠲᠤ ᠥᠷᠲᠥᠭᠰᠡᠨ ᠲᠡᠦᠬᠡ ᠰᠣᠶᠣᠯᠤᠨ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠮᠠᠲ᠋ᠧᠷᠢᠶᠠᠯᠳᠤ ᠲᠤᠯᠭ᠋ᠠᠭᠤᠷᠢᠯᠠᠵᠤ ᠤᠴᠢᠭᠢᠨᠢ ᠰᠦᠪᠡᠭᠴᠢᠯᠡᠨ᠂ ᠤᠯᠪᠠᠭᠠ ᠵᠢᠨᠢ ᠲᠣᠳᠣᠷᠠᠭᠤᠯᠬᠤ ᠵᠢ ᠵᠣᠷᠢᠯᠠ᠃
1719 ᠣᠨᠤ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭ᠋ᠠᠨᠤ ᠦᠶᠡ ᠵᠢᠨ ᠭᠠᠵᠠᠷᠤᠨ ᠵᠢᠷᠤᠭ 《ᠭᠤᠷᠪᠠᠨ ᠨᠦᠬᠡᠰ》 ［7］ ᠭᠡᠵᠦ ᠲᠡᠮᠳᠡᠭᠯᠡᠵᠡᠢ᠃ ᠮᠥᠨ ᠴᠢᠩ ᠤᠯᠤᠰᠤᠨ ᠪᠠᠳᠠᠷᠠᠭᠤᠯᠲᠤ ᠲᠥᠷᠥ ᠵᠢᠨ ᠦᠶᠡ ᠵᠢᠨ ᠰᠥᠨᠢᠳ ᠵᠡᠭᠦᠨ ᠭᠠᠷᠤᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭᠲᠤ 《ᠭᠤᠷᠪᠠᠨ ᠨᠦᠬᠡᠰ》 ［8］ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠠᠢ᠌ᠳᠠᠭ᠃ ᠡᠨᠡ ᠬᠣᠶᠠᠷ ᠲᠡᠮᠳᠡᠭᠯᠡᠯᠳᠠᠬᠢ 《ᠭᠤᠷᠪᠠᠨ ᠨᠦᠬᠡᠰ》 ᠭᠡᠳᠡᠭᠨᠢ ᠨᠢᠭᠡᠳᠦᠯᠲᠠᠢ ᠪᠠᠢ᠌ᠭᠠ ᠪᠥᠭᠡᠳ 《ᠨᠦᠬᠡᠰ》 ᠭᠡᠳᠡᠭᠨᠢ ᠡᠮᠦᠨᠡ ᠳᠤᠷᠠᠳᠤᠭᠰᠠᠨ ᠵᠠᠷᠢᠮ ᠮᠠᠲ᠋ᠧᠷᠢᠶᠠᠯ ᠳᠤᠬᠢ ᠨᠡᠷᠡᠢ᠌ᠳᠦᠯᠯᠦᠭᠡ ᠨᠡᠢ᠌ᠯᠡᠵᠦ ᠪᠠᠢ᠌ᠨᠠ᠃ ᠲᠡᠢ᠌ᠮᠦᠠᠴᠠ 《ᠭᠤᠷᠪᠠᠨ ᠨᠦᠬᠡᠰ》 ᠭᠡᠳᠡᠭᠤᠨ ᠤᠴᠢᠷᠢ ᠲᠣᠳᠣᠯᠠᠬᠤᠨᠢ ᠬᠠᠮᠤᠭᠤᠨ ᠵᠠᠩᠭᠢᠯᠠᠭᠠ ᠵᠢᠨ ᠠᠰᠠᠭᠤᠳᠠᠯ ᠪᠣᠯᠣᠨᠠ᠃
ᠴᠢᠩ ᠤᠯᠤᠰᠤᠨ ᠦᠶᠡ ᠵᠢᠨ ᠲᠡᠮᠳᠡᠭᠯᠡᠯᠳᠤ 《ᠴᠠᠩ ᠰᠦᠢ （长水） ᠵᠡᠭᠦᠨ ᠬᠣᠰᠢᠭᠤ （ ᠲᠤᠬᠠᠢ ᠵᠢᠨ ᠰᠥᠨᠢᠳ ᠵᠡᠭᠦᠨ ᠭᠠᠷᠤᠨ ᠬᠣᠰᠢᠭᠤ- ᠡᠰᠢᠯᠡᠭᠴᠢ）ᠠᠴᠠ ᠪᠠᠷᠠᠭᠤᠨ ᠤᠷᠤᠭᠰᠢ ᠶᠡᠷᠡᠨ ᠭᠠᠵᠠᠷᠲᠤ ᠪᠣᠢ᠂ ᠮᠣᠩᠭᠣᠯ ᠨᠡᠷᠡᠨᠢ ᠤᠷᠲᠤ᠃ ᠬᠤᠷᠠᠬᠤ ᠠᠭᠤᠯᠠ ᠵᠢᠨ ᠪᠠᠷᠠᠭᠤᠨ ᠡᠮᠦᠨᠡᠠᠴᠠ ᠤᠷᠤᠰᠤᠨ ᠢᠷᠡᠳᠡᠭ᠃ ᠲᠥ᠋ ᠶᠤᠸᠠᠨ ᠰᠦᠢ （兔园水） ᠵᠡᠭᠦᠨ ᠬᠣᠰᠢᠭᠤᠨᠠᠴᠠ ᠵᠡᠭᠦᠨ ᠤᠷᠤᠭᠰᠢ ᠶᠡᠷᠡᠨ ᠭᠠᠵᠠᠷᠲᠤ ᠪᠣᠢ᠂ ᠮᠣᠩᠭᠣᠯ ᠨᠡᠷᠡᠨᠢ ᠨᠦᠬᠡᠲᠦ᠃ ᠰᠢᠯᠤᠭᠤᠨ ᠬᠥᠬᠡ ᠬᠣᠰᠢᠭᠤ ᠴᠠᠬᠠᠷᠤᠨ ᠵᠠᠭ᠋ᠠᠭᠠᠴᠠ ᠤᠷᠤᠰᠤᠨ ᠢᠷᠠᠵᠤ ᠹᠦ᠋ ᠱᠠᠨ ᠠᠭᠤᠯᠠ ᠵᠢᠨ ᠬᠣᠢ᠌ᠭᠤᠷ ᠬᠦᠷ ᠨᠠᠭᠤᠷᠲᠤ ᠴᠢᠳᠬᠤᠨᠠ》 ［9］ ᠬᠡᠮᠡᠨ ᠲᠡᠮᠳᠡᠭᠯᠡᠭᠰᠡᠨᠤ 《ᠨᠦᠬᠡᠲᠦ》 ᠭᠡᠳᠡᠭᠨᠢ ᠣᠳᠣ ᠵᠢᠨ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠨᠤᠲᠤᠭᠲᠠᠬᠢ ᠨᠦᠬᠡᠰᠤᠨ ᠭᠣᠣᠯᠢ ᠵᠢᠭ᠋ᠠᠵᠤ ᠪᠣᠢ᠃
ᠵᠠᠩ ᠮᠦ᠍ ᠵᠢᠨ 《ᠮᠣᠩᠭᠣᠯᠤᠨ ᠬᠣᠰᠢᠭᠤ ᠨᠤᠲᠤᠭᠤᠨ ᠲᠡᠮᠳᠡᠭᠯᠡᠯ》ᠳᠠᠬᠢ 《ᠰᠥᠨᠢᠳ ᠵᠡᠭᠦᠨ ᠭᠠᠷᠤᠨ ᠬᠣᠰᠢᠭᠤ》 ᠭᠡᠬᠦ ᠬᠡᠰᠡᠭᠲᠤ 《ᠨᠤᠲᠤᠭᠤᠨ ᠭᠠᠵᠠᠷ ᠭᠤᠷᠪᠠᠨ ᠨᠦᠬᠡᠰ ᠭᠣᠣᠯ ᠪᠠᠢ᠌ᠮᠤᠢ᠃ ᠬᠣᠰᠢᠭᠤᠨᠤ ᠵᠠᠭ᠋ᠠᠭ ᠭᠠᠵᠠᠷᠲᠤᠷ ᠲᠥ᠋ ᠶᠤᠸᠠᠨ ᠰᠦᠢ ᠪᠣᠢ᠂ ᠮᠣᠩᠭᠣᠯ ᠨᠡᠷᠡᠨᠢ ᠨᠦᠬᠡᠲᠦ ᠪᠣᠯᠠᠢ᠃ ᠴᠠᠩ ᠰᠦᠢ᠂ ᠮᠣᠩᠭᠣᠯ ᠵᠶ᠋ᠠᠷ ᠤᠷᠲᠤ᠃ ᠭᠤᠷᠪᠠᠨ ᠨᠦᠬᠡᠰ ᠢᠨᠦ ᠲᠡᠭᠦᠨᠤ ᠶᠡᠷᠦᠩᠬᠡᠢ ᠨᠡᠷᠡ ᠪᠤᠯᠠᠢ᠃ ᠬᠦᠷ ᠴᠠᠭ᠋ᠠᠨ ᠨᠠᠭᠤᠷ ᠵᠡᠭᠦᠨ ᠭᠠᠷᠤᠨ ᠬᠣᠰᠢᠭᠤᠨᠠᠴᠠ ᠵᠡᠭᠦᠨ ᠤᠷᠤᠭᠰᠢ ᠵᠢᠷᠠᠨ ᠲᠠᠪᠤᠨ ᠭᠠᠵᠠᠷᠲᠤᠷ ᠠᠮᠤᠢ᠃ ᠨᠤᠲᠤᠭᠤᠨ ᠨᠡᠷᠡᠢ᠌ᠳᠦᠯᠨᠢ ᠬᠦᠷ ᠴᠠᠭ᠋ᠠᠨ ᠨᠠᠭᠤᠷ᠃ ᠭᠣᠪᠢ ᠮᠠᠩᠬᠠᠨᠳᠤ ᠬᠡᠳᠦᠨ ᠠᠷᠪᠠᠨ ᠭᠠᠵᠠᠷ ᠤᠷᠤᠰᠤᠮᠤᠢ᠂ ᠡᠬᠢ ᠢᠨᠦ ᠬᠣᠶᠠᠷ ᠪᠣᠢ᠃ ᠵᠡᠭᠦᠨ ᠡᠮᠦᠨᠡᠠᠴᠠ ᠨᠦᠬᠡᠲᠦ ᠭᠣᠣᠯ᠂ ᠴᠠᠬᠠᠷᠤᠨ ᠰᠢᠯᠤᠭᠤᠨ ᠬᠥᠬᠡ ᠬᠣᠰᠢᠭᠤᠨᠤ ᠬᠣᠢ᠌ᠲᠤ ᠬᠢᠵᠠᠭ᠋ᠠᠷᠠᠴᠠ ᠤᠷᠤᠰᠤᠨ ᠢᠷᠠᠵᠤ᠂ ᠪᠠᠷᠠᠭᠤᠨ ᠭᠠᠷᠤᠨ ᠬᠣᠰᠢᠭᠤᠨᠠᠴᠠ ᠤᠷᠤᠭᠰᠢ ᠨᠠᠶᠠᠨ ᠭᠠᠵᠠᠷ ᠲᠤᠬᠢ ᠬᠡᠰᠡᠭ ᠠᠭᠤᠯᠠ ᠵᠢᠨ ᠬᠣᠢ᠌ᠭᠤᠷ ᠨᠠᠭᠤᠷᠲᠤ ᠴᠢᠳᠬᠤᠮᠤᠢ᠃ ᠡᠮᠦᠨᠡᠠᠴᠠ ᠢᠷᠡᠬᠦ ᠤᠷᠲᠤ ᠭᠣᠣᠯ ᠠᠨᠤ ᠬᠤᠷᠠᠬᠤ ᠠᠭᠤᠯᠠᠨᠠᠴᠠ ᠡᠬᠢ ᠠᠪᠤᠨ ᠭᠤᠷᠪᠠᠨ ᠭᠣᠣᠯ ᠨᠡᠢ᠌ᠯᠡᠨ ᠬᠦᠷ ᠨᠠᠭᠤᠷᠲᠤᠷ ᠴᠢᠳᠬᠤᠮᠤᠢ᠃ ᠁ ᠭᠤᠷᠪᠠᠨ ᠭᠣᠣᠯ ᠨᠡᠢ᠌ᠯᠡᠭᠰᠡᠨᠠᠴᠠ ᠮᠣᠩᠭᠣᠯᠴᠤᠳ ᠭᠤᠷᠪᠠᠨ ᠭᠣᠣᠯ ᠬᠡᠮᠡᠵᠦᠬᠦᠢ》 ［10］ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨᠨᠢ ᠴᠦ᠍ 《ᠭᠤᠷᠪᠠᠨ ᠨᠦᠬᠡᠰ》 ᠭᠡᠳᠡᠭᠲᠠᠢ ᠬᠣᠯᠪᠣᠭᠳᠠᠵᠤ ᠪᠠᠢ᠌ᠨᠠ᠃
ᠬᠠᠷᠢᠨ ᠨᠢᠭᠡᠨ ᠵᠦᠢ᠍ᠯᠢ ᠬᠠᠪᠴᠢᠭᠤᠯᠤᠨ ᠶᠠᠷᠢᠶᠠ᠃ 《ᠮᠣᠩᠭᠣᠯ ᠬᠣᠰᠢᠭᠤ ᠨᠤᠲᠤᠭᠤᠨ ᠲᠡᠮᠳᠡᠭᠯᠡᠯ》ᠤᠨ ᠮᠣᠩᠭᠣᠯ ᠣᠷᠴᠢᠭᠤᠯᠭᠠᠳᠤ ᠤᠭ ᠡᠬᠢᠳᠠᠬᠢ 《固爾班烏斯克河》 ᠭᠡᠳᠡᠭᠢ 《ᠨᠤᠲᠤᠭᠤᠨ ᠭᠠᠵᠠᠷᠲᠤᠷ ᠭᠤᠷᠪᠠᠨ ᠦᠰᠦᠭᠤᠨ ᠭᠣᠣᠯ ᠪᠣᠢ》 ［11］ ᠭᠡᠵᠦ ᠣᠷᠴᠢᠭᠤᠯᠵᠠᠢ᠃ ᠡᠨᠳᠡ ᠤᠭ ᠡᠬᠢᠳᠠᠬᠢ ᠠᠪᠢᠶᠠᠴᠢᠯᠠᠭᠠ ᠵᠢᠨ ᠠᠨᠳᠠᠭᠤᠷᠠᠯ ᠭᠠᠷᠤᠭᠰᠠᠨᠠᠴᠠ ᠣᠷᠴᠢᠭᠤᠯᠭᠠ ᠵᠢᠨ ᠠᠯᠳᠠᠭᠠ ᠭᠠᠷᠤᠭᠰᠠᠨ ᠪᠣᠯᠣᠯᠲᠠᠢ᠃ 《烏斯克》 ᠭᠡᠳᠡᠭ ᠦᠭᠡᠨᠢ ᠮᠣᠩᠭᠣᠯ ᠭᠠᠵᠠᠷᠤᠨ ᠵᠢᠷᠤᠭ ᠳᠡᠭᠡᠷᠡᠬᠢ 《ᠨᠦᠬᠡᠰ》 ᠭᠡᠳᠡᠭ ᠦᠭᠡ ᠵᠢᠨ ᠳᠤᠰᠤᠯᠢᠨᠢ ᠣᠷᠬᠢᠨ 《ᠦᠭᠡᠰ》 ᠪᠣᠯᠭ᠋ᠠᠨ ᠤᠩᠰᠢᠭ᠋ᠠᠳ 《烏克斯》 ᠭᠡᠵᠦ ᠪᠢᠴᠢᠬᠦ ᠭᠡᠳ《烏斯克》 ᠭᠡᠵᠦ ᠠᠪᠢᠶᠠ ᠲᠣᠩᠭᠣᠷᠠᠭᠤᠯᠵᠤ ᠪᠢᠴᠢᠭᠰᠡᠨ ᠪᠠᠢ᠌ᠬᠤ ᠮᠠᠭ᠋ᠠᠳᠯᠠᠯᠲᠠᠢ᠃ ᠡᠰᠡᠪᠡᠯ 《ᠭᠤᠷᠪᠠᠨ ᠤᠰᠤ》 ᠭᠡᠰᠡᠨ ᠦᠭᠡ ᠵᠢᠨ ᠠᠪᠢᠶᠠᠯᠠᠭᠠ ᠪᠠᠢ᠌ᠬᠤ ᠪᠣᠯᠣᠮᠵᠢᠲᠠᠢ᠃ ᠶᠠᠭᠤ ᠴᠦ᠍ ᠭᠡᠰᠡᠨ 《ᠭᠤᠷᠪᠠᠨ ᠦᠰᠦᠭ》 ᠭᠡᠳᠡᠭ ᠨᠡᠷᠡᠲᠠᠢ ᠭᠣᠣᠯ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠨᠤᠲᠤᠭᠠᠴᠠ ᠣᠯᠳᠠᠬᠤ ᠦᠭᠡᠢ ᠪᠠᠢ᠌ᠨᠠ᠃ ᠶᠡᠷᠦᠨᠢ ᠴᠢᠩ ᠤᠯᠤᠰᠤᠨ ᠦᠶᠡ ᠵᠢᠨ ᠬᠢᠲᠠᠳ ᠰᠤᠷᠪᠤᠯᠵᠢᠳᠤ ᠮᠣᠩᠭᠣᠯ ᠭᠠᠵᠠᠷ ᠤᠰᠤᠨᠤ ᠨᠡᠷᠡ᠂ ᠬᠥᠮᠥᠨᠤ ᠨᠡᠷᠡ ᠵᠢ ᠠᠪᠢᠶᠠᠴᠢᠯᠠᠨ ᠪᠢᠴᠢᠬᠦᠳᠡᠭᠡᠨ ᠪᠤᠷᠤᠭᠤ ᠭᠠᠯᠢᠭᠯᠠᠬᠤ᠂ ᠲᠣᠩᠭᠣᠷᠠᠭᠤᠯᠤᠨ ᠭᠠᠯᠢᠭᠯᠠᠬᠤ ᠵᠡᠷᠭᠡ ᠦᠵᠡᠭᠳᠡᠯ ᠵᠥᠩᠳᠡᠭᠡᠨ ᠬᠠᠷᠠᠭᠳᠠᠳᠠᠭ ᠶᠤᠮ᠃ ᠡᠨᠡ ᠲᠠᠯᠠᠪᠠᠷ ᠳᠠᠷᠠᠭ᠋ᠠᠴᠢ ᠵᠢᠨ ᠰᠤᠳᠤᠯᠤᠯᠳᠤ ᠲᠣᠳᠣᠷᠠᠭᠤᠯᠬᠤ ᠪᠣᠯᠣᠨᠠ᠃
ᠡᠮᠦᠨᠡᠬᠢ ᠲᠡᠦᠬᠡᠨ ᠰᠤᠷᠪᠤᠯᠵᠢᠳᠤ ᠭᠠᠷᠴᠤ ᠪᠣᠢ 《ᠤᠷᠲᠤ ᠭᠣᠣᠯ》ᠨᠢ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠪᠠᠶᠠᠨᠨᠠᠭᠤᠷ ᠪᠠᠯᠭ᠋ᠠᠰᠤᠨᠤ ᠳᠠᠪᠰᠢᠯᠲᠠ ᠭᠠᠴᠠᠭ᠋ᠠᠨᠤ ᠨᠤᠲᠤᠭᠲᠠᠬᠢ ᠤᠷᠲᠤ ᠪᠤᠯᠠᠭ ᠪᠣᠯᠣᠯᠲᠠᠢ᠃ ᠤᠷᠲᠤ ᠪᠤᠯᠠᠭᠨᠢ 《ᠵᠡᠭᠦᠨ ᠤᠷᠳᠤᠷᠢᠭᠤᠨ114。52' 46.5'' ᠂ ᠤᠮᠠᠷᠠᠲᠤ ᠥᠷᠭᠡᠷᠢᠭᠤᠨ 43。13' 17.5''ᠲᠤ ᠪᠠᠢ᠌ᠷᠢᠰᠢᠵᠤ᠂ ᠳᠠᠯᠠᠢ ᠲᠦᠪᠰᠢᠨᠠᠴᠠ1054 ᠮᠸᠲᠷ ᠥᠨᠳᠥᠷᠲᠤ ᠡᠷᠭᠦᠭᠳᠡᠵᠦ ᠪᠠᠢ᠌ᠳᠠᠭ᠃ ᠨᠥᠬᠦᠰᠤᠨ ᠭᠣᠣᠯᠳᠤ ᠴᠢᠳᠬᠤᠳᠠᠭ ᠣᠷᠭᠢᠯᠤᠮᠠᠯ ᠪᠤᠯᠠᠭ》 ［12］ ᠲᠣᠳᠣᠷᠬᠠᠢ᠌ᠯᠠᠭᠰᠠᠨ ᠪᠣᠢ᠃ ᠳᠠᠷᠤᠢ 《ᠨᠥᠬᠦᠰᠤᠨ ᠭᠣᠣᠯᠳᠤ ᠴᠢᠳᠬᠤᠳᠠᠭ》 ᠭᠡᠬᠦ ᠲᠣᠳᠣᠷᠬᠠᠢ᠌ᠯᠠᠯᠲᠠᠨᠢ ᠲᠡᠦᠬᠡᠨ ᠰᠤᠷᠪᠤᠯᠵᠢ ᠵᠢᠨ ᠮᠡᠳᠡᠭᠡ ᠵᠠᠩᠭᠢᠲᠠᠢ ᠨᠡᠢ᠌ᠯᠡᠵᠦ ᠪᠠᠢ᠌ᠨᠠ᠃
《ᠪᠡᠷᠬᠡ ᠵᠢᠨ ᠭᠣᠣᠯ （ᠲᠠᠰᠤᠷᠬᠠᠢ ᠭᠣᠣᠯ） ᠁ ᠪᠠᠶᠠᠨᠨᠠᠭᠤᠷ ᠪᠠᠯᠭ᠋ᠠᠰᠤᠨᠤ ᠵᠢᠪᠬᠤᠯᠠᠩᠲᠤ ᠭᠠᠴᠠᠭ᠋ᠠᠨᠤ ᠨᠤᠲᠤᠭ᠂ ᠵᠡᠭᠦᠨ ᠤᠷᠳᠤᠷᠢᠭᠤᠨ114。 42' 35.6'' ᠂ ᠤᠮᠠᠷᠠᠲᠤ ᠥᠷᠭᠡᠷᠢᠭᠤᠨ 43。13' 02.6'' ᠲᠤ ᠪᠠᠢ᠌ᠷᠢᠰᠢᠵᠤ᠂ ᠳᠠᠯᠠᠢ ᠵᠢᠨ ᠲᠦᠪᠰᠢᠨᠠᠴᠠ1099 ᠮᠸᠲᠷ ᠥᠨᠳᠥᠷᠲᠤ ᠡᠷᠭᠦᠭᠳᠡᠵᠦ ᠪᠠᠢ᠌ᠳᠠᠭ᠃ ᠡᠨᠡ ᠭᠣᠣᠯᠨᠢ ᠁ ᠣᠯᠠᠨ ᠪᠤᠯᠠᠭᠲᠠᠢ ᠁᠃ ᠡᠷᠲᠡ ᠦᠶᠡ ᠡᠨᠡ ᠭᠣᠣᠯᠢ ᠭᠤᠷᠪᠠᠨ ᠨᠥᠬᠦᠰᠤᠨ ᠪᠠᠷᠠᠭᠤᠨ ᠨᠥᠬᠦᠰ ᠭᠡᠵᠦ ᠳᠠᠭᠤᠳᠠᠳᠠᠭ ᠪᠠᠢ᠌ᠭᠰᠠᠨ ᠪᠥᠭᠡᠳ ᠳᠡᠨᠵᠢᠨᠳᠤᠨᠢ ᠨᠤᠲᠤᠭᠰᠢᠵᠤ ᠪᠠᠢ᠌ᠭᠰᠠᠨ ᠠᠬᠠ ᠳᠡᠭᠦᠦ ᠭᠤᠷᠪᠠᠨ ᠪᠠᠶᠠᠨ ᠪᠤᠯᠠᠭᠤᠳᠢᠨᠢ ᠳᠠᠬᠢᠬᠤ ᠤᠩᠰᠢᠯᠭᠠᠳᠤᠪᠠᠨ ᠠᠭᠤᠯᠠ᠂ ᠷᠠᠰᠢᠶᠠᠨ᠂ ᠭᠤᠷᠪᠠᠨ ᠨᠥᠬᠦᠰ ᠭᠡᠰᠡᠨ ᠥᠭᠦᠯᠡᠪᠦᠷᠢ ᠵᠢ ᠬᠡᠷᠡᠭᠯᠡᠵᠦ ᠪᠠᠢ᠌ᠯᠠ ᠭᠡᠰᠡᠨ ᠤᠯᠠᠮᠵᠢᠯᠠᠯ ᠶᠠᠷᠢᠶᠠᠲᠠᠢ》 ［13］ ᠠᠵᠢ᠃
ᠡᠢ᠌ᠨ ᠬᠦ᠌ ᠤᠷᠤᠰᠬᠠᠯ ᠨᠡᠢ᠌ᠯᠡᠨ ᠤᠷᠤᠰᠳᠠᠭ ᠡᠨᠡ ᠭᠤᠷᠪᠠᠨ ᠭᠣᠣᠯᠢ ᠭᠤᠷᠪᠠᠨ ᠨᠦᠬᠡᠰ ᠭᠡᠳᠡᠭ ᠪᠠᠢ᠌ᠭᠰᠠᠨᠨᠢ ᠲᠣᠳᠣ ᠪᠣᠯᠵᠤ ᠢᠷᠠᠪᠠ᠃ ᠨᠡᠷᠡᠢ᠌ᠳᠦᠯ ᠪᠠ ᠭᠠᠵᠠᠷ ᠵᠦᠢ ᠵᠢᠨ ᠪᠠᠢ᠌ᠷᠢᠰᠢᠯ ᠵᠶ᠋ᠠᠷᠨᠢ ᠦᠵᠡᠭᠰᠡᠨ ᠴᠦ᠍ ᠣᠳᠣ ᠵᠢᠨ ᠨᠦᠬᠡᠰᠤᠨ ᠭᠣᠣᠯᠨᠢ ᠡᠷᠲᠡ ᠦᠶᠡᠳᠡᠭᠡᠨ ᠢᠩᠭᠢᠵᠦ ᠨᠡᠷᠡᠯᠡᠭᠳᠡᠵᠦ ᠪᠠᠢ᠌ᠵᠠᠢ ᠭᠡᠳᠡᠭᠨᠢ ᠴᠦ᠍ ᠮᠠᠳᠠᠭ ᠦᠭᠡᠢ ᠲᠣᠳᠣᠯᠠᠭᠳᠠᠵᠤ ᠪᠠᠢ᠌ᠨᠠ᠃
ᠤᠴᠢᠷᠨᠢ ᠵᠠᠩ ᠮᠦ᠍ ᠡᠨᠡ ᠲᠡᠮᠳᠡᠭᠯᠡᠯᠳᠤ 《努克黑忒》 ᠭᠡᠵᠦ ᠬᠢᠲᠠᠳ ᠵᠶ᠋ᠠᠷ ᠠᠪᠢᠶᠠᠴᠢᠯᠠᠨ ᠪᠢᠴᠢᠭᠰᠡᠨᠨᠢ 《ᠨᠦᠬᠡᠲᠦ》 ᠪᠤᠶᠤ 《ᠨᠦᠬᠡᠲᠡᠢ》 ᠭᠡᠰᠡᠨ ᠮᠣᠩᠭᠣᠯ ᠦᠭᠡ ᠪᠣᠯᠣᠨᠠ᠃ ᠮᠥᠨ ᠪᠠᠰᠠ ᠨᠢᠭᠡᠨ ᠲᠡᠦᠬᠡᠨ ᠰᠤᠷᠪᠤᠯᠵᠢᠳᠤ 《ᠨᠦᠬᠡᠲᠦ（努黑特） ᠭᠣᠣᠯ ᠰᠢᠯᠤᠭᠤᠨ ᠬᠥᠬᠡᠠᠴᠠ ᠬᠣᠢ᠌ᠰᠢ ᠵᠢᠷᠠᠨ ᠨᠢᠭᠡᠨ ᠭᠠᠵᠠᠷ ᠵᠢᠷᠢᠮᠲᠠᠢ ᠨᠠᠭᠤᠷᠠᠴᠠ ᠪᠠᠷᠠᠭᠤᠨ ᠬᠣᠢ᠌ᠰᠢ ᠤᠷᠤᠰᠤᠨ ᠠᠪᠠᠭᠠ ᠪᠠᠷᠠᠭᠤᠨ ᠬᠣᠰᠢᠭᠤᠨᠤ ᠬᠢᠵᠠᠭ᠋ᠠᠷᠲᠤ ᠣᠷᠣᠮᠤᠢ》 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢ᠌ᠭᠠᠨᠢ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨ ᠳᠤᠬᠢ ᠨᠦᠬᠡᠰᠤᠨ ᠭᠣᠣᠯᠤᠨ ᠡᠬᠢ ᠵᠢ ᠨᠤᠲᠠᠯᠠᠨ ᠦᠵᠡᠭᠦᠯᠵᠦ ᠪᠠᠢ᠌ᠨᠠ᠃
ᠳᠡᠭᠡᠷᠡᠬᠢ ᠬᠠᠷᠢ ᠬᠡᠯᠡᠪᠠᠷ ᠠᠪᠢᠶᠠᠴᠢᠯᠠᠭᠰᠠᠨ ᠳᠠᠭᠤᠳᠠᠯᠭᠠ ᠵᠢ 《ᠨᠥᠬᠥᠲᠦ》 ᠭᠡᠵᠦ ᠤᠩᠰᠢᠬᠤ ᠠᠷᠭᠠ ᠦᠭᠡᠢ᠃ ᠤᠴᠢᠷᠨᠢ ᠮᠣᠩᠭᠣᠯ ᠬᠡᠯᠡᠨᠤ ᠦᠭᠡ ᠪᠦᠲᠦᠭᠡᠬᠦ ᠵᠠᠷᠴᠢᠮ ᠵᠶ᠋ᠠᠷ 《ᠨᠥᠬᠥ》 ᠭᠡᠳᠡᠭ ᠢᠵᠠᠭᠤᠷᠲᠤ 《ᠳᠤ》 ᠳᠠᠭ᠋ᠠᠪᠤᠷᠢ ᠵᠢ ᠵᠠᠯᠭ᠋ᠠᠨ᠂ 《ᠨᠥᠬᠦᠲᠦ》 ᠭᠡᠬᠦ ᠦᠭᠡ ᠪᠦᠲᠦᠬᠦ ᠪᠣᠯᠣᠮᠵᠢ ᠦᠭᠡᠢ᠃ ᠬᠠᠷᠢᠨ 《ᠨᠦᠬᠡ》 ᠭᠡᠳᠡᠭ ᠦᠭᠡᠨᠳᠤ 《ᠳᠤ》᠂ 《ᠤᠨ》 ᠪᠤᠶᠤ 《᠊ᠰ》 ᠳᠠᠭ᠋ᠠᠪᠤᠷᠢ ᠵᠠᠯᠭ᠋ᠠᠵᠤ᠂ 《ᠨᠦᠬᠡᠲᠦ》᠂ 《ᠨᠦᠬᠡᠳ》᠂ 《ᠨᠦᠬᠡᠰ》 ᠭᠡᠵᠦ ᠦᠭᠡ ᠪᠦᠲᠦᠭᠡᠵᠦ ᠪᠣᠯᠣᠨᠠ᠃
ᠲᠡᠢ᠌ᠮᠦᠠᠴᠠ ᠳᠡᠭᠡᠷᠡᠬᠢ ᠪᠠᠷᠢᠮᠲᠠᠨᠤᠭᠤᠳᠲᠤ ᠦᠨᠳᠦᠰᠦᠯᠡᠨ᠂ ᠡᠨᠡ ᠬᠦ᠌ ᠭᠣᠣᠯᠤᠨ ᠨᠡᠷᠡᠢ᠌ᠳᠦᠯᠨᠢ 《ᠨᠦᠬᠡᠰᠤᠨ ᠭᠣᠣᠯ》 ᠬᠡᠮᠡᠨ ᠪᠢᠴᠢᠬᠦᠨᠢ ᠵᠥᠪ ᠭᠡᠳᠡᠭᠢ ᠨᠤᠲᠠᠯᠠᠵᠤ ᠪᠣᠯᠬᠤ ᠪᠥᠭᠡᠳ 《ᠭᠤᠷᠪᠠᠨ ᠨᠦᠬᠡᠰ》 ᠭᠡᠳᠡᠭᠨᠢ ᠬᠠᠭᠤᠴᠢᠨ ᠨᠡᠷᠡᠢ᠌ᠳᠦᠯ ᠪᠠᠢ᠌ᠭᠰᠠᠨ ᠭᠡᠳᠡᠭᠢ ᠴᠦ᠍ ᠲᠣᠳᠣᠷᠬᠠᠢ᠌ᠯᠠᠵᠤ ᠪᠣᠯᠬᠤ ᠶᠤᠮ᠃
ᠬᠢᠲᠠᠳ ᠵᠶ᠋ᠠᠷ ᠨᠦᠬᠡᠰᠤᠨ ᠭᠣᠣᠯᠢ 《努和斯音高勒》［14］ ᠂ 《努贺斯因高勒》 ［15］ ᠂ 《努格斯高勒》 ［16］ ᠂ 《努格斯郭勒》 ［17］ ᠭᠡᠬᠦ ᠮᠡᠲᠦ ᠠᠳᠠᠯᠢ ᠪᠤᠰᠤᠪᠠᠷ ᠠᠪᠢᠶᠠᠴᠢᠯᠠᠨ ᠲᠡᠮᠳᠡᠭᠯᠡᠵᠦ ᠪᠣᠢ᠃ 《ᠪᠦᠭᠦᠳᠡ ᠨᠠᠢ᠌ᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰᠤᠨ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠬᠠᠮᠢᠶᠠᠷᠤᠯᠲᠠ ᠵᠢᠨ ᠳᠦᠷᠢᠮ》ᠤᠨ ᠲᠠᠪᠤᠳᠤᠭ᠋ᠠᠷ ᠵᠤᠷᠪᠤᠰᠤᠨ ᠳᠥᠷᠪᠡᠳᠦᠭᠡᠷ ᠵᠦᠢ᠍ᠯᠳᠤᠬᠢ《ᠨᠢᠭᠡ ᠭᠠᠵᠠᠷᠤᠨ ᠣᠯᠠᠨ ᠨᠡᠷᠡ᠂ ᠨᠢᠭᠡ ᠨᠡᠷᠡ ᠵᠢᠨ ᠣᠯᠠᠨ ᠵᠦᠢ᠍ᠯᠤᠨ ᠪᠢᠴᠢᠯᠭᠡ ᠵᠢ ᠨᠢᠭᠡᠳᠦᠮᠡᠯ ᠨᠢᠭᠡᠨ ᠨᠡᠷᠡ ᠪᠤᠶᠤ ᠦᠭᠡᠪᠠᠷ ᠲᠣᠭᠲᠠᠭ᠋ᠠᠬᠤ ᠬᠡᠷᠡᠭᠲᠡᠢ》 ［18］ ᠭᠡᠬᠦ ᠲᠣᠭᠲᠠᠭ᠋ᠠᠯᠤᠨ ᠳᠠᠭ᠋ᠠᠤ 《ᠮᠣᠩᠭᠣᠯ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠠᠪᠢᠶᠠᠴᠢᠯᠠᠭᠠ ᠵᠢᠨ ᠳᠦᠷᠢᠮ》 ［19］ ᠵᠶ᠋ᠡᠷ ᠪᠠᠷᠢᠮᠵᠢᠶᠠᠯᠠᠨ ᠬᠢᠲᠠᠳ ᠳᠠᠭᠤᠳᠠᠯᠭᠠ ᠵᠢᠨᠢ 《努和斯音高勒》 ᠬᠡᠮᠡᠨ ᠨᠢᠭᠡᠳᠬᠡᠬᠦ ᠰᠠᠨᠠᠯ ᠳᠡᠪᠰᠢᠭᠦᠯᠵᠦ ᠪᠠᠢ᠌ᠨᠠ᠃
ᠵᠡᠭᠦᠯᠲᠡ᠄
［1］ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠤᠯᠤᠰ ᠲᠥᠷᠥ ᠵᠢᠨ ᠵᠥᠪᠯᠡᠯᠭᠡᠨᠤ ᠰᠣᠶᠣᠯ ᠲᠡᠦᠬᠡ ᠵᠢᠨ ᠠᠯᠪᠠᠨ ᠭᠡᠷ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠮᠥᠩᠬᠡ ᠨᠤᠲᠤᠭ ᠴᠤᠪᠤᠷᠠᠯ- ᠪᠠᠶᠠᠨᠨᠠᠭᠤᠷ ᠪᠠᠯᠭ᠋ᠠᠰᠤᠨᠤ ᠭᠠᠵᠠᠷᠤᠨ ᠨᠡᠷᠡ》᠂2010 ᠣᠨ᠂221 ᠳ᠋ᠦ᠍ᠭᠡᠷ ᠨᠢᠭᠤᠷ᠃
［2］ ᠳ᠋᠊· ᠴᠠᠭ᠋ᠠᠨ ᠨᠠᠢ᠌ᠷᠠᠭᠤᠯᠪᠠ 《ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠨᠡᠷᠡᠰᠤᠨ ᠳᠣᠮᠣᠭ》᠂ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠤᠯᠤᠰ ᠲᠥᠷᠥ ᠵᠢᠨ ᠵᠥᠪᠯᠡᠯᠭᠡᠨᠤ ᠰᠣᠶᠣᠯ ᠲᠡᠦᠬᠡ ᠵᠢᠨ ᠵᠥᠪᠯᠡᠯ᠂2004 ᠣᠨ᠂165 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［3］ ᠶᠣ᠋· ᠡᠷᠳᠡᠨᠢᠲᠣᠭᠲᠠᠬᠤ ᠭᠣᠣᠯᠯᠠᠨ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠲᠠᠯᠠ ᠨᠤᠲᠤᠭᠤᠨ ᠨᠡᠭᠦᠳᠡᠯ ᠮᠠᠯᠵᠢᠯᠤᠨ ᠰᠣᠶᠣᠯᠤᠨ ᠲᠡᠮᠳᠡᠭ ᠴᠤᠪᠤᠷᠠᠯ ᠪᠢᠴᠢᠭ- ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠪᠣᠳᠢ》᠂ ᠥᠪᠥᠷ ᠮᠣᠩᠭᠣᠯᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠲᠧᠭᠨᠢᠭ ᠮᠡᠷᠭᠡᠵᠢᠯᠤᠨ ᠬᠡᠪᠯᠡᠯᠤᠨ ᠬᠣᠷᠢᠶᠠ᠂2018 ᠣᠨ᠂ 417 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［4］ 《ᠪᠦᠭᠦᠳᠡ ᠨᠠᠢ᠌ᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰᠤᠨ ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠲᠡᠭᠦᠪᠦᠷᠢ》᠂ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠬᠤᠪᠢᠰᠬᠠᠯᠤᠨ ᠵᠥᠪᠯᠡᠯᠤᠨ ᠬᠡᠮᠵᠢᠨ ᠵᠢᠷᠤᠬᠤ ᠲᠣᠪᠴᠢᠶᠠ᠂1979 ᠣᠨ᠂62-63 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［5］ ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠲ᠋ᠡᠪᠲᠡᠷ》᠂ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠬᠡᠮᠵᠢᠨ ᠵᠢᠷᠤᠬᠤ ᠲᠣᠪᠴᠢᠶᠠ᠂1987 ᠣᠨ᠂97- 98 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［6］ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠨᠡᠷᠡᠰᠤᠨ ᠵᠥᠪᠯᠡᠯ 《ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠨᠡᠷᠡᠰᠤᠨ ᠲᠡᠮᠳᠡᠭᠯᠡᠯ》᠂1995 ᠣᠨ᠂260᠂265 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［7］ 《ᠬᠠᠭ᠋ᠠᠨᠤ ᠬᠢᠵᠠᠭ᠋ᠠᠷᠤᠨ ᠪᠦᠭᠦᠳᠡ ᠲᠣᠢ᠌ᠮᠣ ᠵᠢᠷᠤᠭ》᠂ ᠲᠠᠢ᠌ᠴᠢᠩ ᠭᠦᠷᠦᠨᠤ ᠡᠩᠬᠡ ᠠᠮᠤᠭᠤᠯᠠᠩᠤᠨ ᠲᠠᠪᠢᠨ ᠨᠠᠢ᠍ᠮᠠᠳᠤᠭ᠋ᠠᠷ ᠣᠨ᠃
［8］ 《ᠰᠥᠨᠢᠳ ᠵᠡᠭᠦᠨ ᠭᠠᠷᠤᠨ ᠬᠣᠰᠢᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭ》᠂ ᠪᠠᠳᠠᠷᠠᠭᠤᠯᠲᠤ ᠲᠥᠷᠥ ᠵᠢᠨ ᠠᠷᠪᠠᠨ ᠵᠢᠷᠭᠤᠳᠤᠭ᠋ᠠᠷ ᠣᠨᠤ ᠡᠪᠦᠯᠤᠨ ᠳᠤᠮᠳᠠᠳᠤ ᠰᠠᠷᠠ ᠵᠢᠨ ᠬᠣᠷᠢᠨ ᠳᠥᠷᠪᠡᠨ᠃
［9］《钦定四库全书》《钦定大清一统志》卷四百七,苏尼特。
［10］张穆《蒙古游牧记》,文海出版社,中华民国五十四年十二月,200页。
［11］ ᠵᠠᠩ ᠮᠦ᠍ 《ᠮᠣᠩᠭᠣᠯ ᠬᠣᠰᠢᠭᠤ ᠨᠤᠲᠤᠭᠤᠨ ᠲᠡᠮᠳᠡᠭᠯᠡᠯ》 （ᠨᠠᠮᠶᠤᠨ᠂ ᠪᠠᠨᠼᠠᠷᠠᠭᠴᠠ ᠮᠣᠩᠭᠣᠯᠴᠢᠯᠠᠪᠠ）᠂ ᠦᠨᠳᠦᠰᠦᠲᠡᠨᠤ ᠬᠡᠪᠯᠡᠯᠤᠨ ᠬᠣᠷᠢᠶᠠ᠂1988 ᠣᠨ᠂393 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［12］ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠤᠯᠤᠰ ᠲᠥᠷᠥ ᠵᠢᠨ ᠵᠥᠪᠯᠡᠯᠭᠡᠨᠤ ᠰᠣᠶᠣᠯ ᠲᠡᠦᠬᠡ ᠵᠢᠨ ᠠᠯᠪᠠᠨ ᠭᠡᠷ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠮᠥᠩᠬᠡ ᠨᠤᠲᠤᠭ ᠴᠤᠪᠤᠷᠠᠯ- ᠪᠠᠶᠠᠨᠨᠠᠭᠤᠷ ᠪᠠᠯᠭ᠋ᠠᠰᠤᠨᠤ ᠭᠠᠵᠠᠷᠤᠨ ᠨᠡᠷᠡ》᠂2010 ᠣᠨ᠂407 ᠳ᠋ᠤᠭ᠋ᠠᠷ ᠨᠢᠭᠤᠷ᠃
［13］ ᠰᠥᠨᠢᠳ ᠵᠡᠭᠦᠨ ᠬᠣᠰᠢᠭᠤᠨᠤ ᠤᠯᠤᠰ ᠲᠥᠷᠥ ᠵᠢᠨ ᠵᠥᠪᠯᠡᠯᠭᠡᠨᠤ ᠰᠣᠶᠣᠯ ᠲᠡᠦᠬᠡ ᠵᠢᠨ ᠠᠯᠪᠠᠨ ᠭᠡᠷ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠮᠥᠩᠬᠡ ᠨᠤᠲᠤᠭ ᠴᠤᠪᠤᠷᠠᠯ- ᠪᠠᠶᠠᠨᠨᠠᠭᠤᠷ ᠪᠠᠯᠭ᠋ᠠᠰᠤᠨᠤ ᠭᠠᠵᠠᠷᠤᠨ ᠨᠡᠷᠡ》᠂2010 ᠣᠨ᠂220 ᠳ᠋ᠦ᠍ᠭᠡᠷ ᠨᠢᠭᠤᠷ᠃
［14］ 苏尼特左旗地名委员会编《苏尼特左旗地名志》,1995年,内蒙古文化出版社,265页。
［15］ 达·查干 尧·额尔敦陶格陶主编《草原茶叶之路》,内蒙古人民出版社,2019年,259页。
［16］ 苏尼特左旗民政局编制《苏尼特左旗地图》,内蒙古自治区地图院制作,2018年12月。
［17］］锡林郭勒盟民政局 内蒙古自治区地图院编制《锡林郭勒盟地图集》,中煤地西安地图制印有限公司,2017年,33页。
［18］ 国务院发布《中华人民共和国地名管理条例》,1986年。
［19］ 国家测绘局 总参谋部测绘局制订《蒙古语地名译音规则-CH Ⅵ》,测绘出版社,1986年。
ᠵᠣᠬᠢᠶᠠᠭᠴᠢ ᠵᠢᠨ ᠬᠠᠶᠠᠭ᠄ ᠥᠪᠥᠷ ᠮᠣᠩᠭᠣᠯᠤᠨ ᠪᠠᠭᠰᠢ ᠶᠡᠬᠡ ᠰᠤᠷᠭ᠋ᠠᠭᠤᠯᠢ ᠵᠢᠨ ᠮᠣᠩᠭᠣᠯ ᠰᠤᠳᠤᠯᠤᠯᠤᠨ ᠳᠡᠭᠡᠳᠦ ᠰᠤᠷᠭ᠋ᠠᠭᠤᠯᠢ