— 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ
                    ᠰᠤᠳᠤᠯᠵᠤ ᠪᠠᠶ᠋ᠢᠭᠰᠠᠨ ᠰᠣᠷᠪᠣᠯᠵᠢ ᠲᠡᠮᠳᠡᠭᠯᠡᠯ

                                  ᠴᠣᠭᠪᠠᠭ᠋ᠠᠲᠤᠷ

      ᠮᠤᠩᠭᠤᠯᠴᠤᠳ ᠠ᠋ᠷᠳᠡᠨ᠎ᠤ ᠨᠡᠭᠦᠳᠡᠯ ᠰᠤᠶᠤᠯ᠎ᠤᠨ ᠠᠮᠢᠳᠤᠷᠠᠯ ᠲᠤᠮᠳᠠ᠎ᠪᠠᠨ ᠥᠪᠡᠷ᠎ᠤᠨ ᠥᠰᠥᠭ ᠪᠢᠴᠢᠭ ᠵᠶ᠋ᠠᠨ ᠵᠣᠬᠢᠶᠠᠨ ᠭᠡᠷᠡᠭᠯᠡᠭᠰᠡᠨ ᠵᠶ᠋ᠠᠷ ᠪᠠᠷᠠᠭ᠍ᠤ ᠥᠭᠡᠢ ᠲᠤᠩ ᠤᠯᠠᠨ ᠭᠠᠶ᠋ᠢᠬᠠᠮᠰᠢᠬᠳᠦ ᠵᠤᠬᠢᠶᠠᠯ ᠪᠦᠳᠦᠭᠡᠯ ᠵᠤᠬᠢᠶᠠᠵᠤ ᠤᠯᠠᠮᠵᠢᠯᠠᠭᠰᠠᠨ ᠶᠤᠮ᠃ ᠲᠤᠬᠠᠢ᠍ᠢ᠍ᠯᠠᠪᠠᠯ᠂ 《ᠮᠤᠩᠭᠤᠯ᠎ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ》᠂ 《ᠠᠯᠲᠠᠨ ᠳᠤᠪᠴᠢ》᠂ 《ᠠ᠋ᠷᠳᠡᠨᠢ ᠵᠢᠨ ᠳᠤᠪᠴᠢ》᠂ 《ᠠᠷᠪᠠᠨ ᠪᠤᠶᠠᠨᠳᠦ ᠨᠤᠮ᠎ᠤᠨ ᠴᠠᠭ᠋ᠠᠨ ᠲᠡᠤᠬᠡ》᠂ 《ᠬᠥᠬᠡ ᠰᠤᠳᠤᠷ》 ᠮᠠᠳᠤᠴᠢᠯᠠᠨ ᠠᠯᠳᠠᠷᠳᠦ ᠵᠤᠬᠢᠶᠠᠯ ᠪᠥᠳᠥᠭᠡᠯ ᠤᠯᠠᠨ ᠪᠠᠶ᠋ᠢᠳᠠᠭ᠎ᠠᠴᠠ ᠭᠠᠳᠠᠨ᠎ᠠ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠂ ᠤᠳᠤᠨ ᠤᠷᠤᠨ᠂ ᠵᠢᠷᠤᠬᠠᠢ ᠵᠢᠨ ᠤᠬᠠᠭ᠋ᠠᠨ ᠵᠡᠷᠭᠡ ᠪᠠᠶ᠋ᠢᠭ᠋ᠠᠯᠢ ᠵᠢᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠲᠸᠭᠨᠢᠭ ᠮᠡᠷᠭᠡᠵᠢᠯ᠎ᠤᠨ ᠲᠠᠯ᠎ᠠ᠎ᠪᠠᠷ ᠴᠦ᠍ ᠴᠥᠬᠡᠨ ᠪᠤᠰᠦ ᠪᠥᠳᠦᠭᠡᠯ ᠲᠤᠭᠤᠷᠪᠢᠯ ᠭᠠᠷᠭ᠋ᠠᠭᠰᠠᠨ ᠪᠠᠶ᠋ᠢᠨ᠎ᠠ᠃ ᠢᠯᠠᠩᠭᠤᠶ᠎ᠠ ᠮᠤᠩᠭᠤᠯᠴᠤᠳ᠎ᠤᠨ ᠤᠳᠤᠨ ᠤᠷᠤᠨ᠂ ᠵᠢᠷᠤᠬᠠᠢ ᠵᠢᠨ ᠤᠬᠠᠭ᠋ᠠᠨ᠎ᠨᠢ ᠳᠤᠮᠳᠠᠳᠦ ᠵᠠᠭᠤᠨ᠎ᠤ ᠥᠶ᠎ᠡ ᠵᠢᠨ ᠳᠣᠷᠣᠨᠠᠳᠠᠬᠢᠨ᠎ᠤ ᠤᠳᠤᠨ ᠤᠷᠤᠨ᠎ᠤ ᠰᠤᠳᠤᠯᠤᠯ᠎ᠤᠨ ᠬᠠᠮᠤᠭ᠎ᠤᠨ ᠥᠨᠳᠤᠷ ᠲᠦᠪᠰᠢᠨ᠎ᠳᠤ ᠬᠥᠷᠥᠭᠰᠡᠨ ᠮᠥᠷᠳᠡᠭᠡᠨ ᠲᠡᠯᠡᠬᠡᠢ ᠵᠢᠨ ᠤᠳᠤᠨ ᠤᠷᠤᠨ᠎ᠤ ᠰᠤᠳᠤᠯᠤᠯ᠎ᠤᠨ ᠥᠨᠳᠥᠷ ᠳᠥᠪᠰᠢᠨ᠎ᠳᠤ ᠴᠦ᠍ ᠬᠥᠷᠥᠭᠰᠡᠨ ᠪᠠᠶ᠋ᠢᠨ᠎ᠠ᠃ ᠢᠯ ᠬᠠᠭ᠋ᠠᠨᠳᠦ ᠤᠯᠤᠰ᠎ᠤᠨ ᠥᠯᠡᠬᠦᠥ ᠬᠠᠭ᠋ᠠᠨ᠎ᠤ ᠥᠶ᠎ᠡ ᠵᠢᠨ 《ᠢᠯ ᠬᠠᠭ᠋ᠠᠨ᠎ᠤ ᠤᠳᠤᠨ ᠤᠷᠤᠨ᠎ᠤ ᠬᠥᠰᠥᠨᠥᠭᠳᠦ》᠂ ᠶᠤᠸᠠᠨ ᠤᠯᠤᠰ᠎ᠤᠨ ᠬᠤᠪᠢᠯᠠᠢ ᠬᠠᠭ᠋ᠠᠨ᠎ᠤ ᠥᠶ᠎ᠡ ᠵᠢᠨ 《ᠴᠠᠭ᠎ᠤᠨ ᠮᠡᠳᠡᠭᠡᠨ᠎ᠤ ᠵᠢᠷᠤᠬᠠᠢ》᠂ ᠲᠡᠮᠥᠷ ᠬᠠᠭ᠋ᠠᠨ᠎ᠤ ᠬᠤᠶ᠋ᠢᠴᠢᠰ᠂ ᠤᠳᠤᠨ ᠤᠷᠤᠨ᠎ᠤ ᠤᠬᠠᠭ᠋ᠠᠨᠳᠠᠨ᠂ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨᠳᠠᠨ ᠥᠯᠥᠭ ᠪᠠᠬᠢ ᠵᠢᠨ ᠵᠤᠬᠢᠶᠠᠭᠰᠠᠨ 《ᠤᠳᠤᠨ ᠤᠷᠤᠨ᠎ᠤ ᠰᠢᠨ᠎ᠡ ᠬᠥᠰᠥᠨᠥᠭᠳᠦ》 ᠵᠡᠷᠭᠡ ᠪᠣᠯ ᠲᠤᠬᠠᠢ ᠥᠶ᠎ᠡ ᠵᠢᠨ ᠲᠡᠯᠡᠬᠡᠢ ᠵᠢᠨ ᠤᠳᠤᠨ ᠤᠷᠤᠨ᠎ᠤ ᠰᠤᠳᠤᠯᠤᠯ᠎ᠤᠨ ᠰᠢᠯᠢᠳᠡᠭ ᠪᠥᠳᠥᠭᠡᠯ ᠪᠠᠶ᠋ᠢᠵᠡᠢ᠃ ᠴᠢᠩ ᠤᠯᠤᠰ᠎ᠤᠨ ᠥᠶ᠎ᠡ ᠵᠢᠨ ᠤᠳᠤᠨ ᠤᠷᠤᠨ᠎ᠤ ᠤᠬᠠᠭ᠋ᠠᠨᠳᠠᠨ ᠮᠢᠩᠭ᠋ᠠᠨᠳᠦ ᠵᠢᠨ ᠬᠡᠮᠵᠢᠯᠳᠡ᠎ᠨᠢ ᠲᠢᠾᠤ᠋᠂ ᠪᠸᠷᠡᠭᠸ ᠵᠢᠨ ᠳᠤᠳᠠᠭᠳᠠᠯ᠎ᠢ ᠨᠥᠬᠦᠭᠰᠡᠨ ᠲᠤᠮᠦ ᠠᠮᠵᠢᠯᠳᠠ ᠶᠤᠮ᠃
      ᠠ᠋ᠳᠦᠭᠡ᠎ᠠᠴᠠ ᠬᠤᠶᠠᠷ ᠮᠢᠩᠭ᠎ᠠ ᠭᠠᠷᠤᠢ ᠵᠢᠯ᠎ᠤᠨ ᠠ᠋ᠮᠤᠨ᠎ᠡ᠂ ᠭ᠋ᠷᠧᠭ᠎ᠤᠨ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨᠳᠡᠨ ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠪᠢᠴᠢᠭᠰᠡᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠪᠣᠯ ᠳᠡᠯᠡᠬᠡᠢ ᠵᠢᠨ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ᠎ᠤᠳ᠎ᠤᠨ ᠳᠤᠲᠤᠷ᠎ᠠ ᠤᠬᠢ ᠰᠢᠯᠢᠳᠡᠭ᠎ᠨᠢ ᠶᠤᠮ᠃ ᠲᠤᠰ ᠥᠭᠦᠯᠡᠯ᠎ᠳᠤ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠲᠣᠪᠴᠢᠯᠠᠨ ᠲᠠᠨᠢᠯᠴᠠᠭᠤᠯᠬᠤ ᠵᠢᠨ ᠬᠠᠮᠳᠦ ᠶᠡᠭᠡ ᠮᠣᠩᠭᠤᠯ ᠤᠯᠤᠰ᠎ᠤᠨ ᠳᠥᠷᠪᠡᠳᠡᠬᠢ ᠶᠡᠭᠡ ᠬᠠᠭ᠋ᠠᠨ ᠮᠥᠩᠬᠡ ᠤᠭ ᠵᠤᠬᠢᠶᠠᠯ᠎ᠢ ᠰᠤᠳᠤᠯᠵᠦ ᠪᠠᠶ᠋ᠢᠭᠰᠠᠨ ᠰᠣᠷᠪᠣᠯᠵᠢ ᠲᠡᠮᠳᠡᠭᠯᠡᠯ᠎ᠤᠳ᠎ᠤᠨ ᠲᠤᠬᠠᠢ ᠲᠣᠪᠴᠢᠯᠠᠨ ᠥᠭᠦᠯᠡᠬᠦ ᠪᠤᠯᠤᠨ᠎ᠠ᠃
      ᠨᠢᠭᠡ᠂ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠤᠨ ᠳᠤᠬᠠᠢ
     《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠪᠣᠯ ᠴᠠᠭ ᠥᠶ᠎ᠡ ᠵᠢ ᠵᠠᠭ᠋ᠠᠬᠯᠠᠭᠰᠠᠨ ᠠᠯᠳᠠᠷᠳᠦ ᠪᠥᠳᠥᠭᠡᠯ ᠪᠤᠯᠤᠨ᠎ᠠ᠂ ᠲᠡᠭᠦᠨ᠎ᠤ ᠠᠭᠤᠥ ᠶᠡᠭᠡ ᠲᠡᠤᠬᠡᠳᠦ ᠠᠴᠢ ᠬᠤᠯᠪᠤᠭᠳᠠᠯ᠎ᠨᠢ ᠬᠥᠮᠥᠨ ᠳᠥᠷᠥᠯᠬᠢᠳᠡᠨ᠎ᠤ ᠲᠡᠤᠬᠡᠨ᠎ᠳᠤ ᠠᠩᠬ᠎ᠠ ᠤᠳᠠᠭ᠎ᠠ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠰᠢᠰᠲᠸᠮ᠎ᠢ ᠪᠤᠢ ᠪᠤᠯᠭ᠋ᠠᠭᠰᠠᠨ᠎ᠳᠤ ᠪᠤᠢ᠃ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠪᠣᠯ ᠠ᠋ᠷᠲᠡᠨ᠎ᠤ ᠭ᠋ᠷᠧᠭ᠎ᠤᠨ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨᠳᠠᠨ ᠠ᠋ᠸᠦ᠋ᠺᠯᠢᠳ᠋ （Euclid （ᠪᠠᠭ᠎ᠠ ᠵᠠᠢ ᠦᠭᠭᠦ） ᠨᠡᠶ᠋ᠢᠳᠡ ᠵᠢᠨ ᠤᠨ ᠲᠤᠭ᠋ᠠᠯᠠᠯ᠎ᠠᠴᠠ ᠠ᠋ᠮᠤᠨ᠎ᠠ 330 — 275）᠎ᠠᠴᠠ ᠠ᠋ᠷᠲᠡᠨ᠎ᠤ ᠭ᠋ᠷᠧᠭ᠎ᠤᠨ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨᠳᠠᠳ᠎ᠤᠨ ᠪᠥᠳᠥᠭᠡᠯ᠎ᠢ ᠠ᠋ᠮᠬᠢᠯᠡᠨ ᠴᠤᠭᠯᠠᠭᠤᠯᠵᠦ᠂ ᠰᠢᠰᠲᠸᠮᠴᠢᠯᠡᠨ᠂ ᠴᠥᠬᠡᠨ ᠲᠤᠭ᠋ᠠᠨ᠎ᠤ ᠢᠯᠡᠶᠤᠰᠦ᠎ᠠᠴᠠ ᠠ᠋ᠬᠢᠯᠡᠵᠦ᠂ ᠯᠤᠬᠢᠬ᠍ᠴᠢᠯᠠᠨ ᠮᠥᠷᠳᠡᠬᠦ ᠪᠠ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠪᠠᠲᠤᠯᠠᠭ᠍ᠤ ᠠᠷᠭ᠎ᠠ （ᠠᠨᠠᠯᠢᠰ ᠪᠠᠲᠤᠯᠠᠭ᠍ᠤ ᠠᠷᠭ᠎ᠠ᠂ ᠶᠡᠷᠤᠩᠬᠡᠶ᠋ᠢᠯᠡᠭᠰᠡᠨ ᠪᠠᠲᠤᠯᠠᠭ᠍ᠤ ᠠᠷᠭ᠎ᠠ᠂ ᠠ᠋ᠰᠡᠷᠭᠦ᠎ᠠᠴᠠ ᠪᠠᠲᠤᠯᠠᠭ᠍ᠤ ᠠᠷᠭ᠎ᠠ） ᠵᠢ ᠬᠡᠷᠡᠭᠯᠡᠨ ᠠ᠋ᠨᠡ ᠬᠦ᠌ ᠠᠪᠤᠷᠭᠤ ᠵᠤᠬᠢᠶᠠᠯ ᠵᠶ᠋ᠠᠨ ᠪᠥᠳᠦᠭᠡᠵᠡᠢ᠃
      ᠭᠧᠦᠮᠸᠲᠸᠷᠢ ᠵᠢᠨ ᠤᠬᠠᠭ᠋ᠠᠨ᠎ᠤ ᠬᠥᠭᠵᠢᠯᠳᠡ᠎ᠳᠤ᠂ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠨᠢ ᠠᠤᠭ᠎ᠠ ᠶᠡᠭᠡ ᠳᠥᠯᠬᠢᠴᠡ ᠬᠥᠴᠥᠨ ᠪᠤᠯᠤᠭᠰᠠᠨ ᠶᠤᠮ᠃ ᠲᠡᠷᠡ᠎ᠪᠠᠷ ᠭᠧᠥᠮᠸᠲᠷᠢ ᠵᠢᠨ ᠤᠬᠠᠭ᠋ᠠᠨ᠎ᠤ 《ᠥᠨᠳᠥᠰᠥᠯᠡᠯ》 ᠪᠤᠯᠤᠨ ᠯᠤᠬᠢᠭ᠎ᠤᠨ 《ᠬᠡᠯᠬᠢᠶᠡᠰᠦ》᠎ᠪᠠᠷ ᠪᠥᠬᠦᠶ ᠯᠡ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠪᠣᠰᠬᠠᠵᠤ ᠭᠠᠷᠭ᠋ᠠᠵᠠᠢ᠃ ᠢᠩᠭᠢᠭᠡᠳ ᠠ᠋ᠮᠥᠨᠡᠬᠢ ᠬᠥᠮᠤᠨ ᠶᠡᠷᠥ ᠬᠢᠵᠦ ᠥᠩᠭᠡᠷᠡᠭᠰᠡᠨ ᠥᠭᠡᠢ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠮᠡᠨᠳᠥᠯᠡᠵᠤ᠂ ᠭᠧᠥᠮᠸᠲᠷᠢ ᠵᠢᠨ ᠤᠬᠠᠭ᠋ᠠᠨ᠎ᠨᠢ ᠨᠢᠭᠡᠨ ᠭᠥᠨ ᠭᠥᠨᠵᠡᠭᠡᠢ ᠤᠨᠤᠯ᠎ᠤᠨ ᠰᠢᠰᠲᠸᠮ ᠪᠠ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠠᠷᠭ᠎ᠠ ᠪᠥᠬᠦᠢ ᠰᠤᠳᠤᠯᠭ᠋ᠠᠨ ᠪᠤᠢ ᠪᠤᠯᠤᠭᠰᠠᠨ ᠪᠠᠶ᠋ᠢᠨ᠎ᠠ᠃
      ᠠ᠋ᠷᠳᠡᠨ᠎ᠠᠴᠠ ᠠᠪᠤᠭ᠋ᠠᠳ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠨᠢ ᠵᠠᠯᠠᠭᠤ ᠪᠠᠭ᠋ᠠᠴᠤᠳ᠎ᠤᠨ ᠯᠤᠬᠢᠭ ᠰᠡᠳᠬᠢᠭᠦᠢ᠎ᠤᠨ ᠴᠢᠳᠠᠪᠤᠷᠢ ᠵᠢ ᠬᠥᠮᠥᠵᠢᠭᠦᠯᠬᠦ ᠪᠠ ᠳᠡᠭᠡᠭᠰᠢᠯᠡᠭᠦᠯᠬᠦ ᠰᠠᠶ᠋ᠢᠨ ᠮᠠᠲᠸᠷᠢᠶᠠᠯ ᠪᠤᠯᠤᠭᠰᠠᠭ᠋ᠠᠷ ᠢᠷᠡᠵᠡᠢ᠃ 《ᠵᠠᠯᠠᠭᠤ ᠥᠶ᠎ᠡ ᠵᠢᠨ ᠨᠢᠶᠦ᠋ᠲ᠋ᠤᠨ （Newton 1643-1727᠂ ᠠᠩᠭ᠍ᠯᠢ ᠵᠢᠨ ᠠᠯᠳᠠᠷᠳᠦ ᠹᠢᠽᠢᠺ᠎ᠤᠨ ᠤᠬᠠᠭ᠋ᠠᠨᠳᠡᠨ᠂ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨᠳᠡᠨ）᠂ ᠺᠠᠮᠪᠷᠢᠵ ᠶᠡᠭᠡ ᠰᠤᠷᠭ᠋ᠠᠭᠤᠯᠢ᠎ᠳᠤ ᠰᠤᠷᠤᠯᠴᠠᠵᠦ ᠪᠠᠶ᠋ᠢᠬᠤ᠎ᠳᠤ᠎ᠪᠠᠨ 〈ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ〉᠎ᠢ ᠰᠤᠨᠢᠷᠬᠠᠨ ᠰᠤᠳᠤᠯᠤᠭᠰᠠᠨ ᠪᠠᠶ᠋ᠢᠨ᠎ᠠ᠃ ᠠ᠋ᠨᠡ᠎ᠨᠢ ᠲᠡᠭᠦᠨ᠎ᠤ ᠬᠤᠵᠢᠮ᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠠᠪᠤᠷᠭᠤ ᠳᠤᠮᠥ ᠪᠥᠳᠥᠭᠡᠯ ᠭᠠᠷᠭ᠋ᠠᠬᠤ᠎ᠳᠤ ᠪᠠᠳᠦ ᠪᠠᠬᠢ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠰᠠᠭᠤᠷᠢ ᠵᠢ ᠲᠠᠯᠪᠢᠵᠦ ᠥᠭᠴᠡᠢ》［1］᠃
     《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠬᠥᠭᠵᠢᠯᠳᠡ ᠵᠢᠨ ᠳᠤᠮᠳᠠᠬᠢ ᠥᠢ᠍ᠯᠡᠳᠤᠯ᠎ᠤᠨ ᠳᠤᠬᠠᠢ᠂ ᠠᠶ᠋ᠢᠨᠰᠲ᠋ᠧᠨ᠄ 《ᠥᠷᠥᠨᠡᠳᠠᠬᠢᠨ᠎ᠤ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠬᠥᠭᠵᠢᠯᠳᠡ ᠪᠣᠯ ᠬᠤᠶᠠᠷ ᠠᠭᠤᠤ ᠶᠡᠭᠡ ᠪᠥᠳᠤᠭᠡᠯ ᠵᠶ᠋ᠠᠷ ᠰᠠᠭᠤᠷᠢ ᠪᠤᠯᠭ᠋ᠠᠭᠰᠠᠨ ᠶᠤᠮ᠃ ᠲᠡᠷᠡ᠎ᠨᠢ ᠳᠠᠷᠥᠢ ᠭ᠋ᠷᠧᠭ᠎ᠤᠨ ᠭᠥᠨ ᠤᠬᠠᠭ᠋ᠠᠨᠳᠠᠨ᠎ᠤ ᠠ᠋ᠭᠦᠳᠥᠭᠰᠡᠨ ᠬᠡᠯᠪᠡᠷᠢ ᠵᠢᠨ ᠯᠤᠬᠢᠬ᠍ᠴᠢᠯᠠᠭᠰᠠᠨ ᠰᠢᠰᠲᠸᠮ－〈ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ〉 ᠪᠤᠯᠤᠨ ᠰᠢᠰᠲᠸᠮ᠎ᠲᠠᠢ ᠳᠤᠷᠰᠢᠯᠳᠠ᠎ᠪᠠᠷ ᠳᠠᠮᠵᠢᠨ ᠥᠷ᠎ᠡ ᠳ᠋ᠦᠩ᠎ᠢ ᠤᠯᠵᠦ ᠮᠡᠳᠡᠬᠦ－〈ᠤᠳᠬ᠎ᠠ ᠤᠷᠠᠯᠢᠭ᠎ᠤᠨ ᠰᠢᠨᠡᠴᠢᠯᠡᠯᠳᠡ〉 ᠪᠤᠯᠤᠨ᠎ᠠ》 ［2］ ᠭᠡᠵᠡᠢ᠃
      ᠢᠯᠠᠶᠤᠰᠤᠴᠢᠯᠠᠭᠰᠠᠨ ᠪᠦᠲᠦᠴᠡ ᠪᠣᠯ ᠣᠷᠴᠢᠨ ᠦᠶ᠎ᠡ ᠵᠢᠨ ᠲᠣᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠭᠤᠤᠯ ᠣᠨᠴᠠᠯᠢᠭ ᠮᠥᠨ᠃ ᠬᠠᠷᠢᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠪᠣᠯ ᠢᠯᠡᠶᠣᠰᠣᠴᠢᠯᠠᠭᠰᠠᠨ ᠪᠦᠲᠦᠴᠡ ᠵᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠬᠠᠮᠤᠭ᠎ᠤᠨ ᠠ᠋ᠷᠲᠡᠨ᠎ᠤ ᠦᠯᠢᠭᠡᠷ ᠵᠢᠱ᠌ᠢᠶ᠎ᠡ ᠮᠥᠨ᠃ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠨᠢ ᠲᠣᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠢᠯᠡᠶᠣᠰᠣᠴᠢᠯᠠᠭ᠍ᠤ ᠵᠥᠪ ᠵᠠᠮ᠎ᠢ ᠨᠡᠭᠡᠭᠡᠵᠦ᠂ ᠪᠦᠬᠦᠢ ᠯᠡ ᠲᠣᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠬᠥᠭᠵᠢᠯᠲᠡ᠎ᠳᠤ ᠦᠵᠡᠭᠦᠯᠦᠭᠰᠡᠨ ᠨᠥᠯᠥᠭᠡ᠎ᠨᠢ ᠲᠡᠤᠬᠡᠨ ᠲᠡᠭᠡᠷᠡᠬᠢ ᠠᠯᠢᠪᠠ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠵᠣᠬᠢᠶᠠᠯ᠎ᠠᠴᠠ ᠳᠠᠪᠠᠭᠰᠠᠨ ᠪᠠᠶ᠋ᠢᠨ᠎ᠠ᠃ ᠠ᠋ᠶ᠋ᠢᠮᠦ᠎ᠠᠴᠠ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠨᠢ ᠭ᠋ᠷᠧᠭ᠂ ᠠᠩᠭ᠍ᠯᠢ᠂ ᠤᠷᠤᠰ᠂ ᠹᠷᠠᠨᠼᠢ᠂ ᠭ᠋ᠸᠷᠮᠠᠨ᠂ ᠶᠠᠫᠤᠨ ᠵᠡᠷᠭᠡ ᠳᠡᠯᠡᠬᠡᠢ ᠵᠢᠨ ᠮᠠᠰᠢ ᠤᠯᠠᠨ ᠬᠡᠯᠡᠨ᠎ᠳᠤ ᠤᠷᠴᠢᠭᠤᠯᠤᠭᠳᠠᠨ ᠬᠡᠪᠯᠡᠭᠳᠡᠭᠰᠡᠨ ᠪᠠᠶ᠋ᠢᠨ᠎ᠠ᠃
     1986 ᠤᠨ᠎ᠳᠤ ᠥᠪᠥᠷ ᠮᠣᠩᠭᠤᠯ᠎ᠤᠨ ᠪᠠᠭᠰᠢ ᠵᠢᠨ ᠶᠡᠭᠡ ᠰᠤᠷᠭ᠋ᠠᠭᠤᠯᠢ ᠵᠢᠨ ᠮᠡᠳᠡᠯᠳᠥ ᠫᠷᠤᠹᠸᠰᠰᠤᠷ ᠠᠩᠭ᠍ᠯᠢ᠂ ᠬᠢᠳᠠᠳ᠂ ᠶᠠᠫᠤᠨ᠂ ᠤᠷᠤᠰ ᠵᠡᠷᠭᠡ ᠠᠳᠠᠯᠢ ᠪᠤᠰᠦ ᠬᠡᠯᠡᠨ᠎ᠳᠤ ᠤᠷᠴᠢᠭᠤᠯᠤᠭᠳᠠᠭᠰᠠᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠬᠠᠷᠢᠴᠠᠭᠤᠯᠤᠨ ᠰᠤᠳᠤᠯᠵᠦ᠂ ᠠ᠋ᠮᠥᠨᠡᠬᠢ ᠲᠠᠪᠤᠨ ᠪᠥᠯᠥᠭ᠎ᠢ᠎ᠨᠢ ᠮᠣᠩᠭᠤᠯᠴᠢᠯᠡᠨ ᠬᠡᠪᠯᠡᠭᠦᠯᠵᠡᠢ᠃ ᠤᠭ ᠨᠣᠮ᠎ᠤᠨ ᠣᠷᠣᠰᠢᠯ᠎ᠳᠤ ᠯᠢ ᠳ᠋ᠢ ᠫᠷᠦᠹᠸᠰᠰᠣᠷ 《ᠠ᠋ᠶ᠋ᠢᠨᠬᠦ 〈ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ〉᠎ᠤᠨ ᠳᠡᠯᠡᠬᠡᠢ ᠳᠡᠬᠡᠷᠡᠬᠢ ᠠᠩᠬᠠᠳᠠᠭᠴᠢ ᠮᠣᠩᠭᠤᠯ ᠬᠡᠯᠡᠨ᠎ᠤ ᠤᠷᠴᠢᠭᠤᠯᠭ᠎ᠠ ᠵᠢᠨ ᠳᠡᠪᠳᠡᠷ ᠪᠣᠢ ᠪᠤᠯᠪᠠ᠃ ᠠ᠋ᠨᠡ ᠪᠣᠯ ᠮᠠᠨ᠎ᠤ ᠤᠯᠤᠰ᠎ᠤᠨ ᠴᠥᠬᠡᠨ ᠲᠤᠭ᠋ᠠᠳᠦ ᠥᠨᠳᠦᠰᠦᠳᠡᠨ᠎ᠤ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠲᠡᠤᠬᠡᠨ᠎ᠠᠴᠠ ᠦᠵᠡᠬᠦ᠎ᠳᠤ ᠠ᠋ᠭᠦᠳᠦᠯᠲᠡ ᠵᠢᠨ ᠴᠢᠨᠠᠷᠲᠠᠢ ᠠᠵᠢᠯ ᠮᠥᠨ᠂ ᠲᠡᠷᠡ᠎ᠨᠢ ᠳᠡᠯᠡᠬᠡᠢ ᠵᠢᠨ ᠬᠡᠪᠴᠢᠶᠠᠨ᠎ᠤ ᠠᠴᠢ ᠬᠤᠯᠪᠤᠭᠳᠠᠯ᠎ᠲᠠᠢ ᠶᠤᠮ》 ᠭᠡᠵᠡᠢ᠃
     《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠤᠨ 13 ᠪᠥᠯᠥᠭ᠎ᠤᠨ ᠠᠭᠤᠯᠭ᠎ᠠ ᠵᠢ ᠲᠣᠪᠴᠢᠯᠠᠪᠠᠯ᠄
      ᠨᠢᠭᠡᠳᠦᠭᠡᠷ ᠪᠦᠯᠦᠭ᠎ᠨᠢ 《ᠭᠧᠥᠮᠸᠲᠷᠢ ᠵᠢᠨ ᠰᠠᠭᠤᠷᠢ ᠮᠡᠳᠡᠯᠭᠡ》᠂ ᠠ᠋ᠩ ᠲᠡᠷᠢᠭᠦᠨ᠎ᠳᠤ 23 ᠲᠤᠳᠤᠷᠬᠠᠶ᠋ᠢᠯᠠᠯᠳᠠ ᠥᠭᠴᠡᠢ᠃ ᠵᠢᠱ᠌ᠢᠶᠡᠯᠡᠪᠡᠯ᠂ 《ᠴᠡᠭ᠎ᠲᠤ ᠬᠡᠰᠡᠭ ᠪᠠᠶ᠋ᠢᠬᠤ ᠦᠭᠡᠢ》᠂ 《ᠱᠤᠭᠤᠮ ᠭᠡᠳᠡᠭ᠎ᠲᠤ ᠤᠷᠲᠤ ᠵᠢᠨ ᠬᠡᠮᠵᠢᠶ᠎ᠡ ᠪᠠᠶ᠋ᠢᠬᠤ᠎ᠠᠴᠠ ᠪᠢᠰᠢ ᠥᠷᠭᠡᠨ ᠭᠡᠵᠦ ᠪᠠᠶ᠋ᠢᠬᠤ ᠦᠭᠡᠢ》 ᠭᠡᠬᠦ ᠮᠡᠲᠦ᠃ ᠪᠠᠰᠠ ᠬᠠᠪᠲᠠᠭ᠋ᠠᠶ᠂ ᠲᠡᠭᠰᠢ ᠥᠨᠴᠥᠭ᠂ ᠠ᠋ᠭ᠌ᠴᠡ᠂ ᠬᠤᠷᠴᠠ ᠥᠨᠴᠥᠭ᠂ ᠮᠣᠬᠤᠭᠤ ᠥᠨᠴᠥᠭ᠂ ᠵᠡᠷᠭᠡᠴᠡᠭᠡ ᠱᠤᠭᠤᠮ［4］ ᠵᠡᠷᠭᠡ ᠲᠤᠳᠤᠷᠬᠠᠶ᠋ᠢᠯᠠᠯᠳᠠ ᠪᠠᠶ᠋ᠢᠳᠠᠭ᠃ ᠵᠠᠯᠭ᠋ᠠᠭ᠋ᠠᠳ 5 ᠵᠥᠢ᠍ᠯ᠎ᠤᠨ ᠢᠯᠡ ᠵᠢᠱ᠌ᠢᠯᠳᠡ ᠪᠠᠶ᠋ᠢᠳᠠᠭ᠃ ᠢᠯᠡ ᠵᠢᠱ᠌ᠢᠯᠳᠡ ᠵᠢᠨ ᠳᠠᠷᠠᠭ᠎ᠠ 5 ᠨᠡᠶ᠋ᠢᠳᠡᠮ᠎ᠤᠨ ᠥᠵᠡᠯᠳᠡ ᠪᠠᠶ᠋ᠢᠵᠤ᠂ ᠣᠷᠴᠢᠨ ᠦᠶ᠎ᠡ ᠵᠢᠨ ᠲᠣᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠳᠤ ᠢᠯᠡ ᠵᠢᠱ᠌ᠢᠯᠳᠡ ᠪᠠ ᠨᠡᠶ᠋ᠢᠳᠡᠮ᠎ᠤᠨ ᠥᠵᠡᠯᠳᠡ ᠭᠡᠵᠦ ᠢᠯᠭ᠋ᠠᠯ ᠦᠭᠡᠢ ᠪᠦᠷ ᠢᠯᠡᠶᠤᠰᠦ ᠭᠡᠳᠡᠭ᠃ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠤᠨ ᠬᠤᠶ᠋ᠢᠨᠠᠬᠢ ᠡᠯ᠎ᠡ ᠪᠦᠯᠦᠭ᠎ᠲᠤ ᠢᠯᠡᠶᠤᠰᠦ ᠵᠢ ᠵᠢᠭᠰᠠᠭ᠋ᠠᠭᠰᠠᠨ ᠦᠭᠡᠢ᠃ ᠨᠢᠭᠡᠳᠦᠭᠡᠷ ᠪᠦᠯᠦᠭ᠎ᠨᠢ ᠢᠯᠡᠶᠤᠰᠦ ᠵᠢᠨ ᠠᠷᠤ᠎ᠳᠤ 48 ᠥᠭᠦᠯᠡᠯ ᠪᠠᠶ᠋ᠢᠳᠠᠬ᠃ ᠥᠭᠦᠯᠡᠯ 1.4᠎ᠪᠠᠷ ᠵᠢᠱ᠌ᠢᠶᠡᠯᠡᠪᠡᠯ᠂ 《ᠬᠤᠶᠠᠷ ᠭᠤᠷᠪᠠᠯᠵᠢᠨ᠎ᠤ ᠬᠤᠶᠠᠷ ᠲᠠᠯ᠎ᠠ ᠪᠤᠯᠤᠨ ᠬᠠᠪᠴᠢᠭᠳᠠᠭᠰᠠᠨ ᠥᠨᠴᠥᠭ᠎ᠨᠢ ᠬᠠᠷᠠᠭ᠋ᠠᠯᠵᠠᠨ ᠲᠡᠩᠴᠡᠭᠦᠤ ᠪᠣᠯ᠂ ᠠ᠋ᠨᠡ ᠬᠤᠶᠠᠷ ᠭᠤᠷᠪᠠᠯᠵᠢᠨ ᠲᠡᠩᠴᠡᠭᠦᠤ ᠪᠣᠯᠤᠨ᠎ᠠ》 ᠭᠡᠰᠡᠨ ᠥᠭᠦᠯᠡᠯ ᠪᠣᠯᠤᠨ᠎ᠠ᠃ ᠡ᠊ᠨᠳᠡ ᠲᠡᠩᠴᠡᠭᠦᠤ ᠭᠡᠳᠡᠭ᠎ᠨᠢ ᠪᠦᠷᠢᠨ ᠲᠡᠩᠴᠡᠭᠦᠤ ᠪᠠᠶ᠋ᠢᠬᠤ ᠵᠢ ᠵᠢᠭ᠋ᠠᠵᠤ ᠪᠠᠶ᠋ᠢᠨ᠎ᠠ᠂ ᠲᠤᠬᠠᠶ᠋ᠢᠯᠠᠪᠠᠯ᠂ ᠬᠤᠶᠠᠷ ᠵᠢᠷᠤᠭ ᠳᠦᠷᠰᠦ᠎ᠨᠢ ᠳᠠᠪᠬᠤᠴᠠᠵᠦ ᠪᠣᠯᠤᠨ᠎ᠠ᠂ ᠭᠡᠪᠡᠴᠦ ᠥᠭᠦᠯᠡᠯ 1.35 ᠵᠢᠨ ᠲᠠᠷᠠᠭ᠎ᠠ᠂ ᠲᠡᠩᠴᠡᠭᠦᠤ ᠭᠡᠳᠡᠭ᠎ᠨᠢ ᠪᠠᠰᠠ ᠥᠭᠡᠷ᠎ᠡ ᠤᠳᠬ᠎ᠠ᠎ᠲᠠᠢ᠂ ᠲᠡᠷᠡ᠎ᠨᠢ ᠲᠠᠯᠠᠪᠠᠢ᠎ᠨᠢ ᠲᠡᠩᠴᠡᠭᠦᠤ ᠪᠠᠶ᠋ᠢᠬᠤ ᠵᠢ ᠵᠢᠭ᠋ᠠᠵᠤ ᠪᠣᠯᠤᠨ᠎ᠠ᠃ ᠥᠭᠦᠯᠡᠯ 1.47 ᠪᠣᠯ ᠳᠠᠷᠤᠶ ᠠᠯᠳᠠᠷᠳᠦ 《ᠬᠤᠶᠠᠷ ᠠ᠋ᠭ᠌ᠴᠡ ᠲᠠᠯ᠎ᠠ ᠵᠢᠨ ᠪᠠᠳᠤᠶᠤᠰᠦ》 ᠪᠣᠯᠤᠨ᠎ᠠ᠂ ᠲᠤᠬᠠᠢ᠍ᠢ᠍ᠯᠠᠪᠠᠯ᠂ 《ᠲᠡᠭᠰᠢ ᠥᠨᠴᠥᠭᠲᠦ ᠭᠤᠷᠪᠠᠯᠵᠢᠨ᠎ᠤ ᠳᠡᠭᠰᠢ ᠥᠨᠴᠥᠭ᠎ᠤᠨ ᠠ᠋ᠰᠡᠷᠭᠦ ᠲᠠᠯ᠎ᠠ ᠳᠡᠭᠡᠷᠡᠬᠢ ᠲᠡᠭᠰᠢ ᠳᠥᠷᠪᠡᠯᠵᠢᠨ （ᠵᠢᠰᠢᠭᠦᠤ ᠲᠠᠯ᠎ᠠ᠎ᠪᠠᠷ ᠲᠠᠯ᠎ᠠ ᠪᠣᠯᠭ᠋ᠠᠭᠰᠠᠨ ᠲᠡᠭᠰᠢ ᠳᠥᠷᠪᠡᠯᠵᠢᠨ）᠎ᠨᠢ ᠳᠡᠭᠰᠢ ᠥᠨᠴᠥᠭ᠎ᠢ ᠬᠠᠪᠴᠢᠭᠰᠠᠨ ᠬᠤᠶᠠᠷ ᠲᠠᠯ᠎ᠠ ᠳᠡᠭᠡᠷᠡᠬᠢ ᠲᠡᠭᠰᠢ ᠳᠥᠷᠪᠡᠯᠵᠢᠨ᠎ᠤ ᠨᠡᠶ᠋ᠢᠯᠡᠪᠥᠷᠢ᠎ᠲᠠᠢ ᠲᠡᠩᠴᠡᠨ᠎ᠡ᠃》
      ᠬᠤᠶᠠᠳᠤᠭ᠋ᠠᠷ ᠪᠦᠯᠦᠭ᠎ᠨᠢ 《ᠭᠧᠣᠮᠧᠲᠷᠢ ᠪᠤᠯᠤᠨ ᠠᠯᠭᠧᠪᠷᠠ ᠵᠢᠨ ᠬᠤᠯᠪᠤᠭᠳᠠᠯ》᠂ 14 ᠥᠭᠦᠯᠡᠯ᠎ᠢ ᠪᠠᠭᠲᠠᠭ᠋ᠠᠵᠤ᠂ ᠭᠧᠣᠮᠧᠲᠷᠢ ᠵᠢᠨ ᠬᠡᠯᠡᠯᠭᠡ᠎ᠪᠠᠷ ᠠᠯᠭᠧᠪᠷᠠ ᠵᠢᠨ ᠪᠠᠶ᠋ᠢᠩᠭᠤ ᠲᠡᠩᠴᠡᠳᠬᠡᠯ᠎ᠢ ᠥᠭᠦᠯᠡᠵᠡᠶ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠥᠭᠦᠯᠡᠯ 2.4᠎ᠨᠢ 《ᠨᠢᠭᠡ ᠰᠢᠯᠤᠭᠤᠨ ᠱᠤᠭᠤᠮ［5］᠎ᠢ ᠳᠤᠷ᠎ᠠ᠎ᠪᠠᠷ ᠵᠶ᠋ᠠᠨ ᠬᠤᠶᠠᠷ ᠬᠡᠰᠡᠭ ᠪᠣᠯᠭ᠋ᠠᠨ ᠬᠤᠪᠢᠶᠠᠪᠡᠯ᠂ ᠪᠦᠬᠦ᠋ᠢ᠍ᠯᠡ ᠬᠡᠷᠴᠢᠮ ᠳᠡᠭᠡᠷᠡᠬᠢ ᠲᠡᠭᠰᠢ ᠳᠥᠷᠪᠡᠯᠵᠢᠨ᠎ᠨᠢ ᠬᠤᠶᠠᠷ ᠬᠡᠷᠴᠢᠮ ᠳᠡᠭᠡᠷᠡᠬᠢ ᠬᠤᠶᠠᠷ ᠲᠡᠭᠰᠢ ᠳᠥᠷᠪᠡᠯᠵᠢᠨ᠎ᠤ ᠳᠡᠭᠡᠷ᠎ᠡ ᠠ᠋ᠨᠡ ᠬᠤᠶᠠᠷ ᠬᠡᠷᠴᠢᠮ ᠵᠶ᠋ᠠᠷ ᠲᠠᠯ᠎ᠠ ᠪᠣᠯᠭ᠋ᠠᠭᠰᠠᠨ ᠲᠡᠭᠰᠢ ᠥᠨᠴᠥᠭᠳᠦ ᠵᠢᠨ ᠨᠡᠶ᠋ᠢᠯᠡᠪᠥᠷᠢ᠎ᠲᠠᠢ ᠲᠡᠩᠴᠡᠨ᠎ᠡ》᠃ ᠥᠭᠦᠯᠡᠯ 2.11 ᠬᠤᠵᠢᠮ᠎ᠨᠢ 《ᠠᠯᠳᠠᠨ ᠤᠭᠳᠤᠯᠤᠯ》 ᠭᠡᠵᠦ ᠨᠡᠷᠡᠶ᠋ᠢᠳᠦᠭᠳᠡᠪᠡ᠃ ᠥᠭᠦᠯᠡᠯ 2.12 ᠪᠤᠯᠤᠨ 2.13 ᠪᠣᠯ ᠺᠣᠰᠠᠶᠢᠨ᠎ᠤ ᠪᠠᠳᠤᠶᠤᠰᠦ᠎ᠲᠠᠢ ᠰᠠᠴᠠᠭᠤ ᠥᠭᠦᠯᠡᠯ ᠪᠤᠯᠤᠨ᠎ᠠ᠃
      ᠭᠤᠷᠪᠠᠳᠤᠭ᠋ᠠᠷ ᠪᠦᠯᠦᠭ᠎ᠨᠢ 《ᠲᠣᠭᠤᠷᠢᠭ ᠪᠤᠯᠤᠨ ᠲᠡᠭᠦᠨ᠎ᠲᠠᠢ ᠬᠤᠯᠪᠤᠭᠳᠠᠯ᠎ᠲᠠᠢ ᠥᠨᠴᠥᠭ》᠂ ᠠ᠋ᠭᠦᠨ᠎ᠳᠤ 37 ᠥᠭᠦᠯᠡᠯ ᠪᠠᠶ᠋ᠢᠵᠤ᠂ ᠲᠣᠭᠤᠷᠢᠭ᠂ ᠬᠥᠪᠴᠢ᠂ ᠰᠢᠬᠠᠭᠴᠢ ᠰᠢᠯᠤᠭᠤᠨ᠂ ᠲᠣᠭᠤᠷᠢᠭ᠎ᠤᠨ ᠲᠥᠪ ᠥᠨᠴᠥᠭ᠂ ᠲᠣᠭᠤᠷᠢᠭ᠎ᠲᠤ ᠪᠠᠭᠲᠠᠭᠰᠠᠨ ᠳᠥᠷᠪᠡᠯᠵᠢᠨ ᠵᠢᠴᠢ ᠲᠣᠭᠤᠷᠢᠭ᠎ᠲᠠᠢ ᠬᠤᠯᠪᠣᠭᠳᠠᠯ ᠪᠦᠬᠦᠢ ᠵᠢᠷᠤᠭ ᠳᠦᠷᠰᠦ ᠵᠢ ᠶᠠᠷᠢᠪᠠ᠃
      ᠳᠥᠷᠪᠡᠳᠥᠭᠡᠷ ᠪᠦᠯᠦᠭ᠎ᠨᠢ 《ᠲᠣᠭᠤᠷᠢᠭ ᠪᠤᠯᠤᠨ ᠵᠥᠪ ᠤᠯᠠᠨ ᠥᠨᠴᠥᠭᠳᠦ》᠂ 16 ᠥᠭᠦᠯᠡᠯ ᠪᠠᠶ᠋ᠢᠨ᠎ᠠ᠃ ᠠ᠋ᠭᠦᠨ᠎ᠳᠤ ᠲᠣᠭᠤᠷᠢᠭ᠎ᠲᠤ ᠪᠠᠭᠳᠠᠭᠰᠠᠨ ᠭᠤᠷᠪᠠᠯᠵᠢᠨ᠂ ᠲᠣᠭᠤᠷᠢᠭ᠎ᠤᠨ ᠭᠠᠳᠠᠭ᠋ᠠᠳᠤ᠎ᠠᠴᠠ ᠰᠢᠬᠠᠭᠰᠠᠨ ᠭᠤᠷᠪᠠᠯᠵᠢᠨ᠂ ᠲᠣᠭᠤᠷᠢᠭ᠎ᠲᠤ ᠪᠠᠭᠳᠠᠭᠰᠠᠨ ᠲᠡᠭᠰᠢ ᠳᠥᠷᠪᠡᠯᠵᠢᠨ᠂ ᠲᠣᠭᠤᠷᠢᠭ᠎ᠤᠨ ᠭᠠᠳᠠᠭ᠋ᠠᠳᠤ᠎ᠠᠴᠠ ᠰᠢᠬᠠᠭᠰᠠᠨ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠵᠥᠪ ᠣᠯᠠᠨ ᠥᠨᠴᠥᠭᠲᠦ （5 ᠲᠠᠯᠠᠳᠦ᠂ 10 ᠲᠠᠯᠠᠳᠦ᠂ 15 ᠲᠠᠯᠠᠳᠦ） ᠵᠢ ᠵᠢᠷᠤᠬᠤ ᠠᠷᠭ᠎ᠠ     ᠪᠠᠭᠲᠠᠨ᠎ᠠ᠃
      ᠲᠠᠪᠤᠳᠤᠭ᠋ᠠᠷ ᠪᠦᠯᠦᠭ᠎ᠨᠢ 《ᠬᠠᠷᠢᠴᠠᠯ᠎ᠤᠨ ᠤᠨᠤᠯ》᠂ ᠬᠤᠵᠢᠮ᠎ᠤᠨ ᠰᠢᠭᠦᠮᠵᠢᠯᠡᠭᠴᠢᠳ᠎ᠤᠨ ᠦᠵᠡᠬᠦ᠎ᠪᠠᠷ ᠠ᠋ᠨᠡ ᠪᠣᠯ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠤᠨ ᠬᠠᠮᠤᠭ᠎ᠤᠨ ᠥᠨᠳᠥᠷ ᠠᠮᠵᠢᠯᠲᠠ ᠪᠣᠯᠤᠨ᠎ᠠ᠃ ᠠ᠋ᠨᠡ ᠪᠥᠯᠥᠭ᠎ᠲᠤ 25 ᠥᠭᠦᠯᠡᠯ ᠪᠠᠶ᠋ᠢᠳᠠᠭ᠃
      ᠵᠢᠷᠭᠤᠳᠤᠭ᠋ᠠᠷ ᠪᠦᠯᠦᠭ᠎ᠨᠢ 《ᠳᠥᠰᠳᠡᠢ ᠳᠥᠷᠰᠦ》᠂ ᠠ᠋ᠮᠦᠨᠡᠬᠢ 5 ᠪᠦᠯᠦᠭ ᠨᠢᠭᠡᠨᠲᠡ ᠪᠠᠶ᠋ᠢᠭᠤᠯᠤᠭᠰᠠᠨ ᠣᠶ᠋ᠢᠯᠠᠭ᠋ᠠᠭᠳᠠᠭ᠍ᠤᠨ᠎ᠢ ᠬᠠᠪᠲᠠᠭ᠋ᠠᠶ ᠵᠢᠨ ᠵᠢᠷᠤᠭ ᠳᠦᠷᠰᠦ᠎ᠳᠤ ᠬᠡᠷᠡᠭᠯᠡᠪᠡ᠂ 33 ᠥᠭᠦᠯᠡᠯ ᠪᠠᠶ᠋ᠢᠳᠠᠭ᠃
      ᠲᠤᠯᠤᠭ᠎ᠠ᠂ ᠨᠠᠢ᠍ᠮᠠ᠂ ᠶᠢᠰᠥᠳᠥᠭᠡᠷ ᠪᠥᠯᠥᠭ᠎ᠨᠢ 《ᠲᠤᠭ᠋ᠠᠨ᠎ᠤ ᠤᠨᠤᠯ》᠂ ᠲᠤᠰ ᠪᠥᠷᠢ 39.27.36 ᠥᠭᠦᠯᠡᠯ ᠪᠤᠢ᠃ ᠥᠭᠦᠯᠡᠯ 9.20 ᠪᠣᠯ ᠲᠣᠭ᠋ᠠᠨ᠎ᠤ ᠣᠨᠣᠯ᠎ᠳᠤ᠎ᠬᠢ ᠧᠦ᠋ᠺᠯᠢᠳ᠋᠎ᠤᠨ ᠪᠠᠲᠤᠶᠣᠰᠣ᠄ 《ᠠᠩᠬᠠᠨ᠎ᠤ ᠲᠣᠭ᠋ᠠᠨ᠎ᠤ ᠪᠣᠳᠠᠭ᠋ᠠᠯᠢ ᠲᠤᠭ᠎ᠠ᠎ᠨᠢ ᠬᠢᠵᠠᠭ᠋ᠠᠷ ᠥᠭᠡᠢ ᠤᠯᠠᠨ ᠪᠠᠶ᠋ᠢᠳᠠᠭ》 ᠪᠤᠯᠤᠨ᠎ᠠ᠃
      ᠠᠷᠪᠠᠳᠤᠭ᠋ᠠᠷ ᠪᠦᠯᠦᠭ᠎ᠨᠢ ᠶᠤᠰᠥᠭᠦᠢ ᠬᠡᠮᠵᠢᠭᠳᠡᠭᠦᠨ᠃ 115 ᠥᠭᠦᠯᠡᠯ᠎ᠢ ᠪᠠᠭᠲᠠᠭ᠋ᠠᠵᠤ᠂ ᠭᠤᠣᠯᠳᠠᠭᠤ ᠶᠤᠰᠦᠭᠦᠢ ᠬᠡᠮᠵᠢᠭᠳᠡᠭᠦᠨ᠎ᠢ ᠰᠤᠳᠤᠯᠵᠡᠢ᠃ ᠥᠭᠦᠯᠡᠯ 10.1 ᠪᠣᠯ ᠲᠦᠢ᠍ᠯᠰᠢᠷᠠᠯ᠎ᠤᠨ ᠣᠨᠣᠯ᠎ᠤᠨ ᠠᠩᠬᠠᠨ᠎ᠤ ᠳᠦᠷᠰᠦ ᠮᠥᠨ᠂ ᠲᠦᠢ᠍ᠯᠰᠢᠷᠠᠯ ᠪᠣᠯ ᠶᠡᠭᠡ ᠰᠤᠷᠭ᠋ᠠᠭᠤᠯᠢ ᠵᠢᠨ ᠳᠡᠬᠡᠳᠦ ᠵᠡᠷᠭᠡ ᠵᠢᠨ ᠳᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠨᠢᠭᠡ ᠴᠢᠬᠤᠯᠠ ᠠᠭᠤᠯᠭ᠎ᠠ ᠪᠤᠯᠤᠨ᠎ᠠ᠃
      ᠠᠷᠪᠠᠨ ᠨᠢᠭᠡᠳᠦᠭᠡᠷ ᠪᠦᠯᠦᠭ᠎ᠨᠢ 《ᠪᠡᠶᠡᠳᠦ ᠵᠢᠨ ᠭᠧᠣᠮᠧᠲᠷᠢ》᠃ ᠣᠭᠲᠠᠷᠭᠤᠶ ᠵᠢᠨ ᠰᠢᠯᠤᠭᠤᠨ ᠱᠤᠭᠤᠮ ᠪᠣᠯᠤᠨ ᠬᠠᠪᠲᠠᠭ᠋ᠠᠶ ᠵᠢᠨ ᠡᠯ᠎ᠡ ᠵᠥᠢ᠍ᠯ᠎ᠤᠨ ᠬᠤᠯᠪᠤᠭᠳᠠᠯ᠎ᠢ ᠶᠠᠷᠢᠪᠠ᠃
      ᠠᠷᠪᠠᠨ ᠬᠤᠶᠠᠳᠤᠭ᠋ᠠᠷ ᠪᠦᠯᠦᠭ᠎ᠨᠢ 《ᠪᠡᠶᠡᠳᠦ ᠵᠢᠨ ᠬᠡᠮᠵᠢᠯᠳᠡ》᠂ 《ᠲᠣᠭᠤᠷᠢᠭ᠎ᠤᠨ ᠲᠠᠯᠠᠪᠠᠢ ᠵᠢᠨ ᠬᠠᠷᠢᠴᠠᠯ᠎ᠨᠢ ᠳ᠋ᠢᠶᠠᠮᠸᠲᠷ᠎ᠤᠨ ᠺᠤᠸᠠᠳ᠋᠎ᠤᠨ ᠬᠠᠷᠢᠴᠠᠯ᠎ᠲᠠᠢ ᠲᠡᠩᠴᠡᠭᠦᠤ》᠂ 《ᠱᠤᠷᠤᠯᠵᠢᠨ᠎ᠤ ᠡᠵᠡᠯᠡᠭᠦᠨ᠎ᠨᠢ ᠢᠵᠢᠯ ᠰᠠᠭᠤᠷᠢ ᠲᠡᠩᠴᠡᠭᠦᠥ ᠥᠨᠳᠦᠷ᠎ᠲᠠᠢ ᠪᠥᠭᠡᠷᠡᠩᠬᠡᠢ ᠪᠠᠭ᠋ᠠᠨ᠎ᠠ ᠵᠢᠨ ᠡᠵᠡᠯᠡᠭᠦᠨ᠎ᠤ ᠭᠤᠷᠪᠠᠨ᠎ᠤ ᠨᠢᠭᠡ᠎ᠲᠠᠢ ᠲᠡᠩᠴᠡᠭᠦᠤ》 ᠵᠢ ᠪᠠᠳᠤᠯᠠᠵᠡᠢ᠃
      ᠠᠷᠪᠠᠨ ᠭᠤᠷᠪᠠᠳᠤᠭ᠋ᠠᠷ ᠪᠦᠯᠦᠭ᠎ᠨᠢ 《ᠵᠥᠪ ᠤᠯᠠᠨ ᠭᠠᠳᠠᠷᠭᠤᠳᠦ ᠪᠡᠶ᠎ᠡ ᠪᠠᠶ᠋ᠢᠭᠤᠯᠬᠤ》᠂ 5 ᠵᠥᠢ᠍ᠯ᠎ᠤᠨ ᠵᠥᠪ ᠣᠯᠠᠨ ᠭᠠᠳᠠᠷᠭᠤᠳᠦ ᠪᠡᠶ᠎ᠡ ᠵᠢ ᠭᠤᠤᠯᠴᠢᠯᠠᠨ ᠰᠤᠳᠤᠯᠵᠡᠢ᠃
     《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠵᠤᠬᠢᠶᠠᠭᠳᠠᠭ᠋ᠠᠳ ᠬᠤᠶᠠᠷ ᠮᠢᠩᠭ᠎ᠠ ᠭᠠᠷᠤᠢ ᠵᠢᠯ ᠪᠤᠯᠵᠦ ᠪᠠᠶ᠋ᠢᠭ᠎ᠠ ᠪᠤᠯᠪᠠᠴᠦ ᠠ᠋ᠳᠤᠭᠡ ᠪᠤᠯᠳᠠᠯ᠎ᠠ ᠠᠩᠬ᠎ᠠ ᠵᠡᠷᠭᠡ ᠵᠢᠨ ᠳᠤᠮᠳᠠᠳᠦ ᠰᠤᠷᠭ᠋ᠠᠭᠤᠯᠢ ᠪᠠ ᠲᠡᠭᠡᠳᠤ ᠵᠡᠷᠭᠡ ᠵᠢᠨ ᠳᠤᠮᠳᠠᠳᠦ ᠰᠤᠷᠭ᠋ᠠᠭᠤᠯᠢ ᠵᠢᠨ ᠰᠤᠷᠬᠤ ᠪᠢᠴᠢᠭ᠎ᠲᠤ ᠬᠡᠷᠡᠭᠯᠡᠭᠳᠡᠵᠦ᠂ ᠵᠠᠯᠠᠭᠤ ᠪᠠᠭ᠋ᠠᠴᠤᠳ᠎ᠤᠨ ᠯᠤᠬᠢᠭ ᠰᠡᠳᠬᠢᠭᠦᠢ ᠵᠢᠨ ᠴᠢᠳᠠᠪᠤᠷᠢ ᠵᠢ ᠬᠥᠮᠦᠵᠢᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ᠎ᠨᠢ ᠭᠠᠶ᠋ᠢᠬᠠᠮᠠᠷ᠂ ᠵᠢᠩᠬᠢᠨᠢ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠪᠤᠯᠬᠤᠷ ᠴᠠᠭ᠎ᠤᠨ ᠠ᠋ᠯᠡᠭᠡᠯᠳᠡ ᠵᠢ ᠳᠠᠭ᠋ᠠᠭ᠋ᠠᠵᠦ ᠴᠢᠳᠠᠵᠦ ᠪᠠᠶ᠋ᠢᠭ᠎ᠠ ᠪᠠᠶ᠋ᠢᠬᠤ ᠡ᠃ ᠠᠩᠬ᠎ᠠ ᠵᠡᠷᠭᠡ ᠵᠢᠨ ᠳᠤᠮᠳᠠᠳᠦ ᠰᠤᠷᠭ᠋ᠠᠭᠤᠯᠢ ᠪᠠ ᠲᠡᠭᠡᠳᠤ ᠵᠡᠷᠭᠡ ᠵᠢᠨ ᠳᠤᠮᠳᠠᠳᠦ ᠰᠤᠷᠭ᠋ᠠᠭᠤᠯᠢ ᠵᠢᠨ ᠲᠣᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠤ ᠰᠤᠷᠬᠤ ᠪᠢᠴᠢᠭ᠎ᠲᠤ 30 ᠤᠷᠴᠢᠮ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠤᠨ ᠠᠭᠤᠯᠭ᠎ᠠ ᠪᠠᠶ᠋ᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠠᠩᠬ᠎ᠠ ᠵᠡᠷᠭᠡ ᠵᠢᠨ ᠲᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ ᠵᠢᠨ ᠬᠠᠪᠳᠠᠭ᠋ᠠᠢ ᠵᠢᠨ ᠭᠧᠥᠮᠸᠲᠷᠢ᠎ᠳᠤ᠂ ᠰᠢᠯᠤᠭᠤᠨ᠂ ᠲᠤᠭᠤᠷᠢᠭ᠂ ᠤᠯᠠᠨ ᠥᠨᠴᠥᠭᠳᠦ ᠵᠢᠨ ᠰᠢᠨᠵᠢ ᠴᠢᠨᠠᠷ᠎ᠤᠨ ᠳᠤᠬᠠᠢ 21 ᠪᠠᠳᠤᠶᠤᠰᠦ ᠵᠢ ᠪᠠᠳᠤᠯᠠᠭᠰᠠᠨ ᠪᠠᠶ᠋ᠢᠳᠠᠭ ᠪᠥᠭᠡᠳ ᠬᠠᠮᠤᠭ᠎ᠤᠨ ᠤᠯᠠᠨ ᠭᠡᠷᠡᠭᠯᠡᠭᠳᠡᠭᠦ 《ᠬᠤᠶᠠᠷ ᠠ᠋ᠭ᠌ᠴᠡ ᠲᠠᠯ᠎ᠠ ᠵᠢᠨ ᠪᠠᠳᠤᠶᠤᠰᠥ》 ᠵᠢ ᠪᠠᠰᠠ ᠪᠠᠳᠤᠯᠠᠭᠰᠠᠨ ᠪᠠᠶ᠋ᠢᠨ᠎ᠠ᠃ ᠲᠡᠭᠡᠳᠤ ᠵᠡᠷᠭᠡ ᠵᠢᠨ ᠲᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ ᠵᠢᠨ ᠪᠡᠶᠡᠳᠦ ᠵᠢᠨ ᠭᠧᠥᠮᠸᠲᠷᠢ᠎ᠳᠤ᠂ ᠤᠭᠳᠠᠷᠭᠤᠢ ᠵᠢᠨ ᠰᠢᠯᠤᠭᠤᠨ᠎ᠨᠤᠭᠤᠳ᠎ᠤᠨ ᠬᠤᠭᠤᠷᠤᠨᠳᠤᠬᠢ ᠬᠤᠯᠪᠤᠭᠳᠠᠯ᠂ ᠰᠢᠯᠤᠭᠤᠨ ᠪᠠ ᠬᠠᠪᠳᠠᠭ᠋ᠠᠢ ᠵᠢᠨ ᠠ᠋ᠭ᠌ᠴᠡ ᠪᠤᠯᠬᠤ ᠵᠢᠨ ᠮᠠᠭ᠋ᠠᠳᠯᠠᠯᠳᠠ ᠰᠢᠨᠵᠢ ᠴᠢᠨᠠᠷ᠂ ᠬᠠᠪᠳᠠᠭ᠋ᠠᠢ ᠪᠠ ᠬᠠᠪᠳᠠᠭ᠋ᠠᠢ ᠵᠡᠷᠭᠡᠴᠡᠭᠡ ᠪᠤᠯᠬᠤ ᠵᠢᠨ ᠮᠠᠭ᠋ᠠᠳᠯᠠᠯᠳᠠ ᠰᠢᠨᠵᠢ ᠴᠢᠨᠠᠷ᠂ ᠬᠠᠪᠳᠠᠭ᠋ᠠᠢ ᠪᠠ ᠬᠠᠪᠳᠠᠭ᠋ᠠᠢ ᠠ᠋ᠭ᠌ᠴᠡ ᠪᠤᠯᠬᠤ ᠵᠢᠨ ᠮᠠᠭ᠋ᠠᠳᠯᠠᠯᠳᠠ ᠵᠡᠷᠭᠡ 8 ᠪᠠᠳᠤᠶᠤᠰᠦ ᠵᠢ ᠪᠠᠳᠤᠯᠠᠭᠰᠠᠨ ᠪᠠᠶ᠋ᠢᠳᠠᠭ᠃ ᠪᠠᠰᠠ 《ᠱᠤᠷᠤᠯᠵᠢᠨ᠎ᠤ ᠡᠵᠡᠯᠡᠭᠦᠨ᠎ᠨᠢ ᠢᠵᠢᠯ ᠰᠠᠭᠤᠷᠢ ᠲᠡᠩᠴᠡᠭᠦᠥ ᠥᠨᠳᠦᠷ᠎ᠲᠠᠢ ᠪᠥᠭᠡᠷᠡᠩᠬᠡᠢ ᠪᠠᠭ᠋ᠠᠨ᠎ᠠ ᠵᠢᠨ ᠡᠵᠡᠯᠡᠭᠦᠨ᠎ᠤ ᠭᠤᠷᠪᠠᠨ᠎ᠤ ᠨᠢᠭᠡ᠎ᠲᠠᠢ ᠲᠡᠩᠴᠡᠭᠦᠤ》 ᠵᠢ ᠪᠠᠳᠤᠯᠠᠵᠡᠢ᠃ ᠤᠯᠠᠨ ᠬᠡᠷᠡᠭᠴᠡᠭᠡᠳᠦ 《ᠠᠯᠳᠠᠨ ᠤᠭᠳᠤᠯᠤᠯ》 ᠪᠤᠯᠤᠨ 《ᠺᠣᠰᠠᠶᠢᠨ᠎ᠤ ᠪᠠᠳᠤᠶᠤᠰᠦ》᠎ᠲᠠᠢ ᠰᠠᠴᠠᠭᠤ ᠥᠭᠦᠯᠡᠯ᠎ᠢ ᠴᠦ᠍ ᠪᠠᠳᠤᠯᠠᠵᠡᠢ᠃
      ᠬᠤᠶᠠᠷ᠂ ᠮᠥᠩᠬᠡ ᠬᠠᠭ᠋ᠠᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠰᠤᠳᠤᠯᠵᠤ ᠪᠠᠶ᠋ᠢᠭᠰᠠᠨ ᠰᠣᠷᠪᠣᠯᠵᠢ ᠲᠡᠮᠳᠡᠭᠯᠡᠯ᠎ᠤᠳ
      ᠶᠡᠭᠡ ᠮᠤᠩᠭᠤᠯ ᠤᠯᠤᠰ᠎ᠤᠨ ᠮᠥᠩᠭᠡ ᠬᠠᠭ᠋ᠠᠨ （1208 — 1259） 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠰᠤᠳᠤᠯᠵᠦ ᠲᠡᠭᠦᠨ᠎ᠤ ᠳᠤᠳᠤᠷᠠᠬᠢ ᠨᠡᠯᠢᠶᠡᠳ ᠠᠷᠪᠢᠨ ᠢᠯᠡᠳᠭᠡᠭᠴᠢ ᠵᠢᠷᠤᠭ᠎ᠢ ᠵᠠᠳᠠᠯᠤᠨ ᠲᠠᠶ᠋ᠢᠯᠪᠤᠷᠢᠯᠠᠵᠦ ᠴᠢᠳᠠᠳᠠᠭ ᠭᠡᠰᠡᠨ ᠲᠡᠤᠬᠡᠨ ᠲᠡᠮᠳᠡᠭᠯᠡᠯ ᠪᠠᠶ᠋ᠢᠳᠠᠭ᠃ ᠶᠠᠫᠤᠨ᠎ᠤ ᠮᠤᠩᠭᠤᠯᠴᠢ ᠠ᠋ᠷᠳᠡᠮᠳᠡᠨ ᠺᠠᠽᠦ᠋ᠪᠣᠵᠢ · ᠲᠠᠺᠠᠶ᠋ᠢᠰᠢ᠄ 《ᠮᠥᠩᠭᠡ ᠪᠣᠯ ᠴᠢᠩᠭᠢᠰ ᠬᠠᠭ᠋ᠠᠨ᠎ᠤ ᠤᠳᠬᠤᠨ ᠬᠥᠪᠡᠭᠦᠨ ᠲᠤᠯᠤᠢ ᠵᠢᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠶᠤᠮ᠂ ᠠᠯᠳᠠᠨ ᠤᠯᠤᠰ᠎ᠢ ᠳᠠᠶ᠋ᠢᠯᠠᠭ᠍ᠤ ᠳᠠᠶ᠋ᠢᠨ᠎ᠳᠤ ᠴᠦ᠍ ᠲᠡᠷᠡ᠂ ᠠ᠋ᠸᠦ᠋ᠷᠤᠫᠠ᠎ᠳᠤ ᠶᠠᠪᠤᠭᠤᠯᠤᠭᠰᠠᠨ ᠳᠠᠶ᠋ᠢᠨ᠎ᠳᠤ ᠴᠦ᠍ ᠲᠡᠷᠡ᠂ ᠮᠥᠩᠬᠡ ᠵᠢᠨ ᠪᠠᠶ᠋ᠢᠭᠤᠯᠤᠭᠰᠠᠨ ᠴᠡᠷᠢᠭ᠎ᠤᠨ ᠭᠠᠪᠢᠶ᠎ᠠ ᠭᠡᠪᠡᠯ ᠥᠨᠡᠭᠡᠷ ᠭᠢᠯᠠᠯᠵᠠᠮ᠎ᠠ ᠪᠠᠢ᠍ᠢ᠍ᠭᠰᠠᠨ ᠶᠤᠮ᠃ ᠮᠦᠨᠭᠭᠡ ᠬᠠᠭ᠋ᠠᠨ ᠪᠤᠯ ᠠᠷᠢᠬᠢᠳᠠᠵᠦ ᠴᠡᠩᠭᠡᠬᠦ ᠪᠤᠶᠦ ᠪᠥᠷᠢᠯᠭᠡᠵᠦ ᠱᠠᠯᠢᠬᠤ᠎ᠳᠤ ᠰᠤᠨᠢᠷᠬᠠᠯ ᠥᠭᠡᠢ᠂ ᠠᠩ ᠭᠥᠷᠥᠭᠡ ᠬᠢᠬᠦ᠎ᠪᠠᠷ ᠵᠤᠭ᠎ᠠ ᠴᠡᠩᠭᠡᠯ ᠪᠤᠯᠭ᠋ᠠᠳᠠᠭ ᠪᠠᠭ᠋ᠠᠳᠤᠷᠯᠢᠭ ᠪᠥᠭᠡᠳ ᠠᠰᠪᠤᠷ ᠴᠠᠭ᠋ᠠᠨ ᠵᠠᠩ ᠴᠢᠨᠠᠷ᠎ᠲᠠᠢ᠂ ᠮᠥᠩᠭᠡ ᠬᠠᠭ᠋ᠠᠨ᠎ᠢ ᠶᠤᠰᠤᠳᠠᠢ ᠯᠠ ᠮᠤᠩᠭᠤᠯᠴᠤᠳ᠎ᠤᠨ ᠤᠭ ᠰᠢᠨᠵᠢ ᠵᠢ ᠬᠠᠳᠠᠭ᠋ᠠᠯᠠᠭᠰᠠᠨ ᠬᠥᠮᠥᠨ ᠭᠡᠵᠦ ᠬᠡᠯᠡᠵᠦ ᠪᠤᠯᠤᠨ᠎ᠠ》 ［6］ ᠬᠡᠵᠦ ᠬᠡᠯᠡᠵᠡᠢ᠃ ᠮᠥᠩᠭᠡ ᠬᠠᠭ᠋ᠠᠨ ᠪᠣᠯ ᠠᠭᠤᠤ ᠶᠡᠭᠡ ᠮᠤᠩᠭᠤᠯ ᠠ᠋ᠬᠡ ᠰᠤᠷᠬᠠᠭᠳᠠᠨᠢ ᠪᠠᠬᠢ ᠵᠢᠨ ᠬᠥᠮᠥᠵᠢᠯ ᠳᠤᠤᠷ᠎ᠠ ᠥᠰᠥᠨ ᠪᠤᠶ᠋ᠢᠵᠢᠭᠰᠠᠨ ᠠᠯᠳᠠᠷᠳᠦ ᠶᠡᠭᠡ ᠮᠤᠨᠭ᠌ᠭᠤᠯ ᠤᠯᠤᠰ᠎ᠤᠨ ᠬᠠᠭ᠋ᠠᠨ᠎ᠤ ᠨᠢᠭᠡ᠎ᠨᠢ ᠶᠤᠮ᠃ ᠠ᠋ᠨᠡ ᠬᠦ᠌ ᠮᠤᠩᠭᠤᠯ ᠪᠥᠰᠡᠭᠦᠢ ᠵᠢ ᠫᠸᠷᠰ᠎ᠤᠨ ᠲᠡᠤᠬᠡᠴᠢᠨ ᠷᠠᠰᠢᠳ᠋ － ᠠᠳ᠋ － ᠳ᠋ᠢᠨ 《ᠰᠤᠳᠤᠷ᠎ᠤᠨ ᠴᠢᠭᠤᠯᠭ᠋ᠠᠨ》 ᠬᠡᠬᠦ ᠠᠯᠳᠠᠷᠳᠦ ᠨᠤᠮ᠎ᠳᠤ᠎ᠪᠠᠨ᠄ 《ᠰᠤᠷᠬᠠᠬᠳᠠᠨᠢ ᠪᠡᠬᠢ ᠪᠤᠯ ᠮᠠᠰᠢ ᠶᠡᠭᠡ ᠤᠬᠠᠭ᠋ᠠᠨ᠎ᠲᠠᠢ᠂ ᠠᠪᠢᠶᠠᠰᠯᠢᠬ ᠲᠠᠯ᠎ᠠ᠎ᠪᠠᠷ ᠵᠶ᠋ᠠᠨ ᠪᠦᠭᠦ ᠲᠡᠯᠡᠭᠡᠢ ᠵᠢᠨ ᠠ᠋ᠮᠡᠭᠳᠠᠢ᠍ᠢ᠍ᠴᠤᠳ᠎ᠤᠨ ᠲᠤᠳᠤᠷ᠎ᠠ᠎ᠠᠴᠠ ᠲᠤᠪᠤᠢ᠍ᠢ᠍ᠵᠤ ᠪᠠᠢ᠍ᠢ᠍ᠯ᠎ᠠ》 ［7］ ᠭᠡᠮᠡᠵᠦ᠂ ᠠ᠋ᠸᠦ᠋ᠷᠤᠫᠠ ᠵᠢᠨ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠥᠭᠴᠢ ᠫᠯᠠᠨ ᠺᠠᠷᠫᠢᠨ 《ᠮᠤᠩᠭᠤᠯ᠎ᠳᠤ ᠵᠢᠭᠤᠴᠢᠯᠠᠭᠰᠠᠨ ᠲᠡᠮᠳᠡᠭᠯᠡᠯ》᠎ᠳᠤ᠎ᠪᠠᠨ᠄ 《ᠪᠦᠭᠦ ᠲᠠᠲ᠋ᠠᠷ᠎ᠤᠨ ᠬᠠᠭ᠋ᠠᠨ᠎ᠤ ᠠ᠋ᠬᠡ ᠵᠢ ᠭᠠᠷᠭ᠋ᠠᠪᠠᠯ ᠬᠠᠮᠤᠭ᠎ᠠᠴᠠ ᠬᠥᠨᠳᠥᠲᠠᠢ ᠪᠠᠢ᠍ᠢ᠍ᠳᠠᠬ》 ［8］ ᠭᠡᠵᠡᠢ᠃ 
      ᠫᠷᠤᠹᠸᠰᠰᠤᠷ ᠲᠠᠶ᠋ᠢᠴᠢᠭᠤᠳ · ᠮᠠᠨᠰᠠᠩ᠎ᠤᠨ ᠠ᠋ᠷᠭᠢᠯᠡᠨ ᠨᠠᠶ᠋ᠢᠷᠠᠭᠤᠯᠤᠭᠰᠠᠨ 《ᠮᠤᠩᠭᠤᠯ ᠥᠨᠳᠦᠰᠦᠳᠡᠨ᠎ᠤ ᠪᠥᠷᠢᠨ ᠲᠡᠤᠬᠡ》᠎ᠳᠤ᠄ 《ᠮᠥᠩᠬᠡ ᠬᠠᠭ᠋ᠠᠨ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠢ ᠰᠠᠶ᠋ᠢᠨ ᠮᠡᠳᠡᠳᠡᠭ ᠪᠥᠭᠡᠳ ᠪᠠᠰᠠ ᠰᠤᠳᠤᠯᠤᠯ ᠬᠢᠵᠦ ᠪᠠᠶ᠋ᠢᠭᠰᠠᠨ ᠪᠠᠶ᠋ᠢᠵᠡᠢ᠃ ᠲᠡᠷᠡ ᠠ᠋ᠾᠤᠢ᠍ᠭ᠍ᠯᠢᠳ （ᠠ᠋ᠸᠤᠢ᠍ᠺᠯᠢᠳ᠋ — ᠨᠠᠢ᠍ᠢ᠍ᠷᠠᠭᠤᠯᠤᠭᠴᠢ） ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠎ᠢ ᠮᠡᠳᠡᠳᠡᠭ᠃ ᠠ᠋ᠾᠤᠢ᠍ᠭ᠍ᠯᠢᠳ ᠪᠣᠯ ᠠ᠋ᠷᠳᠡᠨ᠎ᠤ ᠭ᠋ᠷᠧᠭ᠎ᠤᠨ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨᠳᠡᠨ ᠮᠥᠨ᠃ ᠲᠡᠭᠦᠨ᠎ᠤ ᠨᠡᠷ᠎ᠡ᠎ᠲᠠᠢ ᠵᠤᠬᠢᠶᠠᠯ 〈ᠵᠢᠢ ᠾᠧ ᠶᠤᠸᠨᠨ ᠪᠸᠨ〉᠎ᠨᠢ 13 ᠳ᠋ᠤᠭ᠋ᠠᠷ ᠵᠠᠭᠤᠨ᠎ᠤ ᠠ᠋ᠮᠥᠨ᠎ᠠ ᠬᠠᠭ᠋ᠠᠰ ᠬᠤᠭᠤᠴᠠᠭ᠋ᠠᠨ᠎ᠳᠤ ᠫᠸᠷᠰ᠎ᠤᠨ ᠠ᠋ᠷᠳᠡᠮᠳᠡᠨ ᠨᠠᠰᠢ － ᠥᠳ᠋ － ᠳ᠋ᠢᠨ ᠲᠤᠤ ᠰᠸ ᠠᠷᠠᠪ ᠬᠡᠯᠡ ᠳᠡᠭᠡᠷ᠎ᠡ ᠤᠷᠴᠢᠭᠤᠯᠤᠨ ᠪᠠᠭᠤᠯᠭ᠋ᠠᠵᠡᠢ ᠁ ᠲᠤᠰ ᠨᠤᠮ ᠪᠣᠯ ᠮᠥᠩᠭᠡ ᠬᠠᠭ᠋ᠠᠨ᠎ᠤ ᠰᠤᠳᠤᠯᠵᠦ ᠪᠠᠶ᠋ᠢᠭᠰᠠᠨ ᠨᠤᠮ᠎ᠤᠨ ᠭᠡᠰᠡᠭ ᠠᠭᠤᠯᠭ᠎ᠠ ᠪᠤᠯᠤᠨ᠎ᠠ》 ［9］ ᠭᠡᠵᠡᠢ᠃
      ᠫᠷᠤᠹᠸᠰᠰᠤᠷ ᠱ᠌ᠢ ᠵᠢᠶᠦ᠋ᠨ᠄ 《ᠮᠥᠩᠭᠡ ᠬᠠᠭ᠋ᠠᠨ᠂ ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ᠎ᠢ ᠲᠠᠶ᠋ᠢᠯᠵᠦ ᠪᠠᠶ᠋ᠢᠭᠰᠠᠨ᠎ᠨᠢ ᠮᠤᠩᠭᠤᠯ ᠬᠥᠮᠦᠨ᠎ᠤ ᠳᠤᠳᠤᠷᠠᠬᠢ ᠬᠠᠮᠤᠭ᠎ᠤᠨ ᠲᠡᠷᠢᠭᠦᠨ᠎ᠤ ᠬᠥᠮᠥᠨ ᠪᠤᠯᠤᠨ᠎ᠠ》［10］ ᠭᠡᠵᠡᠢ᠃ ᠲᠡᠷᠡᠴᠢᠯᠡᠨ᠄ 《ᠮᠥᠩᠭᠡ ᠬᠠᠭ᠋ᠠᠨ ᠪᠣᠯ ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ᠎ᠢ ᠬᠠᠮᠤᠭ᠎ᠤᠨ ᠲᠡᠷᠢᠭᠦᠨ᠎ᠳᠤ ᠰᠤᠳᠤᠯᠤᠭᠰᠠᠨ ᠳᠤᠮᠳᠠᠳᠦ ᠤᠯᠤᠰ᠎ᠤᠨ ᠬᠥᠮᠥᠨ ᠪᠤᠯᠤᠨ᠎ᠠ》［11］ ᠭᠡᠵᠡᠢ᠃
      ᠠ᠋ᠭᠦᠨ᠎ᠠᠴᠠ ᠥᠵᠡᠬᠦ᠎ᠳᠤ᠂ ᠠᠯᠢ ᠠ᠋ᠷᠳᠡ ᠶᠡᠭᠡ ᠮᠤᠩᠭᠤᠯ ᠤᠯᠤᠰ᠎ᠤᠨ ᠥᠶ᠎ᠡ᠎ᠳᠤ ᠮᠤᠩᠭᠤᠯᠴᠤᠳ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠰᠤᠨᠢᠷᠬᠠᠵᠦ ᠰᠤᠳᠤᠯᠵᠦ ᠪᠠᠶ᠋ᠢᠭᠰᠠᠨ ᠪᠠᠶ᠋ᠢᠨ᠎ᠠ᠃ ᠮᠥᠩᠬᠡ ᠬᠠᠭ᠋ᠠᠨ ᠰᠠᠷᠳᠠᠭᠤᠯ᠎ᠤᠨ ᠠᠰᠲᠷᠤᠨᠤᠮᠢᠴᠢ ᠨᠠᠰᠢ — ᠠᠯ — ᠳ᠋ᠢᠨ ᠲᠥᠰᠢ ᠵᠢᠨ ᠨᠠᠶ᠋ᠢᠷᠠᠭᠤᠯᠤᠭᠰᠠᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠤᠩᠰᠢᠬᠤ᠎ᠪᠠᠷ ᠳᠠᠮᠵᠢᠨ ᠠ᠋ᠷᠳᠡᠮᠳᠡᠨ ᠨᠠᠰᠢ — ᠠᠯ — ᠳ᠋ᠢᠨ ᠲᠥᠰᠢ ᠵᠢ ᠤᠯᠵᠦ ᠮᠡᠳᠡᠭᠰᠡᠨ ᠪᠠᠶ᠋ᠢᠵᠠᠢ᠃ ᠶᠠᠭ ᠠ᠋ᠶ᠋ᠢᠮᠦ᠎ᠠᠴᠠ ᠮᠥᠩᠬᠡ ᠬᠠᠭ᠋ᠠᠨ 1252 ᠤᠨ᠎ᠳᠤ ᠳᠡᠭᠦᠥ ᠬᠤᠯᠤᠭᠤ （ᠢᠯ ᠬᠠᠭ᠋ᠠᠨᠳᠦ ᠤᠯᠤᠰ᠎ᠤᠨ ᠥᠯᠡᠬᠦ ᠬᠠᠭ᠋ᠠᠨ᠎ᠢ ᠬᠡᠯᠡᠵᠦ ᠪᠠᠶ᠋ᠢᠨ᠎ᠠ） ᠵᠢ ᠪᠠᠷᠠᠭᠤᠨᠰᠢ ᠰᠠᠷᠳᠠᠭᠤᠯ ᠳᠡᠶ᠋ᠢᠰᠢ ᠳᠠᠶ᠋ᠢᠯᠠᠷ᠎ᠠ ᠮᠤᠷᠳᠠᠭᠤᠯᠬᠤ᠎ᠳᠤ᠎ᠪᠠᠨ ᠨᠠᠰᠢ — ᠠᠯ — ᠳ᠋ᠢᠨ ᠲᠥᠰᠢ ᠵᠢ ᠠ᠋ᠷᠢᠵᠦ ᠤᠯᠤᠭ᠋ᠠᠳ ᠮᠤᠩᠭᠤᠯ᠎ᠤᠨ ᠬᠠᠭ᠋ᠠᠨ᠎ᠤ ᠤᠷᠳᠤᠨ᠎ᠳᠤ ᠶᠠᠪᠤᠭᠤᠯᠵᠦ ᠥᠭᠬᠦ ᠬᠡᠷᠡᠭᠳᠠᠢ ᠭᠡᠵᠦ ᠵᠠᠬᠢᠭᠰᠠᠨ ᠪᠠᠶ᠋ᠢᠳᠠᠭ᠃
     《ᠶᠤᠸᠠᠨ ᠤᠯᠤᠰ᠎ᠤᠨ ᠠᠰᠲᠷᠤᠨᠤᠮᠢ ᠵᠢᠨ ᠲᠡᠥᠬᠡ ᠵᠢᠨ ᠨᠠᠪᠳᠠᠷᠠᠭ》 ᠭᠡᠳᠡᠭ ᠨᠤᠮ᠎ᠳᠤ᠄ 《ᠮᠢᠩ ᠤᠯᠤᠰ᠎ᠤᠨ ᠰᠢᠥᠢ ᠭᠤᠸᠠᠩ ᠴᠢ᠎ᠠᠴᠠ 350 ᠵᠢᠯ᠎ᠤᠨ ᠠ᠋ᠮᠥᠨ᠎ᠡ ᠮᠥᠩᠬᠡ ᠬᠠᠭ᠋ᠠᠨ᠎ᠤ ᠥᠶ᠎ᠡ᠎ᠳᠤ ᠤᠷᠴᠢᠭᠤᠯᠤᠭᠰᠠᠨ （ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ） ᠪᠣᠯ ᠮᠠᠨ᠎ᠤ ᠤᠯᠤᠰ᠎ᠲᠤ ᠤᠷᠥᠵᠦ ᠢᠷᠡᠭᠰᠡᠨ ᠬᠠᠮᠤᠭ᠎ᠤᠨ ᠠᠩᠬᠠᠨ᠎ᠤ 〈ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ〉 ᠪᠤᠯᠤᠨ᠎ᠠ》 ［12］ ᠭᠡᠵᠡᠢ᠃
      ᠮᠥᠨ ᠫᠷᠤᠹᠸᠰᠰᠤᠷ ᠱ᠌ᠢ ᠵᠢᠶᠦ᠋ᠨ᠄ 《ᠮᠥᠩᠭᠡ ᠬᠠᠭ᠋ᠠᠨ᠎ᠤ ᠥᠶ᠎ᠡ᠎ᠳᠤ᠂ 〈ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ〉 ᠪᠣᠯ ᠬᠠᠮᠤᠭ᠎ᠤᠨ ᠠᠩᠬᠠᠨ᠎ᠳᠤ᠎ᠪᠠᠨ ᠮᠤᠩᠭᠤᠯ ᠵᠶ᠋ᠠᠷ ᠤᠷᠴᠢᠭᠤᠯᠤᠭᠳᠠᠵᠦ ᠮᠠᠨ᠎ᠤ ᠤᠯᠤᠰ᠎ᠲᠤ ᠤᠯᠠᠮᠵᠢᠯᠠᠭᠳᠠᠭᠰᠠᠨ ᠶᠤᠮ》［13］ ᠭᠡᠵᠡᠢ᠃ ᠠ᠋ᠳᠡᠭᠡᠷ ᠲᠡᠤᠬᠡ ᠵᠢᠨ ᠪᠠᠷᠢᠮᠳᠠ᠎ᠠᠴᠠ ᠥᠵᠡᠪᠡᠯ ᠮᠤᠩᠭᠤᠯᠴᠤᠳ ᠬᠠᠷᠢᠨ ᠬᠢᠳᠡᠳ ᠦᠨᠳᠤᠰᠤᠳᠠᠨ᠎ᠠᠴᠠ 350 ᠭᠠᠷᠤᠢ ᠵᠢᠯ᠎ᠤᠨ ᠠ᠋ᠮᠤᠨ᠎ᠡ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ᠎ᠢ ᠰᠤᠨᠢᠷᠬᠠᠵᠦ ᠰᠤᠳᠥᠯᠵᠦ ᠪᠠᠶ᠋ᠢᠭᠰᠠᠨ》［14］ ᠪᠠᠶ᠋ᠢᠨ᠎ᠠ᠃
      ᠮᠥᠩᠭᠡ ᠬᠠᠭ᠋ᠠᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠥᠪᠡᠷ ᠵᠶ᠋ᠠᠨ ᠤᠷᠴᠢᠭᠤᠯᠤᠭᠰᠠᠨ ᠥᠭᠡᠢ ᠴᠦ᠍ ᠲᠡᠭᠦᠨ᠎ᠤ ᠤᠳᠤᠷᠢᠳᠤᠯᠭ᠎ᠠ ᠳᠤᠤᠷ᠎ᠠ ᠤᠷᠴᠢᠭᠤᠯᠤᠭᠰᠠᠨ ᠪᠠᠶ᠋ᠢᠵᠦ ᠪᠤᠯᠬᠤ ᠶᠤᠮ᠃ ᠠ᠋ᠷᠳᠡᠮᠲᠡᠨ ᠪᠤᠷᠵᠢᠭᠢᠨ· ᠸᠨᠩᠴᠤᠭ᠄ 《ᠮᠤᠩᠭᠤᠯᠴᠤᠳ᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠲᠸᠭᠨᠢᠭ᠎ᠤᠨ ᠲᠡᠤᠬᠡ》 ᠬᠡᠭᠦ ᠨᠤᠮ᠎ᠳᠤ᠎ᠪᠠᠨ᠄ 《ᠶᠤᠸᠠᠨ ᠤᠯᠤᠰ᠎ᠤᠨ ᠪᠢᠴᠢᠭᠡᠴᠢ ᠵᠢᠨ ᠶᠠᠮᠤᠨ᠎ᠤ ᠲᠡᠮᠳᠡᠭᠯᠡᠯ᠎ᠳᠤ ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠳᠥᠷᠪᠡᠨ ᠮᠥᠴᠡ ᠵᠢᠨ ᠪᠤᠳᠤᠬᠤ ᠠᠷᠭ᠎ᠠ ᠵᠢᠨ ᠬᠡᠰᠡᠭᠯᠡᠯ ᠲᠤᠭ᠎ᠠ 15 ᠪᠥᠯᠥᠭ ᠨᠢᠭᠡᠨ ᠵᠥᠢ᠍ᠯ ᠪᠤᠢ᠃ ᠠ᠋ᠨᠡ ᠪᠣᠯ ᠶᠠᠭ 〈ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ〉᠎ᠤᠨ ᠠᠷᠠᠪ ᠬᠡᠯᠡᠨ᠎ᠤ ᠤᠷᠴᠢᠭᠤᠯᠭ᠎ᠠ ᠮᠥᠨ》［15］ ᠭᠡᠵᠡᠢ᠃ ᠡ᠊ᠨᠳᠡ ᠶᠠᠷᠢᠵᠦ ᠪᠠᠶ᠋ᠢᠭ᠎ᠠ ᠤᠮᠠᠷᠠᠳᠥ ᠵᠤᠷᠭ᠋ᠠᠨ᠎ᠤ ᠤᠳᠤᠨ ᠤᠷᠤᠨ᠎ᠤ ᠤᠷᠭᠢᠯ ᠭᠡᠭᠴᠢ ᠪᠣᠯ ᠬᠤᠪᠢᠯᠠᠢ ᠬᠠᠭ᠋ᠠᠨ᠎ᠤ ᠥᠶ᠎ᠡ᠎ᠳᠤ ᠪᠠᠶ᠋ᠢᠭᠤᠯᠤᠭᠰᠠᠨ ᠲᠡᠭᠡᠳᠤ ᠨᠠᠢ᠍ᠢ᠍ᠰᠯᠠᠯ᠎ᠳᠤ᠎ᠬᠢ ᠤᠳᠤᠨ ᠤᠷᠤᠨ᠎ᠤ ᠤᠷᠭᠢᠯ－《ᠤᠳᠤᠨ ᠤᠷᠤᠨ᠎ᠢ ᠰᠢᠨᠵᠢᠯᠡᠬᠦ ᠥᠷᠳᠡᠭᠡ》 ᠵᠢ ᠵᠢᠭ᠋ᠠᠵᠦ ᠪᠠᠶ᠋ᠢᠨ᠎ᠠ᠃
      ᠮᠥᠩᠭᠡ ᠬᠠᠭ᠋ᠠᠨ᠎ᠤ ᠥᠶ᠎ᠡ᠎ᠳᠤ ᠮᠤᠩᠭᠤᠯ ᠵᠶ᠋ᠠᠷ ᠤᠷᠴᠢᠭᠤᠯᠤᠭᠳᠠᠭᠰᠠᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠭᠡᠭᠦ ᠠ᠋ᠨᠡ ᠭᠦ᠌ ᠥᠨᠡᠳᠦ ᠨᠤᠮ ᠬᠤᠶ᠋ᠢᠴᠢ ᠥᠶ᠎ᠡ ᠵᠢᠨ ᠮᠤᠩᠭᠤᠯᠴᠤᠳ᠎ᠲᠤ ᠤᠯᠠᠮᠵᠢᠯᠠᠭᠳᠠᠵᠦ ᠳᠡᠶ᠋ᠢᠯᠦᠭᠰᠡᠨ ᠥᠭᠡᠢ᠂ ᠶᠤᠸᠠᠨ ᠤᠯᠤᠰ᠎ᠤᠨ ᠲᠡᠭᠡᠳᠤ ᠨᠠᠢ᠍ᠢ᠍ᠰᠯᠡᠯ᠎ᠳᠤ ᠬᠠᠳᠠᠭ᠋ᠠᠯᠠᠭᠳᠠᠵᠤ ᠪᠠᠶ᠋ᠢᠭ᠋ᠠᠳ 《ᠮᠢᠩ ᠤᠯᠤᠰ᠎ᠤᠨ ᠬᠠᠭ᠋ᠠᠨ ᠵᠥ᠍ ᠶᠤᠸᠠᠨ ᠵᠠᠩ᠂ ᠶᠤᠸᠠᠨ ᠤᠯᠤᠰ᠎ᠤᠨ 〈ᠬᠠᠭ᠋ᠠᠨ ᠰᠥᠷ〉᠎ᠢ ᠳᠠᠷᠤᠬᠤ ᠲᠡᠷᠡ ᠥᠶ᠎ᠡ ᠵᠢᠨ ᠪᠢᠴᠢᠭ ᠨᠤᠮ᠎ᠢ ᠰᠢᠳᠠᠭ᠋ᠠᠵᠦ ᠰᠥᠢ᠍ᠳᠭᠡᠭᠰᠡᠨ᠎ᠲᠠᠢ ᠬᠤᠯᠪᠤᠭᠳᠠᠯ᠎ᠲᠠᠢ ᠪᠤᠯᠤᠯᠳᠠᠢ》 ᠭᠡᠵᠦ ᠰᠤᠳᠤᠯᠤᠭ᠋ᠠᠴᠢ ᠥᠭᠡᠯᠡᠳ᠂ ᠨᠢᠮ᠎ᠠ 《ᠶᠤᠸᠠᠨ ᠤᠯᠤᠰ᠎ᠤᠨ ᠠᠰᠲᠷᠤᠨᠤᠮᠢ ᠵᠢᠨ ᠲᠡᠥᠬᠡ ᠵᠢᠨ ᠨᠠᠪᠳᠠᠷᠠᠭ》 ᠬᠡᠬᠦ ᠨᠤᠮ᠎ᠳᠤ᠎ᠪᠠᠨ ᠲᠡᠮᠳᠡᠭᠯᠡᠭᠰᠡᠨ ᠪᠠᠶ᠋ᠢᠨ᠎ᠠ᠃ ᠪᠠᠰᠠ ᠲᠤᠰ ᠨᠤᠮ᠎ᠳᠤ᠄ 《ᠶᠤᠸᠠᠨ ᠤᠯᠤᠰ᠎ᠤᠨ ᠬᠠᠭ᠋ᠠᠨ᠎ᠤ ᠤᠷᠳᠤᠨ᠎ᠤ ᠪᠢᠴᠢᠭᠡᠴᠢ ᠵᠢᠨ ᠶᠠᠮᠤᠨ — ᠬᠠᠭ᠋ᠠᠨ᠎ᠤ ᠤᠷᠳᠤᠨ᠎ᠤ ᠨᠤᠮ᠎ᠤᠨ ᠰᠠᠩ᠎ᠳᠤ ᠲᠤᠬᠠᠢ ᠵᠢᠨ ᠥᠶ᠎ᠡ᠎ᠳᠤ ᠶᠤᠸᠠᠨ ᠤᠯᠤᠰ᠎ᠤᠨ ᠬᠠᠭ᠋ᠠᠨ᠎ᠤ ᠤᠷᠳᠤᠨ᠎ᠤ ᠳᠥᠰᠢᠮᠡᠯ ᠪᠠᠶ᠋ᠢᠭᠰᠠᠨ ᠰᠠᠷᠳᠠᠭᠤᠯ ᠠ᠋ᠷᠳᠡᠮᠳᠡᠨ ᠵᠠᠮᠠᠯ — ᠠᠯ — ᠳ᠋ᠢᠨ᠎ᠤ ᠠᠪᠴᠢᠷᠠᠭᠰᠠᠨ ᠠᠷᠠᠪ ᠬᠡᠯᠡ᠎ᠪᠠᠷ ᠪᠢᠴᠢᠭᠳᠡᠭᠰᠡᠨ ᠠ᠋ᠷᠳᠡᠨ᠎ᠤ ᠠᠷᠠᠪ ᠬᠢᠭᠡᠳ ᠭ᠋ᠷᠧᠭ᠎ᠤᠨ ᠠ᠋ᠷᠳᠡᠮ ᠰᠢᠨᠵᠢᠯᠡᠭᠡᠨ᠎ᠤ ᠵᠤᠬᠢᠶᠠᠯ ᠪᠥᠳᠥᠭᠡᠯ — ᠠᠰᠲᠷᠤᠨᠤᠮᠢ （ᠤᠳᠤᠨ ᠤᠷᠤᠨ᠎ᠤ ᠰᠤᠳᠤᠯᠭ᠋ᠠᠨ）᠂ ᠲᠤᠭ᠋ᠠᠨ᠎ᠤ ᠤᠬᠠᠭ᠋ᠠᠨ᠂ ᠭᠠᠵᠠᠷ ᠵᠥᠢ᠂ ᠲᠡᠤᠬᠡ᠂ ᠠᠨᠠᠭ᠋ᠠᠬᠤ ᠤᠬᠠᠭ᠋ᠠᠨ᠂ ᠭᠥᠨ ᠤᠬᠠᠭ᠋ᠠᠨ᠂ ᠤᠳᠬ᠎ᠠ ᠵᠤᠬᠢᠶᠠᠯ᠂ ᠮᠸᠬᠠᠨᠢᠭ ᠰᠤᠳᠤᠯᠤᠯ᠂ ᠲᠡᠮᠤᠷ᠎ᠤᠨ ᠲᠠᠷᠬᠠᠨ᠎ᠤ ᠤᠨᠤᠯ᠂ ᠵᠢᠷᠤᠬᠠᠢ ᠰᠤᠳᠤᠯᠤᠯ ᠪᠤᠯᠤᠨ ᠤᠳᠤᠨ ᠤᠷᠤᠨ᠎ᠤ ᠰᠤᠳᠤᠯᠤᠯ᠎ᠤᠨ ᠪᠠᠭ᠋ᠠᠵᠢ ᠬᠡᠮᠵᠢᠬᠦᠷ ᠥᠢ᠍ᠯᠡᠳᠬᠦ ᠶᠤᠰᠥ ᠵᠢᠴᠢ ᠬᠡᠷᠡᠭᠯᠡᠬᠦ ᠠᠷᠭ᠎ᠠ ᠵᠡᠷᠭᠡ ᠤᠯᠠᠨ ᠵᠥᠢ᠍ᠯ᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠬᠥᠷᠢᠶ᠎ᠡ ᠬᠡᠪᠴᠢᠶ᠎ᠡ ᠵᠢ ᠪᠠᠭᠳᠠᠭ᠋ᠠᠭᠰᠠᠨ ᠲᠤᠬᠠᠢ ᠵᠢᠨ ᠥᠶ᠎ᠡ ᠵᠢᠨ ᠳᠡᠯᠡᠬᠡᠢ ᠳ᠋ᠠᠬᠢᠨ᠎ᠤ ᠤᠬᠢ ᠰᠠᠶ᠋ᠢᠨ ᠲᠤᠯᠭᠤᠷ ᠪᠢᠴᠢᠭ᠎ᠤᠳ ᠪᠠᠶ᠋ᠢᠵᠡᠢ》［16］ ᠭᠡᠵᠡᠢ᠃ 
      ᠭᠤᠷᠪᠠ᠂ ᠲᠣᠪᠴᠢ ᠳ᠋ᠦᠩᠨᠡᠯᠲᠡ
      ᠮᠥᠩᠭᠡ ᠬᠠᠭ᠋ᠠᠨ᠎ᠤ ᠥᠶ᠎ᠡ᠎ᠳᠤ ᠮᠤᠩᠭᠤᠯ ᠵᠶ᠋ᠠᠷ ᠤᠷᠴᠢᠭᠤᠯᠤᠭᠳᠠᠭᠰᠠᠨ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠪᠣᠯ ᠮᠤᠩᠭᠤᠯ ᠬᠡᠯᠡᠨ᠎ᠤ ᠪᠠᠶ᠋ᠢᠭ᠋ᠠᠯᠢ ᠵᠢᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠬᠠᠮᠤᠭ᠎ᠤᠨ ᠠ᠋ᠷᠳᠡᠨ᠎ᠤ ᠵᠤᠬᠢᠶᠠᠯ ᠪᠤᠯᠬᠤ ᠪᠥᠭᠡᠳ ᠮᠤᠩᠭᠤᠯ ᠲᠡᠥᠬᠡ ᠰᠣᠶᠣᠯ᠎ᠤᠨ ᠪᠠᠰᠠ ᠨᠢᠭᠡᠨ ᠥᠨᠡᠳᠦ ᠠ᠋ᠷᠳᠡᠨᠢ ᠪᠤᠯᠬᠤ᠎ᠨᠢ ᠳᠠᠮᠵᠢᠭ ᠥᠭᠡᠢ ᠶᠤᠮ᠃ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》 ᠬᠡᠮᠡᠬᠦ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ᠎ᠤ ᠠᠭᠤᠤ ᠰᠣᠳᠣᠨ ᠪᠦᠲᠦᠭᠡᠯ᠎ᠢ ᠮᠣᠩᠭᠤᠯ᠎ᠤᠨ ᠨᠢᠭᠡᠨ ᠦᠶ᠎ᠡ ᠵᠢᠨ ᠶᠡᠭᠡ ᠬᠠᠭ᠋ᠠᠨ ᠮᠦᠨᠭᠭᠡ ᠰᠤᠳᠤᠯᠤᠨ ᠰᠢᠨᠵᠢᠯᠡᠵᠦ ᠪᠠᠶ᠋ᠢᠭᠰᠠᠨ ᠶᠠᠪᠤᠳᠠᠯ ᠪᠣᠯ ᠮᠠᠰᠢ ᠰᠣᠨᠢᠷᠬᠠᠯᠲᠠᠢ ᠪᠥᠭᠡᠳ ᠰᠤᠳᠤᠯᠤᠭᠤᠰᠢᠲᠠᠢ ᠤᠴᠢᠷ ᠶᠤᠮ᠃ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠨᠢ ᠠ᠋ᠳᠦᠭᠡ ᠬᠦᠷᠲᠡᠯ᠎ᠡ ᠮᠣᠩᠭᠤᠯ ᠵᠶ᠋ᠠᠷ ᠪᠦᠷᠢᠨ ᠪᠦᠲᠦᠨ ᠣᠷᠴᠢᠭᠤᠯᠤᠭᠳᠠᠵᠤ ᠭᠠᠷᠤᠭ᠋ᠠᠳᠤᠢ ᠪᠠᠶ᠋ᠢᠭᠰᠠᠭ᠋ᠠᠷ᠃ ᠠ᠋ᠶ᠋ᠢᠮᠦ᠎ᠠᠴᠠ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ᠎ᠤ ᠲᠡᠥᠬᠡ ᠰᠣᠶᠣᠯ᠎ᠲᠠᠢ ᠨᠢᠭᠲᠠ ᠬᠤᠯᠪᠣᠭ᠎ᠠ ᠪᠦᠬᠦᠢ ᠠ᠋ᠨᠡ ᠬᠦ᠌ ᠠᠪᠤᠷᠭᠤ ᠪᠦᠲᠦᠭᠡᠯ᠎ᠢ ᠮᠣᠩᠭᠤᠯ ᠵᠶ᠋ᠠᠷ ᠣᠷᠴᠢᠭᠤᠯᠤᠨ ᠭᠠᠷᠭ᠋ᠠᠬᠤ ᠶᠠᠪᠤᠳᠠᠯ ᠴᠠᠭ ᠦᠶ᠎ᠡ ᠵᠢᠨ ᠵᠠᠶ᠋ᠢᠯᠠᠰᠢ ᠦᠭᠡᠢ ᠨᠢᠭᠡᠨ ᠱᠠᠭ᠋ᠠᠷᠳᠠᠯᠭ᠎ᠠ ᠪᠣᠯᠣᠭ᠋ᠠᠳ ᠪᠣᠢ᠃
      ᠪᠢᠳᠠ 《ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ》᠎ᠢ ᠪᠠᠭᠲᠠᠭ᠋ᠠᠭᠰᠠᠨ ᠪᠠᠶ᠋ᠢᠭ᠋ᠠᠯᠢ ᠵᠢᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠰᠣᠩᠭᠤᠳᠠᠭ ᠪᠦᠲᠦᠭᠡᠯ᠎ᠤᠳ᠎ᠤᠨ ᠳᠣᠬᠠᠢ ᠰᠤᠷᠲᠠᠯᠴᠢᠯᠠᠨ ᠤᠬᠠᠭᠤᠯᠬᠤ᠎ᠪᠠᠷ ᠳᠠᠮᠵᠢᠨ ᠣᠯᠠᠨ ᠨᠡᠶ᠋ᠢᠲᠡ᠂ ᠢᠯᠠᠩᠭᠤᠶ᠎ᠠ ᠵᠠᠯᠠᠭᠤ ᠪᠠᠭ᠋ᠠᠴᠤᠳ᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠲᠡᠥᠬᠡ ᠵᠢᠨ ᠮᠡᠳᠡᠯᠭᠡ ᠵᠢᠨ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠡ ᠵᠢ ᠲᠡᠯᠡᠵᠦ᠂ ᠲᠡᠳᠡᠨ᠎ᠤ ᠰᠣᠨᠢᠷᠬᠠᠯ᠎ᠢ ᠳᠠᠶ᠋ᠢᠴᠢᠯᠠᠵᠤ᠂ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ᠎ᠤ ᠣᠶᠤᠨ ᠤᠬᠠᠭ᠋ᠠᠨ᠎ᠤ ᠠ᠋ᠭᠦᠳᠦᠨ ᠪᠦᠲᠦᠭᠡᠯᠲᠡ ᠪᠣᠯ ᠥᠨᠢ ᠠ᠋ᠭᠦᠷᠢᠳᠡ ᠵᠢᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠴᠢᠨᠠᠷ᠎ᠲᠠᠢ ᠪᠠᠶ᠋ᠢᠳᠠᠭ ᠭᠡᠳᠡᠭ᠎ᠢ ᠤᠯᠠᠮ ᠭᠦᠨᠵᠡᠭᠡᠢ ᠲᠠᠨᠢᠭᠤᠯᠵᠤ᠂ ᠣᠶᠣᠨ ᠮᠡᠳᠡᠯᠭᠡ ᠰᠢᠮᠳᠠᠨ ᠰᠤᠷᠤᠯᠴᠠᠭ᠍ᠤ ᠵᠢᠨ ᠷᠢᠳᠢ ᠰᠢᠳᠢ ᠵᠢ ᠠᠮᠢᠳᠤ ᠳᠦᠷᠰᠦᠯᠢᠭ ᠵᠶ᠋ᠠᠷ ᠣᠶ᠋ᠢᠯᠠᠭ᠋ᠠᠭᠤᠯᠵᠤ ᠪᠣᠯᠣᠨ᠎ᠠ᠃

　　　 ᠵᠡᠭᠦᠯᠲᠡ ᠲᠠᠶ᠋ᠢᠯᠪᠤᠷᠢ

    ［1］［2］ ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ᠂ ᠸᠸᠢ ᠫᠢᠩ ᠤᠷᠴᠢᠭᠤᠯᠵᠤ᠂ ᠱᠤ᠌ ᠱ᠌ᠢ ᠴᠠᠨ ᠬᠢᠨᠠᠪᠠ᠂ ᠱᠠᠨᠰᠢ ᠵᠢᠨ ᠬᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 2010᠄ 5᠂ 6
    ［3］ ᠠ᠋ᠸᠦ᠋ᠺᠯᠢᠳ᠋᠎ᠤᠨ ᠤᠭ ᠪᠢᠴᠢᠭ᠂ ᠮᠡᠳᠡᠯᠳᠦ ᠵᠢᠨ ᠮᠤᠩᠭᠤᠯᠴᠢᠯᠠᠭ᠎ᠠ ᠵᠢᠨ 《ᠤᠷᠤᠰᠢᠯ》［M］· ᠥᠪᠥᠷ ᠮᠤᠩᠭᠤᠯ᠎ᠤᠨ ᠠᠷᠠᠳ᠎ᠤᠨ ᠬᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 1986
    ［4］ ᠵᠡᠷᠭᠡᠴᠡᠭᠡ ᠱᠤᠭᠤᠮ ᠭᠡᠳᠡᠭ᠎ᠨᠢ ᠵᠡᠷᠭᠡᠴᠡᠭᠡ ᠰᠢᠯᠤᠭᠤᠨ᠎ᠢ ᠬᠡᠯᠡᠵᠦ ᠪᠠᠶ᠋ᠢᠨ᠎ᠠ
    ［5］ ᠰᠢᠯᠤᠭᠤᠨ ᠱᠤᠭᠤᠮ ᠭᠡᠳᠡᠭ᠎ᠨᠢ ᠰᠢᠯᠤᠭᠤᠨ᠎ᠢ ᠬᠡᠯᠡᠵᠦ ᠪᠠᠶ᠋ᠢᠨ᠎ᠠ
    ［6］［ᠶᠠᠫᠤᠨ］ ᠺᠠᠽᠦ᠋ᠪᠣᠵᠢ ᠲᠠᠺᠠᠶ᠋ᠢᠰᠢ᠂ ᠤᠲ᠋ᠠᠲ ᠮᠠᠼᠤᠢ᠍ᠸᠤ᠋· ᠴᠢᠩᠭᠢᠰ ᠬᠠᠭ᠋ᠠᠨ ᠬᠤᠪᠢᠯᠠᠢ ᠬᠠᠭ᠋ᠠᠨ［M］· ᠭᠦᠭᠡᠬᠤᠳᠠ᠄ ᠲᠠᠯᠭᠡᠷᠴᠤᠭᠳᠤ᠂ ᠰᠤᠳᠨᠠᠮᠳᠠᠷᠵᠠ᠂ ᠰᠠᠴᠠᠨ᠂ ᠪᠤᠶᠠᠨᠳᠠᠯᠭᠡᠷ ᠤᠷᠴᠢᠭᠤᠯᠪᠠ᠂ ᠥᠪᠥᠷ ᠮᠤᠩᠭᠤᠯ᠎ᠤᠨ ᠰᠤᠷᠭ᠋ᠠᠨ ᠬᠥᠮᠥᠵᠢᠯ᠎ᠤᠨ ᠬᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 1987᠄ 293᠂ 296-297
    ［7］［ᠫᠸᠷᠰ］ ᠷᠢᠰᠢᠳ᠋ — ᠠᠳ᠋ — ᠳ᠋ᠢᠨ ᠨᠠᠢ᠍ᠢ᠍ᠷᠠᠭᠤᠯᠪᠠ᠂ ᠰᠤᠳᠤᠷ᠎ᠤᠨ ᠴᠢᠭᠤᠯᠭ᠋ᠠᠨ［M］·［ᠮᠤᠨᠭ᠌ᠭᠤᠯ ᠤᠯᠤᠰ］ ᠰᠦᠷᠤᠨᠭ᠌ᠬᠤᠷᠯᠸ᠎ᠠ ᠮᠤᠨᠭ᠌ᠭᠤᠯᠴᠢᠯᠠᠪᠠ᠂ ᠪᠠᠯᠵᠢᠨᠢᠮ᠎ᠠ ᠪᠠᠭᠤᠯᠭ᠋ᠠᠪᠠ᠂ ᠪᠠᠭᠡᠵᠢᠩ᠄ ᠦᠨᠳᠤᠰᠤᠳᠠᠨ᠎ᠤ ᠭᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 2013᠄ 549
    ［8］ ᠫᠯᠠᠨ ᠺᠠᠷᠫᠢᠨ᠂ ᠸᠢᠯᠢᠶᠠᠮ ᠷᠤᠢ᠍ᠪᠷᠦᠢ᠍ᠭ ᠮᠤᠨᠭ᠌ᠭᠤᠯ᠎ᠳᠤ ᠵᠢᠭᠤᠯᠴᠢᠯᠠᠭᠰᠠᠨ ᠲᠡᠮᠳᠡᠭᠯᠡᠯ［M］· ᠭᠡᠷᠡᠯᠴᠤᠭᠳᠤ ᠤᠷᠴᠢᠭᠤᠯᠪᠠ᠂ ᠭᠦᠭᠡᠬᠤᠳᠠ᠄ ᠦᠪᠤᠷ ᠮᠤᠨᠭ᠌ᠭᠤᠯ᠎ᠤᠨ ᠰᠤᠷᠭ᠋ᠠᠨ ᠭᠦᠮᠦᠵᠢᠯ᠎ᠤᠨ ᠭᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 1987᠄ 100
    ［9］ ᠲᠠᠢ᠍ᠢ᠍ᠴᠢᠭᠤᠳ· ᠮᠠᠨᠰᠠᠩ ᠠ᠋ᠷᠬᠢᠯᠡᠨ ᠨᠠᠢ᠍ᠢ᠍ᠷᠠᠭᠤᠯᠪᠠ᠂ ᠮᠤᠨᠭ᠌ᠭᠤᠯ ᠦᠨᠳᠤᠰᠤᠳᠠᠨ᠎ᠤ ᠪᠦᠷᠢᠨ ᠲᠡᠦᠭᠡ （ᠲᠠᠪᠤᠳᠤᠭ᠋ᠠᠷ ᠲᠠᠪᠳᠠᠷ）［M］· ᠮᠦᠭᠳᠡᠨ᠄ ᠯᠢᠶᠤᠤᠨᠢᠩ᠎ᠤᠨ ᠦᠨᠳᠤᠰᠤᠳᠠᠨ᠎ᠤ ᠭᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 2004᠄ 228
    ［10］［13］1982 ᠤᠨ᠎ᠳᠤ ᠪᠤᠯᠤᠭᠰᠠᠨ ᠮᠤᠩᠭᠤᠯ ᠥᠨᠳᠥᠰᠥᠳᠡᠨ᠎ᠤ ᠭᠥᠨ ᠤᠬᠠᠭ᠋ᠠᠨ᠎ᠤ ᠲᠡᠤᠬᠡ ᠰᠤᠳᠤᠯᠬᠤ ᠨᠡᠶ᠋ᠢᠭᠡᠮᠯᠢᠭ ᠪᠠᠶ᠋ᠢᠭᠤᠯᠤᠭᠳᠠᠭ᠍ᠤ ᠬᠤᠷᠠᠯ ᠳᠡᠭᠡᠷ᠎ᠡ ᠳᠤᠮᠳᠠᠳᠦ ᠤᠯᠤᠰ᠎ᠤᠨ ᠠᠷᠠᠳ᠎ᠤᠨ ᠶᠡᠭᠡ ᠰᠤᠷᠭ᠋ᠠᠭᠤᠯᠢ ᠵᠢᠨ ᠭᠥᠨ ᠤᠬᠠᠭ᠋ᠠᠨ᠎ᠤ ᠰᠠᠯᠪᠤᠷᠢ ᠵᠢᠨ ᠫᠷᠤᠹᠸᠰᠰᠤᠷ᠂ ᠳᠤᠮᠳᠠᠳᠦ ᠤᠯᠤᠰ᠎ᠤᠨ ᠭᠥᠨ ᠤᠬᠠᠭ᠋ᠠᠨ᠎ᠤ ᠲᠡᠤᠬᠡ ᠵᠢᠨ ᠨᠡᠶ᠋ᠢᠭᠡᠮᠯᠢᠭ᠎ᠤᠨ ᠳᠡᠳ᠋ ᠳᠠᠷᠤᠭ᠎ᠠ ᠱ᠌ᠢ ᠵᠢᠶᠦ᠋ᠨ᠎ᠤ ᠬᠢᠭᠰᠡᠨ ᠠ᠋ᠷᠳᠡᠮ ᠰᠢᠨᠵᠢᠯᠡᠭᠡᠨ᠎ᠤ ᠢᠯᠡᠳᠭᠡᠯ᠎ᠠᠴᠠ
    ［11］ ᠳᠤᠮᠳᠠᠳᠦ ᠤᠯᠤᠰ᠎ᠤᠨ ᠪᠠᠶ᠋ᠢᠭ᠋ᠠᠯᠢ ᠵᠢᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ᠎ᠤ ᠲᠡᠤᠬᠡ ᠰᠤᠳᠤᠯᠬᠤ ᠭᠠᠵᠠᠷ᠂ ᠳᠤᠮᠳᠠᠳᠦ ᠤᠯᠤᠰ᠎ᠤᠨ ᠠ᠋ᠷᠳᠡᠨ᠎ᠤ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠲᠸᠭᠨᠢᠭ ᠮᠡᠷᠭᠡᠵᠢᠯ᠎ᠤᠨ ᠠᠮᠵᠢᠯᠳᠠ· ᠳᠤᠮᠳᠠᠳᠦ ᠤᠯᠤᠰ᠎ᠤᠨ ᠵᠠᠯᠠᠭᠤᠴᠤᠳ ᠰᠡᠳᠭᠦᠯ᠎ᠤᠨ ᠬᠤᠷᠢᠶ᠎ᠠ᠂ 1984᠄ 670
    ［12］［14］［15］ ᠶᠤᠸᠠᠨ ᠤᠯᠤᠰ᠎ᠤᠨ ᠠᠰᠲᠷᠤᠨᠤᠮᠢ ᠵᠢᠨ ᠲᠡᠥᠬᠡ ᠵᠢᠨ ᠨᠠᠪᠳᠠᠷᠠᠭ［M］· ᠴᠠᠭᠴᠢ ᠦᠭᠡᠯᠡᠳ᠂ ᠨᠢᠮ᠎ᠠ᠂ ᠤᠯᠠᠭ᠋ᠠᠨᠬᠠᠳᠠ᠄ ᠥᠪᠥᠷ ᠮᠤᠩᠭᠤᠯ᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠲᠸᠭᠨᠢᠭ ᠮᠡᠷᠭᠡᠵᠢᠯ᠎ᠤᠨ ᠬᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 1993᠄ 52᠂ 58᠂ 152
    ［16］ ᠮᠤᠩᠭᠤᠯᠴᠤᠳ᠎ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨ ᠲᠸᠭᠨᠢᠭ᠎ᠤᠨ ᠲᠡᠤᠬᠡ᠂ ᠥᠪᠥᠷ ᠮᠤᠩᠭᠤᠯ᠎ᠤᠨ ᠠᠷᠠᠳ᠎ᠤᠨ ᠬᠡᠪᠯᠡᠯ᠎ᠤᠨ ᠬᠤᠷᠢᠶ᠎ᠠ᠂ 2008

        ᠠᠵᠢᠯᠯᠠᠵᠤ ᠪᠠᠢ᠍ᠢ᠍ᠭ᠎ᠠ ᠪᠠᠢ᠍ᠢ᠍ᠭᠤᠯᠭ᠎ᠠ᠄ ᠠᠪᠠᠭ᠎ᠠ ᠬᠤᠰᠢᠭᠤᠨ᠎ᠤ ᠮᠣᠩᠭᠤᠯ ᠳᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ
                                           （ᠠᠯᠲᠠᠨᠰᠦ᠋ᠬᠡ ᠨᠠᠢ᠌ᠷᠠᠭᠤᠯᠪᠠ）
                                           2021 ᠣᠨ᠎ᠤ 2 ᠳ᠋ᠤᠭ᠋ᠠᠷ ᠬᠤᠭᠤᠴᠠᠭ᠎ᠠ