ᠬᠠᠯᠬ᠎ᠠ ᠪᠦᠬᠡ

    ᠬᠠᠯᠬ᠎ᠠ ᠪᠦᠬᠡ ᠬᠤᠷᠢᠳᠤᠭ᠋ᠠᠷ ᠵᠠᠭᠤᠨ᠎ᠤ ᠡᠬᠢ᠎ᠪᠠᠷ ᠬᠠᠯᠬ᠎ᠠ ᠮᠤᠩᠭᠤᠯ᠎ᠤᠨ ᠬᠤᠪᠢᠰᠬᠠᠯ ᠰᠢᠷᠦᠭᠦᠰᠬᠦ ᠵᠢ ᠲᠠᠭ᠋ᠠᠯᠳᠤᠨ 1930 ᠊ᠠᠭ᠋ᠠᠳ ᠤᠨ᠎ᠳᠤ ᠨᠡᠯᠢᠶᠡᠳ ᠲᠤᠭ᠋ᠠᠨ᠎ᠤ ᠬᠠᠯᠬᠠᠴᠤᠳ ᠡᠵᠡᠨ᠎ᠡ ᠨᠤᠳᠤᠭ᠎ᠲᠤ ᠴᠠᠭ᠋ᠠᠴᠢᠯᠠᠨ ᠢᠷᠡᠵᠦ ᠨᠤᠳᠤᠭᠰᠢᠨ ᠰᠠᠭᠤᠷᠢᠰᠢᠵᠤ᠂ ᠲᠤᠷᠭᠤᠳ ᠶᠠᠰᠤᠳᠠᠨ᠎ᠲᠠᠢ ᠤᠷᠤᠭ ᠡᠯᠢᠭᠡᠨ ᠪᠤᠯᠤᠯᠴᠠᠵᠤ ᠬᠠᠷᠢᠴᠠᠭ᠎ᠠ ᠬᠤᠯᠪᠤᠭ᠎ᠠ ᠡᠳᠦᠷ ᠢᠷᠡᠬᠦᠶ᠎ᠡ ᠤᠯᠠᠰᠢᠷᠠᠭᠰᠠᠨ ᠶᠤᠮ᠂ ᠲᠡᠳᠡᠭᠡᠷ ᠬᠦᠮᠦᠰ᠎ᠤᠨ ᠲᠤᠳᠤᠷ᠎ᠠ ᠠᠯᠳᠠᠨ ᠵᠠᠳᠠᠮᠪᠠ （ᠴᠤᠬᠤᠷ ᠯᠠᠮᠠ）᠂ ᠴᠢᠮᠡᠳᠳᠤᠤ᠂ ᠰᠡᠩᠭᠡ ᠵᠡᠷᠭᠡ ᠨᠡᠷᠡᠳᠡᠢ ᠪᠦᠬᠡᠴᠢᠨ ᠢᠷᠡᠵᠦ᠂ ᠱᠠᠪᠢ ᠡᠯᠰᠡᠨ ᠬᠠᠯᠬ᠎ᠠ ᠪᠦᠬᠡ ᠵᠢ ᠲᠡᠯᠭᠡᠷᠡᠭᠦᠯᠪᠡ᠃
    ᠪᠥᠬᠡ ᠵᠢᠨ ᠶᠠᠪᠤᠳᠠᠯ᠎ᠳᠤ ᠬᠦᠯ᠎ᠤᠨ ᠰᠠᠶ᠋ᠢᠳ ᠲᠠᠷᠤᠢ ᠪᠦᠬᠡ ᠵᠢᠨ ᠶᠡᠷᠦᠩᠭᠡᠢ ᠬᠢᠨᠠᠭᠴᠢ （ᠰᠢᠭᠦᠭᠴᠢ）᠎ᠠᠴᠠ ᠪᠦᠬᠡ ᠵᠢᠨ ᠪᠦᠬᠦ ᠠᠵᠢᠯ᠎ᠢ ᠬᠠᠷᠢᠭᠤᠴᠠᠨ᠂ ᠪᠦᠬᠡ ᠲᠡᠮᠳᠡᠭᠯᠡᠭᠴᠢ᠂ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ ᠨᠠᠷ ᠪᠤᠳᠠᠳᠠᠢ ᠠᠵᠢᠯ ᠬᠢᠳᠡᠭ᠂ ᠲᠡᠳᠡ ᠦᠪᠡᠷᠰᠡᠳ᠎ᠤᠨ ᠲᠡᠪᠡᠯ ᠲᠡᠷᠯᠢᠭ ᠵᠶ᠋ᠠᠨ ᠡᠮᠦᠰᠦᠨ ᠬᠤᠪᠢᠶᠠᠷᠢᠯᠠᠭᠰᠠᠨ ᠠᠵᠢᠯ ᠵᠶ᠋ᠠᠨ ᠭᠦᠢ᠍ᠴᠡᠳᠬᠡᠨ᠎ᠡ᠃ ᠪᠦᠬᠦ ᠨᠠᠶ᠋ᠢᠷ᠎ᠲᠤ ᠨᠠᠢ᠍ᠮᠠᠨ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ ᠲᠤᠬᠢᠷᠠᠭᠤᠯᠬᠤ ᠪᠦᠭᠡᠳ ᠨᠢᠬᠡ ᠵᠠᠰᠠᠭᠤᠯᠴᠢᠨ ᠨᠢᠭᠡ ᠪᠦᠬᠡ ᠵᠢ ᠲᠠᠭ᠋ᠠᠵᠤ ᠵᠠᠯᠠᠵᠤ ᠵᠠᠰᠠᠬᠤ ᠠᠵᠢᠯ ᠬᠢᠨ᠎ᠡ᠂ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ ᠵᠶ᠋ᠠᠷ ᠪᠦᠬᠡ ᠵᠢᠨ ᠶᠤᠰᠤ ᠤᠴᠢᠷ ᠰᠠᠶ᠋ᠢᠨ ᠮᠡᠳᠡᠳᠡᠭ ᠮᠦᠷᠳᠡᠭᠡᠨ ᠪᠦᠬᠡ ᠵᠢᠨ ᠴᠤᠯᠠ ᠭᠤᠩᠰᠢᠨ ᠲᠠᠭᠤᠳᠠᠵᠤ ᠴᠢᠳᠠᠳᠠᠭ ᠬᠦᠮᠦᠨ ᠲᠠᠯᠪᠢᠳᠠᠭ᠂ ᠤᠯᠠᠩᠬᠢ ᠪᠠᠶ᠋ᠢᠳᠠᠯ᠎ᠳᠤ ᠨᠢᠭᠡ ᠲᠠᠯ᠎ᠠ᠎ᠠᠴᠠ ᠨᠢᠭᠡ ᠤᠳᠠᠭ᠎ᠠ᠎ᠳᠤ ᠲᠦᠷᠪᠡᠨ ᠪᠦᠬᠡ ᠲᠠᠯᠪᠢᠨ ᠪᠠᠷᠢᠯᠳᠤᠭᠤᠯᠳᠠᠭ ᠪᠠᠶ᠋ᠢᠵᠠᠢ᠂ ᠲᠡᠷᠢᠭᠦᠨ ᠲᠡᠳ᠋ ᠪᠦᠬᠡ ᠦᠯᠡᠳᠡᠭᠰᠡᠨ ᠦᠶ᠎ᠡ᠎ᠳᠤ ᠬᠠᠷᠢᠨ ᠨᠢᠭᠡ ᠪᠦᠬᠡ᠎ᠳᠤ ᠬᠤᠶᠠᠷ ᠵᠠᠰᠠᠭᠤᠯᠴᠢᠨ ᠲᠤᠬᠢᠷᠠᠭᠤᠯᠤᠨ᠂ ᠨᠢᠭᠡ᠎ᠨᠢ ᠲᠤᠰᠬᠠᠶ᠋ᠢᠯᠠᠨ ᠮᠠᠯᠠᠭ᠋ᠠᠢ ᠵᠢ ᠪᠠᠷᠠᠭᠤᠨ ᠭᠠᠷ᠎ᠲᠠᠭᠠᠨ ᠡᠷᠭᠦᠨ᠂ ᠨᠦᠭᠦᠭᠡ᠎ᠨᠢ ᠬᠤᠪᠴᠠᠰᠤ ᠵᠠᠰᠠᠯ᠎ᠢ᠎ᠨᠢ ᠪᠠᠷᠢᠵᠤ ᠦᠭᠭᠦ ᠶᠤᠰᠤ᠎ᠲᠠᠢ ᠪᠠᠶ᠋ᠢᠭᠰᠠᠨ ᠪᠠᠶ᠋ᠢᠨ᠎ᠠ᠃
    ᠦᠷᠡᠰ ᠨᠠᠶ᠋ᠢᠷ᠂ ᠬᠤᠩᠭᠤᠷ᠎ᠤᠨ ᠨᠠᠶ᠋ᠢᠷ᠂ ᠡᠵᠡᠢ ᠯᠠᠮᠠ ᠵᠢᠨ ᠨᠠᠰᠤᠨ ᠪᠠᠶᠠᠷ ᠵᠡᠷᠭᠡ ᠲᠤᠮᠤᠬᠠᠨ ᠨᠠᠶ᠋ᠢᠷ ᠨᠠᠭ᠋ᠠᠳᠤᠮ᠎ᠳᠤ ᠲᠠᠮᠠᠭ᠋ᠠᠨ ᠭᠠᠵᠠᠷ᠎ᠠᠴᠠ ᠪᠡᠯᠡᠳᠦᠭᠰᠡᠨ ᠲᠤᠷᠭ᠋ᠠᠨ ᠵᠤᠳᠤᠭ ᠱᠤᠳᠠᠭ ᠡᠮᠦᠰᠦᠨ ᠪᠠᠷᠢᠯᠳᠤᠬᠤ ᠪᠦᠭᠡᠳ ᠤᠪᠤᠭ᠋ᠠᠨ ᠲᠠᠬᠢᠯᠭ᠎ᠠ᠂ ᠵᠥᠩᠵᠢᠷ ᠮᠠᠶ᠋ᠢᠳᠠᠷᠢ ᠵᠡᠷᠭᠡ ᠪᠠᠭ᠎ᠠ ᠴᠤᠭᠯᠠᠭ᠋ᠠᠨ᠎ᠳᠤ ᠵᠤᠳᠤᠭ ᠱᠤᠳᠠᠭ᠎ᠲᠠᠢ ᠪᠦᠬᠡᠴᠦᠳ ᠦᠪᠡᠷ᠎ᠤᠨ᠎ᠬᠢ᠎ᠪᠠᠨ ᠡᠮᠦᠰᠦᠨ ᠪᠠᠷᠢᠯᠳᠤᠵᠤ᠂ ᠵᠤᠳᠤᠭ ᠱᠤᠳᠠᠭ ᠦᠭᠡᠢ᠎ᠨᠢ ᠦᠮᠦᠳᠦ᠎ᠪᠠᠨ ᠲᠡᠭᠡᠭᠰᠢ ᠰᠢᠭᠤᠨ ᠪᠦᠰᠡ ᠪᠦᠰᠡᠯᠡᠵᠦ ᠪᠠᠷᠢᠯᠳᠤᠳᠠᠭ ᠪᠠᠶ᠋ᠢᠵᠠᠢ᠂ ᠡᠩ᠎ᠤᠨ ᠴᠠᠭ᠎ᠲᠤ ᠬᠤᠶᠠᠷ ᠬᠦᠮᠦᠨ ᠬᠦᠴᠦ ᠲᠡᠩᠭᠡᠭᠡ᠂ ᠤᠪᠰᠤ ᠮᠡᠭᠡ᠎ᠪᠠᠨ ᠰᠤᠷᠢᠯᠴᠠᠬᠤ᠎ᠪᠠᠷ ᠨᠤᠤᠯᠳᠤᠬᠤ᠎ᠳᠤ ᠪᠦᠰᠡ ᠪᠦᠰᠡᠯᠡᠨ ᠪᠠᠷᠢᠯᠳᠤᠳᠠᠭ ᠪᠠᠶ᠋ᠢᠭᠰᠠᠨ ᠭᠡᠵᠦ ᠪᠤᠢ᠂ ᠲᠡᠭᠡᠬᠦ᠎ᠳᠡᠭᠡᠨ ᠲᠤᠷᠭᠤᠳ ᠪᠦᠬᠡ᠎ᠲᠠᠢ ᠠᠳᠠᠯᠢ ᠬᠦᠯ ᠨᠢᠴᠦᠭᠦᠨ ᠪᠠᠷᠢᠯᠳᠤᠬᠤ ᠪᠢᠰᠢ᠂ ᠬᠠᠷᠢᠨ ᠪᠤᠯᠢᠭ᠋ᠠᠷᠢ ᠪᠤᠶᠤ ᠺᠦᠮ （ᠰᠢᠷᠢ） ᠭᠤᠳᠤᠯ ᠡᠮᠦᠰᠦᠨ ᠪᠠᠷᠢᠯᠳᠤᠳᠠᠭ᠃ ᠬᠠᠯᠬ᠎ᠠ ᠪᠦᠬᠡ ᠪᠤᠯ ᠲᠠᠪᠠᠭ᠎ᠠ᠎ᠲᠠᠢ ᠪᠦᠬᠡ᠂ ᠲᠠᠷᠤᠢ ᠤᠯᠠᠨ ᠨᠤᠭᠤᠯᠤᠭ᠎ᠠ᠎ᠲᠠᠢ ᠪᠦᠬᠡ ᠪᠤᠯᠤᠨ᠎ᠠ᠃ ᠲᠡᠭᠦᠨ᠎ᠢ ᠤᠨᠤᠭ᠎ᠠ ᠲᠠᠭ᠋ᠠᠷᠠᠭᠤᠯᠤᠨ ᠪᠠᠷᠢᠯᠳᠤᠬᠤ ᠪᠦᠭᠡᠳ ᠤᠯᠠᠨ ᠲᠠᠪᠠᠭ᠎ᠠ ᠲᠠᠪᠠᠭᠰᠠᠨ ᠪᠦᠬᠡ ᠦᠵᠦᠭᠦᠷᠯᠡᠨ᠎ᠡ᠃ ᠪᠠᠷᠢᠯᠳᠤᠭ᠋ᠠᠨ᠎ᠤ ᠶᠠᠪᠤᠴᠠ᠎ᠳᠤ ᠪᠦᠬᠡ ᠵᠢᠨ ᠲᠡᠶ᠋ᠢᠯᠵᠦ ᠲᠡᠶ᠋ᠢᠯᠦᠭᠳᠡᠬᠦ ᠵᠢ ᠪᠡᠶ᠎ᠡ ᠵᠢᠨ ᠠᠯᠢ ᠨᠢᠭᠡ ᠡᠷᠭᠡᠳᠡᠨ ᠭᠠᠵᠠᠷ ᠬᠦᠷᠦᠭᠰᠡᠨ ᠡᠰᠡᠬᠦ᠎ᠪᠠᠷ ᠪᠤᠳᠤᠵᠤ᠂ ᠭᠠᠷ ᠭᠠᠵᠠᠷ ᠬᠦᠷᠬᠦ᠂ ᠡᠪᠦᠳᠦᠭ ᠰᠢᠷᠤᠶ᠋ᠢᠳᠠᠬᠤ ᠵᠢ ᠪᠦᠷ ᠲᠡᠶ᠋ᠢᠯᠦᠭᠳᠡᠭᠰᠡᠨ ᠵᠶ᠋ᠠᠷ ᠲᠤᠭ᠋ᠠᠴᠠᠳᠠᠭ ᠪᠠᠶ᠋ᠢᠵᠠᠢ᠂ ᠡᠨᠡ ᠲᠠᠯ᠎ᠠ᠎ᠪᠠᠷ ᠲᠤᠷᠭᠤᠳ ᠪᠦᠬᠡ ᠵᠢᠨ ᠢᠯᠠᠵᠤ ᠢᠯᠠᠭᠳᠠᠬᠤ ᠪᠠᠷᠢᠮᠵᠢᠶ᠎ᠠ᠎ᠲᠠᠢ ᠡᠷᠡᠰ ᠤᠨᠳᠤᠤ ᠪᠠᠶ᠋ᠢᠭ᠎ᠠ᠃ ᠪᠦᠬᠡ ᠵᠢᠨ ᠲᠦᠷᠢᠮ᠎ᠤᠨ ᠲᠠᠯ᠎ᠠ᠎ᠪᠠᠷ ᠤᠳᠤᠬᠢ ᠵᠤᠳᠤᠭ ᠪᠦᠬᠡ         （ᠲᠠᠷᠤᠢ ᠦᠵᠦᠮᠦᠴᠢᠨ ᠮᠠᠶᠢᠭ᠎ᠤᠨ ᠪᠦᠬᠡ） ᠬᠦᠯ ᠠᠪᠴᠤ ᠦᠯᠦ ᠪᠤᠯᠬᠤ ᠲᠤᠭᠳᠠᠭ᠋ᠠᠯ᠎ᠲᠠᠢ ᠪᠠᠶ᠋ᠢᠬᠤ᠎ᠳᠤ ᠬᠠᠯᠬ᠎ᠠ ᠪᠦᠬᠡ ᠬᠠᠷᠢᠨ ᠡᠨᠡ ᠲᠠᠯ᠎ᠠ᠎ᠪᠠᠷ ᠴᠢᠯᠦᠭᠡᠳᠡᠢ ᠪᠠᠶ᠋ᠢᠬᠤ ᠤᠨᠴᠠᠯᠢᠭ᠎ᠲᠠᠢ᠃ ᠪᠠᠷᠢᠯᠳᠤᠭ᠋ᠠᠨ᠎ᠤ ᠶᠠᠪᠤᠴᠠ᠎ᠳᠤ ᠨᠢᠭᠤᠷ ᠨᠢᠳᠦ ᠰᠠᠮᠤᠷᠳᠠᠬᠤ᠂ ᠲᠤᠯᠤᠭ᠋ᠠᠢ ᠲᠦᠷᠦᠭᠦᠦ ᠤᠷᠤᠭᠤ ᠰᠢᠭ᠋ᠠᠬᠤ᠂ ᠡᠷᠢᠭᠡ ᠬᠤᠷᠢᠭ᠎ᠠ ᠦᠭᠡᠢ ᠢᠰᠭᠦᠯᠬᠦ ᠵᠡᠷᠭᠡ ᠵᠢ ᠡᠷᠡᠰ ᠴᠠᠭ᠋ᠠᠵᠠᠯᠠᠨ᠎ᠠ᠃ ᠨᠢᠭᠡ ᠵᠢᠨ ᠲᠠᠪᠠᠭ᠎ᠠ᠎ᠳᠤ ᠨᠡᠷᠡᠳᠡᠢ ᠴᠤᠯᠠ᠎ᠲᠠᠢ ᠪᠦᠬᠡᠴᠦᠳ᠎ᠲᠤ ᠪᠦᠬᠡ ᠵᠢᠨ ᠠᠮᠠ ᠦᠭᠴᠦ ᠪᠠᠷᠢᠯᠳᠤᠭᠤᠯᠤᠨ᠎ᠠ᠂ ᠲᠠᠷᠤᠢ ᠪᠠᠷᠢᠯᠳᠤᠬᠤ ᠮᠡᠭᠡ ᠮᠡᠷᠭᠡᠵᠢᠯ ᠵᠶ᠋ᠠᠷ ᠠᠨᠠᠢ ᠪᠦᠬᠡ ᠪᠤᠶᠤ ᠬᠡᠦᠬᠡᠳ ᠪᠦᠬᠡ ᠤᠨᠤᠭ᠋ᠠᠨ ᠪᠠᠷᠢᠯᠳᠤᠭᠤᠯᠳᠠᠭ᠂ ᠡᠭᠦᠨ᠎ᠢ ᠠᠮᠠ ᠦᠭᠬᠦ ᠶᠤᠰᠤ ᠭᠡᠳᠡᠭ᠃ ᠪᠦᠬᠡ ᠵᠢᠨ ᠤᠴᠢᠷ ᠲᠡᠭᠡᠷ᠎ᠡ ᠴᠢᠯᠦᠭᠡᠯᠡᠬᠦ ᠪᠤᠯᠳᠠᠯ᠎ᠠ ᠨᠢᠭᠡ ᠵᠢᠨ ᠲᠠᠪᠠᠭ᠎ᠠ ᠰᠢᠪᠳᠤᠷᠠᠪᠠ᠂ ᠬᠤᠶᠠᠷ᠎ᠤᠨ ᠲᠠᠪᠠᠭ᠎ᠠ ᠡᠬᠢᠯᠡᠬᠦ᠎ᠪᠠᠷ ᠪᠠᠶ᠋ᠢᠨ᠎ᠠ ᠭᠡᠬᠦ ᠮᠡᠳᠦ᠎ᠪᠠᠷ ᠬᠤᠶᠠᠷ ᠬᠢᠶ᠎ᠠ ᠵᠠᠰᠠᠭ ᠨᠤᠶᠠᠨ᠎ᠤ ᠡᠮᠦᠨ᠎ᠡ ᠰᠦᠬᠦᠷᠡᠨ ᠪᠠᠶ᠋ᠢᠵᠤ ᠠᠶ᠋ᠢᠯᠠᠳᠳᠠᠭ ᠪᠠᠶ᠋ᠢᠵᠠᠢ᠃
    ᠴᠢᠯᠦᠭᠡᠯᠡᠬᠦ᠎ᠠᠴᠠ ᠡᠮᠦᠨ᠎ᠡ ᠪᠦᠬᠡᠴᠦᠳ ᠵᠶ᠋ᠠᠨ ᠮᠦᠨ ᠲᠤᠷᠭᠤᠳ ᠪᠦᠬᠡ᠎ᠲᠠᠢ ᠠᠳᠠᠯᠢ ᠬᠠᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ᠂ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ ᠭᠡᠮᠡᠨ ᠬᠤᠪᠢᠶᠠᠨ ᠲᠡᠩᠰᠡᠯᠡᠵᠦ᠂ ᠬᠠᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡ ᠵᠢ ᠪᠠᠷᠠᠭᠤᠨ ᠲᠠᠯ᠎ᠠ᠎ᠠᠴᠠ᠂ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡ ᠵᠢ ᠵᠡᠭᠦᠨ ᠲᠠᠯ᠎ᠠ᠎ᠠᠴᠠ ᠭᠠᠷᠭ᠋ᠠᠬᠤ ᠶᠤᠰᠤ᠎ᠲᠠᠢ ᠪᠠᠶ᠋ᠢᠭᠰᠠᠨ ᠪᠦᠭᠡᠳ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠳ ᠲᠤᠰ ᠲᠤᠰ᠎ᠤᠨ ᠭᠡᠷ᠎ᠤᠨ ᠡᠭᠦᠳᠡᠨ᠎ᠳᠤ ᠵᠡᠷᠭᠡᠴᠡᠨ ᠵᠤᠭᠰᠤᠭ᠋ᠠᠳ ᠵᠡᠭᠦᠨ ᠭᠠᠷ ᠵᠶ᠋ᠠᠷ ᠵᠶ᠋ᠠᠨ ᠰᠦᠪᠡᠭᠡ᠎ᠪᠠᠨ ᠲᠤᠯᠤᠨ᠂ ᠪᠠᠷᠠᠭᠤᠨ ᠭᠠᠷ᠎ᠲᠠᠭᠠᠨ ᠵᠤᠳᠤᠭ ᠱᠤᠳᠠᠭ ᠪᠠᠷᠢᠨ ᠭᠤᠷᠪᠠᠨ ᠤᠳᠠᠭ᠎ᠠ ᠨᠠᠷᠠ ᠵᠦᠪ ᠡᠷᠭᠢᠭᠦᠯᠦᠨ ᠬᠤᠷᠤᠶ᠋ᠢᠯᠠᠵᠤ᠂ 《ᠪᠦᠬᠡᠴᠦᠳ ᠴᠤᠭᠯᠠᠷᠠ！ ᠪᠦᠬᠡᠴᠦᠳ ᠴᠤᠭᠯᠠᠷᠠ！》 ᠭᠡᠮᠡᠨ ᠦᠨᠳᠦᠷ ᠲᠠᠭᠤᠨ ᠵᠶ᠋ᠠᠷ ᠲᠠᠯᠠᠯᠤᠨ ᠲᠠᠭᠤᠳᠠᠬᠤ᠎ᠳᠤ ᠪᠦᠬᠡᠴᠦᠳ ᠴᠤᠭᠯᠠᠷᠠᠨ ᠦᠪᠡᠷᠰᠡᠳ᠎ᠤᠨ ᠭᠡᠷ ᠮᠠᠶ᠋ᠢᠬᠠᠨ᠎ᠳᠤ ᠤᠷᠤᠨ ᠬᠤᠪᠴᠠᠰᠤᠯᠠᠵᠤ ᠡᠬᠢᠯᠡᠨ᠎ᠡ᠃ ᠠᠯᠢ ᠲᠠᠯ᠎ᠠ ᠵᠢᠨ ᠪᠦᠬᠡ ᠪᠡᠯᠡᠳᠬᠡᠵᠦ ᠭᠦᠢ᠍ᠴᠡᠭᠰᠡᠨ ᠪᠤᠯ ᠲᠡᠷᠡ ᠲᠠᠯ᠎ᠠ ᠵᠢᠨ ᠵᠠᠰᠠᠭᠤᠯᠴᠢᠨ᠎ᠠᠴᠠ ᠨᠦᠭᠦᠭᠡ ᠲᠠᠯ᠎ᠠ᠎ᠳᠠᠭᠠᠨ᠄ 《ᠰᠢᠮᠳᠠᠵᠤ ᠭᠠᠷ ᠡ！ ᠪᠦᠬᠡ ᠴᠢᠯᠡᠯ᠎ᠡ》 ᠭᠡᠨ᠎ᠡ᠂ ᠲᠡᠭᠡᠬᠦ᠎ᠳᠤ ᠨᠦᠭᠦᠭᠡ ᠲᠠᠯ᠎ᠠ ᠵᠢᠨ ᠵᠠᠰᠠᠭᠤᠯᠴᠢᠨ᠎ᠠᠴᠠ᠄ 《ᠵᠤᠳᠤᠭ ᠱᠤᠳᠠᠭ ᠪᠠᠭᠳᠠᠭ᠋ᠠᠳᠤᠢ ᠪᠠᠶ᠋ᠢᠨ᠎ᠠ᠂ ᠭᠠᠷᠤᠭ᠋ᠠᠳ ᠢᠷᠡᠬᠦ᠎ᠳᠤ ᠭᠠᠶ᠋ᠢᠬᠠᠵᠤ ᠦᠵᠡᠭᠡᠷᠡᠢ！》 ᠭᠡᠨ᠎ᠡ᠃ ᠬᠤᠶᠠᠷ ᠲᠠᠯ᠎ᠠ᠎ᠪᠠᠷ ᠵᠶ᠋ᠠᠨ ᠪᠡᠯᠡᠳᠬᠡᠵᠦ ᠪᠠᠷᠠᠪᠠᠯ ᠪᠦᠬᠡᠴᠦᠳ ᠵᠶ᠋ᠠᠨ ᠪᠦᠬᠡ ᠵᠢᠨ ᠲᠠᠯᠠᠪᠠᠢ᠎ᠳᠤ ᠤᠷᠢᠬᠤ ᠵᠢᠨ ᠬᠠᠮᠳᠤ ᠲᠤᠰ ᠲᠤᠰ᠎ᠤᠨ ᠪᠦᠬᠡ ᠵᠢᠨ ᠵᠶ᠋ᠠᠨ ᠴᠤᠯᠠ ᠭᠤᠩᠰᠢᠨ᠎ᠢ ᠲᠠᠭᠤᠳᠠᠨ᠂ ᠲᠡᠳᠡᠨ᠎ᠤ ᠭᠡᠢ ᠮᠤᠷᠢ ᠰᠦᠯᠳᠡ ᠵᠢ ᠮᠠᠨᠳᠤᠭᠤᠯᠳᠠᠭ ᠪᠠᠶ᠋ᠢᠵᠠᠢ᠃ ᠵᠢᠱ᠌ᠢᠶᠡᠯᠡᠵᠦ ᠬᠡᠯᠡᠪᠡᠯ᠄ ᠬᠠᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠠᠪᠤᠷᠭᠤ ᠪᠦᠬᠡ ᠴᠠᠭ᠋ᠠᠨᠬᠦᠦ ᠵᠢ ᠲᠠᠯᠪᠢᠬᠤ᠎ᠳᠠᠭᠠᠨ᠄ 《ᠲᠡᠷᠡ ᠪᠦᠬᠡ ᠬᠡᠨ᠎ᠤ ᠭᠡᠨ ᠪᠤᠢ？ ᠡᠵᠡᠨ᠎ᠡ ᠬᠠᠭᠤᠴᠢᠨ ᠲᠤᠷᠭᠤᠳ ᠬᠤᠰᠢᠭᠤᠨ᠎ᠤ ᠵᠠᠰᠠᠭ ᠲᠦᠷᠦ ᠵᠢᠨ ᠵᠢᠶᠦ᠋ᠨ ᠸᠠᠩ᠂ ᠰᠧᠯᠢᠩ ᠨᠤᠶᠠᠨ ᠯᠾᠠᠸᠠᠩᠵᠠᠪ ᠲᠠᠨ᠎ᠠ ᠪᠦᠬᠡ ᠡ᠂ ᠯᠤᠤ ᠵᠢᠨ ᠴᠠᠬᠢᠯᠭ᠋ᠠᠨ ᠵᠶ᠋ᠠᠷ ᠰᠦᠷ᠎ᠢ ᠪᠠᠳᠠᠷᠠᠭᠤᠯᠤᠭᠴᠢ ᠦᠨᠡᠨ ᠬᠦᠴᠦᠳᠦ ᠬᠠᠷᠴᠠᠭ᠋ᠠᠢ᠂ ᠨᠠᠴᠢᠨ ᠱᠤᠩᠬᠤᠷ ᠴᠠᠭ᠋ᠠᠨᠬᠦᠦ！》 ᠭᠡᠮᠡᠨ ᠭᠤᠩᠰᠢᠨ ᠴᠤᠯᠠ ᠵᠢ ᠲᠠᠭᠤᠳᠠᠨ ᠭᠠᠷᠭ᠋ᠠᠬᠤ᠎ᠳᠤ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ᠎ᠬᠢᠨ ᠴᠤᠯᠠ᠎ᠲᠠᠢ ᠪᠦᠬᠡ᠎ᠪᠠᠨ᠄ 《ᠲᠡᠷᠡ ᠪᠦᠬᠡ ᠬᠡᠨ᠎ᠤ ᠬᠡᠨ ᠪᠤᠢ？ ᠡᠵᠡᠨ᠎ᠡ ᠬᠠᠭᠤᠴᠢᠨ ᠲᠤᠷᠭᠤᠳ ᠬᠤᠰᠢᠭᠤᠨ᠎ᠤ ᠸᠴᠢᠷ ᠳ᠋ᠠᠷ᠎ᠠ ᠨᠤᠮᠴᠢ ᠮᠡᠷᠭᠡᠨ ᠺᠠᠮᠪᠤ ᠬᠤᠪᠢᠯᠭ᠋ᠠᠨ ᠡᠵᠡᠢ ᠯᠠᠮᠠ ᠲᠠᠨ᠎ᠠ ᠨᠠᠴᠢᠨ ᠱᠤᠩᠬᠤᠷ ᠴᠤᠯᠠ᠎ᠲᠠᠢ ᠪᠦᠬᠡ ᠨᠢᠮ᠎ᠠ》 ᠭᠡᠮᠡᠨ ᠲᠠᠭᠤᠳᠠᠨ ᠭᠠᠷᠭ᠋ᠠᠨ᠎ᠠ᠃ ᠪᠦᠬᠡᠴᠦᠳ ᠴᠤ᠌ ᠭᠤᠩᠰᠢᠨ ᠴᠤᠯᠠ ᠵᠢᠨ ᠠᠶ᠎ᠠ ᠲᠤᠮᠳᠠ ᠠᠷᠢᠶᠠᠳᠠᠨ ᠵᠢᠭᠦᠷᠳᠡᠨ᠎ᠤ ᠲᠡᠪᠢᠯᠭᠡ᠎ᠪᠠᠷ ᠲᠠᠯᠠᠪᠤᠷ᠎ᠲᠤ ᠲᠡᠯᠡᠨ ᠭᠠᠷᠴᠤ᠂ ᠭᠤᠤᠯ ᠠᠰᠠᠷ᠎ᠤᠨ ᠡᠮᠦᠨ᠎ᠡ ᠬᠦᠷᠴᠦ ᠨᠤᠶᠠᠳ ᠰᠠᠶ᠋ᠢᠳ ᠭᠡᠭᠡᠨ ᠯᠠᠮᠠ᠎ᠳᠤ ᠬᠤᠶᠠᠷ ᠠᠯᠠᠭ᠎ᠠ᠎ᠪᠠᠨ ᠬᠠᠪᠰᠤᠷᠴᠤ ᠨᠠᠮᠠᠨᠴᠢᠯᠠᠨ ᠮᠦᠷᠭᠦᠭᠡᠳ᠂ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ᠎ᠤ ᠲᠤᠬᠢᠶ᠎ᠠ᠎ᠪᠠᠷ ᠤᠨᠤᠭ᠋ᠠᠯᠳᠠ ᠵᠢᠨ ᠪᠦᠬᠡ᠎ᠲᠠᠢ᠎ᠪᠠᠨ ᠪᠠᠷᠢᠯᠳᠤᠵᠤ ᠡᠬᠢᠯᠡᠨ᠎ᠡ᠃
    ᠦᠷᠡᠰ ᠨᠠᠶ᠋ᠢᠷ᠂ ᠵᠡᠷᠭᠡ ᠰᠢᠷᠠᠬᠤ ᠨᠠᠶ᠋ᠢᠷ ᠵᠡᠷᠭᠡ ᠶᠡᠭᠡ ᠨᠠᠶ᠋ᠢᠷ᠎ᠲᠤ ᠪᠠᠷᠤᠭ 128 ᠪᠦᠬᠡ᠂ ᠤᠪᠤᠭ᠋ᠠᠨ ᠨᠠᠶ᠋ᠢᠷ᠎ᠲᠤ ᠪᠠᠷᠤᠭ᠎ᠲᠠᠭᠠᠨ 64 ᠪᠦᠬᠡ ᠲᠠᠯᠪᠢᠳᠠᠭ ᠪᠠᠶ᠋ᠢᠭᠰᠠᠨ ᠪᠦᠭᠡᠳ ᠮᠦᠷᠦᠶ᠋ᠢᠴᠡᠭᠡᠨ᠎ᠤ ᠳ᠋ᠦᠩ᠎ᠳᠤ ᠠᠳᠠᠯᠢ ᠪᠤᠰᠤ ᠲᠠᠪᠠᠭ᠎ᠠ ᠵᠢᠨ ᠪᠦᠬᠡ ᠪᠠ ᠲᠡᠷᠢᠭᠦᠨ ᠲᠡᠳ᠋ ᠪᠦᠬᠡ ᠢᠯᠭ᠋ᠠᠷᠠᠨ ᠭᠠᠷᠬᠤ ᠪᠤᠯᠤᠨ᠎ᠠ᠃ ᠲᠡᠷᠢᠭᠦᠨ ᠪᠦᠬᠡ ᠶᠡᠷᠦ᠎ᠳᠡᠭᠡᠨ ᠵᠢᠷᠭᠤᠭ᠎ᠠ ᠪᠤᠶᠤ ᠲᠤᠯᠤᠭ᠋ᠠᠨ ᠲᠠᠪᠠᠭ᠎ᠠ ᠲᠠᠪᠠᠵᠤ ᠪᠠᠶ᠋ᠢᠵᠤ ᠰᠠᠶᠢ ᠮᠠᠩᠨᠠᠢ ᠵᠢᠨ ᠪᠦᠬᠡ ᠪᠤᠯᠳᠠᠭ᠃ ᠲᠠᠪᠠᠭ᠎ᠠ᠎ᠲᠠᠢ ᠪᠠᠷᠢᠯᠳᠤᠭ᠋ᠠᠨ᠎ᠳᠤ ᠠᠬ᠎ᠠ ᠲᠡᠭᠦᠦ ᠬᠤᠶᠠᠷ ᠤᠨᠤᠭᠤ ᠲᠠᠭ᠋ᠠᠷᠠᠬᠤ ᠪᠤᠶᠤ ᠪᠠᠭᠰᠢ ᠱᠠᠪᠢ ᠬᠤᠶᠠᠷ ᠲᠠᠭ᠋ᠠᠷᠠᠬᠤ ᠦᠶ᠎ᠡ᠎ᠳᠤ ᠨᠢᠭᠡ᠎ᠨᠢ ᠨᠦᠭᠦᠭᠡ᠎ᠳᠡᠭᠡᠨ ᠨᠠᠶ᠋ᠢᠷ ᠲᠠᠯᠪᠢᠨ ᠪᠠᠭᠤᠵᠤ ᠦᠭᠬᠦ ᠶᠠᠪᠤᠳᠠᠯ ᠲᠤᠬᠢᠶᠠᠯᠳᠤᠳᠠᠭ᠂ ᠡᠨᠡ ᠦᠶ᠎ᠡ᠎ᠳᠤ ᠱᠤ᠎ᠳᠤ ᠰᠠᠭᠤᠬᠤ ᠪᠦᠬᠡᠴᠢᠨ ᠭᠡᠵᠦ ᠭᠠᠷᠤᠨ᠎ᠠ᠂ ᠲᠡᠶ᠋ᠢᠮᠦ ᠪᠦᠬᠡ ᠨᠢᠭᠡ ᠲᠠᠪᠠᠭ᠎ᠠ᠎ᠳᠤ ᠪᠠᠷᠢᠯᠳᠤᠬᠤ ᠦᠭᠡᠢ ᠦᠩᠭᠡᠷᠡᠨ᠂ ᠭᠤᠷᠪᠠ ᠲᠦᠷᠪᠡᠳᠦᠭᠡᠷ ᠨᠡᠷ᠎ᠡ ᠪᠤᠶᠤ ᠲᠡᠷᠢᠭᠦᠨ ᠲᠡᠳ᠋᠎ᠢ ᠪᠤᠯᠢᠶᠠᠯᠳᠤᠬᠤ ᠵᠠᠪᠰᠢᠶᠠᠨ （ᠲᠤᠬᠢᠶᠠᠯ）᠎ᠲᠠᠢ ᠪᠤᠯᠳᠠᠭ᠃ ᠲᠤᠬᠠᠢ ᠵᠢᠨ ᠬᠤᠶᠠᠷ ᠪᠦᠬᠡ ᠬᠦᠴᠦ ᠲᠡᠩᠴᠡᠨ ᠤᠳᠠᠪᠠᠯ ᠬᠠᠶ᠋ᠢᠮ （ᠲᠡᠩᠴᠡᠬᠦ） ᠪᠤᠯᠤᠭᠰᠠᠨ ᠵᠶ᠋ᠠᠷ ᠪᠤᠳᠤᠭ᠋ᠠᠳ ᠲᠠᠬᠢᠵᠤ ᠪᠠᠷᠢᠯᠳᠤᠭᠤᠯᠤᠨ ᠰᠢᠭᠦᠯᠳᠡ ᠭᠠᠷᠭ᠋ᠠᠨ᠎ᠠ᠃ ᠪᠦᠬᠡᠴᠢᠨ ᠪᠠᠷᠢᠯᠳᠤᠵᠤ ᠪᠠᠷᠠᠭ᠋ᠠᠳ ᠰᠢᠭᠦᠭᠰᠡᠨ ᠨᠢᠭᠡ᠎ᠨᠢ ᠰᠢᠭᠦᠭᠳᠡᠭᠰᠡᠨ ᠨᠢᠭᠡ᠎ᠪᠠᠨ ᠲᠠᠳᠠᠵᠤ ᠪᠤᠰᠬᠠᠭ᠋ᠠᠳ ᠰᠢᠷᠤᠢ ᠵᠢ᠎ᠨᠢ ᠭᠦᠪᠢᠵᠦ ᠦᠭᠬᠦ᠎ᠳᠤ ᠤᠨᠠᠭᠰᠠᠨ ᠪᠦᠬᠡ ᠨᠦᠭᠦᠭᠡ ᠪᠦᠬᠡ ᠵᠢᠨ ᠵᠶ᠋ᠠᠨ ᠵᠡᠭᠦᠨ ᠰᠤᠭᠤᠨ ᠲᠤᠤᠭᠤᠷ ᠭᠠᠷᠤᠭ᠋ᠠᠳ ᠲᠠᠯᠠᠪᠤᠷ᠎ᠠᠴᠠ ᠲᠡᠯᠡᠵᠤ ᠪᠠᠭᠤᠨ᠎ᠠ᠃ ᠰᠢᠭᠦᠭᠰᠡᠨ ᠪᠦᠬᠡ ᠨᠤᠶᠠᠳ ᠰᠠᠶ᠋ᠢᠳ᠎ᠲᠤ ᠮᠦᠷᠭᠦᠭᠡᠳ ᠬᠦᠯ᠎ᠤᠨ ᠰᠠᠶ᠋ᠢᠳ᠎ᠠᠴᠠ ᠰᠠᠴᠤᠯᠢ ᠵᠢᠨ ᠪᠤᠤᠪᠤ ᠰᠢᠬᠢᠷ ᠠᠪᠴᠤ ᠲᠡᠭᠡᠳᠦ ᠲᠡᠭᠷᠢ ᠲᠡᠷᠭᠡᠳᠡ ᠤᠯᠠᠨ᠎ᠳᠤ ᠰᠠᠴᠤᠨ ᠦᠭᠳᠡᠭ᠃ ᠪᠠᠷᠢᠯᠳᠤᠭ᠋ᠠᠨ ᠲᠡᠭᠦᠰᠦᠭᠰᠡᠭᠡᠷ ᠪᠦᠬᠡ ᠵᠢᠨ ᠶᠠᠪᠤᠳᠠᠯ ᠬᠠᠮᠢᠶᠠᠷᠤᠭᠴᠢᠳ᠎ᠠᠴᠠ ᠴᠤᠯᠠᠯᠠᠬᠤ ᠶᠤᠰᠤᠳᠠᠢ ᠪᠦᠬᠡᠴᠦᠳ᠎ᠲᠤ ᠴᠤᠯᠠ ᠴᠢᠮᠡᠭ ᠤᠯᠭᠤᠬᠤ ᠵᠢᠨ ᠬᠠᠮᠳᠤ ᠲᠡᠷᠢᠭᠦᠨ ᠪᠦᠬᠡ᠎ᠳᠡᠭᠡᠨ ᠲᠤᠰᠬᠠᠢ ᠢᠷᠦᠭᠡᠯᠴᠢ ᠵᠠᠯᠠᠵᠤ 《ᠪᠦᠬᠡ ᠵᠢᠨ ᠮᠠᠭᠳᠠᠭ᠋ᠠᠯ》 ᠲᠠᠯᠪᠢᠭᠤᠯᠤᠨ ᠪᠦᠬᠡᠴᠦᠳ ᠵᠶ᠋ᠠᠨ ᠮᠠᠭᠳᠠᠵᠤ ᠤᠯᠠᠨ ᠵᠶ᠋ᠠᠨ ᠪᠠᠶᠠᠰᠬᠠᠨ᠎ᠠ᠃ ᠢᠩᠬᠢᠵᠦ ᠪᠠᠷᠠᠪᠠᠯ ᠬᠤᠰᠢᠭᠤ ᠵᠠᠬᠢᠷᠤᠭᠴᠢ᠎ᠠᠴᠠ ᠪᠦᠬᠡᠴᠢᠨ ᠵᠶ᠋ᠠᠨ ᠱᠠᠩᠨᠠᠵᠤ ᠡᠬᠢᠯᠡᠨ᠎ᠡ᠃ ᠪᠦᠬᠦ ᠪᠦᠬᠡᠴᠢᠨ᠎ᠤ ᠬᠠᠭ᠋ᠠᠰ᠎ᠢ ᠪᠦᠷ ᠱᠠᠩᠨᠠᠳᠠᠭ ᠮᠦᠷᠳᠡᠭᠡᠨ ᠲᠡᠷᠢᠭᠦᠨ ᠪᠦᠬᠡ᠎ᠳᠤ ᠤᠯᠠᠩᠬᠢ᠎ᠳᠠᠭᠠᠨ ᠲᠡᠪᠡᠯ᠎ᠤᠨ ᠲᠤᠷᠭ᠎ᠠ᠂ ᠴᠠᠢ ᠬᠠᠳᠠᠭ᠂ ᠨᠢᠭᠡ ᠲᠤᠯᠤᠭ᠋ᠠᠢ ᠲᠤᠷᠳᠤᠮ ᠱᠠᠩᠨᠠᠵᠤ᠂ ᠵᠠᠷᠢᠮ ᠦᠶ᠎ᠡ᠎ᠳᠤ ᠮᠤᠷᠢ ᠦᠭᠴᠦ᠂ ᠲᠡᠳ᠋ ᠪᠦᠬᠡ᠎ᠳᠤ ᠲᠡᠪᠡᠯ᠎ᠤᠨ ᠲᠤᠷᠭ᠎ᠠ᠂ ᠴᠠᠢ ᠬᠠᠳᠠᠭ ᠪᠠᠷᠢᠵᠤ᠂ ᠪᠤᠰᠤᠳ᠎ᠲᠤᠨᠢ ᠲᠠᠪᠠᠭ᠋ᠠᠨ᠎ᠤ ᠲᠤᠭ᠎ᠠ ᠵᠢ ᠦᠨᠳᠦᠰᠦᠯᠡᠨ ᠠᠳᠠᠯᠢ ᠪᠤᠰᠤ᠎ᠪᠠᠷ ᠱᠠᠩᠨᠠᠨ᠎ᠠ᠂ ᠱᠠᠩᠨᠠᠯ᠎ᠤᠨ ᠶᠡᠭᠡ ᠪᠠᠭ᠎ᠠ᠎ᠨᠢ ᠤᠯᠠᠩᠬᠢ ᠎ᠳᠠᠭᠠᠨ ᠡᠳ᠋᠎ᠤᠨ ᠵᠠᠰᠠᠭ᠎ᠤᠨ ᠪᠠᠶ᠋ᠢᠳᠠᠯ ᠵᠶ᠋ᠠᠷ ᠰᠢᠯᠳᠠᠭ᠋ᠠᠯᠠᠭᠳᠠᠳᠠᠭ ᠪᠠᠶ᠋ᠢᠵᠠᠢ᠃
    ᠬᠠᠯᠬ᠎ᠠ ᠪᠦᠬᠡ ᠵᠢᠨ ᠤᠪᠰᠤ ᠮᠡᠷᠭᠡᠵᠢᠯ ᠠᠯᠢ ᠤᠯᠠᠨ ᠪᠠᠶ᠋ᠢᠵᠤ᠂ ᠲᠡᠳᠡᠭᠡᠷ᠎ᠤᠨ ᠲᠤᠳᠤᠷ᠎ᠠ᠎ᠠᠴᠠ ᠦᠷᠭᠦᠯᠵᠢ ᠬᠡᠷᠡᠭᠯᠡᠭᠳᠡᠳᠡᠭ ᠤᠪᠰᠤ ᠭᠡᠪᠡᠯ᠄ ᠡᠭᠦᠷᠬᠦ （ᠠᠴᠢᠬᠤ）᠂ ᠲᠤᠩᠭᠤᠷᠠᠬᠤ᠂ ᠬᠠᠪᠰᠤᠷᠬᠤ᠂ ᠲᠡᠭᠡᠭᠡᠳᠡᠬᠦ᠂ ᠲᠠᠰᠢᠬᠤ᠂ ᠰᠤᠶ᠋ᠢᠯᠠᠬᠤ᠂ ᠬᠡᠢ ᠡᠷᠭᠢᠭᠦᠯᠬᠦ （ᠡᠷᠭᠦᠬᠦ）᠂ ᠰᠢᠷᠭᠤᠬᠤ᠂ ᠲᠤᠭᠳᠤᠷᠬᠤ᠂ ᠭᠤᠬᠠᠳᠠᠬᠤ᠂ ᠬᠦᠶᠦᠬᠦ᠂ ᠮᠤᠰᠭᠢᠬᠤ᠂ ᠲᠠᠷᠤᠬᠤ ᠵᠡᠷᠭᠡ ᠪᠤᠯᠬᠤ ᠪᠦᠭᠡᠳ ᠡᠳᠡᠭᠡᠷ ᠮᠡᠭᠡ᠎ᠨᠦᠭᠦᠳ᠎ᠢ ᠬᠠᠮᠳᠤᠷᠠᠭᠤᠯᠤᠨ ᠠᠮᠢᠳᠤᠯᠢᠭ ᠬᠡᠷᠡᠭᠯᠡᠳᠡᠭ᠎ᠨᠢ ᠤᠯᠠᠨ ᠪᠠᠶ᠋ᠢᠵᠠᠢ᠃
    ᠰᠠᠶ᠋ᠢᠨ ᠪᠦᠬᠡᠴᠢᠨ ᠵᠶ᠋ᠠᠨ ᠴᠤᠯᠠᠯᠠᠳᠠᠭ ᠵᠠᠩᠰᠢᠯ᠎ᠲᠠᠢ ᠪᠠᠶ᠋ᠢᠵᠤ᠂ ᠭᠤᠤᠯᠳᠠᠭᠤ ᠬᠦᠴᠦ ᠶᠡᠬᠡᠳᠡᠢ ᠠᠷᠢᠶᠠᠳᠠᠨ ᠵᠢᠭᠦᠷᠳᠡᠨ᠎ᠤ ᠨᠡᠷ᠎ᠡ᠎ᠪᠠᠷ ᠨᠡᠷᠡᠶ᠋ᠢᠳᠴᠦ ᠵᠢᠩᠬᠢᠨᠢ ᠴᠤᠯᠠ ᠪᠤᠯᠭ᠋ᠠᠳᠠᠭ ᠪᠠᠶ᠋ᠢᠵᠠᠢ᠃ ᠬᠤᠰᠢᠭᠤ ᠨᠠᠶ᠋ᠢᠷ᠎ᠤᠨ ᠲᠠᠪᠠᠭ᠋ᠠᠨ᠎ᠤ ᠲᠤᠭ᠎ᠠ ᠪᠠ ᠦᠵᠦᠭᠦᠷᠯᠡᠭᠰᠡᠨ ᠪᠠᠶ᠋ᠢᠳᠠᠯ᠎ᠢ ᠦᠨᠳᠦᠰᠦᠯᠡᠨ 《ᠬᠠᠷᠴᠠᠭ᠋ᠠᠢ》᠂ 《ᠱᠤᠩᠬᠤᠷ》᠂    《ᠨᠠᠴᠢᠨ》᠂ 《ᠵᠠᠭ᠋ᠠᠨ》᠂ 《ᠠᠷᠰᠯᠠᠨ》᠂ 《ᠠᠪᠤᠷᠭᠤ》 （ᠬᠠᠮᠤᠭ ᠦᠨᠳᠦᠷ ᠴᠤᠯᠠ） ᠵᠡᠷᠭᠡ ᠵᠢᠩᠬᠢᠨᠢ ᠴᠤᠯᠠ ᠤᠯᠭᠤᠵᠤ᠂ ᠠᠪᠤᠷᠭᠤ ᠴᠤᠯᠠ᠎ᠲᠠᠢ ᠪᠦᠬᠡ ᠪᠠᠷᠢᠯᠳᠤᠬᠤ ᠦᠭᠡᠢ ᠪᠠᠶ᠋ᠢᠳᠠᠯ ᠲᠤᠤᠷ᠎ᠠ ᠴᠤ᠌ ᠨᠠᠶ᠋ᠢᠷ ᠨᠠᠭ᠋ᠠᠳᠤᠮ᠎ᠤᠨ ᠲᠡᠷᠢᠭᠦᠨ ᠪᠦᠬᠡ ᠵᠢᠨ ᠱᠠᠩ᠎ᠢ ᠤᠯᠭᠤᠳᠠᠭ ᠶᠤᠰᠤ᠎ᠲᠠᠢ ᠪᠠᠶ᠋ᠢᠭᠰᠠᠨ ᠪᠦᠭᠡᠳ ᠵᠢᠩᠬᠢᠨᠢ ᠴᠤᠯᠠ ᠵᠢᠨ ᠲᠡᠭᠡᠷ᠎ᠡ ᠬᠤᠷᠰᠢᠶ᠎ᠠ ᠦᠭᠡ᠂ ᠭᠤᠷᠪᠠᠨ ᠦᠭᠡ᠂ ᠲᠦᠷᠪᠡᠨ ᠦᠭᠡ ᠵᠢᠨ ᠴᠢᠮᠡᠭ ᠴᠤᠯᠠ ᠨᠡᠮᠡᠵᠦ᠂ ᠪᠦᠬᠡ ᠵᠢᠨ ᠠᠯᠳᠠᠷ ᠴᠤᠯᠠ ᠵᠢ ᠲᠠᠭᠤᠷᠢᠰᠬᠠᠳᠠᠭ ᠪᠠᠶ᠋ᠢᠵᠠᠢ᠃ ᠪᠦᠬᠡ ᠵᠢᠨ ᠪᠦᠬᠦ ᠶᠠᠪᠤᠳᠠᠯ ᠲᠠᠭᠤᠰᠤᠭᠰᠠᠨ᠎ᠤ ᠲᠠᠷᠠᠭ᠎ᠠ ᠪᠦᠬᠡᠴᠦᠳ ᠵᠶ᠋ᠠᠨ ᠴᠤᠭᠯᠠᠭᠤᠯᠤᠨ ᠴᠠᠶ᠋ᠢᠯᠠᠵᠤ ᠬᠤᠭᠤᠯᠠᠯᠠᠭᠤᠯᠬᠤ᠎ᠳᠤ ᠤᠭᠤᠴᠠ ᠪᠤᠶᠤ ᠲᠠᠯᠤ᠎ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠮᠢᠬᠠᠨ᠎ᠳᠤ ᠪᠦᠬᠦᠯᠢ᠎ᠪᠠᠷ ᠴᠢᠨᠠᠭᠰᠠᠨ ᠬᠦᠵᠦᠭᠦᠦ ᠲᠠᠯᠪᠢᠵᠤ᠂ ᠨᠡᠷᠡᠳᠡᠢ ᠴᠤᠯᠠ᠎ᠲᠠᠢ ᠪᠦᠬᠡᠴᠢᠨ ᠵᠶ᠋ᠠᠷ ᠭᠦᠵᠦᠭᠦᠦ ᠮᠤᠰᠭᠢᠭᠤᠯᠤᠨ ᠰᠠᠯᠭ᠋ᠠᠭᠤᠯᠵᠤ᠂ ᠤᠯᠠᠨ ᠪᠦᠬᠡᠴᠢᠨ᠎ᠳᠡᠭᠡᠨ ᠬᠤᠪᠢᠶᠠᠨ ᠢᠳᠡᠭᠦᠯᠬᠦ ᠵᠠᠩᠰᠢᠯ᠎ᠲᠠᠢ ᠪᠠᠶ᠋ᠢᠵᠠᠢ᠃
    ᠬᠠᠯᠬ᠎ᠠ ᠪᠦᠬᠡ᠎ᠨᠢ ᠬᠤᠷᠢᠳᠤᠭ᠋ᠠᠷ ᠵᠠᠭᠤᠨ᠎ᠤ ᠭᠤᠴᠢᠭ᠋ᠠᠳ ᠤᠨ᠎ᠠᠴᠠ ᠲᠠᠯᠠᠭ᠋ᠠᠳ ᠤᠨ ᠪᠤᠯᠳᠠᠯ᠎ᠠ ᠲᠠᠪᠢᠭ᠋ᠠᠳ ᠵᠢᠯ ᠤᠯᠠᠮᠵᠢᠯᠠᠨ ᠲᠡᠯᠭᠡᠷᠡᠬᠦ ᠶᠠᠪᠤᠴᠠ᠎ᠳᠤ ᠠᠯᠢ ᠤᠯᠠᠨ ᠰᠠᠶ᠋ᠢᠨ ᠪᠦᠬᠡ ᠴᠤᠯᠭᠤᠷᠠᠨ ᠭᠠᠷᠴᠤ᠂ ᠬᠤᠰᠢᠭᠤ ᠨᠤᠳᠤᠭ᠂ ᠴᠢᠨᠠᠭᠰᠢᠯᠠᠨ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠠᠶ᠋ᠢᠮᠠᠭ ᠤᠷᠤᠨ᠎ᠳᠤ ᠴᠤ᠌ ᠠᠯᠳᠠᠷ ᠨᠡᠷ᠎ᠡ᠎ᠪᠠᠨ ᠮᠠᠨᠳᠤᠭᠤᠯᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠲᠡᠳᠡᠨ᠎ᠤ ᠲᠤᠳᠤᠷ᠎ᠠ᠎ᠠᠴᠠ ᠴᠢᠮᠡᠳᠳᠤᠤ᠂ ᠰᠡᠩᠭᠡ᠂ ᠴᠠᠭ᠋ᠠᠨᠬᠦᠦ （ᠪᠦᠬᠡᠴᠠᠭ᠋ᠠᠨ）᠂ ᠡᠪᠦᠭᠡᠨᠬᠦᠦ᠂ ᠯᠤᠤᠬᠤ᠂ ᠯᠠᠯᠢ ᠵᠢᠨ ᠭᠤᠮᠪᠤ᠂ ᠴᠡᠪᠡᠭᠮᠢᠳ᠂ ᠽᠠᠨᠳᠠᠨᠮᠢᠳᠠᠭ᠂ ᠴᠡᠸᠡᠩᠳᠤᠷᠵᠢ᠂ ᠨᠢᠮ᠎ᠠ （ᠲᠡᠮᠴᠢ ᠯᠠᠮᠠ）᠂ ᠴᠤᠶ᠋ᠢᠮᠪᠤᠯ ᠯᠠᠮᠠ᠂ ᠺᠤᠯᠢ᠂ ᠲᠡᠯᠢᠭᠬᠥ᠋ᠨᠵᠢ᠂ ᠷᠢᠨᠴᠢᠨᠳᠠᠸᠠ᠂ ᠬᠡᠯᠢᠭᠵᠡᠮᠰᠤ ᠨᠠᠷ ᠲᠤᠷᠠᠳᠤᠭᠳᠠᠬᠤ ᠶᠤᠰᠤᠳᠠᠢ᠃