ᠨᠣᠮᠢᠩᠬᠤᠸᠠᠷ ᠵᠣᠭᠢᠶᠠᠪᠠ
ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠲᠦᠪ ᠳᠠᠴᠢᠨᠲᠠᠯᠠᠠᠴᠠ ᠵᠡᠭᠦᠨ ᠬᠣᠢ᠌ᠰᠢ 30 ᠺᠢᠯᠤᠮᠧᠲᠷ ᠶᠠᠪᠤᠪᠠᠯ ᠳᠣᠪᠣ ᠲᠣᠯᠣᠭ᠋ᠠᠳ᠂ ᠮᠠᠩᠬᠠ ᠵᠢᠯᠠᠭᠠ ᠦᠷᠭᠦᠯᠵᠢᠯᠡᠭᠰᠡᠨ ᠨᠤᠲᠤᠭ ᠪᠠᠢ᠌ᠳᠠᠭᠢ ᠪᠠᠶᠠᠨᠲᠠᠯᠠ ᠰᠤᠮᠤ ᠭᠡᠳᠡᠭ᠃ ᠪᠠᠶᠠᠨᠲᠠᠯᠠ ᠰᠤᠮᠤ ᠲᠠᠯᠠ ᠨᠡᠷᠡᠢ᠌ᠳᠦᠯᠲᠠᠢ ᠪᠣᠯᠪᠠᠴᠤ ᠬᠠᠷᠠᠭᠠ ᠰᠤᠩᠭ᠋ᠠᠮᠠ ᠠᠭᠤᠳᠠᠮ ᠲᠠᠯᠠ ᠠᠯᠠᠭᠠ᠃ ᠭᠡᠪᠡᠴᠦ ᠪᠠᠬᠠᠷᠤᠯᠲᠠᠢ ᠰᠠᠢ᠌ᠬᠠᠨ ᠭᠠᠵᠠᠷᠤᠨ ᠨᠡᠷᠡᠢ᠌ᠳᠦᠯ᠂ ᠦᠯᠢᠭᠡᠷ ᠳᠣᠮᠣᠭ᠂ ᠵᠠᠩ ᠦᠢ᠍ᠯᠡ᠂ ᠠᠮᠠᠨ ᠠᠶᠠᠯᠭᠤ᠂ ᠰᠢᠨᠡ ᠬᠦᠭᠵᠢᠯᠨᠢ ᠬᠣᠯᠠ ᠵᠢᠨ ᠰᠣᠨᠣᠰᠬᠠᠯ ᠣᠢ᠌ᠷᠠ ᠵᠢᠨ ᠳᠠᠭᠤᠷᠢᠶᠠᠯ ᠪᠣᠯᠵᠣ ᠪᠠᠢ᠌ᠳᠠᠭ ᠪᠣᠯᠬᠣᠷ ᠵᠣᠨᠤ ᠰᠠᠢ᠌ᠬᠠᠨ ᠤᠯᠠᠷᠢᠯᠤᠨ ᠪᠦᠲᠦᠨ ᠰᠠᠢ᠌ᠨ ᠡᠳᠦᠷᠤᠨ ᠠᠮᠠᠷᠠᠯᠲᠠᠪᠠᠷ ᠪᠢᠳᠡ ᠪᠠᠶᠠᠨᠲᠠᠯᠠ ᠰᠤᠮᠤᠨᠤ ᠬᠡᠳᠦᠨ ᠠᠢ᠌ᠯ ᠵᠶ᠋ᠡᠷ ᠲᠣᠭᠣᠷᠢᠵᠤ ᠨᠢᠳᠦ ᠲᠠᠢ᠌ᠯᠵᠤ᠂ ᠰᠣᠨᠣᠷ ᠪᠠᠶᠠᠰᠬᠠᠵᠤ ᠶᠠᠪᠤᠭ᠋ᠠᠳ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠣᠯᠵᠠᠲᠠᠢ ᠪᠤᠴᠠᠭᠰᠠᠨ ᠪᠢᠯᠡ᠃ ᠪᠢᠯᠢᠭ ᠪᠢᠷᠤᠨ ᠬᠣᠶᠠᠷᠤᠨ ᠮᠢᠨᠢ ᠬᠤᠷᠴᠠᠨᠢ ᠮᠡᠬᠦᠰᠲᠡᠬᠦᠨᠢ ᠶᠠᠷᠢᠶᠠᠨ ᠦᠭᠡᠢ ᠪᠣᠯᠪᠠᠴᠤ ᠪᠠᠬᠠᠷᠬᠠᠯ ᠱᠠᠭᠰᠢᠯ ᠬᠣᠶᠠᠷ ᠮᠢᠨᠢ ᠵᠢᠷᠦᠬᠡᠨᠠᠴᠠ ᠣᠢ᠌ᠯᠰᠤᠭ᠋ᠠᠳ ᠪᠠᠢ᠌ᠳᠠᠭ ᠪᠣᠯᠬᠣᠷ ᠲᠡᠷᠡ ᠨᠠᠨᠳᠢᠨ ᠣᠯᠵᠠᠪᠠᠨ ᠴᠠᠢ ᠵᠢᠨ ᠵᠣᠭᠣᠭ ᠪᠣᠯᠭ᠋ᠠᠨ ᠲᠠ ᠪᠦᠬᠦᠨᠲᠠᠢᠪᠠᠨ ᠬᠤᠪᠢᠶᠠᠯᠴᠠᠬᠤ ᠶᠤᠮᠰᠠᠨ ᠭᠡᠵᠤ ᠪᠣᠳᠣᠯᠠ᠃
ᠲᠤᠰᠬᠤᠨᠤ ᠨᠡᠷᠡᠢ᠌ᠳᠦᠯ ᠲᠡᠦᠬᠡ ᠬᠦᠦᠷᠨᠢᠨᠡ
ᠪᠠᠶᠠᠨᠲᠠᠯᠠ ᠰᠤᠮᠤᠨᠳᠤ 29 ᠭᠠᠴᠠᠭᠠ ᠲᠤᠰᠬᠤᠨᠲᠠᠢ᠃ ᠲᠤᠰᠬᠤᠨ ᠪᠦᠷᠢ ᠰᠠᠢ᠌ᠬᠠᠨ ᠮᠣᠩᠭᠣᠯ ᠨᠡᠷᠡᠢ᠌ᠳᠦᠯᠲᠠᠢ᠃ ᠪᠠᠶᠠᠨᠲᠠᠯᠠ᠂ ᠪᠣᠭᠣᠲᠣ᠂ ᠵᠡᠭᠡᠷᠡᠲᠦ᠂ ᠰᠢᠪᠡᠭᠡᠲᠦ᠂ ᠳᠦᠷᠪᠡᠨ ᠣᠪᠤᠭᠠ᠂ ᠰᠠᠨᠳᠠᠢ᠂ ᠭᠤᠤᠲᠤ ᠳᠣᠯᠣᠭ᠋ᠠᠨ ᠮᠣᠳᠣ᠂ ᠬᠣᠶᠠᠷ ᠨᠠᠭᠤᠷ᠂ ᠯᠠᠮᠠ ᠵᠢᠨ ᠲᠠᠯᠠ᠂ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ᠂ ᠶᠣᠰᠣᠲᠣ᠂ ᠦᠬᠡᠷᠤᠨ ᠲᠠᠷᠢᠶᠠ᠂ ᠰᠤᠪᠤᠷᠭᠠ᠂ ᠨᠠᠷᠢᠨ ᠬᠣᠭᠣᠯᠠᠢ᠂ ᠦᠪᠦᠩᠤᠨ ᠠᠢ᠌ᠯ᠂ ᠶᠡᠬᠡ ᠤᠰᠤ᠂ ᠭᠤᠤ ᠵᠢᠨ ᠣᠯᠣᠮ᠂ ᠳ᠋ᠠᠩᠬᠠᠷ᠂ ᠮᠠᠨᠳᠤᠭᠤᠯᠬᠤ ᠁ ᠭᠡᠬᠦ ᠮᠡᠲᠦ᠃ ᠡᠢ᠌ᠮᠦ ᠰᠠᠢ᠌ᠬᠠᠨ ᠨᠡᠷᠡᠢ᠌ᠳᠦᠯᠳᠤ ᠮᠣᠩᠭᠤᠯ ᠤᠬᠠᠭ᠋ᠠᠨ᠂ ᠮᠣᠩᠭᠤᠯ ᠰᠣᠶᠣᠯ᠂ ᠮᠣᠩᠭᠤᠯ ᠲᠡᠦᠬᠡ ᠠᠭᠤᠰᠤᠨ ᠰᠢᠩᠭᠡᠵᠦ᠂ ᠪᠠᠶᠠᠨᠲᠠᠯᠠ ᠨᠤᠲᠤᠭᠤᠨ ᠦᠪᠡᠷᠮᠢᠴᠡ ᠣᠨᠴᠠᠯᠢᠭᠢ ᠠᠴᠢᠶᠠᠯᠠᠨ ᠠᠭᠤᠯᠵᠤ᠂ ᠤᠷᠲᠤ ᠵᠢᠨ ᠤᠷᠲᠤ ᠴᠠᠭ ᠠᠬᠤᠢ ᠵᠢ ᠲᠤᠭᠤᠯᠤᠭᠰᠠᠭ᠋ᠠᠷ ᠢᠷᠡᠵᠡᠢ᠃ ᠲᠡᠷᠡ ᠰᠠᠢ᠌ᠬᠠᠨᠢ ᠣᠯᠵᠠᠭᠤᠷᠬᠠᠨ ᠮᠡᠳᠡᠷᠡᠵᠦ ᠶᠠᠪᠤᠭᠰᠠᠨᠤ ᠵᠠᠬᠠ ᠵᠤᠬᠠᠠᠴᠠ ᠳᠡᠯᠭᠡᠬᠦᠳᠤ ᠤᠬᠠᠭ᠋ᠠᠨ ᠴᠡᠯᠮᠡᠵᠦ ᠪᠣᠳᠣᠯ ᠲᠤᠩᠭ᠋ᠠᠯᠠᠭᠰᠢᠨᠠ᠃
ᠪᠠᠶᠠᠨᠲᠠᠯᠠ᠃ ᠮᠣᠩᠭᠤᠯ ᠨᠤᠲᠤᠭᠲᠤ ᠪᠠᠶᠠᠨᠲᠠᠯᠠ ᠭᠡᠬᠦ ᠨᠡᠷᠡᠢ᠌ᠳᠦᠯᠲᠠᠢ ᠭᠠᠵᠠᠷ ᠵᠠᠬᠠᠠᠴᠠᠪᠠᠨ ᠠᠪᠤᠭ᠋ᠠᠳ ᠪᠠᠢ᠌ᠳᠠᠭ ᠪᠦᠭᠡᠳ ᠵᠦᠪᠬᠡᠨ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠬᠢᠵᠠᠭ᠋ᠠᠷᠲᠤ ᠭᠤᠷᠪᠠᠨᠬᠤᠸᠠ ᠵᠢᠨ ᠪᠠᠶᠠᠨᠲᠠᠯᠠ᠂ ᠰᠢᠷᠠ ᠬᠣᠭᠣᠯᠠᠢ ᠵᠢᠨ ᠪᠠᠶᠠᠨᠲᠠᠯᠠ᠂ ᠨᠠᠢ᠍ᠮᠠᠳᠤᠭ᠋ᠠᠷ ᠨᠤᠲᠤᠭ ᠪᠠᠶᠠᠨᠲᠠᠯᠠ ᠭᠡᠵᠤ ᠭᠤᠷᠪᠠ ᠪᠤᠢ᠃ ᠪᠠᠶᠠᠨᠲᠠᠯᠠ ᠭᠡᠬᠦ ᠨᠡᠷᠡᠢ᠌ᠳᠦᠯ ᠮᠣᠩᠭᠤᠯ ᠨᠤᠲᠤᠭ ᠵᠶ᠋ᠡᠷ ᠨᠡᠢ᠌ᠳᠡᠮ ᠬᠡᠷᠡᠭᠯᠡᠭᠳᠡᠳᠡᠭᠨᠢ ᠲᠤᠬᠠᠢ ᠵᠢᠨ ᠣᠷᠣᠨᠤ ᠪᠠᠢ᠌ᠭ᠋ᠠᠯᠢ ᠵᠢᠨ ᠰᠠᠢ᠌ᠬᠠᠨ᠂ ᠠᠮᠢᠳᠤᠷᠠᠯᠤᠨ ᠪᠠᠶᠠᠯᠢᠭᠢ ᠲᠤᠰᠬᠠᠨ ᠬᠠᠷᠠᠭᠤᠯᠤᠭᠰᠠᠨ ᠤᠳᠬᠠᠲᠠᠢᠠᠴᠠ ᠭᠠᠳᠠᠨᠠ ᠲᠠᠩᠰᠤᠭ ᠪᠠᠶᠠᠯᠢᠭᠢ ᠵᠦᠩᠨᠡᠨ ᠪᠡᠯᠭᠡᠳᠡᠭᠰᠡᠨ ᠤᠳᠬᠠ ᠴᠦ᠍ ᠪᠠᠢ᠌ᠭᠠ ᠶᠤᠮ᠃ 《ᠠᠮᠠᠨ ᠪᠡᠯᠭᠡ ᠬᠠᠮᠢᠭ᠋ᠠᠰᠢᠪᠠᠨ ᠪᠣᠯ ᠠᠰᠢᠲᠠ ᠵᠢᠨ ᠪᠡᠯᠭᠡ ᠲᠡᠢ᠌ᠰᠢ》ᠪᠠᠨ ᠭᠡᠵᠤ ᠪᠡᠯᠭᠡ ᠳᠡᠮᠪᠡᠷᠡᠯᠢ ᠡᠷᠬᠢᠮᠯᠡᠳᠡᠭ ᠮᠣᠩᠭᠤᠯ ᠬᠦᠮᠦᠨᠤ ᠤᠬᠠᠭ᠋ᠠᠨᠠᠴᠠ ᠤᠷᠭᠤᠭᠰᠠᠨ ᠡᠨᠡ ᠰᠠᠢ᠌ᠬᠠᠨ ᠨᠡᠷᠡᠢ᠌ᠳᠦᠯᠨᠢ ᠨᠤᠲᠤᠭ ᠨᠤᠲᠤᠭᠤᠨ ᠠᠷᠠᠳ ᠲᠦᠮᠡᠨᠢ ᠡᠳᠦᠷᠠᠴᠠ ᠡᠳᠦᠷ ᠦᠭᠡᠳᠡ ᠵᠢᠨ ᠬᠡᠢ ᠮᠣᠷᠢᠲᠠᠢ ᠪᠠᠶᠠᠨ ᠴᠢᠨᠡᠭᠡᠯᠢᠭ᠂ ᠠᠵᠠ ᠵᠢᠷᠭ᠋ᠠᠯᠲᠠᠢ ᠠᠮᠢᠳᠤᠷᠠᠭᠤᠯᠤᠭᠰᠠᠭ᠋ᠠᠷ ᠢᠷᠡᠭᠰᠡᠨ ᠶᠤᠮ᠃ ᠡᠨᠡ ᠪᠣᠯ ᠳᠡᠭᠡᠳᠦᠰᠤᠨ ᠮᠢᠨᠢ ᠬᠣᠷᠸᠠ ᠪᠠᠢ᠌ᠭ᠋ᠠᠯᠢ ᠵᠢᠨ ᠣᠷᠣᠰᠢᠬᠤᠢ ᠵᠣᠬᠢᠴᠠᠯᠢ ᠲᠠᠨᠢᠵᠤ ᠤᠬᠠᠭ᠋ᠠᠷᠠᠭᠰᠠᠨ ᠮᠡᠷᠭᠡᠨ ᠤᠬᠠᠭ᠋ᠠᠨ᠃ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠪᠠᠶᠠᠨᠲᠠᠯᠠ ᠰᠤᠮᠤ ᠭᠡᠵᠤ ᠦᠨᠡᠬᠡᠷ 《ᠪᠠᠶᠠᠨᠲᠠᠯᠠ᠂ ᠯᠠᠮᠠ ᠵᠢᠨ ᠲᠠᠯᠠ》 ᠭᠡᠬᠦᠴᠢᠯᠡᠭᠰᠡᠨ ᠰᠠᠷᠠᠭᠤᠯ ᠲᠠᠯᠠᠲᠠᠢ᠂ 《ᠬᠣᠶᠠᠷ ᠨᠠᠭᠤᠷ᠂ ᠶᠡᠬᠡ ᠤᠰᠤ》 ᠭᠡᠬᠦᠴᠢᠯᠡᠭᠰᠡᠨ ᠨᠠᠭᠤᠷ ᠤᠰᠤᠲᠠᠢ᠂ 《ᠭᠤᠤᠲᠤ᠂ ᠨᠠᠷᠢᠨ ᠬᠣᠭᠣᠯᠠᠢ》 ᠭᠡᠬᠦᠴᠢᠯᠡᠭᠰᠡᠨ ᠭᠤᠤ ᠵᠢᠯᠠᠭᠠᠲᠠᠢ᠂ 《ᠪᠤᠭᠤᠲᠤ᠂ ᠵᠡᠭᠡᠷᠡᠲᠦ》 ᠪᠤᠭᠤ ᠵᠡᠭᠡᠷᠡ ᠨᠠᠳᠬᠤᠨ ᠭᠦᠶᠦᠯᠳᠦᠭᠰᠡᠨ ᠲᠠᠩᠰᠤᠭ ᠪᠠᠢ᠌ᠭ᠋ᠠᠯᠢᠲᠠᠢ ᠦᠵᠡᠰᠭᠦᠯᠡᠩᠲᠦ ᠣᠷᠣᠨ ᠪᠠᠢ᠌ᠵᠠᠢ᠃ ᠪᠠᠢ᠌ᠭ᠋ᠠᠯᠢ ᠵᠢᠨ ᠰᠠᠢ᠌ᠬᠠᠨᠢ ᠳᠠᠭ᠋ᠠᠵᠤ ᠬᠦᠮᠦᠨᠤ ᠰᠠᠢ᠌ᠬᠠᠨ ᠢᠵᠢᠯᠢᠰᠢᠳᠡᠭ ᠵᠢᠨ ᠵᠢᠮᠡᠪᠠᠷ 《ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ᠂ ᠯᠠᠮᠠ ᠵᠢᠨ ᠲᠠᠯᠠ᠂ ᠰᠤᠪᠤᠷᠭᠠ》 ᠭᠡᠬᠦᠴᠢᠯᠡᠭᠰᠡᠨ ᠰᠦᠮᠡ ᠰᠤᠪᠤᠷᠭᠠ ᠰᠡᠬᠦᠢ᠌ᠯᠴᠡᠵᠦ᠂ ᠰᠣᠶᠣᠯ ᠲᠡᠦᠬᠡ ᠬᠦᠦᠷᠨᠢᠭᠰᠡᠨ ᠰᠠᠢ᠌ᠬᠠᠨ ᠨᠤᠲᠤᠭ ᠪᠢᠯᠡ᠃
ᠪᠠᠬᠠᠷᠤᠮᠠ ᠰᠠᠢ᠌ᠬᠠᠨ ᠪᠠᠶᠠᠨᠲᠠᠯᠠ ᠨᠤᠲᠤᠭ ᠮᠢᠨᠢ ᠪᠠᠳᠠᠷᠠᠯ ᠬᠦᠭᠵᠢᠯᠤᠨ ᠳᠠᠷᠬᠠᠨ ᠭᠤᠯᠤᠮᠲᠠ᠂ ᠪᠠᠭ᠋ᠠᠲᠤᠷᠯᠢᠭ ᠮᠣᠩᠭᠤᠯᠤᠨ ᠲᠡᠦᠬᠡ ᠤᠯᠪᠠᠭᠠ ᠂ ᠪᠠᠬᠠᠲᠤᠬᠤ ᠮᠠᠷᠭ᠋ᠠᠰᠢ ᠵᠢᠨ ᠤᠶᠠᠩᠭ᠋ᠠᠨ ᠬᠤᠷᠤᠢ ᠃
ᠰᠢᠪᠡᠭᠡᠲᠦ᠃ 《ᠰᠢᠪᠡᠭᠡᠲᠦ ᠭᠡᠳᠡᠭᠨᠢ ᠶᠠᠮᠠᠷ ᠤᠳᠬᠠᠲᠠᠢ ᠪᠣᠢ？》 ᠭᠡᠵᠤ ᠬᠠᠮᠲᠤ ᠠᠶᠠᠯᠠᠭᠰᠠᠳᠤᠨ ᠨᠢᠭᠡᠨᠢ ᠠᠰᠠᠭᠤᠬᠤᠳᠤ ᠪᠢ 《ᠶᠠᠭ᠋ᠠᠬᠢᠵᠤ ᠬᠠᠷᠢᠭᠤᠯᠬᠤ ᠪᠢᠯᠡ？》 ᠭᠡᠵᠤ ᠪᠠᠬᠠᠨ ᠲᠤᠯᠭ᠋ᠠᠮᠠᠳᠠᠵᠤ ᠠᠪᠤᠭᠰᠠᠨ ᠪᠢᠯᠡ᠃ ᠰᠢᠪᠡᠭᠡᠲᠦ ᠭᠡᠵᠤ ᠰᠢᠪᠡᠭᠡᠲᠠᠢ ᠭᠠᠵᠠᠷ ᠯᠠ ᠭᠡᠰᠡᠨ ᠦᠭᠡ᠃ ᠲᠡᠭᠡᠪᠡᠯ ᠰᠢᠪᠡᠭᠡ ᠭᠡᠵᠤ ᠶᠠᠭᠤ ᠶᠤᠮ ᠪᠣᠢ？ ᠨᠢᠭᠡᠳᠦᠭᠡᠷ ᠲᠠᠢ᠌ᠯᠪᠤᠷᠢᠨᠢ ᠮᠣᠳᠣ ᠪᠤᠷᠭ᠋ᠠᠰᠤ ᠵᠡᠷᠭᠡ ᠵᠢ ᠰᠦᠯᠵᠢᠨ ᠤᠶᠠᠵᠤ ᠭᠠᠵᠠᠷ ᠬᠠᠳᠬᠤᠨ ᠪᠠᠷᠢᠭᠰᠠᠨ ᠬᠠᠰᠢᠯᠭᠠ ᠬᠦᠷᠢᠶᠡ᠃ ᠰᠢᠪᠡᠭᠡᠲᠦ ᠭᠡᠬᠦ ᠨᠡᠷᠡᠢ᠌ᠳᠦᠯᠨᠢ ᠰᠢᠪᠡᠭᠡ ᠬᠠᠰᠢᠯᠭᠠᠲᠠᠢ ᠭᠠᠵᠠᠷ ᠭᠡᠰᠡᠨ ᠤᠳᠬᠠᠲᠠᠢ ᠶᠤᠮ ᠪᠣᠯᠪᠠ ᠦᠦ？ ᠰᠢᠷᠣᠢ ᠵᠢᠨ ᠬᠡᠷᠡᠮ᠂ ᠲᠣᠭᠣᠰᠬᠠᠨ ᠬᠡᠷᠡᠮ ᠮᠡᠨᠳᠦᠯᠡᠭᠰᠡᠨᠠᠴᠠ ᠰᠡᠭᠦᠯᠡᠷ ᠰᠢᠪᠡᠭᠡᠨ ᠬᠠᠰᠢᠯᠭᠠ ᠬᠠᠷᠠᠭᠳᠠᠬᠤᠪᠠᠨ ᠪᠣᠯᠢᠵᠤ᠂ ᠰᠢᠪᠡᠭᠡ ᠭᠡᠳᠡᠭ ᠦᠭᠡ ᠬᠠᠭᠤᠴᠢᠷᠠᠬᠤᠳᠤ ᠬᠦᠷᠴᠡᠢ᠃ ᠬᠣᠶᠠᠳᠤᠭ᠋ᠠᠷ ᠲᠠᠢ᠌ᠯᠪᠤᠷᠢᠨᠢ ᠬᠢᠯᠠᠭ᠋ᠠᠨᠠ ᠬᠡᠮᠡᠬᠦ ᠡᠪᠡᠰᠦᠨᠤ ᠤᠷᠲᠤ ᠪᠦᠭᠡᠳ ᠬᠤᠷᠴᠠ ᠦᠵᠦᠭᠦᠷᠲᠠᠢ ᠦᠷᠡ᠃ ᠰᠢᠪᠡᠭᠡ ᠬᠢᠯᠠᠭ᠋ᠠᠨᠠ ᠣᠯᠠᠨ ᠪᠠᠢ᠌ᠭᠰᠠᠨ ᠭᠠᠵᠠᠷ ᠭᠡᠬᠦ ᠤᠳᠬᠠᠪᠠᠷ ᠲᠠᠢ᠌ᠯᠪᠤᠷᠢᠯᠠᠪᠠᠯ ᠨᠡᠩ ᠣᠨᠣᠪᠴᠢᠲᠠᠢ ᠴᠦ᠍ ᠶᠤᠮ ᠦᠦ？ ᠡᠭᠦᠨᠤ ᠬᠠᠷᠢᠭᠤᠯᠲᠠ ᠵᠢ ᠣᠯᠠᠨ ᠵᠢᠯᠤᠨ ᠡᠮᠦᠨᠡᠬᠢ ᠨᠤᠲᠤᠭ ᠪᠠᠢ᠌ᠭ᠋ᠠᠯᠢᠠᠴᠠᠪᠠᠨ ᠠᠰᠠᠭᠤᠬᠤᠠᠴᠠ ᠦᠭᠡᠷᠡ ᠠᠷᠭᠠ ᠠᠯᠠᠭᠠ᠃ ᠭᠤᠷᠪᠠᠳᠤᠭ᠋ᠠᠷ ᠲᠠᠢ᠌ᠯᠪᠤᠷᠢᠨᠢ ᠬᠦᠮᠦᠨᠤ ᠪᠡᠯᠬᠡᠭᠦᠰᠦᠨᠤ ᠣᠷᠴᠢᠨ ᠪᠠᠢ᠌ᠬᠤ ᠣᠬᠣᠷ ᠬᠠᠪᠢᠰᠦ᠃ ᠡᠭᠦᠨ ᠵᠶ᠋ᠡᠷ ᠲᠠᠢ᠌ᠯᠪᠤᠷᠢᠯᠠᠪᠠᠯ ᠵᠣᠬᠢᠰ ᠵᠶ᠋ᠡᠷ ᠠᠨᠠᠢ᠃ ᠳᠦᠷᠪᠡᠳᠦᠭᠡᠷ ᠲᠠᠢ᠌ᠯᠪᠤᠷᠢᠨᠢ ᠰᠢᠪᠡᠭᠡ ᠦᠨᠳᠦᠰᠦᠲᠡᠨ᠃ ᠰᠢᠪᠡᠭᠡ ᠦᠨᠳᠦᠰᠦᠲᠡᠨ ᠠᠮᠢᠳᠤᠷᠠᠵᠤ ᠪᠠᠢ᠌ᠭᠰᠠᠨ ᠭᠠᠵᠠᠷ᠃ ᠡᠭᠦᠨ ᠵᠶ᠋ᠡᠷ ᠲᠠᠢ᠌ᠯᠪᠤᠷᠢᠯᠠᠪᠠᠯ ᠮᠥᠨ ᠵᠣᠬᠢᠰ ᠦᠭᠡᠢ᠃ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠨᠤᠲᠤᠭ ᠳᠡᠪᠢᠰᠭᠡᠷ ᠳᠡᠭᠡᠷᠡ ᠡᠷᠲᠡᠨᠤ ᠰᠢᠪᠡᠭᠡ ᠦᠨᠳᠦᠰᠦᠲᠡᠨ ᠠᠮᠢᠳᠤᠷᠠᠬᠤ ᠪᠣᠯᠣᠮᠵᠢ ᠪᠠᠢ᠌ᠳᠠᠭ ᠪᠣᠯᠪᠠᠴᠤ ᠮᠣᠩᠭᠤᠯᠴᠤᠳ ᠣᠪᠤᠭ ᠠᠢ᠌ᠮᠠᠭ᠂ ᠤᠭᠰᠠᠭᠠ ᠦᠨᠳᠦᠰᠦᠲᠡᠨᠤ ᠨᠡᠷᠡᠢ᠌ᠳᠦᠯ ᠳᠡᠭᠡᠷᠡ 《ᠳᠤ》 ᠳᠠᠭ᠋ᠠᠪᠤᠷᠢ ᠵᠠᠯᠭ᠋ᠠᠵᠤ ᠭᠠᠵᠠᠷᠤᠨ ᠨᠡᠷᠡ ᠪᠣᠯᠭ᠋ᠠᠳᠠᠭ ᠵᠠᠩᠰᠢᠯ ᠪᠠᠢ᠌ᠳᠠᠭ ᠦᠭᠡᠢ᠃ ᠲᠡᠭᠡᠬᠦᠪᠠᠷ ᠲᠤᠰ ᠳᠦᠷᠪᠡᠨ ᠲᠠᠢ᠌ᠯᠪᠤᠷᠢᠠᠴᠠ ᠨᠢᠭᠡ ᠬᠣᠶᠠᠳᠤᠭ᠋ᠠᠷ ᠵᠢ ᠭᠣᠣᠯᠴᠢᠯᠠᠵᠤ᠂ 《ᠰᠢᠪᠡᠭᠡᠲᠦ ᠠᠢ᠌ᠯ》ᠤᠨ ᠨᠡᠷᠡ ᠵᠢᠨ ᠢᠷᠡᠯᠲᠡ ᠪᠣᠯᠭ᠋ᠠᠵᠤ ᠲᠠᠢ᠌ᠯᠪᠤᠷᠢᠯᠠᠭᠰᠠᠨ ᠮᠢᠨᠢ ᠵᠦᠪ ᠡᠰᠡᠬᠦ ᠵᠢ ᠮᠡᠳᠡᠬᠦ ᠦᠭᠡᠢ ᠯᠠ ᠳ᠋ᠠ᠃ ᠭᠡᠪᠡᠴᠦ ᠪᠢ ᠠᠯᠳᠠᠷᠲᠤ ᠵᠣᠬᠢᠶᠠᠯᠴᠢ ᠴ᠊ · ᠳᠠᠮᠳᠢᠨᠰᠦᠢ᠍ᠷᠦᠩᠤᠨ 《ᠵᠤᠭ᠋ᠠᠴᠠᠷᠠ ᠮᠣᠷᠳᠠᠭᠰᠠᠨᠨᠢ》 ᠰᠢᠯᠦᠭᠲᠤᠬᠢ 《ᠡᠯᠢᠭᠡᠨ ᠶᠡᠬᠡ ᠬᠠᠳᠠᠨᠳᠤᠨᠢ ᠪᠦᠷᠭᠦᠳ ᠰᠢᠪᠠᠭᠤ ᠬᠠᠯᠢᠭᠰᠠᠨ / ᠡᠷᠭᠢ ᠵᠢᠯᠠᠭᠠ ᠪᠦᠭᠦᠳᠡᠳᠤᠨᠢ ᠠᠷᠢᠶᠠᠲᠠᠨ ᠭᠦᠷᠦᠭᠡᠰᠦ ᠰᠢᠪᠡᠭᠡᠯᠡᠭᠰᠡᠨ / ᠡᠶᠡᠯᠳᠡᠭ ᠠᠭᠤᠵᠢᠮ ᠲᠣᠬᠣᠢᠳᠤᠨᠢ ᠠᠢ᠌ᠯ ᠮᠠᠯ ᠵᠶ᠋ᠡᠷ ᠳᠦᠭᠦᠷᠦᠭᠰᠡᠨ / ᠡᠯᠳᠡᠪ ᠵᠢᠮᠢᠰᠤᠨ ᠮᠣᠳᠣᠪᠠᠷ ᠡᠭᠡᠯ ᠪᠡᠶᠡᠨᠢ ᠬᠤᠴᠢᠭᠳᠠᠭᠰᠠᠨ》 ᠭᠡᠬᠦ ᠪᠠᠳᠠᠭᠲᠤᠬᠢ 《ᠰᠢᠪᠡᠭᠡᠯᠡᠬᠦ》 ᠭᠡᠬᠦ ᠤᠳᠬᠠᠪᠠᠷ ᠲᠠᠢ᠌ᠯᠪᠤᠷᠢᠯᠠᠬᠤ ᠳᠤᠷᠠᠲᠠᠢ ᠃ ᠤᠴᠢᠷᠨᠢ ᠡᠨᠡ ᠲᠠᠢ᠌ᠯᠪᠤᠷᠢ᠂ ᠪᠠᠶᠠᠯᠢᠭ ᠰᠠᠢ᠌ᠬᠠᠨ ᠪᠠᠶᠠᠨᠲᠠᠯᠠ ᠨᠤᠲᠤᠭᠤᠨ ᠪᠠᠢ᠌ᠭ᠋ᠠᠯᠢ ᠲᠡᠦᠬᠡᠲᠠᠢ ᠨᠡᠩ ᠲᠣᠬᠢᠷᠠᠯᠴᠠᠨᠠ᠃ ᠮᠣᠩᠭᠤᠯᠴᠤᠳ ᠪᠢᠳᠡ ᠬᠦᠮᠦᠨ ᠠᠮᠢᠲᠠᠨ ᠣᠢ ᠮᠣᠳᠣᠨᠳᠤ ᠬᠣᠷᠭᠤᠳᠠᠨ ᠣᠷᠣᠩᠨᠠᠬᠤ ᠪᠤᠶᠤ ᠡᠭᠦᠷᠯᠡᠬᠦ ᠵᠢ 《ᠰᠢᠪᠡᠭᠡᠯᠡᠬᠦ》 ᠭᠡᠳᠡᠭ᠃ ᠶᠠᠭ ᠡᠨᠡ 《ᠰᠢᠪᠡᠭᠡᠲᠦ》 ᠭᠡᠰᠡᠨ ᠠᠢ᠌ᠯᠤᠨ ᠨᠡᠷᠡ ᠪᠣᠯ ᠡᠨᠡ ᠨᠤᠲᠤᠭ ᠵᠢᠨ ᠣᠢ ᠰᠢᠭᠤᠢ ᠢᠭᠴᠤ ᠰᠠᠬᠤᠯᠢᠭ᠂ ᠪᠤᠭᠤ ᠵᠡᠭᠡᠷᠡ 《ᠰᠢᠪᠡᠭᠡᠯᠡᠨ ᠣᠷᠣᠩᠨᠠᠭᠰᠠᠨ》 ᠪᠠᠢ᠌ᠭ᠋ᠠᠯᠢ ᠵᠢᠨ ᠲᠠᠩᠰᠤᠭ ᠣᠷᠣᠨ ᠪᠠᠢ᠌ᠭᠰᠠᠨᠤ ᠭᠡᠷᠡᠴᠢ ᠪᠢᠯᠡ᠃
ᠬᠡᠯᠡᠯᠭᠡᠨ ᠦᠭᠡᠢ ᠣᠳᠤᠬᠠᠨᠤ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯ ᠲᠠᠪᠤᠨ ᠲᠠᠷᠢᠶᠠ ᠬᠠᠯᠢᠭᠤᠷᠠᠭᠰᠠᠨ ᠠᠭᠤᠳᠠᠮᠬᠠᠨ ᠲᠠᠯᠠ᠂ ᠬᠡᠳᠦᠨ ᠵᠠᠭᠤᠨ ᠡᠷᠦᠬᠡ ᠵᠢᠭᠳᠡᠷᠡᠯᠴᠡᠭᠰᠡᠨ ᠲᠣᠮᠤᠬᠠᠨ ᠲᠣᠰᠬᠤᠨ᠂ ᠦᠢ᠍ᠯᠡᠳᠪᠦᠷᠢ᠂ ᠮᠠᠯ᠂ ᠲᠠᠷᠢᠶᠠᠯᠠᠩ ᠵᠡᠷᠭᠡᠴᠡᠨ ᠬᠦᠭᠵᠢᠭᠰᠡᠨ ᠬᠦᠭᠵᠢᠯ ᠪᠠᠳᠠᠷᠠᠯᠲᠠᠢ ᠰᠢᠨᠡ ᠬᠦᠳᠡᠭᠡ ᠪᠤᠯᠤᠨᠠ᠃ ᠠᠬᠤᠢ ᠪᠠᠢ᠌ᠭ᠋ᠠᠯᠢ᠂ ᠨᠡᠢ᠌ᠭᠡᠮ ᠠᠮᠢᠳᠤᠷᠠᠯᠤᠨ ᠬᠤᠪᠢᠷᠠᠯᠲᠠ ᠬᠦᠭᠵᠢᠯᠲᠡ ᠵᠢ ᠳᠠᠭ᠋ᠠᠵᠤ᠂ ᠭᠠᠵᠠᠷᠤᠨ ᠪᠠᠢ᠌ᠴᠠ᠂ ᠬᠦᠷᠦᠰᠦᠨᠤ ᠪᠦᠷᠬᠦᠴᠡ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠤᠪᠢᠷᠠᠳᠠᠭᠤᠨ ᠰᠢᠯᠲᠠᠭ᠋ᠠᠨ ᠵᠶ᠋ᠠᠷ ᠰᠢᠭᠤᠢ ᠪᠠᠯᠠᠷᠠᠵᠤ᠂ ᠰᠢᠷᠠ ᠬᠦᠷᠦᠰᠦ ᠲᠣᠳᠤᠷᠠᠵᠤ᠂ ᠰᠢᠵᠢᠷ ᠲᠠᠷᠢᠶᠠ ᠬᠠᠯᠢᠭᠤᠷᠠᠭᠰᠠᠨ ᠦᠨᠦᠳᠦᠷᠤᠨ ᠥᠩᠭᠡ ᠳᠦᠷᠰᠦ᠂ ᠥᠨᠥᠳᠦᠷᠤᠨ ᠬᠠᠷᠠᠴᠠᠪᠠᠷ ᠭᠠᠵᠠᠷᠤᠨ ᠨᠡᠷᠡᠢ᠌ᠳᠦᠯᠢ ᠲᠠᠢ᠌ᠯᠪᠤᠷᠢᠯᠠᠬᠤᠨᠢ ᠠᠷᠠᠢ ᠵᠣᠬᠢᠰ ᠦᠭᠡᠢ ᠪᠣᠯᠪᠠ ᠦᠦ ᠭᠡᠵᠦ ᠪᠣᠳᠤᠭᠳᠠᠬᠤ ᠶᠣᠮ᠃ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯᠤᠨ ᠦᠩᠭᠡᠷᠡᠭᠰᠡᠨᠤ ᠥᠩᠭᠡ ᠳᠥᠷᠰᠦ ᠵᠢ 《ᠰᠢᠪᠡᠭᠡᠲᠦ》 ᠭᠡᠬᠦ ᠭᠠᠵᠠᠷᠤᠨ ᠨᠡᠷᠡᠢ᠌ᠳᠦᠯ ᠦᠭᠦᠯᠡᠭᠡᠳ ᠪᠠᠢ᠌ᠭᠠ ᠮᠡᠲᠦ᠃
ᠰᠢᠪᠡᠭᠡ ᠪᠣᠶᠣ ᠰᠢᠪᠡᠭᠡᠲᠦ ᠭᠡᠬᠦ ᠭᠠᠵᠠᠷ ᠣᠷᠣᠨᠤ ᠨᠡᠷᠡᠢ᠌ᠳᠦᠯ ᠮᠣᠩᠭᠤᠯ ᠣᠷᠣᠨᠳᠤ ᠵᠦᠩᠳᠡᠭᠡᠨ᠃ ᠰᠢᠯᠢ ᠵᠢᠨ ᠭᠣᠣᠯᠤᠨ ᠬᠦᠪᠡᠭᠡᠲᠦ ᠰᠢᠷᠠ ᠬᠣᠰᠢᠭᠤ᠂ ᠪᠠᠶᠠᠨᠨᠠᠭᠤᠷ ᠠᠢ᠌ᠮᠠᠭᠤᠨ ᠤᠷᠠᠳᠤᠨ ᠳᠤᠮᠳᠠᠳᠤ ᠬᠣᠰᠢᠭᠤ᠂ ᠬᠢᠩᠭ᠋ᠠᠨ ᠠᠢ᠌ᠮᠠᠭᠤᠨ ᠬᠣᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠡᠮᠦᠨᠡᠲᠦ ᠬᠣᠰᠢᠭᠤ᠂ ᠯᠢᠶᠣᠣᠨᠢᠩ ᠮᠣᠵᠢ ᠵᠢᠨ ᠹᠦᠰᠢᠨᠤ ᠮᠣᠩᠭᠤᠯ ᠦᠨᠳᠦᠰᠦᠲᠡᠨᠤ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠰᠢᠶᠠᠨ᠂ ᠬᠦᠷᠢᠶᠡ ᠬᠣᠰᠢᠭᠤ ᠵᠡᠷᠭᠡ ᠭᠠᠵᠠᠷ ᠣᠷᠣᠨ ᠵᠶ᠋ᠡᠷ ᠰᠢᠪᠡᠭᠡᠲᠦ ᠪᠣᠶᠣ ᠡᠷᠭᠢ ᠵᠢᠨ ᠰᠢᠪᠡᠭᠡ ᠭᠡᠬᠦ ᠨᠡᠷᠡᠢ᠌ᠳᠦᠯᠲᠠᠢ ᠭᠠᠵᠠᠷ ᠣᠷᠣᠨ ᠪᠠᠢ᠌ᠳᠠᠭ᠃ ᠡᠭᠦᠨᠳᠤ ᠡᠷᠭᠢ ᠵᠢᠨ ᠰᠢᠪᠡᠭᠡ ᠭᠡᠬᠦ ᠨᠡᠷᠡᠢ᠌ᠳᠦᠯᠨᠢ ᠰᠢᠪᠡᠭᠡ ᠬᠠᠰᠢᠶᠠᠠᠴᠠ ᠢᠷᠡᠯᠲᠡᠲᠠᠢ᠂ ᠪᠣᠰᠤᠳ ᠭᠠᠵᠠᠷ ᠣᠷᠣᠨᠤ ᠰᠢᠪᠡᠭᠡᠲᠦ ᠭᠡᠳᠡᠭᠨᠢ ᠮᠥᠨ ᠠᠩ ᠭᠦᠷᠦᠭᠡᠰᠦ ᠰᠢᠪᠡᠭᠡᠯᠡᠭᠰᠡᠨ ᠭᠡᠬᠦ ᠤᠳᠬᠠᠲᠠᠢ ᠶᠤᠮ ᠪᠣᠯᠪᠠ ᠦᠦ？ ᠡᠰᠡᠭᠦᠯᠡ ᠰᠢᠪᠡᠭᠡ ᠬᠠᠰᠢᠶᠠ？ ᠶᠠᠭᠤ ᠴᠦ᠍ ᠪᠣᠯᠣᠭᠰᠠᠨ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯᠤᠨ ᠨᠡᠷᠡ 《ᠰᠢᠪᠡᠭᠡᠯᠡᠬᠦ》 ᠭᠡᠬᠦ ᠦᠭᠡᠨᠠᠴᠠ ᠢᠷᠡᠯᠲᠡᠲᠠᠢ ᠭᠡᠳᠡᠭᠢ ᠳᠠᠷᠠᠭᠠ ᠦᠷᠲᠡᠭᠡ 《ᠵᠡᠭᠡᠷᠡᠲᠦ》 ᠨᠡᠷᠡᠲᠠᠢ ᠠᠢ᠌ᠯ ᠲᠠᠨᠳᠤ ᠬᠠᠷᠢᠭᠤᠯᠲᠠ ᠦᠭᠭᠦᠨᠡ᠃
ᠵᠡᠭᠡᠷᠳᠡ （ᠵᠡᠭᠡᠷᠡᠲᠦ）᠃ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯᠤᠨ ᠵᠡᠷᠭᠡᠯᠡᠳᠡᠭᠡ ᠵᠡᠭᠡᠷᠡᠲᠦ ᠵᠢᠨ ᠠᠢ᠌ᠯ ᠭᠡᠵᠤ ᠪᠠᠢ᠌ᠳᠠᠭ᠃ ᠲᠤᠰ ᠠᠢ᠌ᠯᠳᠤ ᠬᠢᠲᠠᠳ ᠮᠣᠩᠭᠤᠯ ᠬᠣᠯᠢᠯᠳᠣᠨ ᠰᠠᠭᠤᠷᠢᠰᠢᠵᠠᠢ᠃ ᠲᠣᠰᠬᠣᠨᠤ ᠺᠠᠳ᠋ᠷᠤᠨ ᠠᠯᠪᠠᠯᠠᠬᠤ ᠭᠠᠵᠠᠷ ᠬᠦᠷᠬᠦᠳᠤ ᠬᠢᠲᠠᠳ ᠮᠣᠩᠭᠤᠯ ᠦᠰᠦᠭ ᠵᠶ᠋ᠡᠷ 《 ᠪᠠᠶᠠᠨᠲᠠᠯᠠ ᠰᠤᠮᠤ ᠵᠢᠨ ᠵᠡᠭᠡᠷᠳᠡ ᠲᠣᠰᠬᠤᠨᠤ ᠲᠤᠰᠬᠤᠨᠤ ᠶᠠᠪᠤᠳᠠᠯᠳᠤ ᠬᠢᠨᠠᠯᠲᠠ ᠲᠠᠯᠪᠢᠬᠤ ᠵᠦᠪᠯᠡᠯ》 《ᠪᠠᠶᠠᠨᠲᠠᠯᠠ ᠰᠤᠮᠤ ᠵᠢᠨ ᠵᠡᠭᠡᠷᠳᠡ ᠲᠤᠰᠬᠤᠨᠤ ᠲᠤᠰᠬᠤᠨᠤ ᠠᠷᠠᠳᠤᠨ ᠵᠦᠪᠯᠡᠯ》᠂ 《ᠵᠡᠭᠡᠷᠳᠡ ᠲᠤᠰᠬᠤᠨᠤ ᠨᠠᠮᠤᠨ ᠡᠭᠦᠷ》 ᠭᠡᠰᠡᠨ ᠪᠢᠴᠢᠭᠡᠰᠦ ᠳᠤᠷᠠᠢ᠌ᠵᠤ ᠬᠠᠷᠠᠭᠳᠠᠨᠠ᠃ ᠲᠤᠰ ᠭᠠᠵᠠᠷ ᠵᠡᠭᠡᠷᠳᠡ ᠮᠣᠷᠢᠲᠠᠢ ᠬᠣᠯᠪᠤᠭᠳᠠᠭᠰᠠᠨ ᠲᠡᠦᠬᠡᠨ ᠳᠣᠮᠣᠭ ᠪᠣᠢ ᠦᠦ？ ᠲᠤᠰᠬᠤᠨᠤ ᠨᠡᠷᠡ ᠶᠠᠭᠤᠨᠤ ᠢᠷᠡᠯᠲᠡᠲᠠᠢ ᠶᠤᠮ ᠪᠣᠯ？ ᠭᠡᠵᠤ ᠰᠣᠨᠢᠭᠤᠴᠢᠯᠠᠨ ᠠᠰᠠᠭᠤᠬᠤᠳᠤ᠂ ᠲᠤᠰᠬᠤᠨᠤ ᠵᠠᠯᠠᠭᠤᠬᠠᠨ ᠺᠠᠳ᠋ᠷ᠄ 《ᠮᠡᠳᠡᠬᠦ ᠦᠭᠡᠢ ᠶᠤᠮ ᠡ᠂ ᠪᠠᠷᠤᠭ ᠵᠡᠭᠡᠷᠳᠡ ᠮᠣᠷᠢᠲᠠᠢ ᠬᠣᠯᠪᠣᠭᠳᠠᠬᠤ ᠦᠯᠢᠭᠡᠷ ᠪᠠᠢ᠌ᠭᠰᠠᠨ ᠪᠠᠢ᠌ᠬᠤ》 ᠭᠡᠪᠡ᠃ ᠵᠡᠭᠡᠷᠲᠡ ᠮᠣᠷᠢᠲᠠᠢ ᠬᠣᠯᠪᠤᠭᠳᠠᠭᠰᠠᠨ ᠶᠠᠮᠠᠷ ᠰᠠᠢ᠌ᠬᠠᠨ ᠦᠯᠢᠭᠡᠷ ᠳᠣᠮᠣᠭ ᠪᠠᠢ᠌ᠳᠠᠭ ᠶᠤᠮ ᠪᠣᠯ？
ᠪᠤᠴᠠᠬᠤ ᠵᠠᠮᠳᠤᠪᠠᠨ ᠪᠢ 《ᠰᠢᠪᠡᠭᠡᠲᠦ》᠂ 《ᠵᠡᠭᠡᠷᠡᠲᠦ》᠂ 《ᠪᠤᠭᠤᠲᠤ》 ᠭᠤᠷᠪᠠᠭᠤᠯᠠ ᠬᠣᠯᠪᠣᠭᠳᠠᠯᠲᠠᠢ ᠪᠠᠢ᠌ᠮᠠᠷ ᠭᠡᠵᠤ ᠲᠠᠭ᠋ᠠᠮᠠᠭᠯᠠᠨ ᠪᠣᠳᠣᠯᠠ᠃ ᠵᠡᠭᠡᠷᠳᠡ （ᠵᠡᠭᠡᠷᠡᠲᠦ） ᠵᠢᠨ ᠠᠢ᠌ᠯᠠᠴᠠ ᠵᠡᠭᠦᠨᠰᠢ ᠲᠦᠢ᠍ᠮᠡᠷ ᠲᠦᠩ᠂ ᠬᠣᠩᠬᠣᠷ ᠲᠦᠩ ᠵᠡᠷᠭᠡ ᠣᠢ ᠰᠢᠭᠤᠢ ᠢᠭᠴᠤ ᠰᠠᠬᠤᠯᠢᠭ ᠪᠠᠯᠠᠷ ᠲᠦᠩᠲᠠᠢ ᠭᠠᠵᠠᠷ ᠪᠠᠢ᠌ᠭᠰᠠᠨᠢ ᠭᠡᠷᠡᠴᠢᠯᠡᠬᠦ ᠠᠢ᠌ᠯ ᠲᠤᠰᠬᠤᠨᠤ ᠨᠡᠷᠡᠢ᠌ᠳᠦᠯ ᠪᠠᠢ᠌ᠳᠠᠭ᠃ ᠵᠡᠭᠡᠷᠡᠲᠦ ᠵᠢᠨ ᠠᠢ᠌ᠯᠤᠨ ᠨᠡᠷᠡᠢ᠌ᠳᠦᠯᠨᠢ ᠮᠣᠷᠢᠨᠤ ᠵᠢᠰᠤᠮ ᠵᠡᠭᠡᠷᠳᠡ ᠪᠢᠰᠢ᠂ ᠬᠠᠷᠢᠨ ᠪᠣᠭᠣ ᠵᠡᠭᠡᠷᠡ ᠵᠢᠨ ᠵᠡᠭᠡᠷᠡ ᠪᠣᠯᠬᠣ ᠵᠢ ᠡᠷᠭᠢᠨ ᠲᠣᠭᠣᠷᠢᠨᠤᠬᠢᠨᠢ ᠠᠢ᠌ᠯ ᠲᠤᠰᠬᠤᠨᠤ ᠨᠡᠷᠡᠢ᠌ᠳᠦᠯ ᠭᠡᠷᠡᠴᠢᠯᠡᠨᠡ᠃ ᠨᠤᠲᠤᠭ ᠪᠠᠢ᠌ᠭ᠋ᠠᠯᠢ ᠵᠢᠨ ᠲᠠᠩᠰᠤᠭ ᠰᠠᠢ᠌ᠬᠠᠨᠤ ᠭᠡᠷᠡᠴᠢ ᠪᠣᠯᠤᠭᠰᠠᠨ ᠡᠨᠡ ᠰᠠᠢ᠌ᠬᠠᠨ ᠨᠡᠷᠡᠢ᠌ᠳᠦᠯ ᠲᠡᠷᠡ ᠴᠢᠭ ᠵᠶ᠋ᠡᠷ ᠵᠶ᠋ᠡᠨ ᠨᠠᠢ᠍ᠮᠠᠨ ᠨᠤᠲᠤᠭᠤᠨ ᠪᠠᠢ᠌ᠭ᠋ᠠᠯᠢ ᠭᠠᠵᠠᠷ ᠵᠦᠢ ᠵᠢᠨ ᠲᠡᠦᠬᠡ ᠮᠥᠨ᠃ ᠦᠦᠬᠡ ᠲᠡᠦᠬᠡ ᠶᠠᠭᠤ ᠪᠣᠯ？ ᠦᠨᠡᠨ ᠮᠦᠷᠳᠡᠯᠡᠭᠡ ᠶᠠᠭᠤ ᠪᠣᠯ？ ᠭᠡᠵᠤ ᠪᠣᠳᠣᠯᠭ᠋ᠠᠰᠢᠷᠠᠨ ᠬᠠᠮᠲᠤ ᠠᠶᠠᠯᠠᠭᠰᠠᠨ ᠣᠯᠠᠨᠤᠪᠠᠨ ᠠᠷᠤᠠᠴᠠ ᠭᠡᠯᠲᠦᠷᠢᠭᠰᠡᠭᠡᠷ ᠶᠠᠪᠤᠬᠤᠳᠤ 《ᠵᠡᠭᠡᠷᠡ ᠲᠠᠭᠰᠢᠭᠰᠠᠨ ᠭᠤᠪᠢᠨᠢ ᠵᠡᠷᠭᠡᠯᠭᠡᠨ ᠳᠤᠮᠳᠠᠪᠠᠨ ᠪᠤᠳᠠᠩᠲᠠᠢ᠂ ᠵᠢᠩᠬᠢᠨᠢ ᠠᠮᠠᠷᠠᠭ ᠬᠣᠶᠠᠷᠨᠢ ᠰᠡᠳᠭᠢᠯ ᠳᠤᠮᠳᠠᠪᠠᠨ ᠪᠤᠳᠠᠩᠲᠠᠢ》 ᠭᠡᠬᠦ 《ᠴᠣᠢ᠌ᠳᠠᠷ ᠨᠣᠷᠵᠢᠨ ᠬᠣᠶᠠᠷ》 ᠭᠡᠬᠦ ᠺᠢᠨᠤ᠋ ᠵᠢᠨ ᠳᠠᠭᠤᠤ ᠬᠠᠮᠢᠭᠠ ᠨᠢᠭᠡ ᠵᠦᠭᠠᠴᠠ ᠮᠢᠨᠦ ᠵᠦᠭ ᠤᠶᠠᠩᠭ᠋ᠠᠷᠠᠭ᠋ᠠᠳ ᠨᠠᠭ᠋ᠠᠰᠢᠯᠠᠬᠤ ᠰᠢᠭ᠋᠃ ᠡᠨᠡ ᠰᠠᠢ᠌ᠬᠠᠨ ᠢᠨᠠᠭᠤᠨ ᠳᠠᠭᠤᠤ 《ᠵᠡᠭᠡᠷᠡᠲᠦ》 ᠵᠢᠨ ᠠᠢ᠌ᠯᠲᠠᠢ ᠶᠠᠮᠠᠷ ᠬᠣᠯᠪᠣᠭᠳᠠᠯ ᠪᠠᠢ᠌ᠬᠤ ᠪᠢᠯᠡ？ ᠭᠡᠵᠤ ᠪᠣᠳᠣᠭ᠋ᠠᠳ ᠦᠪᠡᠷᠢᠪᠠᠨ ᠳᠣᠭᠣᠭᠢᠯᠠᠭᠰᠠᠭ᠋ᠠᠷ ᠨᠢᠭᠡ ᠮᠡᠳᠡᠬᠦᠳᠤ ᠬᠦᠮᠦᠰ ᠮᠠᠰᠢᠨᠳᠤᠪᠠᠨ ᠭᠠᠷᠴᠤ ᠨᠦᠭᠦᠭᠡ ᠲᠣᠰᠬᠣᠨ ᠵᠦᠭ ᠮᠣᠷᠳᠠᠬᠤᠪᠠᠷ ᠪᠡᠯᠡᠬᠡᠨ ᠪᠣᠯᠪᠠ᠃ ᠵᠠᠮ ᠵᠠᠭᠤᠷᠠ ᠨᠦᠭᠦᠭᠡ ᠯᠠ 《ᠵᠡᠭᠡᠷᠡ ᠲᠠᠭᠰᠢᠭᠰᠠᠨ ᠭᠤᠪᠢᠨᠢ》 ᠭᠡᠬᠦ ᠳᠠᠭᠤᠤ ᠵᠢᠨ ᠠᠶᠠ ᠪᠣᠳᠣᠭᠳᠠᠭᠰᠠᠭ᠋ᠠᠷ ᠯᠠ ᠪᠠᠢ᠌ᠪᠠ᠃ ᠲᠡᠷᠡ ᠡᠳᠦᠷᠤᠨ ᠪᠠᠶᠠᠨᠲᠠᠯᠠ ᠵᠢᠨ ᠭᠤᠪᠢ ᠪᠤᠳᠠᠩ ᠦᠭᠡᠢ ᠲᠤᠩᠭ᠋ᠠᠯᠠᠭ᠃ ᠪᠢ ᠮᠠᠰᠢᠨᠤ ᠴᠣᠩᠬᠣᠪᠠᠷ ᠪᠠᠷᠠᠯᠠᠬᠤᠳᠤᠪᠠᠨ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷᠠᠴᠠ ᠰᠦᠷᠦᠭ ᠵᠡᠭᠡᠷᠡ ᠵᠢᠷᠪᠢᠯᠵᠡᠨ ᠦᠩᠭᠡᠷᠡᠬᠦ ᠬᠠᠷᠠᠭᠳᠠᠪᠠᠯ ᠶᠠᠭᠤᠲᠠᠢ ᠰᠠᠢ᠌ᠬᠠᠨ ᠭᠡᠵᠤ ᠬᠦᠰᠡᠯᠡᠩᠤᠨ ᠰᠠᠢ᠌ᠬᠠᠨᠳᠤ ᠱᠤᠮᠪᠠᠵᠤ ᠶᠠᠪᠤᠯᠠ᠃
ᠪᠣᠭᠲᠣ （ᠪᠣᠭᠣᠲᠤ）᠃ ᠪᠤᠭᠲᠤ ᠵᠢᠨ ᠠᠢ᠌ᠯᠤᠨ ᠨᠡᠷᠡ ᠵᠢᠨ ᠢᠷᠡᠯᠲᠡ ᠵᠢᠨ ᠲᠤᠬᠠᠢ ᠡᠢ᠌ᠮᠦ ᠨᠢᠭᠡ ᠰᠠᠢ᠌ᠬᠠᠨ ᠳᠣᠮᠣᠭ ᠪᠠᠢ᠌ᠳᠠᠭ᠃ ᠤᠷᠢᠳᠦᠳᠤ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠸᠠᠩᠤᠨ ᠣᠢ᠌ᠷᠠ ᠲᠦᠷᠦᠯ ᠪᠣᠯᠬᠣ ᠤᠯᠠᠭ᠋ᠠᠨ ᠵᠢᠩᠰᠡᠲᠠᠢ ᠨᠣᠶᠠᠨᠨᠢ ᠣᠳᠣ ᠵᠢᠨ ᠪᠣᠭᠲᠤ ᠭᠠᠴᠠᠭᠠ ᠵᠢᠨ ᠨᠣᠶᠠᠨᠤ ᠨᠤᠲᠤᠭ ᠭᠡᠳᠡᠭ ᠭᠠᠵᠠᠷ ᠨᠤᠲᠤᠭᠯᠠᠵᠤ ᠪᠠᠢ᠌ᠵᠠᠢ᠃ ᠲᠤᠰ ᠨᠣᠶᠠᠨ 《ᠨᠢᠳᠦ ᠵᠢᠨᠢ ᠵᠢᠭ᠋ᠠᠪᠠᠯ ᠬᠠᠮᠠᠷᠢᠨᠢ ᠣᠨᠣᠭ᠋ᠠᠳᠠᠭ ᠦᠭᠡᠢ ᠴᠡᠴᠡᠨ ᠫᠣᠣᠴᠢ ᠪᠠᠢ᠌ᠵᠠᠢ᠃ ᠨᠢᠭᠡᠨ ᠤᠳᠠᠭᠠ ᠠᠪᠠᠳᠤ ᠭᠠᠷᠬᠤᠳᠤ ᠲᠠᠰ ᠰᠢᠪᠠᠭᠤ ᠲᠠᠭ᠋ᠠᠷᠠᠯᠳᠤᠪᠠ ᠭᠡᠨᠡ᠃ ᠮᠡᠷᠭᠡᠨ ᠫᠤᠤᠴᠢ ᠵᠡᠭᠦᠨ ᠨᠢᠳᠦᠪᠠᠷ ᠵᠶ᠋ᠡᠨ ᠣᠨᠢᠯᠠᠵᠤ ᠬᠠᠷᠪᠤᠭ᠋ᠠᠳ ᠣᠨᠣᠭ᠋ᠠᠵᠤ ᠳᠡᠢ᠌ᠯᠦᠭᠰᠡᠨ ᠦᠭᠡᠢ᠂ ᠪᠠᠷᠠᠭᠤᠨ ᠨᠢᠳᠦᠪᠠᠷ ᠵᠶ᠋ᠡᠨ ᠣᠨᠢᠯᠠᠵᠣ ᠬᠠᠷᠪᠤᠭᠰᠠᠨ ᠴᠢᠨᠢ ᠨᠢᠭᠡ ᠯᠠ ᠦᠳᠦ ᠵᠢᠨᠢ ᠤᠨᠠᠭ᠋ᠠᠪᠠ ᠭᠡᠨᠡ᠃ ᠲᠠᠰᠢ ᠬᠠᠷᠪᠤᠭ᠋ᠠᠳ 《ᠰᠡᠪᠳᠦᠭᠰᠡᠨ》 ᠶᠤᠮ ᠦᠦ？ ᠬᠣᠯᠠ ᠣᠢ᠌ᠷᠠᠳᠤᠪᠠᠨ ᠠᠯᠳᠠᠷᠲᠠᠢ ᠮᠡᠷᠭᠡᠨ ᠫᠣᠣᠴᠢ ᠣᠨᠣᠭ᠋ᠠᠵᠤ ᠳᠡᠢ᠌ᠯᠦᠭᠰᠡᠨ ᠦᠭᠡᠢᠳᠤᠪᠠᠨ ᠬᠡᠲᠦᠷᠬᠡᠢ ᠵᠣᠪᠠᠭᠰᠠᠨᠠᠴᠠ ᠪᠣᠯᠣᠭᠰᠠᠨ ᠶᠤᠮ ᠦᠦ？ ᠪᠣᠣ ᠮᠡᠳᠡ᠃ ᠲᠡᠭᠦᠨᠠᠴᠠ ᠬᠣᠢ᠌ᠰᠢ ᠨᠣᠶᠠᠨ ᠮᠠᠭᠤ ᠡᠪᠡᠳᠴᠢᠨᠳᠤ ᠨᠡᠷᠪᠡᠭᠳᠡᠭᠡᠳ ᠵᠠᠰᠠᠪᠤᠷᠢ ᠠᠪᠤᠭᠰᠠᠨ ᠦᠭᠡᠢ ᠲᠠᠭ᠋ᠠᠯᠠᠯ ᠪᠤᠯᠵᠠᠢ᠃ ᠰᠡᠭᠦᠯᠡᠷᠨᠢ ᠡᠳᠦᠷ ᠪᠦᠷᠢ ᠪᠦᠷᠦᠢ ᠲᠠᠰᠤᠷᠠᠬᠤ ᠦᠶᠡᠪᠠᠷ ᠨᠣᠶᠠᠨᠤ ᠭᠡᠷᠢ ᠲᠣᠭᠣᠷᠢᠭ᠋ᠠᠳ ᠬᠦᠷᠴᠢᠭᠢᠨᠡᠵᠦ ᠳᠦᠷᠴᠢᠭᠢᠨᠡᠭᠡᠳ ᠲᠡᠷᠭᠡ ᠤᠨᠣᠭᠠ ᠨᠠᠭ᠋ᠠᠰᠢ ᠴᠠᠭ᠋ᠠᠰᠢ ᠶᠠᠪᠤᠵᠤ ᠪᠠᠢ᠌ᠭᠠ ᠰᠢᠭ᠋ ᠪᠣᠯᠬᠣᠷ ᠡᠮᠡᠰ ᠬᠡᠦᠬᠡᠳᠨᠢ ᠠᠶᠤᠭ᠋ᠠᠳ ᠨᠡᠭᠦᠭᠡᠳ ᠶᠠᠪᠤᠴᠢᠬᠠᠭᠰᠠᠨ ᠭᠡᠨᠡ᠃ ᠨᠣᠶᠠᠨ ᠪᠣᠭ ᠪᠣᠰᠴᠢᠬᠠᠯᠠ ᠭᠡᠳ ᠠᠢ᠌ᠯ ᠠᠢ᠌ᠮᠠᠭᠤᠨ ᠬᠦᠮᠦᠰᠨᠢ ᠴᠦ᠍ ᠠᠶᠤᠵᠤ ᠵᠢᠷᠦᠬᠡᠰᠢᠶᠡᠭᠡᠳ ᠪᠠᠢ᠌ᠳᠠᠭ ᠪᠣᠯᠬᠣᠷ ᠯᠠᠮᠠ ᠭᠡᠭᠡᠨ ᠵᠠᠯᠠᠵᠤ ᠳᠣᠯᠣᠭᠠ ᠳᠣᠯᠣᠭᠠ ᠳᠦᠴᠢ ᠶᠢᠰᠦᠨ ᠬᠣᠨᠣᠭ ᠨᠣᠮ ᠭᠦᠷᠢᠮ ᠤᠩᠰᠢᠭᠤᠯᠤᠭ᠋ᠠᠳ ᠰᠠᠶᠢ ᠪᠣᠭ ᠪᠣᠰᠬᠤᠪᠠᠨ ᠪᠣᠯᠢᠭᠰᠠᠨ ᠭᠡᠨᠡ᠃ ᠲᠡᠭᠦᠨᠠᠴᠠ ᠠᠪᠤᠭ᠋ᠠᠳ ᠲᠤᠰ ᠠᠢ᠌ᠯᠢ 《ᠪᠤᠭᠲᠤ ᠵᠢᠨ ᠠᠢ᠌ᠯ》 ᠭᠡᠳᠡᠭ ᠪᠣᠯᠵᠠᠢ᠃ ᠡᠢ᠌ᠮᠦ ᠰᠠᠢ᠌ᠬᠠᠨ ᠨᠤᠲᠤᠭᠲᠤ ᠡᠢ᠌ᠮᠦ ᠨᠢᠭᠡ ᠦᠯᠢᠭᠡᠷ ᠳᠡᠯᠭᠡᠷᠡᠨᠡ ᠭᠡᠭᠴᠢ ᠨᠢᠭᠡᠨ ᠴᠠᠭ ᠦᠶᠡ ᠵᠢᠨ ᠬᠦᠮᠦᠨ ᠠᠷᠠᠳᠤᠨ ᠲᠠᠨᠢᠯᠲᠠ᠂ ᠰᠡᠳᠭᠢᠬᠦᠢ᠂ ᠰᠣᠶᠣᠯ ᠠᠷᠠᠨᠰᠢᠨᠤ ᠢᠯᠡᠷᠡᠯ ᠪᠠᠢ᠌ᠵᠠᠢ᠃ ᠪᠤᠭᠲᠤ ᠪᠢᠰᠢ᠂ ᠪᠣᠭᠤᠲᠤ ᠪᠠᠢ᠌ᠬᠤ ᠶᠣᠰᠣᠲᠠᠢ ᠭᠡᠵᠤ ᠪᠢ ᠪᠣᠳᠣᠳᠠᠭ᠂ ᠬᠦᠰᠡᠳᠡᠭ᠃
ᠪᠣᠭᠤᠲᠤ ᠭᠡᠵᠤ ᠪᠣᠭᠣᠲᠠᠢ ᠭᠠᠵᠠᠷᠢ ᠨᠡᠷᠡᠢ᠌ᠳᠦᠭᠰᠡᠨ ᠰᠠᠢ᠌ᠬᠠᠨ ᠯᠠ ᠨᠡᠷᠡ᠃ ᠮᠣᠨᠢ ᠠᠭᠤᠯᠠᠨᠤ ᠡᠩᠭᠡᠷᠲᠤ ᠮᠠᠨᠳᠤᠯ ᠬᠦᠭᠵᠢᠯᠤᠨ ᠭᠢᠯᠪᠠᠭᠠᠪᠠᠨ ᠰᠠᠴᠤᠷᠠᠭᠤᠯᠤᠭᠰᠠᠨ ᠪᠣᠭᠣᠲᠣ ᠭᠡᠳᠡᠭ ᠲᠣᠮᠣ ᠬᠣᠲᠠ ᠪᠠᠢ᠌ᠨᠠ ᠭᠡᠬᠦᠯᠡᠷ ᠤᠯᠠᠭ᠋ᠠᠨᠬᠠᠳᠠ ᠲᠦᠩᠯᠢᠶᠣᠣ ᠵᠢᠨ ᠳᠤᠮᠳᠠᠬᠢ ᠠᠤᠬᠠᠨ ᠬᠣᠰᠢᠭᠤ᠂ ᠨᠠᠢ᠍ᠮᠠᠨ ᠬᠣᠰᠢᠭᠤ ᠬᠣᠶᠠᠷ ᠬᠣᠰᠢᠭᠤᠨᠳᠤ ᠴᠦ᠍ ᠪᠤᠭᠤᠲᠤ ᠭᠡᠬᠦ ᠰᠠᠢ᠌ᠬᠠᠨ ᠨᠡᠷᠡᠢ᠌ᠳᠦᠯᠲᠠᠢ ᠠᠢ᠌ᠯ ᠲᠤᠰᠬᠤᠨ ᠪᠠᠢ᠌ᠳᠠᠭ ᠶᠤᠮ᠃ ᠠᠤᠬᠠᠨ ᠬᠣᠰᠢᠭᠤᠨᠤ ᠪᠤᠭᠤᠲᠤ ᠵᠢᠨ ᠠᠢ᠌ᠯᠨᠢ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠲᠦᠪ ᠳᠠᠴᠢᠨᠲᠠᠯᠠᠠᠴᠠ ᠪᠠᠷᠠᠭᠤᠨ ᠡᠮᠦᠨᠡ ᠵᠠᠭᠤ ᠢᠯᠡᠭᠦᠦ ᠺᠢᠯᠤᠮᠧᠲᠷᠤᠨ ᠵᠠᠢᠲᠠᠢ ᠪᠠᠢ᠌ᠷᠢᠯᠠᠵᠤ᠂ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠪᠤᠭᠤᠲᠤᠨᠢ ᠳᠠᠴᠢᠨᠲᠠᠯᠠᠠᠴᠠ ᠵᠡᠭᠦᠨ ᠬᠣᠢ᠌ᠲᠠᠢ 60 ᠺᠢᠯᠤᠮᠧᠲᠷ ᠵᠠᠢ᠌ᠲᠠᠢ ᠪᠠᠢ᠌ᠷᠢᠯᠠᠳᠠᠭ᠃ ᠪᠣᠭᠣᠲᠣ ᠵᠢᠨ ᠠᠢ᠌ᠯᠤᠨᠬᠢᠨ ᠪᠣᠰᠤᠳ ᠬᠡᠳᠦᠨ ᠬᠦᠷᠰᠢ ᠠᠢ᠌ᠯᠲᠠᠢᠪᠠᠨ ᠠᠳᠠᠯᠢᠪᠠᠷ ᠮᠠᠯᠵᠢᠬᠤ ᠲᠠᠷᠢᠶᠠᠯᠠᠬᠤ ᠵᠢ ᠬᠣᠣᠰᠯᠠᠭᠤᠯᠵᠤ ᠠᠮᠢᠳᠤᠷᠠᠵᠤ ᠪᠠᠢ᠌ᠳᠠᠭ᠃ ᠭᠠᠵᠠᠷ ᠨᠤᠲᠤᠭᠨᠢ ᠮᠠᠩᠬᠠᠪᠠᠷ ᠭᠣᠣᠯᠯᠠᠵᠤ ᠪᠠᠢ᠌ᠭᠠ ᠪᠣᠯᠬᠣᠷ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠵᠤᠭ᠋ᠠᠴᠠᠯᠤᠨ ᠦᠢ᠍ᠯᠡᠰ ᠬᠦᠭᠵᠢᠭᠦᠯᠬᠦ ᠲᠦᠯᠦᠪᠯᠡᠭᠡᠳᠤ ᠣᠷᠣᠵᠣ᠂ ᠣᠳᠣ ᠤᠯᠤᠰᠤᠨ A ᠳᠡᠰᠤᠨ ᠵᠤᠭ᠋ᠠᠴᠠᠯᠤᠨ ᠣᠷᠣᠨ ᠪᠣᠯᠵᠤ ᠬᠦᠭᠵᠢᠭᠡᠳ ᠬᠣᠯᠠ ᠣᠢ᠌ᠷᠠ ᠵᠢᠨ ᠬᠦᠮᠦᠰᠤᠨ ᠠᠩᠬᠠᠷᠤᠯᠢ ᠲᠠᠲᠠᠭ᠋ᠠᠳ 《ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠪᠣᠭᠤᠲᠤ ᠵᠢᠨ ᠮᠠᠩᠬᠠᠨᠤ ᠵᠤᠭ᠋ᠠᠴᠠᠯᠤᠨ ᠭᠠᠵᠠᠷ》 ᠭᠡᠬᠦ ᠠᠯᠳᠠᠷ ᠤᠯᠤᠰ ᠳᠠᠶᠠᠭ᠋ᠠᠷ ᠮᠠᠨᠳᠤᠪᠠ᠃ ᠪᠦᠬᠦ ᠤᠯᠤᠰᠤᠨ ᠬᠡᠪᠴᠢᠶᠡᠨᠤ ᠠᠯᠳᠠᠷᠲᠤ ᠰᠡᠭᠦᠳᠡᠷᠯᠡᠭᠴᠢᠳ ᠬᠡᠳᠦᠨᠳᠡ ᠮᠣᠷᠢᠯᠠᠵᠤ᠂ ᠲᠦᠪ ᠲᠧᠯᠧᠢ᠍ᠰᠤᠨᠬᠢᠨ ᠬᠡᠳᠦᠨᠲᠡ ᠰᠠᠭ᠋ᠠᠲᠠᠵᠤ᠂ ᠲᠣᠮᠣ ᠬᠡᠪᠴᠢᠶᠡᠨᠤ ᠬᠣᠰᠢᠭᠤᠨ ᠨᠠᠢ᠌ᠷ ᠬᠡᠳᠦᠨᠲᠡ ᠶᠠᠪᠤᠭᠳᠠᠪᠠ᠃ ᠪᠣᠭᠣ ᠤᠷᠤᠮᠳᠠᠵᠤ ᠵᠡᠭᠡᠷᠡ ᠲᠠᠭᠰᠢᠭᠰᠠᠨ ᠪᠣᠭᠤᠲᠤ ᠵᠢᠨ ᠨᠤᠲᠤᠭ ᠦᠨᠦᠳᠦᠷ ᠪᠣᠭᠣ ᠭᠦᠷᠦᠭᠡᠰᠦᠪᠠᠷ ᠪᠢᠰᠢ᠂ ᠪᠣᠭᠣᠷᠣᠯ ᠮᠠᠩᠬᠠᠪᠠᠷ ᠦᠪᠡᠷᠮᠢᠴᠡ ᠦᠵᠡᠮᠵᠢ ᠪᠣᠯᠭ᠋ᠠᠵᠤ ᠶᠢᠷᠲᠢᠨᠴᠦ ᠵᠢᠨ ᠬᠠᠷᠠᠭ᠋ᠠᠨᠳᠤ ᠳᠡᠯᠭᠡᠭᠳᠡᠪᠡ᠃ ᠵᠠᠭᠤᠨ ᠵᠠᠭᠤᠨᠤ ᠬᠦᠮᠦᠨ ᠪᠠᠢ᠌ᠭ᠋ᠠᠯᠢ ᠵᠢᠨ ᠣᠷᠴᠢᠯ ᠬᠤᠪᠢᠷᠠᠯᠢ ᠳᠠᠭ᠋ᠠᠵᠤ᠂ ᠲᠦᠮᠡᠨ ᠠᠮᠢᠲᠠᠨ ᠬᠤᠪᠢᠷᠠᠵᠤ᠂ ᠮᠢᠩᠭ᠋ᠠᠨ ᠦᠵᠡᠭᠳᠡᠯ ᠢᠯᠡᠷᠡᠬᠦ ᠵᠢ ᠬᠡᠨ ᠴᠦ᠍ ᠲᠦᠰᠦᠭᠡᠯᠡᠵᠦ ᠳᠡᠢ᠌ᠯᠬᠦ ᠦᠭᠡᠢ᠃ ᠪᠤᠭᠤᠲᠠᠢ ᠨᠤᠲᠤᠭᠲᠤ ᠪᠣᠭᠣ ᠰᠤᠭᠤ ᠵᠢᠨ ᠪᠠᠷᠠ ᠲᠠᠰᠤᠷᠠᠭ᠋ᠠᠳ ᠬᠡᠳᠦᠢ ᠵᠢᠯ ᠪᠣᠯᠵᠤ ᠪᠠᠢ᠌ᠬᠤ ᠵᠢ ᠲᠣᠯᠭᠢᠶᠠᠯᠠᠨ ᠳᠠᠪᠠᠯᠭ᠋ᠠᠯᠠᠭᠰᠠᠨ ᠬᠦᠪᠡᠭᠡ ᠬᠢᠵᠠᠭ᠋ᠠᠷ ᠦᠭᠡᠢ ᠮᠠᠩᠬᠠ ᠵᠢᠯᠠᠭᠠᠨᠢ ᠴᠡᠭᠡᠵᠢᠯᠡᠵᠦ ᠪᠠᠢ᠌ᠭᠠ ᠶᠤᠮ ᠪᠣᠯᠪᠠ ᠦᠦ？ ᠦᠨᠦᠳᠦᠷ ᠬᠣᠯᠠ ᠣᠢ᠌ᠷᠠ ᠵᠢᠨ ᠭᠡᠢ᠌ᠴᠢᠨ ᠮᠣᠷᠢᠯᠠᠨ ᠰᠠᠭ᠋ᠠᠲᠠᠬᠤᠳᠤᠪᠠᠨ ᠬᠠᠶᠠ ᠨᠢᠭᠡᠨᠢ 《ᠪᠣᠭᠤᠲᠤ》 ᠭᠡᠵᠤ ᠶᠠᠮᠠᠷ ᠤᠳᠬᠠᠲᠠᠢ ᠦᠭᠡ ᠪᠣᠢ？ ᠭᠡᠭᠦᠯᠡᠷ 《ᠪᠣᠭ ᠪᠣᠰᠤᠭᠰᠠᠨ ᠭᠠᠵᠠᠷ ᠶᠤᠮ ᠭᠡᠨᠡ᠂ ᠲᠡᠭᠡᠭᠡᠳ ᠪᠣᠭᠲᠤ ᠭᠡᠵᠤ ᠨᠡᠷᠡᠢ᠌ᠳᠬᠦ ᠪᠣᠯᠵᠠᠢ》 ᠭᠡᠵᠤ ᠬᠠᠷᠢᠭᠤᠯᠤᠭᠰᠠᠨ ᠪᠠᠢ᠌ᠯᠠ᠃ ᠪᠣᠭᠣᠲᠣ ᠶᠤᠮ ᠦᠦ？ ᠪᠣᠭᠲᠤ ᠶᠤᠮ ᠦᠦ？ ᠪᠠᠲᠤᠲᠠᠢ ᠬᠠᠷᠢᠭᠤᠯᠲᠠ ᠪᠠᠢ᠌ᠬᠤ ᠦᠭᠡᠢ ᠃ ᠤᠴᠢᠷᠨᠢ ᠦᠨᠦᠳᠦᠷᠤᠨ ᠪᠣᠭᠤᠲᠤᠳᠤ ᠪᠤᠭᠤ ᠠᠯᠠᠭᠠ᠂ ᠪᠤᠭ ᠴᠢᠳᠭᠦᠷ ᠴᠦ᠍ ᠠᠯᠠᠭᠠ᠃ ᠬᠠᠷᠢᠨ ᠨᠤᠲᠤᠭ ᠣᠷᠣᠨ ᠵᠶ᠋ᠡᠨ ᠦᠭᠡᠳᠡ ᠲᠠᠲᠠᠵᠤ ᠬᠡᠢ ᠮᠣᠷᠢ ᠵᠣᠯᠪᠣᠭᠠᠲᠠᠢ ᠠᠮᠢᠳᠤᠷᠠᠭᠠ ᠭᠤᠪᠢ ᠵᠢᠨ ᠲᠡᠮᠡᠭᠡᠴᠢᠨ ᠪᠣᠢ᠃ ᠭᠣᠪᠢ ᠵᠢᠨ ᠲᠡᠮᠡᠭᠡᠴᠢᠨ ᠰᠢᠵᠢᠷ ᠳᠠᠪᠠᠯᠭᠠ ᠦᠷᠭᠦᠯᠵᠢᠯᠡᠭᠰᠡᠨ ᠮᠠᠩᠬᠠᠨ ᠳᠠᠯᠠᠢ ᠵᠢᠨ ᠳᠤᠮᠳᠠᠭᠤᠷ ᠵᠣᠩᠵᠢᠭᠤᠯᠤᠭᠰᠠᠭ᠋ᠠᠷ ᠨᠠᠭ᠋ᠠᠰᠢᠯᠠᠨᠠ᠃ ᠵᠢᠷᠭ᠋ᠠᠬᠤ ᠨᠠᠷᠠᠨᠤ ᠤᠯᠠᠪᠤᠷ ᠲᠤᠶᠠᠭᠠ ᠵᠢ ᠨᠦᠮᠦᠷᠦᠭᠰᠡᠭᠡᠷ ᠲᠣᠷᠣᠢ᠌ᠨ ᠨᠠᠭ᠋ᠠᠰᠢᠯᠠᠬᠤ ᠲᠡᠷᠡ ᠰᠠᠢ᠌ᠬᠠᠨ ᠪᠠᠷᠠ᠂ ᠬᠠᠶᠠ ᠪᠤᠭᠤ ᠰᠤᠭᠤ ᠰᠢᠭ᠋᠂ ᠬᠠᠶᠠ ᠵᠡᠭᠡᠷᠡ ᠭᠦᠷᠦᠭᠡᠰᠦ ᠰᠢᠭ ᠬᠠᠷᠠᠭᠳᠠᠨᠠ᠃ ᠲᠡᠷᠲᠡᠭᠡ ᠬᠣᠯᠠ ᠪᠤᠷᠭ᠋ᠠᠰᠤ ᠰᠢᠪᠠᠭᠨᠢ ᠪᠠᠭᠰᠢᠷᠠᠵᠤ᠂ ᠪᠦᠳᠦᠭᠦᠨ ᠬᠠᠢ᠌ᠯᠠᠰᠤᠨᠢ ᠯᠠᠭᠰᠠᠢ᠌ᠭᠰᠠᠨ ᠮᠠᠩᠬᠠ ᠵᠢᠯᠠᠭᠠ ᠵᠢᠨ ᠳᠤᠮᠳᠠᠭᠤᠷ ᠪᠤᠭᠤ ᠤᠷᠤᠮᠳᠠᠵᠤ ᠪᠠᠢ᠌ᠭᠠ ᠴᠦ᠍ ᠪᠢᠯᠡ ᠦᠦ？ ᠭᠦᠷᠦᠭᠡᠰᠦ ᠲᠣᠭᠯᠠᠵᠤ ᠪᠠᠢ᠌ᠭᠠ ᠴᠦ᠍ ᠪᠢᠯᠡ ᠦᠦ？ ᠪᠣᠭᠲᠤ ᠪᠢᠰᠢ᠂ ᠪᠣᠭᠣᠲᠣ ᠨᠤᠲᠤᠭ ᠶᠤᠮ ᠡ ᠲᠣᠭᠯᠠᠭ᠋ᠠᠳ ᠨᠠᠭ᠋ᠠᠰᠢᠯᠠᠬᠤ ᠡᠷᠲᠡ ᠴᠠᠭᠤᠨ ᠪᠤᠭᠤ ᠰᠤᠭᠤ ᠵᠢᠨ ᠭᠣᠶᠣᠮᠰᠣᠭ ᠲᠦᠷᠬᠦ ᠵᠢ ᠪᠢ ᠣᠯᠵᠣ ᠬᠠᠷᠠᠪᠠ᠃ ᠲᠡᠷᠡ ᠪᠣᠯ ᠡᠷᠲᠡᠨᠤᠬᠢ᠂ ᠪᠦᠷ ᠴᠦ᠍ ᠡᠷᠲᠡᠨᠤᠬᠢ ᠭᠤᠸᠠ ᠰᠠᠢ᠌ᠬᠠᠨ！
ᠰᠠᠨᠳᠠᠢ᠃ ᠰᠠᠨᠳᠠᠢ ᠠᠢ᠌ᠯᠳᠤ ᠪᠢ ᠬᠦᠷᠦᠭᠡ ᠦᠭᠡᠢ᠂ ᠭᠡᠪᠡᠴᠦ ᠰᠠᠨᠳᠠᠢ ᠭᠡᠬᠦ ᠨᠡᠷᠡ ᠵᠢ ᠰᠣᠨᠣᠰᠤᠭᠰᠠᠭ᠋ᠠᠷ ᠤᠳᠠᠪᠠ᠂ 《ᠰᠠᠨᠳᠠᠢ （sBdBi）》 ᠭᠡᠳᠡᠭᠨᠢ ᠶᠠᠮᠠᠷ ᠤᠳᠬᠠᠲᠠᠢ ᠶᠤᠮ ᠪᠣᠯ？ ᠭᠡᠵᠤ ᠭᠠᠢ᠌ᠬᠠᠭᠰᠠᠭ᠋ᠠᠷ ᠤᠳᠠᠪᠠ᠃ 《ᠰᠠᠨᠲᠠᠢ ᠲᠦᠰᠢᠭᠰᠡᠨ ᠬᠠᠳᠤᠳ》 ᠭᠡᠬᠦ ᠤᠩᠰᠢᠯᠭᠠ ᠵᠢ ᠰᠣᠨᠣᠰᠤᠭ᠋ᠠᠳ ᠰᠠᠶᠢ 《ᠰᠠᠨᠳᠠᠢ s[nt[i》 ᠭᠡᠭᠴᠢ ᠬᠦᠨᠳᠦᠲᠦ ᠰᠠᠭᠤᠳᠠᠯᠤᠨ ᠨᠡᠷᠡᠢ᠌ᠳᠦᠯ ᠭᠡᠵᠤ ᠮᠡᠳᠡᠯᠡ᠃ ᠶᠡᠬᠡᠰ ᠪᠣᠭᠳᠠ ᠭᠡᠭᠡᠨ ᠬᠤᠪᠢᠯᠭ᠋ᠠᠳᠤᠨ ᠰᠠᠭᠤᠳᠠᠭ ᠨᠠᠢ᠍ᠮᠠᠨ ᠠᠷᠰᠯᠠᠨᠲᠠᠢ ᠲᠦᠰᠢᠯᠭᠡᠲᠦ ᠰᠠᠭᠤᠳᠠᠯᠢ ᠰᠡᠨᠲᠡᠢ ᠭᠡᠳᠡᠭ ᠪᠦᠭᠡᠳ ᠲᠤᠰ ᠤᠩᠰᠢᠯᠭᠠᠳᠤ ᠬᠠᠭ᠋ᠠᠨᠤ ᠰᠠᠭᠤᠳᠠᠯ᠂ ᠬᠠᠭ᠋ᠠᠨ ᠣᠷᠣ ᠵᠢ ᠵᠢᠭ᠋ᠠᠭᠰᠠᠨ ᠪᠢᠯᠡ ᠃ ᠲᠡᠭᠡᠪᠡᠯ᠂ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠰᠠᠨᠳᠠᠢ ᠠᠢ᠌ᠯ᠂ ᠠᠯᠢ ᠦᠶᠡ ᠵᠢᠨ ᠶᠠᠮᠠᠷ ᠬᠠᠭ᠋ᠠᠨ ᠪᠤᠶᠤ ᠭᠡᠭᠡᠨ ᠬᠤᠪᠢᠯᠭ᠋ᠠᠨᠲᠠᠢ ᠬᠣᠯᠪᠤᠭᠳᠠᠬᠤ ᠶᠤᠮ ᠪᠣᠯ？ 《ᠰᠠᠨᠳᠠᠢ s[nt[i》 ᠭᠡᠵᠤ ᠤᠩᠰᠢᠳᠠᠭ ᠪᠠᠢ᠌ᠭᠰᠠᠨ ᠵᠶ᠋ᠡᠨ ᠬᠣᠵᠢᠮᠨᠢ 《ᠰᠠᠨᠳᠠᠢ （sBdBi）》 ᠭᠡᠵᠤ ᠤᠩᠰᠢᠬᠤ ᠪᠣᠯᠣᠭᠰᠠᠨ ᠶᠤᠮ ᠪᠣᠯᠪᠠ ᠦᠦ？ 《ᠰᠠᠨᠳᠠᠢ᠌ᠯᠠᠵᠤ ᠰᠠᠭᠤᠬᠤ᠂ ᠰᠠᠨᠳᠠᠯᠢ》 ᠭᠡᠳᠡᠭ ᠦᠭᠡᠨᠢ ᠡᠨᠡ 《ᠰᠠᠨᠳᠠᠢ （sBdBi）》 ᠪᠤᠶᠤ 《ᠰᠠᠨᠳᠠᠢ s[nt[i》 ᠭᠡᠬᠦ ᠦᠭᠡᠨᠠᠴᠠ ᠢᠷᠡᠯᠲᠡᠲᠠᠢ ᠶᠤᠮ ᠪᠣᠯᠪᠠ ᠦᠦ？ ᠰᠠᠨᠳᠠᠢ ᠭᠡᠵᠤ ᠳᠣᠮᠣᠭ ᠪᠢᠰᠢ ᠦᠨᠡᠨ ᠦᠯᠢᠭᠡᠷ᠂ ᠪᠢᠳᠡ ᠬᠠᠷᠢᠨ ᠮᠠᠷᠲᠠᠵᠠᠢ᠂ ᠰᠠᠨᠳᠠᠢ ᠭᠡᠵᠤ ᠰᠢᠯᠦᠭ ᠪᠢᠰᠢ ᠰᠢᠯᠤᠭᠤᠨ ᠲᠡᠦᠬᠡ᠂ ᠪᠢᠳᠡ ᠨᠡᠭᠡᠷᠡᠨ ᠮᠠᠷᠲᠠᠵᠠᠢ！
ᠰᠠᠨᠳᠠᠢ ᠭᠡᠬᠦ ᠨᠡᠷᠡᠢ᠌ᠳᠦᠯ ᠪᠣᠯ ᠲᠠᠩᠰᠤᠭ ᠰᠣᠶᠣᠯᠤᠨ ᠨᠢᠭᠡᠨ ᠰᠢᠳᠡᠮᠡᠰᠦ ᠪᠣᠯᠬᠣ ᠪᠦᠭᠡᠳ ᠲᠠᠰᠤᠷᠠᠭᠰᠠᠨ ᠲᠡᠦᠬᠡ ᠵᠢᠨ ᠨᠢᠭᠡᠨ ᠰᠦᠪᠡᠭᠴᠢ ᠮᠥᠨ᠃ ᠠᠮᠢᠳᠤᠷᠠᠯ ᠲᠡᠦᠬᠡ ᠪᠣᠯᠵᠣ ᠬᠤᠪᠢᠷᠠᠬᠤ ᠦᠶᠡᠳᠤ ᠠᠷᠤᠠᠴᠠᠨᠢ ᠳᠠᠭ᠋ᠠᠵᠤ ᠦᠭᠡ ᠦᠰᠦᠭ ᠴᠦ᠍ ᠲᠡᠦᠬᠡ ᠪᠣᠯᠵᠣ ᠬᠤᠪᠢᠷᠠᠳᠠᠭ ᠠᠵᠢ᠃ ᠬᠠᠭ᠋ᠠᠨᠲᠤ ᠲᠦᠷᠦ ᠤᠰᠠᠳᠬᠤᠳᠤ 《ᠬᠠᠭ᠋ᠠᠨ᠂ ᠵᠢᠨᠤᠩ᠂ ᠲᠠᠪᠤᠨᠠᠩ᠂ ᠲᠦᠰᠢᠮᠡᠯ ᠁》 ᠭᠡᠬᠦᠴᠢᠯᠡᠨ ᠬᠡᠳᠦᠨ ᠵᠠᠭᠤᠨ ᠨᠡᠷᠡ ᠲᠣᠮᠢᠶᠠ ᠠᠮᠢᠳᠤᠷᠠᠯᠠᠴᠠ ᠠᠷᠴᠢᠭᠳᠠᠵᠤ᠂ 《ᠰᠦᠯᠵᠢᠶᠡ᠂ ᠵᠢᠷᠭᠢᠶᠡ᠂ ᠵᠠᠭᠤᠴᠢᠯᠠᠭᠤᠷ》 ᠭᠡᠬᠦᠴᠢᠯᠡᠨ ᠬᠡᠳᠦᠨ ᠮᠢᠩᠭᠠ᠂ ᠬᠡᠳᠦᠨ ᠲᠦᠮᠡᠨ ᠰᠢᠨᠡ ᠨᠡᠷᠡ ᠲᠣᠮᠢᠶᠠ ᠤᠷᠭᠤᠨ ᠲᠦᠯᠵᠢᠵᠡᠢ᠃ ᠭᠠᠵᠠᠷᠤᠨ ᠨᠡᠷᠡ ᠪᠣᠯ ᠠᠷᠴᠢᠭᠳᠠᠰᠢ ᠦᠭᠡᠢ ᠲᠡᠦᠬᠡ᠂ ᠠᠷᠢᠯᠤᠰᠢ ᠦᠭᠡᠢ ᠤᠯᠠ ᠮᠦᠷ ᠶᠤᠮ᠃ ᠰᠧᠴᠤᠸᠠᠨ ᠮᠣᠵᠢ ᠵᠢᠨ 《ᠮᠣᠣᠲᠠᠢ ᠠᠷᠢᠬᠢ》 ᠭᠡᠳᠡᠭᠨᠢ 《ᠮᠣᠭ᠋ᠠᠢ᠌ᠲᠦ》 ᠭᠡᠬᠦ ᠭᠠᠵᠠᠷᠤᠨ ᠨᠡᠷᠡᠠᠴᠠ ᠢᠷᠡᠯᠲᠡᠲᠠᠢ ᠭᠡᠬᠦ᠂ 《ᠫᠦ᠋ ᠡᠯ ᠴᠠᠢ》 ᠭᠡᠳᠡᠭᠨᠢ 《ᠪᠣᠷᠣ ᠴᠠᠢ》 ᠭᠡᠬᠦ ᠮᠣᠩᠭᠣᠯ ᠦᠭᠡᠨᠠᠴᠠ ᠢᠷᠡᠯᠲᠡᠲᠠᠢ ᠭᠡᠬᠦ ᠁ ᠲᠡᠷᠡ ᠪᠦᠬᠦᠨᠤ ᠴᠠᠭ᠋ᠠᠨᠠ᠂ ᠲᠡᠦᠬᠡ ᠰᠣᠶᠣᠯ᠂ ᠤᠯᠠ ᠮᠦᠷ᠂ ᠤᠭᠰᠠᠭᠠ ᠭᠠᠷᠤᠯᠳᠤ ᠬᠣᠯᠪᠣᠭᠳᠠᠬᠤ ᠦᠨᠡᠲᠦ ᠵᠦᠢ᠍ᠯ ᠬᠠᠳᠠᠭ᠋ᠠᠯᠠᠭᠳᠠᠵᠤ ᠪᠠᠢ᠌ᠳᠠᠭ᠃ ᠰᠠᠨᠳᠠᠢ ᠭᠡᠵᠤ ᠳ᠋ᠦᠩᠬᠤ ᠦᠬᠤᠸᠠᠨᠤ ᠲᠡᠦᠬᠡ ᠪᠠᠢ᠌ᠵᠤ ᠮᠡᠳᠡᠨᠡ᠂ ᠰᠠᠨᠳᠠᠢ ᠭᠡᠵᠤ ᠯᠢᠶᠣᠣ ᠭᠢᠳᠠᠨᠤ ᠴᠠᠳᠢᠭ ᠪᠠᠢ᠌ᠵᠤ ᠮᠡᠳᠡᠨᠡ᠂ ᠰᠠᠨᠳᠠᠢ ᠭᠡᠵᠤ ᠵᠦᠷᠴᠢᠨ ᠮᠠᠨᠵᠤ ᠵᠢᠨ ᠤᠯᠠ ᠮᠦᠷ ᠪᠠᠢ᠌ᠵᠤ ᠮᠡᠳᠡᠨᠡ᠂ ᠰᠠᠨᠲᠠᠢ ᠭᠡᠵᠤ ᠵᠦᠴᠢ ᠬᠠᠰᠠᠷᠤᠨ ᠣᠷᠳᠣᠨ ᠪᠠᠢ᠌ᠵᠤ ᠴᠦ᠍ ᠮᠡᠳᠡᠨᠡ ᠃
ᠰᠠᠨᠳᠠᠢ ᠭᠡᠭᠴᠢ ᠬᠢᠴᠢᠶᠡᠩᠭᠦᠢ ᠭᠡᠬᠦ ᠤᠳᠬᠠᠲᠠᠢ ᠲᠦᠪᠡᠳ ᠦᠭᠡ᠂ ᠰᠠᠨᠳᠠᠢ ᠭᠡᠬᠦ ᠨᠡᠷᠡᠲᠠᠢ ᠬᠦᠮᠦᠨ ᠨᠤᠲᠤᠭᠯᠠᠵᠤ ᠪᠠᠢ᠌ᠭᠰᠠᠨ ᠵᠶ᠋ᠡᠷ ᠠᠢ᠌ᠯᠤᠨ ᠨᠡᠷᠡ ᠡᠢ᠌ᠮᠦ ᠪᠣᠯᠪᠠ ᠭᠡᠵᠤ ᠨᠤᠲᠤᠭᠤᠨ ᠪᠤᠭᠤᠷᠤᠯ ᠬᠠᠭᠤᠴᠢᠯᠠᠪᠠ᠃ 《ᠰᠠᠨᠳᠠᠢ s[nt[i》 ᠭᠡᠭᠴᠢ ᠶᠡᠬᠡᠰ ᠪᠣᠭᠳᠠ᠂ ᠭᠡᠭᠡᠨ ᠬᠤᠪᠢᠯᠭ᠋ᠠᠳᠤᠨ ᠰᠠᠭᠤᠳᠠᠭ ᠨᠠᠢ᠍ᠮᠠᠨ ᠠᠷᠰᠯᠠᠨᠲᠠᠢ ᠲᠦᠰᠢᠯᠭᠡᠲᠦ ᠰᠠᠭᠤᠳᠠᠯᠢ ᠬᠡᠯᠡᠨᠡ᠃ ᠲᠡᠭᠡᠬᠦᠪᠠᠷ ᠰᠠᠨᠳᠠᠢ ᠭᠡᠬᠦ ᠨᠡᠷᠡ ᠵᠢ ᠴᠢᠩᠭᠠ ᠬᠦᠨᠳᠡᠢ ᠠᠯᠢᠪᠠᠷᠨᠢ ᠤᠩᠰᠢᠭᠰᠠᠨ ᠴᠦ᠍ ᠰᠢᠷᠠ ᠵᠢᠨ ᠱᠠᠰᠢᠨᠤ ᠨᠦᠯᠦᠭᠡᠪᠠᠷ ᠲᠦᠪᠡᠳ ᠰᠣᠶᠣᠯ ᠨᠡᠪᠴᠢᠵᠦ ᠣᠷᠣᠵᠣ ᠢᠷᠡᠭᠰᠡᠨ ᠢᠮ ᠲᠡᠮᠳᠡᠭ ᠴᠦ᠍ ᠪᠠᠢ᠌ᠵᠤ ᠮᠡᠳᠡᠨᠡ᠃ ᠯᠠᠮᠠ ᠵᠢᠨ ᠲᠠᠯᠠ᠂ ᠰᠤᠪᠤᠷᠭᠠ᠂ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠭᠡᠬᠦ ᠵᠡᠷᠭᠡ ᠡᠷᠭᠢᠨ ᠲᠣᠭᠣᠷᠢᠨᠤ ᠠᠢ᠌ᠯ ᠲᠤᠰᠬᠤᠨᠤ ᠨᠡᠷᠡᠢ᠌ᠳᠦᠯᠠᠴᠠ ᠦᠵᠡᠪᠡᠯ ᠭᠡᠭᠡᠨ ᠬᠤᠪᠢᠯᠭ᠋ᠠᠨᠤ ᠬᠠᠷᠰᠢ ᠣᠷᠳᠣᠨ᠂ ᠬᠦᠨᠳᠦᠲᠦ ᠰᠠᠭᠤᠳᠠᠯᠲᠠᠢ ᠬᠣᠯᠪᠣᠭᠳᠠᠯᠲᠠᠢ ᠮᠠᠭ᠋ᠠᠳᠯᠠᠯ ᠵᠦᠪ ᠪᠠᠢ᠌ᠵᠤ ᠮᠡᠳᠡᠨᠡ᠃ ᠮᠣᠩᠭᠤᠯᠴᠤᠳ ᠪᠢᠳᠡ ᠨᠤᠲᠤᠭᠯᠠᠵᠤ ᠰᠠᠭᠤᠭᠰᠠᠨ ᠬᠦᠮᠦᠨᠤ ᠨᠡᠷᠡᠢ᠌ᠳᠦᠯ ᠵᠶ᠋ᠡᠷ ᠭᠠᠵᠠᠷᠤᠨ ᠨᠡᠷᠡ ᠪᠣᠯᠭ᠋ᠠᠬᠤ ᠵᠠᠩᠰᠢᠯᠲᠠᠢ ᠪᠠᠢ᠌ᠳᠠᠭᠠᠴᠠᠨᠢ ᠦᠵᠡᠪᠡᠯ ᠰᠠᠨᠳᠠᠢ ᠪᠤᠶᠤ ᠰᠠᠨᠳᠠᠢ᠌ᠵᠠᠪ （ᠰᠠᠨᠳᠠᠢᠨᠢ ᠰᠤᠩᠳᠤᠢ ᠭᠡᠬᠦ ᠦᠭᠡᠨᠤ ᠠᠪᠢᠶᠠ ᠬᠤᠪᠢᠯᠪᠤᠷᠢ ᠶᠤᠮ ᠪᠣᠯᠪᠠ ᠦᠦ？） ᠭᠡᠬᠦ ᠨᠡᠷᠡᠲᠠᠢ ᠬᠦᠮᠦᠨᠤ ᠨᠤᠲᠤᠭ ᠪᠠᠢ᠌ᠭᠰᠠᠨ ᠭᠡᠬᠦᠨᠢ ᠴᠦ᠍ ᠵᠦᠪ ᠪᠠᠢ᠌ᠵᠤ ᠮᠡᠳᠡᠨᠡ᠃ ᠲᠡᠦᠬᠡ ᠵᠢᠨ ᠤᠷᠲᠤ ᠠᠶᠠᠨᠤ ᠳᠤᠮᠳᠠ ᠰᠠᠨᠲᠠᠢ ᠭᠡᠬᠦ ᠦᠭᠡ ᠵᠢ ᠭᠡᠭᠡᠭᠳᠡᠭᠦᠯᠦᠭᠰᠡᠨ ᠦᠭᠡᠢ ᠬᠠᠳᠠᠭ᠋ᠠᠯᠠᠵᠤ ᠴᠢᠳᠠᠭᠰᠠᠨ ᠪᠠᠶᠠᠨᠲᠠᠯᠠ ᠨᠤᠲᠤᠭᠤᠨ ᠰᠠᠨᠳᠠᠢ ᠠᠢ᠌ᠯᠤᠨ ᠬᠦᠮᠦᠨ ᠵᠣᠨ ᠮᠢᠨᠢ ᠳ᠋ᠠ！
ᠭᠠᠵᠠᠷᠤᠨ ᠨᠡᠷᠡ ᠪᠣᠯ ᠪᠠᠢ᠌ᠭ᠋ᠠᠯᠢ ᠵᠢᠨ ᠲᠡᠦᠬᠡ ᠮᠦᠷᠲᠡᠭᠡᠨ ᠨᠡᠢ᠌ᠭᠡᠮᠤᠨ ᠲᠡᠦᠬᠡ ᠮᠥᠨ᠂ ᠦᠪ ᠰᠣᠶᠣᠯ ᠮᠥᠨ᠂ ᠰᠢᠨᠵᠢᠯᠡᠭᠡᠨᠤ ᠰᠢᠨᠡ ᠰᠡᠳᠦᠪ ᠮᠥᠨ᠃ ᠪᠠᠬᠠᠷᠤᠮᠠ ᠰᠠᠢ᠌ᠬᠠᠨ ᠪᠠᠶᠠᠨᠲᠠᠯᠠ ᠵᠢᠨ ᠰᠠᠢ᠌ᠬᠠᠨ ᠮᠣᠩᠭᠤᠯ ᠨᠡᠷᠡᠢ᠌ᠳᠦᠯ ᠲᠠᠨᠳᠤ ᠶᠠᠭᠤ ᠨᠢᠭᠡ ᠵᠢ ᠤᠴᠢᠷᠯᠠᠨᠠ᠃ ᠨᠤᠲᠤᠭ ᠤᠰᠤᠨᠤᠪᠠᠨ ᠲᠦᠯᠦᠭᠡ ᠪᠠᠭ᠋ᠠᠲᠤᠷᠯᠠᠨ ᠲᠡᠮᠡᠴᠡᠭᠰᠡᠨ ᠲᠤᠰᠠᠯᠠᠭᠴᠢ ᠨᠣᠶᠠᠨᠤ ᠲᠤᠬᠠᠢ ᠳᠣᠮᠣᠭ᠂ ᠦᠬᠡᠷᠤᠨ ᠲᠠᠷᠭᠤ ᠨᠡᠷᠡ ᠬᠠᠢ᠌ᠷᠠᠯᠠᠭᠰᠠᠨ ᠬᠣᠰᠢᠭᠤᠨ ᠸᠠᠩ ᠤᠨ ᠲᠤᠬᠠᠢ ᠳᠣᠮᠣᠭ᠂ ᠬᠠᠷᠠ ᠲᠠᠰᠢ ᠬᠠᠷᠪᠤᠭ᠋ᠠᠳ ᠪᠤᠭ ᠪᠣᠯᠣᠭᠰᠠᠨ ᠮᠡᠷᠭᠡᠨ ᠬᠠᠷᠪᠤᠭ᠋ᠠᠴᠢ ᠨᠣᠶᠠᠨᠤ ᠲᠤᠬᠠᠢ ᠳᠣᠮᠣᠭ᠂ ᠭᠡᠷᠤᠨ ᠵᠶ᠋ᠡᠨ ᠳᠦᠷᠪᠡᠨ ᠵᠦᠭᠲᠤ ᠳᠦᠷᠪᠡᠨ ᠣᠪᠤᠭᠠ ᠪᠤᠰᠬᠠᠵᠤ ᠲᠡᠭᠷᠢ ᠲᠠᠬᠢᠭ᠋ᠠᠳ ᠭᠠᠢ ᠪᠠᠷᠴᠢᠳ ᠵᠶ᠋ᠡᠨ ᠵᠠᠢ᠌ᠯᠠᠭᠤᠯᠤᠭᠰᠠᠨ ᠲᠣᠮᠣ ᠪᠠᠶᠠᠨᠤ ᠳᠣᠮᠣᠭ ᠵᠡᠷᠭᠡᠨᠢ ᠦᠪᠡᠷ ᠦᠪᠡᠷᠤᠨ ᠵᠶ᠋ᠡᠨ ᠦᠯᠢᠭᠡᠷ ᠲᠡᠦᠬᠡ ᠵᠢ ᠦᠭᠡᠷᠡ ᠨᠢᠭᠡ ᠲᠠᠯᠠᠠᠴᠠᠨᠢ ᠬᠠᠭᠤᠴᠢᠯᠠᠵᠤ᠂ ᠮᠣᠩᠭᠤᠯ ᠬᠦᠮᠦᠨᠤ ᠨᠤᠲᠤᠭᠴᠢ ᠦᠵᠡᠯ᠂ ᠪᠠᠭ᠋ᠠᠲᠤᠷᠯᠢᠭ ᠦᠵᠡᠯ ᠪᠠᠬᠠᠷᠬᠠᠬᠤ ᠰᠣᠶᠣᠯ ᠰᠡᠳᠭᠢᠯᠭᠡ᠂ ᠨᠤᠲᠤᠭ ᠤᠰᠤᠪᠠᠨ ᠬᠣᠰᠢᠭᠤᠨ ᠸᠠᠩ᠂ ᠬᠠᠭ᠋ᠠᠳ ᠨᠣᠶᠠᠳᠲᠠᠢ ᠬᠣᠯᠪᠣᠨ ᠦᠭᠦᠯᠡᠬᠦ ᠳᠤᠷᠠᠲᠠᠢ ᠪᠠᠢ᠌ᠳᠠᠭ ᠰᠣᠶᠣᠯ ᠰᠡᠳᠭᠢᠯᠭᠡ᠂ ᠮᠡᠷᠭᠡᠨ ᠫᠤᠤᠴᠢ ᠴᠡᠴᠡᠨ ᠬᠠᠷᠪᠤᠭ᠋ᠠᠴᠢ ᠵᠢ ᠰᠢᠲᠦᠨ ᠪᠠᠬᠠᠷᠬᠠᠬᠤ ᠪᠣᠯᠪᠠᠴᠤ᠂ ᠠᠮᠢᠲᠠᠨᠢ ᠬᠣᠷᠣᠭ᠋ᠠᠬᠤ᠂ ᠠᠯᠠᠵᠤ ᠨᠢᠲᠤᠯᠬᠤ ᠵᠢ ᠦᠪᠡᠷᠤᠨ ᠪᠡᠶᠡᠳᠤ ᠭᠠᠢᠲᠠᠢ ᠭᠡᠵᠤ ᠦᠵᠡᠬᠦ ᠰᠣᠶᠣᠯ ᠰᠡᠳᠭᠢᠯᠭᠡ᠂ ᠣᠪᠣᠭᠠ ᠪᠣᠰᠬᠠᠵᠤ ᠲᠡᠭᠷᠢ ᠲᠠᠬᠢᠬᠤ ᠵᠢ ᠡᠷᠬᠢᠮᠨᠡᠬᠦ ᠰᠣᠶᠣᠯ ᠰᠡᠳᠭᠢᠯᠭᠡ ᠵᠢ ᠬᠣᠵᠢᠮᠤᠨ ᠬᠦᠮᠦᠰᠲᠤ ᠦᠭᠦᠯᠡᠭᠡᠳ ᠪᠠᠢ᠌ᠭᠠ ᠪᠢᠯᠡ᠃
ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ᠃ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠲᠦᠪ ᠳᠠᠴᠢᠨᠳᠠᠯᠠᠠᠴᠠ ᠵᠡᠭᠦᠨ ᠬᠣᠢ᠌ᠰᠢ 40 ᠺᠢᠯᠤᠮᠧᠲᠷᠤᠨ ᠵᠠᠢᠲᠠᠢ ᠰᠢᠨᠡ ᠬᠠᠭᠤᠴᠢᠨ ᠦᠩᠭᠡ ᠳᠦᠷᠰᠦ ᠵᠢ ᠵᠡᠷᠭᠡᠪᠠᠷ ᠢᠯᠡᠷᠡᠭᠦᠯᠦᠭᠰᠡᠨ ᠦᠪᠡᠷᠮᠢᠴᠡ ᠣᠨᠴᠠᠯᠢᠭᠲᠠᠢ ᠲᠤᠰᠬᠤᠨ ᠪᠠᠢ᠌ᠳᠠᠭᠢ ᠰᠦᠮᠡ ᠵᠢᠨ ᠠᠢ᠌ᠯ ᠭᠡᠳᠡᠭ᠃ ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠪᠦᠬᠦᠯᠢ ᠨᠡᠷᠡᠨᠢ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠃ ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠦᠪᠡᠷᠮᠢᠴᠡ ᠣᠨᠴᠠᠯᠢᠭᠨᠢ ᠴᠠᠳᠢᠭ ᠲᠡᠦᠬᠡᠨᠠᠴᠠ ᠤᠯᠪᠠᠭᠠ ᠬᠢᠭᠡᠳ ᠴᠠᠭ ᠲᠦᠷᠦᠠᠴᠠ ᠴᠦ᠍ ᠭᠢᠯᠪᠠᠭᠠ ᠬᠣᠶᠠᠷ ᠲᠠᠯᠠᠪᠠᠷ ᠪᠦᠲᠦᠭᠡᠭᠳᠡᠵᠡᠢ᠃ ᠲᠤᠰᠠᠯᠠᠭᠴᠢ ᠨᠣᠶᠠᠨᠨᠢ ᠬᠡᠨ ᠪᠣᠢ？ ᠬᠡᠵᠢᠶᠡ᠂ ᠬᠡᠨ᠂ ᠶᠠᠮᠠᠷ ᠰᠢᠯᠲᠠᠭ᠋ᠠᠨ ᠵᠶ᠋ᠡᠷ ᠰᠦᠮᠡ ᠪᠠᠢ᠌ᠭᠤᠯᠤᠭᠰᠠᠨ ᠪᠣᠢ？ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠠᠢ᠌ᠯᠳᠤ ᠬᠦᠷᠦᠭᠰᠡᠨᠤ ᠳᠠᠷᠠᠭᠠ ᠲᠠᠷᠢᠬᠢᠨᠳᠤ ᠤᠷᠭᠤᠭᠰᠠᠨ ᠲᠡᠷᠢᠭᠦᠨᠤ ᠠᠰᠠᠭᠤᠯᠲᠠ ᠮᠢᠨᠢ ᠡᠨᠡ᠃ ᠲᠠᠷᠢᠶᠠᠴᠢᠨ ᠰᠢᠯᠦᠭᠴᠢ ᠭᠡᠵᠤ ᠠᠯᠳᠠᠷᠰᠢᠭᠰᠠᠨ ᠪᠣᠣ ᠢᠦᠢ ᠮᠢᠨ （ᠨᠠᠰᠤᠠᠠᠤᠷᠲᠤ） ᠠᠪᠤᠭ᠋ᠠᠢ ᠰᠦᠮᠡ ᠵᠢᠨ ᠠᠢ᠌ᠯᠳᠤ ᠨᠤᠲᠤᠭᠲᠠᠢ ᠪᠣᠯᠬᠣᠷ ᠨᠠᠷᠢᠯᠢᠭ ᠰᠠᠢ᠌ᠬᠠᠨ ᠲᠠᠢ᠌ᠯᠤᠮᠵᠢ ᠬᠢᠵᠦ ᠦᠭᠭᠦᠭᠰᠡᠨ ᠪᠢᠯᠡ᠃
ᠲᠤᠰᠠᠯᠠᠭᠴᠢ ᠭᠡᠳᠡᠭᠨᠢ ᠴᠢᠩ ᠤᠯᠤᠰᠤᠨ ᠦᠶᠡ ᠵᠢᠨ ᠵᠡᠷᠭᠡ ᠭᠡᠷᠭᠡᠮᠤᠨ ᠨᠡᠷᠡᠢ᠌ᠳᠦᠯ᠃ ᠬᠣᠰᠢᠭᠤᠨ ᠸᠠᠩᠢ ᠲᠤᠰᠠᠯᠠᠵᠤ ᠵᠠᠰᠠᠭᠤᠨ ᠠᠵᠢᠯᠢ ᠬᠠᠮᠢᠶᠠᠷᠳᠠᠭ ᠨᠣᠶᠠᠨ ᠪᠣᠯᠣᠨᠠ᠃ ᠲᠤᠰᠠᠯᠠᠭᠴᠢ ᠨᠣᠶᠠᠨᠤ ᠠᠯᠳᠠᠷ ᠰᠧᠪᠳᠡᠨ ᠭᠡᠳᠡᠭ᠂ ᠪᠡᠶᠡ ᠪᠢᠯᠳᠡᠷ ᠠᠪᠤᠷᠭᠤ ᠰᠦᠷᠲᠠᠢ᠂ ᠬᠦᠴᠦ ᠴᠢᠳᠠᠯ ᠶᠡᠬᠡ᠂ ᠡᠷᠡᠯᠬᠡᠭ ᠪᠠᠭ᠋ᠠᠲᠤᠷᠯᠢᠭ᠂ ᠠᠪᠬᠠᠯᠵᠢ ᠰᠡᠷᠭᠦᠯᠡᠩ ᠪᠣᠯᠬᠣᠷ ᠬᠠᠨᠳᠤᠭᠰᠠᠨ ᠵᠦᠭᠲᠤ ᠳᠠᠢ᠌ᠰᠤᠨ ᠦᠭᠡᠢ ᠡᠷᠡᠯᠭᠡᠭᠯᠡᠨ ᠪᠠᠢ᠌ᠯᠳᠤᠳᠠᠭ ᠪᠠᠢ᠌ᠭᠰᠠᠨ ᠭᠡᠨᠡ᠃ ᠭᠡᠪᠡᠴᠦ ᠬᠣᠵᠢᠮᠨᠢ ᠬᠣᠯᠠ ᠵᠢᠨ ᠨᠤᠲᠤᠭᠲᠤ ᠦᠷᠡᠭᠳᠡᠭᠰᠡᠨ ᠪᠠᠢ᠌ᠨᠠ᠃ ᠳᠣᠣᠷᠠᠬᠢ ᠴᠡᠷᠢᠭᠨᠢ ᠰᠧᠪᠳᠡᠨ ᠲᠤᠰᠠᠯᠠᠭᠴᠢ ᠵᠢᠨ ᠡᠮᠦᠰᠴᠦ ᠪᠠᠢ᠌ᠭᠰᠠᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠵᠢᠨᠢ ᠨᠠᠢ᠍ᠮᠠᠨ ᠨᠤᠲᠤᠭᠲᠤᠪᠠᠨ ᠠᠪᠴᠤ ᠢᠷᠡᠬᠦᠳᠤ ᠨᠠᠢ᠍ᠮᠠᠨ ᠸᠠᠩ ᠮᠠᠰᠢᠳᠠ ᠡᠮᠭᠡᠨᠢᠨ ᠭᠠᠰᠢᠭᠤᠳᠠᠬᠤ ᠵᠢᠨ ᠬᠠᠮᠲᠤ ᠬᠦᠨᠳᠦᠳᠭᠡᠭᠰᠡᠨ ᠰᠡᠳᠭᠢᠯᠭᠡᠪᠠᠨ ᠢᠯᠡᠳᠭᠡᠬᠦ ᠵᠢᠨ ᠲᠦᠯᠦᠭᠡ᠂ ᠬᠤᠶᠠᠭ ᠳᠤᠭᠤᠯᠠᠭᠠ ᠵᠢᠨᠢ ᠲᠠᠬᠢᠬᠤ ᠰᠦᠮᠡ ᠪᠠᠢ᠌ᠭᠤᠯᠬᠤᠪᠠᠷ ᠵᠠᠷᠯᠢᠭ ᠪᠠᠭᠤᠯᠭ᠋ᠠᠵᠠᠢ᠃
ᠰᠦᠮᠡ ᠵᠢ ᠠᠩᠬᠠ ᠡᠬᠢᠨᠳᠤᠪᠠᠨ ᠤᠤᠯᠤᠨ ᠪᠠᠭᠠ ᠪᠡᠷᠬᠡ ᠰᠤᠮᠤ ᠵᠢᠨ ᠶᠡᠬᠡ ᠵᠡᠭᠡᠰᠦᠲᠡᠢ ᠭᠠᠴᠠᠭᠠ ᠵᠢᠨ ᠲᠡᠨᠳᠡ ᠪᠠᠢ᠌ᠭᠤᠯᠤᠭᠰᠠᠨ ᠪᠠ ᠬᠣᠶᠠᠳᠤᠭ᠋ᠠᠷ ᠤᠳᠠᠭᠠᠨᠢ ᠤᠤᠯᠤᠨ ᠠᠩᠨᠠᠢ ᠰᠤᠮᠤ ᠵᠢᠨ ᠳᠤᠯᠴᠢᠨ ᠠᠢ᠌ᠯᠤᠨ ᠣᠢ᠌ᠷᠠᠯᠴᠠᠭᠠ ᠪᠠᠢ᠌ᠭᠤᠯᠤᠭᠰᠠᠨ ᠭᠡᠨᠡ᠃ ᠭᠡᠪᠡᠴᠦ ᠬᠣᠶᠠᠷ ᠤᠳᠠᠭᠠ ᠰᠦᠮᠡ ᠵᠢᠨ ᠣᠷᠣᠢ ᠭᠠᠷᠭ᠋ᠠᠬᠤ ᠦᠶᠡᠪᠠᠷ ᠶᠡᠭᠦᠷᠡᠵᠦ ᠤᠨᠠᠭᠰᠠᠨ ᠪᠣᠯᠬᠣᠷ ᠪᠠᠢ᠌ᠭᠤᠯᠵᠤ ᠳᠡᠢ᠌ᠯᠦᠭᠰᠡᠨ ᠦᠭᠡᠢ᠃ ᠬᠣᠵᠢᠮᠨᠢ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠲᠦᠪ ᠳᠠᠴᠢᠨᠲᠠᠯᠠᠠᠴᠠ ᠵᠡᠭᠦᠨ ᠬᠣᠢ᠌ᠰᠢ 80 ᠭᠠᠵᠠᠷᠤᠨ ᠵᠠᠢᠲᠠᠢ ᠣᠩᠭᠣᠨ ᠲᠦᠩ ᠭᠡᠳᠡᠭ ᠪᠠᠯᠠᠷ ᠰᠢᠭᠤᠢᠲᠠᠢ ᠭᠠᠵᠠᠷ ᠰᠦᠮᠡ ᠪᠠᠢ᠌ᠭᠤᠯᠤᠭᠰᠠᠨ ᠪᠠᠢ᠌ᠨᠠ᠃ ᠪᠠᠢ᠌ᠨ ᠳᠠᠬᠢᠨ ᠶᠡᠭᠦᠷᠡᠨ ᠨᠤᠷᠠᠵᠤ ᠪᠠᠢ᠌ᠲᠠᠯᠠ ᠶᠠᠭᠤᠨᠳᠤ ᠪᠠᠢ᠌ᠨ ᠳᠠᠬᠢᠨ ᠭᠠᠵᠠᠷ ᠰᠢᠯᠵᠢᠵᠤ ᠰᠦᠮᠡ ᠪᠠᠢ᠌ᠭᠤᠯᠤᠭᠰᠠᠨ ᠪᠣᠢ？ ᠶᠠᠭᠤᠨᠳᠤ ᠭᠠᠪᠢᠶᠠᠲᠤ ᠪᠠᠭ᠋ᠠᠲᠤᠷᠤᠨ ᠳᠤᠭᠤᠯᠠᠭᠠ ᠵᠢ ᠲᠠᠬᠢᠳᠠᠭ ᠶᠤᠮ ᠪᠣᠢ？ ᠡᠨᠡ ᠪᠣᠯ ᠬᠦᠨᠳᠦᠳᠭᠡᠯ ᠲᠡᠲᠦᠢ ᠪᠢᠰᠢ᠂ ᠨᠢᠭᠡ ᠵᠦᠢ᠍ᠯᠤᠨ ᠰᠢᠲᠦᠯᠭᠡ ᠪᠢᠰᠢᠷᠡᠯ᠂ ᠨᠢᠭᠡ ᠵᠦᠢ᠍ᠯᠤᠨ ᠰᠣᠶᠣᠯ ᠰᠡᠳᠭᠢᠯᠭᠡ᠂ ᠨᠢᠭᠡ ᠵᠦᠢ᠍ᠯᠤᠨ ᠤᠯᠠᠮᠵᠢᠯᠠᠯ ᠶᠤᠮ᠃
ᠤᠯᠠᠮᠵᠢᠯᠠᠯ ᠶᠠᠷᠢᠶᠠᠨᠳᠤ ᠲᠤᠰᠠᠯᠠᠭᠴᠢ ᠵᠢᠨ ᠳᠤᠭᠤᠯᠠᠭᠠ ᠮᠠᠰᠢ ᠲᠣᠮᠣ᠂ 60 ᠵᠢᠩ ᠪᠣᠳᠠᠭᠠ ᠵᠢ ᠰᠠᠪᠠᠯᠠᠵᠤ ᠪᠠᠭᠲᠠᠳᠠᠭ ᠭᠡᠨᠡ᠃ ᠠᠷᠠᠳᠤᠨ ᠠᠮᠠᠨ ᠵᠣᠬᠢᠶᠠᠯᠳᠤ ᠪᠠᠭ᠋ᠠᠲᠤᠷ ᠡᠷᠡᠰᠢ ᠦᠰᠭᠡᠨ ᠳᠦᠰᠭᠡᠨᠲᠠᠢ ᠳᠦᠷᠰᠦᠯᠡᠬᠦᠨᠢ ᠮᠠᠰᠢ ᠣᠯᠠᠨ ᠬᠠᠷᠠᠭᠳᠠᠳᠠᠭ ᠪᠢᠯᠡ᠃ ᠡᠢ᠌ᠮᠦᠠᠴᠠ ᠲᠤᠰᠠᠯᠠᠭᠴᠢ ᠵᠢᠨ ᠳᠤᠭᠤᠯᠠᠭᠠ ᠵᠢ 《ᠨᠢᠭᠡ ᠳ᠋ᠧᠦ ᠬᠣᠶᠠᠷ ᠱᠧᠩ （ᠪᠠᠷᠤᠭ 60 ᠵᠢᠩ）》 ᠪᠤᠳᠠᠭᠠ ᠰᠠᠪᠠᠯᠠᠵᠤ ᠪᠠᠭᠲᠠᠭ᠋ᠠᠨᠠ ᠭᠡᠳᠡᠭᠨᠢ ᠪᠠᠭ᠋ᠠᠲᠤᠷ ᠵᠠᠩᠵᠤᠨᠤᠪᠠᠨ ᠪᠡᠶᠡ ᠪᠢᠯᠳᠠᠷᠤᠨ ᠲᠣᠮᠣ᠂ ᠴᠢᠳᠠᠯ ᠬᠦᠴᠦᠨᠤ ᠶᠡᠬᠡ ᠭᠡᠳᠡᠭᠢ ᠳᠣᠪᠣᠢ᠌ᠯᠭ᠋ᠠᠬᠤ ᠭᠡᠰᠡᠨ ᠵᠣᠷᠢᠯᠭᠠᠲᠠᠢ ᠠᠵᠠᠢ᠃
ᠣᠳᠤ ᠡᠨᠳᠡ ᠵᠦᠪᠬᠡᠨ ᠮᠡᠢ᠌ᠷᠡᠨ ᠨᠣᠶᠠᠨᠤ ᠪᠠᠭᠤᠷᠢ ᠵᠢ ᠰᠠᠬᠢᠭᠰᠠᠨ ᠪᠦᠳᠦᠭᠦᠨ ᠱᠠᠩᠰᠢ ᠦᠯᠢᠭᠡᠷ ᠳᠣᠮᠣᠭ ᠬᠦᠦᠷᠨᠢᠵᠦ᠂ ᠦᠩᠭᠡᠷᠡᠭᠰᠡᠨ ᠣᠳᠣ ᠵᠢ ᠲᠣᠯᠢᠳᠠᠨ ᠰᠦᠷᠯᠢᠭᠦᠨ ᠪᠠᠷᠠᠲᠠᠢ ᠰᠡᠬᠦᠢ᠌ᠨᠡ᠃ ᠪᠣᠣ ᠢᠦᠢ ᠮᠢᠨ ᠠᠪᠤᠭ᠋ᠠᠢ ᠪᠢᠳᠡᠨᠢ ᠳᠠᠭ᠋ᠠᠭᠤᠯᠵᠤ᠂ ᠰᠠᠪᠠᠲᠠᠢ ᠦᠵᠡᠮᠵᠢ ᠰᠢᠭ ᠤᠷᠭᠤᠭᠰᠠᠨ ᠲᠣᠮᠣ ᠱᠠᠩᠰᠢ ᠮᠣᠳᠣᠨᠤ ᠬᠠᠵᠠᠭᠤᠳᠤ ᠬᠦᠷᠪᠡ᠃ ᠱᠠᠩᠰᠢ ᠮᠣᠳᠣᠨᠢ ᠲᠤᠰ ᠠᠢ᠌ᠯᠢ ᠡᠭᠦᠰᠭᠡᠨ ᠰᠠᠭᠤᠷᠢᠰᠢᠭᠰᠠᠨ ᠮᠠᠨᠢ ᠮᠡᠢ᠌ᠷᠡᠨᠤ ᠬᠣᠢ᠌ᠴᠢᠰᠤᠨ ᠰᠠᠭᠤᠵᠤ ᠪᠠᠢ᠌ᠭᠰᠠᠨ ᠪᠠᠢ᠌ᠰᠢᠩ ᠭᠡᠷᠤᠨ ᠡᠭᠦᠳᠡᠨ ᠬᠠᠵᠠᠭᠤᠳᠤ ᠤᠷᠭᠤᠭᠰᠠᠨ ᠪᠠᠢ᠌ᠵᠠᠢ᠃ ᠠᠩᠬᠠ ᠡᠬᠢᠨᠳᠤᠪᠠᠨ ᠨᠠᠢ᠍ᠮᠠᠨ ᠸᠠᠩᠤᠨ ᠭᠡᠷ ᠰᠠᠯᠠᠭᠠ ᠵᠢᠨ ᠬᠦᠬᠡ ᠵᠢᠩᠰᠡᠲᠠᠢ ᠲᠠᠢ᠌ᠵᠢ ᠮᠠᠨᠢ ᠮᠡᠢ᠌ᠷᠡᠨ᠂ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠬᠢᠭᠡᠳ ᠳᠣᠯᠣᠭ᠋ᠠᠨ ᠮᠣᠳᠣ ᠠᠢ᠌ᠯᠤᠨ ᠳᠤᠮᠳᠠ ᠬᠡᠰᠡᠭᠤᠨ ᠭᠠᠵᠠᠷᠲᠤ ᠭᠡᠷ ᠬᠦᠷᠢᠶᠡ ᠪᠠᠢ᠌ᠭᠤᠯᠵᠤ ᠰᠠᠭᠤᠷᠢᠰᠢᠭᠰᠠᠨ ᠪᠦᠭᠡᠳ ᠬᠠᠷᠠᠨᠤᠳ （ᠬᠠᠨ）᠂ ᠦᠵᠢᠶᠡᠳ （ᠦ᠋）᠂ ᠰᠢᠶᠧᠵᠢᠨ （ᠰᠢᠶᠧ） ᠵᠡᠷᠭᠡ ᠣᠪᠣᠭᠲᠠᠳ ᠤᠷᠢᠳ ᠬᠣᠵᠢᠳ ᠲᠤᠰ ᠭᠠᠵᠠᠷ ᠢᠷᠡᠵᠦ ᠰᠠᠭᠤᠷᠢᠰᠢᠨ ᠠᠮᠢᠳᠤᠷᠠᠭᠰᠠᠨ ᠵᠶ᠋ᠡᠷ ᠰᠦᠮᠡ ᠵᠢᠨ ᠠᠢ᠌ᠯ ᠪᠦᠷᠢᠯᠳᠦᠭᠰᠡᠨ ᠭᠡᠨᠡ᠃
ᠳᠣᠮᠣᠭᠤᠨ ᠰᠠᠢ᠌ᠬᠠᠨ ᠪᠠᠶᠠᠨᠲᠠᠯᠠ ᠵᠢᠨ ᠦᠯᠢᠭᠡᠷ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠁
ᠪᠠᠬᠠᠷᠤᠯᠲᠠᠢ ᠰᠠᠢ᠌ᠬᠠᠨ ᠰᠢᠨᠡ ᠳᠦᠷᠬᠦ
ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯ 2019 ᠣᠨᠳᠤ ᠪᠦᠬᠦ ᠤᠯᠤᠰᠤᠨ ᠬᠦᠳᠡᠭᠡ ᠲᠣᠰᠬᠣᠨᠤ ᠪᠦᠲᠦᠭᠡᠨ ᠪᠠᠢ᠌ᠭᠤᠯᠤᠯᠲᠠ ᠵᠢᠨ ᠳᠠᠭᠤᠷᠢᠶᠠᠯ ᠲᠣᠰᠬᠣᠨ ᠵᠶ᠋ᠡᠷ ᠦᠨᠡᠯᠡᠭᠳᠡᠵᠦ᠂ ᠪᠠᠶᠠᠵᠢᠯ ᠬᠦᠭᠵᠢᠯᠤᠨ ᠵᠠᠮ ᠵᠶ᠋ᠡᠷ ᠳᠠᠭ᠋ᠠᠭᠤᠯᠤᠭᠴᠢ ᠵᠢᠱ᠌ᠢᠶᠡᠴᠢ ᠲᠤᠰᠬᠤᠨ ᠪᠣᠯᠬᠣᠷ ᠪᠢᠳᠡᠨᠤ ᠠᠶᠠᠯᠠᠯᠤᠨ ᠪᠠᠭᠤᠨᠬᠢᠨ ᠰᠢᠪᠡᠭᠡᠲᠦ ᠲᠤᠰᠬᠤᠨᠢ ᠤᠷᠢᠳ ᠵᠶ᠋ᠠᠷ ᠵᠣᠷᠢᠭᠰᠠᠨ ᠶᠤᠮ᠃ ᠰᠢᠪᠡᠭᠡᠲᠦ ᠭᠡᠵᠤ 500 ᠢᠯᠡᠭᠦᠦ ᠡᠷᠦᠬᠡᠲᠠᠢ ᠲᠣᠮᠣ ᠠᠢ᠌ᠯ ᠃ ᠰᠢᠨᠡ ᠴᠠᠭ ᠦᠶᠡ ᠵᠢᠨ ᠦᠩᠭᠡ ᠳᠦᠷᠰᠦ ᠵᠢ ᠬᠠᠷᠠᠭᠤᠯᠤᠭᠰᠠᠨ ᠪᠠᠶᠠᠨ ᠠᠢ᠌ᠯ᠃ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯᠤᠨ 500 ᠡᠷᠦᠬᠡ ᠵᠢᠨ ᠳᠣᠲᠤᠷᠠ᠂ 460 ᠭᠠᠷᠤᠢ ᠡᠷᠦᠬᠡᠨᠢ 《ᠤᠨᠤᠯᠭᠠ》ᠳᠤ ᠬᠡᠷᠡᠭᠯᠡᠬᠦ ᠬᠤᠪᠢ ᠵᠢᠨ ᠵᠢᠵᠢᠭ ᠮᠠᠰᠢᠨᠲᠠᠢ ᠭᠡᠵᠤ ᠲᠤᠰᠬᠤᠨᠤ ᠳᠠᠷᠤᠭᠠᠠᠴᠠ ᠣᠮᠣᠭ ᠪᠠᠷᠳᠠᠮ ᠲᠠᠨᠢᠯᠴᠠᠭᠤᠯᠵᠤ ᠪᠠᠢ᠌ᠯᠠ᠃
《ᠲᠠᠨᠤ ᠠᠢ᠌ᠯᠤᠨᠬᠢᠨ ᠮᠠᠯ ᠲᠡᠵᠢᠭᠡᠳᠡᠭ ᠦᠦ？》 ᠭᠡᠬᠦᠯᠡᠷ ᠳᠠᠷᠤᠭᠠ ᠭᠤᠸᠠᠢ᠄
《ᠲᠡᠵᠢᠭᠡᠵᠦ ᠪᠠᠢ᠌ᠨᠠ᠂ ᠪᠦᠬᠦ ᠲᠣᠰᠬᠤᠨᠤ ᠮᠠᠯᠤᠨ ᠲᠤᠭᠠ ᠬᠡᠳᠦᠨ ᠮᠢᠩᠭᠠ ᠬᠦᠷᠴᠡᠢ》 ᠭᠡᠨᠡ᠃
《 ᠬᠠᠮᠤᠭᠤᠨ ᠣᠯᠠᠨ ᠮᠠᠯᠲᠠᠢ ᠡᠷᠦᠬᠡ ᠵᠢᠨ ᠦᠬᠡᠷ ᠬᠡᠳᠦᠢ ᠪᠠᠢ᠌ᠭᠠ ᠪᠣᠢ？》 ᠭᠡᠪᠡᠯ
《200 ᠢᠯᠡᠭᠦᠦ ᠲᠤᠯᠤᠭᠰᠠᠨ ᠪᠠᠢ᠌ᠨᠠ》 ᠭᠡᠨᠡ᠃
200 ᠦᠬᠡᠷ ᠭᠡᠳᠡᠭ ᠴᠢᠨᠢ ᠮᠠᠨᠤ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠳᠤ ᠲᠣᠮᠣ ᠪᠠᠶᠠᠨᠳᠤ ᠲᠣᠭ᠋ᠠᠴᠠᠭᠳᠠᠨᠠ᠃ ᠮᠠᠯ ᠵᠶ᠋ᠡᠷ ᠵᠣᠭᠰᠣᠬᠣ ᠦᠦ？ ᠲᠠᠷᠢᠶᠠᠲᠠᠢ᠂ ᠦᠢ᠍ᠯᠡᠳᠪᠦᠷᠢᠲᠠᠢ᠃ ᠲᠤᠰᠬᠤᠨᠤ ᠳᠠᠷᠤᠭᠠ ᠪᠢᠳᠡᠨᠢ ᠳᠠᠭ᠋ᠠᠭᠤᠯᠵᠤ᠂ 《ᠮᠠᠩᠬᠠᠨ ᠳᠤᠲᠤᠷᠭᠠᠲᠠᠢ ᠳᠤᠮᠳᠠᠳᠤ ᠤᠯᠤᠰ · ᠳᠡᠯᠭᠡᠨ ᠦᠵᠡᠭᠦᠯᠦᠯᠭᠡ ᠵᠢᠨ ᠣᠷᠳᠣᠨ》 《ᠦᠪᠦᠷ ᠮᠣᠩᠭᠤᠯᠤᠨ ᠢ ᠯᠢ ᠰᠢᠨ ᠵᠦᠩ ᠨᠦᠩ ᠺᠣᠮᠫᠠᠨᠢ》ᠳᠤ ᠳᠠᠭ᠋ᠠᠭᠤᠯᠵᠤ ᠠᠪᠠᠴᠢᠪᠠ᠃ ᠵᠠᠮᠤᠨ ᠡᠮᠦᠨᠡ ᠲᠠᠯᠠᠳᠤ ᠳᠤᠲᠤᠷᠭᠠ ᠵᠢᠨ ᠲᠠᠷᠢᠶᠠ ᠬᠠᠯᠢᠭᠤᠷᠠᠵᠤ᠂ ᠲᠠᠷᠢᠶᠠ ᠵᠢᠨ ᠦᠵᠦᠭᠦᠷᠲᠤᠬᠢ ᠨᠣᠭᠣᠭ᠋ᠠᠨ ᠦᠩᠭᠡᠲᠠᠢ ᠫᠠᠢ᠌ᠰᠠ ᠢᠯᠡᠷᠬᠡᠢ᠌ᠯᠡᠯ ᠳᠡᠭᠡᠷᠡ 《ᠲᠤᠰ ᠭᠠᠵᠠᠷ ᠬᠣᠪᠤᠷ ᠴᠤᠬᠠᠭ ᠰᠢᠪᠠᠭᠤᠳᠤᠨ ᠴᠡᠩᠭᠡᠯᠤᠨ ᠣᠷᠣᠨ ᠶᠤᠮ᠂ ᠬᠠᠤᠯᠢ ᠶᠣᠰᠤᠭ᠋ᠠᠷ ᠬᠠᠮᠠᠭ᠋ᠠᠯᠠᠵᠠᠭ᠋ᠠᠶᠠ》 ᠭᠡᠰᠡᠨ ᠦᠰᠦᠭ ᠳᠤᠷᠠᠢ᠌ᠨᠠ᠃ ᠵᠠᠮᠤᠨ ᠬᠣᠢ᠌ᠲᠦ ᠲᠠᠯᠠᠳᠤ ᠺᠣᠮᠫᠠᠨᠢ ᠵᠢᠨ ᠬᠣᠶᠠᠷ ᠳᠠᠪᠬᠤᠷ ᠠᠰᠠᠷ ᠰᠢᠯ ᠪᠣᠯᠣᠷ ᠦᠩᠭᠡᠪᠠᠷ ᠬᠢᠯᠠᠯᠵᠠᠨ ᠬᠠᠷᠠᠭᠳᠠᠨᠠ᠃ ᠠᠰᠠᠷᠤᠨ ᠡᠭᠦᠳᠡᠨ ᠳᠡᠭᠡᠷᠡ 《ᠲᠦᠩᠯᠢᠶᠣᠣ ᠬᠣᠲᠠ ᠵᠢᠨ ᠲᠠᠷᠢᠶᠠᠯᠠᠩᠤᠨ ᠰᠢᠨᠵᠢᠯᠡᠭᠡᠨᠤ ᠬᠦᠷᠢᠶᠡᠯᠡᠩᠤᠨ ᠮᠠᠩᠬᠠᠨ ᠳᠤᠲᠤᠷᠭᠠ ᠵᠢᠨ ᠰᠤᠳᠤᠯᠭ᠋ᠠᠨᠤ ᠭᠠᠵᠠᠷ》 ᠭᠡᠬᠦ ᠦᠰᠦᠭᠲᠠᠢ᠃ ᠪᠢᠳᠡᠨᠢ ᠬᠦᠷᠬᠦᠳᠤ ᠶᠠᠭ ᠰᠠᠶᠢᠬᠠᠨ ᠴᠠᠢ᠌ᠯᠭ᠋ᠠᠭᠰᠠᠨ ᠳᠣᠲᠣᠷᠭᠠ ᠲᠡᠭᠡᠭᠡᠭᠰᠡᠨ ᠬᠣᠶᠠᠷ ᠲᠣᠮᠣ ᠮᠠᠰᠢᠨ ᠲᠡᠷᠭᠡ ᠬᠦᠷᠴᠦ ᠢᠷᠡᠭᠡᠳ ᠬᠦᠮᠦᠷᠭᠡᠳᠤ ᠣᠷᠤᠭᠤᠯᠬᠤᠪᠠᠷ ᠪᠠᠢ᠌ᠪᠠ᠃ ᠳᠤᠲᠤᠷᠭᠠ ᠵᠢᠨ ᠦᠩᠭᠡ᠂ ᠬᠡᠯᠪᠡᠷᠢ ᠳᠦᠷᠰᠦᠨᠢ ᠤᠭᠤᠲᠠᠨᠤ ᠭᠠᠳᠠᠨᠠᠠᠴᠠ ᠲᠣᠳᠣ ᠬᠠᠷᠠᠭᠳᠠᠨᠠ᠃ ᠺᠣᠮᠫᠠᠨᠢᠨᠢ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯᠳᠤ ᠪᠠᠢ᠌ᠪᠠᠴᠤ ᠳᠤᠲᠤᠷᠭᠠᠨᠢ ᠬᠠᠷᠢᠨ ᠪᠠᠶᠠᠨᠲᠠᠯᠠ ᠰᠤᠮᠤᠨᠤ ᠪᠣᠰᠤᠳ ᠠᠢ᠌ᠯ ᠲᠤᠰᠬᠤᠨ ᠵᠶ᠋ᠡᠷ ᠴᠦ᠍ ᠲᠠᠷᠢᠵᠤ ᠪᠠᠢ᠌ᠭᠠ ᠠᠵᠢ᠃
ᠰᠢᠨᠵᠢᠯᠡᠭᠡ ᠮᠡᠷᠭᠡᠵᠢᠯᠤᠨ ᠰᠢᠨᠡ ᠨᠡᠭᠡᠭᠡᠯᠲᠡ ᠲᠠᠰᠤᠷᠠᠯᠲᠠ ᠦᠭᠡᠢ ᠮᠡᠨᠳᠦᠯᠡᠬᠦ ᠵᠢ ᠳᠠᠭ᠋ᠠᠯᠳᠤᠨ ᠮᠠᠩᠬᠠᠨ ᠨᠤᠲᠤᠭᠲᠤ ᠤᠰᠤᠨ ᠲᠤᠳᠤᠷᠭᠠ ᠲᠠᠷᠢᠬᠤ ᠪᠣᠯᠣᠭᠰᠠᠨᠨᠢ ᠡᠯᠡᠰᠦ ᠮᠠᠩᠬᠠᠪᠠᠷ ᠭᠣᠣᠯᠯᠠᠭᠰᠠᠨ ᠪᠠᠶᠠᠨᠲᠠᠯᠠ ᠨᠤᠲᠤᠭᠤᠨ ᠨᠢᠭᠡ ᠶᠡᠬᠡ ᠬᠤᠪᠢᠷᠠᠯᠲᠠ ᠪᠣᠯᠬᠣ ᠶᠤᠮ᠃ ᠨᠤᠲᠤᠭ ᠰᠢᠷᠣᠢ᠂ ᠬᠦᠷᠦᠩᠭᠡ ᠮᠦᠩᠭᠦ᠂ ᠬᠦᠮᠦᠨᠤ ᠬᠦᠴᠦᠨ ᠵᠡᠷᠭᠡ ᠲᠠᠯᠠ ᠵᠢ ᠨᠠᠷᠢᠯᠢᠭ ᠰᠤᠳᠤᠯᠤᠭᠰᠠᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠰᠤᠮᠤ ᠪᠠᠯᠭ᠋ᠠᠰᠤ ᠪᠤᠯᠭ᠋ᠠᠨ ᠦᠪᠡᠷ ᠦᠪᠡᠷᠤᠨ ᠵᠶ᠋ᠡᠨ ᠬᠣᠷᠸᠠ ᠲᠣᠬᠢᠷᠠᠭᠤᠯᠭᠠ ᠬᠢᠭᠰᠡᠨᠠᠴᠠ ᠮᠠᠩᠬᠠᠨ ᠳᠤᠲᠤᠷᠭᠠ ᠂ ᠵᠢᠮᠢᠰ᠂ ᠬᠠᠯᠠᠭᠤᠨ ᠨᠣᠭᠣᠭᠠ᠂ ᠡᠮᠤᠨ ᠮᠠᠲ᠋ᠧᠷᠢᠶᠠᠯ ᠲᠠᠷᠢᠬᠤ ᠭᠡᠬᠦ ᠮᠡᠲᠦᠪᠠᠷ ᠲᠠᠷᠢᠮᠠᠯᠤᠨ ᠦᠢ᠍ᠯᠡᠰ ᠡᠷᠬᠢᠯᠡᠬᠦ ᠵᠢᠴᠢ ᠮᠦᠭᠦ ᠪᠣᠢ᠌ᠵᠢᠭᠤᠯᠬᠤ᠂ ᠮᠠᠯ ᠲᠡᠵᠢᠭᠡᠬᠦ᠂ ᠵᠤᠭ᠋ᠠᠴᠠᠯᠤᠨ ᠦᠢ᠍ᠯᠡᠰ ᠡᠷᠬᠢᠯᠡᠬᠦ᠂ ᠦᠢ᠍ᠯᠡᠳᠪᠦᠷᠢ ᠪᠠᠢ᠌ᠭᠤᠯᠬᠤ ᠁ ᠭᠡᠬᠦ ᠮᠡᠲᠦ ᠵᠢᠨ ᠠᠳᠠᠯᠢ ᠪᠣᠰᠤ ᠵᠢᠨ ᠡᠵᠡᠩᠨᠡᠬᠦ ᠬᠡᠯᠪᠡᠷᠢᠲᠠᠢ ᠠᠳᠠᠯᠢ ᠪᠣᠰᠤ ᠵᠢᠨ ᠠᠮᠢᠳᠤᠷᠠᠯᠤᠨ ᠵᠠᠮ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠬᠦᠳᠡᠭᠡ ᠲᠣᠰᠬᠤᠨᠤ ᠠᠷᠠᠳ ᠲᠦᠮᠡᠨᠤ ᠡᠮᠦᠨᠡ ᠳᠤᠷᠠᠢ᠌ᠭᠰᠠᠨ ᠪᠠᠢ᠌ᠨᠠ᠃ ᠰᠢᠪᠡᠭᠡᠲᠦ ᠵᠢᠨ ᠠᠢ᠌ᠯᠤᠨ ᠮᠠᠩᠬᠠᠨ ᠳᠤᠲᠤᠷᠭᠠ ᠵᠢᠨ ᠰᠤᠳᠤᠯᠭ᠋ᠠᠨᠤ ᠭᠠᠵᠠᠷ ᠪᠣᠯ ᠲᠡᠳᠡᠭᠡᠷᠤᠨ ᠳᠣᠲᠤᠷᠠᠬᠢ ᠨᠢᠭᠡᠨᠢ ᠶᠤᠮ᠃ ᠨᠠᠮ ᠵᠠᠰᠠᠭᠤᠨ ᠵᠦᠪ ᠤᠳᠤᠷᠢᠳᠤᠯᠭᠠ ᠬᠢᠭᠡᠳ ᠰᠤᠳᠤᠯᠭ᠋ᠠᠨᠤ ᠭᠠᠵᠠᠷᠤᠨᠬᠢᠨᠤ ᠮᠡᠷᠭᠡᠵᠢᠯᠤᠨ ᠵᠢᠯᠤᠭᠤᠳᠤᠯᠭᠠ ᠵᠢᠴᠢ ᠨᠤᠲᠤᠭᠤᠨ ᠠᠷᠠᠳᠤᠨ ᠬᠦᠳᠡᠯᠮᠦᠷᠢᠴᠢ ᠬᠣᠶᠠᠷ ᠭᠠᠷ ᠵᠶ᠋ᠡᠷ ᠰᠢᠮᠡᠲᠡᠢ᠂ ᠠᠮᠲᠠᠲᠠᠢ ᠳᠤᠲᠤᠷᠭᠠ ᠬᠣᠯᠠ ᠣᠢ᠌ᠷᠠ ᠵᠢᠨ ᠬᠦᠮᠦᠰᠤᠨ ᠬᠣᠭᠣᠯᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠳᠡᠯᠭᠡᠭᠳᠡᠵᠦ᠂ ᠪᠠᠶᠠᠨᠲᠠᠯᠠ ᠨᠤᠲᠤᠭᠤᠨ ᠠᠷᠠᠳ ᠲᠦᠮᠡᠨᠢ ᠪᠠᠶᠠᠵᠢᠯᠤᠨ ᠵᠠᠮ ᠦᠭᠡᠳᠡ ᠬᠦᠲᠦᠯᠵᠡᠢ᠃ ᠳᠣᠲᠣᠭᠰᠢ ᠣᠷᠣᠬᠣᠳᠤ ᠭᠣᠶᠣ ᠭᠣᠶᠣ ᠬᠠᠢ᠌ᠷᠴᠠᠭ ᠪᠣᠭᠣᠯᠲᠠᠲᠠᠢ ᠳᠤᠲᠤᠷᠭᠠ ᠳᠡᠯᠭᠡᠨ ᠦᠵᠡᠭᠦᠯᠵᠦ ᠪᠠᠢ᠌ᠭᠠ ᠪᠦᠭᠡᠳ 《ᠪᠦᠬᠦ ᠤᠯᠤᠰᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨᠢ ᠲᠦᠭᠡᠮᠡᠯᠵᠢᠭᠦᠯᠦᠭᠰᠡᠨ ᠵᠢᠱ᠌ᠢᠶᠡᠴᠢ ᠲᠠᠷᠢᠶᠠᠯᠠᠬᠤ ᠲᠣᠰᠬᠤᠨ》 ᠭᠡᠬᠦ ᠬᠦᠬᠢᠭᠦᠯᠦᠯᠤᠨ ᠲᠡᠮᠳᠡᠭ ᠬᠢᠭᠡᠳ ᠳᠤᠮᠳᠠᠳᠤ ᠤᠯᠤᠰᠤᠨ ᠢᠳᠡᠭᠡᠨ ᠤᠮᠳᠠᠭ᠋ᠠᠨᠤ ᠠᠮᠤᠷ ᠲᠦᠪᠰᠢᠨᠤ ᠣᠨᠤ ᠬᠤᠷᠠᠯᠤᠨ ᠵᠦᠪᠯᠠᠯᠠᠴᠠ ᠦᠨᠡᠯᠡᠨ ᠬᠦᠬᠢᠭᠦᠯᠦᠭᠰᠡᠨ 《ᠲᠧᠩ ᠰᠢᠦᠸᠠᠢ ᠵᠢᠶᠦ᠋ᠨ ᠨᠦᠬᠦᠷᠲᠤ᠂ 2015 ᠣᠨᠤ ᠪᠦᠬᠦ ᠤᠯᠤᠰᠤᠨ ᠢᠳᠡᠭᠡᠨ ᠤᠮᠳᠠᠭ᠋ᠠᠨᠤ ᠠᠮᠤᠷ ᠲᠦᠪᠰᠢᠨᠤ ᠲᠠᠯᠠᠪᠠᠷ ᠰᠢᠯᠢᠳᠡᠭ ᠬᠠᠮᠢᠶᠠᠷᠤᠭᠴᠢ》 ᠭᠡᠬᠦ ᠬᠦᠬᠢᠭᠦᠯᠦᠯᠤᠨ ᠲᠡᠮᠳᠡᠭ ᠵᠡᠷᠭᠡ ᠬᠡᠳᠦ ᠬᠡᠳᠦᠨ ᠫᠠᠢ᠌ᠰᠠ ᠲᠡᠮᠳᠡᠭ ᠳᠤᠷᠠᠢ᠌ᠨᠠ᠃ ᠲᠠᠷᠢᠶᠠᠯᠠᠩᠤᠨ ᠦᠢ᠍ᠯᠡᠰᠨᠢ ᠬᠦᠷᠦᠰᠦ ᠰᠢᠷᠣᠢ᠂ ᠦᠷᠡ᠂ ᠪᠣᠷᠳᠣᠭᠣᠷ ᠵᠢᠴᠢ ᠮᠠᠰᠢᠨᠴᠢᠯᠠᠬᠤ ᠵᠡᠷᠭᠡ ᠪᠦᠬᠦ ᠲᠠᠯᠠ ᠵᠢᠨ ᠬᠦᠭᠵᠢᠯᠲᠡᠲᠠᠢ ᠰᠢᠨᠡ ᠴᠠᠭ ᠦᠶᠡᠳᠤ ᠣᠷᠣᠭᠰᠠᠨᠤ ᠬᠡᠪ ᠳᠠᠭᠤᠷᠢᠶᠠᠯ ᠪᠣᠯ ᠶᠠᠭ ᠡᠨᠡ ᠰᠢᠪᠡᠭᠡᠲᠦ ᠲᠣᠰᠬᠤᠨ ᠪᠣᠯᠣᠨᠠ᠃
ᠺᠤᠮᠫᠠᠨᠢ ᠵᠢᠨ ᠬᠣᠶᠠᠳᠤᠭ᠋ᠠᠷ ᠳᠠᠪᠬᠤᠷᠲᠤ ᠭᠣᠶᠣ ᠬᠢᠴᠡᠲᠠᠢ ᠮᠣᠳᠣᠨ ᠰᠢᠷᠡᠭᠡ ᠰᠠᠨᠳᠠᠯᠢᠨᠦᠭᠦᠳᠢ ᠳᠡᠯᠭᠡᠭᠰᠡᠨᠨᠢ ᠵᠣᠴᠢᠯᠠᠬᠤ ᠦᠷᠦᠭᠡ ᠭᠡᠵᠤ ᠲᠣᠬᠢᠷᠠᠭᠤᠯᠤᠭᠰᠠᠨ ᠪᠣᠯᠣᠯᠲᠠᠢ᠃ ᠲᠡᠢ᠌ᠮᠦ ᠡ᠂ ᠰᠢᠪᠡᠭᠡᠲᠦ ᠲᠤᠰᠬᠤᠨᠤ ᠪᠠᠶᠠᠵᠢᠯ ᠬᠦᠭᠵᠢᠯᠤᠨ ᠰᠢᠨᠡ ᠳᠦᠷᠰᠦ ᠵᠢ ᠦᠵᠡᠶᠡ᠂ ᠰᠤᠷᠤᠯᠴᠠᠶᠠ ᠭᠡᠵᠤ ᠠᠯᠤᠰᠤᠨ ᠭᠡᠢ᠌ᠴᠢᠨ ᠴᠠᠭ ᠦᠷᠭᠦᠯᠵᠢ ᠮᠣᠷᠢᠯᠠᠨ ᠰᠠᠭ᠋ᠠᠳᠠᠬᠤᠨᠢ ᠮᠡᠳᠡᠭᠡᠵᠢ ᠵᠢᠨ ᠬᠡᠷᠡᠭ᠃
ᠵᠡᠭᠡᠷᠡᠲᠦ᠃ ᠠᠶᠠᠨᠤ ᠪᠠᠭᠤᠨᠬᠢᠨᠤ ᠲᠡᠷᠭᠡ ᠵᠢᠭᠳᠡᠷᠡᠨ ᠮᠦᠷᠯᠡᠭᠦᠯᠦᠭᠰᠡᠨ ᠬᠣᠷᠢ ᠭᠤᠴᠢᠨ ᠬᠦᠯᠡᠮᠵᠢ ᠵᠢᠨ ᠫᠧᠩᠤᠨ ᠲᠡᠷᠭᠡᠳᠡ ᠬᠦᠷᠦᠭᠰᠡᠨᠨᠢ ᠵᠡᠭᠡᠷᠡᠲᠦ ᠵᠢᠨ ᠠᠢ᠌ᠯᠤᠨ ᠮᠦᠬᠦ ᠪᠣᠢ᠌ᠵᠢᠭᠤᠯᠬᠤ ᠰᠠᠭᠤᠷᠢᠨ ᠭᠠᠵᠠᠷ ᠪᠠᠢ᠌ᠵᠠᠢ᠃ ᠵᠡᠭᠡᠷᠡᠳᠦ ᠭᠠᠴᠠᠭᠠᠨᠢ ᠵᠡᠭᠡᠷᠡᠲᠦ ᠬᠢᠭᠡᠳ ᠬᠤᠵᠢᠷᠲᠤ ᠬᠣᠶᠠᠷ ᠠᠢ᠌ᠯ ᠵᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ 500 ᠢᠯᠡᠭᠦᠦ ᠡᠷᠦᠬᠡᠲᠠᠢ ᠴᠢᠨᠡᠭᠡᠯᠢᠭ ᠠᠢ᠌ᠯ ᠪᠣᠯᠣᠨᠠ᠃
ᠨᠤᠲᠤᠭ ᠰᠢᠷᠣᠢ ᠵᠢᠨ ᠣᠨᠴᠠᠯᠢᠭ ᠵᠶ᠋ᠡᠨ ᠦᠨᠳᠦᠰᠦᠯᠡᠵᠦ᠂ ᠣᠢ ᠰᠢᠭᠤᠢ᠂ ᠮᠠᠯ᠂ ᠲᠠᠷᠢᠶᠠ ᠭᠤᠷᠪᠠᠨ ᠲᠠᠯᠠᠪᠠᠷ ᠤᠯᠠᠮᠵᠢᠯᠠᠯᠲᠤ ᠠᠷᠭᠠ ᠬᠡᠯᠪᠡᠷᠢ ᠵᠢᠨ ᠣᠷᠣᠯᠭᠠ ᠵᠢ ᠲᠦᠰᠢᠵᠦ ᠠᠮᠢᠳᠤᠷᠠᠵᠤ ᠪᠠᠢ᠌ᠭᠰᠠᠨ ᠵᠡᠭᠡᠷᠡᠲᠦ ᠲᠤᠰᠬᠤᠨᠤᠬᠢᠨ ᠰᠢᠨᠡ ᠴᠠᠭ ᠡᠷᠡᠨᠤ ᠠᠯᠬᠤᠭᠠ ᠵᠢ ᠳᠠᠭ᠋ᠠᠵᠤ᠂ ᠦᠭᠡᠷᠡᠴᠢᠯᠡᠯᠲᠡ ᠨᠡᠭᠡᠭᠡᠯᠲᠡ ᠵᠢᠨ ᠴᠢᠭᠯᠡᠯᠲᠡ᠂ ᠲᠦᠷᠦ ᠵᠢᠨ ᠪᠣᠳᠣᠯᠭᠠ ᠵᠢ ᠳᠠᠭ᠋ᠠᠵᠤ ᠡᠷᠴᠢᠮᠲᠠᠢ ᠤᠷᠤᠭᠰᠢᠯᠠᠵᠤ ᠪᠠᠢ᠌ᠭᠠ ᠠᠵᠢ᠃ ᠵᠠᠬᠠ ᠳᠡᠯᠭᠡᠭᠦᠷᠤᠨ ᠪᠠᠢ᠌ᠳᠠᠯᠢ ᠰᠢᠨᠵᠢᠵᠦ᠂ ᠭᠠᠵᠠᠷᠤᠨ ᠠᠰᠢᠭᠢ ᠲᠡᠭᠷᠢ ᠵᠢᠨ ᠵᠦᠢᠳᠤ ᠨᠡᠢ᠌ᠴᠡᠭᠦᠯᠦᠨ ᠬᠦᠮᠦᠨᠤ ᠰᠡᠳᠭᠢᠯᠳᠤ ᠨᠡᠢ᠌ᠴᠡᠭᠦᠯᠵᠦ ᠡᠵᠡᠩᠨᠡᠬᠦᠨᠢ ᠵᠡᠭᠡᠷᠡᠲᠦ ᠵᠢᠨ ᠠᠢ᠌ᠯᠤᠨ ᠣᠨᠴᠠᠯᠢᠭ ᠭᠡᠯᠲᠡᠢ᠃ ᠲᠡᠳᠡ ᠬᠠᠯᠠᠭᠤᠨ ᠨᠣᠭᠣᠭᠠ ᠲᠠᠷᠢᠵᠤ᠂ ᠲᠠᠯᠠ ᠠᠭᠯᠠᠭ ᠪᠦᠷᠬᠦᠲᠡᠯᠡ ᠤᠯᠠᠢ᠌ᠯᠭ᠋ᠠᠵᠤ᠂ ᠲᠠᠯᠠ ᠭᠠᠵᠠᠷᠤᠨ ᠠᠰᠢᠭ ᠰᠢᠮᠡ ᠵᠢ ᠳᠠᠶᠠᠭ᠋ᠠᠷ ᠣᠯᠠᠨᠳᠤ ᠲᠠᠨᠢᠭᠤᠯᠵᠤ ᠪᠠᠢ᠌ᠪᠠ᠃ ᠲᠡᠳᠡ ᠲᠦᠩᠬᠦᠢ᠌ᠭᠰᠡᠨ ᠲᠠᠩᠬᠠᠢ᠌ᠭᠰᠠᠨ ᠲᠠᠷᠪᠤᠰ ᠵᠶ᠋ᠡᠨ ᠲᠦᠩᠯᠢᠶᠣᠣ ᠱᠧᠨᠶᠠᠩ ᠬᠦᠷᠲᠡᠯᠡ ᠠᠮᠰᠠᠭᠤᠯᠵᠤ ᠪᠠᠢ᠌ᠪᠠ᠃ ᠲᠡᠳᠡ ᠦᠬᠡᠷ ᠬᠣᠨᠢ ᠢᠮᠠᠭᠠ ᠠᠳᠤᠭᠤ ᠳᠦᠷᠪᠡᠨ ᠬᠣᠰᠢᠭᠤ ᠮᠠᠯᠢ ᠡᠷᠦᠬᠡ ᠪᠣᠯᠭ᠋ᠠᠨᠤ ᠪᠠᠢ᠌ᠳᠠᠯᠳᠤᠪᠠᠨ ᠵᠣᠬᠢᠴᠠᠭᠤᠯᠵᠤ ᠠᠷᠠᠴᠢᠯᠠᠨ ᠲᠡᠵᠢᠭᠡᠭᠡᠳ ᠪᠠᠢ᠌ᠩᠭᠤ ᠵᠢᠨ ᠣᠷᠣᠯᠭᠠᠪᠠᠨ ᠪᠣᠯᠭ᠋ᠠᠳᠠᠭ᠃ ᠲᠡᠳᠡ ᠣᠳᠣ ᠮᠦᠷᠯᠡᠨ ᠵᠢᠭᠳᠡᠷᠡᠭᠰᠡᠨ ᠮᠦᠬᠦ ᠵᠢᠨ ᠫᠧᠩ ᠵᠣᠬᠢᠶᠠᠭ᠋ᠠᠳ ᠮᠦᠭᠦ ᠪᠣᠢ᠌ᠵᠢᠭᠤᠯᠵᠤ ᠪᠠᠢ᠌ᠭᠠ ᠠᠵᠢ᠃ ᠮᠠᠯ ᠵᠶ᠋ᠡᠨ ᠠᠷᠠᠴᠢᠯᠠᠭ᠋ᠠᠳ ᠲᠠᠷᠢᠶᠠᠪᠠᠨ ᠲᠠᠷᠢᠳᠠᠭᠨᠢ ᠦᠵᠡᠬᠦᠳᠤ ᠤᠯᠠᠮᠵᠢᠯᠠᠯᠲᠤ ᠠᠵᠤ ᠠᠬᠤᠢ᠂ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠰᠢᠭ᠋ ᠪᠣᠯᠪᠠᠴᠤ ᠵᠠᠬᠠ ᠳᠡᠯᠭᠡᠬᠦᠷ᠂ ᠬᠠᠩᠭ᠋ᠠᠯᠭᠠ ᠪᠣᠷᠣᠯᠠᠭᠤᠯᠭᠠ᠂ ᠮᠡᠷᠭᠡᠵᠢᠯ ᠭᠡᠬᠦᠴᠢᠯᠡᠨ ᠴᠠᠭ ᠡᠷᠡᠨᠤ ᠰᠢᠨᠡ ᠬᠠᠨᠳᠤᠰᠢ᠂ ᠰᠢᠨᠡ ᠬᠦᠭᠵᠢᠯᠲᠠᠢ ᠤᠶᠠᠯᠳᠤᠨ ᠡᠵᠡᠩᠨᠡᠬᠦᠨᠢ ᠵᠡᠭᠡᠷᠡᠲᠦ ᠵᠢᠨ ᠠᠢ᠌ᠯᠤᠨ ᠰᠢᠨᠡ ᠳᠦᠷᠰᠦ᠂ ᠰᠢᠨᠡ ᠠᠭᠤᠷ ᠠᠮᠢᠰᠬᠤᠯ᠂ ᠰᠢᠨᠡ ᠠᠮᠢᠳᠤᠷᠠᠯ ᠪᠠᠢ᠌ᠵᠠᠢ᠃
ᠡᠨᠳᠡ ᠵᠡᠭᠡᠷᠡ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠂ ᠵᠡᠭᠡᠷᠳᠡ ᠮᠣᠷᠢ ᠴᠦ᠍ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠵᠡᠷᠭᠡᠯᠡᠨ ᠰᠣᠨᠣᠯᠵᠠᠭᠰᠠᠨ ᠮᠦᠭᠦ ᠵᠢᠨ ᠫᠧᠩ ᠣᠨᠴᠠ ᠵᠢᠨ ᠦᠵᠡᠮᠵᠢ ᠪᠣᠯᠵᠣ ᠨᠣᠲᠣᠭ ᠵᠶ᠋ᠡᠨ ᠴᠢᠮᠡᠨ ᠠᠷᠤᠳᠤ ᠬᠣᠴᠤᠷᠪᠠ᠃
ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ᠃ ᠴᠠᠭ ᠦᠶᠡ ᠤᠷᠤᠭᠰᠢᠯᠠᠭᠰᠠᠭ᠋ᠠᠷ᠃ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠵᠢᠨ ᠠᠢ᠌ᠯᠤᠨᠬᠢᠨ ᠠᠷᠪᠠ ᠵᠢ ᠪᠦᠷᠬᠦᠭᠦᠯᠬᠦ ᠲᠦᠷᠦ ᠵᠢᠨ ᠪᠣᠳᠣᠯᠭᠠ ᠵᠢ ᠤᠭᠲᠤᠨ ᠠᠪᠴᠢᠷᠠᠵᠠᠢ᠃ ᠠᠢ᠌ᠯ ᠪᠣᠯᠭ᠋ᠠᠨᠳᠤ ᠵᠠᠰᠠᠮᠠᠯ ᠵᠠᠮ ᠨᠡᠪᠲᠡᠷᠡᠵᠦ᠂ ᠡᠷᠦᠬᠡ ᠪᠣᠯᠭ᠋ᠠᠨ ᠲᠣᠭᠣᠰᠬᠠᠨ ᠭᠡᠷ ᠪᠠᠷᠢᠵᠤ᠂ ᠶᠠᠳᠠᠭᠤ ᠬᠦᠴᠢᠷᠳᠡᠯᠲᠠᠢ ᠪᠠᠢ᠌ᠳᠠᠯᠠᠴᠠ ᠠᠩᠭᠢᠵᠢᠷᠠᠬᠤ ᠪᠣᠯᠪᠠ᠃ ᠲᠡᠷᠡ ᠳᠤᠮᠳᠠ᠂ ᠰᠢᠨᠡ ᠬᠠᠭᠤᠴᠢᠨ ᠳᠦᠷᠰᠦ ᠪᠠᠢ᠌ᠳᠠᠯᠢ ᠵᠡᠷᠭᠡᠪᠡᠷ ᠬᠠᠷᠠᠭᠤᠯᠤᠭᠰᠠᠨ ᠦᠪᠡᠷᠮᠢᠴᠡ ᠣᠨᠴᠠᠯᠢᠭᠲᠠᠢ ᠠᠢ᠌ᠯ ᠲᠤᠰᠬᠤᠨ ᠢᠯᠡᠷᠡᠭᠰᠡᠨ ᠪᠠᠢ᠌ᠨᠠ᠃
ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠳᠤᠮᠳᠠᠭᠤᠷ ᠬᠣᠢ᠌ᠰᠢ ᠤᠷᠤᠭᠰᠢ ᠵᠠᠰᠠᠭᠰᠠᠨ ᠼᠸᠮᠸᠨ᠋ᠲ ᠵᠠᠮᠲᠠᠢ᠃ ᠵᠠᠮᠤᠨ ᠪᠠᠷᠠᠭᠤᠨ ᠲᠠᠯᠠᠳᠤ ᠰᠢᠨᠡ ᠪᠠᠷᠢᠭᠰᠠᠨ ᠸᠠᠭ᠋ᠠᠷ ᠲᠣᠭᠣᠰᠬᠠᠨ ᠪᠠᠢ᠌ᠰᠢᠩ ᠵᠢᠭᠳᠡᠷᠡᠵᠦ 《ᠰᠢᠨᠡ ᠠᠢ᠌ᠯ》 ᠪᠣᠯᠵᠠᠢ᠃ ᠵᠠᠮᠤᠨ ᠵᠡᠭᠦᠨ ᠲᠠᠯᠠᠳᠤ ᠤᠨᠠᠵᠤ ᠲᠤᠰᠬᠤ ᠠᠶᠤᠯ ᠦᠭᠡᠢ ᠰᠢᠨᠡᠬᠡᠨ ᠰᠢᠷᠣᠢ ᠵᠢᠨ ᠪᠠᠢ᠌ᠰᠢᠩᠤᠳᠠᠴᠠ 18 ᠪᠠᠢ᠌ᠰᠢᠩᠢ ᠬᠠᠭᠤᠴᠢᠨ ᠲᠤᠰᠬᠤᠨᠤ ᠠᠮᠢᠳᠤᠷᠠᠯᠤᠨ ᠦᠩᠭᠡ ᠳᠦᠷᠰᠦ ᠵᠢ ᠬᠠᠳᠠᠭ᠋ᠠᠯᠠᠬᠤ᠂ ᠳᠡᠯᠭᠡᠨ ᠦᠵᠡᠭᠦᠯᠬᠦᠪᠠᠷ ᠦᠯᠡᠳᠡᠭᠡᠵᠡᠢ᠃ ᠭᠡᠬᠦᠳᠤᠪᠠᠨ ᠲᠤᠰᠬᠤᠨᠤ ᠬᠠᠭᠤᠴᠢᠨ ᠰᠠᠭᠤᠷᠢᠨᠢ ᠰᠢᠨᠡ ᠡᠷᠡᠨᠤ ᠵᠤᠭ᠋ᠠᠴᠠᠯᠤᠨ ᠦᠢ᠍ᠯᠡᠰ ᠂ ᠬᠣᠷᠰᠢᠶᠠᠵᠢᠯᠤᠨ ᠦᠢ᠍ᠯᠡᠰ᠂ ᠵᠠᠬᠠ ᠳᠡᠯᠭᠡᠭᠦᠷᠤᠨ ᠠᠵᠤ ᠦᠢ᠍ᠯᠡᠰ ᠵᠡᠷᠭᠡᠲᠠᠢ ᠬᠣᠯᠪᠤᠭᠳᠠᠭᠤᠯᠵᠤ᠂ 《ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠠᠷᠠᠳᠤᠨ ᠵᠠᠩ ᠦᠢ᠍ᠯᠡ ᠵᠢᠨ ᠦᠵᠡᠭᠦᠯᠦᠯᠭᠡ》 《ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠲᠠᠷᠢᠶᠠᠯᠠᠩᠤᠨ ᠬᠣᠷᠰᠢᠶᠠᠵᠢᠯᠤᠨ ᠺᠣᠮᠫᠠᠨᠢ》 《ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠴᠣᠯ ᠪᠠᠢ᠌ᠭ᠋ᠠᠯᠢᠯᠢᠭ ᠴᠠᠭ᠋ᠠᠨ ᠢᠳᠡᠭᠡᠨᠤ ᠦᠢ᠍ᠯᠡᠰ ᠺᠣᠮᠫᠠᠨᠢ》 ᠁ ᠵᠡᠷᠭᠡ ᠵᠢ ᠪᠠᠢ᠌ᠭᠤᠯᠵᠤ᠂ ᠲᠤᠰᠬᠤᠨᠤ ᠠᠷᠠᠳᠤᠨ ᠤᠯᠠᠮᠵᠢᠯᠠᠯᠲᠤ ᠵᠠᠩ ᠦᠢ᠍ᠯᠡ ᠵᠢ ᠣᠷᠣᠨ ᠰᠠᠭᠤᠴᠠ᠂ ᠡᠳ᠋ᠯᠡᠯ ᠬᠡᠷᠡᠭᠰᠡᠯ᠂ ᠢᠳᠡᠭᠡᠨ ᠤᠮᠳᠠᠭ᠋ᠠᠨ᠂ ᠨᠠᠭ᠋ᠠᠳᠤᠮ ᠲᠣᠭᠯᠠᠭ᠋ᠠᠮ ᠵᠡᠷᠭᠡ ᠲᠠᠯᠠᠪᠠᠷ ᠲᠤᠰᠬᠠᠨ ᠬᠠᠷᠠᠭᠤᠯᠵᠤ᠂ ᠬᠣᠯᠠ ᠣᠢ᠌ᠷᠠ ᠵᠢᠨ ᠵᠤᠭ᠋ᠠᠴᠢᠭᠴᠢᠳᠤᠨ ᠲᠠᠭ᠋ᠠᠰᠢᠶᠠᠯ ᠮᠠᠭᠲᠠᠭ᠋ᠠᠯᠢ ᠣᠯᠵᠣ ᠪᠠᠢ᠌ᠭᠠ ᠠᠵᠠᠢ᠃
ᠪᠣᠣ ᠢᠦᠢ ᠮᠢᠨ （ᠨᠠᠰᠤᠠᠠᠤᠷᠲᠤ） ᠠᠪᠤᠭ᠋ᠠᠢ ᠪᠢᠳᠡᠨᠢ ᠳᠠᠭ᠋ᠠᠭᠤᠯᠵᠤ ᠰᠢᠷᠣᠢ ᠵᠢᠨ ᠬᠡᠷᠡᠮᠲᠠᠢ᠂ ᠬᠣᠶᠠᠷ ᠠᠯᠳᠠ ᠦᠷᠭᠡᠨ᠂ ᠠᠯᠳᠠ ᠦᠨᠳᠦᠷ ᠰᠢᠪᠡᠭᠡ ᠡᠭᠦᠳᠡᠲᠠᠢ ᠲᠣᠮᠣ ᠬᠦᠷᠢᠶᠡ ᠵᠢᠨ ᠲᠡᠨᠳᠡ ᠬᠦᠷᠦᠭᠡᠳ᠄ 《ᠵᠠ᠂ ᠡᠨᠡ ᠪᠣᠯ ᠮᠠᠨᠤ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠠᠢ᠌ᠯᠤᠨ 〈ᠮᠠᠩᠬᠠᠨ ᠴᠡᠴᠡᠷᠯᠢᠭ〉 ᠪᠣᠯᠣᠨᠠ》 ᠭᠡᠵᠤ ᠲᠠᠨᠢᠯᠴᠠᠭᠤᠯᠪᠠ᠃ ᠮᠠᠩᠬᠠᠨ ᠴᠡᠴᠡᠷᠯᠢᠭᠨᠢ ᠵᠢᠵᠢᠭᠬᠡᠨ ᠨᠠᠭᠤᠷ᠂ ᠨᠠᠭᠤᠷᠤᠨ ᠬᠦᠪᠡᠭᠡᠨᠤ ᠮᠠᠩᠬᠠ᠂ ᠰᠡᠷᠢᠭᠦᠴᠡᠬᠦ ᠲᠢᠩᠬᠢᠮ᠂ ᠮᠣᠳᠣᠨ ᠬᠦᠭᠦᠷᠭᠡ᠂ ᠵᠡᠭᠡᠰᠦ ᠬᠤᠯᠤᠰᠤᠪᠠᠷ ᠡᠯᠪᠡᠭᠰᠡᠨ ᠲᠣᠮᠣ ᠰᠢᠬᠦᠷ ᠵᠡᠷᠭᠡᠪᠠᠷ ᠪᠦᠷᠢᠯᠳᠦᠵᠦ᠂ ᠴᠠᠭ ᠰᠤᠨᠳᠠᠯᠠᠵᠤ ᠡᠷᠳᠡ ᠵᠠᠭᠤᠨᠤ ᠣᠷᠴᠢᠨ ᠲᠣᠭᠣᠷᠢᠨᠳᠤ ᠣᠴᠢᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠭᠤᠯᠤᠨᠠ᠃ ᠵᠢᠵᠢᠭᠬᠡᠨ ᠨᠠᠭᠤᠷᠨᠢ ᠦᠨᠡᠨᠳᠤᠪᠠᠨ ᠵᠣᠬᠢᠶᠠᠮᠠᠯ ᠨᠠᠭᠤᠷ ᠪᠠᠢ᠌ᠵᠠᠢ ᠃ ᠵᠣᠨᠤ ᠴᠠᠭᠲᠤ ᠤᠮᠪᠠᠯᠲᠠ ᠵᠢᠨ ᠭᠠᠵᠠᠷ᠂ ᠡᠪᠦᠯᠤᠨ ᠤᠯᠠᠷᠢᠯᠳᠤ ᠮᠦᠰᠦ ᠲᠡᠰᠢᠯᠲᠡ ᠵᠢᠨ ᠲᠠᠯᠠᠪᠤᠷ ᠪᠣᠯᠭ᠋ᠠᠵᠤ᠂ ᠲᠤᠰᠬᠤᠨᠤ ᠠᠷᠠᠳᠤᠨ ᠠᠵᠢᠯᠤᠨ ᠴᠢᠯᠦᠭᠡᠨᠤ ᠵᠤᠭᠠ ᠴᠡᠩᠬᠡᠯᠤᠨ ᠲᠠᠯᠠᠪᠤᠷ ᠪᠣᠯᠵᠤ ᠪᠠᠢ᠌ᠭᠠ ᠶᠤᠮ ᠪᠠᠢ᠌ᠨᠠ᠃
ᠮᠠᠩᠬᠠᠨ ᠴᠡᠴᠡᠷᠯᠢᠭᠤᠨ ᠡᠮᠦᠨᠡᠭᠦᠷ ᠼᠸᠮᠸᠨ᠋ᠲ ᠵᠠᠮᠲᠠᠢ᠃ ᠵᠠᠮᠤᠨ ᠡᠮᠦᠨᠡ ᠲᠠᠯᠠᠳᠤ 《ᠦᠨᠳᠦᠰᠦᠲᠡᠨᠤ ᠵᠠᠩ ᠦᠢ᠍ᠯᠡ ᠵᠢᠨ ᠦᠵᠡᠭᠦᠯᠦᠯᠭᠡ ᠵᠢᠨ ᠬᠦᠷᠢᠶᠡᠯᠡᠩ》 ᠪᠣᠢ᠃ ᠪᠢᠳᠡ ᠤᠷᠢᠳ ᠵᠶ᠋ᠠᠷ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯᠤᠨ ᠦᠵᠡᠭᠦᠯᠦᠯᠭᠡ ᠵᠢᠨ ᠭᠡᠷᠲᠤ ᠬᠦᠷᠪᠡᠯ᠂ ᠳᠡᠪᠢᠭᠦᠷ᠂ ᠫᠣᠣᠯᠣᠣ᠂ ᠪᠣᠯᠣ᠂ ᠠᠨᠵᠢᠰᠤ᠂ ᠠᠪᠳᠠᠷᠠ ᠬᠣᠷᠭᠣ ᠁ ᠵᠡᠷᠭᠡ ᠪᠤᠷᠭ᠋ᠠᠰᠤ ᠮᠣᠳᠣᠪᠠᠷ ᠭᠣᠣᠯ ᠮᠠᠲ᠋ᠧᠷᠢᠶᠠᠯ ᠪᠣᠯᠭ᠋ᠠᠭᠰᠠᠨ ᠮᠠᠰᠢ ᠣᠯᠠᠨ ᠵᠦᠢ᠍ᠯᠢ ᠳᠡᠯᠭᠡᠨ ᠦᠵᠡᠭᠦᠯᠵᠦ ᠪᠣᠢ᠂ ᠵᠢᠪᠡᠷᠡᠬᠦ ᠦᠭᠡᠢ ᠲᠡᠮᠦᠷ᠂ ᠰᠦᠯᠢᠶᠣᠣ ᠮᠠᠲ᠋ᠧᠷᠢᠶᠠᠯᠢ ᠡᠭᠦᠳᠦᠨ ᠪᠦᠲᠦᠭᠡᠭᠰᠡᠨᠤ ᠳᠠᠷᠠᠭᠠ ᠡᠳᠡᠭᠡᠷ ᠵᠦᠢ᠍ᠯ ᠣᠳᠣ ᠨᠢᠭᠡᠨᠲᠡ ᠭᠡᠷᠡᠭᠯᠡᠬᠦᠪᠠᠨ ᠪᠣᠯᠢᠵᠤ᠂ ᠶᠣᠰᠤᠲᠠᠢ 《ᠬᠠᠭᠤᠴᠢᠨ ᠶᠠᠭᠤᠮᠠ ᠤᠯᠠ ᠪᠣᠯᠵᠣ᠂ ᠰᠢᠨᠡ ᠶᠠᠭᠤᠮᠠ ᠵᠤᠯᠠ ᠪᠣᠯᠵᠠᠢ》᠃ ᠭᠡᠪᠡᠴᠦ ᠡᠷᠲᠡᠨᠤ ᠮᠣᠩᠭᠤᠯᠴᠤᠳᠤᠨ ᠤᠬᠠᠭ᠋ᠠᠨᠤ ᠬᠤᠷᠴᠠ᠂ ᠭᠠᠷᠤᠨ ᠤᠷᠠᠨᠢ ᠲᠡᠮᠳᠡᠭᠯᠡᠨ ᠦᠯᠡᠳᠡᠭᠰᠡᠨ ᠡᠳᠡᠭᠡᠷ ᠵᠦᠢ᠍ᠯᠡᠰ ᠲᠡᠦᠬᠡᠨ ᠴᠠᠭ ᠦᠶᠡ ᠵᠢᠨ ᠰᠢᠨᠵᠢ ᠲᠡᠮᠳᠡᠭ ᠪᠣᠯᠵᠤ᠂ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠲᠤᠰᠬᠤᠨᠤ ᠠᠷᠠᠳᠤᠨ ᠠᠮᠢᠳᠤᠷᠠᠯᠤᠨ ᠤᠯᠠ ᠮᠦᠷᠢ ᠬᠠᠷᠠᠭᠤᠯᠵᠤ ᠪᠠᠢ᠌ᠳᠠᠭ ᠵᠶ᠋ᠡᠷ ᠵᠶ᠋ᠡᠨ ᠬᠣᠪᠣᠷ ᠨᠠᠨᠳᠢᠨ ᠶᠤᠮ᠃
ᠦᠵᠡᠭᠦᠯᠦᠯᠭᠡ ᠵᠢᠨ ᠭᠡᠷᠠᠴᠠ ᠤᠷᠤᠭᠰᠢᠯᠠᠵᠤ ᠡᠮᠦᠨᠡ ᠬᠦᠷᠢᠶᠡᠨᠳᠤ ᠣᠷᠣᠪᠠᠯ ᠬᠠᠭᠤᠴᠢᠨ ᠴᠠᠭᠤᠨ ᠰᠤᠷᠭ᠋ᠠᠭᠤᠯᠢ ᠵᠢᠨ ᠬᠦᠷᠢᠶᠡᠨᠤ ᠳᠡᠯᠭᠡᠨ ᠦᠵᠡᠭᠦᠯᠦᠯᠭᠡ ᠪᠠᠢ᠌ᠵᠠᠢ᠃ ᠬᠦᠷᠢᠶᠡ ᠬᠠᠰᠢᠶᠠᠨᠢ ᠰᠢᠷᠣᠢ ᠵᠢᠨ ᠬᠡᠷᠡᠮ ᠵᠶ᠋ᠡᠷ ᠪᠤᠰᠬᠠᠭᠳᠠᠵᠤ᠂ ᠠᠩᠭᠢ ᠵᠢᠨ ᠭᠡᠷᠨᠢ ᠴᠦ᠍ ᠰᠢᠷᠣᠢ ᠵᠢᠨ ᠪᠠᠢ᠌ᠰᠢᠩ᠃ ᠬᠦᠷᠢᠶᠡᠨ ᠳᠤᠮᠳᠠᠬᠢ ᠰᠠᠭᠰᠤᠨ ᠪᠦᠮᠪᠦᠭᠡ ᠵᠢᠨ ᠲᠠᠯᠠᠪᠤᠷ ᠵᠢᠴᠢ ᠰᠢᠷᠣᠢᠪᠠᠷ ᠪᠠᠷᠢᠭᠰᠠᠨ ᠫᠢᠩᠫᠠᠩ ᠪᠦᠮᠪᠦᠭᠡ ᠵᠢᠨ ᠰᠢᠷᠡᠭᠡ ᠲᠡᠦᠬᠡ ᠦᠭᠦᠯᠡᠵᠦ ᠤᠭᠲᠤᠪᠠ᠃ ᠳᠣᠲᠣᠭᠰᠢ ᠣᠷᠣᠪᠠᠯ ᠪᠦᠭᠦᠳᠡ ᠵᠢ ᠰᠢᠷᠣᠢᠪᠠᠷ ᠪᠠᠷᠢᠭᠰᠠᠨ ᠪᠠᠭᠰᠢ ᠵᠢᠨ ᠬᠢᠴᠢᠶᠡᠯᠯᠡᠬᠦ ᠰᠢᠷᠡᠭᠡ᠂ ᠰᠤᠷᠤᠭᠴᠢ ᠵᠢᠨ ᠰᠤᠷᠤᠯᠴᠠᠬᠤ ᠰᠠᠨᠳᠠᠯᠢ ᠰᠢᠷᠡᠭᠡ᠂ ᠬᠢᠰᠠ ᠵᠡᠷᠭᠡ ᠬᠠᠷᠠᠭᠳᠠᠪᠠ᠃ 20 ᠳ᠋ᠤᠭ᠋ᠠᠷ ᠵᠠᠭᠤᠨᠤ ᠳᠠᠯᠠᠭ᠋ᠠᠳ ᠣᠨ ᠪᠣᠯᠲᠠᠯᠠ ᠵᠠᠷᠢᠮ ᠠᠢ᠌ᠯ ᠲᠤᠰᠬᠤᠨᠳᠤ ᠡᠢ᠌ᠮᠦᠷᠬᠦᠦ ᠨᠦᠬᠦᠴᠡᠯ ᠳᠣᠣᠷᠠ ᠰᠤᠷᠭ᠋ᠠᠭᠤᠯᠢ ᠡᠷᠬᠢᠯᠡᠵᠦ ᠪᠠᠢ᠌ᠭᠰᠠᠨ ᠪᠢᠯᠡ᠃ ᠬᠠᠷᠢᠴᠠᠭᠤᠯᠤᠯ ᠪᠠᠢ᠌ᠮᠠᠨᠵᠢᠨ ᠰᠠᠶᠢ ᠨᠡᠢ᠌ᠭᠡᠮᠤᠨ ᠬᠦᠭᠵᠢᠯᠲᠡ ᠳᠠᠪᠰᠢᠯᠲᠠ ᠶᠠᠮᠠᠷ ᠪᠣᠯᠬᠣ ᠵᠢ ᠨᠡᠩ ᠲᠣᠳᠤᠷᠬᠠᠢ ᠣᠢ᠌ᠯᠠᠭ᠋ᠠᠨᠠ᠂ ᠬᠠᠷᠢᠴᠠᠭᠤᠯᠤᠯ ᠪᠠᠢ᠌ᠮᠠᠨᠵᠢᠨ ᠰᠠᠶᠢ ᠣᠳᠣᠬᠢ ᠰᠠᠢ᠌ᠨ ᠰᠠᠢ᠌ᠬᠠᠨ ᠠᠮᠢᠳᠤᠷᠠᠯ ᠵᠶ᠋ᠡᠨ ᠨᠠᠨᠳᠢᠩᠨᠠᠬᠤ ᠵᠢ ᠮᠡᠳᠡᠨᠡ᠂ ᠬᠠᠷᠢᠴᠠᠭᠤᠯᠤᠯ ᠪᠠᠢ᠌ᠮᠠᠨᠵᠢᠨ ᠰᠠᠶᠢ ᠴᠠᠭ ᠦᠶᠡ ᠵᠢᠨ ᠬᠠᠷᠢᠭᠤᠴᠠᠯᠭᠠ ᠭᠡᠳᠡᠭ ᠶᠠᠭᠤ ᠭᠡᠳᠡᠭᠢ ᠮᠡᠳᠡᠨᠡ᠃ ᠲᠡᠭᠡᠬᠦᠪᠠᠷ ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠵᠢᠨᠬᠢᠨᠤ ᠳᠡᠯᠭᠡᠨ ᠦᠵᠡᠭᠦᠯᠦᠯᠭᠡᠨᠢ ᠮᠠᠰᠢ ᠴᠢᠬᠤᠯᠠ ᠤᠳᠬᠠ ᠠᠭᠤᠯᠭᠠᠲᠠᠢ᠃ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠨᠡᠯᠢᠶᠡᠳ ᠬᠡᠳᠦᠨ ᠠᠢ᠌ᠯ ᠲᠤᠰᠬᠤᠨᠳᠤ ᠡᠢ᠌ᠮᠦᠷᠬᠦᠦ ᠬᠠᠭᠤᠴᠢᠨ ᠴᠠᠭᠤᠨ ᠡᠳ᠋ᠯᠡᠯ ᠬᠡᠷᠡᠭᠰᠡᠯᠢ ᠳᠡᠯᠭᠡᠨ ᠦᠵᠡᠭᠦᠯᠬᠦ ᠲᠤᠰᠬᠠᠢ ᠦᠷᠦᠭᠡ ᠪᠠᠢ᠌ᠭᠤᠯᠤᠭᠰᠠᠨᠨᠢ ᠨᠡᠢ᠌ᠳᠡᠯᠢᠭ ᠲᠠᠯᠠᠲᠠᠢ ᠪᠦᠭᠡᠳ ᠪᠠᠰᠠ ᠦᠪᠡᠷᠮᠢᠴᠡ ᠲᠠᠯᠠᠲᠠᠢ ᠶᠤᠮ᠃
ᠬᠠᠭᠤᠴᠢᠨ ᠰᠤᠷᠭ᠋ᠠᠭᠤᠯᠢ ᠵᠢᠨ ᠬᠦᠷᠢᠶᠡᠨᠤ ᠳᠡᠷᠭᠡᠳᠡᠬᠢ ᠪᠠᠢ᠌ᠰᠢᠩ ᠪᠣᠯ ᠰᠢᠨᠡ ᠬᠠᠭᠤᠴᠢᠨᠤ ᠬᠣᠯᠪᠤᠭ᠋ᠠᠰᠤ ᠪᠣᠯᠤᠭᠰᠠᠨ ᠬᠦᠳᠡᠭᠡ ᠠᠢ᠌ᠯᠤᠨ ᠬᠣᠭᠣᠯᠠᠨ ᠭᠡᠷ ᠪᠣᠯᠣᠨᠠ᠃ ᠬᠣᠭᠣᠯᠠᠨ ᠭᠡᠷᠤᠨ ᠨᠣᠭᠣᠭᠠ ᠴᠠᠭᠠ᠂ ᠮᠢᠬᠠ ᠲᠠᠷᠢᠶᠠ ᠶᠠᠭᠤ ᠪᠦᠬᠦᠨᠨᠢ ᠲᠤᠰ ᠠᠢ᠌ᠯᠤᠨ ᠨᠤᠲᠤᠭᠤᠨ ᠭᠠᠷᠤᠯᠲᠠ᠃ ᠡᠵᠡᠩᠨᠡᠭᠴᠢ ᠪᠣᠯᠣᠨ ᠦᠢ᠍ᠯᠡᠴᠢᠯᠡᠭᠴᠢᠨᠢ ᠪᠦᠷ ᠲᠤᠰ ᠠᠢ᠌ᠯᠤᠨᠬᠢ᠃ ᠬᠣᠭᠣᠯᠠᠨ ᠭᠡᠷᠨᠢ ᠰᠢᠪᠠᠷ ᠪᠠᠢ᠌ᠰᠢᠩ᠂ ᠬᠠᠨᠵᠤ᠂ ᠵᠤᠤᠬᠠ᠂ ᠬᠣᠪᠣᠩ ᠵᠡᠷᠭᠡᠪᠠᠷ ᠵᠶ᠋ᠡᠨ ᠬᠠᠭᠤᠴᠢᠨ ᠴᠠᠭᠤᠨ ᠦᠩᠭᠡ ᠳᠦᠷᠰᠦ ᠵᠢ ᠬᠠᠷᠠᠭᠤᠯᠵᠤ᠂ ᠬᠤᠭᠤᠯᠠᠨ ᠭᠡᠷ ᠡᠵᠡᠩᠨᠡᠬᠦ ᠠᠷᠭᠠ ᠬᠡᠯᠪᠡᠷᠢ᠂ ᠣᠢ᠌ᠯᠠᠭ᠋ᠠᠨᠳᠠᠬᠤᠨᠤ ᠲᠠᠯᠠᠪᠠᠷ ᠰᠢᠨᠡ ᠴᠠᠭᠤᠨ ᠵᠠᠬᠠ ᠳᠡᠯᠭᠡᠭᠦᠷᠤᠨ ᠠᠵᠤ ᠠᠬᠤᠢ᠌ᠯᠠᠯᠲᠠᠢ ᠨᠡᠢ᠌ᠯᠡᠭᠡᠳ ᠰᠢᠨᠡ ᠬᠦᠳᠡᠭᠡ ᠲᠤᠰᠬᠤᠨᠤ ᠦᠩᠭᠡ ᠭᠠᠯᠪᠢᠷᠢ ᠬᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨ ᠬᠡᠪ ᠳᠠᠭᠤᠷᠢᠶᠠᠯ ᠪᠣᠯᠵᠠᠢ᠃
ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠠᠢ᠌ᠯᠤᠨᠬᠢᠨ ᠵᠤᠭ᠋ᠠᠴᠠᠯᠤᠨ ᠦᠢ᠍ᠯᠡᠰ ᠵᠶ᠋ᠡᠷ ᠭᠣᠣᠯ ᠲᠦᠪ ᠪᠣᠯᠭ᠋ᠠᠵᠤ᠂ ᠵᠤᠭ᠋ᠠᠴᠠᠭᠴᠢᠳᠤᠨ ᠱᠠᠭ᠋ᠠᠷᠳᠠᠯᠭᠠ ᠵᠢᠴᠢ ᠣᠷᠣᠨ ᠨᠤᠲᠤᠭᠤᠨ ᠭᠠᠵᠠᠷ ᠰᠢᠷᠤᠢ᠂ ᠭᠠᠷᠤᠯᠳᠠ᠂ ᠤᠯᠠᠮᠵᠢᠯᠠᠯᠲᠤ ᠠᠵᠤ ᠠᠬᠤᠢ ᠵᠡᠷᠭᠡᠪᠠᠷ ᠦᠨᠳᠦᠰᠦᠯᠡᠯ ᠪᠣᠯᠭ᠋ᠠᠭ᠋ᠠᠳ 《ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠬᠤᠷᠤᠳ》 《ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠪᠤᠷᠴᠠᠭᠤᠨ ᠡᠭᠡᠳᠡᠩ》 《ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠭᠦᠵᠡᠯᠵᠡᠭᠡᠨᠡ》 《ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠦᠵᠦᠮ》 《ᠲᠤᠰᠠᠯᠠᠭᠴᠢ ᠵᠢᠨ ᠰᠦᠮᠡ ᠲᠠᠷᠪᠤᠰ》 ᠁ ᠭᠡᠬᠦ ᠮᠡᠲᠦᠪᠠᠷ ᠠᠢ᠌ᠯ ᠤᠰᠤᠨᠤ ᠲᠤᠰᠬᠠᠢ ᠮᠠᠷᠺ ᠲᠡᠮᠳᠡᠭᠢ ᠡᠭᠦᠳᠦᠨ ᠪᠦᠲᠦᠭᠡᠭᠡᠳ ᠠᠶᠠᠯᠠᠨ ᠵᠤᠭ᠋ᠠᠴᠠᠭᠴᠢᠳᠲᠤ ᠴᠣᠯ ᠪᠠᠢ᠌ᠭ᠋ᠠᠯᠢᠯᠢᠭ ᠢᠳᠡᠭᠡᠨ ᠤᠮᠳᠠᠭ᠋ᠠᠨᠢ ᠬᠠᠩᠭ᠋ᠠᠳᠠᠭᠠᠴᠠ ᠰᠢᠨᠡ ᠬᠦᠳᠡᠭᠡ ᠵᠢᠨ ᠰᠢᠨᠡ ᠵᠠᠮᠢ ᠨᠡᠭᠡᠭᠡᠭᠰᠡᠨ ᠰᠢᠯᠢᠳᠡᠭ ᠲᠤᠰᠬᠤᠨ ᠪᠣᠯᠵᠤ ᠬᠣᠯᠠ ᠣᠢ᠌ᠷᠠᠳᠤ ᠠᠯᠳᠠᠷᠰᠢᠭᠰᠠᠨ ᠪᠠᠢ᠌ᠨᠠ᠃
2017 ᠣᠨᠤ 5 ᠳ᠋ᠤᠭ᠋ᠠᠷ ᠰᠠᠷᠠᠳᠤ᠂ ᠪᠦᠬᠦ ᠲᠤᠰᠬᠤᠨᠤ ᠠᠷᠠᠳ ᠬᠤᠪᠢ ᠤᠷᠤᠭᠤᠯᠵᠤ 《ᠦᠪᠦᠷ ᠮᠣᠩᠭᠤᠯᠤᠨ ᠰᠦᠮᠡ ᠵᠢᠨ ᠠᠢ᠌ᠯᠤᠨ ᠠᠷᠠᠳᠤᠨ ᠵᠠᠩ ᠦᠢ᠍ᠯᠡ ᠵᠢᠨ ᠰᠡᠯᠡᠭᠦᠴᠡᠯ ᠵᠤᠭ᠋ᠠᠴᠠᠯᠤᠨ ᠺᠣᠮᠫᠠᠨᠢ》 ᠵᠢ ᠪᠦᠷᠢᠳᠭᠡᠭᠦᠯᠦᠨ ᠪᠠᠢ᠌ᠭᠤᠯᠤᠭᠰᠠᠨᠠᠴᠠ ᠪᠦᠬᠦ ᠲᠤᠰᠬᠤᠨᠤ ᠠᠷᠠᠳ ᠲᠦᠮᠡᠨ ᠭᠠᠴᠠᠭ᠋ᠠᠨᠤ ᠤᠳᠤᠷᠢᠳᠤᠯᠭᠠ᠂ ᠺᠣᠮᠫᠠᠨᠢ ᠵᠢᠨ ᠤᠳᠤᠷᠢᠳᠤᠯᠭᠠ ᠵᠢᠨ ᠲᠤᠭᠤᠷᠢᠨᠳᠤ ᠪᠦᠯᠬᠦᠮᠳᠡᠨ ᠨᠢᠭᠲᠠᠷᠠᠵᠤ᠂ ᠺᠣᠮᠫᠠᠨᠢ ᠵᠢᠨ ᠡᠵᠡᠩᠨᠡᠬᠦ ᠠᠷᠭᠠ ᠬᠡᠯᠪᠡᠷᠢᠪᠠᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠦᠭᠡᠷᠡᠴᠢᠯᠡᠨ ᠰᠢᠯᠢᠳᠡᠭᠵᠢᠭᠦᠯᠵᠦ᠂ ᠪᠠᠶᠠᠨ ᠬᠦᠴᠦᠷᠬᠡᠭ᠂ ᠡᠶᠡ ᠵᠣᠬᠢᠴᠠᠯᠲᠤ᠂ ᠠᠵᠠ ᠵᠢᠷᠭ᠋ᠠᠯᠲᠠᠢ ᠠᠢ᠌ᠯ ᠲᠤᠰᠬᠤᠨ ᠣᠢ᠌ᠷᠠ ᠵᠢᠨ ᠬᠦᠮᠦᠰᠲᠤ ᠱᠠᠭᠰᠢᠭᠳᠠᠵᠤ᠂ ᠬᠣᠯᠠ ᠵᠢᠨ ᠰᠣᠨᠣᠰᠬᠤᠯᠠᠩᠳᠤ ᠳᠠᠭᠤᠷᠢᠰᠴᠠᠢ᠃
ᠵᠤᠨᠤ ᠰᠠᠢ᠌ᠬᠠᠨ ᠤᠯᠠᠷᠢᠯᠳᠤ ᠵᠦᠢ᠍ᠯᠤᠨ ᠰᠢᠪᠠᠭᠤᠳ ᠰᠢᠭᠤᠢᠪᠠᠨ ᠪᠠᠶᠠᠰᠬᠠᠵᠤ ᠡᠭᠡᠰᠢᠭᠯᠡᠭᠡᠳ᠂ ᠵᠢᠷᠬᠢᠷᠡ ᠮᠡᠯᠡᠬᠡᠢ ᠬᠣᠭᠣᠯᠠᠢ ᠨᠡᠢ᠌ᠯᠡᠭᠦᠯᠦᠨ ᠬᠠᠩᠭᠢᠨᠠᠭᠤᠯᠤᠭᠰᠠᠨ ᠪᠠᠶᠠᠨᠲᠠᠯᠠ ᠨᠤᠲᠤᠭ ᠠᠷᠤᠳᠤ ᠬᠤᠴᠤᠷᠴᠤ ᠪᠢᠳᠡᠨᠤ ᠭᠠᠯ ᠠᠶᠠᠨ ᠪᠤᠴᠠᠬᠤ ᠵᠠᠮ ᠵᠶ᠋ᠡᠨ ᠡᠯᠭᠦᠪᠡ᠃ ᠵᠠᠮᠤᠨ ᠬᠠᠵᠠᠭᠤᠪᠠᠷ ᠡᠷᠳᠡᠨᠢ ᠰᠢᠰᠢ ᠵᠢᠨ ᠲᠠᠷᠢᠶᠠ ᠤᠷᠭᠤᠴᠠᠪᠠᠨ ᠭᠠᠢ᠌ᠬᠠᠭᠤᠯᠤᠨ ᠬᠦᠬᠡᠷᠡᠨ ᠨᠣᠭᠤᠭ᠋ᠠᠷᠠᠭ᠋ᠠᠳ᠂ ᠦᠩ ᠵᠢᠯᠤᠨ ᠪᠠᠢ᠌ᠳᠠᠯ ᠬᠠᠷᠠᠭᠳᠠᠨᠠ᠃ ᠲᠠᠷᠢᠮᠠᠯ ᠦᠭᠡᠢ ᠭᠠᠵᠠᠷ ᠵᠶ᠋ᠡᠷ ᠡᠯᠳᠡᠪ ᠵᠦᠢ᠍ᠯᠤᠨ ᠤᠷᠭᠤᠮᠠᠯ ᠦᠩᠭᠡ ᠢᠯᠭ᠋ᠠᠷᠠᠭᠤᠯᠤᠨ ᠪᠠᠭᠰᠢᠷᠠᠭ᠋ᠠᠳ ᠬᠠᠶᠠ ᠬᠡᠷᠡᠮᠦ ᠠᠯᠢᠶᠠᠷᠬᠠᠨ ᠰᠤᠮᠤᠳᠠᠵᠤ᠂ ᠬᠠᠶᠠ ᠭᠤᠷᠭᠤᠤᠯ ᠳᠡᠪᠳᠡᠷᠢᠨ ᠨᠢᠰᠦᠭᠡᠳ ᠪᠠᠶᠠᠨ ᠬᠦᠳᠡᠭᠡ ᠵᠢᠨ ᠭᠤᠸᠠ ᠰᠠᠢ᠌ᠬᠠᠨᠢ ᠳᠡᠯᠡᠬᠡᠢ ᠵᠢᠨ ᠬᠠᠷᠠᠭ᠋ᠠᠨᠳᠤ ᠳᠡᠯᠭᠡᠭᠳᠡᠨᠡ᠃
ᠴᠠᠳᠢᠭ ᠲᠡᠦᠬᠡ ᠵᠢᠨ ᠪᠠᠶᠠᠯᠢᠭ ᠬᠠᠳᠠᠭ᠋ᠠᠯᠠᠮᠵᠢᠲᠠᠢ᠂ ᠴᠠᠭᠤᠨ ᠦᠩᠭᠡ ᠵᠢᠨ ᠪᠠᠬᠠᠷᠤᠮᠠ ᠭᠢᠯᠪᠠᠭᠠᠲᠠᠢ ᠪᠠᠶᠠᠨᠲᠠᠯᠠ ᠨᠤᠲᠤᠭ ᠰᠠᠢ᠌ᠬᠠᠨ！
ᠵᠣᠬᠢᠶᠠᠭᠴᠢ ᠵᠢᠨ ᠬᠠᠶᠢᠭ᠄ ᠨᠠᠢ᠍ᠮᠠᠨ ᠬᠣᠰᠢᠭᠤᠨᠤ ᠮᠣᠩᠭᠤᠯ ᠳᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ