ᠢᠯᠡᠭᠦᠳ ᠡᠭᠡᠰᠢᠭ ᠵᠣᠭᠢᠶᠠᠪᠠ
ᠤᠷᠠᠯᠢᠭ ᠭᠡᠳᠡᠭ ᠶᠠᠭᠤᠮᠠ ᠡᠭᠦᠳᠡᠪᠠᠨ ᠲᠠᠷᠤᠴᠢᠬᠠᠭᠰᠠᠨ ᠪᠠᠢ᠌ᠳᠠᠯᠠ ᠴᠤᠩᠬᠤᠪᠠᠷ ᠤᠷᠤᠵᠤ ᠢᠷᠡᠳᠡᠭ ᠭᠡᠨᠡᠮ᠃ ᠯᠢ ᠰᠠᠨ ᠶᠠᠭ ᠡᠢ᠌ᠮᠦᠷᠬᠦᠦ ᠤᠷᠠᠯᠢᠭᠤᠨ ᠠᠮᠢᠨ ᠰᠦᠨᠡᠰᠦ ᠰᠢᠭ ᠡᠭᠦᠳᠡᠪᠠᠨ ᠲᠠᠷᠤᠴᠢᠬᠠᠭᠰᠠᠨ ᠪᠠᠢ᠌ᠳᠠᠯᠠ ᠴᠤᠩᠬᠤᠪᠠᠷ ᠤᠷᠤᠵᠤ ᠢᠷᠡᠭᠡᠳ ᠨᠠᠮᠠᠳᠤ ᠠᠪᠤ ᠰᠠᠭᠤᠵᠠᠢ᠃
ᠬᠤᠪᠢ ᠵᠠᠶᠠᠭ᠋ᠠᠨᠤ ᠨᠡᠭᠡᠭᠡᠯᠲᠠᠢ ᠴᠤᠩᠬᠤᠪᠠᠷ ᠤᠳᠠᠴᠢ ᠬᠤᠪᠢᠯᠤᠭ᠋ᠠᠳ ᠨᠢᠰᠦᠨ ᠢᠷᠡᠭᠰᠡᠨ ᠯᠢ ᠰᠠᠨᠤ ᠬᠤᠶᠠᠷ ᠭᠠᠷᠢ ᠠᠪᠤ ᠮᠢᠨᠢ ᠴᠢᠩᠭ᠋ᠠᠬᠠᠨ ᠠᠳᠬᠤᠵᠤ 《ᠦᠬᠢᠨᠢ ᠮᠢᠨᠢ ᠠᠪᠤᠷᠠᠭ᠋ᠠᠴᠢ 》 ᠭᠡᠮᠡᠨ ᠪᠠᠴᠢᠮᠳᠠᠨ ᠭᠤᠶᠤᠵᠠᠢ᠃ ᠲᠡᠷᠡ ᠦᠶᠡᠳᠤ ᠠᠮᠢ ᠨᠠᠰᠤ᠂ ᠠᠶᠤᠯ ᠲᠦᠭᠰᠢᠬᠦᠷᠢ ᠭᠡᠳᠡᠭ ᠶᠠᠭᠤᠮᠠ ᠠᠪᠤ ᠪᠤᠯᠤᠨ ᠯᠢ ᠰᠠᠨᠤ ᠡᠮᠦᠨᠡᠬᠦᠷ ᠬᠤᠢ᠌ᠭᠤᠷ ᠰᠦᠯᠵᠢᠯᠳᠦᠨ ᠬᠦᠶᠦᠵᠤ ᠪᠠᠢ᠌ᠭᠰᠠᠨ᠃ ᠰᠦᠯᠵᠢᠯᠳᠦᠨ ᠬᠦᠶᠦᠬᠦ ᠠᠶᠤᠯ ᠲᠦᠭᠰᠢᠬᠦᠷᠢ ᠵᠢᠨ ᠡᠮᠦᠨᠡ ᠠᠪᠤ ᠵᠢᠷᠦᠭᠡᠪᠠᠨ ᠭᠠᠷᠲᠤᠪᠠᠨ ᠪᠠᠷᠢᠵᠤ ᠠᠶᠤᠭᠰᠠᠨ ᠪᠤᠯ ᠯᠢ ᠰᠠᠨ ᠵᠢᠷᠦᠭᠡᠨ ᠲᠠᠮᠢᠷ ᠵᠶ᠋ᠡᠨ ᠰᠢᠪᠬᠠᠵᠠᠢ᠃ ᠯᠢ ᠰᠠᠨ ᠡᠴᠦᠰᠲᠤᠪᠠᠨ ᠨᠠᠮᠠ ᠵᠢ ᠡᠪᠡᠳᠴᠢᠨᠤ ᠠᠶᠤᠯᠠᠴᠠ ᠠᠪᠤᠷᠠᠨ ᠭᠡᠳᠦᠯᠭᠡᠵᠤ᠂ ᠡᠮᠴᠢ ᠬᠦᠮᠦᠨᠤ ᠵᠢᠷᠭ᠋ᠠᠯ ᠡᠳ᠋ᠯᠡᠪᠡ᠃
ᠠᠪᠤ ᠮᠢᠨᠢ ᠬᠦᠯᠨᠢ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠪᠠᠶᠠᠷᠯᠠᠵᠤ᠂ ᠲᠤᠭᠳᠤᠯᠤᠭᠰᠠᠨᠳᠤᠪᠠᠨ ᠶᠠᠭᠤ ᠪᠤᠳᠤᠭᠰᠠᠨᠢ ᠪᠤᠤ ᠮᠡᠳᠡ᠂ ᠯᠢ ᠰᠠᠨᠤ ᠬᠤᠶᠠᠷ ᠭᠠᠷᠢ ᠴᠢᠩᠭ᠋ᠠᠬᠠᠨ ᠠᠳᠬᠤᠭ᠋ᠠᠳ᠄ 《ᠦᠬᠢᠨ ᠵᠶ᠋ᠡᠨ ᠴᠢᠮᠠᠳᠤ ᠦᠭᠭᠦᠶᠡ᠂ ᠴᠢᠮᠠᠳᠤ ᠮᠦᠷᠭᠦᠭᠦᠯᠦᠶᠡ ᠁》 ᠭᠡᠭᠦᠨᠢ ᠲᠡᠷᠡ᠃ ᠠᠪᠤ ᠮᠢᠨᠢ ᠡᠵᠢ ᠵᠢᠨ ᠬᠠᠳᠬᠤᠮᠠᠯᠯᠠᠵᠤ ᠤᠶᠤᠭᠰᠠᠨ ᠬᠠᠷᠠ ᠲᠤᠷᠭ᠋ᠠᠨ ᠰᠢᠭᠤᠲᠠᠢ ᠵᠢ ᠯᠢ ᠰᠠᠨᠳᠤ ᠪᠡᠯᠡᠭ ᠪᠤᠯᠭ᠋ᠠᠨ ᠪᠠᠷᠢᠭ᠋ᠠᠳ ᠨᠠᠮᠠ ᠵᠢ ᠮᠦᠷᠭᠦᠭᠦᠯᠪᠡ᠃
ᠠᠪᠤ ᠡᠵᠢ ᠬᠤᠶᠠᠷ ᠨᠠᠮᠠ ᠵᠢ ᠯᠢ ᠰᠠᠨᠳᠤ ᠮᠦᠷᠭᠦᠭᠦᠯᠦᠭᠡᠳ ᠶᠠᠭ ᠬᠠᠷᠠᠩᠭᠤᠢ ᠵᠢᠨ ᠲᠤᠮᠳᠠᠠᠴᠠ ᠵᠤᠷᠪᠤᠰ ᠭᠡᠷᠡᠯ ᠬᠠᠷᠠᠭᠰᠠᠨ ᠰᠢᠭ᠋ ᠰᠡᠳᠭᠢᠯ ᠲᠦᠭᠦᠷᠡᠩ ᠪᠤᠯᠵᠠᠢ᠃ ᠯᠢ ᠰᠠᠨᠢ ᠠᠪᠤ ᠲᠠᠨᠢᠭᠰᠠᠨ ᠶᠤᠰᠤᠯᠠᠯ ᠮᠠᠰᠢ ᠲᠦᠬᠦᠮ ᠲᠦᠳᠡ᠃ ᠭᠡᠭᠦᠳᠤᠪᠠᠨ ᠤᠶᠠᠷᠠᠭᠤᠨ ᠵᠢᠪᠬᠤᠯᠠᠩᠳᠤ ᠠᠭᠤᠷ ᠠᠮᠢᠰᠬᠤᠯᠤᠨ ᠲᠤᠮᠳᠠ ᠶᠠᠪᠤᠭᠳᠠᠵᠠᠢ᠃ ᠪᠢ ᠠᠩᠬᠠ ᠤᠳᠠᠭᠠ ᠬᠢᠳᠡᠳ ᠵᠶ᠋ᠡᠷ ᠯᠢ ᠰᠠᠨᠢ 《ᠠᠪᠤ ᠡ》 ᠭᠡᠵᠦ ᠲᠠᠭᠤᠳᠠᠪᠠ᠃ ᠯᠢ ᠰᠠᠨ ᠦᠨᠡᠭᠡᠷ ᠬᠠᠪ ᠬᠠᠯᠠᠭᠤᠬᠠᠨ ᠰᠠᠨᠠᠭᠳᠠᠪᠠ᠃ 《ᠠᠪᠤ ᠡ 》 ᠭᠡᠰᠡᠨ ᠲᠠᠭᠤᠳᠠᠯᠭᠠᠳᠤ ᠯᠢ ᠰᠠᠨᠤ ᠡᠯᠢᠭᠡ ᠵᠢᠷᠦᠭᠡ ᠪᠦᠷ ᠬᠠᠢ᠌ᠯᠴᠢᠬᠠᠬᠤ ᠵᠢ ᠵᠠᠪᠳᠤᠭᠰᠠᠨ ᠪᠤᠯᠤᠯᠲᠠᠢ᠂ ᠲᠡᠷᠡ ᠨᠢᠳᠦᠨᠳᠤᠪᠠᠨ ᠨᠢᠯᠪᠤᠰᠤ ᠵᠠᠢ᠌ᠷᠯᠠᠭᠤᠯᠵᠤ᠂ ᠮᠠᠩᠨᠠᠢ ᠲᠡᠭᠡᠷᠡ ᠮᠢᠨᠢ ᠬᠦᠩᠭᠡᠭᠡᠨ ᠭᠡᠭᠴᠢ ᠦᠨᠦᠰᠪᠡ᠃ ᠲᠡᠷᠡ ᠵᠢᠯ ᠪᠢ ᠠᠷᠪᠠᠲᠠᠢ᠃ ᠯᠢ ᠰᠠᠨᠤ ᠲᠤᠬᠠᠢ ᠬᠠᠮᠤᠭᠤᠨ ᠠᠩᠬᠠᠨᠤ ᠤᠢ ᠰᠠᠨᠠᠮᠵᠢ ᠪᠤᠯ ᠨᠢᠯᠪᠤᠰᠤ ᠵᠠᠢ᠌ᠷᠯᠠᠭᠤᠯᠤᠭᠰᠠᠨ ᠲᠡᠷᠡ ᠨᠢᠳᠦ ᠪᠢᠯᠡ᠃
ᠯᠢ ᠰᠠᠨ ᠪᠤᠯ ᠰᠢᠨᠡ ᠬᠤᠷᠢᠶᠠ ᠠᠢ᠌ᠯᠤᠨ ᠬᠦᠯ ᠨᠢᠴᠦᠬᠦᠨ ᠡᠮᠴᠢ᠃ ᠰᠢᠨᠡ ᠬᠤᠷᠢᠶᠠ ᠭᠡᠵᠦ ᠮᠠᠨᠤ ᠠᠢ᠌ᠯᠠᠴᠠ ᠠᠷᠪᠠᠨ ᠭᠠᠵᠠᠷ ᠵᠠᠢ᠌ᠲᠠᠢ ᠬᠢᠳᠠᠳ ᠠᠢ᠌ᠯᠤᠳ ᠶᠤᠮ᠃ ᠠᠷᠪᠠᠨ ᠭᠠᠵᠠᠷᠤᠨ ᠬᠤᠯᠠ ᠵᠠᠢᠨᠢ ᠤᠢ ᠮᠤᠳᠤᠪᠠᠷ ᠠᠯᠤᠰᠯᠠᠭᠳᠠᠵᠤ᠂ ᠵᠤᠨ ᠴᠠᠭ ᠪᠤᠯᠪᠠᠯ ᠰᠢᠬᠦᠷ ᠪᠠᠷᠢᠭᠰᠠᠨ ᠰᠢᠭ᠋ ᠰᠡᠭᠦᠳᠡᠷ ᠭᠠᠵᠠᠷ ᠠᠯᠬᠠᠯᠠᠵᠤ ᠪᠠᠢ᠌ᠳᠠᠭ᠃ ᠯᠢ ᠰᠠᠨ ᠶᠠᠭ ᠡᠨᠡ ᠬᠦ᠌ ᠰᠢᠬᠦᠷ ᠪᠠᠷᠢᠭᠰᠠᠨ ᠰᠡᠭᠦᠳᠡᠷ ᠮᠤᠳᠤᠨᠤ ᠲᠤᠮᠳᠠᠭᠤᠷ ᠡᠮᠴᠢ ᠵᠢᠨ ᠪᠤᠭᠴᠦᠪᠠᠨ ᠡᠬᠦᠷᠦᠭᠡᠳ ᠦᠷᠯᠦᠭᠡ ᠦᠳᠡᠰᠢ ᠦᠭᠡᠢ ᠶᠠᠭ᠋ᠠᠷᠠᠵᠤ ᠬᠦᠶᠦᠳᠡᠭ᠃ ᠯᠢ ᠰᠠᠨ ᠬᠦᠭᠰᠢᠨ ᠲ᠋ᠠᠢᠪᠠᠨ ᠬᠣᠶᠠᠭᠤᠯᠠᠬᠠᠨ᠃ ᠲᠡᠳᠡ ᠬᠤᠶᠠᠷᠠᠴᠠ ᠲᠦᠷᠦᠭᠰᠡᠨ ᠬᠡᠥᠬᠡᠳ ᠠᠯᠠᠭᠠ᠃ ᠬᠠᠷᠢᠨ ᠭᠤᠵᠢᠩ ᠲᠦᠵᠢᠩ ᠨᠠᠮᠠ ᠵᠢ ᠪᠠᠭᠳᠠᠭ᠋ᠠᠭᠰᠡᠨ ᠠᠷᠪᠠᠨ ᠲᠤᠯᠤᠭ᠋ᠠᠨ ᠬᠠᠭᠤᠷᠠᠢ ᠬᠡᠥᠬᠡᠳᠲᠠᠢ᠃
ᠪᠢ ᠬᠤᠶᠠᠷ ᠠᠪᠤᠲᠠᠢ ᠪᠤᠯᠵᠠᠢ᠃ ᠨᠢᠭᠡᠨᠢ ᠠᠮᠢ ᠵᠢ ᠮᠢᠨᠢ ᠤᠯᠭᠤᠭᠴᠢ᠂ ᠨᠦᠬᠦᠭᠡᠨᠢ ᠠᠮᠢ ᠵᠢ ᠮᠢᠨᠢ ᠠᠪᠤᠷᠠᠭᠴᠢ᠃ ᠤᠳᠬᠠ ᠵᠢᠨ ᠬᠤᠪᠢᠳᠤ ᠠᠳᠠᠯᠢᠬᠠᠨ ᠬᠦᠨᠳᠦ ᠵᠢᠨ ᠵᠢᠩᠲᠠᠢ᠃ ᠬᠤᠶᠠᠷ ᠠᠪᠤ ᠮᠢᠨᠢ ᠨᠠᠳᠠᠳᠤ ᠦᠨᠢ ᠡᠭᠦᠷᠢᠳᠡ ᠵᠢᠨ ᠲᠦᠰᠢᠭ ᠲᠤᠯᠭ᠋ᠠᠭᠤᠷ ᠪᠤᠯᠤᠨᠠ ᠭᠡᠵᠦ ᠢᠳᠡᠭᠡᠪᠡ᠃ ᠲᠡᠭᠡᠭᠦᠳᠤ ᠦᠨᠢ ᠡᠭᠦᠷᠢᠳᠡ ᠭᠡᠰᠡᠨ ᠶᠠᠭᠤᠮᠠ ᠪᠠᠢ᠌ᠳᠠᠭ ᠦᠭᠡᠢᠨᠢ ᠡ ᠁
ᠲᠡᠷᠡ ᠵᠢᠯᠤᠨ ᠴᠠᠭ᠋ᠠᠨ ᠰᠠᠷᠠ ᠵᠢᠨ ᠰᠢᠨᠡᠳ ᠵᠶ᠋ᠠᠷ ᠯᠢ ᠰᠠᠨᠢ ᠠᠪᠤ ᠲᠠᠨᠢᠭᠰᠠᠨ ᠬᠡᠳᠦᠨ ᠡᠳᠦᠷᠤᠨ ᠬᠢᠨᠢ ᠲᠠᠷᠠᠭᠠ ᠲᠦᠷᠦᠭᠰᠡᠨ ᠠᠪᠤ ᠮᠢᠨᠢ ᠭᠡᠨᠡᠳᠳᠡ ᠡᠪᠡᠳᠴᠢᠯᠠᠵᠤ ᠡᠮᠨᠡᠯᠭᠡᠳᠤ ᠤᠷᠤᠪᠠ ᠁ ᠡᠮᠨᠡᠯᠭᠡᠳᠤ ᠤᠷᠤᠭᠰᠠᠨ ᠠᠪᠤ ᠵᠢᠪᠠᠨ ᠡᠷᠬᠢᠵᠤ ᠬᠡᠵᠢᠶᠡ ᠴᠦ᠍ ᠢᠷᠡᠵᠦ ᠲᠡᠢ᠌ᠯᠬᠦ ᠦᠭᠡᠢ ᠪᠤᠯᠤᠭᠰᠠᠨ ᠭᠡᠳᠡᠭᠢ ᠶᠠᠭ᠋ᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳ᠋ᠠ！ ᠪᠤᠷᠬᠠᠨ ᠮᠢᠨᠢ！
ᠠᠪᠤ ᠵᠢ ᠨᠤᠳᠤᠭᠲᠤᠨᠢ ᠬᠦᠷᠭᠡᠭᠦ ᠡᠳᠦᠷ ᠯᠢ ᠰᠠᠨ ᠪᠠᠰᠠ ᠬᠦᠷᠦᠭᠡᠳ ᠢᠷᠡᠵᠠᠢ᠃ ᠲᠡᠷᠡ ᠬᠤᠶᠠᠷ ᠭᠠᠷ ᠵᠶ᠋ᠡᠷ ᠵᠶ᠋ᠠᠨ ᠡᠭᠰᠢᠵᠤ ᠮᠡᠭᠰᠢᠭᠰᠡᠨ ᠭᠠᠰᠢᠭᠤᠨ ᠨᠢᠯᠪᠤᠰᠤ ᠵᠢ ᠮᠢᠨᠢ ᠲᠠᠰᠤᠷᠠᠯᠳᠠ ᠦᠭᠡᠢ ᠵᠦᠯᠬᠦᠨ ᠦᠭᠴᠦ᠂ ᠦᠪᠡᠷ ᠵᠶ᠋ᠠᠨ ᠪᠠᠰᠠ ᠨᠢᠯᠪᠤᠰᠤ ᠤᠷᠤᠰᠬᠠᠵᠤ ᠯᠠ ᠪᠠᠢ᠌ᠯᠠ᠃
ᠬᠡᠥᠬᠡᠳ ᠭᠡᠵᠦ ᠬᠦᠭᠡ ᠨᠤᠭᠤᠭᠠ ᠰᠢᠭ᠋ ᠬᠤᠷᠳᠤᠨ ᠦᠰᠳᠡᠭᠤᠨ ᠵᠢᠮᠡᠪᠠᠷ ᠨᠢᠯᠪᠤᠰᠤᠨ ᠲ᠋ᠤᠮᠳᠠ ᠦᠰᠦᠭᠰᠡᠨ ᠪᠢ ᠴᠦ᠍ ᠲᠤᠮᠤ ᠪᠤᠯᠵᠠᠢ᠃ ᠤᠨ ᠰᠠᠷᠠ ᠰᠠᠯᠬᠢᠨᠳᠤ ᠬᠦᠬᠡᠭᠡᠭᠳᠡᠭᠰᠡᠨ ᠲᠡᠭᠷᠢ ᠵᠢᠨ ᠡᠬᠦᠯᠡ ᠠᠳᠠᠯᠢ ᠬᠤᠷᠳᠤᠨ ᠦᠩᠭᠡᠷᠡᠵᠦ ᠪᠢ ᠯᠢ ᠰᠠᠨᠲᠠᠢ ᠠᠭᠤᠯᠵᠠᠭᠠ ᠦᠭᠡᠢ ᠬᠤᠷᠢ ᠭᠠᠷᠤᠢ ᠵᠢᠯ ᠪᠤᠯᠪᠠ᠃ ᠯᠢ ᠰᠠᠨᠢ ᠲᠠᠭ ᠮᠠᠷᠳᠠᠵᠦ ᠤᠷᠬᠢᠭᠰᠠᠨ ᠭᠡᠪᠡᠯ ᠱᠠᠯ ᠬᠤᠳᠠᠯ᠃ ᠠᠵᠢᠯ ᠰᠤᠷᠤᠯᠴᠠᠯᠭᠠ ᠭᠡᠳ ᠬᠡᠵᠢᠶᠡ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠴᠦ᠍ ᠰᠡᠳᠭᠢᠯᠠᠴᠠ ᠮᠢᠨᠢ ᠭᠠᠷᠳᠠᠭ ᠦᠭᠡᠢ᠃ ᠠᠳᠠᠯᠢᠬᠠᠨ ᠯᠢ ᠰᠠᠨ ᠴᠦ᠍ ᠨᠠᠮᠠ ᠵᠢ ᠮᠠᠷᠳᠠᠭᠰᠡᠨ ᠦᠭᠡᠢ᠃ ᠬᠡᠳᠦ ᠤᠳᠠᠭᠠ ᠬᠦᠳᠡᠭᠡ ᠭᠡᠷᠲᠤ ᠮᠢᠨᠢ ᠢᠷᠡᠵᠤ ᠨᠠᠮᠠ ᠵᠢ ᠠᠰᠠᠭᠤᠵᠤ ᠬᠠᠯᠠᠮᠵᠢᠯᠠᠭᠰᠠᠨ ᠭᠡᠵᠤ ᠡᠵᠢ ᠮᠢᠨᠢ ᠬᠡᠯᠡᠵᠤ ᠪᠠᠢ᠌ᠭᠰᠠᠨ ᠪᠦᠭᠡᠳ ᠬᠡᠳᠦᠨ ᠵᠢᠯᠤᠨ ᠡᠮᠦᠨᠡ ᠬᠤᠯᠠ ᠨᠡᠬᠦᠵᠤ ᠶᠠᠪᠤᠬᠤ ᠬᠠᠶᠢᠭ ᠪᠠ ᠤᠳᠠᠰᠤᠪᠠᠨ ᠦᠯᠡᠳᠡᠭᠡᠵᠠᠢ᠃ ᠪᠢ ᠯᠢ ᠰᠠᠨᠤ ᠬᠠᠶᠢᠭᠢ ᠬᠠᠶᠠ ᠭᠠᠷᠭ᠋ᠠᠵᠤ ᠠᠯᠠᠭ᠋ᠠᠨ ᠲᠡᠭᠡᠷᠡᠪᠠᠨ ᠲᠠᠯᠪᠢᠳᠠᠭ᠃ ᠶᠡᠷᠦᠨᠢ ᠲᠡᠭᠦᠨᠤ ᠬᠠᠶᠢᠭ ᠬᠠᠷᠠᠬᠠᠨ ᠪᠠᠭᠠ ᠵᠢᠨ ᠠᠷᠪᠠᠨ ᠨᠠᠰᠤᠨᠤ ᠲᠤᠷᠠᠰᠤᠯᠢ ᠲᠡᠷᠪᠡᠭᠦᠯᠬᠦᠳᠤ ᠵᠢᠷᠦᠭᠡ ᠮᠢᠨᠢ ᠵᠢᠮᠵᠢᠬᠢᠨᠡᠳᠡᠯᠡ ᠬᠠᠳᠬᠤᠯᠠᠳᠠᠭ ᠁ ᠯᠢ ᠰᠠᠨᠤ ᠤᠳᠠᠰᠤᠨ ᠨᠤᠮᠸᠷ ᠰᠡᠳᠭᠢᠯᠤᠨ ᠮᠢᠨᠢ ᠡᠴᠢᠨᠡ ᠲᠠᠯᠳᠠ ᠨᠢᠭᠤᠭᠳᠠᠭᠰᠠᠨ ᠬᠦᠨᠳᠡᠵᠦ ᠪᠤᠯᠤᠮᠠ ᠦᠭᠡᠢ ᠰᠡᠳᠭᠢᠯᠤᠨ ᠮᠢᠨᠢ ᠰᠢᠷᠬᠠᠯᠠᠯᠢ ᠡᠮᠵᠡᠭᠯᠡᠭᠦᠯᠦᠨ ᠰᠡᠷᠡᠭᠡᠵᠤ ᠪᠠᠢ᠌ᠮᠠᠷ᠃ ᠡᠴᠢᠨᠡᠬᠡᠨ ᠵᠢᠯᠤᠨ ᠠᠪᠤᠪᠠᠨ ᠰᠠᠨᠠᠭᠰᠠᠨ ᠮᠦᠷᠦᠭᠡᠳᠦᠯ ᠬᠢᠭᠡᠳ ᠬᠡᠴᠢᠨᠡᠬᠡᠨ ᠵᠢᠯᠤᠨ ᠬᠡᠯᠡᠬᠦᠶᠡ ᠪᠡᠷᠭᠡ ᠰᠡᠳᠭᠢᠯᠤᠨ ᠵᠤᠪᠠᠨᠢᠯ ᠯᠢ ᠰᠠᠨᠲᠠᠢ ᠶᠠᠮᠠᠷ ᠴᠦ᠍ ᠬᠤᠯᠪᠤᠭᠠ ᠦᠭᠡᠢ᠃ ᠬᠡᠭᠦᠳᠤᠪᠠᠨ ᠬᠡᠨ ᠴᠦ᠍ ᠲᠠᠢ᠌ᠯᠪᠤᠷᠢᠯᠠᠵᠤ ᠦᠯᠦ ᠲᠡᠢ᠌ᠯᠬᠦ ᠲᠡᠢ᠌ᠮᠦ ᠨᠢᠭᠡᠨ ᠤᠴᠢᠭᠨᠢ ᠤᠯᠳᠠᠭᠳᠠᠬᠤ ᠦᠭᠡᠢ ᠰᠡᠳᠭᠢᠯᠤᠨ ᠰᠦᠪᠡᠭᠴᠢᠨᠳᠤ ᠡᠯᠢᠭᠡ ᠵᠢᠷᠦᠭᠡ ᠮᠢᠨᠢ ᠰᠢᠵᠢᠮᠯᠡᠭᠳᠡᠵᠦ᠂ ᠤᠳᠠᠰᠤᠨ ᠰᠢᠷᠭᠡᠭ ᠰᠢᠭ ᠤᠷᠳᠤᠠᠴᠠ ᠤᠷᠳᠤ ᠰᠤᠪᠤᠷᠠᠵᠦ ᠪᠠᠢ᠌ᠬᠤ ᠵᠢ ᠦᠭᠡᠪᠠᠷ ᠢᠯᠡᠳᠭᠡᠭᠦ ᠵᠢᠨ ᠠᠷᠭᠠ ᠦᠭᠡᠢ᠃
ᠥᠨᠥ ᠵᠢᠯᠤᠨ ᠲᠠᠪᠤᠨ ᠰᠠᠷᠠ ᠵᠢᠨ ᠠᠮᠠᠷᠠᠯᠳᠠᠳᠤ ᠪᠢ ᠯᠢ ᠰᠠᠨᠤ ᠬᠠᠶᠢᠭ ᠵᠶ᠋ᠠᠷ ᠫᠢᠩᠵᠤᠸᠠᠩ ᠤᠷᠤᠭᠤ ᠮᠤᠷᠳᠠᠪᠠ᠃ ᠠᠪᠤ ᠭᠡᠳᠡᠭ ᠦᠭᠡᠨᠤ ᠬᠠᠯᠠᠭᠤᠨ ᠠᠮᠢᠰᠬᠤᠭᠠᠲᠠᠢ ᠠᠶᠠᠨ ᠵᠠᠮ ᠨᠡᠢ᠌ᠯᠡᠵᠤ ᠶᠠᠪᠤᠬᠤᠳᠤᠪᠠᠨ ᠪᠢ ᠶᠠᠭ ᠯᠡ ᠠᠷᠪᠠᠨ ᠨᠠᠰᠤ ᠤᠷᠤᠭᠤᠪᠠᠨ ᠪᠤᠴᠠᠴᠢᠬᠠᠭᠰᠠᠨ ᠰᠢᠭ᠋ ᠰᠡᠳᠭᠢᠯ ᠲᠡᠪᠬᠡᠷᠡᠭᠦᠨ᠃ ᠯᠢ ᠰᠠᠨᠤ ᠬᠦᠭᠰᠢᠨᠨᠢ ᠨᠠᠰᠤ ᠪᠠᠷᠠᠵᠤ᠂ ᠲᠡᠷᠡ ᠫᠢᠩ ᠵᠤᠸᠠᠩᠤᠨ ᠨᠠᠰᠤᠳᠠᠨᠢ ᠠᠰᠠᠷᠠᠬᠤ ᠬᠦᠷᠢᠶᠡᠯᠡᠩᠳᠤ ᠰᠠᠭᠤᠳᠠᠭ᠃ ᠪᠢ ᠯᠢ ᠰᠠᠨᠳᠤ ᠠᠪᠤᠭᠰᠠᠨ ᠪᠡᠯᠡᠭ ᠰᠠᠯᠳᠡᠲᠠᠢ ᠲᠤᠮᠤ ᠪᠤᠭᠴᠦᠪᠠᠨ ᠡᠭᠦᠷᠦᠭᠡᠳ ᠨᠠᠷᠠᠪᠴᠢᠨᠳᠤ ᠵᠤᠭᠤᠭᠳᠠᠵᠤ ᠪᠠᠢ᠌ᠭᠰᠠᠨ ᠨᠠᠰᠤᠳᠠᠳᠤᠨ ᠲᠡᠷᠭᠡᠳᠡ ᠬᠦᠷᠦᠭᠡᠳ 《ᠮᠢᠨᠦ ᠠᠪᠤ ᠵᠢ ᠯᠢ ᠰᠠᠨ ᠭᠡᠳᠡᠭ ᠁》 ᠭᠡᠵᠤ ᠬᠡᠯᠡᠭᠡᠳ ᠲᠡᠳᠡ ᠨᠠᠷᠤᠨ ᠡᠮᠦᠨᠡ ᠮᠡᠭᠦᠢ᠌ᠨ ᠶᠤᠰᠤᠯᠠᠪᠠ᠃ ᠡᠮᠰᠢᠭᠡᠷ ᠬᠠᠮᠰᠢᠭ᠋ᠠᠷ ᠨᠠᠰᠤᠳᠠᠳᠤᠨ ᠭᠠᠢ᠌ᠬᠠᠭᠰᠠᠨ ᠬᠠᠷᠠᠴᠠ ᠨᠢᠷᠤᠭᠤᠪᠠᠷ ᠵᠶ᠋ᠠᠨ ᠶᠠᠯᠢᠮ ᠦᠭᠡᠢ ᠪᠦᠭᠳᠦᠢ᠌ᠭᠰᠡᠨ ᠬᠠᠷᠠ ᠡᠪᠦᠭᠡᠨ ᠤᠷᠤᠭᠤ ᠭᠡᠨᠡᠳᠳᠡ ᠰᠢᠯᠵᠢᠭᠡᠳ 《ᠯᠢ ᠰᠠᠨᠤ ᠦᠬᠢᠨ ᠢᠷᠡᠭᠰᠡᠨ ᠡ ᠁ 》 ᠭᠡᠳ ᠪᠦᠭᠦᠳᠡᠭᠡᠷ ᠱᠤᠤᠬᠢᠯᠳᠤᠪᠠ᠃ ᠨᠠᠰᠤᠳᠠᠳ ᠨᠠᠮᠠ ᠵᠢ ᠲᠠᠨᠢᠳᠠᠭ ᠭᠡᠰᠡᠨᠢ ᠰᠤᠨᠤᠰᠤᠭ᠋ᠠᠳ ᠪᠢ ᠮᠡᠯ ᠭᠠᠢ᠌ᠬᠠᠯᠠ᠃ ᠯᠢ ᠰᠠᠨ ᠤᠤᠯᠨᠢ ᠦᠳᠡᠰᠢ ᠪᠦᠷᠢ ᠮᠢᠨᠦ ᠨᠡᠪᠳᠡᠷᠡᠭᠦᠯᠳᠡᠭ ᠤᠩᠨᠢᠭᠤᠳᠤᠨ ᠰᠤᠨᠢᠨ ᠮᠡᠳᠡᠭᠡ ᠵᠢ ᠪᠠᠢ᠌ᠩᠭᠤ ᠯᠡ ᠦᠵᠡᠳᠡᠭ ᠠᠵᠢ᠃
ᠲᠡᠷᠡ ᠮᠤᠩᠭᠤᠯ ᠦᠭᠡ ᠵᠢ ᠤᠢ᠌ᠯᠭ᠋ᠠᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠨᠠᠮᠠ ᠵᠢ ᠲᠸᠯᠸᠢᠰᠠᠴᠠ ᠬᠠᠷᠠᠵᠤ ᠰᠠᠭᠤᠬᠤ ᠵᠢᠨ ᠬ᠋ᠦᠰᠡᠯ ᠮᠦᠷᠦᠭᠡᠳᠦᠯᠳᠤ ᠠᠪᠳᠠᠳᠠᠭ ᠰᠠᠨᠵᠠᠢ᠃ ᠠᠪᠤᠲᠠᠢ ᠮᠢᠨᠢ ᠨᠠᠰᠤ ᠬᠤᠷᠠᠭ ᠯᠢ ᠰᠠᠨ ᠲᠠᠨᠢᠭᠳᠠᠰᠢ ᠦᠭᠡᠢ ᠦᠳᠡᠯᠵᠠᠢ᠃ ᠪᠢ ᠯᠢ ᠰᠠᠨᠤ ᠬᠤᠶᠠᠷ ᠭᠠᠷᠢ ᠴᠢᠩᠭ᠋ᠠᠬᠠᠨ ᠠᠳᠬᠤᠵᠤ 《ᠠᠪᠤ ᠡ》 ᠭᠡᠵᠤ ᠨᠠᠮ ᠲᠠᠭᠤᠳᠠᠭ᠋ᠠᠳ ᠠᠪᠴᠢᠷᠠᠭᠰᠠᠨ ᠪᠡᠯᠡᠭ ᠵᠶ᠋ᠠᠨ ᠭᠠᠷᠳᠠᠭᠤᠯᠪᠠ᠃ ᠲᠡᠭᠦᠨᠤ ᠨᠢᠯᠪᠤᠰᠤᠨᠤ ᠠᠭᠤᠷᠬᠠᠢ ᠦᠨᠡᠭᠡᠷ ᠪᠠᠶᠠᠯᠢᠭ ᠪᠠᠢ᠌ᠭᠰᠠᠨ ᠠᠵᠢ᠃ ᠲᠡᠷᠡ ᠬᠤᠷᠤᠳ ᠦᠷᠦᠮᠡ ᠵᠢᠨ ᠲᠤᠮᠳᠠᠠᠴᠠ ᠬᠤᠶᠠᠷ ᠨᠤᠮᠢ ᠮᠢᠨᠢ ᠬᠢᠴᠢᠶᠡᠩᠭᠦᠢ᠌ᠯᠡᠨ ᠲᠤᠰᠤᠭᠰᠠᠨ ᠵᠶ᠋ᠡᠨ ᠤᠳᠠᠭ᠋ᠠᠨ ᠬᠤᠭᠤᠴᠠᠭᠠᠪᠠᠷ ᠬᠡᠥᠬᠡᠳᠲᠠᠢᠪᠠᠨ ᠠᠭᠤᠯᠵᠠᠭᠠ ᠦᠭᠡᠢ ᠡᠵᠢ ᠬᠦᠮᠦᠨ ᠰᠢᠭ ᠨᠢᠯᠪᠤᠰᠤ ᠬᠦᠶᠦᠯᠬᠡᠨᠡᠭᠦᠯᠪᠡ᠃ ᠪᠢ ᠴᠦ᠍ ᠯᠢ ᠰᠠᠨᠤ ᠤᠶᠠᠷᠠᠬᠤ ᠵᠢ ᠬᠠᠷᠠᠭ᠋ᠠᠳ ᠦᠪᠡᠷᠤᠨ ᠡᠷᠭᠡ ᠦᠭᠡᠢ ᠮᠡᠯᠮᠡᠷᠡᠭᠦᠯᠬᠦ ᠭᠡᠳ ᠪᠠᠢ᠌ᠯᠠ᠃ 《ᠠᠪᠤ ᠡ》 ᠭᠡᠰᠡᠨ ᠵᠢᠷᠦᠭᠡᠨ ᠲᠠᠭᠤᠳᠠᠯᠭᠠᠳᠤ ᠬᠠᠢ᠌ᠷᠠᠳᠤ ᠠᠪᠤ ᠮᠢᠨᠢ ᠬᠠᠵᠠᠭᠤᠳᠤ ᠢᠷᠡᠴᠢᠬᠡᠭᠰᠡᠨ ᠰᠢᠭ ᠯᠡ ᠰᠠᠨᠠᠭᠳᠠᠬᠤ ᠵᠢ ᠶᠠᠭ᠋ᠠᠬᠢᠨᠠ！
《ᠦᠷᠡ ᠵᠢᠨ ᠰᠡᠳᠭᠢᠯᠳᠤ ᠠᠪᠤ ᠪᠤᠯᠭ᠋ᠠᠨ ᠮᠦᠩᠭᠡᠷᠡᠨᠡ᠂ ᠭᠡᠪᠡᠴᠦ ᠤᠩᠰᠢᠭᠴᠢ ᠵᠢᠨ ᠰᠡᠳᠭᠢᠯᠳᠤ ᠵᠤᠬᠢᠶᠠᠯᠴᠢ ᠪᠤᠯᠭ᠋ᠠᠨ ᠮᠦᠩᠭᠡᠷᠡᠭᠦ ᠦᠭᠡᠢ〉〉 ᠭᠡᠵᠤ ᠠᠪᠤ ᠵᠢᠨ ᠵᠶ᠋ᠡᠨ ᠡᠷᠳᠡ ᠶᠠᠪᠤᠭᠰᠠᠨ ᠬᠠᠷᠠᠮᠰᠠᠯ ᠬᠠᠷᠠᠭᠤᠰᠠᠯᠢ ᠨᠦᠬᠦᠵᠤ᠂ ᠵᠤᠬᠢᠶᠠᠯ ᠪᠦᠳᠦᠭᠡᠯᠢᠨᠢ ᠨᠤᠮ ᠪᠤᠯᠭ᠋ᠠᠨ ᠡᠮᠬᠢᠳᠭᠡᠭᠰᠡᠨ ᠰᠡᠳᠭᠢᠯᠢ ᠮᠢᠨᠢ ᠯᠢ ᠰᠠᠨ ᠣᠢ᠌ᠯᠠᠭ᠋ᠠᠵᠤ ᠪᠠᠢ᠌ᠭᠰᠠᠨ ᠡᠰᠡᠭᠦ ᠵᠢ ᠪᠢ ᠮᠡᠳᠡᠭᠦ ᠦᠭᠡᠢ ᠁ ᠯᠢ ᠰᠠᠨᠤ ᠨᠤᠮ ᠪᠠᠷᠢᠭᠰᠠᠨ ᠬᠤᠶᠠᠷ ᠭᠠᠷᠢ ᠠᠪᠤ ᠮᠢᠨᠢ ᠴᠢᠩᠭ᠋ᠠᠬᠠᠨ ᠠᠳᠬᠤᠵᠤ ᠦᠩᠭᠡᠷᠡᠭᠰᠡᠨ ᠰᠠᠨ᠃ ᠯᠢ ᠰᠠᠨ ᠨᠢᠯᠪᠤᠰᠤᠪᠠᠨ ᠵᠦᠯᠬᠦᠭᠡᠳ ᠠᠮᠠᠨᠳᠤᠪᠠᠨ ᠶᠠᠭᠤ ᠨᠢᠭᠡ ᠵᠢ ᠲᠦᠳᠦᠨᠡᠪᠡ᠃ ᠶᠠᠭᠤ ᠶᠠᠷᠢᠭᠰᠠᠨᠨᠢ ᠲᠤᠳᠤ ᠰᠤᠨᠤᠰᠳᠠᠭᠰᠠᠨ ᠦᠭᠡᠢ ᠴᠦ᠍ ᠠᠪᠤ ᠮᠢᠨᠢ ᠨᠠᠳᠠᠲᠠᠢ ᠵᠤᠭᠤᠭᠳᠠᠵᠤ ᠪᠠᠢ᠌ᠭᠠᠨᠢ ᠨᠡᠨ ᠳ᠋ᠠ ᠭᠡᠵᠤ ᠪᠢ ᠪᠤᠳᠤᠪᠠ᠃
ᠬᠡᠯᠡᠬᠦᠶᠡ ᠪᠡᠷᠭᠡ ᠨᠢᠭᠡ ᠵᠦᠢ᠍ᠯᠤᠨ ᠬᠦᠴᠦᠨᠳᠤ ᠰᠡᠳᠭᠢᠯ ᠮᠢᠨᠢ ᠨᠤᠷᠠᠵᠤ ᠪᠠᠢ᠌ᠬᠤᠪᠠᠨ ᠪᠢ ᠤᠯᠵᠤ ᠬᠠᠷᠠᠯᠠ ᠁ ᠲᠠ ᠨᠠᠷ ᠠᠪᠤᠲᠠᠢ ᠮᠢᠨᠢ ᠠᠭᠤᠯᠵᠬᠤ ᠭᠡᠪᠡᠯ ᠫᠢᠩᠵᠤᠸᠠᠩᠤᠨ ᠨᠠᠰᠤᠳᠠᠨᠢ ᠠᠰᠠᠷᠠᠬᠤ ᠬᠦᠷᠢᠶᠡᠯᠡᠩᠳᠤ ᠤᠴᠢᠭ᠋ᠠᠷᠠᠢ᠃ ᠮᠢᠨᠦ ᠠᠪᠤ ᠵᠢ ᠯᠢ ᠰᠠᠨ ᠭᠡᠳᠡᠭ᠃
ᠵᠣᠬᠢᠶᠠᠭᠴᠢ ᠵᠢᠨ ᠬᠠᠶᠢᠭ᠄ ᠤᠩᠨᠢᠭᠤᠳ ᠬᠤᠰᠢᠭᠤᠨᠤ ᠬᠠᠮ ᠵᠠᠭᠤᠴᠢᠯᠠᠭᠤᠷᠤᠨ ᠲᠦᠪ