ᠰ᠊ · ᠪᠤᠶᠠᠨᠲᠣᠭᠲᠠᠬᠣ  ᠵᠣᠬᠢᠶᠠᠪᠠ

   ᠭᠣᠪᠢ᠃
   ᠦᠴᠦᠭᠡᠳᠦᠷ ᠭᠣᠪᠢ᠎ᠳᠤ ᠲᠡᠮᠡᠭᠡ᠎ᠲᠠᠢ ᠤᠷᠣᠭᠰᠠᠨ᠃ ᠮᠠᠷᠭ᠋ᠠᠰᠢ᠎ᠨᠢ ᠪᠠᠰᠠ ᠯᠠ ᠭᠣᠪᠢ᠎ᠠᠴᠠ ᠭᠠᠷᠴᠦ ᠴᠢᠳᠠᠭ᠎ᠠ ᠦᠬᠡᠢ ᠨᠠᠷᠠ ᠰᠢᠩᠭᠡᠵᠣ᠂ ᠰᠠᠷᠠ ᠮᠠᠨᠳᠣᠵᠣ᠂ ᠳᠠᠬᠢᠭ᠋ᠠᠳ ᠨᠠᠷᠠ ᠤᠷᠭᠣᠵᠣ᠂ ᠰᠠᠷᠠ ᠵᠢᠷᠭ᠋ᠠᠵᠤ ᠪᠠᠢ᠌ᠪᠠ᠃
   《ᠪᠠᠢ᠌ᠨ᠎ᠠ  ᠦᠦ？》
   《ᠪᠠᠢ᠌ᠨ᠎ᠠ！》 ᠭᠡᠵᠣ ᠭᠣᠪᠢ ᠎ᠳᠤ ᠳᠠᠭᠤᠷᠢᠰᠣᠨ᠎ᠠ᠃ ᠠᠭᠣᠯᠠ᠎ᠳᠤ ᠢᠩᠬᠢᠵᠤ ᠴᠣᠣᠷᠢᠶ᠎ᠠ ᠭᠠᠷᠳᠠᠭ᠎ᠢ ᠲᠡᠷᠡ ᠪᠤᠳᠣᠵᠣ ᠶᠠᠪᠤᠯ᠎ᠠ᠃ ᠭᠣᠪᠢ᠎ᠠᠴᠠ ᠭᠠᠷᠬᠣ ᠬᠡᠢ  ᠳᠠᠭᠤᠨ᠎ᠳᠤ ᠦᠪᠡᠷ᠎ᠠᠴᠠ  ᠪᠤᠰᠣᠳ᠎ᠨᠢ ᠲᠥᠭᠡᠷᠢᠮᠡᠷ ᠰᠠᠨᠠᠭᠳᠠᠨ᠎ᠠ ᠃
    ᠥᠩ ᠦᠷᠭᠡᠨ ᠭᠣᠪᠢ᠎ᠪᠠᠷ ᠨᠢᠭᠡ ᠯᠠ ᠦᠩᠭᠡ ᠵᠢᠨ ᠬᠥᠬᠡ ᠴᠢᠯᠠᠭᠤᠳ᠎ᠢ ᠰᠠᠴᠣᠭᠰᠠᠨ ᠮᠡᠳᠦ ᠰᠠᠷᠳᠢᠭ ᠰᠢᠭᠢᠣᠡᠷᠠᠩᠬᠡᠨ ᠦᠷᠭᠦᠯᠵᠢᠯᠡᠨ᠎ᠡ᠃ ᠶᠡᠬᠡ ᠭᠣᠪᠢ ᠵᠢᠨ ᠭᠦᠨ ᠬᠦᠨᠳᠡᠢ᠎ᠳᠤ  ᠤᠷᠭᠣᠮᠠᠯ ᠬᠠᠷᠠᠬᠳᠠᠬᠣ ᠦᠬᠡᠢ ᠰᠠᠷᠳᠢᠭ᠎ᠲᠠᠢ ᠪᠤᠷᠣ ᠬᠦᠳᠡᠭᠡ ᠵᠢ ᠬᠠᠷᠠᠵᠣ ᠶᠠᠪᠤᠬᠣ ᠭᠡᠭᠴᠢ ᠨᠢᠳᠦ ᠬᠤᠭᠤᠰᠣᠳᠠᠨ᠎ᠠ᠃ ᠵᠣᠨ ᠴᠦ᠍ ᠡᠢ᠌ᠮᠦ᠂ ᠡᠪᠣᠯ ᠴᠦ᠍ ᠡᠢ᠌ᠮᠦ᠂ ᠳᠠᠷᠠᠭ᠎ᠠ᠎ᠪᠠᠷ ᠢᠷᠡᠬᠦ᠎ᠳᠤ ᠪᠠᠰᠠ ᠯᠠ ᠬᠡᠪ ᠵᠶ᠋ᠠᠷ ᠵᠶ᠋ᠡᠨ ᠪᠠᠢ᠌ᠳᠠᠭ ᠠᠮᠢ ᠦᠭᠡᠢ ᠤᠷᠴᠢᠯᠠᠩ᠎ᠤᠨ ᠰᠡᠮᠡᠷᠬᠡᠢ ᠭᠡᠮᠡᠷ ᠨᠢᠳᠣᠨ᠎ᠳᠤ ᠬᠠᠷᠠᠭᠳᠠᠵᠣ ᠬᠤᠴᠣᠷᠣᠭᠰᠠᠨ ᠪᠦᠬᠦᠨ ᠎ᠢ ᠠᠭ᠋ᠠᠷ ᠭᠡᠷᠡᠯ ᠬᠤᠶᠠᠷ ᠲᠡᠯᠠᠨ ᠨᠢᠭᠡ ᠯᠠ ᠬᠥᠭ ᠵᠶ᠋ᠡᠷ ᠬᠠᠭᠤᠷᠠᠢ᠎ᠪᠠᠷ  ᠠᠮᠢᠰᠬᠤᠯᠯᠠᠨ᠎ᠠ ᠂ ᠲᠤᠮᠣᠭ᠎ᠠ ᠦᠭᠡᠢ ᠬᠡᠦᠬᠡᠳ ᠭᠠᠵᠠᠷ ᠲᠡᠭᠷᠢ ᠵᠢᠨ  ᠲᠡᠭ ᠲᠤᠮᠳᠠᠭᠣᠷ ᠎ᠨᠢ ᠱᠤᠭᠣᠮ ᠲᠠᠲᠠᠵᠣ ᠵᠢᠷᠦᠵᠣ ᠲᠠᠯᠪᠢᠭᠰᠠᠨ ᠰᠢᠭ᠋ ᠴᠡᠯᠡᠢ᠌ᠨ᠎ᠠ᠃  ᠭᠤᠨᠢᠭ ᠲᠠᠢ᠌ᠪᠤᠰᠢᠷᠠᠯ᠎ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠬᠤᠮᠠᠬᠢ ᠵᠢᠨ ᠲᠡᠳᠦᠢ ᠴᠦ᠍ ᠭ᠋ᠬᠢᠷ ᠦᠭᠡᠢ ᠬᠥᠪ ᠬᠥᠬᠡ ᠲᠡᠭᠷᠢ᠂  ᠡᠨᠡ ᠬᠦ᠌ ᠬᠥᠯ ᠦᠬᠡᠢ ᠠᠭᠣᠵᠢᠷᠬᠠᠨ ᠴᠡᠯᠡᠮᠡᠢ᠌ᠭᠰᠡᠨ ᠭᠣᠪᠢ ᠵᠢᠨ ᠬᠦᠨᠳᠡᠢ ᠯᠠ ᠤᠷᠴᠢᠯᠠᠩ᠎ᠤᠨ ᠬᠢᠵᠠᠭ᠋ᠠᠷ ᠦᠭᠡᠢ ᠵᠢ ᠲᠠᠨᠢᠭᠣᠯᠣᠨ᠎ᠠ᠃ ᠵᠢᠷᠦᠬᠡ ᠰᠡᠳᠭᠢᠯ᠎ᠳᠤ ᠨᠠᠯᠠᠭᠰᠠᠨ ᠪᠦᠬᠦᠨ ᠲᠡᠭᠷᠢ ᠭᠠᠵᠠᠷ ᠬᠤᠶᠠᠷ᠎ᠠᠴᠠ ᠦᠷᠰᠢᠶ᠎ᠡ （ᠦᠬᠡᠷ᠎ᠡ） ᠲᠠᠭ ᠬᠣᠭᠣᠰᠣᠨ ᠵᠠᠢ ᠲᠡᠳᠦᠢ ᠬᠠᠷᠠᠭᠳᠠᠭᠣᠯᠳᠠᠭ ᠪᠤᠯᠬᠣᠷ ᠨᠢᠭᠡ ᠯᠠ ᠤᠢ᠌ᠳᠬᠠᠷ᠎ᠲᠠᠢ ᠰᠠᠨᠠᠭᠳᠠᠳᠠᠭ᠎ᠢ ᠬᠦᠮᠦᠰ ᠭᠣᠪᠢ ᠭᠡᠵᠣ ᠶᠠᠷᠢᠳᠠᠭ ᠶᠤᠮ ᠪᠢᠵᠡ ᠦᠦ？ ᠲᠡᠭᠡᠬᠦ ᠲᠤᠳᠣᠮ 《ᠭᠣᠪᠢ ᠪᠠᠢ᠌ᠳᠠᠭ ᠰᠢᠭ᠋ ᠪᠠᠢ᠌ᠭ᠎ᠠ ᠶᠠᠩᠵᠣ᠎ᠪᠠᠷ ᠵᠶ᠋ᠡᠨ ᠪᠠᠢ᠌ᠵᠤ ᠯᠠ ᠪᠠᠢ᠌ᠨ᠎ᠠ》 ᠭᠡᠳ ᠬᠠᠯᠢᠷᠠᠵᠣ ᠰᠢᠨᠳᠠᠷᠠᠬᠣ ᠦᠬᠡᠢ ᠮᠡᠲᠦ ᠬᠠᠷᠠᠭ᠋ᠠᠨ᠎ᠤ ᠦᠵᠦᠭᠦᠷ ᠰᠣᠨᠣᠭ᠋ᠠᠳ ᠪᠠᠢ᠌ᠯ᠎ᠠ᠃ 
   ᠨᠠᠷᠠ᠎ᠠᠴᠠ ᠬᠠᠮᠣᠭ ᠣᠢ᠌ᠷᠠᠬᠠᠨ ᠪᠠᠢ᠌ᠬᠣ ᠲᠡᠷᠡ ᠬᠦᠮᠦᠨ ᠲᠡᠮᠡᠭᠡᠨ ᠳᠡᠭᠡᠷ᠎ᠡ ᠥᠩ ᠦᠷᠭᠡᠨ ᠭᠣᠪᠢ ᠵᠢ ᠲᠤᠭᠣᠯᠣᠨ ᠵᠢᠳᠬᠦᠨ᠎ᠡ᠃ ᠤᠯᠠᠭ᠎ᠠ ᠪᠤᠲᠠᠷᠠᠭᠰᠠᠨ ᠭᠣᠪᠢ ᠵᠢᠨ ᠭᠣᠣᠯ᠎ᠳᠤ᠎ᠪᠠᠨ ᠵᠣᠣᠬ᠎ᠠ ᠰᠢᠭ᠋ ᠬᠠᠯᠠᠵᠣ ᠡᠬᠢᠯᠡᠪᠡ᠃   ᠰᠢᠷᠠᠭᠳᠠᠵᠤ ᠪᠠᠢ᠌ᠬᠣ ᠰᠢᠭ᠋ ᠲᠡᠮᠡᠭᠡ ᠠᠩᠭ᠋ᠠᠰᠣᠨ ᠲᠡᠮᠡᠣᠯᠬᠦ᠎ᠳᠤ ᠲᠤᠯᠤᠭ᠋ᠠᠢ ᠵᠢᠨ ᠤᠷᠣᠢ ᠳᠡᠭᠡᠷ᠎ᠡ᠎ᠠᠴᠠ ᠨᠠᠷᠠ ᠶᠠᠭ ᠯᠠ ᠡᠭᠴᠡᠯᠡᠨ ᠲᠣᠰᠴᠦ ᠢᠯᠢᠭᠦᠷ᠎ᠤᠨ ᠣᠯᠨ᠎ᠪᠠᠷ  ᠬᠠᠭ᠋ᠠᠷᠢᠬᠤ ᠮᠡᠳᠦ  ᠪᠦᠭᠴᠢᠮ ᠬᠠᠯᠠᠭᠣᠨ᠎ᠢ ᠲᠡᠰᠪᠦᠷᠢᠯᠡᠬᠦᠶ᠎ᠡ ᠪᠡᠷᠬᠡ᠃ ᠰᠠᠯᠬᠢ ᠴᠦ᠍ ᠦᠭᠡᠢ ᠂ ᠵᠢᠪᠠᠷ ᠴᠦ᠍ ᠦᠭᠡᠢ ᠨᠠᠮ ᠵᠢᠮ᠂  ᠣᠨᠲᠠᠵᠣ ᠪᠠᠢ᠌ᠮᠠᠷ ᠠᠮᠢᠲᠠᠨ ᠭᠤᠤᠯᠲᠠᠨ ᠦᠷᠭᠦᠮᠡᠷ ᠡᠵᠠᠬᠦᠢ ᠵᠡᠯᠢᠭᠦᠳ᠂ ᠬᠠᠮᠢᠭ᠋ᠠᠰᠢ ᠎ᠪᠠᠨ ᠬᠠᠷᠠᠭᠰᠠᠨ ᠴᠦ᠍ ᠵᠦᠭ ᠴᠢᠭ ᠠᠯᠳᠠᠮᠠᠷ ᠠᠪ ᠠᠳᠠᠯᠢᠬᠠᠨ ᠦᠩᠭᠡ᠎ᠲᠠᠢ ᠬᠦᠨᠳᠡᠢ ᠠᠭᠣᠳᠠᠮ ᠪᠣᠯᠬᠣᠷ ᠡᠨᠳᠡ ᠠᠮᠢᠲᠠᠨ ᠭᠤᠤᠯᠲᠠᠨ ᠤᠷᠣᠰᠢᠵᠤ  ᠪᠠᠢ᠌ᠭ᠎ᠠ ᠭᠡᠵᠣ ᠬᠡᠯᠡᠵᠣ ᠴᠢᠳᠠᠮᠠᠷ ᠦᠬᠡᠢ ᠦᠶᠡᠷ᠎ᠲᠤ ᠵᠣᠭᠰᠣᠵᠣ ᠪᠠᠢ᠌ᠬᠤ ᠰᠢᠭ᠋ ᠲᠤᠯᠤᠭ᠋ᠠᠢ ᠡᠷᠭᠢᠨ᠎ᠡ᠃ ᠬᠦᠮᠦᠨ ᠠᠮᠢᠲᠠᠨ᠎ᠤ ᠲᠠᠭᠣᠨ᠎ᠨᠢ ᠲᠠᠰᠣᠷᠠᠭᠰᠠᠨ ᠬᠥᠯ᠎ᠤᠨ ᠮᠦᠷ ᠪᠠᠯᠠᠷᠰᠢᠭᠰᠠᠨ ᠬᠠᠭᠤᠷᠠᠢ ᠭᠣᠪᠢ ᠡᠢ᠌ᠮᠦ ᠯᠠ ᠶᠠᠩᠵᠣ᠎ᠪᠠᠷ ᠨᠠᠷᠠᠨ᠎ᠳᠤ ᠬᠠᠬᠰᠠᠭᠰᠠᠨ ᠴᠢᠯᠠᠭᠤ ᠣᠯᠠᠢ᠌ᠰᠴᠦ᠂ ᠬᠥᠯ ᠲᠤᠤᠷ᠎ᠠ᠎ᠠᠴᠠ ᠴᠣᠭ ᠭᠢᠰᠬᠢᠵᠣ ᠶᠠᠪᠤᠭ᠎ᠠ ᠮᠡᠲᠦ ᠲᠡᠭᠦᠬᠡᠢ ᠬᠦᠯᠦᠰᠦ ᠪᠡᠶᠡᠨ᠎ᠠᠴᠠ ᠨᠡᠪᠲᠡᠷᠡᠵᠦ ᠬᠠᠮᠠᠷ᠎ᠲᠤ ᠣᠲᠣᠭ᠎ᠠ ᠦᠨᠦᠷᠲᠣᠨ᠎ᠡ᠃ ᠬᠢᠵᠠᠭ᠋ᠠᠷ ᠦᠬᠡᠢ ᠦᠷᠭᠡᠨ ᠬᠦᠨᠳᠡᠢ ᠵᠢ ᠲᠣᠭᠣᠯᠣᠨ ᠲᠣᠭᠣᠯᠲᠠᠯ᠎ᠠ 《ᠲᠠᠮᠤ》᠎ᠳᠤ ᠰᠢᠷᠭᠣᠯ᠎ᠠ ᠯᠠ ᠭᠡᠵᠣ ᠮᠠᠳᠡ᠃ ᠲᠡᠰᠪᠤᠷᠢ ᠭᠡᠳᠡᠭ᠎ᠢ ᠰᠢᠯᠭ᠋ᠠᠳᠠᠭ ᠭᠠᠭᠴᠠ ᠭᠠᠵᠠᠷ ᠴᠢᠨᠢ ᠶᠤᠰᠣᠲᠠᠢ ᠲᠡᠨᠳᠡ ᠪᠠᠢ᠌ᠨ᠎ᠠ ᠭᠡᠵᠣ ᠬᠦᠳᠡᠭᠡ ᠵᠢᠨ ᠬᠦᠮᠦᠰ ᠶᠠᠷᠢᠳᠠᠭ᠃ ᠬᠤᠷ᠎ᠠ  ᠲᠣᠨᠣᠳᠠᠰᠤ ᠴᠢᠬᠢᠭ ᠨᠤᠢ᠌ᠲᠠᠨ ᠪᠤᠯᠠᠭ ᠱᠠᠩᠲᠠ᠂ ᠡᠪᠡᠰᠦ ᠤᠷᠭᠣᠮᠠᠯ ᠪᠤᠲᠠ ᠪᠤᠷᠭ᠋ᠠᠰᠣ᠂ ᠠᠭᠣᠯᠠ ᠬᠠᠳᠠ ᠤᠢ ᠲᠠᠢ᠌ᠭ᠎ᠠ ᠥᠭᠡᠷ᠎ᠡ ᠥᠭᠡᠷ᠎ᠡ ᠵᠢᠨ ᠦᠩᠭᠡ᠎ᠲᠠᠢ ᠪᠠᠶᠠᠨ ᠪᠠᠢ᠌ᠭ᠋ᠠᠯᠢ ᠦᠷᠡᠵᠢᠯ ᠲᠦᠭᠡᠮᠡᠯ ᠬᠠᠷᠠᠭᠳᠠᠬᠣ ᠎ᠳᠤ ᠡᠨᠡ ᠬᠦᠨᠳᠡᠢ᠎ᠳᠤ ᠰᠡᠷᠢᠭᠦᠴᠡᠴᠢᠬᠡᠮᠡᠷ ᠰᠡᠭᠦᠳᠡᠷ ᠲᠣᠰᠬᠣ ᠭᠠᠵᠠᠷ ᠶᠠᠭ ᠣᠯᠳᠠᠬᠣ ᠦᠬᠡᠢ ᠲᠠᠭ᠎ᠠ ᠦᠬᠡᠢ ᠴᠦ᠍ ᠭᠡᠰᠡᠨ ᠲᠤᠭᠤᠯᠵᠣ ᠯᠠ ᠲᠠᠭ᠋ᠠᠷᠠᠨ᠎ᠠ᠃ ᠲᠤᠭᠤᠯᠵᠣ ᠭᠠᠷᠬᠣ᠎ᠠᠴᠠ ᠲᠤᠭᠤᠷᠢᠵᠣ ᠭᠠᠷᠴᠦ ᠴᠢᠳᠠᠳᠠᠭ ᠦᠭᠡᠢ ᠳᠠᠪᠠᠭ᠎ᠠ ᠲᠡᠷᠡ ᠮᠦᠨ ᠳ᠋ᠠ᠃ ᠲᠡᠨᠳᠡ ᠮᠠᠭᠤᠵᠢᠷᠠᠭ᠋ᠠᠳ ᠤᠢ᠌ᠴᠢᠯ᠎ᠠ ᠭᠡᠬᠦ᠎ᠳᠤ ᠪᠤᠰᠴᠦ ᠴᠢᠳᠠᠬᠣ ᠦᠬᠡᠢ ᠪᠣᠯ ᠬᠠᠲᠠᠭᠰᠠᠨ ᠭᠦᠵᠡᠭᠡ ᠰᠢᠭ ᠪᠣᠷᠴᠠ ᠪᠤᠯᠬᠣ᠎ᠠᠴᠠ ᠠᠯᠵᠠᠰᠢ ᠦᠭᠡᠢ ᠵᠢ ᠶᠠᠭ᠋ᠠᠬᠢᠶ᠎ᠠ  ᠭᠡᠬᠦ ᠪᠣᠢ？ ᠠᠵᠠ ᠮᠡᠳᠡᠭᠰᠡᠨ ᠣᠴᠢᠷ ᠶᠤᠮ᠃
    ᠲᠡᠮᠡᠭᠡ᠎ᠲᠠᠢ ᠬᠦᠮᠦᠨ ᠶᠠᠪᠤᠭ᠋ᠠᠳ ᠪᠠᠢ᠌ᠯ᠎ᠠ᠃ ᠲᠤᠬᠤᠮ᠎ᠤᠨ ᠴᠢᠨᠡᠭᠡᠨ ᠡᠭᠦᠯᠡ ᠬᠦᠷᠲᠡᠯ᠎ᠡ ᠵᠠᠯᠬᠠᠭᠣᠷᠠᠭᠰᠠᠨ ᠮᠡᠲᠦ  ᠲᠡᠨᠡᠭᠦᠨ᠎ᠳᠤ᠎ᠪᠠᠨ ᠶᠠᠳᠠᠷᠠᠭᠰᠠᠨ ᠰᠢᠨᠵᠢ᠎ᠲᠠᠢ ᠨᠢᠭᠡ ᠲᠠᠰᠣᠷᠠᠭ᠋ᠠᠳ ᠨᠢᠭᠡ ᠬᠤᠷᠠᠭ᠋ᠠᠳ ᠡᠳᠦᠷ᠎ᠤᠨ ᠵᠠᠮ ᠳᠥᠬᠦᠬᠦ ᠦᠭᠡᠢ ᠰᠠᠨᠠᠭᠳᠠᠨ᠎ᠠ᠃ ᠰᠢᠲᠠᠮ᠎ᠠ ᠨᠠᠷᠠᠨ᠎ᠳᠤ ᠳᠡᠩᠳᠡᠭᠦᠦ ᠵᠦᠳᠡᠷᠡᠵᠦ ᠲᠡᠭᠦᠨ᠎ᠤ ᠴᠢᠰᠦ᠎ᠨᠢ ᠬᠦᠭᠡᠷᠴᠦ ᠲᠤᠯᠤᠭ᠋ᠠᠢ ᠎ᠨᠢ ᠡᠷᠭᠢᠨ᠎ᠡ᠃   ᠲᠡᠷᠡ ᠮᠠᠨᠢ  ᠵᠢᠳᠬᠦᠭᠡᠳ ᠪᠠᠢ᠌ᠯ᠎ᠠ᠃ ᠬᠠᠲᠠᠵᠣ ᠬᠠᠯᠠᠵᠤ ᠶᠠᠪᠤᠭ᠋ᠠᠳ ᠰᠡᠭᠦᠳᠡᠷ᠎ᠲᠠᠢ ᠠᠮᠢᠲᠠᠨ᠎ᠠᠴᠠ ᠭᠠᠭᠴᠠ ᠬᠤᠶᠠᠷ ᠬᠤᠯᠠᠨ ᠵᠢᠷᠦᠭ᠎ᠠ  （ᠭᠣᠪᠢ ᠵᠢᠨ ᠰᠢᠪᠠᠭᠣ）᠎ᠲᠠᠢ ᠵᠠᠮ᠎ᠳᠤ ᠲᠠᠭ᠋ᠠᠷᠠᠯᠳᠤᠪᠠ᠃ ᠨᠣᠬᠠᠢ ᠳᠣᠯᠢᠶᠠᠬᠣ ᠡᠭᠦᠯᠨ ᠦᠬᠡᠢ ᠨᠢᠴᠦᠭᠦᠨ ᠬᠦᠳᠡᠭᠡ᠎ᠳᠤ ᠬᠠᠯᠠᠭ᠋ᠠᠳ ᠲᠡᠰᠬᠦ ᠦᠬᠡᠢ ᠎ᠳᠤ᠎ᠪᠠᠨ ᠲᠡᠮᠡᠭᠡᠨ᠎ᠠᠴᠠ᠎ᠪᠠᠨ ᠪᠠᠭᠤᠭ᠋ᠠᠳ ᠰᠡᠷᠢᠭᠦᠴᠡᠨ᠎ᠡ᠃ ᠬᠣᠯᠠ ᠭᠠᠵᠠᠷ᠎ᠢ ᠡᠪᠬᠡᠵᠣ ᠢᠷᠡᠭᠰᠡᠨ ᠣᠨᠣᠭ᠎ᠠ ᠰᠠᠯᠲᠠᠭ᠋ᠠᠨ᠎ᠳᠤ᠎ᠪᠠᠨ ᠬᠠᠪᠴᠢᠵᠣ ᠶᠠᠪᠤᠭᠰᠠᠨ ᠳᠠᠪᠤᠰᠠᠩ ᠵᠶ᠋ᠠᠨ ᠲᠠᠢ᠌ᠪᠤᠭᠤᠬᠠᠨ ᠰᠣᠯᠠᠳᠬᠠᠵᠣ ᠬᠡᠳᠦᠨ ᠰᠢᠷᠬᠡᠭ ᠨᠣᠭᠣᠭ᠋ᠠᠨ ᠠᠷᠭ᠋ᠠᠯ ᠤᠨᠠᠭ᠋ᠠᠪᠠ᠃  ᠲᠡᠮᠡᠭᠡᠨ᠎ᠤ ᠬᠡᠪᠢᠯᠭᠡ ᠵᠢᠨ ᠨᠣᠭᠣᠭ᠋ᠠᠨ᠎ᠤ ᠬᠤᠷᠴᠠ ᠦᠨᠦᠷ ᠬᠠᠩᠬᠣᠯᠵᠣ ᠵᠢᠪᠠᠷ ᠲᠤᠤᠷ᠎ᠠ᠎ᠠᠴᠠ ᠢᠯᠠᠭ᠎ᠠ ᠪᠠᠲᠠᠭ᠋ᠠᠨ᠎ᠠ ᠬᠤᠷᠠᠨ ᠴᠣᠭᠯᠠᠭ᠋ᠠᠳ ᠨᠣᠭᠣᠭ᠋ᠠᠨ ᠠᠷᠭ᠋ᠠᠯ᠎ᠢ ᠲᠣᠭᠣᠷᠢᠵᠣ ᠦᠩᠭᠢᠨᠡᠨ᠎ᠠ᠃ ᠲᠡᠷᠡ ᠬᠡᠳᠦ ᠪᠠᠶᠠᠷᠯᠠᠵᠣ ᠬᠦᠭᠡᠷᠦᠭᠰᠡᠨ ᠰᠡᠳᠭᠢᠯᠭᠡ᠎ᠪᠠᠨ ᠲᠠᠲᠠᠵᠣ ᠶᠠᠳᠠᠨ ᠪᠦᠷ ᠴᠣᠭ ᠵᠢᠪᠬᠤᠭ᠎ᠠ᠎ᠲᠠᠢ ᠨᠢᠰᠴᠦ ᠬᠠᠷᠠᠭᠳᠠᠨ᠎ᠠ᠃ ᠵᠠᠷᠢᠮ᠎ᠨᠢ ᠬᠦᠮᠦᠨ ᠰᠢᠭ ᠨᠢᠭᠡᠨ ᠨᠢᠭᠡᠨ ᠵᠶ᠋ᠡᠨ ᠲᠡᠪᠡᠷᠢᠭᠡᠳ ᠠᠪᠤᠨ᠎ᠠ᠃ ᠪᠠᠰᠠ ᠨᠢᠭᠡ ᠬᠤᠶᠠᠷ᠎ᠨᠢ ᠳᠣᠮᠳᠠ᠎ᠪᠠᠨ ᠵᠤᠳᠣᠷᠠᠯᠳᠠᠵᠣ ᠪᠠᠢ᠌ᠬᠣ ᠶᠠᠩᠵᠣᠳᠠᠢ ᠨᠣᠢ᠌ᠲᠠᠨ ᠠᠷᠭ᠋ᠠᠯ᠎ᠤᠨ ᠳᠡᠭᠡᠷ᠎ᠡ ᠰᠠᠭᠣᠬᠣ ᠵᠠᠪ ᠦᠭᠡᠢ ᠨᠢᠰᠴᠦ ᠲᠤᠭᠤᠷᠢᠭ᠋ᠠᠳ ᠴᠠᠭᠳᠠᠨ ᠪᠠᠢ᠌ᠯ᠎ᠠ᠃ ᠨᠢᠭᠡ ᠠᠮᠢᠲᠠᠨ ᠰᠦᠷᠲᠡᠢ ᠳᠠᠭᠣ ᠭᠠᠷᠭ᠋ᠠᠵᠣ ᠲᠡᠷᠭᠡᠳᠡ᠎ᠨᠢ ᠢᠷᠡᠪᠠ᠃ ᠶᠠᠭᠤ ᠪᠠᠢ᠌ᠨ᠎ᠠ ᠭᠡᠵᠣ ᠰᠠᠨᠠᠨ᠎ᠠ？ ᠶᠠᠭ᠋ᠠᠨ ᠰᠣᠭᠣ᠎ᠨᠢ ᠬᠦᠪᠬᠡᠯᠵᠡᠭᠰᠡᠨ ᠬᠠᠪᠲᠠᠭ᠋ᠠᠢ ᠪᠤᠷᠣ ᠲᠤᠯᠣᠭ᠋ᠠᠢ᠎ᠲᠠᠢ ᠬᠣᠨᠢᠨ ᠬᠦᠷᠪᠡᠯ ᠨᠤᠭᠣᠭ᠋ᠠᠨ ᠠᠷᠭ᠋ᠠᠯ ᠎ᠤᠨ ᠳᠡᠷᠭᠡᠳᠡ ᠤᠳᠣᠵᠣ ᠢᠷᠡᠭᠡᠳ᠂ ᠶᠠᠮᠠᠷ ᠴᠦ᠍  ᠡᠷᠡᠭᠡ ᠵᠢᠨᠵᠠᠢ ᠦᠬᠡᠢ ᠴᠡᠭᠡᠵᠢ᠎ᠪᠠᠨ ᠡᠷᠭᠦᠨ᠂ ᠰᠡᠭᠦᠯ ᠵᠶ᠋ᠡᠨ ᠵᠣᠭᠣᠰᠯᠠᠵᠣ᠂ ᠶᠠᠭᠣ ᠨᠢᠭᠡ ᠵᠢ ᠲᠠᠰᠢᠭᠣᠷᠳᠠᠬᠣ᠎ᠪᠠᠷ ᠪᠡᠯᠡᠨ ᠪᠠᠢ᠌ᠮᠠᠷ ᠤᠮᠣᠭ᠎ᠲᠠᠢ ᠬᠠᠷᠠᠭᠳᠠᠨ᠎ᠠ᠃ ᠰᠡᠭᠦᠯ ᠴᠠᠭ᠋ᠠᠷᠢᠭᠯᠠᠭᠰᠠᠨ ᠡᠨᠡ ᠬᠦᠭᠡᠷᠦᠬᠦᠨ ᠠᠮᠢᠲᠠᠨ ᠲᠡᠮᠡᠭᠡᠨ᠎ᠠᠴᠠ ᠦᠨᠳᠦᠷ ᠨᠢᠰᠳᠡᠭ ᠠᠮᠢᠲᠠᠨ᠎ᠢ ᠭᠠᠵᠠᠷ ᠪᠠᠭᠤᠬᠣ᠎ᠳᠤ ᠴᠢᠳᠠᠵᠣ ᠤᠷᠬᠢᠳᠠᠭ ᠭᠦᠭ᠎ᠤᠨ ᠠᠮᠢᠲᠠᠨ ᠶᠤᠮ᠃ ᠰᠦᠷᠳᠡᠭᠦᠯᠦᠯ᠎ᠳᠤ ᠣᠴᠠᠷᠠᠭᠰᠠᠨ ᠢᠯᠠᠭ᠎ᠠ ᠪᠠᠲᠠᠭ᠋ᠠᠨ᠎ᠠ ᠨᠢᠭᠡ ᠮᠡᠳᠡᠬᠦ᠎ᠳᠤ ᠪᠦᠷ ᠨᠢᠰᠴᠦ ᠠᠯᠠᠭ᠎ᠠ ᠪᠤᠯᠪᠠ᠃ ᠬᠡᠳᠦᠨ ᠡᠳᠦᠷ ᠠᠮᠢ᠎ᠲᠠᠢ ᠭᠣᠣᠯ᠎ᠲᠠᠢ᠎ᠠᠴᠠ ᠲᠡᠮᠡᠭᠡ᠎ᠲᠠᠢ ᠬᠤᠶᠠᠭᠣᠯᠠᠬᠠᠨ ᠶᠠᠪᠤᠵᠣ ᠢᠷᠡᠭᠰᠡᠨ ᠲᠡᠷᠡ᠎ᠪᠠᠷ ᠲᠡᠷᠭᠡᠳᠡ᠎ᠨᠢ ᠨᠢᠰᠴᠦ ᠢᠷᠡᠭᠰᠡᠨ᠂ ᠮᠦᠯᠬᠦᠵᠦ ᠢᠷᠡᠭᠰᠡᠨ ᠠᠮᠢᠲᠠᠨ᠎ᠢ ᠵᠦᠩᠳᠡᠭᠡᠨ ᠭᠠᠢ᠌ᠬᠠᠪᠠ᠃ ᠬᠦᠳᠡᠭᠡ ᠵᠢᠨ ᠬᠤᠨᠢᠨ ᠭᠦᠷᠪᠡᠯ ᠪᠦᠭᠡᠷᠡᠭ ᠪᠤᠲᠠ ᠬᠡᠷᠦᠭᠡᠳ ᠳᠠᠪᠬᠢᠵᠣ ᠯᠠ ᠪᠠᠢ᠌ᠳᠠᠭ᠃ ᠡᠯᠡᠰᠣᠨ ᠎ᠤ ᠬᠤᠨᠢᠨ ᠭᠦᠷᠪᠡᠯ ᠪᠠᠶ᠎ᠡ᠎ᠪᠠᠷ ᠠᠷᠠᠢ ᠲᠤᠮᠤ ᠭᠡᠳᠡᠰᠦ᠎ᠨᠢ ᠪᠦᠳᠦᠭᠦᠨ ᠪᠠᠢ᠌ᠳᠠᠭ ᠳ᠋ᠠ᠃ ᠭᠣᠪᠢ ᠵᠢᠨ ᠬᠤᠨᠢᠨ ᠬᠦᠷᠪᠡᠯ ᠨᠥᠭᠦᠭᠡ ᠬᠤᠶᠠᠷ ᠵᠶ᠋ᠠᠨ ᠪᠤᠳᠣᠪᠠᠯ  ᠰᠣᠢ᠌ᠭᠰᠠᠨ ᠮᠣᠷᠢ ᠰᠢᠭ᠋ ᠠᠷᠠᠢ ᠨᠠᠷᠢᠨ ᠤᠷᠲᠦ ᠪᠠᠶ᠎ᠡ᠎ᠲᠠᠢ ᠬᠤᠷᠴᠠ ᠱᠠᠯᠠᠮᠠᠭ᠋ᠠᠢ ᠬᠦᠶᠦᠳᠡᠯ᠎ᠲᠠᠢ ᠬᠠᠷᠠᠭᠳᠠᠨ᠎ᠠ᠃ ᠬᠡᠦᠬᠡᠳ ᠪᠠᠢ᠌ᠬᠣ᠎ᠳᠤ ᠰᠡᠭᠦᠯ᠎ᠢ᠎ᠨᠢ ᠲᠠᠰᠣᠳᠠᠭ᠋ᠠᠳ ᠬᠠᠶᠠᠬᠣ᠎ᠳᠤ ᠰᠡᠭᠦᠯ᠎ᠨᠢ ᠦᠰᠦᠷᠦᠭᠡᠳ ᠬᠣᠴᠣᠷᠳᠠᠭ᠃ ᠶᠠᠷᠦ᠎ᠠᠴᠠ ᠡᠳᠡᠭᠡᠷ ᠠᠮᠢᠲᠠᠳ᠎ᠢ ᠲᠤᠭᠤᠵᠣ ᠬᠠᠷᠠᠳᠠᠭ ᠦᠬᠡᠢ ᠪᠠᠢ᠌ᠭᠰᠠᠨ᠎ᠠᠴᠠ ᠭᠠᠢ᠌ᠬᠠᠭᠰᠠᠨ ᠨᠢᠳᠦ᠎ᠪᠠᠷ ᠰᠢᠷᠲᠡᠨ ᠡᠷᠡᠦ᠎ᠪᠠᠨ ᠢᠯᠢᠪᠠ᠃ ᠬᠤᠨᠢᠨ ᠬᠦᠷᠪᠡᠯ ᠦᠨᠳᠡᠯᠵᠡᠵᠦ ᠶᠠᠭᠣᠮ᠎ᠠ ᠬᠠᠢ᠌ᠵᠣ ᠪᠠᠢ᠌ᠯ᠎ᠠ᠃ ᠲᠣᠭᠣᠯᠵᠣ ᠭᠠᠷᠣᠰᠢ ᠦᠬᠡᠢ ᠭᠣᠪᠢ ᠲᠠᠯ᠎ᠠ ᠵᠢ ᠢᠯᠠᠭ᠎ᠠ ᠪᠠᠲᠠᠭ᠋ᠠᠨ᠎ᠠ ᠠᠮᠢᠳᠦᠷᠠᠵᠣ ᠪᠠᠢ᠌ᠳᠠᠭ᠎ᠲᠤ ᠰᠣᠨᠢᠷᠬᠠᠯ ᠲᠦᠷᠦᠪᠡ᠃  ᠢᠯᠠᠭ᠎ᠠ ᠪᠠᠲᠠᠭ᠋ᠠᠨ᠎ᠠ ᠬᠡᠳᠦᠢ᠌ᠨ ᠬᠤᠨᠢᠨ ᠬᠦᠷᠪᠡᠯ ᠦᠰᠦᠷᠦᠭᠡᠳ ᠬᠦᠷᠬᠦ ᠦᠬᠡᠢ ᠲᠡᠮᠡᠭᠡᠨ᠎ᠤ ᠲᠤᠯᠣᠭ᠋ᠠᠢ ᠵᠢᠨ ᠬᠠᠪᠢ᠎ᠪᠠᠷ ᠡᠷᠭᠢᠯᠳᠦᠨ ᠪᠠᠢ᠌ᠨ᠎ᠠ᠃ ᠪᠠᠢ᠌ᠨ ᠪᠠᠢ᠌ᠨ ᠲᠡᠮᠡᠭᠡᠨ᠎ᠤ ᠪᠤᠷᠣ ᠨᠢᠳᠦᠨ᠎ᠤ ᠵᠣᠪᠬᠢᠨ᠎ᠳᠤ ᠨᠢᠰᠴᠦ ᠪᠠᠭᠣᠭ᠋ᠠᠳ ᠥᠭᠯᠢᠭᠡ ᠵᠢᠨ ᠡᠵᠠᠨ᠎ᠨᠢ ᠪᠠᠢ᠌ᠨ᠎ᠠ ᠭᠡᠵᠣ ᠠᠮᠣᠷ ᠵᠠᠶᠠᠭ᠎ᠠ ᠦᠵᠡᠭᠦᠯᠬᠦ ᠦᠭᠡᠢ ᠯᠣᠣᠬ᠎ᠠ᠎ᠲᠠᠢ ᠨᠢᠯᠪᠤᠰᠣᠨ᠎ᠠᠴᠠ ᠤᠮᠳᠠ ᠬᠠᠷᠢᠭᠣᠯᠬᠣ ᠭᠡᠵᠣ ᠭᠤᠷᠢᠯᠠᠭᠰᠠᠨ ᠪᠢᠵᠡ᠃ ᠠᠮᠢ᠎ᠪᠠᠨ ᠪᠤᠲᠣᠬᠣ ᠦᠬᠡᠢ ᠠᠮᠢᠲᠠᠨ ᠭᠡᠵᠦ ᠶᠠᠭᠤ ᠪᠠᠢ᠌ᠳᠠᠭ᠎ᠢ ᠬᠡᠳᠦᠨ ᠡᠳᠦᠷ ᠣᠢ᠌ᠳᠴᠦ ᠶᠠᠪᠤᠭᠰᠠᠨ ᠲᠡᠷᠡ ᠠᠮᠢᠲᠠᠨ᠎ᠤ ᠬᠣᠭᠣᠷᠣᠨᠳᠦᠬᠢ ᠭᠠᠷᠴᠦ ᠪᠣᠯᠬᠣ ᠲᠡᠮᠡᠴᠡᠯ᠎ᠢ ᠤᠢ᠌ᠭ᠎ᠠ ᠦᠬᠡᠢ ᠬᠠᠷᠠᠴᠠ᠎ᠪᠠᠷ ᠬᠠᠢ᠌ᠨ ᠰᠢᠷᠲᠡᠭᠰᠡᠭᠡᠷ᠃ ᠲᠡᠮᠡᠭᠡᠨ᠎ᠤ ᠬᠥᠯ ᠲᠤᠤᠷ᠎ᠠ ᠭᠠᠵᠠᠷ ᠴᠣᠬᠣᠷᠯᠠᠭᠰᠠᠨ ᠲᠡᠷᠡ ᠵᠢᠭ᠋ᠠᠬᠠᠨ ᠴᠢᠬᠢᠭ ᠠᠯᠢ ᠬᠡᠳᠦᠢ᠌ᠨ ᠬᠠᠲᠠᠵᠠᠢ᠃ ᠬᠡᠷᠪᠡ ᠲᠡᠮᠡᠭᠡ᠎ᠲᠠᠢ ᠲᠣᠭᠣᠯᠵᠣ ᠢᠷᠡᠭᠰᠡᠨ ᠦᠬᠡᠢ ᠪᠣᠯ ᠡᠨᠡ ᠵᠢᠵᠢᠭ ᠠᠮᠢᠲᠠᠳ ᠶᠠᠭᠣ᠎ᠪᠠᠷ ᠬᠣᠭᠣᠯᠠᠯᠠᠵᠣ ᠶᠠᠪᠤᠳᠠᠭ᠎ᠢ ᠮᠡᠳᠡᠬᠦ ᠦᠬᠡᠢ᠃ ᠡᠨᠡ ᠶᠠᠬᠡ ᠭᠣᠪᠢ ᠬᠥᠳᠡᠭᠡ ᠠᠮᠢ ᠠᠮᠢ᠎ᠪᠠᠨ ᠬᠠᠷᠠᠭᠰᠠᠨ ᠠᠮᠢᠲᠠᠨ ᠬᠠᠮᠢᠭ᠎ᠠ᠎ᠨᠢ ᠠᠮᠢ ᠠᠮᠢᠨ᠎ᠳᠤ᠎ᠪᠠᠨ ᠪᠦᠬᠡᠵᠢᠵᠣ ᠢᠷᠡᠭᠰᠡᠨ ᠬᠠᠴᠢᠷᠬᠠᠯ᠎ᠢ ᠲᠦᠷᠦᠭᠦᠯᠦᠨ᠎ᠡ᠃
    ᠲᠡᠷᠡ ᠣᠨᠣᠭ᠎ᠠ᠎ᠪᠠᠨ ᠠᠯᠳᠠᠬᠣ᠎ᠠᠴᠠ ᠬᠢᠴᠢᠶᠡᠵᠦ ᠪᠤᠷᠠᠨᠳᠠᠭ ᠎ᠤᠨ ᠦᠵᠦᠭᠦᠷ᠎ᠠᠴᠠ᠎ᠪᠠᠨ ᠪᠦᠬᠡ ᠪᠠᠷᠢᠵᠣ ᠲᠡᠮᠡᠭᠡᠨ᠎ᠤ ᠰᠡᠭᠦᠳᠡᠷ᠎ᠲᠤ ᠲᠡᠩᠭᠡᠯ ᠲᠠᠰᠣᠷᠠᠭ᠋ᠠᠳ ᠤᠳᠠᠭ᠋ᠠᠨ ᠭᠡᠪᠲᠡᠪᠡ᠃ ᠣᠪᠤᠤ ᠰᠡᠭᠡᠬᠦ ᠰᠢᠭ ᠤᠢ ᠲᠣᠢ ᠭᠡᠢ᠌ᠵᠣ ᠪᠠᠢ᠌ᠪᠠ᠃ ᠰᠡᠭᠦᠯ᠎ᠤᠨ ᠬᠤᠶᠠᠷ ᠡᠳᠦᠷ ᠭᠣᠪᠢ᠎ᠳᠤ ᠶᠠᠪᠤᠵᠣ ᠢᠷᠡᠭᠰᠡᠨ᠎ᠳᠤ᠎ᠪᠠᠨ 《ᠭᠡᠷ ᠎ᠲᠤ᠎ᠪᠠᠨ ᠵᠦᠭᠡᠷ ᠬᠡᠪᠳᠡᠵᠣ ᠪᠠᠢ᠌ᠬᠣ ᠦᠬᠡᠢ ᠦᠭᠦᠭᠰᠡᠨ ᠵᠶ᠋ᠡᠨ ᠬᠢᠵᠣ ᠡᠨᠳᠡ ᠢᠷᠡᠭᠰᠡᠨ ᠪᠤᠢ》 ᠭᠡᠵᠣ ᠬᠠᠷᠠᠮᠰᠠᠪᠠ᠃ ᠨᠢᠳᠦ ᠎ᠪᠠᠨ ᠠᠷᠠᠢ ᠴᠠᠷᠠᠢ ᠨᠡᠭᠡᠭᠡᠬᠦ᠎ᠳᠤ ᠨᠠᠷᠠ ᠪᠠᠷᠠᠭᠣᠨ ᠨᠠᠢ᠎ᠳᠤ ᠲᠠᠰᠢᠵᠠᠢ᠃ ᠵᠠᠮ᠎ᠳᠤ ᠶᠠᠪᠤᠵᠣ ᠪᠠᠢ᠌ᠬᠣ᠎ᠳᠤ ᠣᠨᠣᠵᠣ ᠶᠠᠪᠤᠭ᠎ᠠ ᠲᠡᠮᠡᠭᠡ᠎ᠨᠢ  ᠲᠤᠯᠣᠭ᠋ᠠᠢ ᠤᠷᠣᠭᠣᠯ ᠵᠶ᠋ᠠᠨ ᠰᠡᠭᠰᠦᠷᠦᠭᠡᠳ ᠬᠠᠴᠢᠨ ᠪᠠᠢ᠌ᠭᠰᠠᠨ ᠪᠤᠯᠬᠣᠷ 《ᠵᠣᠷᠢᠭᠰᠠᠨ ᠠᠵᠢᠯ ᠰᠠᠭ᠋ᠠᠳ ᠭᠠᠷᠣᠨ᠎ᠠ》 ᠭᠡᠵᠣ ᠰᠡᠵᠢᠭ ᠬᠦᠷᠴᠦ ᠪᠠᠢ᠌ᠭᠰᠠᠨ ᠶᠤᠮ᠃  ᠨᠠᠷᠠ ᠵᠢ ᠬᠠᠷᠠᠪᠠᠯ ᠶᠠᠪᠤᠭᠰᠠᠨ ᠵᠦᠭ ᠲᠠᠭ᠋ᠠᠷᠠᠵᠣ ᠪᠠᠢ᠌ᠬᠣ  ᠪᠤᠯᠪᠠᠴᠦ ᠠᠷᠠᠢ ᠵᠢᠭ᠋ᠠᠬᠠᠨ ᠵᠡᠭᠦᠨ ᠨᠠᠢ᠎ᠳᠤ ᠤᠷᠣᠭᠰᠠᠨ ᠮᠡᠲᠤ  ᠪᠦᠷ ᠰᠡᠭᠦᠯᠳᠡᠭᠡᠳ ᠬᠡᠳᠦ ᠵᠡᠭᠦᠨᠰᠢᠯᠡᠭᠰᠡᠨ ᠵᠶ᠋ᠠᠨ ᠣᠬᠠᠭ᠋ᠠᠷᠠᠵᠠᠢ᠃
      ᠣᠷᠣᠢ ᠲᠡᠭᠡᠷ᠎ᠡ᠎ᠨᠢ ᠡᠯᠢᠶ᠎ᠡ ᠢᠨᠴᠠᠭ᠋ᠠᠨ ᠰᠡᠭᠦᠳᠡᠷ᠎ᠨᠢ ᠭᠠᠵᠠᠷ ᠠᠷᠴᠢᠨ ᠦᠩᠭᠡᠷᠡᠪᠡ᠃ ᠳᠠᠯᠠᠪᠴᠢ ᠵᠢ᠎ᠨᠢ ᠵᠦᠰᠦᠭᠰᠡᠨ ᠰᠡᠷᠢᠭᠦᠨ ᠵᠢᠪᠠᠷ ᠢᠰᠬᠡᠷᠬᠦ ᠮᠡᠲᠦ  ᠪᠠᠬᠠᠷᠬᠠᠨ᠎ᠠ᠃ 《ᠪᠢ ᠡᠨᠡᠭᠦᠨ ᠰᠢᠭ ᠨᠢᠰᠴᠦ ᠴᠢᠳᠠᠪᠠᠯ ᠤᠭᠲᠠᠷᠭᠤᠢ ᠵᠢᠨ ᠴᠡᠭᠡᠯ᠎ᠳᠤ ᠶᠡᠬᠡ ᠳᠠᠯᠠᠢ᠎ᠳᠤ ᠱᠣᠮᠪᠠᠬᠤ ᠵᠢᠭ᠋ᠠᠰᠤ ᠮᠡᠲᠦ ᠮᠦᠷ ᠦᠯᠡᠳᠡᠭᠡᠬᠦ ᠦᠬᠡᠢ ᠳᠡᠭᠦᠯᠢᠨ᠎ᠡ᠃ ᠰᠠᠯᠬᠢᠨ ᠵᠢᠪᠠᠷ᠎ᠲᠤ ᠪᠦᠷ ᠦᠨᠳᠦᠷ ᠨᠢᠰᠣᠨ᠎ᠡ》 ᠭᠡᠵᠣ ᠪᠤᠳᠣᠪᠠ᠃ ᠬᠤᠪᠢ ᠵᠠᠶᠠᠭ᠎ᠠ ᠬᠤᠪᠢᠨ᠎ᠳᠤ᠎ᠪᠠᠨ ᠪᠠᠢ᠌ᠳᠠᠭ ᠪᠤᠯᠵᠣᠰᠢ ᠦᠬᠡᠢ ᠦᠷ᠎ᠡ ᠳ᠋ᠦᠩ᠎ᠳᠤ ᠬᠦᠷᠬᠦ᠎ᠠᠴᠠ ᠥᠪᠡᠷ᠎ᠢ᠎ᠪᠠᠨ ᠰᠡᠷᠡᠮᠵᠢᠯᠡᠭᠦᠯᠵᠦ᠂ ᠬᠤᠷᠲᠣᠬᠠᠨ ᠰᠢᠭ᠋ ᠭᠣᠪᠢ ᠵᠢ ᠲᠤᠭᠤᠯᠵᠣ ᠭᠠᠷᠠᠠᠦ ᠵᠢ ᠬᠢᠴᠢᠶᠡᠨ᠎ᠡ᠃
   ᠲᠡᠮᠡᠭᠡ᠎ᠲᠠᠢ ᠬᠦᠮᠦᠨ ᠶᠠᠪᠤᠭ᠋ᠠᠳ ᠪᠠᠢ᠌ᠯ᠎ᠠ！ ᠦᠳᠡᠰᠢ ᠭᠠᠯ ᠲᠦᠯᠡᠵᠦ ᠱᠠᠭ᠋ᠠᠭ ᠨᠦᠷᠦᠮᠳᠠᠵᠣ ᠴᠠᠢ ᠴᠢᠨᠠᠵᠤ ᠣᠣᠭᠣᠬᠣ ᠵᠢ ᠪᠤᠳᠣᠵᠣ᠂ ᠪᠤᠲᠠ᠎ᠲᠠᠢ ᠭᠠᠵᠠᠷ ᠬᠠᠢ᠌ᠵᠣ  ᠶᠠᠳᠠᠷᠠᠭᠰᠠᠨ ᠵᠶ᠋ᠠᠨ ᠮᠠᠷᠲᠠᠵᠣ ᠡᠬᠢᠯᠡᠪᠡ᠃ ᠪᠤᠷᠲᠣᠭᠣ᠎ᠲᠠᠢ ᠣᠰᠤ᠎ᠨᠢ ᠬᠠᠰᠣᠭᠳᠠᠭᠰᠠᠭ᠋ᠠᠷ ᠪᠠᠢ᠌ᠯ᠎ᠠ᠃ ᠶᠠᠭᠣ  ᠴᠦ᠍ ᠭᠡᠰᠡᠨ ᠬᠠᠯᠠᠭᠣᠨ  ᠴᠠᠢ ᠬᠡᠯᠡᠨ ᠳᠡᠭᠡᠷ᠎ᠡ᠎ᠪᠠᠨ ᠲᠠᠯᠪᠢᠭᠰᠠᠨ ᠦᠬᠡᠢ  ᠣᠪᠣᠭ᠎ᠠ ᠬᠡᠳᠦ ᠬᠤᠨᠣᠵᠡᠢ᠃ ᠬᠠᠶᠨ ᠨᠢᠭᠡ ᠪᠤᠲᠠ  ᠪᠤᠳᠤᠷᠭ᠋ᠠᠨ᠎ᠠ ᠬᠠᠷᠠᠭᠳᠠᠬᠣᠯᠠᠷ ᠭᠡᠳᠡᠰᠦ ᠲᠤᠮᠳᠠᠭᠣᠷ ᠶᠠᠪᠤᠭᠰᠠᠨ ᠲᠡᠮᠡᠭᠡᠨ ᠎ᠳᠤ᠎ᠪᠠᠨ ᠠᠮᠠᠨ ᠵᠠᠪᠠ ᠭᠠᠷᠭ᠋ᠠᠭᠰᠠᠨ ᠲᠡᠳᠦᠢ ᠬᠡᠳᠦᠬᠡᠨ ᠵᠣᠯᠭ᠋ᠠᠭ᠋ᠠᠬᠤ᠎ᠳᠤ ᠬᠦᠬᠡᠷᠡᠭᠰᠡᠨ ᠪᠤᠲᠠ ᠬᠤᠪᠠᠬᠠᠢ᠌ᠷᠠᠭ᠍ᠣ ᠠᠵᠢ᠃ ᠲᠡᠮᠡᠭᠡ ᠴᠦ᠍ ᠬᠡᠪᠢᠯᠭᠡ ᠰᠢᠩᠭᠡᠷᠡᠵᠣ ᠰᠢᠳᠦ᠎ᠨᠢ ᠬᠢᠬᠤᠨᠠᠬᠤ ᠪᠤᠯᠪᠠ᠃ ᠪᠡᠶ᠎ᠡ ᠪᠡᠶ᠎ᠡ᠎ᠳᠤ᠎ᠪᠠᠨ ᠲᠦᠰᠢᠭ ᠪᠣᠯᠣᠭᠰᠠᠨ ᠡᠨᠡ ᠣᠨᠣᠭ᠋ᠠᠨ᠎ᠠᠴᠠ ᠰᠠᠯᠪᠠᠯ ᠬᠥᠯ ᠳᠦᠷᠦᠭᠡᠯᠡᠬᠦ ᠶᠠᠭᠣᠮ᠎ᠠ ᠦᠬᠡᠢ ᠭᠠᠬᠠᠢ ᠶᠠᠪᠠᠭ᠋ᠠᠨ ᠪᠤᠯᠬᠣ ᠠᠶᠣᠯ ᠤᠢ᠌ᠷᠬᠠᠨ ᠪᠠᠢ᠌ᠪᠠ᠃ 
    ᠨᠠᠷᠠ ᠭᠠᠨᠵᠤᠭ᠋ᠠᠨ᠎ᠠᠴᠠ ᠤᠶᠠᠭ᠎ᠠ᠎ᠲᠠᠢ ᠶᠤᠮ ᠰᠢᠭ᠋ ᠲᠡᠨᠳᠡ᠎ᠪᠠᠨ ᠲᠡᠭᠦᠵᠢᠯᠡᠭᠳᠡᠭᠡᠳ ᠵᠢᠷᠭ᠋ᠠᠠᠠᠣ ᠨᠠᠷᠠᠨ᠎ᠤ ᠳᠣᠯᠣᠩ ᠲᠤᠶᠠᠭ᠋ᠠᠨ᠎ᠳᠤ ᠶᠠᠭ᠋ᠠᠬᠢᠵᠣ ᠶᠠᠪᠤᠭ᠋ᠠᠳ ᠲᠡᠷᠡ ᠭᠡᠷᠡᠯ᠎ᠤᠨ ᠬᠦᠨᠳᠡᠢ᠎ᠪᠠᠷ ᠰᠢᠷᠭᠣᠵᠣ ᠭᠠᠷᠬᠣ ᠵᠢ ᠶᠠᠭ᠋ᠠᠷᠠᠨ᠎ᠠ᠃ ᠲᠡᠷᠡ᠎ᠪᠠᠷ ᠵᠣᠭᠰᠣᠭᠰᠠᠨ ᠭᠠᠵᠠᠷ ᠎ᠲᠤ᠎ᠪᠠᠨ ᠪᠠᠭᠣᠵᠣ ᠶᠣᠳᠠᠷ  ᠬᠣᠵᠤᠤᠯ᠎ᠠ᠎ᠠᠴᠠ ᠲᠡᠮᠡᠭᠡ᠎ᠪᠠᠨ ᠤᠶᠠᠭ᠋ᠠᠳ᠂ ᠰᠡᠭᠦᠳᠡᠷ ᠎ᠲᠤ᠎ᠨᠢ ᠰᠠᠭ᠋ᠠᠲᠠᠨ ᠪᠤᠷᠲᠣᠭᠣ᠎ᠲᠠᠢ ᠣᠰᠤ᠎ᠠᠴᠠ ᠣᠣᠭᠣᠵᠣ ᠶᠠᠭᠣᠮ᠎ᠠ ᠭᠠᠷᠭ᠋ᠠᠵᠣ ᠢᠳᠡᠵᠦ ᠰᠠᠭᠣᠪᠠ᠃ ᠰᠢᠬᠢᠷ᠎ᠠ ᠬᠠᠲᠠᠭ᠋ᠠᠳᠠᠭ ᠬᠤᠷᠴᠠ ᠨᠠᠷᠠ ᠵᠢᠷᠭ᠋ᠠᠵᠤ ᠣᠳᠣᠭ᠋ᠠᠳ ᠡᠩᠬᠡᠯᠵᠡᠭᠥᠷ ᠥᠭᠡᠳᠡ ᠦᠯᠢᠶᠡᠳᠡᠭ ᠬᠠᠯᠠᠭᠣᠨ ᠤᠷᠣᠰᠬᠠᠯ ᠰᠣᠯᠢᠭᠲᠠᠨ ᠰᠡᠷᠢᠭᠦᠨ ᠵᠶ᠋ᠡᠷ ᠠᠷᠴᠢᠵᠦ ᠵᠢᠪᠠᠷ ᠲᠠᠲᠠᠨ᠎ᠠ᠃ ᠮᠠᠷᠭ᠋ᠠᠰᠢ ᠭᠣᠪᠢ ᠎ᠠᠴᠠ ᠭᠠᠷᠴᠦ ᠴᠢᠳᠠᠬᠣ᠎ᠪᠠᠨ ᠮᠡᠳᠡᠵᠦ ᠪᠠᠢ᠌ᠬᠣ ᠪᠣᠯᠬᠣᠷ ᠡᠷᠲᠡᠬᠡᠨ ᠣᠨᠲᠠᠬᠣ ᠵᠢ ᠬᠦᠰᠡᠵᠦ  ᠴᠢᠯᠠᠭᠤ ᠳᠡᠷᠡᠯᠡᠨ ᠬᠡᠪᠲᠡᠪᠡ᠃ ᠭᠤᠷᠪᠠᠨ ᠮᠠᠷᠠᠯ ᠤᠷᠣᠢ ᠳᠡᠭᠡᠷ᠎ᠡ ᠭᠠᠷᠣᠭᠰᠠᠨ ᠪᠠᠢ᠌ᠲᠠᠯ᠎ᠠ ᠨᠦᠢ᠍ᠷ ᠬᠦᠷᠬᠦ ᠦᠬᠡᠢ ᠨᠣᠬᠠᠢ ᠳᠣᠯᠢᠶᠠᠵᠠᠢ᠃ ᠰᠠᠷᠠᠨ᠎ᠤ ᠭᠡᠷᠡᠯ᠎ᠢ ᠨᠢᠷᠤᠭᠣᠨ᠎ᠳᠤ᠎ᠪᠠᠨ ᠠᠴᠢᠭᠰᠠᠨ ᠵᠢᠵᠢᠭ  ᠠᠮᠢᠲᠠᠨ 《ᠪᠦᠵᠢᠷ ᠪᠦᠵᠢᠷ》 ᠳᠠᠪᠬᠢᠵᠦ ᠢᠷᠡᠬᠦ ᠬᠠᠷᠠᠭᠳᠠᠪᠠ᠃ ᠶᠠᠭ᠋ᠠᠬᠢᠳᠠᠭ ᠠᠮᠢᠲᠠᠨ ᠭᠡᠭᠴᠢ ᠭᠡᠳ ᠰᠣᠴᠢᠭ᠋ᠠᠳ ᠦᠨᠳᠡᠢ᠌ᠬᠦ᠎ᠪᠠᠷ ᠭᠣᠪᠢ ᠵᠢᠨ ᠪᠤᠷᠣ ᠰᠢᠰᠢ ᠢᠳᠡᠰᠢ ᠲᠡᠭᠦᠵᠦ 《ᠺᠠᠪᠠᠷ ᠺᠠᠪᠠᠷ》 ᠵᠠᠵᠢᠯᠵᠦ ᠭᠠᠷᠪᠠ᠃ 《ᠪᠤᠬᠠᠢ ᠢᠷᠡᠪᠡᠯ ᠶᠠᠭ᠋ᠠᠬᠢᠬᠤ ᠪᠢᠯᠡ》 ᠭᠡᠵᠣ ᠠᠶᠣᠮᠠᠷ ᠲᠦᠷᠦᠪᠡ᠃ 《ᠲᠡᠮᠡᠭᠡ  ᠭᠠᠵᠠᠷᠴᠢ ᠵᠦᠩᠴᠢ ᠠᠮᠢᠲᠠᠨ ᠪᠤᠯᠬᠣᠷ ᠬᠦᠳᠡᠭᠡ ᠭᠠᠳᠠᠨ᠎ᠠ ᠭᠠᠭᠴᠠᠭ᠋ᠠᠷ ᠶᠠᠪᠤᠵᠣ ᠰᠠᠭᠣᠪᠠᠯ ᠰᠢᠠᠵᠢᠵᠤ ᠪᠠᠢ᠃ ᠲᠡᠮᠡᠭᠡ ᠡᠵᠡᠨ᠎ᠤ ᠥᠭᠡᠳᠡ ᠬᠠᠷᠠᠵᠣ  ᠡᠪᠰᠢᠶᠡᠪᠡᠯ ᠪᠤᠳᠣᠭᠰᠠᠨ ᠶᠠᠪᠤᠳᠠᠯ ᠤᠷᠣᠭᠰᠢᠲᠠᠢ᠂ ᠤᠯᠠᠨ ᠲᠡᠮᠡᠭᠡ ᠡᠪᠰᠢᠶᠡᠪᠡᠯ ᠮᠠᠷᠭ᠋ᠠᠰᠢ ᠰᠠᠢ᠌ᠬᠠᠨ ᠡᠳᠦᠷ ᠭᠠᠷᠣᠨ᠎ᠠ᠃ ᠣᠯᠠᠨ ᠲᠡᠮᠡᠭᠡ ᠨᠠᠷᠠ ᠤᠷᠣᠭᠣ ᠬᠠᠷᠠᠵᠣ ᠬᠡᠪᠲᠡᠪᠡᠯ ᠬᠠᠯᠠᠭᠣᠨ ᠡᠳᠦᠷ  ᠪᠤᠯᠣᠨ᠎ᠠ᠃ ᠭᠠᠵᠠᠷ ᠥᠨᠦᠷᠯᠡᠵᠣ ᠵᠣᠭᠰᠣᠬᠣ ᠎ᠠᠴᠠ᠎ᠨᠢ ᠨᠣᠲᠣᠭ᠎ᠤᠨ ᠬᠦᠮᠦᠰ  ᠬᠢᠴᠢᠶᠡᠳᠡᠭ᠃  ᠬᠠᠪᠤᠷ᠎ᠤᠨ ᠲᠡᠮᠡᠭᠡᠳ ᠠᠮᠠ ᠠᠩᠭ᠋ᠠᠢ᠌ᠨ ᠣᠭᠣᠴᠢᠵᠣ ᠪᠠᠢ᠌ᠪᠠᠯ ᠭᠠᠩ ᠪᠤᠯᠣᠨ᠎ᠠ᠂ ᠰᠠᠯᠬᠢ ᠰᠦᠷᠪᠡᠯ ᠪᠤᠷᠣᠭ᠎ᠠ ᠤᠷᠣᠨ᠎ᠠ》 ᠭᠡᠵᠣ ᠡᠪᠦᠭᠡ᠎ᠨᠢ ᠵᠠᠬᠢᠳᠠᠭ ᠪᠠᠢ᠌ᠭᠰᠠᠨ ᠎ᠢ ᠰᠠᠨᠠᠨ᠎ᠠ᠃
      ᠣᠨᠣᠭᠰᠠᠨ ᠲᠡᠮᠡᠭᠡ᠎ᠨᠢ ᠲᠠᠢ᠌ᠪᠤᠩ ᠬᠡᠪᠢᠬᠦ᠎ᠳᠤ   ᠲᠡᠷᠡ ᠲᠠᠢ᠌ᠪᠤᠰᠢᠷᠠᠨ ᠪᠤᠴᠠᠵᠣ ᠬᠡᠪᠲᠡᠪᠡ᠃ ᠡᠪᠣᠯ᠎ᠢ ᠰᠠᠨᠠᠭᠳᠠᠭᠣᠯᠣᠮ᠎ᠠ ᠬᠦᠢ᠍ᠲᠡᠨ ᠵᠶ᠋ᠡᠷ ᠴᠣᠷᠭᠢᠳᠠᠭ ᠱᠠᠩᠳᠠ ᠪᠤᠯᠠᠭ᠎ᠢ ᠰᠠᠨᠠᠭᠳᠠᠭᠣᠯᠣᠨ᠎ᠠ᠃ ᠤᠳᠣ ᠬᠦᠢ᠍ᠲᠡᠨ ᠶᠠᠭᠣᠮ᠎ᠠ ᠣᠣᠭᠣᠬᠣ ᠵᠢ ᠲᠡᠷᠡ ᠬᠦᠰᠡᠵᠤ ᠪᠠᠢ᠌ᠪᠠ᠃ ᠣᠰᠤ ᠵᠠᠯᠭᠢᠬᠣ ᠶᠣᠮᠰᠠᠨ᠂ ᠪᠦᠷ ᠴᠡᠯ ᠬᠦᠢ᠍ᠲᠡᠨ ᠣᠰᠤᠨ᠎ᠳᠤ ᠤᠷᠣᠵᠣ ᠪᠡᠶ᠎ᠡ ᠠᠮᠠᠷᠠᠬᠣ ᠰᠠᠨ ᠭᠡᠵᠣ ᠪᠤᠳᠣᠨ᠎ᠠ᠃ ᠡᠪᠣᠯ᠎ᠤᠨ ᠬᠦᠢ᠍ᠲᠡᠨ᠎ᠤ ᠶᠠᠰᠣ ᠬᠠᠩᠭᠢᠨᠠᠭᠰᠠᠨ ᠬᠠᠷᠭᠢᠯ ᠡᠷᠴᠢ ᠵᠢ  ᠬᠡᠴᠢᠨᠡᠬᠡᠨ ᠬᠦᠰᠡᠨ᠎ᠡ ᠪᠤᠢ？ ᠬᠠᠯᠠᠵᠣ ᠵᠣᠪᠠᠬᠣ᠎ᠠᠴᠠ ᠳᠠᠭ᠋ᠠᠷᠠᠬᠣ᠎ᠨᠢ ᠠᠶᠠᠲᠠᠢ ᠰᠠᠨᠠᠭᠳᠠᠨ᠎ᠠ᠃ ᠳᠠᠭ᠋ᠠᠷᠠᠭᠰᠠᠨ᠎ᠠᠴᠠ ᠬᠠᠯᠠᠭᠰᠠᠨ᠎ᠨᠢ ᠬᠡᠴᠡᠭᠦᠦ ᠭᠡᠰᠡᠨ ᠪᠤᠳᠣᠯ ᠡᠩᠬᠡ ᠲᠣᠩᠬ᠎ᠠ ᠪᠤᠶᠠᠨ ᠬᠡᠰᠢᠭ᠎ᠤᠨ ᠮᠦᠷᠦᠭᠡᠳᠦᠯ᠎ᠢ ᠤᠷᠣᠯᠠᠵᠣ ᠵᠡᠭᠦᠳᠦᠨ᠎ᠠᠴᠠ  ᠰᠡᠷᠡᠬᠦ᠎ᠠᠴᠠ  ᠨᠠᠭ᠋ᠠᠰᠢ ᠠᠷᠴᠢᠭᠳᠠᠬᠤ ᠦᠬᠡᠢ ᠶᠤᠮ ᠪᠢᠯᠡ᠃ ᠨᠠᠪᠰᠠᠢ᠌ᠭᠰᠠᠨ ᠪᠣᠷᠲᠣᠭᠣ ᠎ᠪᠠᠨ ᠬᠠᠷᠠᠭᠰᠠᠭ᠋ᠠᠷ ᠶᠠᠭ᠋ᠠᠬᠢᠵᠣ ᠨᠢᠭᠡ ᠬᠠᠨᠲᠠᠯ᠎ᠠ ᠣᠰᠤ ᠣᠯᠵᠣ ᠣᠣᠭᠣᠶ᠎ᠠ ᠳ᠋ᠠ ᠭᠡᠵᠣ ᠪᠤᠳᠣᠭᠰᠠᠭ᠋ᠠᠷ ᠨᠠᠮ ᠣᠨᠲᠠᠭ᠋ᠠᠳ ᠥᠭᠴᠡᠢ᠃ ᠶᠠᠭᠤ ᠬᠦᠰᠡᠪᠡᠯ ᠲᠡᠭᠦᠨ ᠵᠶ᠋ᠡᠨ ᠵᠠᠭᠦᠳᠦᠯᠡᠵᠦ ᠬᠤᠨᠣᠯ᠎ᠠ᠃ ᠠᠯᠢ ᠠᠯᠢ᠎ᠨᠢ ᠭᠠᠩᠲᠠᠭᠣᠰ ᠬᠠᠬᠢᠷ ᠪᠤᠯᠬᠣᠷ ᠭᠣᠪᠢ᠎ᠠᠴᠠ ᠭᠠᠷᠴᠦ ᠯᠠ ᠴᠢᠳᠠᠪᠠᠯ ᠰᠡᠳᠭᠢᠯ ᠲᠡᠨ᠋ᠢ᠌ᠬᠦ ᠵᠢ ᠢᠲᠡᠭᠡᠨ᠎ᠡ᠃ 

    （ᠦᠷᠬᠦᠯᠵᠢᠯᠡᠯ ᠪᠤᠢ）