ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠨᠡᠶᠢᠭᠡᠮ ᠰᠡᠳᠬᠦᠯ
ᠣᠬᠠᠭᠠᠨ ᠴᠤᠭᠤᠷᠠᠭᠤᠯᠤᠭᠰᠠᠨ  ᠬᠠᠶᠢᠷ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/11/27
   ᠨᠢᠭᠡ   ᠡᠵᠢ ᠮᠢᠨᠢ  ᠨᠠᠷᠠᠨ ᠳᠤ ᠪᠠᠨ‌ᠮᠠᠨᠤᠰ ᠢᠶᠠᠨ ᠤᠷᠬᠢᠵᠤ  ᠣᠳᠬᠤ  ᠴᠠᠭ ᠨᠢ  ᠪᠤᠯᠣᠭᠰᠠᠨ ᠶᠤᠮ ᠪᠠᠶᠢᠨ᠎ᠠ ᠃     ᠨᠠᠮᠤᠷ ᠤᠨ ᠬᠢᠷᠠᠭᠤ ᠰᠠᠮᠨᠠᠭᠰᠠᠨ ᠪᠤᠭᠤᠷᠣᠯ ᠲᠡᠷᠢᠭᠦᠨ ᠢᠶᠠᠨ ᠡᠷᠭᠦᠯ ᠦᠭᠡᠢ ᠨᠠᠰᠣᠨ ᠤ ᠲᠤᠭ᠎ᠠ ᠪᠠᠨ ᠵᠢᠷᠭᠠᠭᠠᠵᠤ  ᠪᠠᠶᠢᠬᠤ ᠨᠢ ᠡᠨᠡ ᠪᠢᠯᠡ᠃ ᠦᠷ᠎ᠡ ᠲᠠᠢ ᠬᠦᠮᠦᠨ ᠢᠩᠬᠢᠵᠤ ᠶᠠᠪᠤᠭᠠᠳ ᠥᠭᠳᠡᠭ ᠭᠡᠵᠤ ᠬᠡᠯᠡᠵᠦ ᠪᠠᠶᠢᠮᠠᠷ ᠴᠠᠢ ᠪᠠᠨ ᠣᠣᠭᠤᠭᠠᠳ ᠴᠢᠮᠡᠭᠡ ᠠᠯᠳᠠᠷᠠᠭᠰᠠᠨ ᠶᠤᠮ᠃ ᠬᠤᠷᠤᠭᠤᠳᠠᠵᠤ ᠬᠤᠴᠤᠷᠤᠭᠰᠠᠨ ᠬᠡᠥᠬᠡᠳ ᠨᠢ ᠴᠢᠩᠭᠠᠭᠠᠵᠤ ᠲᠠᠳᠠᠵᠤ ᠪᠠᠶᠢᠳᠠᠯ᠎ᠠ ᠠᠯᠳᠠᠭᠤᠯᠬᠤ ᠳᠤ ᠠᠶᠠᠲᠠᠢ ᠳᠤᠯᠠᠭᠠᠨ ᠦᠷᠦᠭᠡ ᠬᠦᠢᠲᠡᠷᠡᠭᠡᠳ ᠶᠠᠪᠤᠬᠤ ᠨᠢ ᠲᠡᠷᠡ ᠡ︕    ᠠᠢ ᠳ᠋ᠠ ᠁ ᠴᠠᠰᠤ ᠲᠠᠢ ᠡᠩᠭᠡᠷ ᠲᠤ ᠪᠠᠶᠢᠭ᠎ᠠ ᠮᠢᠨᠦ ᠨᠤᠲᠤᠭ ᠤᠨ ᠪᠠᠭᠤᠴᠠ ᠡᠵᠡᠭᠦᠶᠢᠷᠡᠭᠡᠳ ᠨᠠᠳᠠ ᠲᠠᠢ ᠦᠯᠡᠳᠡᠵᠡᠢ︕ ᠲᠠᠰᠣᠷᠠᠵᠤ ᠵᠤᠭᠰᠣᠭᠰᠠᠨ ᠨᠠᠷᠠ ᠲᠡᠨᠳᠡ ᠪᠠᠨ ᠪᠠᠶᠢᠭᠠᠳ ᠪᠠᠶᠢᠯ᠎ᠠ᠃ ᠤᠷᠤᠶᠢᠲᠠᠭᠰᠠᠨ ᠤᠳᠣᠳ ᠰᠠᠷᠠ ᠰᠢᠩᠭᠡᠲᠡᠯ᠎ᠡ ᠡᠷᠢᠯ ᠳᠤ ᠶᠠᠪᠤᠭᠠᠳ ᠲᠠᠨ ᠳᠤ ᠪᠠᠨ ᠪᠤᠴᠠᠵᠣ ᠢᠷᠡᠭᠡ ᠦᠭᠡᠢ᠃ ᠡᠵᠢ ᠶᠢᠨ ᠪᠠᠷ᠎ᠠ ᠲᠠᠰᠣᠷᠠᠬᠤ ᠳᠤ ᠦᠷ᠎ᠡ ᠶᠢᠨ ᠡᠯᠢᠬᠡ ᠦᠨᠦᠴᠢᠷᠠᠵᠤ ᠨᠢᠯᠪᠤᠰᠤ ᠴᠣᠭᠤᠷᠠᠳᠠᠭ ᠶᠤᠮ ᠪᠠᠶᠢᠨ᠎ᠠ᠃ ᠡᠵᠢ  ᠨᠠᠮ᠎ᠠ  ᠶᠢ ᠬᠠᠷᠢᠵᠣ ᠢᠷᠡᠬᠦ ᠶᠢ ᠬᠦᠯᠢᠶᠡᠵᠦ ᠪᠠᠶᠢᠭᠰᠠᠨ ᠰᠢᠭ᠋ ᠪᠠᠭᠤᠴᠠᠨ ᠳᠤ ᠪᠠᠨ  ᠁ ᠪᠢ ᠡᠵᠢ ᠲᠠᠢ ᠪᠠᠶᠢᠭᠰᠠᠨ ᠰᠢᠦ ︕       ᠡᠵᠢ  ᠭᠡᠳ ᠳᠠᠪᠬᠢᠭᠠᠳ ᠤᠴᠢᠳᠠᠭ ᠪᠠᠶᠢᠯ᠎ᠠ᠂ ᠶᠠᠪᠠᠭᠠᠨ ᠬᠦᠷᠦᠭᠡᠳ ᠤᠴᠢᠬᠤ  ᠳᠤ ᠭᠠᠳᠠᠨ᠎ᠠ  ᠪᠠᠨ ᠪᠠᠷ᠎ᠠ ᠲᠠᠢ ᠪᠠᠶᠢᠯ᠎ᠠ ᠃ ᠡᠵᠢ ᠭᠡᠳ    ᠭᠠᠯᠲᠦ ᠪᠠᠷ ᠤᠴᠢᠳᠠᠭ ᠪᠠᠶᠢᠯ᠎ᠠ᠂ ᠭᠡᠷ ᠤᠨ ᠡᠭᠦᠳᠡᠨ ᠲᠡᠭᠡᠷ᠎ᠡ  ᠰᠠᠷᠠᠪᠴᠢᠯᠠᠵᠤ ᠵᠤᠭᠰᠣᠭᠠᠳ ᠬᠦᠯᠢᠶᠡᠳᠡᠭ ᠪᠠᠶᠢᠯ᠎ᠠ᠃ ᠡᠵᠢ ᠭᠡᠳ ᠬᠦᠦ ᠲᠠᠢ ᠪᠠᠨ ᠤᠴᠢᠳᠠᠭ ᠪᠠᠶᠢᠯ᠎ᠠ᠂ ︽ᠮᠢᠨᠦ ᠬᠦᠦ ᠡ︾ ᠭᠡᠳ ᠠᠪᠤ ᠶᠢᠨ ᠠᠶᠠᠭᠠᠨ ᠳᠤ ᠰᠥᠡᠭ ᠠᠮᠰᠠᠭᠤᠯᠳᠠᠭ ᠪᠠᠶᠢᠯ᠎ᠠ᠃ ᠡᠵᠢ ᠭᠡᠳ ᠲᠠᠶᠠᠭ ᠲᠠᠢ ᠤᠴᠢᠳᠠᠭ ᠪᠠᠶᠢᠯ᠎ᠠ᠂ ︽ᠮᠢᠨᠦ ᠬᠦᠦ ᠶᠢᠨ ᠰᠢᠳᠦ ᠣᠩᠭᠤᠷᠬᠠᠢ ᠭᠠᠷᠴᠢᠬᠠᠯ᠎ᠠ︾ ᠭᠡᠳ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠶᠢᠯ᠎ᠠ᠃ ︽ᠡᠵᠢ ᠡ᠂ ᠪᠢ ᠪᠠᠶᠢᠨ᠎ᠠ︾ ᠭᠡᠳ ᠳᠠᠭᠤᠳᠠᠭᠠᠳ ᠤᠴᠢᠳᠠᠭ ᠪᠠᠶᠢᠯ᠎ᠠ᠃ ︽ᠮᠢᠨᠦ ᠬᠦᠦ ᠢᠷᠡᠭᠰᠡᠨ ᠶᠤᠮ ᠦᠦ︾ ᠭᠡᠳ ᠰᠡᠳᠭᠢᠯ  ᠬᠠᠨᠳᠠᠭ ᠪᠠᠶᠢᠯ᠎ᠠ ᠃ ︽ᠡᠵᠢ ᠡ᠂ ᠲᠠ ᠰᠠᠶᠢᠨ ᠪᠠᠶᠢᠨ᠎ᠠ ᠤᠤ︾ ᠭᠡᠬᠦᠯᠡᠷ  ᠳ᠋ᠠᠷ᠎ᠠ ᠡᠬᠡ ᠰᠢᠭ ᠮᠦᠰᠢᠶᠡᠩᠭᠦᠶᠢᠯᠡᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠭᠠᠷᠭᠠᠳᠠᠭ  ᠪᠠᠶᠢᠯ᠎ᠠ᠃ ︽ᠡᠵᠢ ᠡ᠂ ᠪᠢᠳᠠ ᠳᠡᠷᠭᠡᠳᠡ ᠴᠢᠨᠢ ᠪᠠᠶᠢᠨ᠎ᠠ︾ ᠭᠡᠬᠦᠯᠡᠷ ᠬᠤᠷᠸ᠎ᠠ ᠶᠢ  ᠵᠢᠷᠭᠠᠭᠠᠵᠤ  ᠠᠮᠤᠭᠤᠯᠠᠩ  ᠳᠦᠷᠢ ᠦᠵᠡᠭᠦᠯᠵᠡᠢ᠃ ᠨᠠᠷᠠ ᠰᠠᠯᠬᠢᠨ ᠳᠤ ᠪᠠᠨ  ᠶᠠᠪᠤᠵᠣ ᠢᠷᠡᠭᠰᠡᠨ ᠬᠠᠯᠠᠭᠤᠨ ᠬᠦᠢᠲᠡᠨ ᠢ ᠪᠢᠴᠢᠵᠦ ᠲᠠᠯᠪᠢᠭᠰᠠᠨ ᠬᠠᠲᠠᠭᠤ ᠬᠠᠪᠢᠰᠦ ᠲᠠᠢ  ᠨᠠᠮᠳᠠᠷ ᠢ ᠮᠦᠩᠬᠡ ᠦᠯᠡᠳᠡᠭᠡᠪᠡ᠃ ᠡᠵᠢ ᠲᠠᠨ ᠳᠤ ᠪᠠᠨ ᠵᠤᠯᠠ ᠡᠷᠭᠦᠯ᠎ᠡ︕    ᠬᠤᠶᠠᠷ     ᠪᠢ ᠪᠠᠯᠠᠷ ᠤᠨ ᠬᠡᠥᠬᠡᠳ᠃ ᠲᠠᠨ ᠤ ᠪᠠᠨ ᠶᠠᠪᠤᠭᠰᠠᠨ ᠮᠦᠷ ᠢ ᠬᠢᠰᠬᠢᠵᠦ ᠡᠯᠡᠰᠣᠨ ᠠᠴᠠ ᠭᠠᠷᠣᠭᠰᠠᠨ ᠶᠤᠮ᠃ ᠮᠠᠨ ᠤ ᠬᠢᠨ ᠨᠣᠭᠳᠠᠭᠰᠠᠨ ᠨᠤᠳᠤᠭ ᠪᠡᠯᠴᠢᠭᠡᠷ ᠲᠣᠮᠣ ᠭᠡᠭᠴᠢ ᠶᠠᠭᠠᠬᠢᠬᠤ ᠠᠷᠭ᠎ᠠ ᠦᠭᠡᠢ᠃ ᠣᠬᠠᠭ᠎ᠠ ᠤᠷᠣᠭᠰᠠᠨ ᠠᠴᠠ ᠮᠢᠨᠢ ᠬᠤᠶᠢᠰᠢ ᠠᠪᠤ ᠡᠵᠢ ᠭᠡᠳᠣᠨ ᠬᠤᠨᠢ ᠲᠠᠢ ᠪᠠᠨ ᠵᠣᠨ ᠪᠣᠯᠬᠤ ᠪᠠᠷ ᠪᠠᠯᠠᠷ ᠠᠴᠠ ᠭᠠᠷᠴᠦ ᠭᠤᠪᠢ ᠳᠤ ᠤᠷᠤᠭᠠᠳ᠂ ᠲᠡᠭᠷᠢ ᠬᠦᠢᠲᠡᠷᠡᠬᠦ ᠠᠴᠠ ᠡᠮᠦᠨᠡᠬᠡᠨ ᠭᠤᠪᠢ ᠠᠴᠠ ᠭᠠᠷᠴᠦ ᠪᠠᠯᠠᠷ ᠲᠤ ᠪᠠᠨ ᠢᠷᠡᠵᠦ  ᠡᠪᠤᠯᠵᠢᠳᠡᠭ᠃ ᠮᠢᠨᠦ ᠠᠪᠤ ᠡᠵᠢ ᠬᠤᠶᠠᠭᠤᠯᠠ ᠪᠠᠯᠠᠷ᠂ ᠭᠤᠪᠢ ᠶᠢᠨ ᠬᠤᠭᠤᠷᠣᠨᠳᠦ ᠨᠡᠭᠦᠵᠦ ᠨᠢᠭᠡ ᠨᠠᠰᠤ ᠪᠠᠨ ᠡᠯᠡᠭᠡᠭᠰᠡᠨ ᠪᠤᠭᠤᠷᠣᠯ ᠶᠤᠮ ᠰᠠᠨ᠃ ᠭᠤᠪᠢ ᠶᠢᠨ ᠬᠦᠳᠡᠭᠡ ᠪᠤᠷᠤᠭ᠎ᠠ ᠬᠤᠷ᠎ᠠ ᠬᠤᠮᠰᠠ ᠪᠣᠯᠬᠤᠷ ᠪᠡᠯᠴᠢᠭᠡᠷ ᠢ ᠶᠡᠭᠡ ᠲᠠᠰᠣᠯᠵᠤ ᠦᠭᠭᠦᠭᠰᠡᠨ ᠪᠠᠶᠢᠭ᠎ᠠ ᠭᠡᠵᠣ ᠪᠤᠳᠣᠳᠠᠭ᠃ ᠡᠰᠡᠬᠦᠯ᠎ᠠ ᠠᠪᠤ ᠡᠵᠢ ᠲᠠᠶᠢᠳᠠᠢ ᠬᠦᠭᠰᠢᠳ ᠪᠤᠭᠤᠷᠣᠯ ᠤᠳ ᠪᠠᠶᠢᠳᠠᠭ ᠢᠶᠠᠨ ᠬᠤᠮᠢᠵᠤ ᠬᠠᠷᠠᠮᠨᠠᠭᠰᠠᠭᠠᠷ ᠳᠦᠩᠭᠡᠵᠦ ᠦᠯᠡᠳᠡᠭᠡᠭᠰᠡᠨ ᠨᠤᠳᠤᠭ ᠤᠨ ᠲᠠᠰᠣᠷᠬᠠᠢ ᠶᠤᠮ ᠪᠠᠶᠢᠯ ᠦᠬᠡᠢ︕  ᠬᠠᠪᠤᠷᠵᠢᠶ᠎ᠠ ᠡᠪᠦᠯᠵᠢᠶ᠎ᠡ ᠭᠡᠳ ᠵᠣᠨ ᠤ ᠲᠤᠮᠳᠠᠴᠢ ᠰᠠᠷ᠎ᠠ ᠪᠠᠷ ᠵᠠᠪᠠᠯ ᠵᠤᠰᠠᠯᠠᠩ ᠤᠨ  ᠪᠡᠯᠴᠢᠭᠡᠷ ᠣᠯᠠᠨᠪᠤᠯᠠᠭ ᠲᠤ  ᠪᠠᠨ ᠤᠴᠢᠳᠠᠭ᠃ ᠬᠠᠭᠤᠷᠠᠢ ᠲᠠᠴᠢᠷ ᠨᠤᠳᠤᠭ ᠢ ᠪᠡᠯᠭᠡᠰᠢᠶᠡᠵᠦ ᠣᠯᠠᠨ ᠪᠤᠯᠠᠭ ᠭᠡᠵᠣ ᠠᠨᠳᠠᠭᠤᠷᠠᠮᠠᠷ ᠰᠠᠶᠢᠬᠠᠨ ᠨᠡᠷ᠎ᠡ ᠰᠣᠶᠣᠷᠬᠠᠭᠰᠠᠨ ᠪᠢᠵᠡ᠃ ᠵᠠᠭ ᠢᠶᠠᠷ ᠱᠠᠲᠣᠯᠠᠭᠰᠠᠨ ᠭᠠᠭᠴᠠ ᠬᠤᠳᠳᠤᠭ ᠲᠠᠢ᠃ ᠵᠣᠨ ᠪᠤᠯᠬᠤᠷ ᠯᠠ ᠤᠰᠣ ᠲᠠᠲᠠᠭᠤᠷᠠᠵᠤ  ᠬᠠᠭᠰᠠᠷᠠᠳᠠᠭ ᠲᠤᠯᠠ ᠪᠠᠯᠠᠷ ᠲᠤ ᠪᠠᠨ ᠵᠠᠭ᠂ ᠰᠣᠯᠢ᠂ ᠬᠤᠯᠣᠰᠤ ᠤᠷᠭᠤᠳᠠᠭ ᠪᠤᠯᠪᠠᠴᠦ ᠭᠤᠪᠢ ᠪᠠᠷ ᠶᠡᠬᠡᠩᠬᠢ ᠨᠢ  ᠬᠠᠷ᠎ᠠ ᠪᠣᠳᠠ᠂ ᠵᠡᠭᠡᠷᠭᠡᠨ᠎ᠡ᠂ ᠪᠤᠳᠤᠷᠭᠠᠨ᠎ᠠ ᠵᠡᠷᠭᠡ ᠪᠤᠳᠠᠯᠢᠭ ᠲᠠᠢ ᠠᠲᠠᠷ ᠰᠢᠣᠬᠠᠨ ᠬᠦᠳᠡᠭᠡ ᠶᠤᠮ᠃ ᠡᠨᠡ ᠨᠤᠳᠤᠭ ᠠᠪᠤ ᠡᠵᠢ ᠶᠢᠨ ᠬᠠᠶᠢᠷᠠᠯᠠᠵᠤ  ᠬᠤᠷᠢᠶᠠᠭᠰᠠᠨ ᠲᠡᠪᠡᠯ ᠤᠨ ᠡᠩᠭᠡᠷ ᠤᠨ ᠲᠠᠰᠣᠷᠬᠠᠢ ᠰᠢᠭ᠋ ᠰᠠᠨᠠᠭᠳᠠᠨ᠎ᠠ᠃  ᠪᠤᠷᠤᠭ᠎ᠠ ᠬᠤᠷ᠎ᠠ ᠤᠷᠣᠬᠤ ᠭᠡᠵᠤ ᠠᠶᠣᠩᠭ᠎ᠠ ᠶᠢᠨ ᠰᠠᠬᠢᠭᠤᠰᠦ ᠠᠳᠡᠭᠦᠷᠡᠭᠡᠳ ᠭᠠᠩ ᠲᠠᠶᠢᠯᠤᠭᠳᠠᠳᠠᠭ ᠨᠤᠳᠤᠭ ᠶᠤᠮ ᠃ ᠠᠪᠤ ᠡᠵᠢ ᠡᠶᠢᠮᠦᠷᠬᠦᠦ ᠨᠤᠲᠤᠭ ᠢᠶᠠᠨ ᠤᠷᠬᠢᠭ᠎ᠠ ᠦᠭᠡᠢ ︽ᠮᠢᠨᠦ ᠨᠤᠲᠤᠭ︾ ᠭᠡᠳ ᠨᠢᠭᠡ ᠨᠠᠰᠤ ᠪᠠᠨ ᠪᠠᠷᠠᠬᠤ ᠭᠡᠵᠣ ᠤᠶᠢᠯᠭᠠᠭᠳᠠᠰᠢ ᠦᠭᠡᠢ ᠰᠠᠨᠠᠭᠳᠠᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠪᠢ ᠣᠨᠣᠭᠠᠨ ᠤ ᠨᠢᠷᠣᠭᠤᠨ ᠳᠤ ᠰᠠᠭᠤᠵᠣ ᠴᠢᠳᠠᠬᠤ ᠪᠣᠯᠳᠠᠯ᠎ᠠ ᠬᠦᠳᠡᠭᠡ ᠳᠤ ᠦᠰᠦᠭᠰᠡᠨ ᠪᠣᠯᠬᠤᠷ ᠰᠠᠯᠬᠢ ᠰᠢᠭᠤᠷᠭᠠᠨ᠂ ᠭᠠᠩ ᠬᠠᠭᠤᠷᠠᠢ᠂ ᠵᠤᠳ ᠭᠠᠮᠰᠢᠭ ᠢ ᠦᠵᠡᠵᠦ ᠶᠠᠪᠤᠭᠰᠠᠨ ᠠᠴᠠ ᠪᠢᠰᠢ᠂ ᠥᠩ ᠲᠠᠢ ᠦᠭᠡᠳᠡ ᠲᠠᠢ ᠣᠨ ᠵᠢᠯ ᠢ ᠬᠤᠪᠤᠷᠬᠠᠨ ᠬᠠᠷᠠᠭᠰᠠᠨ ᠶᠤᠮ᠃ ᠡᠪᠦᠭᠡ ᠡᠮᠡᠭᠡ ᠶᠢᠨ ᠳᠡᠭᠡᠷ᠎ᠡ ᠦᠶ᠎ᠡ ᠳᠤ ᠶᠡᠭᠡ ᠰᠠᠶᠢᠬᠠᠨ ᠭᠠᠩᠭᠠᠩ ᠪᠠᠶᠢᠭᠠᠯᠢ ᠲᠠᠢ ᠪᠠᠶᠢᠯ᠎ᠠ ᠭᠡᠵᠣ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠢ ᠴᠡᠭᠡᠵᠢᠯᠡᠭᠰᠡᠨ ᠲᠡᠳᠦᠢ ᠪᠤᠷᠣᠭᠠᠨ ᠬᠤᠷ᠎ᠠ ᠶᠢ ᠶᠡᠭᠡ ᠥᠵᠡᠭᠡ ᠦᠭᠡᠢ ᠬᠠᠭᠤᠷᠠᠢ ᠦᠰᠴᠡᠢ᠃ ᠨᠢᠯᠬ᠎ᠠ ᠪᠠᠯᠴᠢᠷ ᠨᠠᠰᠣᠨ ᠤ ᠲᠣᠷᠠᠳᠬᠠᠯ ᠳᠤ ᠠᠶᠣᠩᠭ᠎ᠠ ᠳᠣᠣᠭᠠᠷᠬᠤ ᠠᠴᠠ ᠰᠦᠨᠡᠰᠤ ᠪᠠᠨ ᠵᠠᠪᠬᠠᠷᠠᠲᠠᠯ᠎ᠠ ᠰᠣᠴᠢᠵᠤ ᠶᠡᠭᠡ ᠣᠰᠤ ᠠᠴᠠ ᠠᠶᠤᠳᠠᠭ ᠪᠠᠶᠢᠪᠠ ᠃   ᠭᠤᠪᠢ  ᠶᠢᠨ ᠬᠦᠮᠦᠰ ᠲᠤ ᠤᠰᠣ ᠡᠷᠳᠡᠨᠢ᠂ ᠭᠠᠳᠠᠨ᠎ᠠ ᠪᠠᠨ ᠢᠷᠡᠳᠡᠭ ᠰᠠᠭᠠᠬᠠᠯᠲᠠ ᠡᠷᠳᠡᠨᠢ᠃ ᠠᠪᠤ ᠭᠤᠪᠢ ᠳᠤ ᠰᠣᠷᠣᠭᠰᠠᠨ ᠪᠣᠯᠬᠤᠷ ᠪᠠᠯᠭᠤ ᠤᠰᠣ ᠪᠠᠷ ᠠᠮᠠ ᠪᠠᠨ ᠵᠠᠶᠢᠯᠠᠵᠤ ᠨᠢᠭᠤᠷ ᠭᠠᠷ ᠢᠶᠠᠨ ᠤᠬᠢᠶᠠᠬᠤ ᠨᠢ ᠲᠡᠷᠡ᠃ ᠬᠤᠷᠢᠶᠠᠵᠤ ᠨᠦᠭᠡᠴᠡᠯᠡᠭᠰᠡᠨ ᠤᠰᠤ ᠪᠠᠷ ᠢᠶᠠᠨ ᠬᠤᠷᠠᠭ᠎ᠠ ᠢᠰᠢᠭᠡ᠂ ᠬᠠᠰᠢᠶᠠᠨ ᠳᠤ ᠢᠷᠡᠳᠡᠭ ᠪᠤᠭᠱᠣᠷᠭ᠎ᠠ᠂ ᠬᠠᠶᠠ ᠬᠦᠳᠡᠭᠡ ᠭᠠᠳᠠᠨ᠎ᠠ ᠬᠠᠲᠠᠵᠤ ᠴᠠᠩᠭᠠᠭᠰᠠᠨ ᠦᠷ᠎ᠡ ᠵᠤᠯᠵᠠᠭ᠎ᠠ ᠲᠠᠷᠪᠠᠭ᠎ᠠ ᠢᠨᠵᠠᠭ᠎ᠠ ᠶᠢ ᠤᠰᠣᠯᠠᠳᠠᠭ ᠪᠠᠶᠢᠪᠠ᠃ ᠭᠡᠬᠦ  ᠳᠤ ᠪᠠᠨ ᠡᠵᠢ ᠳᠤ ᠤᠰᠣ ᠳᠣᠲᠠᠭᠠᠵᠤ ᠦᠵᠡᠭᠡ ᠦᠭᠡᠢ᠃   ᠡᠵᠢ ᠵᠠᠯᠠᠭᠤ ᠳᠤ ᠪᠠᠨ ᠦᠢᠷ᠎ᠠ ᠵᠠᠭᠤᠷ᠎ᠠ ᠳᠤ ᠪᠠᠨ ︽ᠭᠠᠩᠭᠠᠩ ᠪᠦᠰᠡᠭᠦᠢ︾ ᠨᠡᠷ᠎ᠠ ᠲᠠᠢ᠂ ᠨᠢᠭᠤᠷ ᠭᠠᠷ ᠢᠶᠠᠨ ᠤᠬᠢᠶᠠᠬᠤ ᠳᠤ ᠤᠰᠣ ᠶᠡᠭᠡ ᠬᠡᠷᠡᠭᠯᠡᠳᠡᠭ ᠭᠡᠨ᠎ᠡ ᠯᠠᠢ᠃ ᠪᠤᠳᠣᠪᠠᠯ ᠰᠠᠶᠢᠬᠠᠨ ᠨᠤᠲᠤᠭ ᠲᠤ ᠪᠠᠨ ᠦᠷ᠎ᠡ ᠪᠠᠨ ᠦᠰᠭᠡᠬᠦ ᠭᠡᠵᠤ ᠶᠠᠳᠠᠷᠠᠵᠤ ᠶᠠᠪᠤᠭ᠎ᠠ  ᠪᠦᠰᠡᠭᠦᠢ ᠬᠦᠮᠦᠨ ᠢ ᠭᠤᠶᠣᠬᠠᠨ ᠪᠠᠶᠢᠯᠭᠠᠬᠤ ᠭᠡᠳᠡᠭ ᠡᠷ᠎ᠡ ᠬᠦᠮᠦᠨ ᠤ ᠰᠠᠨᠠᠳᠠᠭ ᠰᠠᠨᠠᠭ᠎ᠠ ᠪᠢᠵᠡ︕ ᠮᠠᠨ ᠤ ᠬᠢᠨ ᠳᠤ ᠵᠦᠩᠳᠡᠭᠡᠨ ᠬᠦᠮᠦᠰ ᠴᠣᠭᠯᠠᠷᠠᠨ᠎ᠠ᠃ ᠠᠪᠤ ᠵᠤᠭ᠎ᠠ ᠲᠠᠢ ᠬᠦᠮᠦᠨ ᠪᠠᠶᠢᠯ᠎ᠠ᠃ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢᠶᠠᠨ ᠶᠠᠷᠢᠨ᠎ᠠ ᠦᠦ᠂ ᠦᠯᠢᠭᠡᠷ ᠬᠠᠭᠤᠴᠢ ᠲᠡᠯᠭᠡᠨ᠎ᠡ ᠦᠦ᠂ ︽ᠵᠠ ᠪᠠᠶᠢᠵᠡ︕ ᠠᠵᠠ ᠲᠠᠢ  ᠬᠡᠶᠢᠮᠣᠷᠢᠯᠢᠭ  ᠨᠤᠲᠤᠭ ᠁︾ ᠭᠡᠳ ᠣᠩᠭᠤᠵᠤ ᠲᠦᠩᠰᠦᠶᠢᠭᠰᠡᠨ ᠪᠤᠷᠦ ᠬᠦᠳᠡᠭᠡ ᠪᠠᠨ ᠬᠠᠷᠠᠭᠠᠳ ᠬᠤᠳᠠᠯ ᠶᠠᠷᠢᠬᠤ ᠨᠢ ᠢᠯᠡᠭᠦᠦ ᠭᠤᠶᠣ ᠪᠠᠶᠢᠪᠠ᠃ ᠲᠡᠷᠡ ᠪᠠᠷ ᠡᠵᠢ ᠶᠢᠨ ᠳᠡᠷᠭᠡᠳᠡ ᠰᠡᠳᠭᠢᠯ ᠰᠡᠷᠭᠦᠭᠡᠬᠦ ᠪᠠᠷ ᠬᠦᠮᠦᠨ ᠳᠦᠭᠦᠷᠴᠦ ᠯᠠ ᠪᠠᠶᠢᠳᠠᠭ᠃ ᠪᠡᠶ᠎ᠡ ᠴᠣᠭᠴᠠᠰ ᠤᠨ ᠦᠵᠡᠰᠬᠦᠯᠡᠩ ᠭᠡᠭᠴᠢ ᠵᠣᠪᠠᠯᠠᠩ ᠳᠤ ᠣᠨᠠᠬᠤ ᠤᠷᠤᠭ᠎ᠠ ᠬᠦᠰᠡᠯᠡᠩ ᠳᠤ ᠵᠢᠯᠣᠭᠤ ᠠᠯᠳᠠᠳᠠᠭ ᠠᠶᠢᠯ ᠤᠨ ᠲᠡᠬᠦᠤ ᠨᠡᠷ ᠢ ᠡᠵᠢ ᠢᠨᠢᠶᠡᠵᠦ ᠳᠠᠭᠤᠯᠠᠳᠠᠭ ᠪᠣᠯᠬᠤᠷ ᠮᠠᠭᠤᠬᠠᠢ ᠬᠠᠷᠠᠵᠤ ᠪᠤᠯᠣᠮᠠᠷ ᠦᠭᠡᠢ ᠰᠠᠶᠢᠬᠠᠨ ᠬᠦᠮᠦᠨ ᠶᠤᠮ᠃ ᠠᠭᠤᠳᠠᠮ ᠬᠦᠨᠳᠡᠢ ᠶᠢᠨ ᠰᠠᠯᠬᠢ ᠪᠠᠷ ᠢᠨᠢᠶᠡᠳᠡᠭ ᠴᠡᠴᠡᠭᠡᠰ ᠰᠢᠭ ᠴᠡᠭᠡᠵᠢᠨ ᠤ ᠵᠦᠭᠡᠯᠡᠨ ᠳᠠᠭᠤᠣ ᠪᠠᠷ ᠠᠯᠢᠪᠠ ᠠᠮᠢᠲᠠᠨ ᠤ ᠪᠣᠬᠢᠨᠢᠳᠦᠯ ᠭᠠᠰᠯᠠᠩ ᠢ ᠮᠠᠷᠲᠠᠭᠤᠯᠣᠨ᠎ᠠ᠃ ᠠᠪᠤ ᠪᠤᠰᠣᠳ ᠠᠴᠠ ᠬᠠᠷᠠᠮᠨᠠᠳᠠᠭ ᠶᠠᠩᠵᠣᠳᠠᠢ ᠵᠠᠷᠢᠮ ᠦᠶ᠎ᠡ ᠳᠤ ᠬᠦᠮᠦᠨ ᠢᠷᠡᠬᠦ ᠠᠴᠠ ᠲᠦᠪᠡᠭᠰᠢᠶᠡᠳᠡᠭ ᠶᠤᠮ᠃ ᠲᠡᠷᠡ ᠠᠴᠠ ᠪᠤᠯᠵᠣ ᠠᠪᠤ ᠳᠡᠭᠳᠡᠭᠡᠬᠡᠢ ᠪᠠᠨ ᠬᠠᠷᠠᠮᠨᠠᠭᠰᠠᠨ ᠰᠢᠪᠠᠭᠤ ᠰᠢᠭ᠋ ᠤᠰᠣᠨ ᠳᠤ ᠶᠠᠪᠤᠬᠤ ᠪᠠᠨ ᠮᠠᠷᠲᠠᠭᠠᠳ ᠬᠠᠶᠠᠭᠠᠨ ᠳᠤ ᠪᠠᠨ ᠳᠡᠮᠡᠢ ᠬᠤᠷᠭᠤᠳᠠᠨ᠎ᠠ᠃ ᠵᠠᠷᠢᠮ ᠳᠤ ᠪᠠᠨ ᠡᠵᠢ ᠬᠤᠭᠤᠰᠣᠨ ᠪᠤᠷᠪᠢ ᠬᠠᠷᠳᠠᠩᠨᠠᠭᠤᠯᠵᠤ᠄ ︽ᠠᠪᠤ ᠨᠢ ᠲᠠ ᠤᠰᠣᠨ ᠳᠤ ᠪᠠᠨ ᠶᠠᠪᠤᠭᠠᠳ ᠢᠷᠡᠬᠦ ᠦᠭᠡᠢ ᠶᠤᠮ ᠦᠦ︖ ᠴᠢᠷᠠᠢ ᠨᠢᠭᠤᠷ ᠭᠡᠭᠴᠢ ᠶᠠᠩᠵᠤ ᠶᠢᠨ ᠪᠣᠯᠵᠤ ᠲᠤᠭᠤᠷᠣᠯ᠎ᠠ᠂ ᠢᠩᠬᠢᠭᠡᠳ ᠦᠨᠵᠢᠪᠡᠯ ᠭᠤᠯᠣᠭᠳᠠᠬᠤ  ᠳᠤ ᠳᠦᠭᠦᠭᠰᠡᠨ︾ ᠭᠡᠵᠤ ᠬᠠᠶᠢᠯᠤᠭᠰᠠᠨ ᠲᠣᠭᠤᠯᠭ᠎ᠠ ᠰᠢᠭ᠋ ᠨᠢᠳᠦ ᠲᠣᠷᠮᠣᠶᠢᠯᠭᠠᠨ ᠶᠠᠯᠠᠷᠬᠠᠳᠠᠭ ᠶᠤᠮ᠃ ᠭᠤᠯᠣᠬᠤ ᠭᠤᠯᠣᠭᠳᠠᠬᠤ ᠭᠡᠳᠡᠭ ᠢ ᠴᠡᠭᠡᠷᠲᠡᠢ ᠰᠢᠭ  ᠠᠪᠤ ᠡᠵᠢ ᠬᠤᠶᠠᠭᠤᠯᠠ ᠵᠠᠩ ᠢᠶᠠᠨ ᠤᠯᠣᠭᠰᠠᠨ ᠪᠠᠶᠢᠬᠤ ᠳ᠋ᠠ᠃ ᠤᠰᠣ  ᠠᠪᠬᠤ ᠨᠢ ᠠᠪᠤ ᠶᠢᠨ ᠭᠤᠣᠯᠲᠠᠢ ᠠᠵᠢᠯ ᠪᠣᠯᠬᠤᠷ ᠦᠷᠴᠡᠶᠢᠵᠦ ᠠᠪᠤᠭᠠᠳ ᠬᠤᠭᠤᠰᠣᠨ ᠪᠤᠷᠪᠢ ᠪᠠᠨ ᠲᠡᠭᠦᠵᠢᠯᠡᠭᠡᠳ ᠣᠨᠣᠭᠠᠨ ᠳᠤ ᠪᠠᠨ ᠬᠤᠯᠬᠢᠵᠤ ᠬᠦᠷᠬᠦ ᠳᠤ ᠡᠵᠢ ᠠᠮᠠ ᠪᠠᠨ ᠪᠠᠷᠢᠭᠰᠠᠭᠠᠷ  ᠨᠠᠳᠠ ᠤᠷᠣᠭᠤ ᠬᠠᠷᠠᠵᠣ ᠢᠨᠢᠶᠡᠮᠰᠦᠭᠯᠡᠨ᠎ᠡ᠃ ᠪᠢ ᠠᠪᠤ ᠶᠢᠨ ᠬᠤᠶᠢᠨ᠎ᠠ᠄ ︽ᠠᠪᠤ ᠡ᠂ ᠪᠢ ᠲᠠᠨ ᠲᠠᠢ ᠤᠴᠢᠶ᠎ᠠ︾ ᠭᠡᠳ ᠲᠡᠮᠡᠢ ᠶᠠᠷᠢᠬᠤ ᠳᠤ ᠠᠪᠤ ᠭᠡᠳᠡᠷᠭᠦ ᠪᠠᠨ ᠬᠠᠷᠠᠭᠠᠳ᠄ ︽ᠬᠡᠥᠬᠡᠳ ᠪᠠᠶᠢᠵᠤ ᠮᠢᠨᠦ ᠬᠦᠦ ᠴᠢᠳᠠᠬᠤ ᠪᠤᠯᠤᠭ᠎ᠠ ᠦᠭᠡᠢ ᠳ᠋ᠠ᠂  ᠡᠵᠢ ᠳᠤ ᠪᠠᠨ ᠬᠠᠨᠢ ᠪᠣᠯ︾  ᠭᠡᠳ ᠣᠯᠠᠨ ᠪᠤᠯᠠᠭ ᠤᠨ ᠵᠠᠳᠠᠭᠠᠢ ᠳᠤ  ᠶᠠᠪᠤᠳᠠᠭ ᠶᠤᠮ᠃  ᠬᠤᠶᠢᠨ᠎ᠠ ᠠᠴᠠ ᠨᠢ᠄︽ᠠᠪᠤ ᠴᠢᠨᠢ ᠲᠡᠨᠡᠭ  ᠪᠢᠵᠡ︖ ᠡᠵᠢ ᠶᠢ ᠨᠢ ᠰᠠᠬᠢᠵᠤ ᠪᠠᠢ ᠭᠡᠨ᠎ᠡ ᠰᠢᠦ︕︾ ᠭᠡᠳ ᠲᠠᠭᠠᠵᠠᠩᠨᠠᠨ ᠢᠨᠢᠶᠡᠨ᠎ᠡ᠃  ᠠᠪᠤ ᠶᠢ ᠮᠠᠨᠠᠭᠰᠠᠭᠠᠷ ᠪᠠᠶᠢᠭᠠᠳ ᠤᠰᠣᠨ ᠠᠴᠠ ᠶᠠᠪᠤᠭᠠᠳ ᠢᠷᠡᠬᠦ ᠳᠤ ᠠᠪᠤ ᠡᠵᠢ ᠲᠡᠩᠨᠡᠭᠡ ᠲᠠᠢ ᠪᠤᠷᠪᠢ ᠶᠢ ᠪᠠᠭᠤᠯᠭᠠᠬᠤ ᠵᠠᠭᠤᠷ᠎ᠠ ᠲᠡᠮᠡᠭᠡᠨ ᠤ ᠪᠦᠬᠦᠨ ᠳᠡᠭᠡᠭᠦᠷ ᠰᠢᠪᠡᠨᠡᠯᠳᠦᠳᠡᠭ ᠢ ᠬᠠᠷᠠᠵᠠᠢ᠃ ᠠᠪᠤ ᠬᠤᠳᠠᠯ ᠢᠶᠠᠷ ᠴᠢᠮᠠᠷᠬᠠᠵᠤ ᠪᠠᠶᠢᠪᠠ᠃ ᠡᠵᠢ ᠶᠢᠨ  ᠢᠶᠠᠨ ᠬᠠᠯᠠᠭᠤᠨ ᠬᠤᠩᠰᠢᠶᠠᠷ ᠢ ᠭᠠᠭᠴᠠᠬᠠᠨ ᠮᠢᠨᠦ ᠭᠡᠵᠣ ᠪᠤᠳᠣᠳᠠᠭ ᠪᠠᠶᠢᠪᠠ᠃ ᠡᠨᠡ ᠬᠠᠶᠢᠷ᠎ᠠ ᠶᠢᠨ ᠬᠠᠯᠠᠭᠤᠨ ᠦᠨᠦᠰᠦᠯᠲᠠ ᠬᠦᠳᠡᠭᠡ ᠶᠢᠨ ᠰᠠᠯᠬᠢ ᠰᠢᠭ᠋ ᠡᠪᠡᠰᠣᠨ ᠤ ᠦᠵᠦᠭᠦᠷ ᠨᠠᠶᠢᠭᠤᠳᠠᠭ  ᠰᠡᠨᠵᠡᠢ᠃ ᠡᠵᠢ᠄ ︽  ᠠᠰᠢᠭᠦᠢ ᠨᠢᠭᠡ ᠪᠤᠷᠤᠭ᠎ᠠ ᠤᠷᠣᠬᠤ ᠶᠤᠮ ᠪᠠᠶᠢᠨ᠎ᠠ︾ ᠭᠡᠳ ᠭᠠᠵᠠᠷ ᠠᠴᠠ ᠡᠯᠡᠰᠦ ᠠᠪᠴᠦ ᠰᠠᠴᠤᠬᠤᠯᠠᠷ ᠪᠢ ᠪᠠᠰᠠ ᠳᠠᠭᠤᠷᠢᠶᠠᠵᠤ  ᠨᠢᠭᠡ ᠠᠳᠬᠤ ᠰᠢᠷᠣᠢ ᠰᠠᠴᠣᠬᠤ ᠳᠤ ᠡᠵᠢ ᠬᠦᠬᠦᠷᠡᠵᠦ᠄︽ᠴᠢ ᠶᠠᠭᠤ ᠮᠡᠳᠡᠯ᠎ᠡ ᠭᠡᠵᠣ ᠰᠢᠷᠦᠢ ᠪᠤᠲᠠᠷᠠᠭᠤᠯᠵᠤ ᠪᠠᠶᠢᠨ᠎ᠠ︖︾ ᠭᠡᠵᠤ ᠡᠯᠢᠭᠡ ᠬᠠᠲᠠᠬᠤ ᠵᠠᠭᠤᠷ᠎ᠠ ᠵᠡᠭᠦᠨ ᠡᠮᠦᠨ᠎ᠡ ᠠᠴᠠ ᠵᠢᠪᠠᠷ ᠤᠷᠢᠪᠠᠯ ᠭᠤᠷᠪᠠᠨ ᠬᠤᠨᠤᠭ ᠲᠤ ᠪᠠᠨ ᠵᠠᠪᠠᠯ ᠪᠤᠷᠣᠭᠠᠯᠠᠳᠠᠭ︾ ᠭᠡᠵᠤ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠢ ᠦᠨᠡᠮᠰᠢᠵᠢ ᠪᠢᠯᠡ᠃  ᠪᠢ ᠡᠵᠢ ᠶᠢᠨ ᠬᠡᠯᠡᠭᠰᠡᠨ ᠦᠭᠡ ᠶᠢ ᠮᠠᠨᠠᠵᠤ᠂ ᠭᠡᠷ ᠤᠨ ᠬᠠᠶᠠᠭᠠᠨ ᠳᠤ ᠪᠤᠷᠪᠢ ᠲᠦᠰᠢᠭᠡᠳ ᠪᠤᠷᠤᠭ᠎ᠠ ᠤᠷᠣᠬᠤ ᠶᠢ  ᠬᠦᠯᠢᠶᠡᠵᠦ ᠰᠠᠭᠤᠪᠠ᠃ ᠠᠪᠤ᠄︽ᠮᠠᠨ ᠤ ᠤᠰᠣᠨ ᠤ ᠰᠠᠪᠠ ᠬᠦᠯᠦᠷᠡᠭᠰᠡᠨ ᠪᠠᠶᠢᠬ᠎ᠠ ᠨᠢ ᠭᠡᠳ ᠥᠭᠡᠳᠡ ᠬᠠᠷᠠᠨ ᠪᠠᠶᠢᠭᠰᠠᠨ ᠢᠶᠠᠨ ᠮᠢᠨᠦ ᠬᠦᠦ ᠬᠠᠯᠠᠭᠤᠨ ᠳᠤ ᠭᠠᠳᠠᠨ᠎ᠠ ᠰᠠᠭᠤᠭᠠᠳ  ᠰᠢᠲᠠᠴᠢᠬᠠᠬᠤ ᠪᠤᠢ︾ ᠭᠡᠬᠦ ᠳᠤ  ᠪᠢ᠄ ︽ᠪᠤᠷᠤᠭ᠎ᠠ ᠭᠡᠳᠡᠭ ᠢ ᠴᠢᠨᠢ ᠬᠦᠯᠢᠶᠡᠵᠦ ᠯᠠ ᠪᠠᠶᠢᠨ᠎ᠠ︾ ᠭᠡᠵᠤ ᠢᠨᠢᠶᠡᠯᠭᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃ ︽ᠥ︕  ᠬᠤᠷ᠎ᠠ ᠪᠠᠭᠤᠬᠤ ᠶᠢ ᠬᠦᠯᠢᠶᠠᠵᠦ ᠪᠠᠶᠢᠨ᠎ᠠ ᠦᠦ ᠳ᠋ᠠ︖ ᠵᠢᠪᠠᠷ ᠰᠠᠯᠬᠢᠨ ᠤ ᠵᠦᠭ ᠢᠶᠠᠨ ᠤᠯᠳᠠᠭ ᠰᠠᠶᠢᠬᠠᠨ ᠮᠠᠯᠴᠢᠨ ᠭᠠᠷᠬᠤ ᠨᠢ︾ ᠭᠡᠳ ᠪᠦᠰᠡ ᠪᠠᠨ ᠴᠢᠩᠭᠠᠯᠠᠵᠤ  ᠬᠤᠨᠢᠨ ᠳᠤ ᠪᠠᠨ ᠶᠠᠪᠤᠪᠠ᠃ ᠬᠤᠷᠮᠣᠢ ᠬᠡᠶᠢᠰᠭᠡᠵᠣ ᠶᠠᠪᠤᠬᠤ ᠭᠡᠵᠣ ᠡᠷ᠎ᠡ ᠬᠦᠮᠦᠨ ᠤ ᠪᠠᠭ᠋ᠠᠳᠣᠯ ᠲᠡᠷᠡ ᠪᠠᠶᠢᠭ᠎ᠠ ᠭᠡᠵᠣ ᠨᠠᠭᠠᠨ᠎ᠠ ᠨᠢ ᠪᠢ ᠤᠮᠣᠭᠰᠢᠵᠤ ᠬᠠᠷᠠᠨ᠎ᠠ᠃ ᠲᠡᠷᠡ ᠵᠣᠨ ᠦᠩᠰᠢᠵᠦ ᠲᠠᠷᠭᠤᠨ ᠲᠡᠮᠡᠭᠡᠨ ᠤ ᠨᠢᠷᠦᠭᠤᠨ ᠳᠤ  ᠬᠠᠮᠬᠤᠤᠯ ᠤᠷᠭᠤᠵᠤ᠂ ᠢᠮᠠᠭᠠᠨ ᠤ ᠰᠡᠭᠦᠯ ᠢᠵᠠᠷᠠᠭᠰᠠᠨ ᠰᠠᠶᠢᠬᠠᠨ ᠵᠢᠯ ᠪᠤᠯᠣᠭᠰᠠᠨ ᠶᠤᠮ᠃ ᠲᠡᠷᠡ ᠵᠤᠨ ᠭᠤᠣᠯ ᠢᠶᠠᠷ ᠬᠠᠭᠤᠷᠠᠢ ᠦᠶᠡᠷ ᠢᠷᠡᠭᠰᠡᠨ ᠢ ᠭᠠᠶᠢᠬᠠᠵᠢ ᠪᠢᠯᠡ᠃ ᠠᠭᠤᠯᠠᠨ ᠳᠤ ᠶᠡᠭᠡ ᠪᠤᠷᠤᠭ᠎ᠠ ᠣᠷᠣᠪᠠᠯ ᠭᠤᠣᠯ ᠢᠶᠠᠷ ᠨᠠᠭᠠᠰᠢ ᠪᠠᠨ ᠦᠶᠡᠷ ᠢᠷᠡᠳᠡᠭ ᠭᠡᠵᠤ ᠡᠵᠢ ᠶᠠᠷᠢᠵᠣ ᠦᠭᠴᠡᠢ᠃ ᠡᠶᠢᠮᠦ ᠶᠡᠭᠡ ᠤᠰᠣ ᠶᠠᠪᠤᠳᠠᠭ ᠢ ᠠᠩᠬ᠎ᠠ ᠬᠠᠷᠠᠪᠠ᠃ ᠨᠠᠷᠢᠨ ᠭᠤᠣᠯ ᠤᠨ ᠬᠦᠨᠳᠡᠢ ᠪᠠᠷ ᠦᠶᠡᠷ ᠤᠨ ᠦᠵᠦᠭᠦᠷ ᠰᠢᠷ᠎ᠠ ᠲᠤᠭᠤᠰᠣ ᠲᠠᠲᠠᠭᠤᠯᠣᠨ ᠱᠣᠣᠭᠢᠭᠠᠳ ᠢᠷᠡᠬᠦ ᠨᠢ ᠤᠷᠣᠯᠳᠣᠭᠠᠨ ᠤ ᠮᠣᠷᠢᠳ ᠢᠷᠡᠬᠦ ᠮᠡᠳᠦ ᠰᠦᠷ ᠲᠠᠢ᠃ ᠠᠪᠤ ᠮᠣᠷᠢ ᠲᠠᠢ ᠳᠠᠪᠬᠢᠵᠤ ᠢᠷᠡᠭᠡᠳ ︽ᠪᠤᠷᠣᠭᠠᠯᠠᠬᠤ ᠶᠤᠮ ᠪᠠᠶᠢᠨ᠎ᠠ︾ ᠭᠡᠳ ᠨᠠᠮ᠎ᠠ ᠶᠢ ᠮᠣᠷᠢ ᠣᠨᠣᠭᠤᠯᠵᠣ ᠡᠵᠢ ᠲᠠᠢ ᠶᠢᠰᠣᠨ ᠰᠢᠳᠢ ᠶᠢᠨ ᠶᠠᠭᠤᠮ᠎ᠠ ᠶᠠᠷᠢᠵᠤ ᠶᠠᠪᠤᠬᠤ ᠳᠤ ᠮᠢᠨᠦ ᠨᠦᠢᠷ ᠬᠦᠷᠦᠨ᠎ᠡ᠃ ᠭᠡᠷ ᠲᠤ ᠪᠠᠨ ᠬᠠᠷᠢᠵᠤ ᠤᠴᠢᠬᠤ  ᠳᠤ ᠠᠪᠤ ᠨᠢᠭᠡ ᠲᠡᠪᠡᠷᠢ ᠲᠦᠯᠡᠭᠡ ᠲᠡᠭᠦᠵᠦ᠂ ᠡᠵᠢ ᠤᠷᠣᠢ ᠶᠢᠨ ᠬᠤᠭᠤᠯᠠᠨ ᠤ  ᠰᠣᠷᠢᠰᠤ ᠲᠡᠭᠦᠵᠡᠢ᠃   ︽ᠤᠷᠣᠬᠤ ᠲᠡᠭᠷᠢ ᠶᠢᠨ ᠤᠷᠣᠢ ᠨᠢ ᠴᠣᠭᠤᠷᠬᠠᠢ᠂ ᠤᠷᠣᠬᠤ ᠦᠭᠡᠢ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠴᠤᠭᠤᠷᠬᠠᠢ︾ ᠭᠡᠳᠡᠭ ᠢᠶᠠᠷ ᠨᠢᠬᠡ ᠯᠨ ᠮᠡᠳᠡᠬᠦ ᠳᠤ ᠵᠢᠪᠠᠷ ᠰᠡᠩᠭᠢᠨᠡᠵᠤ ᠪᠦᠭᠭᠦᠭᠰᠢᠪᠡ᠃ ᠤᠷᠣᠢ ᠳᠡᠭᠡᠷ᠎ᠡ ᠬᠦᠴᠦᠲᠠᠢ ᠬᠦᠷᠴᠢᠭᠡᠨᠡᠨ ᠳᠣᠷᠭᠢᠵᠤ᠂ ᠭᠡᠷ ᠤᠨ ᠡᠮᠦᠨᠡᠬᠢ ᠠᠭᠤᠯᠠᠨ ᠤᠷᠣᠢ ᠳᠡᠭᠡᠷ᠎ᠡ ᠴᠠᠭᠠᠨ ᠭᠡᠷᠡᠯ ᠲᠠᠰᠢᠭᠤᠷᠳᠠᠨ  ᠭᠢᠯᠪᠠᠭᠠᠯᠠᠪᠠ᠃ ᠪᠢ ᠠᠶᠣᠩᠭ᠎ᠠ ᠳᠣᠣᠭᠠᠷᠬᠤ ᠶᠢ ᠦᠵᠡᠭᠡ ᠦᠭᠡᠢ ᠪᠤᠯᠬᠤᠷ  ︽ᠡᠵᠢ ᠡ︕︾ ᠭᠡᠳ ᠬᠠᠰᠬᠢᠷᠣᠭᠰᠠᠭᠠᠷ ᠪᠤᠷᠪᠢ ᠶᠢᠨ ᠳᠡᠭᠡᠭᠦᠷ ᠳᠣᠩᠭᠤᠴᠠᠨ ᠬᠠᠷᠠᠶᠢᠯᠭᠠᠭᠠᠳ ᠭᠡᠷ ᠲᠤ ᠪᠠᠨ ᠳᠠᠪᠬᠢᠨ ᠤᠷᠣᠪᠠ᠃  ︽ᠠᠶᠤᠩᠭ᠎ᠠ ᠨᠢᠷᠭᠡᠬᠦ ᠨᠢ ᠭᠠᠯᠳᠦ ᠯᠤᠤ ᠤᠭᠲᠠᠷᠭᠤᠢ ᠳᠤ ᠪᠠᠭᠲᠠᠯᠴᠠᠬᠤ ᠦᠬᠡᠢ ᠯᠤᠤᠰ ᠤᠨ ᠡᠵᠠᠨ ᠲᠠᠢ ᠨᠢᠭᠦᠯ ᠬᠢᠭᠰᠡᠨ ᠬᠤᠤᠷ ᠤᠨ ᠠᠭᠠᠯᠵᠢ ᠶᠢ ᠠᠯᠠᠬᠤ ᠰᠢᠢᠳᠭᠡᠯ ᠦᠭᠴᠦ ᠵᠤᠳᠣᠭᠠᠨ ᠬᠢᠵᠦ ᠪᠠᠶᠢᠨ᠎ᠠ︾ ᠭᠡᠳᠡᠭ ᠠᠪᠤ ᠶᠢᠨ ᠶᠠᠷᠢᠳᠠᠭ ᠦᠯᠢᠭᠡᠷ ᠪᠤᠳᠣᠭᠳᠠᠨ᠎ᠠ᠃ ᠬᠤᠷ᠎ᠠ ᠪᠤᠷᠣᠭᠠᠨ ᠳᠤ ᠠᠯᠠᠭ ᠡᠷᠢᠶᠠᠨ ᠬᠤᠪᠴᠠᠰᠣ ᠡᠮᠤᠰᠬᠦ ᠶᠢ ᠴᠡᠭᠡᠷᠯᠠᠳᠡᠭ ᠵᠠᠩᠰᠢᠯ ᠨᠢ ᠭᠠᠯᠲᠦ ᠯᠤᠤ᠂ ᠯᠤᠤᠰ ᠤᠨ ᠬᠠᠳ ᠬᠦᠮᠦᠨ ᠢ ᠠᠨᠳᠠᠭᠤ ᠨᠢᠷᠭᠡᠬᠦ ᠠᠴᠠ ᠬᠡᠴᠢᠶᠡᠭᠰᠡᠨ ᠴᠡᠭᠡᠷ ᠭᠡᠨ᠎ᠡ᠃ ︽ᠠᠶᠤᠩᠭ᠎ᠠ ᠳᠣᠣᠭᠠᠷᠪᠠᠯ ᠭᠡᠷ ᠲᠤ ᠪᠠᠨ ᠤᠷᠣ︾ ᠭᠡᠳᠡᠭ ᠬᠡᠯᠡᠯᠭᠡ ᠪᠤᠢ᠃ ᠲᠡᠭᠷᠢ ᠲᠣᠣᠭᠠᠷᠪᠠᠯ ︽ᠬᠦᠶ᠋ᠢ᠂ ᠬᠦᠶ᠋ᠢ︾ ᠭᠡᠵᠤ ᠦᠨᠳᠦᠷ ᠳᠠᠭᠤ ᠭᠠᠷᠭᠠᠵᠤ ︽ᠪᠢ ᠬᠦᠮᠦᠨ ᠪᠠᠶᠢᠨ᠎ᠠ︾ ᠭᠡᠳᠡᠭ ᠲᠤᠭᠢᠶ᠎ᠠ ᠥᠭᠴᠦ᠂ ᠵᠠᠷᠢᠮ ᠭᠠᠵᠠᠷ ᠡᠭᠦᠳᠡ ᠪᠠᠷ ᠢᠶᠠᠨ ᠱᠦᠭᠦᠷ ᠰᠠᠪᠠ ᠭᠠᠳᠠᠭᠰᠢ ᠰᠢᠲᠡᠳᠡᠭ ᠵᠠᠩᠰᠢᠯ ᠢ ᠤᠳᠣ ᠬᠦᠷᠲᠡᠯ᠎ᠡ ᠬᠠᠳᠠᠭᠠᠯᠠᠵᠤ ᠪᠤᠢ᠃ ᠡᠵᠢ ᠠᠷᠤ ᠠᠴᠠ᠄ ︽ᠢᠯᠢ ᠡ︕ ᠮᠢᠨᠦ ᠬᠦᠦ ᠠᠶᠣᠩᠭ᠎ᠠ ᠠᠴᠠ ᠰᠣᠴᠢᠭᠰᠠᠨ ᠨᠢ ᠲᠡᠷᠡ ᠦᠦ︾ ᠭᠡᠳ ᠲᠣᠯᠣᠭᠠᠢ ᠶᠢ ᠢᠯᠢᠵᠦ᠂ ︽ᠢᠷ᠎ᠡ ᠡ᠂ ᠢᠷ᠎ᠡ︾ ᠭᠡᠵᠤ ᠰᠦᠨᠠᠰᠣ ᠶᠢ ᠲᠠᠭᠤᠳᠠᠵᠤ ᠦᠭᠴᠢ ᠪᠢᠯᠡ᠃ ᠠᠶᠤᠭᠰᠠᠨ ᠪᠢ  ᠴᠢᠬᠢ ᠪᠠᠨ ᠪᠦᠭᠯᠡᠨ ᠵᠤᠭᠰᠣᠨ᠎ᠠ᠃ ᠡᠮᠦᠨ᠎ᠡ ᠬᠤᠭᠤᠯᠠᠢ᠂ ᠠᠭᠤᠯᠠᠨ ᠪᠡᠯ ᠲᠠᠭᠠᠭᠠᠳ ᠴᠠᠭᠠᠨ ᠬᠤᠢ ᠲᠠᠲᠠᠵᠤ ᠥᠨᠦᠬᠢ ᠪᠤᠷᠤᠭ᠎ᠠ ᠭᠡᠳᠡᠭ  ᠨᠢ ᠱᠠᠭᠢᠵᠦ ᠡᠬᠢᠯᠡᠪᠡ᠃ ᠡᠵᠢ ᠪᠦᠷ  ᠬᠡᠥᠬᠡᠳ ᠰᠢᠭ ᠪᠠᠶᠠᠷᠯᠠᠵᠤ ᠭᠡᠷ ᠲᠤ ᠪᠠᠶᠢᠭᠰᠠᠨ ᠠᠶᠠᠭ᠎ᠠ ᠱᠠᠭᠠᠵᠠᠩ᠂ ᠲᠤᠭᠤᠭ᠎ᠠ ᠬᠠᠶᠢᠰᠤ ᠁ ᠥᠭᠡᠳᠡ ᠠᠮᠠᠰᠠᠷ ᠲᠠᠢ ᠪᠦᠬᠦᠨ ᠢ ᠭᠠᠳᠠᠨ᠎ᠠ ᠭᠠᠷᠭᠠᠵᠤ ᠬᠥᠬᠡ ᠲᠡᠭᠷᠢ ᠶᠢᠨ ᠷᠠᠰᠢᠶᠠᠨ ᠬᠤᠷᠢᠶᠠᠬᠤ ᠠᠴᠠ ᠨᠤᠷᠬᠤ ᠨᠢ ᠭᠤᠶᠤ ᠭᠡᠨ᠎ᠡ᠃ ᠡᠵᠢ᠄ ︽ᠮᠢᠨᠦ ᠬᠦᠦ ᠬᠦᠷᠮ᠎ᠡ ᠪᠠᠨ ᠲᠠᠶᠢᠯᠤᠭᠠᠳ ᠪᠤᠷᠣᠭᠠᠨ ᠳᠤ ᠳᠠᠪᠬᠢ︾ ᠭᠡᠯ᠎ᠡ᠃ ᠪᠢ ᠠᠩᠬ᠎ᠠ ᠪᠤᠷᠣᠭᠠᠨ ᠠᠴᠠ ᠠᠶᠣᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠵᠤᠤᠯᠠᠭᠰᠠᠨ ᠬᠤᠳᠠᠴᠢ ᠲᠠᠢ ᠪᠠᠨ ᠨᠦᠭᠦᠳ ᠪᠤᠯᠵᠣ ᠪᠤᠷᠣᠭᠠᠨ ᠤ ᠤᠰᠣᠨ ᠳᠤ ᠦᠰᠦᠷᠭᠡᠪᠡ᠃ ᠮᠢᠨᠦ ᠮᠠᠭᠤ ᠬᠠᠯᠲᠠᠷ ᠴᠢᠷᠠᠢ ᠦᠩᠭᠡ ᠤᠷᠣᠴᠢᠬᠠᠯ᠎ᠠ ᠭᠡᠵᠣ ᠡᠵᠢ ᠠᠪᠤ ᠲᠠᠢ ᠮᠦᠰᠢᠶᠡᠵᠦ ᠪᠠᠶᠢᠪᠠ ᠃ ᠲᠡᠷᠡ ᠡᠳᠦᠷ ᠮᠠᠨ ᠤ ᠬᠢᠨ ᠬᠠᠮᠤᠭ ᠤᠨ ᠶᠡᠭᠡ ᠤᠰᠣ ᠬᠤᠷᠢᠶᠠᠭᠰᠠᠨ ᠤᠳᠠᠭ᠎ᠠ ᠲᠠᠢ᠃ᠰᠠᠷᠠ ᠮᠠᠨᠳᠣᠬᠤ ᠶᠢᠨ ᠦᠶ᠎ᠡ ᠳᠤ ᠠᠪᠤ ᠭᠡᠷ ᠤᠨ ᠠᠷᠣ ᠳᠤ ᠱᠤᠩ ᠪᠤᠰᠬᠠᠵᠤ ᠶᠤᠯᠤᠭ ᠲᠠᠲᠠᠭᠠᠳ ᠡᠵᠢ ᠲᠠᠢ  ᠴᠤᠭ ᠪᠠᠶᠢᠯ᠎ᠠ᠃ ︽ᠮᠢᠨᠦ ᠬᠦᠦ ᠲᠡᠨᠳᠡ ᠪᠠᠨ ᠪᠠᠢ︾ ᠭᠡᠨ᠎ᠡ᠃ ᠡᠵᠢ ᠶᠢᠨ ᠤᠷᠣᠢ ᠳᠡᠭᠡᠷ᠎ᠡ ᠠᠴᠠ ᠴᠣᠷᠭᠤ ᠲᠠᠢ ᠤᠰᠣ ᠭᠤᠭᠤᠵᠢᠭᠤᠯᠬᠤ ᠳᠤ ᠵᠢᠪᠠᠷ ᠤᠨ ᠲᠡᠭᠡᠳᠦ ᠲᠠᠯ᠎ᠠ ᠠᠴᠠ ᠭᠤᠶᠣ ᠦᠨᠦᠷ ᠭᠠᠷᠴᠦ ᠰᠢᠪᠠᠭᠤ ᠮᠡᠳᠥ ᠳᠡᠭᠡᠯᠵᠡᠨ᠎ᠡ᠃ ᠴᠡᠩᠬᠡᠷ ᠠᠭᠠᠷ ᠲᠤ ᠡᠭᠦᠯᠡᠡ ᠰᠡᠮᠡᠷᠬᠡᠢ ᠪᠠᠷ ᠰᠠᠷᠠᠨ ᠤ ᠴᠠᠭᠠᠨ ᠲᠤᠶᠠᠭ᠎ᠠ ᠰᠠᠴᠣᠷᠠᠵᠣ ᠤᠳᠣ ᠠᠷᠴᠢᠭᠰᠠᠨ ᠰᠦ ᠲᠠᠢ ᠰᠦᠨᠢ ᠨᠦᠮᠦᠷᠢᠯᠡᠭᠰᠡᠨ ᠭᠤᠪᠢ ᠶᠢᠨ ᠬᠦᠳᠡᠭᠡ ᠴᠠᠶᠢᠷᠠᠨ ᠲᠤᠨᠢᠷᠬᠠᠨ᠎ᠠ᠃ ᠡᠵᠢ ᠶᠢᠨ ᠬᠥ᠋ ᠬᠠᠷ᠎ᠠ ᠭᠡᠵᠢᠭᠡ ᠠᠴᠠ ᠮᠦᠩᠭᠦᠨ ᠬᠢᠷ᠎ᠠ ᠲᠠᠢ ᠭᠡᠷᠡᠯ ᠲᠤᠯᠢᠶᠠᠵᠤ᠂ ᠪᠡᠶ᠎ᠡ ᠪᠠᠨ ᠨᠢᠭᠤᠭᠰᠠᠨ ᠴᠠᠭᠠᠨ ᠶᠤᠷᠤᠭ ᠲᠤ ᠰᠡᠭᠦᠳᠡᠷ ᠲᠤᠰᠴᠦ᠂ ᠦᠬᠢᠨ ᠲᠡᠭᠷᠢ ᠶᠢᠨ ᠵᠢᠷᠤᠭ ᠠᠮᠢᠯᠠᠭᠰᠠᠨ ᠭᠡᠮᠡᠷ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠤᠸ᠎ᠠ ᠦᠵᠡᠰᠭᠦᠯᠡᠩ ᠢ ᠲᠣᠯᠢᠨ ᠳᠤ ᠣᠶᠢᠯᠠᠭᠰᠠᠨ ᠰᠠᠷᠠ ᠮᠡᠳᠥ ᠰᠣᠮᠣᠨ ᠤ ᠨᠠᠭᠠᠳᠣᠮ ᠳᠤ ᠺᠢᠨᠣ᠋ ᠦᠵᠡᠵᠦ ᠤᠴᠢᠬᠤ ᠳᠤ ᠬᠦᠰᠢᠭᠡᠨ ᠲᠡᠭᠡᠷ᠎ᠡ ᠭᠠᠷᠳᠠᠭ ᠵᠢᠷᠤᠭ ᠠᠴᠠ ᠠᠩᠭᠢᠷ ᠬᠠᠷᠠᠭᠳᠠᠨ᠎ᠠ᠃ ᠤᠳᠣ ᠪᠤᠳᠣᠬᠤ ᠳᠤ ᠬᠤᠲᠠ ᠶᠢᠨ ᠬᠦᠮᠦᠨ ᠰᠢᠭ ᠤᠰᠣᠨ ᠳᠤ ᠤᠷᠣᠵᠣ ᠪᠠᠶᠢᠵᠠᠢ᠃ ᠴᠢᠬᠢᠭ ᠤᠨ ᠦᠨᠦᠷ ᠰᠡᠩᠭᠢᠨᠡᠭᠰᠡᠨ ᠡᠯᠡᠰᠤ ᠬᠠᠶᠠᠭᠠᠷᠠᠭᠰᠠᠨ ᠭᠤᠪᠢ ᠶᠢᠨ ᠬᠤᠪᠤᠷᠬᠠᠨ ᠦᠳᠡᠰᠢ ᠤᠰᠣ ᠰᠠᠳᠠᠷᠠᠬᠤ ᠴᠢᠮᠡᠭᠡ ᠪᠠᠷ ᠪᠢ ᠨᠤᠬᠠᠢ ᠲᠠᠢ ᠪᠠᠨ  ᠰᠠᠷᠠ ᠡᠭᠦᠯᠡ ᠬᠤᠶᠠᠷ ᠤᠨ ᠬᠡᠨ ᠨᠢ ᠲᠦᠷᠦᠭᠦᠯᠡᠵᠦ ᠳᠠᠪᠬᠢᠳᠠᠭ ᠢ ᠰᠢᠷᠲᠡᠨ ᠰᠠᠭᠤᠨ᠎ᠠ᠃  ᠠᠪᠤ ᠤᠰᠣ ᠵᠦᠭᠡᠭᠡᠵᠦ ᠯᠠ ᠪᠠᠶᠢᠪᠠ ᠁ ᠨᠠᠷᠠ ᠭᠠᠷᠴᠦ ᠶᠡᠭᠡ ᠭᠤᠪᠢ ᠰᠡᠷᠢᠭᠦᠨ ᠢᠶᠠᠷ ᠠᠮᠢᠰᠬᠤᠯᠯᠠᠨ᠎ᠠ᠃ ᠭᠠᠩ ᠲᠠᠶᠢᠯᠣᠭᠰᠠᠨ ᠲᠡᠷᠡ ᠪᠤᠷᠣᠭᠠᠨ ᠳᠤ ᠣᠯᠠᠨ ᠵᠢᠯ ᠰᠣᠬᠤᠷᠠᠭᠰᠠᠨ ᠣᠯᠠᠨ ᠪᠣᠯᠠᠭ ᠲᠠᠬᠢᠵᠤ ᠣᠷᠭᠢᠯᠣᠭᠰᠠᠨ ᠢ ᠦᠷᠯᠦᠭᠡ ᠬᠠᠷᠠᠵᠠᠢ᠃ ᠣᠯᠠᠨ ᠪᠣᠯᠠᠭ ᠣᠨᠳᠣᠷᠴᠦ᠂ ᠬᠦᠳᠡᠭᠡ ᠰᠠᠷᠢᠳᠠᠭ ᠣᠬᠢᠶᠠᠭᠳᠠᠨ ᠦᠨᠳᠡᠭᠡᠨ ᠴᠢᠯᠠᠭᠤ ᠵᠠᠶᠢᠳᠠᠯᠠᠨ ᠵᠢᠯᠠᠭ᠎ᠠ ᠤᠷᠣᠭᠤᠳᠠᠵᠤ ᠬᠤᠯᠠ ᠶᠢᠨ ᠬᠤᠯᠠ ᠨᠠᠷᠢᠨ ᠤᠷᠣᠰᠬᠠᠯ ᠭᠠᠵᠠᠷ ᠡᠮᠵᠢᠶᠠᠷᠢᠯᠠᠨ ᠦᠷᠯᠦᠭᠡ ᠦᠳᠡᠰᠢ ᠶᠢᠨ ᠨᠠᠷᠠᠨ ᠤ ᠲᠤᠶᠠᠭᠠᠨ ᠳᠤ  ᠴᠢᠮᠡᠭᠡ ᠦᠭᠡᠢ  ᠭᠢᠯᠪᠠᠯᠵᠠᠨ ᠭᠢᠯᠠᠷᠠᠨ᠎ᠠ᠃  ᠡᠵᠢ ᠶᠢ ᠪᠤᠳᠣᠭᠳᠠᠭᠤᠯᠣᠮᠠᠷ ᠰᠣᠳᠠᠰᠣᠨ ᠤ ᠬᠦᠨᠳᠡᠢ ᠳᠤ ᠴᠢᠰᠤ ᠤᠷᠤᠰᠣᠨ ᠰᠢᠷᠪᠤᠰᠣᠨ ᠳᠤ ᠬᠠᠩᠭᠢᠷ᠎ᠠ ᠠᠴᠠ ᠬᠦᠴᠦ ᠲᠡᠩᠬᠡᠭᠡ ᠨᠦᠭᠡᠴᠡᠯᠡᠳᠡᠭ ᠠᠮᠢ ᠨᠠᠰᠣᠨ ᠤ ᠴᠢᠳᠬᠤᠯ ᠰᠡᠯᠭᠦᠭᠰᠡᠨ ᠬᠡᠥᠬᠡᠳ ᠨᠠᠰᠣᠨ ᠤ ᠲᠣᠷᠠᠳᠬᠠᠯ ᠢ ᠦᠯᠡᠳᠡᠭᠡᠭᠰᠡᠨ ᠶᠤᠮ᠃ ᠵᠠᠯᠠᠭᠤ ᠶᠠᠪᠤᠭᠰᠠᠨ ᠡᠵᠢ ᠶᠢᠨ ᠲᠡᠷᠡ ᠵᠣᠨ ᠢ ᠳᠠᠭᠤᠯᠠᠮᠠᠷ ᠰᠠᠨᠠᠭᠳᠠᠨ᠎ᠠ᠃ ᠮᠠᠨ ᠤ ᠬᠦᠳᠡᠭᠡ ᠪᠠᠷ ᠲᠤᠵᠢᠨ ᠦᠩᠭᠡ ᠭᠠᠷᠴᠣ ᠬᠤᠪᠢᠷᠠᠵᠤ ᠪᠠᠶᠢᠯ᠎ᠠ᠃ ᠬᠠᠷ᠎ᠠ ᠪᠤᠳ᠋ᠨ ᠶᠠᠭᠠᠨ ᠢᠶᠠᠷ ᠴᠡᠴᠡᠭᠯᠡᠵᠦ ᠭᠤᠣᠯ ᠳᠤ ᠤᠷᠭᠤᠭᠰᠠᠨ ᠬᠠᠶᠢᠯᠠᠰᠣᠨ ᠮᠤᠳᠣ ᠬᠦᠷᠡᠩ ᠬᠠᠷ᠎ᠠ ᠪᠠᠷ ᠱᠣᠣᠭᠢᠨ᠎ᠡ᠃ ᠤᠰᠣᠨ ᠤ ᠰᠢᠪᠠᠭᠤ ᠮᠠᠨ ᠤ ᠬᠢᠨ ᠤ ᠭᠡᠷ ᠤᠨ ᠳᠡᠭᠡᠭᠦᠷ ᠭᠠᠷᠳᠠᠭ ᠪᠣᠯᠪᠠ᠃ ᠵᠠᠳᠠᠭᠠᠢ ᠶᠢᠨ ᠡᠩᠭᠡᠷ ᠲᠤ ᠲᠡᠮᠡᠭᠡ ᠮᠠᠯ ᠬᠤᠷᠠᠵᠤ᠂ ᠴᠡᠴᠡᠭ ᠳᠡᠯᠭᠡᠷᠡᠭᠰᠡᠨ ᠲᠠᠨᠵᠢᠨ ᠲᠡᠭᠡᠷ᠎ᠡ ᠠᠯᠠᠭ ᠡᠷᠪᠡᠬᠡᠢ ᠪᠦᠵᠢᠨ᠂ ᠣᠰᠤᠨ ᠳᠤ ᠵᠡᠭᠡᠷ᠎ᠡ ᠬᠠᠷᠠᠭᠳᠠᠪᠠ᠃ ᠠᠪᠤ ᠶᠢᠨ ᠰᠢᠷ᠎ᠠ ᠠᠳᠠ ᠨᠢᠷᠣᠭᠤ ᠠᠮᠠᠷᠠᠵᠤ ᠂  ᠤᠰᠣᠨ ᠤ ᠵᠡᠰ ᠪᠤᠷᠪᠢ ᠭᠡᠷ ᠤᠨ ᠬᠠᠶᠠᠭᠠᠨ ᠳᠤ ᠭᠡᠷᠡᠯ ᠠᠰᠬᠠᠨ᠎ᠠ ᠃ᠠᠪᠤ ᠡᠵᠢ ᠭᠠᠳᠠᠭᠤᠷ ᠶᠠᠪᠤᠵᠣ ᠢᠷᠡᠭᠡᠳ ᠬᠦᠷᠡᠩ ᠢᠩᠭᠡ ᠶᠢ ᠪᠤᠳᠣᠭᠤ ᠶᠢ ᠨᠢ ᠠᠪᠤᠭᠤᠯᠬᠤ ᠭᠡᠵᠣ ᠭᠡᠷ ᠠᠴᠠ ᠶᠠᠭᠤᠮ᠎ᠠ  ᠵᠥᠭᠡᠭᠡᠭᠡᠳ ᠭᠠᠷᠪᠠ᠃ ᠠᠪᠤ ᠬᠤᠭᠤᠷ ᠲᠠᠲᠠᠵᠤ᠂ ᠡᠵᠢ ᠬᠦᠦᠰᠯᠡᠬᠦ ᠳᠤ ᠢᠩᠭᠡ ᠪᠠᠨ ᠳᠠᠭᠠᠵᠤ ᠨᠢᠯᠪᠤᠰᠣᠷᠠᠭᠰᠠᠨ ᠶᠤᠮ᠃  ᠬᠤᠭᠤᠷ ᠤᠨ ᠠᠶᠠᠯᠭᠤ ᠲᠠᠢ ᠨᠠᠷᠢᠨ ᠭᠤᠣᠯ ᠤᠨ ᠤᠰᠣ ᠲᠤᠷᠭᠠᠰᠢᠨ ᠮᠡᠯᠮᠡᠯᠵᠡᠬᠦ ᠮᠡᠳᠥ ᠭᠤᠪᠢ ᠶᠢᠨ ᠡᠯᠢᠭᠡᠨ ᠠᠴᠠ ᠠᠷᠭᠠᠯ ᠤᠨ ᠤᠲᠤᠭ᠎ᠠ ᠲᠠᠢ ᠤᠶᠠᠩᠭᠠᠷᠠᠨ ᠬᠤᠯᠠᠳᠠᠨ᠎ᠠ᠃ ᠲᠡᠷᠭᠡᠳᠡ ᠨᠢ ᠪᠢ ᠡᠯᠡᠰᠣᠨ ᠳᠡᠭᠡᠷ᠎ᠡ ᠤᠷᠭᠤᠭᠰᠠᠨ ᠨᠢᠯᠬ᠎ᠠ ᠴᠣᠯᠢᠬᠢᠷ ᠤᠨ ᠨᠡᠷᠢᠨ ᠤᠷᠲᠦ ᠦᠨᠳᠦᠰᠦ  ᠭᠤᠷᠢᠶᠠᠯᠠᠨ ᠴᠠᠭᠠᠷᠢᠭ ᠲᠠᠲᠠᠭᠰᠠᠨ ᠢ ᠭᠠᠶᠢᠬᠠᠨ ᠬᠠᠷᠠᠵᠤ ︽ᠡᠵᠢ ᠨᠠᠮ᠎ᠠ ᠶᠢ ᠭᠤᠯᠣᠬᠤ ᠦᠭᠡᠢ ᠪᠢᠵᠡ︾ ᠭᠡᠵᠣ ᠪᠢᠳᠡᠭᠦᠬᠡᠨ ᠰᠠᠨᠠᠪᠠ᠃ ᠬᠦᠮᠦᠨᠰᠢᠨ᠎ᠡ ᠭᠡᠭᠴᠢ ᠮᠢᠨᠦ ᠬᠡᠥᠬᠡᠳ ᠨᠠᠰᠤ ᠨᠠᠷᠢᠨ ᠭᠤᠣᠯ ᠰᠢᠭ᠋ ᠤᠷᠣᠰᠣᠨ ᠣᠳᠪᠠ᠃  ᠪᠢ ᠭᠤᠪᠢ ᠠᠴᠠ ᠨᠢᠯᠪᠤᠰᠣ ᠲᠠᠢ ᠠᠶᠠᠷᠯᠠᠪᠠ᠃  ᠦᠨᠡᠨ ᠳᠤ ᠪᠠᠨ ᠡᠵᠢ ᠳᠤ ᠪᠠᠨ ᠬᠤᠷᠭᠤᠳᠠᠭᠰᠠᠨ ᠶᠤᠮ᠃ ᠭᠤᠪᠢ ᠠᠴᠠ ᠪᠠᠨ ᠰᠠᠯᠵᠤ ᠶᠠᠪᠤᠳᠠᠭ ᠡᠳᠦᠷ ᠠᠪᠤ ᠶᠢᠨ ᠢᠶᠠᠨ ᠠᠲᠣᠷᠢᠶ᠎ᠠ ᠰᠠᠭᠤᠭᠰᠠᠨ ᠴᠢᠷᠠᠢ ᠶᠢ ᠡᠭᠴᠡ ᠬᠠᠷᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠡᠵᠢ ᠡᠯᠢᠭᠡᠨ ᠳᠤ ᠪᠠᠨ ᠨᠠᠮ᠎ᠠ ᠶᠢ ᠬᠡᠥᠬᠡᠳ ᠪᠠᠶᠢᠬᠤ ᠳᠤ ᠲᠡᠪᠡᠷᠢᠳᠡᠭ ᠰᠢᠭ ᠨᠠᠭᠠᠭᠠᠳ ᠨᠢᠯᠪᠤᠰᠣ ᠨᠢ ᠮᠢᠨᠦ ᠬᠠᠴᠠᠷ ᠳᠡᠭᠡᠷ᠎ᠡ ᠲᠡᠷᠡ ᠵᠢᠯ ᠤᠨ ᠪᠤᠷᠤᠭ᠎ᠠ ᠤᠷᠣᠳᠠᠭ ᠰᠢᠭ᠋ ᠫᠦᠷᠲᠡᠬᠢᠨ ᠣᠨᠠᠪᠠ᠃ ᠮᠢᠨᠦ ᠰᠠᠯᠵᠤ ᠶᠠᠳᠠᠭᠰᠠᠨ ᠰᠡᠳᠬᠢᠯ ᠢ ᠰᠠᠮᠨᠠᠭᠰᠠᠨ ᠨᠢᠯᠪᠤᠰᠤ ᠨᠠᠷᠢᠨ ᠭᠤᠣᠯ ᠤᠨ ᠤᠷᠣᠰᠬᠠᠯ ᠰᠢᠭ᠋ ᠡᠩᠭᠡᠷ  ᠲᠤ ᠰᠢᠩᠭᠡᠵᠤ ᠪᠠᠶᠢᠪᠠ᠃ ᠬᠦᠳᠡᠭᠡ ᠭᠤᠪᠢ ᠳᠤ ᠮᠢᠨᠦ ᠤᠨᠠᠭᠠᠨ ᠨᠠᠰᠦ ᠨᠠᠷᠢᠨ ᠭᠤᠣᠯ ᠤᠨ ᠲᠠᠰᠤᠷᠬᠠᠢ ᠤᠷᠣᠰᠬᠠᠯ ᠰᠢᠭ᠋ ᠭᠭᠢᠷ ᠦᠭᠡᠢ ᠦᠰᠴᠦ ᠰᠡᠳᠭᠢᠯ ᠢᠶᠠᠷ ᠲᠣᠷᠨᠢᠭᠰᠠᠨ᠃ᠪᠢ ᠰᠣᠷᠭᠠᠭᠤᠯᠢ ᠳᠤ ᠣᠷᠣᠭᠰᠠᠨ ᠵᠢᠯ ᠬᠠᠲᠤᠨ ᠭᠤᠣᠯ ᠤᠨ ᠬᠦᠪᠡᠭᠡᠨ ᠳᠤ ᠬᠦᠷᠪᠡ᠃ ᠬᠠᠲᠤᠨ ᠭᠤᠣᠯ  ᠠᠵᠢᠨᠠᠢ ᠬᠦᠯᠦᠭ ᠴᠣᠷᠣᠶᠢᠨ ᠪᠤᠰᠬᠤ ᠮᠡᠳᠥ  ᠬᠦᠷᠬᠢᠷᠡᠨ ᠳᠠᠪᠠᠯᠭᠠᠯᠠᠨ᠎ᠠ᠃ ᠲᠡᠷᠡ ᠮᠢᠨᠦ ᠵᠠᠯᠠᠭᠤ ᠨᠠᠰᠣᠨ ᠤ ᠬᠦᠴᠦ ᠵᠣᠷᠢᠭ ᠢ ᠠᠷᠭᠠᠮᠵᠢᠪᠠ᠃ ᠠᠪᠤ ᠡᠵᠢ ᠬᠠᠮᠢᠭ᠎ᠠ ᠴᠦ ᠶᠠᠪᠤᠭᠰᠠᠨ ᠦᠭᠡᠢ᠃ ᠨᠠᠰᠣᠨ ᠲᠤᠷᠰᠢᠲᠠ ᠭᠤᠪᠢ ᠶᠢᠨ ᠬᠦᠳᠡᠭᠡ ᠨᠠᠷᠢᠨ ᠭᠤᠣᠯ ᠳᠤ ᠪᠠᠨ ᠡᠯᠡᠭᠡᠭᠰᠡᠨ, ᠶᠤᠮ ᠰᠠᠨ᠃ ᠠᠪᠤ ᠪᠤᠷᠬᠠᠯᠠᠭᠰᠠᠨ ᠠᠴᠠ ᠬᠤᠶᠢᠰᠢ ᠡᠵᠢ ᠭᠤᠪᠢ ᠳᠤ ᠪᠠᠨ ᠰᠠᠭᠠᠯᠢ ᠶᠢᠨ ᠬᠤᠶᠠᠷ ᠢᠩᠭᠡ ᠲᠠᠢ ᠪᠠᠨ ᠨᠠᠮ᠎ᠠ ᠶᠢ ᠬᠦᠯᠢᠶᠡᠳᠡᠭ  ᠪᠠᠶᠢᠪᠠ᠃  ᠡᠵᠢ ᠡ︕ ᠰᠦᠨᠢ ᠨᠢ ᠪᠢ ᠶᠢᠰᠦᠨ ᠡᠷᠳᠡᠨᠢ ᠶᠢᠨ ᠰᠢᠭᠢᠳᠭᠡᠭᠡ ᠲᠠᠢ ᠳᠠᠯᠯᠠᠭ᠎ᠠ ᠶᠢᠨ ᠤᠭᠤᠲᠠ ᠠᠴᠠ ᠷᠠᠰᠢᠶᠠᠨ ᠬᠤᠷᠢᠶᠠᠵᠤ ᠪᠠᠶᠢᠨ᠎ᠠ ᠭᠡᠵᠣ ᠵᠡᠭᠦᠳᠦᠯᠡᠭᠡᠳ ᠰᠡᠷᠢᠪᠠ᠃ ᠡᠵᠢ ᠡ︕ ᠲᠠ ᠶᠠᠭᠠᠬᠢᠭᠰᠠᠨ ᠶᠠᠭᠠᠷᠠᠣ ᠠᠶᠠᠷᠯᠠᠪᠠ︖ ᠪᠢ ᠨᠠᠷᠢᠨ ᠭᠤᠣᠯ ᠳᠤ ᠪᠠᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠰᠢᠦ︕  ᠨᠠᠮ᠎ᠠ ᠶᠢ ᠲᠡᠷᠭᠡᠳᠡ ᠴᠢᠨᠢ ᠪᠠᠶᠢᠭ᠎ᠠ ᠬᠤᠭᠤᠷᠣᠨᠳᠦ ᠬᠤᠷᠸ᠎ᠠ ᠶᠢᠨ ᠬᠠᠮᠤᠭ ᠨᠠᠮ ᠵᠢᠮ  ᠦᠦᠷ ᠢᠶᠠᠷ ᠪᠤᠷᠬᠠᠨ ᠲᠠᠨ ᠢ ᠵᠠᠯᠠᠭᠠᠳ ᠶᠠᠪᠤᠭᠰᠠᠨ ᠦᠦ︕ ᠲᠠᠨ ᠤ ᠬᠠᠶᠢᠷ᠎ᠠ ᠳᠤ ᠳᠡᠪᠲᠦᠭᠰᠡᠨ ᠠᠮᠢᠨ ᠤ ᠴᠢᠨᠢ ᠲᠠᠰᠣᠷᠬᠠᠢ ᠪᠢᠳᠠ ᠬᠡᠳᠤ ᠢᠩᠭᠡᠭᠡᠳ ᠬᠠᠭᠠᠴᠠᠬᠤ ᠭᠡᠵᠤ ᠦᠶᠡᠯᠡᠨ ᠤᠷᠣᠰᠬᠤ ᠨᠢᠯᠪᠤᠰᠤ ᠡᠵᠢ ᠶᠢᠨ ᠠᠷᠤ ᠠᠴᠠ ᠡᠩᠭᠡᠷ ᠤᠨ ᠵᠠᠩᠭᠢᠶ᠎ᠠ ᠲᠠᠢ ᠮᠦᠩᠭᠦᠨ ᠲᠤᠪᠴᠢ ᠭᠠᠩᠰᠠᠷᠠᠨ ᠬᠠᠶᠢᠯᠣᠭᠰᠠᠨ ᠶᠤᠮ᠃ ᠲᠠᠨ ᠤ ᠠᠷᠢᠭᠤᠨ ᠴᠣᠭᠴᠠᠰ ᠬᠦᠳᠡᠭᠡ ᠬᠤᠨᠣᠭᠰᠠᠨ ᠰᠠᠷᠠ ᠶᠢ ᠠᠷᠭᠠᠮᠵᠢᠶᠠᠯᠠᠵᠤ᠂ ᠴᠣᠬᠢᠶ᠎ᠠ ᠶᠢᠨ ᠤᠷᠣᠢ ᠳᠠᠷᠣᠭᠰᠠᠨ ᠬᠠᠨ ᠬᠠᠶᠢᠷᠬᠠᠨ ᠪᠦᠬᠦᠶᠢᠨ ᠨᠠᠮᠠᠨᠴᠢᠯᠠᠵᠤ᠂ ᠤᠢ ᠲᠠᠶᠢᠭ᠎ᠠ᠂ ᠬᠦᠳᠡᠭᠡ ᠲᠠᠯ᠎ᠠ᠂ ᠬᠠᠭᠤᠴᠢ ᠪᠠᠭᠤᠷᠠᠢ᠂ ᠬᠤᠳᠳᠤᠭ ᠤᠨ ᠡᠩᠭᠡᠷ ᠁ ᠲᠡᠨ ᠤ ᠬᠢᠰᠬᠢᠵᠤ ᠶᠠᠪᠤᠭᠰᠠᠨ ᠰᠦᠨ ᠴᠠᠭᠠᠨ ᠮᠦᠷ ᠢᠶᠠᠷ ᠴᠠᠰᠤ ᠬᠠᠶᠠᠯᠠᠨ ᠭᠠᠵᠠᠷ ᠲᠡᠯᠡᠬᠡᠢ ᠭᠠᠰᠢᠭᠤᠳᠠᠯ ᠨᠦᠮᠦᠷᠯᠡᠵᠡᠢ᠃            ᠭᠤᠷᠪᠠ   ︽ᠡᠵᠢ ᠡ︕︾ ᠭᠡᠵᠣ ᠲᠡᠨ ᠢ ᠪᠠᠨ ᠳᠠᠭᠤᠳᠠᠬᠤ ᠳᠤ ᠨᠠᠷᠠ ᠰᠢᠭ᠋ ᠬᠠᠷᠠᠭᠳᠠᠳᠠᠭ᠂ ᠰᠠᠷᠠ ᠰᠢᠭ᠋ ᠢᠨᠢᠶᠡᠳᠡᠭ ᠪᠠᠶᠢᠯ᠎ᠠ᠃   ᠡᠵᠢ ᠪᠠᠨ  ᠦᠭᠡᠶᠢᠯᠡᠳᠡᠭ ᠴᠠᠭ  ᠲᠠᠩᠴᠦ ᠡᠷᠲᠡ ᠢᠷᠡᠭᠰᠡᠨ ᠪᠠᠶᠢᠵᠠᠢ᠃ ᠠᠯᠠᠭ ᠳᠡᠯᠡᠭᠡᠢ ᠶᠢᠨ ᠬᠦᠢᠲᠡᠨ ᠬᠦᠷᠦᠰᠣᠨ ᠳᠤ ᠠᠩᠬ᠎ᠠ ᠬᠥᠯ ᠲᠡᠯᠪᠢᠬᠤ ᠳᠤ ᠠᠩᠭᠢᠷ ᠤᠭᠤᠷᠠᠭ ᠢᠶᠠᠷ ᠢᠶᠠᠨ ᠲᠡᠵᠢᠭᠡᠯ ᠤᠨ ᠲᠡᠭᠡᠵᠢ ᠰᠠᠬᠠᠷᠠᠭᠤᠯᠣᠨ ᠨᠠᠮ᠎ᠠ ᠶᠢ ᠲᠤᠷᠨᠢᠭᠤᠯᠣᠭᠰᠠᠨ᠃ ᠬᠤᠨ ᠰᠢᠪᠠᠭᠤᠨ ᠤ ᠰᠡᠭᠦᠳᠡᠷ ᠲᠤ ᠬᠥᠯ ᠢᠶᠠᠨ ᠬᠦᠷᠦᠭᠡᠴᠢᠭᠡᠭᠡᠳ ᠲᠠᠨ ᠤ ᠡᠪᠦᠷ ᠲᠤ ᠲᠤᠯᠠᠭᠠᠴᠠᠵᠤ ᠦᠨᠳᠡᠶᠢᠭᠰᠡᠨ᠃ ᠠᠪᠤ ᠶᠢᠨ ᠰᠦᠷᠦᠭ ᠠᠴᠠ ᠪᠤᠴᠠᠵᠤ ᠳᠠᠪᠬᠢᠭᠠᠳ ᠲᠠᠨ ᠤ ᠴᠢᠨᠠᠭᠰᠠᠨ ᠴᠠᠢ ᠪᠠᠷ ᠭᠤᠣᠯ ᠢᠶᠠᠨ ᠨᠤᠷᠭᠠᠳᠠᠭ ᠪᠠᠶᠢᠪᠠ᠃ ᠠᠷᠪᠠᠨ ᠵᠢᠯ ᠤᠨ ᠰᠣᠷᠭᠠᠭᠤᠯᠢ ᠳᠤ ᠤᠷᠣᠭᠠᠳ ᠠᠩᠬᠠᠨ ᠤ ᠵᠢᠯ ᠡᠵᠢ ᠪᠠᠨ  ᠰᠠᠨᠠᠭᠠᠳ ᠶᠠᠭᠤ ᠶᠢ ᠴᠦ ᠬᠦᠰᠡᠬᠦ ᠦᠭᠡᠢ ᠬᠠᠷᠢᠶ᠎ᠠ ᠯᠠ ᠭᠡᠵᠤ  ᠪᠤᠳᠣᠳᠠᠭ ᠪᠠᠶᠢᠪᠠ᠃ ᠡᠵᠢ ᠪᠠᠨ ᠰᠠᠨᠠᠳᠠᠭ ᠬᠦᠦ ᠰᠢᠯᠭᠠᠯᠲᠠ ᠳᠤ ᠪᠠᠨ ᠮᠠᠭᠤ ᠳ᠋ᠦᠩ ᠠᠪᠴᠢᠭᠠᠳ ᠪᠠᠭᠰᠢ ᠲᠠᠨ ᠢ ᠲᠠᠭᠤᠳᠠᠵᠢ ᠪᠢᠯᠡ︕ ᠲᠠᠨ ᠢ ᠪᠠᠨ ᠬᠠᠷᠠᠭᠠᠳ ᠪᠠᠶᠠᠷᠯᠠᠳᠠᠭ ᠮᠡᠭᠡ ᠶᠢ ᠪᠠᠭᠰᠢ ᠮᠡᠳᠡᠭᠡᠳ ᠡᠵᠢ ᠪᠠᠨ ᠰᠠᠨᠠᠭᠰᠠᠨ ᠬᠦᠦ ᠢ ᠪᠤᠷᠣᠭᠤᠰᠢᠶᠠᠭᠰᠠᠨ ᠦᠭᠡᠢ ᠰᠠᠨ᠃ ᠠᠯᠠᠭ ᠦᠷ᠎ᠡ ᠴᠢᠨᠢ ᠪᠢᠳᠡ ᠣᠯᠠᠭᠤᠯᠠ ᠪᠠᠨ ᠬᠤᠩᠰᠢᠶᠠᠷ ᠥᠭᠬᠦ ᠭᠡᠵᠣ ᠡᠵᠢ ᠶᠢᠨ ᠬᠤᠷᠮᠣᠢ ᠠᠴᠠ ᠵᠡᠭᠦᠭᠳᠡᠵᠦ᠂ ᠠᠯᠳᠠᠨ ᠲᠡᠯᠡᠬᠡᠢ ᠳᠤ ᠪᠠᠭᠲᠠᠵᠣ ᠶᠠᠳᠠᠨ ᠬᠠᠶᠢᠷ᠎ᠠ ᠪᠣᠯᠢᠶᠡᠯᠴᠠᠳᠠᠭ ᠬᠤᠶᠢᠨ᠎ᠠ ᠠᠪᠤ ᠶᠢᠨ ᠠᠯᠠᠭ ᠨᠢᠳᠦ ᠨᠢ ᠬᠠᠶᠢᠯᠣᠭᠰᠠᠨ ᠲᠤᠭᠤᠯᠭ᠎ᠠ ᠰᠢᠭ᠋ ᠡᠷᠭᠢᠯᠳᠦᠭᠡᠳ ᠬᠤᠭᠤᠯᠠᠢ ᠵᠠᠰᠠᠳᠠᠭ ᠪᠠᠶᠢᠪᠠ᠃ ᠠᠯᠠᠭᠠᠨ ᠳᠡᠭᠡᠷᠡᠬᠢ ᠰᠢᠬᠢᠷ ᠢᠶᠠᠨ ᠲᠤᠭᠠᠯᠠᠭᠠᠳ ᠠᠷᠠᠭ ᠡᠭᠦᠷᠴᠦ ᠠᠷᠭᠠᠯ ᠲᠡᠭᠦᠳᠡᠭ ᠡᠵᠢ ᠶᠢ ᠪᠠᠨ ᠶᠠᠳᠠᠷᠠᠵᠣ ᠶᠠᠪᠤᠭ᠎ᠠ ᠶᠢ ᠲᠤᠭᠠᠯᠠᠳᠠᠭ ᠦᠭᠡᠢ ᠪᠠᠶᠢᠵᠤ ᠯᠠ ᠳ᠋ᠠ᠃ ᠠᠪᠤ ᠦᠷᠦᠪᠴᠢᠯᠡᠳᠡᠭ ᠪᠠᠶᠢᠭᠰᠠᠨ ᠪᠠᠶᠢᠬ᠎ᠠ ᠳ᠋ᠠ᠃ ᠠᠭᠠᠷᠤᠤᠯ ᠡᠭᠡᠵᠡᠭᠡᠢ ᠠᠮᠠᠨ ᠳᠤ ᠪᠠᠨ ᠬᠦᠯᠬᠦᠬᠦ ᠳᠤ  ᠪᠠᠨ ᠡᠵᠢ ᠶᠢ ᠪᠠᠨ ᠵᠠᠯᠠᠭᠤ ᠪᠠᠶᠢᠨ᠎ᠠ ᠭᠡᠵᠣ ᠬᠦᠯᠦᠰᠦᠨ  ᠳᠤ ᠪᠠᠨ ᠳᠡᠪᠲᠦᠵᠦ ᠶᠠᠪᠤᠬᠤ ᠳᠤ ᠨᠢ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠤᠰᠣᠨ ᠲᠡᠨᠡᠭ ᠮᠢᠨᠦ ᠲᠤᠷᠠᠳᠬᠠᠯ  ᠳᠤ ᠠᠪᠤ  ᠨᠠᠰᠣᠨ ᠤ ᠬᠠᠨᠢ ᠪᠤᠯᠵᠣ ᠡᠵᠢ ᠶᠢᠨ ᠰᠡᠳᠭᠢᠯ ᠢ ᠵᠠᠰᠠᠳᠠᠭ ᠪᠠᠶᠢᠪᠠ ︕   ᠢᠰᠡᠭᠡᠢ ᠰᠣᠨᠵᠤ ᠡᠷ᠎ᠡ ᠦᠰᠴᠡᠢ᠃ ᠠᠯᠣᠰ ᠤᠨ ᠠᠯᠣᠰ ᠲᠤ ᠪᠠᠨ ᠬᠦᠦ ᠴᠢᠨᠢ ᠪᠢᠳᠠ ᠡᠬᠡ ᠤᠷᠣᠨ ᠢᠶᠠᠨ ᠭᠡᠳ ᠡᠵᠢ ᠠᠴᠠ ᠪᠠᠨ ᠲᠠᠩᠲᠠ ᠬᠤᠯᠠᠳᠠᠭᠠᠳ ᠶᠠᠪᠤᠭᠰᠠᠨ ᠡ︕ ᠦᠷᠥ ᠵᠢᠷᠦᠬᠡ ᠤᠷᠤᠭᠤ ᠪᠠᠨ ᠬᠡᠬᠦᠯᠡᠷ ᠠᠵᠢᠨ ᠲᠤᠵᠢᠨ ᠰᠦᠨᠢ ᠶᠢᠨ ᠤᠷᠲᠤ ᠳᠤ ᠰᠠᠬᠢᠯᠭ᠎ᠠ ᠦᠭᠡᠢ ᠬᠤᠭᠤᠰᠤᠨ ᠲᠡᠷᠪᠡᠳᠡᠭ ᠦᠷ᠎ᠡ ᠪᠠᠨ ᠢᠷᠡᠭᠦᠯᠡᠷ ︽ᠶᠠᠳᠠᠷᠠᠭᠰᠠᠨ ᠪᠠᠶᠢᠯ ᠦᠬᠡᠢ᠂ ᠤᠨᠳᠠᠭ︾ ᠭᠡᠳ ᠲᠡᠪᠥᠷ᠎ᠡ ᠲᠠᠢ ᠴᠠᠢ ᠪᠠᠨ ᠴᠣᠭᠰᠢᠭᠤᠯᠵᠤ ᠨᠠᠷᠠ ᠦᠳᠡᠯᠡᠳᠡᠭ ᠪᠠᠶᠢᠪᠠ᠃ ᠮᠠᠭᠤ ᠵᠡᠭᠦᠳᠦ ᠵᠡᠭᠦᠳᠦᠯᠡᠭᠡᠳ ᠰᠠᠨᠠᠭ᠎ᠠ ᠠᠯᠳᠠᠬᠤ ᠳᠤ ᠲᠠᠶᠢᠪᠤᠩ ᠪᠠᠢ ᠭᠡᠵᠣ ᠲᠡᠷᠭᠡᠳᠡ ᠰᠠᠬᠢᠵᠣ ᠯᠠ ᠪᠠᠶᠢᠳᠠᠭ᠃ ᠬᠦᠢᠲᠡᠨ ᠴᠡᠪᠳᠡᠭ ᠂ ᠬᠤᠷᠣᠨ ᠦᠭᠡ ᠠᠭᠰᠠᠳᠠᠭ ᠬᠠᠬᠢᠷ ᠬᠥᠯᠲᠡᠨ ᠤ ᠲᠤᠮᠳᠡ ᠦᠷᠦᠪᠴᠢᠯᠡᠮᠡᠷ ᠭᠤᠨᠭ᠍ᠰᠤᠶᠢᠬᠤ ᠳᠤ ︽ᠵᠠ︕ ᠶᠠᠭᠠᠬᠢᠳᠠᠭ ᠶᠤᠮ᠂ ᠡᠷ᠎ᠡ ᠬᠦᠮᠦᠨ ᠤ ᠭᠤᠷᠪᠠᠨ ᠲᠠᠪᠠᠭ᠎ᠠ ᠶᠢ ᠲᠤᠭᠤᠯᠵᠣ ᠦᠵᠡ︾ ᠭᠡᠳᠡᠭ᠃ ᠦᠷ᠎ᠡ ᠴᠢᠨᠢ ᠪᠢᠳᠠ ᠬᠠᠲᠠᠭᠤᠵᠢᠵᠤ ᠦᠨᠳᠡᠶᠢᠬᠦ ᠳᠤ ᠨᠢᠯᠪᠤᠰᠣ ᠪᠠᠷ ᠴᠢᠯᠠᠭᠤᠵᠢᠵᠤ᠂ ᠴᠢᠠᠳᠠᠭ᠎ᠠ ᠳᠠᠪᠲᠠᠭᠰᠠᠨ ᠬᠠᠲᠠᠭᠤ ᠠᠮᠢᠳᠣᠷᠠᠯ ᠢ ᠠᠵᠢᠭ ᠦᠭᠡᠢ ᠲᠤᠭᠤᠯᠣᠭᠰᠠᠨ ᠶᠤᠮ ᠳ᠋ᠠᠭ᠃  ᠬᠦᠮᠦᠨ ᠠᠮᠢᠲᠠᠨ ᠳᠤ ᠦᠷ᠎ᠡ ᠶᠢᠨ ᠵᠠᠶᠠᠭ᠎ᠠ ᠣᠯᠠᠨ ᠵᠠᠭᠤ ᠶᠢᠨ ᠪᠣᠯᠣᠮᠵᠢ ᠪᠠᠶᠢᠬᠤ ᠳᠤ ᠮᠢᠩᠭᠠᠨ ᠤ ᠲᠠᠪᠢᠯᠠᠩ ᠳᠤ ᠡᠵᠢ ᠶᠢᠨ ᠢᠷᠦᠭᠡᠯ ᠭᠠᠭᠴᠠ ᠪᠠᠶᠢᠳᠠᠭ ᠢ ᠰᠠᠨᠠᠬᠤ ᠦᠭᠡᠢ ᠲᠡᠷᠪᠡᠵᠡᠢ᠃ ᠨᠦᠮᠵᠦᠭᠬᠡᠨ ᠬᠠᠶᠢᠷᠠᠨ ᠳᠤ ᠪᠠᠨ ᠬᠠᠲᠠᠭᠤ ᠵᠦᠭᠡᠯᠡᠨ ᠭᠤᠣᠯ ᠬᠠᠷᠠᠯᠠᠮᠠᠷ ᠥᠬᠦᠭᠡᠷᠳᠡᠵᠦ ᠴᠠᠴᠠᠮᠠᠷ ᠭᠠᠰᠢᠭᠤᠨ ᠤᠰᠤ ᠶᠢ ᠲᠠ ᠭᠠᠭᠴᠠᠭᠠᠷ ᠡᠭᠦᠷᠴᠦ ᠶᠠᠪᠤᠭᠰᠠᠨ᠃ ᠲᠨ ᠬᠠᠨᠢ ᠢᠵᠢᠯᠢ ᠠᠴᠠ ᠪᠠᠨ ᠣᠭᠤᠰᠣᠷ ᠲᠠᠰᠣᠷᠠᠭᠰᠠᠨ ᠬᠤᠷᠸ᠎ᠠ ᠶᠢᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠳᠤ  ᠣᠶᠢᠭ᠎ᠠ ᠦᠭᠡᠢ ᠵᠢᠳᠬᠦᠵᠦ ︽ᠮᠢᠨᠦ ᠬᠦᠦ ᠰᠠᠨᠠᠭ᠎ᠠ ᠠᠮᠤᠷ︕ ᠡᠵᠢ ᠨᠢ ᠰᠠᠶᠢᠨ ᠪᠠᠶᠢᠨ᠎ᠠ︾ ᠭᠡᠳᠡᠭ ᠪᠠᠶᠢᠯ᠎ᠠ᠃ ᠭᠠᠪᠢᠶ᠎ᠠ ᠲᠡᠮᠳᠡᠭᠯᠡᠵᠦ᠂ ᠠᠵᠠ ᠵᠢᠷᠭᠠᠯ ᠲᠤᠬᠢᠶᠠᠬᠤ ᠬᠤᠪᠤᠷᠬᠠᠨ ᠮᠦᠴᠡ ᠳᠤ ᠲᠠ ᠠᠷᠣ ᠳᠤᠨᠢ ᠵᠤᠭᠰᠣᠭᠠᠳ ᠮᠦᠰᠢᠶᠡᠵᠦ ᠪᠠᠶᠢᠪᠠ ᠃ ᠡᠵᠢ ᠡ︕ ᠬᠡᠥᠬᠡᠰ ᠴᠢᠨᠢ ᠶᠠᠮᠠᠷᠬᠠᠨ ᠠᠮᠢᠨᠴᠢᠷ ᠬᠤᠬᠢᠷ ᠪᠠᠶᠢᠪᠠ ᠡ︖    ᠡᠬᠡ ᠶᠢᠨ ᠰᠦ ᠶᠢᠨ ᠬᠠᠷᠢᠭᠤ ᠳᠤ ᠣᠬᠠᠭᠠᠨ ᠴᠣᠭᠤᠷᠠᠵᠠᠢ︕                           ᠲᠦᠷᠪᠠᠨᠠᠷᠠ ᠪᠠᠨ ᠬᠠᠷᠠᠭᠠᠳ ᠡᠵᠢ ᠪᠠᠨ ᠳᠣᠷᠠᠰᠳᠠᠭ᠂ ᠰᠠᠷᠠ ᠪᠠᠨ ᠮᠠᠨᠠᠭᠠᠳ ᠡᠵᠢ  ᠪᠠᠨ ᠵᠡᠭᠦᠳᠦᠯᠡᠳᠡᠭ ᠴᠠᠭ ᠠᠷᠠᠢ ᠡᠷᠲᠡ ᠢᠷᠡᠭᠰᠡᠨ ᠶᠤᠮ᠃ ᠡᠵᠢ ᠮᠢᠨᠢ ᠬᠤᠶᠠᠷ ᠦᠵᠦᠭᠦᠷ ᠤᠨ ᠨᠡᠷᠡᠨ ᠢᠶᠠᠷ ᠡᠷᠲᠡᠯᠡᠵᠤ ᠤᠷᠣᠶᠢᠯᠠᠵᠤ ᠬᠦᠯᠦᠰᠦ ᠪᠠᠨ ᠬᠠᠲᠠᠭᠠᠵᠤ ᠶᠠᠪᠤᠭᠰᠠᠨ ᠨᠢᠭᠡ ᠨᠠᠰᠤ ᠶᠤᠮ᠃ ᠲᠠᠨ ᠤ ᠨᠠᠰᠣᠨ ᠲᠣᠷᠰᠢᠬᠢ ᠵᠤᠪᠠᠵᠣ ᠵᠦᠳᠡᠷᠡᠭᠰᠡᠨ ᠢ ᠰᠠᠨᠠᠬᠤ ᠪᠦᠷᠢ ᠡᠯᠢᠭᠡ ᠬᠠᠭᠠᠰᠷᠠᠵᠤ᠂ ᠰᠢᠷᠪᠣᠰᠤ ᠴᠢᠩᠭᠠᠷᠠᠳᠠᠭ ᠶᠤᠮ᠃ ᠡᠬᠡ ᠤᠷᠣᠨ ᠲᠠᠢ ᠪᠠᠨ ᠲᠠᠨ ᠤ ᠲᠡᠯᠭᠡᠷ ᠦᠷᠦᠰᠢᠶᠡᠩᠭᠦᠢ ᠬᠠᠶᠢᠷ᠎ᠠ ᠶᠢ ᠨᠡᠬᠡᠨ ᠰᠠᠨᠠᠬᠤ ᠳᠤ ᠲᠤᠭ᠎ᠠ ᠪᠦᠷᠢᠨ ᠲᠤᠯᠣᠭᠠᠢ ᠮᠡᠨᠳᠦ ᠦᠷ᠎ᠡ ᠴᠢᠨᠢ ᠪᠢᠳᠡ ᠡᠵᠢ ᠶᠢ ᠪᠠᠨ ᠭᠤᠮᠣᠳᠠᠭᠠᠭᠰᠠᠨ ᠶᠤᠮ ᠦᠦ ᠭᠡᠵᠣ ᠪᠤᠳᠣᠳᠠᠭ ᠪᠣᠯᠵᠠᠢ ᠁ ᠣᠰᠤᠨ ᠲᠡᠨᠡᠭ ᠨᠠᠰᠣᠨ ᠤ ᠬᠤᠷᠣᠮ ᠲᠡᠷᠡ ᠬᠦ ᠦᠷᠥ ᠵᠢᠷᠦᠬᠡ ᠮᠢᠨᠢ ᠲᠠᠰᠣᠷᠠᠮᠠᠷ ᠣᠨ ᠵᠢᠯ ᠤᠳ ᠲᠤ  ᠪᠢᠳᠠ ᠵᠦᠩᠳᠡᠭᠡᠨ ᠡᠬᠡ ᠤᠷᠣᠨ ᠲᠠᠢ ᠪᠠᠨ ᠵᠤᠪᠠᠵᠤ ᠶᠠᠪᠤᠬᠤ ᠳᠤ ᠡᠵᠢ ᠳᠤ ᠪᠠᠨ ᠭᠤᠮᠣᠳᠠᠵᠣ ᠬᠠᠷᠠᠮᠰᠠᠯ ᠦᠯᠡᠳᠡᠭᠡᠭᠰᠡᠨ  ᠴᠢᠭ ᠦᠭᠡᠢ ᠰᠠᠨ᠃ ᠠᠳᠠᠯᠢᠬᠠᠨ ᠦᠷ᠎ᠡ ᠪᠠᠨ ᠭᠡᠳ ᠮᠢᠨᠦ ᠡᠵᠢ ᠳᠠᠪᠬᠤᠷ ᠵᠤᠪᠠᠵᠤ ᠶᠠᠪᠤᠭᠰᠠᠨ᠃ ᠠᠶᠠᠨ ᠤ ᠠᠷᠭᠠᠮᠵᠢᠶ᠎ᠠ ᠶᠢᠨ ᠬᠤᠶᠠᠷ ᠦᠵᠦᠭᠦᠷ ᠢ ᠬᠤᠯᠪᠤᠭᠰᠠᠨ ᠵᠢᠷᠦᠬᠡᠨ ᠤ ᠤᠭᠤᠰᠣᠷ ᠲᠤ ᠪᠠᠨ ᠡᠵᠢ ᠬᠦᠮᠦᠨ ᠶᠡᠭᠡ ᠵᠤᠪᠠᠵᠤ᠂ ᠵᠦᠪ ᠬᠠᠷᠠᠵᠤ ᠢᠨᠢᠶᠡᠭᠡᠳ ᠪᠤᠷᠣᠭᠤ ᠬᠠᠷᠠᠵᠤ ᠣᠬᠢᠯᠠᠳᠠᠭ ᠭᠡᠯᠴᠡᠨ᠎ᠡ᠃  ᠤᠶᠠᠭ᠎ᠠ ᠪᠠᠨ ᠲᠠᠰᠣᠯᠠᠬᠤ ᠵᠠᠶᠠᠭ᠎ᠠ ᠶᠢ ᠬᠦᠯᠢᠶᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠤ ᠠᠪᠤ ᠶᠢᠨ ᠬᠦᠦ ᠮᠡᠬᠦᠰᠳᠡᠵᠦ ᠠᠮᠢ ᠬᠠᠭᠠᠴᠬᠠᠣ ᠵᠣᠪᠠᠯᠠᠩ  ᠳᠤ ᠣᠨᠠᠬᠤ ᠦᠶ᠎ᠡ ᠳᠤ ᠲᠡᠷᠭᠡᠳᠡ ᠠᠴᠠ ᠡᠵᠢ ᠮᠢᠨᠢ ᠮᠠᠨᠠᠨ ᠳᠤ ᠰᠠᠭᠤᠭᠰᠠᠨ ᠬᠠᠠ ᠬᠠᠶᠢᠷᠬᠠᠨ ᠰᠢᠭ᠋ ᠲᠠᠶᠢᠪᠤᠩ ᠬᠠᠷᠠᠭᠳᠠᠵᠤ ᠴᠠᠰᠣᠨ ᠮᠦᠰᠣᠨ ᠢᠰᠭᠡᠷᠬᠦ ᠬᠦᠢᠲᠡᠨ ᠵᠢᠪᠠᠷ ᠲᠤ ᠴᠠᠷᠴᠠᠵᠤ ᠵᠤᠭᠰᠣᠭᠰᠠᠨ ᠶᠤᠮ᠃ ᠶᠠᠷᠢᠶᠠᠨ ᠦᠭᠡᠢ ᠬᠡᠨ ᠠᠯᠢᠨ ᠳᠤ ᠨᠢ ᠬᠡᠴᠡᠭᠦᠦ ᠪᠠᠶᠢᠵᠢ ᠯᠠ ᠳ᠋ᠠ᠃ ᠭᠠᠭᠴᠠ ᠴᠦ ᠭᠡᠰᠡᠨ ᠲᠠᠨ ᠤ ᠰᠡᠳᠭᠢᠯ ᠢ ᠵᠠᠰᠬᠠᠣ ᠶᠤᠮ ᠰᠠᠨ ᠭᠡᠵᠤ ᠰᠠᠨᠠᠬᠤ ᠨᠢ ᠤᠷᠣᠶᠢᠲᠠᠪᠠ︕ ᠡᠵᠢ ᠲᠠᠨ ᠢ ᠪᠠᠶᠢᠬᠤ ᠳᠤ ᠭᠡᠷ ᠳᠦᠭᠦᠷᠡᠩ ᠪᠠᠶᠢᠯ᠎ᠠ᠃ ︽ᠡᠬᠡ ᠶᠢᠨ ᠰᠠᠨᠠᠭ᠎ᠠ ᠦᠷ᠎ᠡ ᠳᠤ ᠂ ᠦᠷ᠎ᠡ ᠶᠢᠨ ᠰᠠᠨᠠᠭ᠎ᠠ ᠠᠭᠤᠯᠠᠨ ᠳᠤ︾ ᠭᠡᠭᠴᠢ ᠰᠠᠶᠢᠨ ᠵᠦᠭ ᠲᠤ ᠮᠢᠩᠭᠠᠨ ᠪᠤᠷᠬᠠᠨ᠂ ᠮᠢᠩᠭ᠎ᠠ ᠮᠢᠩᠭᠠᠨ ᠠᠴᠠ ᠡᠬᠡ  ᠶᠢᠨ ᠠᠭᠤᠳᠠᠮ ᠦᠷᠦᠰᠢᠶᠡᠯ ᠳᠡᠭᠷᠢ ᠰᠠᠴᠠᠭᠤ ᠪᠠᠭᠲᠠᠭᠠᠳᠠᠭ ᠢ ᠣᠨᠣᠭᠠᠵᠤ ᠬᠡᠯᠡᠭᠰᠡᠨ ᠬᠠᠶᠢᠷ᠎ᠠ ᠰᠢᠷᠬᠠᠯᠠᠭ᠎ᠠ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠃ ᠲᠡᠷᠡ ᠰᠡᠳᠭᠢᠯ ᠤᠨ ᠰᠢᠷᠬᠠᠯᠠᠭ᠎ᠠ ᠶᠢ ᠠᠨᠠᠭᠠᠬᠤ ᠭᠡᠵᠣ ᠮᠢᠩᠭ᠎ᠠ ᠮᠢᠩᠭᠠᠨ ᠠᠴᠠ ᠦᠶ᠎ᠡ ᠬᠤᠯᠪᠣᠨ ᠠᠪᠤ ᠶᠢᠨ ᠬᠦᠪᠡᠭᠦᠳ ᠤᠬᠠᠭᠠᠷᠠᠵᠤ ᠶᠠᠪᠤᠭᠰᠠᠨ  ᠬᠦᠴᠦ ᠶᠤᠮ︕ ᠪᠢᠳᠠ ᠡᠵᠢ ᠶᠢ ᠪᠠᠨ ᠰᠠᠨᠠᠬᠤ ᠭᠡᠵᠤ ᠬᠤᠵᠢᠭᠤ ᠣᠬᠠᠭᠠᠷᠠᠭᠰᠠᠨ ᠬᠠᠶᠢᠷ᠎ᠠ ᠶᠤᠮ᠃ ᠡᠵᠢ ᠶᠢ ᠪᠠᠨ ᠰᠠᠨᠠᠬᠤ ᠪᠦᠷᠢ ᠲᠠᠨ ᠤ ᠪᠠᠷ᠎ᠠ ᠴᠢᠨᠳᠠᠷᠸ᠎ᠠ ᠰᠡᠳᠭᠢᠯ ᠳᠤ ᠪᠠᠭᠤᠨ᠎ᠠ᠃  ᠠᠪᠤ ᠶᠢᠨ ᠦᠭᠡᠢ ᠳᠤ ᠲᠠ ᠨᠢᠯᠪᠤᠰᠣ  ᠪᠠᠨ ᠨᠢᠭᠤᠵᠤ ᠦᠮᠦᠷᠡᠵᠦ ᠶᠠᠪᠤᠬᠤ ᠳᠤ ᠪᠢᠳᠠ ᠲᠡᠨᠡᠭᠯᠡᠵᠦ ᠪᠠᠶᠢᠪᠠ᠃ ᠲᠠ ᠣᠯᠠᠭᠠᠨ ᠠᠮᠢᠨ ᠤ ᠲᠠᠰᠣᠷᠬᠠᠢ ᠪᠠᠨ ᠲᠡᠵᠢᠭᠡᠬᠦ ᠭᠡᠵᠣ ᠵᠢᠷ ᠤᠨ ᠠᠮᠢᠳᠣᠷᠠᠯ ᠳᠤ ᠵᠢᠷ ᠤᠨ ᠪᠤᠰᠣ ᠬᠠᠲᠠᠭᠤ ᠲᠡᠷᠡ ᠵᠣᠪᠠᠯᠠᠩ ᠢ ᠣᠭᠤᠷᠴᠦ ᠦᠵᠡᠭᠡ ᠦᠭᠡᠢ ᠬᠤᠷᠮᠣᠢ ᠨᠦᠢᠲᠠᠨ ᠨᠢᠷᠣᠭᠤ ᠬᠠᠲᠠᠭᠤ ᠵᠢᠳᠬᠦᠪᠡ᠃ ᠲᠣᠯᠭᠠᠨ ᠤ ᠪᠠᠨ ᠳᠡᠷᠭᠡᠳᠡ ᠣᠯᠣᠭᠰᠠᠨ ᠬᠡᠳᠦᠨ ᠰᠠᠯᠪᠠᠷᠬᠠᠢ ᠮᠦᠩᠭᠦ ᠪᠠᠨ ᠲᠤᠭᠠᠯᠠᠵᠤ ᠴᠡᠨᠡᠭ ᠨᠢ ᠮᠠᠭᠤᠳᠠᠭᠰᠠᠨ ᠷᠠᠳᠢᠣ᠋ ᠪᠠᠨ ᠱᠠᠵᠢᠬᠢᠨᠠᠭᠤᠯᠣᠨ ᠨᠢᠷᠦᠭᠤ ᠠᠮᠠᠷᠠᠵᠤ ᠬᠡᠪᠲᠡᠬᠦ ᠨᠢ ᠦᠵᠡᠭᠳᠡᠨ᠎ᠡ᠃ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠬᠦᠮᠦᠨ ᠤ ᠮᠠᠩᠯᠠᠢ ᠳᠤ ᠦᠵᠦᠭᠦᠷᠯᠡᠬᠦ ᠭᠡᠵᠦ ᠲᠠᠨ ᠤ ᠬᠦᠳᠡᠯᠮᠦᠷᠢ ᠂ ᠲᠠᠨ ᠤ ᠦᠢᠳᠬᠠᠷ ᠲᠤ  ᠲᠠᠶᠢᠴᠢᠯᠠᠭᠳᠠᠭᠰᠠᠨ ᠶᠤᠮ ᠃  ᠡᠵᠢ ᠮᠢᠨᠢ ᠭᠡᠷ ᠤᠨ ᠭᠠᠳᠠᠨ᠎ᠠ ᠪᠠᠨ ᠦᠷ᠎ᠡ ᠪᠠᠨ ᠬᠦᠯᠢᠶᠡᠵᠦ ᠮᠠᠶᠢᠵᠢᠬᠢᠨᠠᠨ ᠬᠠᠷᠠᠭᠳᠠᠬᠤ ᠳᠤ ᠰᠠᠯᠬᠢ ᠬᠦᠷᠲᠡᠯ᠎ᠡ ᠡᠷᠴᠢ  ᠬᠠᠷᠢᠳᠠᠭ ᠠᠵᠢ᠃ ᠦᠷ᠎ᠡ ᠬᠡᠥᠬᠡᠳ ᠴᠢᠨᠢ ᠣᠯᠠᠨ ᠵᠢᠯ ᠤᠨ ᠲᠣᠷᠰᠢ ᠣᠨᠠᠭᠠᠨ ᠨᠠᠰᠤ ᠪᠠᠨ ᠡᠯᠡᠭᠡᠵᠦ᠂ ᠬᠢᠵᠢᠶᠠᠯ ᠨᠠᠰᠤ ᠪᠠᠨ ᠭᠠᠳᠠᠷᠯᠠᠬᠤ ᠪᠤᠯᠲᠠᠯ᠎ᠠ ᠡᠵᠢ ᠶᠢ ᠪᠠᠨ ᠵᠠᠯᠠᠭᠤ ᠡᠵᠢ ᠭᠡᠵᠣ ᠪᠤᠳᠣᠵᠣ ᠶᠠᠪᠤᠯ᠎ᠠ᠃ ᠡᠵᠢ ᠮᠢᠨᠢ ᠪᠢᠲᠠᠨ ᠢ ᠪᠠᠨ ᠰᠣᠷ ᠰᠢᠭ᠋ ᠪᠥᠭᠡᠴᠡᠶᠢᠯᠡᠵᠦ ᠰᠣᠶᠢᠭᠰᠠᠨ ᠳ᠋ᠠᠭ᠃ ᠬᠡᠥᠬᠡᠳ ᠢᠶᠠᠨ ᠰᠠᠶᠢᠬᠠᠨ ᠠᠵᠢᠯᠯᠠᠵᠤ ᠪᠠᠶᠢᠭ᠎ᠠ ᠰᠣᠷᠠᠭ ᠢᠶᠠᠷ ᠨᠠᠰᠤ ᠪᠠᠨ ᠨᠡᠮᠡᠵᠦ ᠶᠠᠪᠤᠯ᠎ᠠ ᠭᠡᠵᠣ ᠬᠡᠥᠬᠡᠳ ᠰᠢᠭ ᠪᠠᠶᠠᠷᠯᠠᠳᠠᠭ ᠪᠠᠶᠢᠪᠠ᠃ ᠬᠠᠶᠠ ᠨᠢᠭᠡ ᠬᠠᠵᠠᠭᠠᠢ ᠪᠤᠷᠣᠭᠤ ᠭᠢᠰᠬᠢᠬᠦ ᠳᠤ ᠠᠩᠵᠠᠭᠠᠷᠠᠭ᠎ᠠ ᠦᠭᠡᠢ ᠶᠤᠮ ᠰᠢᠭ ︽ᠵᠠ ᠶᠠᠭᠠᠬᠢᠬᠤ ᠪᠤᠢ᠂ ᠠᠮᠢᠳᠣᠷᠠᠯ ᠤᠨ ᠣᠯᠵᠤ ᠠᠯᠳᠠᠬᠤ ᠭᠡᠭᠴᠢ ᠡᠶᠢᠮᠦ ᠪᠠᠶᠢᠳᠠᠭ︾ ᠭᠡᠳ ᠵᠦᠪ ᠲᠠᠯ᠎ᠠ ᠶᠢᠨ ᠲᠦᠷᠦᠭᠡᠨ ᠳᠤ ᠰᠦ ᠳᠤᠰᠤᠭᠠᠵᠤ᠂ ᠣᠶᠢᠴᠢᠭᠤᠯᠬᠤ ᠦᠭᠡᠢ ᠭᠡᠵᠣ ᠪᠣᠯᠭᠤᠮᠵᠢᠯᠠᠨ ᠪᠤᠷᠣᠭᠤ ᠲᠠᠯ᠎ᠠ ᠶᠢᠨ ᠳᠦᠷᠥᠭᠡᠨ ᠠᠴᠠ ᠲᠦᠰᠢᠵᠦ ᠬᠠᠷ᠎ᠠ ᠴᠠᠢ ᠳᠤ ᠪᠠᠨ ᠵᠠᠩᠭᠢᠷᠠᠴᠦ ᠰᠠᠭᠤᠳᠠᠭ ᠶᠤᠮ᠃ ᠠᠶᠠᠨ ᠤ ᠲᠣᠭᠤᠷᠢᠮ ᠳᠤ ᠠᠩᠭᠤᠬᠠᠨ ᠪᠤᠷᠦ ᠨᠢ ᠶᠠᠳᠠᠷᠠᠵᠤ ᠶᠠᠪᠤᠬᠤ ᠳᠤ ᠠᠶᠠᠭ᠎ᠠ ᠲᠠᠢ ᠴᠠᠢ ᠳᠤ ᠡᠵᠢ ᠶᠢᠨ ᠪᠤᠷᠦ ᠨᠢᠳᠦ ᠬᠠᠶᠢᠷ᠎ᠠ ᠳᠦᠭᠦᠷᠡᠩ ᠬᠦᠪᠦᠯᠵᠡᠵᠤ᠂ ︽ᠡᠵᠢ ᠨᠢ ᠬᠦᠦ ᠳᠤ ᠪᠠᠨ ᠬᠠᠨᠢ ᠪᠣᠯᠵᠤ ᠢᠯᠡᠭᠦᠦ ᠬᠡᠳᠣᠨ ᠣᠨ ᠠᠮᠢᠳᠣᠷᠠᠬᠤ ᠶᠤᠮ ᠰᠠᠨ︾ ᠭᠡᠵᠣ ᠢᠷᠡᠵᠦ ᠤᠴᠢᠬᠤ ᠪᠦᠷᠢ ᠳᠠᠩᠲᠠ ᠢᠩᠬᠢᠵᠤ  ᠦᠭᠡ ᠦᠯᠡᠳᠡᠭᠡᠬᠦ ᠪᠠᠶᠢᠯ᠎ᠠ᠃ ︽ᠬᠠᠨ ᠬᠠᠶᠢᠷᠬᠠᠨ ᠢ ᠴᠠᠰᠤ ᠳᠠᠷᠣᠵᠣ ᠬᠠᠶᠢᠷᠠᠨ ᠪᠡᠶ᠎ᠡ ᠶᠢ ᠨᠠᠰᠤ ᠳᠠᠷᠣᠬᠤ︾ ᠭᠡᠭᠴᠢ ᠵᠠᠶᠠᠭ᠎ᠠ ᠶᠢ ᠨᠢ ᠲᠡᠭᠰᠢᠯᠡᠵᠤ ᠬᠤᠷᠸ᠎ᠠ ᠶᠢᠨ ᠡᠨᠡᠬᠡᠨ ᠵᠠᠢ  ᠪᠠᠷ ᠡᠵᠢ ᠶᠢ ᠪᠠᠨ ᠨᠠᠰᠣᠵᠢᠵᠤ ᠪᠠᠶᠢᠨ᠎ᠠ ᠭᠡᠵᠣ ᠶᠡᠷᠦ ᠠᠴᠠ ᠰᠠᠨᠠᠳᠠᠭ ᠦᠭᠡᠢ ᠪᠠᠶᠢᠪᠠ᠃ ᠬᠠᠨ ᠪᠤᠭᠤᠷᠣᠯ ᠡᠵᠢ ᠶᠢᠨ ᠢᠨᠢᠶᠡᠮᠰᠦᠭᠯᠡᠯ ᠳᠤ ᠭᠤᠣᠯ ᠤᠨ ᠤᠰᠣᠨ ᠳᠤ ᠴᠢᠯᠠᠭᠤ ᠲᠤᠯᠢᠶᠠᠯᠭᠠᠭᠰᠠᠨ ᠰᠢᠭ᠋ ᠮᠠᠩᠨᠠᠢ ᠳᠤ ᠨᠢ ᠠᠳᠣᠷᠢᠶ᠎ᠠ ᠰᠠᠭᠤᠵᠠᠢ᠃     ᠮᠠᠨᠣᠰ ᠢ ᠬᠡᠢ ᠮᠠᠨᠠᠨ ᠪᠠᠶᠢᠬᠤ ᠳᠤ ᠲᠠ ᠰᠣᠩᠭᠤᠵᠤ ᠠᠮᠢ ᠣᠯᠭᠤᠯᠵᠤ ᠦᠭᠭᠦᠭᠰᠡᠨ ᠶᠤᠮ ᠡᠵᠢ ᠡ︕ ᠡᠵᠢ ᠶᠢ ᠪᠠᠨ ᠳᠡᠷ᠎ᠡ ᠳᠡᠭᠡᠷ᠎ᠡ ᠮᠡᠳᠡᠭᠡ ᠰᠡᠬᠡᠭᠡ ᠦᠭᠡᠢ ᠪᠤᠯᠬᠤ ᠳᠤ  ᠪᠢᠳᠡ ᠬᠡᠳᠦ ᠳᠠᠬᠢᠵᠤ   ᠰᠡᠷᠡᠭᠡᠬᠦ ᠭᠡᠳ ᠪᠤᠰᠬᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠪᠤᠷᠬᠠᠨ ᠡᠵᠢ ᠲᠠ ᠦᠷᠦᠰᠢᠶᠡᠵᠦ ᠬᠠᠶᠢᠷᠠᠯᠠ︕ ᠡᠵᠢ ᠡ︕ ᠵᠠᠭᠤᠨ  ᠳᠤ ᠶᠡᠷᠡᠨ ᠶᠢᠰᠦᠨ ᠪᠠᠶᠠᠷᠲᠠᠢ ᠭᠡᠳ ᠰᠠᠯᠬᠤ ᠶᠢᠨ ᠲᠦᠭᠡᠷᠭᠡ ᠪᠠᠷ ᠵᠣᠯᠭᠠᠬᠤ ᠲᠠᠪᠢᠯᠠᠩ ᠪᠠᠶᠢᠬᠤ ᠳᠤ ᠭᠠᠭᠴᠠ ᠪᠤᠯᠳᠠᠭ ᠦᠭᠡᠢ ᠬᠠᠭᠠᠴᠠᠯ ᠤᠨ ᠨᠢᠭᠡ ᠲᠤᠭᠠᠯᠠᠩ ᠢ ᠪᠤᠷᠬᠠᠨ ᠪᠢᠲᠠᠨ ᠠᠴᠠ ᠬᠠᠷᠠᠮᠨᠠᠵᠠᠢ᠃ ᠬᠦᠮᠦᠨ ᠤ ᠠᠮᠢᠳᠣᠷᠠᠯ  ᠤᠨ ᠠᠯᠢ ᠨᠢᠭᠡ ᠡᠳᠦᠷ ᠢ ᠡᠭᠦᠷᠢᠳᠡ ᠶᠢᠨ ᠬᠠᠭᠠᠴᠠᠯ ᠪᠤᠯᠬᠤ ᠶᠢ ᠲᠥᠰᠦᠭᠡᠯᠡᠬᠦ ᠪᠢᠰᠢ︕ ᠲᠡᠷᠡ ᠦᠶ᠎ᠡ ᠳᠤ ᠡᠵᠢ ᠪᠠᠨ ᠰᠠᠨᠠᠬᠤ ᠳᠤ ᠪᠢᠳᠠ ᠲᠠᠯᠪᠢᠭᠠᠳ ᠬᠦᠷᠳᠡᠭ ᠪᠠᠶᠢᠪᠠ᠃ ᠤᠳᠣ ᠪᠢᠳᠡ ᠬᠡᠳᠦᠭᠦᠯᠡ ᠰᠠᠳᠣᠨ ᠲᠦᠷᠦᠯ ᠤᠨ ᠳᠤ ᠪᠠᠨ ᠠᠶᠢᠯᠴᠢᠯᠠᠨ᠎ᠠ ᠦᠦ ᠭᠡᠬᠦ ᠠᠴᠠ ᠪᠢᠰᠢ ᠡᠵᠢ ᠪᠠᠨ ᠰᠠᠨᠠᠬᠤ ᠳᠤ ᠤᠴᠢᠬᠤ ᠭᠠᠵᠠᠷ ᠦᠭᠡᠢ ᠦᠨᠦᠴᠢᠷᠡᠯ᠎ᠠ᠃ ᠭᠡᠷ ᠤᠷᠣᠨ ᠬᠠᠩᠬᠠᠶᠢᠷᠠᠵᠤ ᠢᠯᠴᠢ ᠬᠠᠷᠢᠭᠰᠠᠨ ᠮᠢᠨᠦ ᠰᠡᠳᠬᠢᠯ ᠳᠤᠨᠳᠠᠷᠠᠨ᠎ᠠ᠃ ᠡᠵᠢ ᠶᠢᠨ ᠪᠦᠪᠠᠢ ᠲᠠᠢ ᠬᠤᠷᠸ᠎ᠠ ᠳᠤ ᠡᠵᠢ ᠪᠠᠨ  ᠬᠠᠷᠠᠮᠨᠠᠭᠰᠠᠨ ᠪᠢᠳᠡᠨ ᠤ ᠤᠷᠣᠰᠬᠤ ᠨᠢᠯᠪᠤᠰᠣ ᠠᠷᠭ᠎ᠠ ᠦᠭᠡᠢ ᠡᠭᠦᠨ ᠢ ᠦᠨᠡᠮᠰᠢᠯᠡᠭᠦᠯᠪᠡ᠃  ︽ᠮᠢᠨᠦ  ᠬᠦᠦ  ᠬᠠᠷᠢᠭᠠᠳ ᠢᠷ᠎ᠡ︾ ᠭᠡᠵᠦ  ᠪᠠᠭ᠎ᠠ ᠶᠢᠨ ᠨᠡᠭᠡᠯ ᠰᠣᠨᠣᠰᠳᠠᠨ᠎ᠠ ᠪᠢᠯᠡ᠃ ᠡᠵᠢ ᠡ︕  ᠬᠡᠷᠪᠡ ᠴᠠᠭ ᠮᠦᠴᠡ ᠢ ᠪᠤᠴᠠᠭᠠᠵᠤ ᠴᠢᠳᠠᠳᠠᠭ ᠶᠤᠮ ᠪᠣᠯ  ᠁ ᠪᠢ ᠨᠢᠯᠪᠤᠰᠣ ᠪᠠᠨ ᠵᠠᠯᠬᠢᠮᠠᠷ ᠪᠠᠶᠢᠨ᠎ᠠ᠃ ᠲᠠᠨ ᠳᠤ ᠪᠠᠨ  ᠨᠠᠮᠠᠨᠴᠢᠯᠠᠶ᠎ᠠ︕ 
  
ᠢᠷᠡᠯᠲᠡ᠄ ᠦᠪᠤᠷ ᠮᠤᠩᠭᠤᠯ ᠤᠨ ︽ᠨᠡᠶᠢᠬᠡᠮ︾ ᠰᠡᠳᠬᠦᠯ ᠤᠨ ᠬᠤᠷᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠠᠶᠢᠷᠠᠭᠤᠯᠬᠤ ᠬᠡᠯᠲᠡᠰ ᠪᠤᠶᠤ ᠲᠡᠭᠦᠨ ᠤ ᠲᠣᠭᠤᠷᠢᠨ ᠳᠤ ᠬᠢ ᠥᠯᠢᠭᠡᠷ
ᠨᠠᠶᠢᠷᠠᠭᠤᠯᠬᠤ ᠬᠡᠯᠲᠡᠰ ᠪᠤᠶᠤ ᠲᠡᠭᠦᠨ ᠤ ᠲᠣᠭᠤᠷᠢᠨ ᠳᠤ ᠬᠢ ᠥᠯᠢᠭᠡᠷ
ᠪᠠᠭᠰᠢ ᠬᠦᠮᠦᠨ ᠰᠠᠶᠢᠬᠠᠨ
ᠭᠠᠵᠠᠷ ᠤᠨ ᠨᠡᠷᠡᠰ ᠤᠨ ᠬᠠᠶ᠋ᠢᠭ ᠤᠨ ᠬᠠᠮᠢᠶᠠᠷᠣᠯᠲᠠ ᠢ ᠦᠭᠡᠷᠡᠴᠢᠯᠡᠨ ᠰᠢᠨᠡᠴᠢᠯᠡᠵᠦ ᠭᠠᠵᠠᠷ ᠤᠨ ᠨᠡᠷᠡᠰ ᠤᠨ ᠁
ᠳᠤᠮᠳᠠᠳᠤ ᠶᠢᠨ ᠰᠢᠯᠢᠳᠡᠭ ᠤᠯᠠᠮᠵᠢᠯᠠᠯᠲᠤ ᠰᠣᠶᠤᠯ ᠤᠨ ᠦᠯᠢᠭᠡᠷ  ᠤᠨ ᠰᠢᠨ᠎ᠡ ᠣᠷᠴᠢᠭᠤᠯᠭ᠎ᠠ᠄ ᠯᠤᠤ ᠁
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号