— ᠨᠠᠨᠵᠢᠩᠳᠤ ᠪᠣᠯᠤᠭᠰᠠᠨ ᠪᠥᠬᠦ ᠣᠷᠤᠨᠤ ᠮᠣᠩᠭᠤᠯ ᠵᠶ᠋ᠠᠷ ᠬᠢᠴᠢᠶᠡᠯᠯᠡᠬᠦ ᠳᠣᠮᠳᠠᠳᠤ
ᠰᠤᠷᠭ᠋ᠠᠭᠤᠯᠢ ᠵᠢᠨ ᠨᠡᠶ᠋ᠢᠭᠡᠮᠤᠨ ᠰᠢᠨᠵᠢᠯᠡᠭᠡᠨᠤ ᠭᠤᠣᠯᠯᠠᠭᠴᠢ ᠪᠠᠭᠰᠢ ᠵᠢᠨ
ᠳᠡᠭᠡᠳᠦ ᠵᠡᠷᠭᠡ ᠵᠢᠨ ᠪᠣᠯᠪᠠᠰᠤᠷᠠᠯᠳᠤ ᠣᠷᠤᠯᠴᠠᠭᠰᠠᠨ ᠲᠥᠷᠦᠭᠳᠡᠯ
ᠠ᠋ᠷᠳᠠᠨᠢᠪᠠᠶᠠᠷ
《ᠨᠠᠨᠵᠢᠩᠳᠤ ᠣᠴᠢᠵᠤ ᠮᠤᠩᠭᠤᠯ ᠪᠠᠭᠰᠢ ᠨᠠᠷᠤᠨ ᠪᠣᠯᠪᠠᠰᠣᠷᠠᠯᠳᠤ ᠣᠷᠣᠯᠴᠠᠬᠣ ᠭᠡᠨᠠ？》 ᠭᠡᠬᠦ ᠰᠣᠨᠢᠭᠤᠴᠢᠯᠠᠭᠰᠠᠨ ᠠᠰᠠᠭᠤᠯᠲᠠ ᠲᠠᠭ᠋ᠠᠭᠤᠯᠵᠤ ᠪᠢ ᠠ᠋ᠷᠡᠭᠡᠯᠵᠡᠭᠡᠲᠠᠢᠨᠢ ᠠᠷᠭᠠ ᠦᠭᠡᠢ ᠨᠠᠨᠵᠢᠩᠢ ᠵᠣᠷᠢᠯᠠ᠃ ᠤᠮᠠᠷᠠᠳᠤ ᠣᠷᠤᠨᠳᠤ ᠬᠦᠢ᠍ᠲᠡᠨᠤ ᠠ᠋ᠷᠴᠢ ᠴᠢᠩᠭ᠋ᠠᠷᠠᠵᠤ ᠪᠠᠶ᠋ᠢᠭᠰᠠᠨ ᠴᠤ᠌ ᠨᠠᠨᠵᠢᠩᠳᠤ ᠬᠠᠷᠢᠨ ᠴᠡᠴᠡᠭ ᠵᠤᠯᠭ᠋ᠠᠷᠠᠭ᠋ᠠᠳᠣᠢ ᠪᠠᠶ᠋ᠢᠭᠰᠠᠨ ᠠᠵᠤᠭᠤ᠃
ᠠ᠋ᠬᠢᠯᠡᠯᠲᠡ ᠵᠢᠨ ᠶᠤᠰᠤᠯᠠᠯ ᠪᠣᠯᠪᠠ᠃ 《ᠪᠥᠬᠦ ᠣᠷᠤᠨᠤ ᠮᠣᠩᠭᠤᠯ ᠵᠶ᠋ᠠᠷ ᠬᠢᠴᠢᠶᠡᠯᠯᠡᠬᠦ ᠳᠣᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ ᠵᠢᠨ ᠨᠡᠶ᠋ᠢᠭᠡᠮᠤᠨ ᠰᠢᠨᠵᠢᠯᠡᠭᠡᠨᠤ ᠭᠤᠣᠯᠯᠠᠭᠴᠢ ᠪᠠᠭᠰᠢ ᠵᠢᠨ ᠳᠡᠭᠡᠳᠦ ᠵᠡᠷᠭᠡ ᠵᠢᠨ ᠪᠣᠯᠪᠠᠰᠤᠷᠠᠯ》 ᠭᠡᠬᠦ ᠪᠣᠰᠤᠭᠠ ᠮᠤᠩᠭᠤᠯ ᠦᠰᠦᠭ ᠬᠠᠨᠠᠨ ᠲᠠᠭᠡᠷᠠ ᠲᠤᠷᠠᠢ᠍ᠢ᠍ᠬᠤᠳᠤ ᠴᠥᠭᠡᠨ ᠮᠣᠩᠭᠤᠯᠴᠣᠳ ᠮᠢᠨᠢ ᠨᠠᠨᠵᠢᠩ ᠬᠤᠲᠠᠳᠤ ᠬᠥᠯ ᠭᠢᠰᠬᠢᠵᠦ᠂ ᠮᠤᠩᠭᠤᠯ ᠬᠡᠯᠡᠪᠠᠨ ᠰᠤᠷᠴᠤ ᠰᠤᠳᠤᠯᠤᠨᠠ ᠭᠡᠭᠴᠢ ᠪᠠᠭ᠍ᠠᠷᠬᠠᠯᠲᠠᠢ ᠪᠦᠭᠡᠳ ᠣᠮᠤᠭᠰᠢᠯᠲᠠᠢ ᠰᠠᠨᠠᠭᠳᠠᠯᠠ᠃
ᠵᠢᠶᠠᠩᠰᠤ᠂ ᠨᠠᠨᠵᠢᠩ ᠪᠣᠯ ᠳᠤᠮᠳᠠᠳᠣ ᠤᠯᠤᠰᠤᠨ ᠵᠢᠭ᠋ᠠᠨ ᠰᠤᠷᠭ᠋ᠠᠯᠳᠠ ᠵᠢᠨ ᠬᠠᠮᠤᠭᠤᠨ ᠰᠠᠶ᠋ᠢᠨ ᠮᠤᠵᠢ ᠬᠤᠲᠠ ᠵᠢᠨ ᠨᠢᠭᠡᠨᠢ ᠶᠤᠮ᠃ ᠬᠢᠲᠠᠳᠤᠨ ᠲᠠᠪᠰᠢᠭᠰᠠᠨ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠵᠢ ᠰᠤᠷᠴᠣ ᠰᠤᠳᠤᠯᠤᠨ ᠦᠪᠡᠷᠤᠨ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠᠪᠠᠨ ᠤᠯᠠᠮ ᠲᠡᠭᠦᠯᠳᠡᠷᠵᠢᠭᠦᠯᠬᠦᠪᠠᠷ ᠪᠦᠭᠦ ᠤᠷᠤᠨᠤ ᠰᠢᠯᠢᠳᠡᠭ ᠬᠢᠴᠢᠶᠡᠯᠯᠡᠭᠴᠢ ᠪᠠᠭᠰᠢ ᠨᠠᠷ ᠠ᠋ᠨᠳᠠ ᠢᠷᠡᠭᠰᠡᠨ ᠠᠵᠢ᠃ ᠵᠣᠷᠢᠯᠲᠠ ᠲᠣᠳᠤᠷᠬᠠᠢ᠂ ᠠ᠋ᠭᠦᠷᠭᠡ ᠬᠦᠨᠳᠦ ᠪᠣᠯᠪᠠ᠃
ᠠ᠋ᠨᠡ ᠤᠳᠠᠭ᠋ᠠᠨᠤ ᠪᠣᠯᠪᠠᠰᠤᠷᠠᠯᠢ ᠦᠪᠡᠷᠲᠡᠭᠡᠨ ᠵᠠᠰᠠᠭ᠍ᠤ ᠣᠷᠤᠨᠤ ᠰᠤᠷᠭ᠋ᠠᠨ ᠬᠦᠮᠦᠵᠢᠯᠤᠨ ᠲᠢᠩᠬᠢᠮᠠᠴᠠ ᠠ᠋ᠷᠬᠢᠯᠡᠵᠦ ᠪᠠᠶ᠋ᠢᠭᠠ ᠠᠵᠢ᠃ ᠪᠤᠯᠪᠠᠰᠤᠷᠠᠯᠤᠨ ᠠ᠋ᠬᠢᠨᠳᠤ ᠪᠣᠶᠠᠨᠲᠣᠭᠳᠠᠭ᠍ᠤ ᠲᠠᠷᠤᠭᠠ ᠵᠢᠨ 《ᠤᠯᠠᠮᠵᠢᠯᠠᠯᠲᠤ ᠵᠢᠭ᠋ᠠᠬᠤ ᠠᠷᠭᠠ ᠵᠢᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠬᠢᠴᠢᠶᠡᠯᠯᠡᠭᠡ ᠵᠢᠨ ᠦᠭᠡᠷᠡᠴᠢᠯᠡᠯᠲᠡ ᠬᠢᠬᠦ ᠬᠡᠷᠡᠭᠳᠡᠢ》 ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡᠨᠢ ᠰᠡᠳᠭᠢᠯᠳᠤ ᠮᠠᠰᠢ ᠲᠠᠭ᠋ᠠᠯᠠᠭᠳᠠᠯᠠ᠃ ᠣᠨᠴᠠᠭ᠋ᠠᠶ᠋ᠢᠯᠠᠨ ᠬᠡᠯᠡ ᠪᠢᠴᠢᠭᠤᠨ ᠬᠢᠴᠢᠶᠡᠯᠯᠡᠭᠡᠳᠤ ᠤᠯᠠᠮᠵᠢᠯᠠᠯᠲᠤ ᠵᠢᠭ᠋ᠠᠬᠤ ᠠᠷᠭᠠ ᠲᠤᠩ ᠪᠦᠳᠦᠮᠵᠢᠲᠡᠢ ᠶᠤᠮ ᠭᠡᠵᠦ ᠪᠢ ᠦᠵᠡᠳᠡᠭ᠃ ᠪᠢᠳᠡ ᠴᠦᠮ ᠤᠯᠠᠮᠵᠢᠯᠠᠯᠲᠤ ᠵᠢᠭ᠋ᠠᠬᠤ ᠠᠷᠭᠠ ᠵᠢᠨ ᠲᠥᠷᠦᠳᠡᠰᠦ ᠶᠤᠮ᠃ ᠬᠡᠯᠡ ᠪᠢᠴᠢᠭ ᠵᠢᠭ᠋ᠠᠬᠤ ᠠᠷᠭᠠ ᠮᠠᠨᠢ ᠤᠳᠠᠭ᠋ᠠᠨ ᠵᠢᠯᠤᠨ ᠵᠢᠭ᠋ᠠᠨ ᠰᠤᠷᠭ᠋ᠠᠬᠤ ᠲᠤᠷᠰᠢᠯᠭᠠᠠᠴᠠ ᠰᠢᠷᠭ᠋ᠠᠭᠳᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠣᠬᠢ ᠰᠢᠯᠢᠳᠡᠭ ᠵᠢᠭ᠋ᠠᠬᠤ ᠠᠷᠭᠠ ᠪᠣᠯᠬᠤᠷ ᠲᠡᠷᠡᠨᠢ ᠬᠡᠯᠡ ᠰᠤᠷᠬᠤ ᠮᠠᠰᠢ ᠲᠣᠬᠢᠷᠠᠮᠵᠢᠲᠠᠢ ᠠᠷᠭᠠ ᠮᠦᠨ ᠭᠡᠵᠦ ᠪᠢ ᠦᠵᠡᠨᠠ᠃ ᠮᠦᠨ ᠬᠦ᠌ ᠮᠣᠩᠭᠤᠯ ᠬᠡᠯᠡ ᠪᠣᠯ ᠦᠪᠡᠷᠤᠨ ᠣᠨᠴᠠᠯᠢᠭᠲᠠᠢ᠂ ᠦᠪᠡᠷᠤᠨ ᠬᠥᠭᠵᠢᠯᠤᠨ ᠵᠢᠮᠡ ᠬᠠᠤᠯᠢᠲᠠᠢ ᠬᠡᠯᠡ ᠪᠣᠯᠬᠤᠷ ᠦᠪᠡᠷᠤᠨ ᠬᠡᠰᠡᠨ ᠵᠢᠭ᠋ᠠᠬᠤ ᠠᠷᠭᠠ᠂ ᠰᠤᠷᠬᠤ ᠠᠷᠭᠠᠲᠠᠢ ᠪᠠᠶ᠋ᠢᠬᠤᠨᠢ ᠶᠠᠷᠢᠶᠠᠨ ᠦᠭᠡᠢ᠃ ᠠ᠋ᠨᠠᠨᠢ 《ᠬᠠᠭᠤᠴᠢᠨ ᠵᠶ᠋ᠠᠨ ᠪᠠᠷᠢᠮᠲᠠᠯᠠᠵᠤ᠂ ᠮᠣᠵᠢᠭᠤᠳᠠᠯᠠᠵᠤ ᠪᠠᠢ᠍ᠢ᠍ᠭᠠ》 ᠬᠡᠷᠡᠭ ᠪᠢᠰᠢ᠃ ᠪᠢ ᠤᠯᠠᠮᠵᠢᠯᠠᠯᠲᠤ ᠵᠢᠭ᠋ᠠᠬᠤ ᠠᠷᠭᠠᠪᠠᠨ ᠪᠠᠷᠢᠮᠲᠠᠯᠠᠳᠠᠭ ᠴᠤ᠌ ᠬᠢᠴᠢᠶᠡᠯᠤᠨ ᠦᠭᠡᠷᠡᠴᠢᠯᠡᠯᠲᠡ ᠵᠢ ᠠ᠋ᠰᠡᠷᠭᠦᠴᠡᠳᠡᠭ ᠦᠭᠡᠢ᠃ ᠨᠡᠩ ᠴᠤ᠌ ᠵᠢᠭ᠋ᠠᠬᠤ ᠠᠷᠭᠠ ᠵᠢᠨ ᠰᠢᠨᠡᠴᠢᠯᠡᠯᠲᠡ ᠵᠢ ᠤᠤᠬᠠᠢ ᠵᠢᠨ ᠲᠠᠰᠦ ᠵᠦᠪᠰᠢᠶᠡᠷᠡᠳᠡᠭ ᠨᠢᠭᠡᠨᠢ᠃ ᠴᠠᠭ ᠦᠶᠡ ᠬᠤᠪᠢᠷᠠᠵᠠᠢ᠂ ᠠᠮᠢᠳᠤᠷᠠᠯᠤᠨ ᠬᠡᠯᠪᠡᠷᠢ ᠬᠤᠪᠢᠷᠠᠵᠠᠢ᠃ ᠠ᠋ᠳᠡᠭᠡᠷ ᠬᠤᠪᠢᠷᠠᠯᠲᠠ ᠵᠢ ᠲᠠᠭ᠋ᠠᠯᠳᠤᠨ ᠬᠡᠯᠡ ᠰᠣᠶᠤᠯᠤᠨ ᠵᠠᠷᠢᠮ ᠵᠦᠢ᠍ᠯ ᠴᠤ᠌ ᠬᠤᠪᠢᠷᠠᠵᠠᠢ᠂ ᠴᠢᠨᠠᠭᠰᠢᠯᠠᠪᠠᠯ ᠬᠡᠣᠬᠡᠳ ᠴᠤ᠌ ᠬᠤᠪᠢᠷᠠᠵᠤ ᠪᠠᠶ᠋ᠢᠨᠠ᠃ ᠭᠠᠭᠴᠠ ᠵᠢᠱ᠌ᠢᠶᠡ ᠲᠠᠲᠠᠭ᠍ᠤᠳᠤ᠄ ᠮᠣᠩᠭᠤᠯ ᠦᠭᠡ ᠬᠡᠯᠡ ᠮᠠᠨᠢ ᠨᠡᠭᠦᠳᠡᠯ ᠮᠠᠯᠵᠢᠯ ᠰᠤᠶᠤᠯᠲᠠᠢᠪᠠᠨ ᠤᠶᠠᠯᠳᠤᠨ ᠠ᠋ᠭᠦᠰᠦᠭᠰᠡᠨ ᠦᠭᠡ ᠮᠠᠰᠢ ᠤᠯᠠᠨ ᠪᠠᠶ᠋ᠢᠳᠠᠭ᠃ ᠭᠡᠳᠡᠯᠠ ᠠ᠋ᠳᠤᠭᠡ ᠬᠠᠰᠠᠭ ᠲᠡᠷᠭᠡ᠂ ᠬᠠᠨᠠᠲᠤ ᠭᠡᠷ᠂ ᠮᠣᠷᠢᠨᠤ ᠵᠢᠰᠦᠮ᠂ ᠮᠠᠯᠢ ᠨᠠᠰᠤ ᠬᠦᠢ᠍ᠰᠦᠪᠠᠷ ᠨᠡᠷᠡᠯᠡᠬᠦ ᠁ ᠮᠡᠲᠦ ᠵᠢᠨ ᠶᠡᠷᠦ ᠵᠢᠨ ᠮᠡᠳᠡᠯᠬᠡᠨᠢ ᠰᠤᠷᠤᠭᠴᠢᠳᠤᠨ ᠬᠦᠨᠳᠦ ᠦᠭᠡᠰᠤᠨ ᠵᠢᠭᠰᠠᠭ᠋ᠠᠯᠲᠠᠳᠤ ᠣᠷᠤᠵᠠᠢ᠃ ᠬᠠᠷᠢᠨ ᠰᠢᠨᠡ ᠴᠠᠭᠤᠨ ᠰᠢᠨᠵᠢᠯᠡᠬᠦ ᠤᠬᠠᠭ᠋ᠠᠨᠤ ᠨᠡᠷᠡ ᠲᠣᠮᠢᠶᠠ ᠵᠢ ᠰᠤᠷᠤᠭᠴᠢᠳ ᠪᠠᠭᠰᠢᠠᠴᠠᠪᠠᠨ ᠨᠡᠩ ᠬᠤᠷᠳᠤᠨ ᠬᠦᠯᠢᠶᠡᠨ ᠠᠪᠴᠤ ᠴᠢᠳᠠᠳᠠᠬ᠃ ᠪᠢᠳᠡ ᠴᠤ᠌ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠᠳᠤᠪᠠᠨ ᠦᠭᠡᠷᠡᠴᠢᠯᠡᠯᠲᠡ ᠬᠢᠬᠦ ᠴᠢᠬᠤᠯᠠᠲᠠᠢ ᠪᠣᠯᠵᠠᠢ᠃ ᠠ᠋ᠢ᠍ᠢ᠍ᠮᠦᠷᠭᠦᠤ ᠪᠠᠶ᠋ᠢᠳᠠᠯᠳᠤ ᠪᠢᠳᠡ ᠬᠡᠯᠡ ᠰᠤᠶᠤᠯ ᠵᠶ᠋ᠠᠨ ᠶᠠᠭ᠋ᠠᠬᠢᠵᠦ ᠤᠯᠠᠮᠵᠢᠯᠠᠭ᠍ᠤ ᠪᠣᠢ？ ᠶᠠᠭ᠋ᠠᠬᠢᠵᠦ ᠵᠢᠭ᠋ᠠᠪᠠᠯ ᠬᠠᠮᠤᠭᠤᠨ ᠪᠦᠳᠦᠮᠵᠢᠲᠡᠢ ᠪᠣᠢ？ ᠬᠤᠪᠢᠷᠠᠯᠳᠠ ᠬᠥᠭᠵᠢᠯᠲᠡᠲᠠᠢ ᠬᠡᠷᠬᠢᠨ ᠵᠣᠬᠢᠴᠠᠭ᠍ᠤ ᠪᠣᠢ？ ᠭᠡᠳᠡᠭᠢ ᠬᠦᠮᠦᠨ ᠪᠣᠯᠭ᠋ᠠᠨ ᠪᠣᠳᠤᠯᠬᠢᠯᠠᠭ᠍ᠤ ᠴᠠᠭ ᠪᠣᠯᠵᠠᠢ᠃ ᠨᠡᠶ᠋ᠢᠭᠡᠮᠨᠢ ᠪᠠᠭᠰᠢ ᠵᠢ ᠵᠢᠮᠡᠯᠡᠵᠦ᠂ ᠪᠠᠭᠰᠢᠨᠢ ᠭᠡᠷᠤᠨ ᠠᠬᠠᠮᠠᠳᠲᠤ ᠲᠦᠯᠬᠢᠭᠡᠳ᠂ ᠰᠤᠷᠤᠭᠴᠢᠨᠢ ᠦᠢ᠍ᠯᠡ ᠲᠠᠮᠤᠪᠠᠨ ᠦᠵᠡᠭᠡᠳ ᠮᠦᠨ ᠰᠤᠷᠴᠤ ᠲᠡᠶ᠋ᠢᠯᠬᠦ ᠦᠭᠡᠢ ᠪᠠᠶ᠋ᠢᠭᠠ ᠪᠠ ᠵᠢᠭ᠋ᠠᠬᠤ ᠲᠤᠳᠤᠮ ᠦᠷᠡ ᠳ᠋ᠦᠩ ᠠᠨᠠᠢ ᠪᠣᠯᠵᠤ ᠪᠠᠶ᠋ᠢᠭᠠ ᠵᠢ ᠪᠢᠳᠡ ᠰᠣᠳᠤᠯᠬᠤ ᠦᠭᠡᠢ ᠪᠠᠶ᠋ᠢᠬᠤ ᠵᠢᠨ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠠ᠋ᠨᠡ ᠶᠡᠭᠡ ᠬᠢᠮᠦᠷᠠᠯᠠᠴᠠ ᠪᠢᠳᠡ ᠵᠠᠪᠠᠯ ᠲᠠᠪᠠᠵᠤ ᠭᠠᠷᠬᠤ ᠣᠴᠢᠷᠲᠠᠢ ᠪᠣᠯᠪᠠ᠃ 《ᠬᠥᠭᠵᠢᠯᠲᠡ ᠪᠣᠯ ᠬᠠᠲᠠᠭᠤ ᠶᠣᠰᠤ》 ᠭᠡᠳᠡᠭ ᠵᠶ᠋ᠠᠷ 《ᠥᠭᠡᠷᠡᠴᠢᠯᠡᠯᠳᠡ ᠪᠣᠯ ᠵᠠᠶ᠋ᠢᠯᠠᠰᠢ ᠦᠭᠡᠢ》 ᠪᠣᠯᠵᠠᠢ᠃ ᠭᠡᠬᠦᠳᠤᠪᠠᠨ 《ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠵᠢᠨ ᠥᠭᠡᠷᠡᠴᠢᠯᠡᠯᠲᠠ》 ᠭᠡᠵᠦ ᠬᠡᠳᠦᠨ ᠵᠢᠯ ᠶᠠᠷᠢᠭᠰᠠᠨ ᠪᠣᠯᠪᠠᠴᠤ ᠠᠬᠢᠴᠠᠪᠠᠷ ᠠᠨᠠᠢ ᠪᠠᠶ᠋ᠢᠵᠤ ᠮᠦᠨ ᠯᠡ ᠰᠢᠨᠡ ᠭᠤᠳᠣᠯ ᠠ᠋ᠮᠦᠰᠴᠦ ᠬᠠᠭᠤᠴᠢᠨ ᠵᠠᠮ ᠵᠶ᠋ᠠᠷ ᠵᠶ᠋ᠠᠨ ᠠᠯᠬᠤᠯᠠᠵᠤ ᠶᠠᠪᠤᠭᠠ ᠦᠵᠡᠭᠳᠡᠯ ᠣᠷᠤᠰᠢᠵᠦ ᠪᠠᠶ᠋ᠢᠭᠠ ᠶᠤᠮ᠃ ᠦᠭᠡᠷᠡᠴᠢᠯᠠᠯᠳᠠ ᠵᠢᠨ ᠰᠠᠭᠤᠷᠢ ᠪᠤᠯ ᠤᠯᠠᠮᠵᠢᠯᠠᠯ ᠶᠤᠮ᠃ ᠤᠯᠠᠮᠵᠢᠯᠠᠯᠳᠤ 《ᠦᠶᠠᠴᠢᠯᠠᠵᠤ ᠤᠨᠭ᠌ᠰᠢᠬᠤ》 ᠵᠢᠭ᠋ᠠᠨ ᠰᠤᠷᠭ᠋ᠠᠬᠤ ᠠᠷᠭᠠᠪᠠᠷ ᠵᠢᠱ᠌ᠢᠶᠠᠯᠠᠭᠦᠳᠤ ᠲᠠᠷᠠᠨᠢ ᠮᠤᠨᠭ᠌ᠭᠤᠯ ᠭᠡᠯᠠᠨᠤ ᠲᠠᠭᠤᠳᠠᠯᠭᠠ ᠪᠠ ᠪᠢᠴᠢᠯᠭᠡ ᠰᠠᠯᠤᠨᠭ᠌ᠬᠢᠷᠠᠭᠰᠠᠨ ᠵᠠᠯᠭ᠋ᠠᠮᠠᠯ ᠭᠡᠯᠠᠨᠤ ᠤᠨᠴᠠᠯᠢᠬᠲᠤ ᠵᠤᠬᠢᠴᠠᠭᠰᠠᠨ ᠬᠠᠮᠤᠭ ᠰᠢᠨᠵᠢᠯᠠᠭᠦ ᠤᠬᠠᠭ᠋ᠠᠨᠴᠢ ᠵᠢᠭ᠋ᠠᠬᠤ ᠠᠷᠭᠠ ᠶᠤᠮ᠃ ᠬᠢᠳᠠᠳ ᠲᠦᠷᠤᠯ ᠭᠡᠯᠠᠨᠤ 《ᠦᠰᠦᠭᠯᠡᠨ ᠤᠨᠭ᠌ᠰᠢᠬᠤ》 ᠵᠢᠭ᠋ᠠᠬᠤ ᠠᠷᠭᠠᠳᠤ ᠭᠡᠷᠬᠢᠨ ᠦᠨᠳᠤᠰᠤᠯᠠᠵᠤ ᠪᠤᠯᠬᠤ ᠪᠤᠢ᠃ ᠪᠢᠳᠠ ᠤᠯᠠᠮᠵᠢᠯᠠᠯᠤᠨ ᠰᠢᠯᠢᠳᠡᠭᠢ ᠦᠯᠠᠳᠠᠭᠡᠭᠦ ᠭᠡᠳᠡᠭᠢ ᠵᠦᠪ ᠲᠠᠨᠢᠪᠠᠯ ᠵᠤᠬᠢᠨᠠ᠃
ᠵᠢᠷᠭ᠋ᠠᠯᠲᠤ ᠪᠠᠭᠰᠢ 《〈ᠨᠡᠷᠡᠲᠦ ᠪᠠᠭᠰᠢ ᠵᠢᠨ ᠠᠵᠢᠯᠤᠨ ᠬᠠᠮᠲᠤᠯᠢᠭ〉ᠤᠨ ᠪᠦᠳᠦᠭᠡᠨ ᠪᠠᠶ᠋ᠢᠭᠤᠯᠤᠯᠳᠠ ᠵᠢᠨ ᠲᠤᠬᠠᠢ》᠂ 《ᠭᠤᠣᠯᠯᠠᠭᠴᠢ ᠪᠠᠭᠰᠢ ᠵᠢᠨ ᠪᠣᠯᠪᠠᠰᠤᠷᠠᠯ ᠬᠢᠭᠡᠳ ᠪᠠᠭᠰᠢ ᠵᠢᠨ ᠲᠤᠰᠬᠠᠶ᠋ᠢᠵᠢᠯᠲᠠ》 ᠭᠡᠬᠦ ᠰᠡᠳᠦᠪ ᠵᠶ᠋ᠠᠷ ᠬᠢᠴᠢᠶᠡᠯ ᠤᠷᠣᠯᠠ᠃ ᠦᠭᠡ ᠵᠢ ᠴᠢᠩᠭᠠ ᠶᠠᠷᠢᠳᠠᠭᠠᠴᠠᠨᠢ ᠪᠣᠯᠪᠠ ᠦᠦ᠂ ᠮᠠᠰᠢ ᠢᠳᠡᠯᠢᠭ ᠰᠠᠨᠠᠭᠳᠠᠵᠤ ᠬᠦᠮᠦᠰᠲᠤ ᠠ᠋ᠷᠴᠢᠮ ᠬᠦᠴᠦ ᠨᠡᠮᠡᠵᠦ ᠪᠠᠶ᠋ᠢᠯᠠ᠃ 《ᠨᠡᠷᠡᠲᠦ ᠪᠠᠭᠰᠢ ᠵᠢᠨ ᠠᠵᠢᠯᠤᠨ ᠦᠷᠦᠭᠡ》᠂ 《ᠨᠡᠷᠡᠲᠦ ᠪᠠᠭᠰᠢ ᠵᠢᠨ ᠠᠵᠢᠯᠤᠨ ᠬᠠᠮᠲᠤᠯᠢᠭ》 ᠭᠡᠬᠦ ᠬᠤᠯᠪᠤᠭᠠ ᠰᠦᠯᠵᠢᠶᠡᠪᠠᠷ ᠲᠠᠮᠵᠢᠨ ᠬᠠᠮᠲᠤᠷᠠᠨ ᠠᠵᠢᠯᠯᠠᠭ᠍ᠤ ᠠᠷᠭᠠ ᠮᠡᠷᠭᠡᠵᠢᠯᠤᠨ ᠲᠤᠬᠠᠢ ᠶᠠᠷᠢᠯᠠ᠃ 《ᠨᠢᠭᠡ ᠬᠦᠮᠦᠨᠤ ᠣᠬᠠᠭ᠋ᠠᠨ ᠵᠠᠷᠤᠭ᠋ᠠᠳ ᠬᠦᠷᠬᠦ ᠦᠭᠡᠢ᠂ ᠬᠤᠶᠠᠷ ᠬᠦᠮᠦᠨᠤ ᠣᠬᠠᠭ᠋ᠠᠨ ᠵᠠᠷᠤᠭ᠋ᠠᠳ ᠪᠠᠷᠠᠭ᠍ᠤ ᠦᠭᠡᠢ》 ᠭᠡᠳᠡᠭ ᠵᠶ᠋ᠠᠷ ᠬᠠᠮᠵᠢᠯᠴᠠᠵᠦ ᠬᠤᠷᠰᠢᠯᠴᠠᠭ᠍ᠤᠨᠢ ᠵᠦᠢ᠍ᠲᠡᠢ ᠰᠠᠨ᠃ 《ᠨᠠᠳᠠᠳᠤ ᠨᠢᠭᠡ ᠠᠯᠮᠤᠷᠠᠳᠲᠠᠢ᠂ ᠴᠢᠮᠠᠳᠤ ᠨᠢᠭᠡ ᠠᠯᠮᠤᠷᠠᠳᠲᠠᠢ᠃ ᠬᠠᠷᠢᠯᠴᠠᠨ ᠰᠣᠯᠢᠯᠴᠠᠭ᠍ᠤᠳᠤ ᠮᠦᠨ ᠯᠡ ᠨᠢᠭᠡ ᠨᠢᠭᠡ ᠠᠯᠮᠤᠷᠠᠳ᠃ ᠭᠡᠬᠦᠳᠤ ᠨᠠᠳᠠᠳᠤ ᠨᠢᠭᠡ ᠦᠵᠡᠯ ᠰᠠᠨᠠᠭᠠᠲᠠᠢ᠂ ᠴᠢᠮᠠᠳᠤ ᠨᠢᠭᠡ ᠦᠵᠡᠯ ᠰᠠᠨᠠᠭᠠᠲᠠᠢ᠂ ᠬᠠᠷᠢᠯᠴᠠᠨ ᠰᠣᠯᠢᠯᠴᠠᠪᠠᠯ ᠬᠠᠷᠢᠨ ᠬᠤᠶᠠᠷ ᠦᠵᠡᠯ ᠰᠠᠨᠠᠭᠠᠲᠠᠢ ᠪᠣᠯᠤᠨᠠ》 ᠭᠡᠳᠡᠭ ᠪᠢᠯᠡ᠃ ᠬᠢᠷᠢ ᠲᠡᠩᠴᠡᠭᠰᠡᠨ ᠪᠠᠭᠰᠢ ᠪᠣᠯᠬᠤ᠂ ᠰᠠᠶ᠋ᠢᠨ ᠪᠠᠭᠰᠢ ᠪᠣᠯᠬᠤ᠂ ᠨᠡᠷᠡᠲᠦ ᠪᠠᠭᠰᠢ ᠪᠣᠯᠬᠤ ᠪᠣᠯ ᠪᠠᠭᠰᠢ ᠪᠤᠯᠭ᠋ᠠᠨᠤ ᠮᠥᠷᠦᠭᠡᠳᠦᠯ ᠲᠡᠮᠡᠴᠡᠯ ᠪᠠᠶ᠋ᠢᠬᠤ ᠤᠴᠢᠷᠲᠠᠢ ᠪᠢᠯᠡ᠃ ᠭᠡᠬᠦᠳᠤᠪᠠᠨ ᠪᠠᠭᠰᠢ ᠪᠣᠯᠭ᠋ᠠᠨ ᠲᠤᠭᠤᠷᠠᠳᠠᠯᠠ ᠮᠡᠳᠡᠵᠦ ᠪᠠᠢ᠍ᠢ᠍ᠪᠠᠴᠤ ᠪᠠᠷᠢᠮᠲᠠᠯᠠᠵᠤ ᠲᠡᠶ᠋ᠢᠯᠬᠦ ᠦᠭᠡᠢᠠᠴᠠ ᠪᠣᠯᠵᠤ ᠵᠠᠮ ᠳᠤᠮᠳᠠᠠᠴᠠᠪᠠᠨ ᠪᠤᠴᠠᠳᠠᠭᠠᠴᠠ ᠠᠮᠵᠢᠯᠲᠠ ᠵᠢᠨ ᠠᠯᠲᠠᠨ ᠳᠦᠷᠦᠭᠡ ᠵᠢ ᠲᠡᠷᠡ ᠪᠣᠯᠭ᠋ᠠᠨ ᠭᠢᠰᠭᠢᠵᠦ ᠲᠡᠶ᠋ᠢᠯᠳᠡᠭ ᠦᠭᠡᠢ᠃ ᠪᠠᠭᠰᠢ ᠵᠢᠨ ᠠᠵᠢᠯ ᠪᠣᠯ ᠤᠳᠠᠭ᠋ᠠᠨ ᠳᠠᠭ᠋ᠠᠭ᠋ᠠᠮᠠᠭ᠋ᠠᠢ ᠴᠢᠨᠠᠷᠲᠠᠢ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠱᠠᠭ᠋ᠠᠷᠳᠠᠭᠳᠠᠭ᠍ᠤ ᠠᠵᠢᠯ ᠮᠦᠨ᠃ ᠶᠠᠭ᠋ᠠᠷᠠᠵᠤ ᠰᠠᠨᠳᠤᠷᠴᠦ ᠦᠯᠦ ᠪᠣᠯᠬᠤ ᠪᠦᠭᠡᠳ ᠤᠷᠮᠠ ᠬᠤᠭᠤᠷᠠᠵᠤ ᠵᠠᠮᠠᠴᠠᠨᠢ ᠣᠷᠬᠢᠬᠤ ᠠᠵᠢᠯ ᠤᠭᠲᠤ ᠪᠢᠰᠢ᠃ ᠲᠠᠷᠢᠶᠠᠪᠠᠨ 《ᠤᠷᠭᠤᠭᠤᠯᠬᠤ ᠭᠡᠳ ᠦᠭᠳᠡᠭᠡᠵᠦ》 ᠪᠣᠯᠬᠤ ᠦᠭᠡᠢ ᠶᠤᠮ ᠴᠢᠨᠢ ᠨᠡᠩ ᠴᠤ᠌ ᠬᠡᠣᠭᠡᠳᠢ ᠬᠦᠮᠦᠵᠢᠬᠦᠯᠬᠦᠳᠤ ᠦᠰᠦᠨ ᠪᠣᠶ᠋ᠢᠵᠢᠯᠲᠠ ᠵᠢᠨ ᠵᠢᠮᠡ ᠬᠠᠣᠯᠢᠳᠤᠨᠢ ᠵᠣᠬᠢᠴᠠᠭᠤᠯᠬᠤ ᠬᠡᠷᠡᠭᠳᠡᠢ ᠶᠤᠮ᠃ ᠵᠢᠷᠭ᠋ᠠᠯᠲᠤ ᠪᠠᠭᠰᠢ ᠵᠢᠨ 《ᠬᠢᠴᠢᠶᠡᠯᠤᠨ ᠪᠠᠷᠢᠮᠵᠢᠶᠠ ᠵᠢ ᠴᠢᠬᠤᠯᠠᠴᠢᠯᠠᠭ᠍ᠤ》 《ᠬᠢᠴᠢᠶᠡᠯ ᠲᠥᠷᠦᠯᠤᠨ ᠳᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨ ᠪᠣᠯᠬᠤ》 ᠲᠤᠬᠠᠢ ᠶᠠᠷᠢᠭᠰᠠᠨᠨᠢ ᠰᠡᠳᠭᠢᠯᠳᠤ ᠭᠦᠨ ᠬᠠᠳᠠᠩᠰᠢᠯᠡ᠃ 《ᠬᠢᠴᠢᠶᠡᠯᠤᠨ ᠪᠠᠷᠢᠮᠵᠢᠶᠠ ᠵᠢ ᠴᠢᠬᠤᠯᠠᠴᠢᠯᠠᠭ᠍ᠤ》 ᠵᠢ ᠪᠠᠭᠰᠢ ᠪᠣᠯᠭ᠋ᠠᠨ ᠮᠡᠳᠡᠳᠡᠭ ᠴᠤ᠌ ᠰᠣᠳᠤᠯᠵᠤ ᠬᠡᠷᠡᠭᠵᠢᠭᠦᠯᠵᠦ ᠪᠠᠶ᠋ᠢᠭᠠᠨᠢ ᠳᠤᠶ᠋ᠢᠯᠤᠨ ᠴᠥᠭᠡᠨ᠃ 《ᠬᠢᠴᠢᠶᠡᠯᠤᠨ ᠪᠠᠷᠢᠮᠵᠢᠶᠠ》 ᠪᠣᠯ ᠮᠠᠰᠢ ᠣᠯᠠᠨ ᠬᠦᠮᠦᠨᠤ ᠣᠢ ᠤᠬᠠᠭ᠋ᠠᠨ᠂ ᠬᠦᠴᠦ ᠬᠥᠳᠡᠯᠮᠦᠷᠢᠪᠠᠷ ᠲᠠᠮᠵᠢᠨ ᠪᠤᠯᠪᠠᠰᠤᠷᠠᠭᠤᠯᠤᠭᠳᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ᠂ ᠰᠤᠷᠭ᠋ᠠᠨ ᠬᠦᠮᠦᠵᠢᠯᠳᠤ ᠲᠣᠬᠢᠷᠠᠭᠰᠠᠨ ᠵᠦᠪ ᠣᠨᠤᠪᠴᠢᠳᠤ ᠴᠢᠨᠠᠷ ᠵᠶ᠋ᠠᠷ ᠦᠨᠳᠦᠷ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠵᠢᠨ ᠵᠥᠭᠯᠡᠭᠦᠷ ᠪᠣᠯᠬᠤ ᠶᠤᠮ᠃ 《ᠬᠢᠴᠢᠶᠡᠯᠤᠨ ᠪᠠᠷᠢᠮᠵᠢᠶᠠ》 ᠵᠢ ᠠᠮᠢᠳᠤᠯᠢᠭ ᠠᠰᠢᠭᠯᠠᠵᠤ ᠬᠠᠷᠠᠯᠲᠠᠲᠠᠢ ᠵᠢᠭ᠋ᠠᠨ ᠰᠤᠷᠭ᠋ᠠᠬᠤᠨᠢ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠵᠢᠨ ᠠᠮᠵᠢᠯᠳᠠᠳᠤ ᠭᠦᠷᠭᠦ ᠵᠠᠶ᠋ᠢᠯᠠᠰᠢ ᠦᠭᠡᠢ ᠵᠠᠮ ᠶᠤᠮ᠃ ᠬᠢᠴᠢᠶᠡᠯ ᠲᠥᠷᠦᠯᠤᠨ ᠵᠶ᠋ᠠᠨ ᠲᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨ ᠪᠣᠯᠤᠨᠠ ᠭᠡᠳᠡᠭ ᠬᠠᠷᠢᠨ ᠬᠢᠯᠪᠠᠷ ᠪᠢᠰᠢ ᠡ᠃ ᠦᠪᠡᠷᠤᠨ ᠳᠤᠰᠬᠠᠢ ᠮᠡᠷᠭᠡᠵᠢᠯᠳᠤᠪᠠᠨ ᠮᠡᠷᠭᠡᠰᠢᠵᠦ ᠴᠠᠭ᠋ᠠᠷᠠᠨᠠ ᠭᠡᠳᠡᠭ ᠨᠦᠷᠢ ᠶᠡᠭᠡ ᠬᠥᠳᠡᠯᠮᠦᠷᠢ᠂ ᠣᠶ᠋ᠢᠭᠠ ᠦᠭᠡᠢ ᠴᠢᠷᠮᠠᠶ᠋ᠢᠯᠭᠠ ᠬᠡᠷᠡᠭᠳᠡᠢ᠃ ᠥᠷᠭᠦᠯᠵᠢ ᠰᠣᠳᠤᠯᠵᠤ᠂ ᠲᠠᠰᠤᠷᠠᠯ ᠦᠭᠡᠢ ᠬᠤᠷᠠᠮᠳᠤᠭᠤᠯᠵᠤ᠂ ᠢᠮᠠᠭᠲᠠ ᠵᠢᠳᠭᠦᠵᠦ ᠪᠠᠶ᠋ᠢᠵᠤ ᠲᠡᠷᠡ ᠬᠡᠮᠵᠢᠶᠡᠨᠳᠤ ᠬᠦᠷᠬᠦ ᠵᠢ ᠵᠢᠭ᠋ᠠᠨᠠ᠃ ᠪᠠᠭᠰᠢ ᠨᠠᠷ ᠵᠢᠭ᠋ᠠᠨ ᠰᠤᠷᠭ᠋ᠠᠬᠤ ᠶᠠᠪᠤᠴᠠᠳᠤᠪᠠᠨ ᠥᠪᠡᠷᠤᠨ ᠲᠤᠰᠬᠠᠢ ᠮᠡᠷᠭᠡᠵᠢᠯᠤᠨ ᠲᠤᠬᠠᠢ ᠣᠨᠤᠯᠤᠨ ᠲᠤᠭᠳᠠᠯᠴᠠᠭᠠ ᠵᠢ ᠪᠦᠷᠢᠯᠳᠦᠭᠦᠯᠪᠡᠯ ᠵᠦᠢᠲᠠᠢ᠃ ᠪᠠᠭᠰᠢ ᠪᠤᠯᠭ᠋ᠠᠨ ᠭᠦᠦᠱ᠌ᠢ ᠪᠣᠯᠵᠤ ᠴᠢᠳᠠᠭ᠍ᠤ ᠦᠭᠡᠢ ᠴᠤ᠌ ᠲᠤᠰᠬᠠᠢ ᠮᠡᠷᠭᠡᠵᠢᠯᠤᠨ ᠬᠤᠪᠢᠳᠤ 《ᠥᠪᠡᠷᠤᠨ ᠬᠡᠰᠡᠨ ᠶᠠᠭᠤᠮᠠᠲᠠᠢ ᠪᠠᠶ᠋ᠢᠬᠤ》ᠨᠢ ᠲᠡᠭᠡᠷᠡ ᠶᠤᠮ᠃
ᠦᠳᠡ ᠵᠢᠨ ᠬᠤᠶ᠋ᠢᠨᠠᠨᠢ ᠪᠠᠭᠰᠢ ᠨᠠᠷᠢ ᠳᠤᠭᠤᠶ᠋ᠢᠯᠠᠩ ᠬᠤᠪᠢᠶᠠᠵᠤ 《ᠠᠵᠢᠯᠤᠨ ᠬᠠᠮᠲᠤᠯᠢᠭ》 ᠪᠠᠶ᠋ᠢᠭᠤᠯᠵᠠᠢ᠃ ᠳᠡᠭᠡᠳᠦ ᠳᠤᠮᠳᠠᠳᠤ ᠵᠢᠨ ᠬᠡᠯᠡ ᠪᠢᠴᠢᠭᠤᠨ ᠪᠠᠭᠰᠢ ᠬᠤᠶᠠᠷ ᠳᠤᠭᠤᠶ᠋ᠢᠯᠠᠩᠳᠤ ᠬᠤᠪᠢᠶᠠᠭᠳᠠᠯᠠ᠃ ᠰᠤᠷᠤᠯᠴᠠᠯᠭᠠ ᠵᠢᠨ ᠬᠤᠭᠤᠴᠠᠭ᠋ᠠᠨᠳᠤ ᠳᠣᠭᠤᠶ᠋ᠢᠯᠠᠩ ᠵᠶ᠋ᠠᠷ ᠬᠠᠮᠵᠢᠯᠴᠠᠵᠤ ᠰᠤᠳᠤᠯᠤᠨ ᠰᠤᠷᠤᠯᠴᠠᠭ᠍ᠤ ᠠᠵᠢ᠃ ᠳᠤᠭᠤᠶ᠋ᠢᠯᠠᠩ ᠪᠠᠶ᠋ᠢᠭᠤᠯᠤᠭᠳᠠᠮᠠᠭᠴᠠ ᠦᠷᠢᠰᠦᠯᠳᠦᠭᠡᠨ ᠠ᠋ᠬᠢᠯᠡᠯᠡ᠃ ᠣᠷᠢᠳ ᠵᠶ᠋ᠠᠷ ᠳᠣᠭᠤᠶ᠋ᠢᠯᠠᠩ ᠪᠦᠷᠢᠳᠤ ᠨᠢᠭᠡ ᠪᠠᠭᠴᠠ ᠭᠤᠮ ᠭᠤᠤᠷᠰᠤ ᠦᠭᠴᠦ᠂ 《ᠭᠠᠷ ᠬᠥᠳᠡᠯᠦᠯᠴᠡᠵᠦ ᠬᠠᠮᠤᠭᠤᠨ ᠦᠨᠳᠦᠷ ᠬᠠᠮᠤᠭᠤᠨ ᠰᠠᠭᠤᠷᠢᠲᠠᠢ ᠭᠡᠷ ᠪᠥᠲᠦᠭᠡ》 ᠭᠡᠬᠦ ᠠ᠋ᠭᠦᠷᠭᠡ ᠥᠭᠬᠦᠯᠡ᠃ ᠰᠤᠷᠤᠭᠴᠢ ᠵᠢ ᠵᠠᠬᠢᠵᠤ 《ᠳᠣᠭᠤᠶ᠋ᠢᠯᠠᠩᠤᠨ ᠠᠵᠢᠯᠯᠠᠭ᠋ᠠᠨ》 ᠬᠢᠯᠭᠡᠳᠡᠭ ᠪᠠᠭᠰᠢ ᠨᠠᠷ ᠠ᠋ᠨᠡ ᠠᠵᠢᠯᠳᠤ ᠪᠠᠭ᠍ᠠᠨ ᠪᠠᠷᠢᠴᠠ ᠠᠯᠳᠠᠵᠤ ᠲᠤᠭᠳᠠᠭᠰᠠᠨ ᠴᠠᠭᠲᠤ ᠬᠢᠷᠢ ᠲᠡᠩᠴᠡᠭᠰᠡᠨ ᠴᠢᠨᠠᠷᠲᠠᠢ ᠰᠠᠶ᠋ᠢᠬᠠᠨ ᠭᠡᠷ ᠪᠤᠰᠬᠠᠵᠤ ᠴᠢᠳᠠᠭᠠ ᠦᠭᠡᠢᠨᠢ ᠭᠠᠶ᠋ᠢᠬᠠᠮᠠᠷ ᠶᠤᠮ᠃ ᠬᠡᠷᠪᠡ ᠰᠤᠷᠤᠭᠴᠢᠳ ᠵᠶ᠋ᠠᠷ ᠬᠢᠯᠭᠡᠭᠰᠡᠨ ᠪᠣᠯ ᠠ᠋ᠬᠦᠨᠠᠴᠠ ᠠᠷᠪᠠᠨ ᠳᠠᠬᠢᠨ ᠲᠡᠭᠡᠷᠡ ᠪᠠᠶ᠋ᠢᠬᠠ ᠳ᠋ᠠ᠃ 《ᠪᠠᠭᠰᠢ ᠵᠢᠨ ᠬᠠᠮᠵᠢᠯᠴᠠᠭᠠ》 ᠶᠠᠭᠤ ᠪᠤᠯᠵᠤ ᠪᠠᠢ᠍ᠢ᠍ᠨᠠ？ ᠪᠢᠳᠡᠨᠳᠤ ᠰᠤᠷᠬᠤ ᠶᠠᠭᠤᠮᠠ ᠣᠯᠠᠨ ᠪᠣᠢ ᠰᠢᠦ ᠳ᠋ᠠ᠃ ᠵᠠᠯᠭ᠋ᠠᠭ᠋ᠠᠳ ᠳᠣᠭᠤᠶ᠋ᠢᠯᠠᠩᠤᠨ ᠨᠡᠷᠡ᠂ ᠤᠷᠢᠶᠠ᠂ ᠬᠠᠷᠠᠯᠲᠠ᠂ ᠳᠠᠭᠤᠤ᠂ ᠲᠥᠯᠦᠪᠯᠡᠭᠡᠪᠠᠨ ᠲᠣᠭᠲᠠᠭ᠋ᠠᠨᠠ᠃ ᠭᠠᠷ ᠬᠥᠳᠡᠯᠵᠦ ᠬᠢᠬᠦ ᠠᠵᠢᠯᠳᠤ ᠲᠠᠭ᠋ᠠᠷᠠᠤᠬᠠᠨ ᠴᠤ᠌ ᠣᠶᠤᠨ ᠣᠬᠠᠭ᠋ᠠᠨ ᠬᠡᠷᠡᠭᠯᠡᠬᠦ ᠠᠵᠢᠯᠳᠤ ᠪᠠᠭᠰᠢ ᠨᠠᠷ ᠬᠠᠷᠢᠨ ᠮᠠᠰᠢ ᠰᠠᠴᠠᠨ ᠮᠡᠷᠭᠡᠨ ᠶᠤᠮ᠂ ᠤᠳᠠᠯ ᠦᠭᠡᠢ ᠭᠤᠶᠤ ᠰᠠᠶ᠋ᠢᠬᠠᠨ ᠨᠡᠷᠡ᠂ ᠢᠳᠡᠯᠢᠭ ᠬᠦᠴᠦᠲᠡᠢ ᠤᠷᠢᠶᠠ᠂ ᠰᠡᠳᠭᠢᠯ ᠳᠣᠭᠳᠤᠯᠤᠮᠠ ᠬᠠᠷᠠᠯᠲᠠ᠂ ᠭᠤᠴᠤ ᠲᠠᠭᠤᠤ᠂ ᠣᠢ ᠲᠣᠢᠳᠤ ᠣᠷᠤᠮᠠ ᠦᠭᠡᠢ ᠰᠠᠶ᠋ᠢᠨ ᠲᠥᠯᠥᠪᠯᠡᠭᠡ ᠮᠡᠨᠳᠦᠯᠡᠵᠦ᠂ ᠮᠠᠰᠢ ᠤᠷᠠᠨ ᠰᠠᠨᠠᠭᠠᠲᠠᠢ ᠵᠢᠷᠤᠭ ᠤᠷᠠᠯᠠᠯᠲᠠᠢ ᠪᠥᠲᠦᠭᠡᠯ ᠭᠠᠷᠭ᠋ᠠᠨ ᠭᠠᠶ᠋ᠢᠬᠠᠭᠤᠯᠵᠠᠭ᠋ᠠᠯᠠ᠃ ᠵᠠᠷᠢᠮ ᠳᠤᠭᠤᠶ᠋ᠢᠯᠠᠩᠨᠢ ᠪᠦᠷ ᠴᠤ᠌ ᠦᠪᠡᠷ ᠵᠶ᠋ᠠᠨ ᠲᠠᠭᠤᠨᠤ ᠦᠭᠡ ᠠᠶᠠᠯᠭᠤ ᠵᠣᠬᠢᠶᠠᠵᠤ ᠲᠠᠭᠤᠯᠠᠭᠰᠠᠨᠨᠢ ᠮᠣᠨᠳᠠᠭ ᠪᠣᠯᠵᠠᠢ᠃ ᠬᠠᠷᠠᠯᠲᠠ ᠲᠥᠯᠥᠪᠯᠡᠭᠡᠲᠠᠢ ᠪᠣᠯᠵᠠᠭ᠋ᠠᠭᠰᠠᠨ ᠪᠢᠳᠠ ᠶᠠᠭᠤ ᠬᠢᠬᠦ ᠪᠣᠢ？ ᠶᠠᠭ᠋ᠠᠬᠢᠵᠦ ᠬᠢᠬᠦ ᠪᠣᠢ？ ᠭᠡᠵᠦ ᠣᠬᠠᠭ᠋ᠠᠨ ᠲᠡᠯᠡᠵᠦ ᠠ᠋ᠬᠢᠯᠡᠯᠡ ᠁
ᠳᠠᠷᠠᠭᠠ ᠬᠤᠶᠠᠷ ᠠ᠋ᠳᠦᠷᠨᠢ ᠪᠢᠳᠡ ᠨᠠᠨᠵᠢᠩᠤᠨ ᠪᠠᠭᠰᠢ ᠵᠢᠨ ᠶᠡᠭᠡ ᠰᠤᠷᠭ᠋ᠠᠭᠤᠯᠢ ᠵᠢᠨ ᠬᠠᠷᠢᠶᠠᠲᠤ ᠲᠤᠷᠰᠢᠯᠲᠠ ᠵᠢᠨ ᠳᠣᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ ᠪᠠ ᠪᠦᠸᠸ ᠯᠸ ᠳᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢᠳᠤ ᠬᠥᠷᠴᠦ ᠬᠢᠴᠢᠶᠡᠯ ᠰᠤᠨᠤᠰᠤᠯᠠ᠃ ᠮᠠᠨᠤ ᠳᠣᠭᠤᠶ᠋ᠢᠯᠠᠩᠤᠨᠬᠢᠨ ᠬᠡᠯᠡ ᠪᠢᠴᠢᠭᠤᠨ ᠬᠢᠴᠢᠶᠡᠯᠢ ᠰᠣᠩᠭᠤᠵᠤ ᠰᠣᠨᠤᠰᠤᠭᠰᠠᠨ ᠪᠢᠯᠠ᠃ ᠬᠤᠶᠠᠷ ᠠ᠋ᠳᠦᠷᠤᠨ ᠬᠢᠴᠢᠶᠡᠯ ᠰᠤᠨᠤᠰᠤᠭᠰᠠᠨ ᠶᠠᠪᠤᠴᠠᠳᠤ ᠣᠯᠤᠭᠰᠠᠨ ᠣᠯᠤᠯᠲᠠ ᠲᠥᠷᠦᠭᠳᠡᠯ ᠪᠠᠭᠠ ᠪᠤᠰᠤ᠃
1. ᠬᠡᠯᠡ ᠪᠢᠴᠢᠭᠤᠨ ᠵᠢᠭ᠋ᠠᠨ ᠰᠤᠷᠭ᠋ᠠᠯᠳᠠᠳᠤ ᠵᠢᠮᠠ ᠬᠠᠤᠯᠢ ᠪᠠᠶ᠋ᠢᠳᠠᠭ᠂ ᠲᠠᠷᠠᠨᠢ ᠠᠯᠢ ᠬᠡᠯᠡᠨᠳᠤ ᠴᠤ᠌ ᠠᠳᠠᠯᠢᠬᠠᠨ ᠭᠡᠳᠡᠭᠢ ᠨᠡᠩ ᠬᠦᠨᠵᠡᠭᠡᠢ ᠣᠶ᠋ᠢᠯᠠᠭ᠋ᠠᠯᠠ᠃ ᠲᠠᠷᠦᠢ ᠤᠩᠰᠢᠬᠤ᠂ ᠣᠶ᠋ᠢᠯᠠᠭ᠋ᠠᠬᠤ᠂ ᠪᠢᠴᠢᠬᠦ᠂ ᠶᠠᠷᠢᠵᠤ ᠢᠯᠡᠳᠭᠡᠬᠦᠪᠠᠷ ᠳᠠᠮᠵᠢᠨ ᠬᠡᠯᠡ ᠪᠢᠴᠢᠭᠤᠨ ᠮᠡᠳᠡᠯᠭᠡ ᠴᠢᠳᠠᠪᠤᠷᠢ ᠵᠢ ᠣᠯᠭᠤᠨᠠ᠃ ᠬᠢᠲᠠᠳᠤᠨ ᠬᠢᠴᠢᠶᠡᠯ ᠵᠢᠭ᠋ᠠᠵᠤ ᠪᠦᠬᠦᠢ ᠶᠠᠪᠤᠴᠠ ᠮᠦᠨ ᠯᠡ ᠵᠤᠬᠢᠶᠠᠭᠴᠢ ᠵᠢ ᠲᠠᠨᠢᠯᠴᠠᠭᠤᠯᠬᠤ᠂ ᠦᠭᠡ ᠥᠭᠦᠯᠡᠪᠦᠷᠢ ᠵᠢ ᠰᠢᠨᠵᠢᠬᠦ᠂ ᠠᠭᠤᠯᠭᠠ ᠰᠠᠨᠠᠭᠠ ᠵᠢ ᠬᠤᠷᠢᠶᠠᠩᠭᠤᠶ᠋ᠢᠯᠠᠭ᠍ᠤ᠂ ᠪᠣᠯᠪᠠᠰᠤᠷᠠᠯ ᠳᠠᠳᠤᠯᠭᠠ ᠬᠢᠯᠭᠡᠬᠦ ᠁ ᠮᠡᠲᠤᠪᠠᠷ ᠶᠠᠪᠤᠭᠳᠠᠵᠤ ᠪᠣᠢ᠃ ᠬᠡᠯᠡ ᠪᠢᠴᠢᠭ ᠵᠢᠭ᠋ᠠᠬᠤ ᠬᠡᠯᠪᠡᠷᠢᠨᠢ ᠠᠳᠠᠯᠢ ᠴᠤ᠌ ᠬᠠᠷᠢᠨ ᠵᠢᠭ᠋ᠠᠬᠤ ᠠᠷᠭᠠ ᠵᠢᠨ ᠲᠠᠯᠠᠪᠠᠷ ᠠᠳᠠᠯᠢ ᠪᠣᠰᠤ ᠵᠦᠢ᠍ᠯ ᠵᠦᠩᠳᠡᠭᠡᠨ ᠬᠠᠷᠠᠭᠳᠠᠵᠤ ᠪᠣᠢ᠃ ᠮᠢᠨᠦ ᠬᠡᠯᠡ ᠪᠢᠴᠢᠭ ᠵᠢᠭ᠋ᠠᠳᠠᠭ ᠵᠣᠷ ᠭᠡᠪᠡᠯ 《ᠨᠣᠮ ᠣᠩᠰᠢᠭᠤᠯᠬᠤ ᠪᠠ ᠵᠣᠬᠢᠶᠠᠯ ᠪᠢᠴᠢᠭᠦᠯᠬᠦ》 ᠠᠷᠭᠠ ᠪᠣᠯᠤᠨᠠ᠃ ᠰᠤᠷᠤᠭᠴᠢᠳ ᠵᠶ᠋ᠠᠷ ᠣᠯᠠᠨ ᠣᠯᠠᠨ ᠨᠣᠮ ᠣᠩᠰᠢᠭᠤᠯᠳᠠᠭ᠃ ᠰᠤᠷᠤᠭᠴᠢᠳᠢ ᠨᠣᠮ ᠴᠤᠭᠯᠠᠭᠤᠯᠬᠤ ᠵᠠᠩᠰᠢᠯᠲᠠᠢ ᠪᠤᠯᠭ᠋ᠠᠬᠤ᠂ ᠨᠣᠮ ᠬᠤᠳᠠᠯᠳᠤᠨ ᠠᠪᠬᠤ ᠲᠠᠳᠬᠠᠯᠲᠠᠢ ᠪᠣᠯᠭ᠋ᠠᠬᠤ᠂ ᠨᠣᠮ ᠪᠢᠴᠢᠭᠢ ᠬᠠᠶ᠋ᠢᠷᠠᠯᠠᠵᠤ᠂ ᠦᠷᠭᠦᠯᠵᠢ ᠣᠩᠰᠢᠵᠤ ᠪᠠᠶ᠋ᠢᠬᠤ ᠵᠢ ᠢᠮᠠᠭᠲᠠ ᠱᠠᠭ᠋ᠠᠷᠳᠠᠭᠰᠠᠭ᠋ᠠᠷ ᠢᠷᠡᠵᠡᠢ᠃ ᠣᠷᠠᠨ ᠵᠣᠬᠢᠶᠠᠯᠤᠨ ᠢᠳᠡ ᠠᠮᠲᠠ ᠭᠡᠭᠴᠢ ᠬᠦᠮᠦᠨᠤ ᠰᠡᠳᠭᠢᠯᠢ ᠣᠷᠢᠶᠠᠯᠠᠨ ᠳᠠᠯᠠᠯᠵᠤ᠂ ᠤᠷᠮᠠᠰᠢᠭᠤᠯᠤᠨ ᠬᠥᠭᠵᠢᠭᠡᠵᠦ ᠰᠠᠷᠬᠤᠳ ᠰᠢᠬ ᠰᠣᠭᠲᠤᠭᠤᠷᠠᠭᠤᠯᠵᠤ ᠣᠷᠬᠢᠳᠠᠭ᠃ ᠲᠡᠷᠡ ᠠᠮᠲᠠ ᠵᠢ ᠨᠣᠮ ᠣᠩᠰᠢᠳᠠᠭ ᠬᠦᠮᠦᠨ ᠯᠡ ᠰᠡᠷᠡᠵᠦ ᠮᠡᠳᠡᠳᠡᠭ ᠰᠠᠨ᠃ ᠦᠪᠡᠷᠤᠨ ᠵᠶ᠋ᠠᠨ ᠨᠣᠮ ᠵᠶ᠋ᠠᠨ ᠵᠢᠭᠡᠯᠡᠬᠦᠯᠵᠦ ᠤᠨᠭ᠌ᠰᠢᠭᠤᠯᠴᠢᠬᠠᠭ᠋ᠠᠳ ᠬᠡᠳᠦᠨ ᠰᠠᠶ᠋ᠢᠨ ᠨᠣᠮ ᠭᠡᠭᠡᠭᠰᠡᠨᠢ ᠠ᠋ᠰᠡ ᠲᠣᠭ᠋ᠠᠴᠢᠪᠠᠯ ᠣᠭᠳᠤ ᠬᠠᠷᠠᠮᠰᠠᠯ ᠦᠭᠡᠢ ᠪᠦᠭᠡᠳ ᠣᠯᠣᠯᠲᠠ ᠮᠠᠰᠢ ᠶᠡᠭᠡ ᠪᠠᠶ᠋ᠢᠨᠠᠮ᠃ ᠢᠩᠬᠢᠵᠦ ᠵᠢᠯᠤᠭᠤᠳᠣᠭᠰᠠᠨᠠᠴᠠ ᠰᠤᠷᠤᠭᠴᠢ ᠣᠩᠰᠢᠯᠭᠠ ᠵᠢᠨ ᠪᠣᠭᠤᠮᠲᠠ ᠵᠢ ᠠᠶᠠᠨᠳᠠᠭ᠋ᠠᠨ ᠳᠠᠪᠠᠵᠦ ᠰᠤᠷᠬᠤᠳᠤ ᠬᠦᠴᠢᠷᠳᠡᠬᠦ ᠦᠭᠡᠢ ᠪᠣᠯᠳᠠᠭ᠃ 《ᠬᠡᠣᠬᠡᠳ ᠰᠤᠷᠭ᠋ᠠᠭᠤᠯᠢᠳᠤ ᠮᠠᠭᠤ ᠰᠤᠷᠳᠠᠭᠨᠢ ᠣᠩᠰᠢᠯᠭᠠ ᠮᠠᠭᠤᠳᠠᠭᠰᠠᠨᠠᠴᠠ ᠪᠣᠯᠵᠠᠢ》 ᠭᠡᠬᠦ ᠳ᠋ᠦᠩᠨᠡᠯᠲᠡ ᠪᠠᠶ᠋ᠢᠳᠠᠭ ᠳ᠋ᠠ᠃ ᠵᠣᠬᠢᠶᠠᠯ ᠪᠢᠴᠢᠭᠦᠯᠬᠦ ᠪᠣᠯ ᠲᠤᠶ᠋ᠢᠯᠤᠨ ᠤᠷᠮᠠ ᠪᠠᠬᠠᠲᠠᠢ ᠳᠠᠰᠬᠠᠯ ᠪᠣᠯᠬᠤ ᠶᠤᠮ᠃ ᠵᠣᠬᠢᠶᠠᠯ ᠪᠢᠴᠢᠬᠦᠪᠠᠷ ᠳᠠᠮᠵᠢᠨ ᠰᠤᠷᠤᠭᠴᠢ ᠦᠪᠡᠷᠤᠨ ᠦᠵᠡᠯ ᠪᠣᠳᠤᠯ ᠵᠶ᠋ᠠᠨ ᠳᠡᠯᠭᠡᠵᠦ ᠴᠢᠳᠠᠭ᠍ᠤ ᠪᠦᠭᠡᠳ ᠬᠡᠯᠡ ᠰᠤᠷᠤᠭᠰᠠᠨ ᠵᠶ᠋ᠠᠨ ᠭᠠᠶ᠋ᠢᠬᠠᠭᠤᠯᠵᠤ ᠦᠵᠡᠭᠦᠯᠬᠦ ᠰᠠᠶ᠋ᠢᠨ ᠲᠤᠬᠢᠶᠠᠯ ᠮᠦᠨ᠃ ᠵᠣᠬᠢᠶᠠᠯᠨᠢ ᠲᠡᠷᠡ ᠴᠢᠭ ᠵᠶ᠋ᠠᠷ ᠵᠶ᠋ᠠᠨ ᠰᠤᠷᠤᠭᠴᠢ ᠵᠢᠨ ᠠ᠋ᠭᠦᠳᠦᠨ ᠪᠦᠳᠦᠭᠡᠯ ᠪᠣᠯᠬᠤ ᠲᠤᠯᠠ ᠮᠠᠰᠢ ᠦᠨᠡ ᠥᠷᠲᠡᠭᠲᠠᠢ ᠶᠤᠮ᠃ 《ᠤᠷᠮᠠ ᠵᠢᠨᠢ ᠬᠤᠭᠤᠯᠬᠤᠪᠠᠷ ᠤᠭᠤᠴᠠ ᠵᠢᠨᠢ ᠬᠤᠭᠤᠯ》 ᠭᠡᠳᠡᠭ ᠵᠶ᠋ᠠᠷ ᠵᠣᠬᠢᠶᠠᠨ ᠪᠢᠴᠢᠯᠭᠡᠳᠤ ᠤᠷᠮᠠᠰᠢᠭᠤᠯᠬᠤᠨᠢ ᠬᠡᠯᠡ ᠪᠢᠴᠢᠭ ᠰᠤᠷᠬᠤ ᠮᠠᠰᠢ ᠰᠠᠶ᠋ᠢᠨ ᠠᠷᠭᠠ ᠪᠣᠯᠠᠢ᠃ ᠮᠢᠨᠦ ᠰᠤᠷᠤᠭᠴᠢᠠᠴᠠ ᠠᠩᠭᠢᠪᠠᠷ ᠵᠶ᠋ᠠᠨ ᠲᠡᠭᠦᠪᠦᠷᠢ ᠭᠠᠷᠭ᠋ᠠᠴᠢᠬᠠᠳᠠᠭ᠂ ᠦᠪᠡᠷ ᠵᠶ᠋ᠠᠨ ᠲᠡᠭᠦᠪᠦᠷᠢ ᠭᠠᠷᠭ᠋ᠠᠭᠰᠠᠨ ᠵᠢᠱ᠌ᠢᠶᠡ ᠬᠡᠳᠦ ᠪᠣᠢ᠃ ᠵᠣᠬᠢᠶᠠᠯᠢ ᠰᠠᠶ᠋ᠢᠨ ᠪᠢᠴᠢᠵᠤ ᠴᠢᠳᠠᠵᠤ ᠪᠠᠶ᠋ᠢᠨᠠ ᠭᠡᠳᠡᠭ ᠴᠢᠨᠢ ᠬᠡᠯᠡᠪᠠᠨ ᠰᠠᠶ᠋ᠢᠨ ᠰᠤᠷᠴᠤ ᠪᠠᠶ᠋ᠢᠨᠠ ᠭᠡᠵᠦ ᠦᠵᠡᠬᠦᠳᠤ ᠲᠠᠰᠢᠶᠠᠷᠠᠭ᠍ᠤ ᠦᠭᠡᠢ ᠪᠣᠢ ᠊ᠶᠠ᠃
2. ᠦᠭᠡ ᠦᠭᠦᠯᠡᠪᠦᠷᠢᠪᠠᠨ ᠡᠵᠡᠮᠰᠢᠭᠦᠯᠬᠦ᠂ ᠬᠡᠯᠡᠨᠤ ᠮᠡᠳᠡᠷᠡᠮᠵᠢ ᠵᠢ ᠲᠡᠭᠡᠭᠰᠢᠯᠡᠭᠦᠯᠬᠦ᠂ ᠬᠡᠯᠡᠨᠤ ᠬᠤᠷᠠᠮᠳᠤᠭᠤᠯᠤᠯᠢ ᠪᠠᠶᠠᠯᠢᠬ᠍ᠵᠢᠭᠤᠯᠵᠤ᠂ ᠣᠩᠰᠢᠯᠭᠠ ᠵᠢ ᠵᠢᠯᠤᠭᠤᠳᠬᠤ ᠵᠢ ᠴᠢᠬᠤᠯᠠᠴᠢᠯᠠᠨᠠ᠃ ᠠ᠋ᠨᠡ ᠲᠠᠯᠠᠪᠠᠷ ᠬᠢᠲᠠᠳ ᠬᠡᠯᠡ ᠪᠠ ᠮᠣᠩᠭᠤᠯ ᠬᠡᠯᠡᠨᠤ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠨᠢᠭᠡᠳᠦᠯᠳᠡᠢ ᠪᠠᠶ᠋ᠢᠨᠠ᠃ ᠦᠭᠡ ᠦᠭᠦᠯᠡᠪᠦᠷᠢᠪᠠᠨ ᠵᠦᠪ ᠣᠩᠰᠢᠵᠦ᠂ ᠵᠦᠪ ᠪᠢᠴᠢᠵᠦ᠂ ᠵᠦᠪ ᠬᠡᠷᠡᠭᠯᠡᠵᠦ ᠴᠢᠳᠠᠭ᠍ᠤ ᠪᠣᠯ ᠭᠡᠯᠠ ᠰᠤᠷᠬᠤ ᠵᠢᠨ ᠵᠠᠨᠭ᠌ᠬᠢᠯᠠᠭᠠ ᠮᠦᠨ᠃ ᠬᠡᠯᠡ ᠰᠤᠷᠬᠤ ᠵᠢᠨ ᠪᠠᠰᠠ ᠨᠢᠭᠡᠨ ᠵᠣᠷᠢᠯᠭᠠ ᠮᠦᠨ᠃ ᠬᠦᠮᠦᠰ ᠣᠩᠰᠢᠯᠭᠠᠪᠠᠷ ᠲᠠᠮᠵᠢᠨ ᠬᠡᠯᠡᠨᠤ ᠮᠡᠳᠡᠷᠡᠮᠵᠢ ᠵᠢ ᠣᠯᠵᠤ ᠬᠡᠯᠡᠨᠤ ᠬᠤᠷᠠᠮᠳᠤᠭᠤᠯᠤᠯᠲᠠᠢ ᠪᠣᠯᠳᠠᠭ᠃ ᠣᠯᠨᠨ ᠨᠣᠮ ᠣᠩᠰᠢᠵᠦ ᠪᠠᠶ᠋ᠢᠨᠠ ᠭᠡᠳᠡᠭ ᠴᠢᠨᠢ ᠦᠭᠡᠰᠤᠨ ᠰᠠᠩᠳᠤ ᠥᠪ ᠬᠥᠷᠦᠩᠭᠡ ᠨᠡᠮᠡᠭᠳᠡᠵᠦ ᠪᠣᠢ ᠯᠡ ᠬᠡᠰᠡᠨ ᠦᠭᠡ᠃
3. ᠪᠠᠭᠰᠢ ᠨᠠᠷᠤᠨ ᠬᠤᠷᠰᠢᠨ ᠠᠵᠢᠯᠯᠠᠭ᠍ᠤᠨᠢ ᠦᠷᠡ ᠪᠦᠳᠦᠮᠵᠢᠪᠠᠷ ᠨᠡᠩ ᠰᠠᠶ᠋ᠢᠨ ᠪᠠᠶ᠋ᠢᠳᠠᠭᠢ ᠤᠯᠠᠮ ᠭᠦᠨᠵᠡᠭᠡᠢ ᠣᠶ᠋ᠢᠯᠠᠭ᠋ᠠᠯᠠ᠃ ᠪᠠᠭᠰᠢ ᠨᠠᠷᠤᠨ ᠬᠤᠷᠰᠢᠨ ᠠᠵᠢᠯᠯᠠᠵᠤ ᠪᠠᠶ᠋ᠢᠭᠠ ᠵᠢ ᠪᠦᠸᠸ ᠯᠸ ᠳᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢᠠᠴᠠ ᠬᠠᠷᠠᠯᠠ᠃ ᠲᠡᠳᠡ ᠨᠢᠭᠡ ᠬᠢᠴᠢᠶᠡᠯᠢ ᠬᠡᠳᠦᠨ ᠪᠠᠭᠰᠢ ᠪᠡᠯᠡᠳᠭᠡᠨ ᠵᠢᠭ᠋ᠠᠬᠤᠳᠤᠪᠠᠨ ᠮᠡᠳᠡᠯᠭᠡ ᠴᠢᠳᠠᠪᠤᠷᠢ ᠵᠢᠨ ᠬᠠᠷᠠᠯᠲᠠᠪᠠᠨ ᠬᠤᠪᠢᠳᠠᠨ ᠠᠪᠴᠦ ᠬᠠᠷᠢᠯᠴᠠᠨ ᠬᠠᠮᠵᠢᠬᠤ ᠬᠡᠯᠪᠡᠷᠢᠪᠠᠷ ᠵᠣᠷᠢᠯᠭᠠᠳᠤᠪᠠᠨ ᠬᠦᠷᠳᠡᠭ ᠪᠠᠶ᠋ᠢᠨᠠ᠃ ᠪᠠᠭᠰᠢ ᠵᠢᠨ ᠵᠢᠭ᠋ᠠᠭᠰᠠᠨ ᠬᠢᠴᠢᠶᠡᠯᠢ ᠦᠨᠡᠯᠡᠬᠦᠳᠤᠪᠠᠨ ᠬᠡᠳᠦᠨ ᠪᠠᠭᠰᠢᠠᠴᠠ ᠠᠳᠠᠯᠢ ᠪᠣᠰᠤ ᠬᠠᠷᠠᠭ᠋ᠠᠰᠤᠠᠴᠠ ᠳ᠋ᠦᠩᠨᠡᠨ ᠶᠠᠷᠢᠵᠠᠢ᠃ ᠵᠢᠱ᠌ᠢᠶᠡᠯᠡᠬᠦᠳᠤ᠄ ᠨᠢᠭᠡ ᠪᠠᠭᠰᠢᠨᠢ ᠬᠢᠴᠢᠶᠡᠯᠢ ᠳᠥᠰᠦᠪᠯᠡᠬᠦ᠂ ᠨᠢᠭᠡᠨᠢ ᠬᠢᠴᠢᠶᠡᠯᠢ ᠵᠢᠭ᠋ᠠᠬᠤ᠂ ᠨᠢᠭᠡᠨᠢ ᠰᠤᠷᠤᠭᠴᠢ ᠵᠢᠨ ᠰᠤᠷᠬᠤᠳᠤ ᠣᠷᠤᠯᠴᠠᠵᠤ ᠪᠠᠶ᠋ᠢᠭᠠ ᠵᠢ ᠪᠠᠶ᠋ᠢᠴᠠᠭ᠋ᠠᠵᠤ᠂ ᠨᠢᠭᠡᠨᠢ ᠪᠠᠭᠰᠢ ᠵᠢᠨ ᠬᠢᠴᠢᠶᠡᠯᠳᠤᠬᠢ ᠠᠵᠢᠯᠯᠠᠭ᠋ᠠᠨᠢ ᠠᠵᠢᠭᠯᠠᠵᠤ᠂ ᠨᠢᠭᠡᠨᠢ ᠰᠤᠷᠤᠭᠴᠢ ᠵᠢᠨ ᠬᠢᠴᠢᠶᠡᠯᠳᠤᠬᠢ ᠠᠵᠢᠯᠯᠠᠭᠠ ᠵᠢ ᠪᠠᠶ᠋ᠢᠴᠠᠭ᠋ᠠᠨᠠ ᠁ ᠭᠡᠬᠦ ᠮᠡᠲᠦ᠃ ᠬᠢᠴᠢᠶᠡᠯᠤᠨ ᠳᠠᠷᠠᠭᠠ ᠠ᠋ᠳᠡᠭᠡᠷ ᠪᠠᠭᠰᠢ ᠨᠠᠷ ᠦᠪᠡᠷ ᠦᠪᠡᠷᠤᠨ ᠬᠤᠪᠢᠳᠠᠭᠰᠠᠨ ᠠᠵᠢᠭᠯᠠᠯᠲᠠᠪᠠᠨ ᠬᠤᠪᠢᠶᠠᠯᠴᠠᠵᠤ ᠣᠯᠵᠤ ᠠᠯᠳᠠᠭᠰᠠᠨ ᠵᠶ᠋ᠠᠨ ᠳ᠋ᠦ᠍ᠢ᠍ᠨᠭᠨᠠᠵᠤ ᠪᠣᠢ᠃ ᠮᠦᠨ ᠳᠠᠷᠠᠭᠠ ᠬᠢᠴᠢᠶᠡᠯᠤᠨ ᠬᠠᠷᠠᠯᠲᠠᠪᠠᠨ ᠶᠠᠷᠢᠯᠴᠠᠨ ᠲᠣᠭᠲᠠᠵᠤ ᠠ᠋ᠭᠦᠷᠭᠡᠪᠠᠨ ᠬᠤᠪᠢᠳᠠᠨ ᠠᠪᠳᠠᠭ ᠪᠠᠶ᠋ᠢᠪᠠ᠃ ᠠ᠋ᠨᠡ ᠳᠤᠷᠰᠢᠯᠭᠠ ᠵᠢ ᠠᠮᠢᠳᠤᠯᠢᠭ ᠠᠰᠢᠭᠯᠠᠵᠤ ᠪᠠᠭᠰᠢ ᠨᠠᠷ ᠦᠷᠭᠦᠯᠵᠢ ᠵᠢᠨ ᠴᠢᠨᠠᠷᠲᠠᠢ ᠬᠠᠮᠵᠢᠯᠴᠠᠪᠠᠯ ᠰᠠᠶ᠋ᠢᠨ ᠳ᠋ᠠ᠃ ᠪᠠᠰᠠ ᠨᠢᠭᠡᠨ ᠰᠤᠷᠤᠯᠴᠠᠭᠤᠰᠢᠲᠠᠢᠨᠢ ᠬᠢᠳᠡᠳ ᠪᠠᠭᠰᠢ ᠵᠢᠨ ᠬᠢᠴᠢᠶᠡᠯ ᠵᠶ᠋ᠠᠨ ᠮᠠᠰᠢ ᠨᠠᠷᠢᠯᠢᠬ ᠪᠡᠯᠡᠳᠭᠡᠨ ᠨᠢᠮᠪᠠᠢ ᠵᠢᠭ᠋ᠠᠵᠤ ᠪᠠᠶ᠋ᠢᠭᠠ᠂ ᠮᠠᠰᠢᠲᠠ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢᠳᠡᠢᠲᠠᠢ ᠬᠠᠨᠳᠤᠵᠤ ᠪᠠᠶ᠋ᠢᠭᠠ ᠣᠪᠤᠷ ᠵᠢᠴᠢ ᠪᠠᠭᠰᠢ ᠨᠠᠷᠨᠢ ᠬᠢᠴᠢᠶᠡᠯ ᠲᠥᠷᠥᠯᠤᠨ ᠳᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨ ᠪᠣᠯᠬᠤᠪᠠᠷ ᠴᠢᠷᠮᠠᠶ᠋ᠢᠵᠤ ᠪᠠᠶ᠋ᠢᠭᠠ ᠵᠢ ᠠᠩᠬᠠᠷᠴᠦ ᠮᠡᠳᠡᠯᠡ᠃ ᠠ᠋ᠳᠡᠭᠡᠷ ᠵᠢᠭ᠋ᠠᠬᠤ ᠠᠷᠭᠠ ᠮᠤᠨᠭ᠌ᠭᠤᠯ ᠪᠠᠭᠰᠢ ᠵᠢᠨ ᠲᠤᠮᠳᠠ ᠠᠯᠠᠭᠠ ᠭᠡᠰᠡᠨ ᠪᠤᠰᠤ᠂ ᠬᠠᠷᠢᠨ ᠪᠦᠷᠢᠨ ᠲᠦᠬᠦᠷ ᠪᠣᠯᠵᠤ ᠰᠢᠰᠲᠸᠮᠴᠢᠯᠡᠵᠦ ᠲᠡᠶ᠋ᠢᠯᠦᠭᠡ ᠦᠭᠡᠢ ᠪᠠᠶ᠋ᠢᠭᠠᠪᠠᠨ ᠮᠡᠳᠡᠷᠡᠬᠦ ᠬᠡᠷᠡᠭᠳᠡᠢ ᠶᠤᠮ᠃ 《ᠵᠢᠭ᠋ᠠᠬᠤ ᠠᠷᠭᠠ ᠪᠣᠯ ᠲᠤᠭᠲᠠᠭᠰᠠᠨ ᠪᠢᠰᠢ》 ᠲᠤᠯᠠ ᠪᠢᠳᠡ ᠬᠢᠲᠠᠳᠤᠨ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠵᠢᠨ 《ᠰᠢᠮᠡ ᠵᠢᠨᠢ ᠰᠢᠩᠭᠡᠭᠡᠵᠦ᠂ ᠰᠢᠭ᠋ᠠᠷᠤ ᠵᠢᠨᠢ ᠣᠷᠬᠢᠬᠤ》 ᠣᠪᠤᠷ ᠵᠶ᠋ᠠᠷ ᠬᠠᠨᠳᠤᠪᠠᠯ ᠪᠣᠯᠴᠢᠬᠠᠨᠠ᠃ ᠦᠪᠡᠷᠤᠨ ᠣᠨᠴᠠᠯᠢᠭᠲᠤᠪᠠᠨ ᠳᠣᠬᠢᠷᠠᠭᠤᠯᠵᠤ ᠠᠮᠢᠳᠤᠯᠢᠭ ᠬᠡᠷᠡᠭᠯᠡᠪᠡᠯ ᠪᠣᠯᠴᠢᠬᠠᠨᠠ᠃
4. ᠬᠢᠳᠠᠳ ᠦᠨᠳᠦᠰᠦᠳᠡᠨ ᠠ᠋ᠷᠳᠡᠨᠤ ᠣᠯᠠᠮᠵᠢᠯᠠᠯᠲᠦ ᠰᠤᠶᠤᠯ ᠤᠷᠤᠭᠤᠪᠠᠨ ᠶᠡᠭᠡᠳᠡ ᠦᠩᠭᠡᠶ᠋ᠢᠨ ᠬᠠᠷᠠᠵᠤ ᠪᠠᠶ᠋ᠢᠭᠠ ᠶᠤᠮ ᠪᠠᠢ᠍ᠢ᠍ᠨᠠ᠃ ᠠ᠋ᠷᠳᠡᠨᠤ ᠰᠢᠯᠢᠳᠡᠭ ᠥᠪ ᠤᠯᠠᠮᠵᠢᠯᠠᠯᠠᠴᠠᠪᠠᠨ ᠠ᠋ᠷᠴᠢᠮ ᠬᠦᠴᠦ᠂ ᠰᠢᠮᠡ ᠲᠡᠵᠢᠭᠡᠯ ᠠᠪᠬᠤᠨᠢ ᠵᠦᠢ᠍ᠳᠡᠢ᠃ ᠬᠢᠲᠠᠳ ᠦᠨᠳᠦᠰᠦᠳᠡᠨ ᠤᠯᠤᠰᠤᠨ ᠰᠢᠯᠭ᠋ᠠᠯᠲᠠ ᠵᠢᠨ ᠰᠡᠳᠦᠪᠲᠤᠪᠠᠨ ᠮᠦᠨ ᠠ᠋ᠷᠲᠡᠨᠤ ᠵᠣᠬᠢᠶᠠᠯ ᠪᠦᠳᠦᠭᠡᠯᠠᠴᠠᠪᠠᠨ ᠮᠠᠲᠸᠷᠢᠶᠠᠯ ᠠᠪᠴᠤ ᠬᠡᠷᠡᠭᠯᠡᠬᠦ ᠵᠤᠷᠪᠣᠰ ᠲᠣᠭᠲᠠᠭ᠋ᠠᠨ ᠬᠡᠷᠡᠭᠵᠢᠭᠦᠯᠵᠦ ᠪᠠᠶ᠋ᠢᠨᠠ᠃ ᠲᠡᠳᠡ 《ᠳᠥᠷᠪᠡᠨ ᠪᠢᠴᠢᠭ》 《ᠲᠠᠪᠤᠨ ᠨᠣᠮ》 ᠵᠶ᠋ᠠᠨ ᠰᠤᠷᠬᠤ ᠪᠢᠴᠢᠭᠲᠤᠪᠠᠨ ᠶᠡᠬᠡᠲᠡ ᠬᠡᠷᠡᠭᠯᠡᠵᠦ ᠪᠣᠢ᠃ ᠪᠦᠸᠸ ᠯᠸ ᠳᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢᠳᠤ ᠶᠠᠭ ᠰᠠᠶᠢᠬᠠᠨ ᠠ᠋ᠷᠲᠡᠨᠤ ᠬᠡᠯᠡᠨᠤ ᠵᠣᠬᠢᠶᠠᠯ ᠵᠢᠭ᠋ᠠᠵᠤ ᠪᠠᠶ᠋ᠢᠭᠠᠲᠠᠢ ᠲᠠᠭ᠋ᠠᠷᠠᠯᠠ᠃ 《ᠰᠢᠯᠦᠭᠯᠡᠯᠲᠦ ᠨᠣᠮ》ᠠᠴᠠᠪᠠᠨ ᠰᠣᠩᠭᠤᠭᠰᠠᠨ 《ᠬᠤᠯᠤᠰᠤ》 ᠭᠡᠬᠦ ᠵᠣᠬᠢᠶᠠᠯᠢ ᠬᠤᠶᠠᠷ ᠪᠠᠭᠰᠢ ᠠᠳᠠᠯᠢ ᠪᠣᠰᠤ ᠬᠠᠷᠠᠯᠲᠠᠠᠴᠠ ᠬᠢᠴᠢᠶᠡᠯᠯᠡᠯᠡ᠃ ᠨᠢᠭᠡᠨᠢ ᠵᠣᠬᠢᠶᠠᠯᠤᠨ ᠭᠤᠸᠠ ᠲᠠᠭ᠋ᠠᠰᠢᠶᠠᠯ᠂ ᠤᠷᠠᠨ ᠰᠣᠨᠢᠷᠬᠠᠮᠵᠢ ᠵᠢᠨᠢ ᠴᠢᠬᠤᠯᠠᠴᠢᠯᠠᠭᠰᠠᠨ ᠪᠠᠶ᠋ᠢᠬᠤᠳᠤ ᠨᠦᠭᠦᠭᠡᠨᠢ ᠣᠩᠰᠢᠯᠭᠠ ᠵᠢ ᠵᠢᠯᠤᠭᠤᠳᠴᠤ ᠬᠡᠯᠡᠨᠤ ᠮᠡᠳᠡᠷᠡᠮᠵᠢ ᠵᠢ ᠴᠢᠬᠤᠯᠠᠴᠢᠯᠠᠭᠰᠠᠨ ᠪᠠᠶ᠋ᠢᠨᠠ᠃ 《ᠲᠡᠨᠡᠭ ᠡᠪᠦᠭᠡᠨ ᠠᠭᠤᠯᠠ ᠵᠢ ᠨᠡᠭᠦᠯᠭᠡᠭᠰᠡᠨ》 ᠭᠡᠬᠦ ᠬᠢᠴᠢᠶᠡᠯᠢ ᠰᠤᠷᠭ᠋ᠠᠭᠤᠯᠢ ᠵᠢᠨ ᠵᠠᠬᠢᠷᠤᠯᠨᠢ ᠵᠢᠭ᠋ᠠᠯᠠ᠃ ᠣᠳᠤ ᠵᠢᠨ ᠳᠡᠭᠡᠳᠦ ᠬᠥᠭᠵᠢᠯᠲᠠᠢ ᠴᠠᠭᠲᠤ ᠠ᠋ᠢ᠍ᠢ᠍ᠮᠦᠷᠭᠦᠤ ᠬᠠᠭᠤᠮᠠᠭ᠋ᠠᠢ ᠰᠢᠨᠵᠢᠲᠠᠢ ᠦᠯᠢᠭᠡᠷ ᠳᠣᠮᠤᠭᠢ ᠵᠢᠭ᠋ᠠᠵᠤ ᠪᠠᠶ᠋ᠢᠭᠠᠨᠢ ᠬᠢᠲᠠᠳᠤᠨ ᠰᠤᠷᠭ᠋ᠠᠨ ᠬᠦᠮᠦᠵᠢᠯ ᠠ᠋ᠷᠲᠡᠨᠤ ᠰᠤᠶᠤᠯᠠᠴᠠᠪᠠᠨ ᠦᠭᠡ ᠬᠡᠯᠡ᠂ ᠦᠵᠡᠯ ᠰᠠᠨᠠᠭᠠ ᠠ᠋ᠷᠢᠵᠦ ᠪᠠᠶ᠋ᠢᠭᠠᠨᠢ ᠢᠯᠡ᠃ ᠰᠤᠷᠭ᠋ᠠᠭᠤᠯᠢ ᠵᠢᠨ ᠵᠠᠬᠢᠷᠦᠯᠨᠢ ᠲᠥᠮᠡᠨ ᠶᠠᠭ᠋ᠠᠷᠠᠤ ᠵᠢᠨ ᠳᠤᠮᠳᠠ ᠬᠢᠴᠢᠶᠡᠯ ᠵᠢᠭ᠋ᠠᠵᠤ᠂ ᠬᠢᠴᠢᠶᠡᠯ ᠵᠶ᠋ᠠᠨ ᠰᠤᠨᠤᠰᠬᠠᠵᠤ ᠪᠠᠶ᠋ᠢᠭᠠᠨᠢ ᠪᠠᠭ᠍ᠠᠷᠬᠠᠯᠲᠠᠢ ᠰᠠᠨᠠᠭᠳᠠᠯᠠ᠃ ᠭᠠᠶ᠋ᠢᠬᠠᠰᠢ ᠲᠥᠷᠦᠭᠦᠯᠦᠭᠰᠡᠨ ᠨᠢᠭᠡᠨ ᠵᠦᠢ᠍ᠯᠢ ᠦᠭᠦᠯᠡᠪᠡᠰᠦ᠄ ᠨᠢᠭᠡᠨ ᠪᠠᠭᠰᠢ ᠵᠢᠨ ᠰᠤᠷᠤᠭᠴᠢᠳᠤᠪᠠᠨ ᠦᠭᠭᠦᠭᠰᠡᠨ ᠰᠤᠷᠬᠤ ᠳᠥᠰᠦᠪᠲᠤᠨᠢ ᠶᠤᠸᠠᠨ ᠤᠯᠤᠰᠤᠨ ᠮᠣᠩᠭᠤᠯ ᠰᠢᠯᠦᠭᠴᠢ ᠰᠠᠳᠤᠯᠠ ᠵᠢᠨ ᠰᠢᠯᠦᠭ ᠪᠠᠶ᠋ᠢᠭᠰᠠᠨᠢ ᠦᠵᠡᠪᠡᠢ᠃ ᠲᠡᠷᠡᠨᠢ ᠰᠠᠳᠤᠯᠠ ᠵᠢᠨ 《ᠮᠠᠨ ᠵᠢᠶᠠᠩ ᠬᠤᠩ ᠳᠠᠭᠤᠯᠠᠯ》 ᠬᠡᠮᠡᠬᠦ ᠪᠦᠳᠦᠭᠡᠯ ᠪᠠᠶ᠋ᠢᠯᠠ᠃ ᠤᠤᠯᠨᠢ ᠠ᠋ᠨᠡ ᠰᠢᠯᠦᠭ ᠨᠠᠨᠵᠢᠩᠲᠠᠢ ᠬᠤᠯᠪᠤᠭᠠᠲᠠᠢ ᠪᠠᠶ᠋ᠢᠭᠰᠠᠨᠠᠴᠠ ᠬᠡᠷᠡᠭᠯᠡᠭᠰᠡᠨ ᠪᠣᠯᠪᠠ ᠦᠦ᠃ ᠲᠡᠷᠡ ᠰᠢᠯᠦᠭᠲᠤ 《ᠵᠢᠨ ᠯᠢᠩᠳᠤᠷ ᠠ᠋ᠷᠲᠡᠨᠢ ᠰᠠᠨᠠᠭ᠋ᠠᠯᠵᠠᠭᠰᠠᠨ ᠢᠨᠦ》 ᠭᠡᠵᠦ ᠲᠣᠳᠤᠷᠬᠠᠶ᠋ᠢᠯᠠᠵᠤ ᠪᠣᠢ᠃ ᠶᠣᠸᠠᠨ ᠤᠯᠤᠰᠤᠨ ᠦᠶᠡᠳᠤ ᠨᠠᠨᠵᠢᠩᠢ ᠵᠢᠨ ᠯᠢᠩ ᠭᠡᠵᠦ ᠳᠠᠭᠤᠳᠠᠵᠤ ᠪᠠᠶ᠋ᠢᠵᠠᠢ᠃ ᠰᠠᠳᠤᠯᠠ ᠵᠢᠨ ᠰᠢᠯᠦᠭᠲᠤ᠄
ᠵᠢᠷᠭᠤᠭ᠋ᠠᠨ ᠦᠶᠡ ᠵᠢᠨ ᠢᠳᠡᠷᠭᠡᠭ ᠰᠦᠷᠯᠢᠭ᠃
ᠵᠤᠨ ᠪᠣᠯᠬᠤ ᠣᠶ᠋ᠢᠷᠠᠲᠤᠪᠠᠢ᠂
ᠵᠢᠭ᠋ᠠᠬᠠᠨ ᠴᠤ᠌ ᠴᠢᠮᠡᠭᠡ ᠢᠮᠡᠭᠡ ᠦᠭᠡᠢ᠃
ᠤᠶ᠋ᠢᠳᠬᠠᠷᠯᠠᠨ ᠪᠠᠷᠠᠯᠠᠭ᠍ᠤᠶᠠ ᠬᠤᠭᠤᠰᠤᠷ᠂
ᠠᠭᠤᠯᠠ ᠤᠰᠤᠨᠤ ᠲᠥᠷᠰᠦ ᠭᠡᠳᠦᠶ᠋ᠢᠳᠦᠭᠡᠳ
ᠤᠤᠯᠤᠨ ᠰᠢᠨᠵᠢ ᠨᠢᠭᠡᠨᠲᠡ ᠪᠣᠰᠤ᠂
ᠸᠠᠩ᠂ ᠰᠢᠶᠸ ᠣᠪᠤᠭᠲᠤ ᠵᠢᠨ ᠬᠠᠷᠰᠢ ᠵᠢᠨ ᠠ᠋ᠮᠦᠨᠡᠬᠢ ᠬᠤᠣᠰ ᠬᠠᠷᠢᠶᠠᠴᠠᠢ
ᠡᠦ ᠢ ᠭᠤᠳᠤᠮᠵᠢ ᠵᠢᠨ ᠠᠮᠠᠰᠠᠷ ᠳᠡᠭᠡᠷᠡ ᠲᠠᠨᠢᠯᠴᠠᠨ ᠥᠩᠬᠡᠷᠡᠪᠡᠢ᠃
ᠦᠳᠡᠰᠢ ᠵᠢᠨ ᠭᠦᠨᠤ ᠤᠶ᠋ᠢᠳᠬᠠᠷ ᠭᠠᠩᠰᠠᠷᠠᠯ ᠥᠨᠦᠴᠢᠨ ᠬᠤᠲᠠᠨᠠ ᠴᠣᠬᠢᠬᠤ ᠵᠢ ᠰᠣᠨᠤᠰᠬᠤᠶᠠ᠂
ᠬᠠᠪᠤᠷᠤᠨ ᠲᠣᠯᠭᠢᠶᠠ ᠲᠠᠪᠴᠢᠭᠤ᠃
ᠠ᠋ᠮᠦᠨᠡᠬᠢ ᠬᠡᠷᠡᠭᠢ ᠠ᠋ᠷᠭᠢᠴᠡᠭᠦᠯᠬᠦᠶᠡ
ᠦᠰᠦᠨᠠᠴᠠ ᠵᠤᠵᠠᠭ᠋ᠠᠨ ᠵᠣᠪᠠᠨᠢᠯ᠃
ᠦᠩᠬᠡᠷᠡᠭᠰᠡᠨ ᠤᠯᠤᠰᠢ ᠰᠠᠨᠠᠭ᠋ᠠᠯᠵᠠᠭ᠍ᠤᠶᠠ
ᠦᠯᠡᠳᠡᠭᠰᠡᠨ ᠮᠥᠷ ᠲᠡᠳᠦᠢ᠃
ᠳᠠᠩᠳᠠ ᠬᠤᠶ᠋ᠢᠯᠠᠷᠠᠭᠰᠠᠨ ᠤᠲᠤᠭᠠ ᠬᠤᠪᠠᠭ᠍ᠠᠶ᠋ᠢᠷᠠᠭᠰᠠᠨ ᠡᠪᠡᠰᠦ᠂
ᠲᠠᠰᠢᠭᠰᠠᠨ ᠨᠠᠷᠠᠨᠳᠤᠷ ᠬᠡᠷᠢᠶᠡ ᠰᠦᠯᠵᠢᠮᠦᠢ᠃
ᠠ᠋ᠷᠳᠡᠨᠢᠲᠦ ᠮᠣᠳᠤᠨ ᠲᠠᠭᠤᠯᠠᠯ ᠳᠣᠷᠤᠶ᠋ᠢᠳᠠᠭᠤᠯᠵᠤ ᠬᠠᠪᠤᠷᠤᠨ ᠰᠢᠭᠦᠳᠡᠷᠢ ᠵᠢᠭᠡᠭᠦᠨ᠂
ᠠ᠋ᠩᠰᠡᠭᠲᠦ ᠬᠤᠳᠳᠤᠭ ᠰᠦᠢ᠍ᠳᠴᠦ ᠡᠪᠳᠡᠷᠡᠬᠦᠶᠡ ᠬᠦᠢ᠍ᠲᠡᠨᠤ ᠲᠠᠷᠴᠠ ᠤᠬᠢᠯᠠᠨᠠᠮ᠃
ᠠ᠋ᠨᠡ ᠠ᠋ᠳᠦᠷ ᠪᠣᠯᠬᠤᠶᠠ᠂
ᠵᠢᠶᠠᠩ ᠱᠠᠨ ᠠᠭᠤᠯᠠᠨ ᠭᠠᠭᠴᠠ ᠬᠥᠬᠡᠷᠡᠭᠡᠳ
ᠴᠢᠨ ᠬᠤᠸᠠᠢ ᠨᠣᠭᠤᠭ᠋ᠠᠷᠠᠮᠤᠢ》 ᠭᠡᠵᠦ ᠣᠶᠠᠩᠭ᠋ᠠᠯᠠᠭᠰᠠᠨ ᠪᠠᠶ᠋ᠢᠨᠠᠮ᠃ ᠰᠡᠳᠦᠪᠤᠨ ᠠᠰᠠᠭᠤᠯᠲᠠᠨᠢ᠄ ᠲᠤᠰ ᠰᠢᠯᠦᠭᠲᠤ 《ᠠ᠋ᠷᠲᠡᠨᠢ ᠰᠠᠨᠠᠭ᠋ᠠᠯᠵᠠᠭ᠍ᠤ》ᠪᠠᠷ 《ᠥᠩᠬᠡᠷᠡᠭᠰᠡᠨ ᠣᠴᠢᠷ》ᠢ ᠳᠤᠷᠠᠰᠤᠭᠰᠠᠨ ᠪᠣᠯ 《ᠦᠰᠦᠨᠠᠴᠠ ᠵᠤᠵᠠᠭ᠋ᠠᠨ ᠵᠣᠪᠠᠨᠢᠯ》 ᠭᠡᠳᠡᠭᠤᠨ 《ᠵᠣᠪᠠᠨᠢᠯ》ᠤᠨ ᠠᠭᠤᠯᠭᠠ ᠵᠢ ᠶᠠᠷᠢᠵᠤ ᠦᠵᠡᠭᠡᠷᠡᠢ ᠬᠡᠰᠡᠨ ᠪᠠᠶ᠋ᠢᠯᠠ᠃ 《ᠮᠢᠨᠭ᠌ᠭ᠋ᠠᠨ ᠣᠩᠰᠢᠬ᠍ᠴᠢᠳᠤ ᠮᠢᠨᠭ᠌ᠭ᠋ᠠᠨ ᠬᠠᠮᠸᠯᠲᠲᠠᠢ》 ᠭᠡᠳᠡᠭ ᠵᠶ᠋ᠠᠷ ᠠ᠋ᠨᠡ ᠰᠡᠳᠦᠪᠲᠤ ᠣᠯᠠᠨ ᠬᠠᠷᠢᠭᠤᠯᠲᠠᠲᠠᠢ ᠪᠠᠶ᠋ᠢᠬᠠ ᠳ᠋ᠠ᠃ ᠤᠷᠠᠨ ᠵᠣᠬᠢᠶᠠᠯ ᠪᠠ ᠤᠯᠤᠰ ᠲᠥᠷᠦ ᠵᠢ ᠬᠤᠳᠬᠤᠵᠤ ᠪᠣᠯᠬᠤ ᠦᠭᠡᠢ ᠶᠤᠮ᠃ ᠨᠡᠮᠡᠵᠦ ᠬᠡᠯᠡᠬᠦᠳᠤ ᠪᠠᠭᠰᠢ ᠵᠢᠨ ᠲᠠᠯᠪᠢᠭᠰᠠᠨ ᠠᠷᠪᠠᠨ ᠰᠠᠶ᠋ᠢᠨ ᠠᠰᠠᠭᠤᠯᠲᠠᠠᠴᠠ ᠰᠤᠷᠤᠭᠴᠢ ᠵᠢᠨ ᠲᠤᠷᠠᠳᠣᠭᠰᠠᠨ ᠨᠢᠭᠡ ᠮᠠᠭᠤ ᠠᠰᠠᠭᠤᠯᠲᠠ ᠲᠡᠭᠡᠷᠡ ᠪᠠᠢ᠍ᠢ᠍ᠬᠤ ᠲᠤᠬᠢᠶᠠᠯᠳᠤᠯ ᠪᠤᠢ᠃
ᠪᠢᠳᠡ ᠴᠤ᠌ ᠣᠯᠠᠮᠵᠢᠯᠠᠯᠲᠦ ᠰᠤᠶᠤᠯ ᠵᠶ᠋ᠠᠨ ᠵᠠᠯᠭ᠋ᠠᠮᠵᠢᠯᠠᠵᠤ ᠬᠦᠭᠵᠢᠬᠦᠯᠵᠦ ᠪᠠᠳᠠᠷᠠᠭᠤᠯᠵᠤ ᠁ ᠬᠡᠮᠡᠨ ᠣᠷᠢᠶᠠᠯᠠᠭᠰᠠᠭ᠋ᠠᠷ ᠢᠷᠡᠯᠡ᠃ ᠣᠳᠤ ᠪᠣᠳᠠᠳᠠᠢ ᠬᠢᠬᠦ ᠯᠠ ᠦᠯᠠᠳᠠᠵᠤ ᠪᠤᠢ᠃ ᠮᠠᠨᠤ 《ᠨᠢᠭᠤᠴᠠ ᠲᠤᠪᠴᠢᠶᠠᠨ》 ᠮᠠᠨᠢ 《ᠭᠠᠨᠵᠤᠤᠷ ᠳ᠋ᠠᠨᠵᠤᠤᠷ》 《ᠠᠷᠢᠭᠤᠨ ᠨᠤᠮ》 《ᠺᠦᠷᠠᠨ ᠰᠤᠳᠤᠷ》ᠠᠴᠠ ᠲᠤᠤᠷᠠᠳᠠᠬᠤ ᠦᠭᠡᠢ ᠦᠨᠡᠳᠦ ᠪᠥᠲᠦᠭᠡᠯ᠃ 《ᠨᠢᠭᠤᠴᠠ ᠲᠤᠪᠴᠢᠶᠠᠨ》 ᠮᠠᠨᠢ ᠬᠡᠯᠡ᠂ ᠲᠡᠤᠬᠡ᠂ ᠤᠷᠠᠨ ᠵᠣᠬᠢᠶᠠᠯᠢ ᠤᠶᠠᠯᠳᠤᠭᠤᠯᠤᠭᠰᠠᠨ ᠲᠠᠪᠳᠠᠭᠳᠠᠰᠢ ᠦᠭᠡᠢ ᠠᠪᠤᠷᠭᠤ ᠪᠦᠳᠦᠭᠡᠯ ᠪᠣᠯᠬᠤ ᠲᠤᠯᠠ ᠵᠢᠭ᠋ᠠᠬᠤ ᠰᠤᠷᠬᠤᠳᠤ ᠪᠦᠷ ᠲᠤᠬᠢᠷᠠᠮᠵᠢᠳᠠᠢ ᠪᠦᠭᠡᠳ ᠨᠡᠩ ᠴᠢᠬᠤᠯᠠᠨᠢ ᠵᠣᠷᠢᠭ ᠰᠠᠨᠠᠭᠠ᠂ ᠬᠡᠯᠡ ᠣᠬᠠᠭ᠋ᠠᠨ ᠰᠤᠷᠬᠤᠨᠢ ᠦᠨᠡᠯᠡᠰᠢ ᠦᠭᠡᠢ ᠪᠣᠢ ᠊ᠶᠠ᠃ 《ᠬᠡᠰᠡᠷ》 《ᠵᠢᠩᠭ᠋ᠠᠷ》 《ᠠᠯᠲᠠᠨ ᠲᠤᠪᠴᠢ》 《ᠠ᠋ᠷᠳᠡᠨᠢ ᠲᠤᠪᠴᠢ》 《ᠪᠣᠯᠤᠷ ᠠ᠋ᠷᠢᠬᠡ》 《ᠤᠶᠤᠨ ᠲᠦᠯᠬᠢᠭᠦᠷ》 《ᠬᠦᠬᠡ ᠰᠣᠳᠤᠷ》 《ᠮᠣᠩᠭᠤᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠲᠡᠭᠡᠵᠢ ᠪᠢᠴᠢᠭ》 《ᠠᠷᠠᠳᠤᠨ ᠠᠮᠠᠨ ᠦᠯᠢᠭᠡᠷ》 ᠁ ᠮᠡᠲᠦ ᠨᠡᠯᠦᠭᠡᠷ ᠶᠡᠭᠡ ᠠ᠋ᠷᠳᠡᠮᠤᠨ ᠳᠠᠯᠠᠢᠠᠴᠠ ᠠ᠋ᠷᠳᠡᠨᠢ ᠠᠭᠤᠳᠠᠯᠭ᠍ᠤᠳᠤ ᠪᠠᠷᠠᠭᠳᠠᠰᠢ ᠦᠭᠡᠢ᠃ ᠴᠢᠨᠠᠭᠰᠢᠳᠠ ᠦᠭᠦᠯᠠᠭᠦ 《ᠮᠣᠩᠭᠤᠯ ᠠᠷᠠᠳᠤᠨ ᠲᠠᠭᠤᠤ》 ᠵᠢ ᠰᠤᠷᠬᠤ ᠪᠢᠴᠢᠭᠲᠤ ᠲᠥᠯᠥᠪᠯᠡᠭᠡᠲᠠᠢ᠂ ᠬᠠᠷᠠᠯᠲᠠᠲᠠᠢ᠂ ᠠᠯᠬᠤᠮ ᠳᠠᠷᠠᠭᠠᠲᠠᠢ ᠣᠷᠤᠭᠤᠯᠪᠠᠯ ᠰᠢᠯᠦᠭ ᠯᠡ ᠲᠡᠳᠦᠢ ᠪᠣᠰᠤ ᠬᠠᠷᠢᠨ ᠮᠠᠰᠢ ᠶᠡᠭᠡ ᠬᠦᠮᠦᠵᠢᠯᠤᠨ ᠭᠠᠶ᠋ᠢᠬᠠᠮᠰᠢᠭᠲᠤ ᠬᠦᠴᠦᠲᠠᠢ ᠭᠡᠵᠦ ᠦᠵᠡᠨᠡᠮ᠃ ᠠᠷᠠᠳᠤᠨ ᠳᠠᠭᠤᠤ ᠵᠢᠨ ᠦᠭᠡ ᠰᠢᠯᠦᠭᠢ ᠲᠠᠪᠠᠭ᠍ᠤ ᠰᠢᠯᠦᠭ ᠴᠦᠭᠡᠨ ᠰᠢᠦ ᠳ᠋ᠠ᠂ ᠰᠤᠨᠤᠰᠤᠩᠭᠤᠲᠠ ᠴᠡᠭᠡᠵᠢᠯᠡᠭᠳᠡᠳᠡᠭ ᠶᠠᠮᠠᠷ ᠰᠠᠶ᠋ᠢᠬᠠᠨ ᠬᠡᠯᠡᠯᠭᠡ ᠪᠣᠢ！ ᠨᠤᠲᠤᠭ ᠤᠰᠤᠪᠠᠨ ᠮᠠᠭᠲᠠᠭᠰᠠᠨ᠂ ᠠᠪᠤ ᠡᠵᠢᠪᠠᠨ ᠬᠠᠶ᠋ᠢᠷᠠᠯᠠᠭᠰᠠᠨ᠂ ᠠᠮᠠᠷᠠᠭ ᠬᠤᠩᠭᠤᠷ ᠵᠶ᠋ᠠᠨ ᠰᠠᠨᠠᠭᠰᠠᠨ᠂ ᠠᠭᠲᠠ ᠬᠦᠯᠦᠭ ᠵᠶ᠋ᠠᠨ ᠪᠠᠭ᠍ᠠᠷᠬᠠᠭᠰᠠᠨ᠂ ᠠᠷᠤᠤᠬᠠᠨ ᠪᠠᠭ᠋ᠠᠲᠤᠷ ᠵᠶ᠋ᠠᠨ ᠳᠠᠭᠤᠯᠠᠵᠤ ᠠᠲᠠᠭ᠋ᠠᠲᠠᠨ ᠳᠠᠶ᠋ᠢᠰᠦᠨᠳᠤ ᠬᠤᠷᠣᠰᠤᠭᠰᠠᠨ᠂ ᠦᠨᠡᠨ ᠰᠠᠶ᠋ᠢᠨ ᠰᠠᠶ᠋ᠢᠬᠠᠨᠢ ᠬᠦᠰᠡᠵᠦ᠂ ᠬᠤᠳᠠᠯ ᠮᠠᠭᠤ ᠮᠠᠭᠤᠬᠠᠢ ᠵᠢ ᠵᠢᠭᠰᠢᠭᠰᠡᠨ ᠁ ᠶᠠᠮᠠᠷ ᠰᠠᠶ᠋ᠢᠬᠠᠨ ᠰᠢᠯᠦᠭᠲᠠᠢ ᠶᠠᠮᠠᠷ ᠤᠶᠠᠷᠠᠮᠠ ᠠᠶᠠᠯᠭᠤᠲᠠᠢ ᠳᠠᠭᠤᠤ ᠭᠡᠭᠴᠢ ᠪᠣᠢ᠃ ᠲᠡᠷᠡ ᠣᠷᠠᠨ ᠦᠭᠡᠠᠴᠠ ᠬᠡᠯᠡ ᠰᠤᠷᠴᠤ᠂ ᠲᠡᠷᠡ ᠣᠶᠠᠩᠭᠠ ᠰᠡᠳᠭᠢᠯᠠᠴᠠ ᠬᠠᠶ᠋ᠢᠷᠠ ᠬᠥᠷᠲᠡᠵᠦ ᠬᠦᠮᠦᠨ ᠪᠣᠯᠤᠨᠠ ᠰᠢᠦ ᠳ᠋ᠠ᠃ ᠪᠢ ᠦᠰᠦᠭ ᠲᠠᠨᠢᠬᠤᠠᠴᠠᠪᠠᠨ ᠤᠷᠢᠳ ᠠᠷᠠᠳᠤᠨ ᠳᠠᠭᠤᠨᠤ ᠦᠭᠡ ᠠᠶᠠᠯᠭᠤ ᠵᠢ ᠲᠣᠭᠲᠠᠭ᠋ᠠᠨ ᠳᠠᠭᠤᠯᠠᠵᠤ ᠭᠢᠩᠰᠢᠨ᠂ ᠤᠶᠠᠷᠠᠵᠤ ᠬᠠᠶ᠋ᠢᠯᠠᠵᠤ ᠭᠤᠨᠢᠵᠦ ᠪᠠᠶᠠᠰᠤᠨ᠂ ᠵᠢᠷᠭ᠋ᠠᠵᠤ ᠵᠣᠪᠠᠵᠤ ᠦᠰᠦᠭᠰᠡᠨ ᠶᠤᠮᠰᠠᠨ᠃ ᠣᠳᠤ ᠵᠢᠨ ᠬᠡᠣᠬᠡᠳᠤᠨ ᠰᠣᠨᠢᠷᠬᠠᠨ ᠲᠠᠭ᠋ᠠᠰᠢᠶᠠᠳᠠᠭ ᠤᠷᠤᠰᠬᠠᠯ ᠲᠠᠭᠤᠤ᠂ ᠳᠡᠯᠭᠡᠷᠡᠭᠡ ᠲᠠᠭᠤᠤ᠂ ᠨᠠᠶ᠋ᠢᠭᠤᠭᠠ ᠲᠠᠭᠤᠤ᠂ ᠬᠠᠰᠭᠢᠷᠤᠭᠠ ᠳᠠᠭᠤᠤ᠂ ᠬᠢᠲᠠᠳ ᠳᠠᠭᠤᠤᠠᠴᠠ ᠲᠡᠢ᠍ᠢ᠍ᠮᠦᠷᠭᠦᠤ ᠬᠦᠮᠦᠵᠢᠯ ᠬᠦᠷᠲᠡᠬᠥ ᠭᠡᠭᠴᠢ ᠬᠥᠴᠢᠷ ᠠᠰᠠᠭᠣᠳᠠᠯ᠃
ᠥᠷᠬᠥᠯᠵᠢᠯᠡᠨ ᠬᠤᠶᠠᠷ ᠠ᠋ᠳᠦᠷ ᠠ᠋ᠷᠳᠡᠮᠳᠡᠨ ᠪᠠᠭᠰᠢ ᠨᠠᠷᠤᠨ ᠢᠯᠡᠳᠭᠡᠯᠢ ᠰᠣᠨᠤᠰᠴᠠᠭ᠋ᠠᠯᠠ᠃ ᠣᠢ ᠳᠣᠢᠳᠤ ᠣᠷᠤᠮᠠ ᠦᠭᠡᠢ ᠰᠢᠨᠡ ᠰᠠᠶ᠋ᠢᠬᠠᠨ ᠣᠨᠣᠯ ᠳᠤᠷᠠᠳᠴᠤ ᠪᠠᠶ᠋ᠢᠯᠠ᠃ ᠣᠴᠢᠷᠢᠨᠢ ᠣᠯᠵᠤ ᠬᠤᠵᠢᠷᠢᠨᠢ ᠲᠤᠩᠭ᠋ᠠᠪᠠᠯ ᠶᠠᠭᠤᠮᠠ ᠪᠤᠯᠭ᠋ᠠᠨ ᠰᠣᠳᠤᠯᠤᠭᠤᠰᠢᠲᠠᠢ ᠠᠵᠢ᠃ ᠠ᠋ᠷᠳᠡᠮ ᠰᠢᠨᠵᠢᠯᠡᠭᠡᠨ ᠪᠠ ᠵᠢᠭ᠋ᠠᠨ ᠰᠤᠷᠭ᠋ᠠᠯᠲᠠ ᠵᠢ ᠠᠩᠭᠢᠲᠠ ᠦᠵᠡᠳᠡᠭ ᠪᠣᠳᠤᠯ ᠮᠢᠨᠢ ᠠᠷᠠᠢ ᠬᠤᠪᠢᠷᠠᠵᠤ ᠠ᠋ᠬᠢᠯᠡᠵᠦ ᠪᠠᠶ᠋ᠢᠯᠠ᠃ ᠠ᠋ᠢ᠍ᠢ᠍ᠮᠦᠷᠭᠦᠤ ᠪᠣᠯᠪᠠᠰᠤᠷᠠᠯ ᠮᠠᠨᠳᠤ ᠮᠠᠰᠢ ᠴᠢᠬᠤᠯᠠ ᠪᠦᠭᠡᠳ ᠬᠤᠵᠢᠮ ᠬᠤᠶ᠋ᠢᠰᠢᠲᠠ ᠮᠣᠩᠭᠤᠯ ᠪᠠᠭᠰᠢ ᠨᠠᠷ ᠵᠶ᠋ᠠᠨ ᠢᠯᠡᠭᠦᠭᠡᠨ ᠳᠠᠶ᠋ᠢᠴᠢᠯᠠᠵᠤ ᠲᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨᠢ ᠬᠦᠮᠦᠵᠢᠭᠦᠯᠵᠦ ᠮᠤᠩᠭᠤᠯ ᠵᠶ᠋ᠠᠷ ᠢᠯᠡᠳᠭᠡᠯ ᠬᠢᠯᠭᠡᠪᠡᠯ ᠬᠡᠴᠢᠨᠡᠭᠡᠨ ᠰᠠᠶ᠋ᠢᠨ ᠪᠤᠢ᠃ ᠮᠠᠨᠳᠤ ᠴᠢᠩ ᠦᠨᠡᠨᠴᠢ ᠰᠡᠳᠭᠢᠯ ᠵᠶ᠋ᠠᠷ ᠠᠵᠢᠯ ᠬᠢᠳᠡᠭ ᠲᠠᠯᠠ ᠰᠢᠬ ᠰᠡᠳᠭᠢᠯᠲᠠᠢ ᠠᠭᠤᠯᠠ ᠰᠢᠬ ᠬᠦᠮᠦᠰ ᠬᠡᠷᠡᠭᠳᠡᠢ᠃ ᠰᠡᠭᠦᠯᠴᠢ ᠵᠢᠨ ᠠ᠋ᠳᠦᠷ 《ᠠᠵᠢᠯᠤᠨ ᠬᠠᠮᠲᠤᠯᠢᠭ》ᠤᠨᠬᠢᠨ ᠨᠢᠭᠡ ᠵᠢᠯᠤᠨ ᠠᠵᠢᠯᠤᠨ ᠲᠥᠯᠥᠪᠯᠡᠭᠡᠪᠠᠨ ᠲᠤᠭᠳᠠᠭ᠋ᠠᠨ᠂ ᠣᠯᠠᠨᠳᠤ ᠶᠠᠷᠢᠵᠦ ᠦᠭᠭᠦᠭᠰᠡᠨ ᠪᠠ ᠪᠦᠭᠦᠳᠡᠭᠡᠷ ᠭᠠᠷ ᠬᠥᠳᠡᠯᠦᠯᠴᠡᠵᠦ 《ᠰᠤᠷᠬᠤ ᠲᠦᠰᠦᠪ》 ᠬᠢᠵᠡᠭᠡᠯᠡ᠃ ᠣᠯᠠᠨ ᠬᠦᠮᠦᠨᠤ ᠣᠬᠠᠭ᠋ᠠᠨ ᠭᠡᠭᠴᠢ ᠬᠡᠴᠡᠭᠦᠦ ᠯᠡ ᠳ᠋ᠠ᠃ ᠣᠯᠠᠨ ᠰᠠᠶ᠋ᠢᠬᠠᠨ ᠲᠥᠰᠦᠪ ᠮᠡᠨᠳᠦᠯᠡᠵᠦ ᠪᠠᠶ᠋ᠢᠯᠠ᠃ ᠬᠠᠷᠢᠯᠴᠠᠨ ᠰᠣᠯᠢᠯᠴᠠᠵᠤ ᠣᠬᠠᠭ᠋ᠠᠨ ᠲᠡᠯᠡᠵᠦ ᠪᠠᠶ᠋ᠢᠯᠠ᠃
ᠬᠥᠬᠡ ᠮᠦᠷᠡᠨᠤ ᠬᠦᠪᠡᠭᠡᠨᠳᠤᠬᠢ ᠨᠠᠨᠵᠢᠩᠠᠴᠠ ᠬᠦᠬᠡ ᠮᠤᠩᠭᠤᠯᠤᠨ ᠦᠨᠳᠦᠷᠯᠢᠭᠲᠤᠪᠠᠨ ᠬᠡᠯᠡᠬᠦ ᠶᠠᠭᠤᠮᠠᠲᠠᠢ᠂ ᠬᠢᠬᠦ ᠮᠥᠷᠦᠭᠡᠳᠦᠯᠲᠠᠢ ᠪᠤᠴᠠᠨᠠ ᠭᠡᠵᠦ ᠣᠯᠵᠠ ᠪᠣᠰᠤ ᠦᠦ！ ᠡ᠊ᠨᠳᠡ ᠥᠪᠦᠷ ᠮᠣᠩᠭᠤᠯ ᠤᠷᠤᠨᠤ ᠠ᠋ᠷᠳᠡᠮᠳᠡᠨ ᠪᠠᠭᠰᠢ᠂ ᠬᠡᠯᠡᠨᠤ ᠳᠠᠷᠬᠠᠳᠲᠠᠢ ᠲᠠᠨᠢᠯᠴᠠᠨ ᠨᠠᠶ᠋ᠢᠵᠠᠯᠠᠭᠰᠠᠨᠨᠢ ᠲᠣᠮᠤᠬᠠᠨ ᠣᠯᠵᠠ ᠪᠢᠯᠡ᠃ ᠠᠯᠳᠠᠭ ᠣᠨᠤᠭ ᠲᠣᠭᠲᠠᠭ᠋ᠠᠭᠰᠠᠨ ᠲᠦᠭᠦᠬᠡᠢ ᠱᠦᠭᠦᠷᠬᠡᠢ ᠪᠣᠳᠤᠯ ᠵᠶ᠋ᠠᠨ ᠴᠢᠳᠠᠨ ᠶᠠᠳᠠᠨ ᠬᠡᠯᠬᠢᠵᠦ ᠬᠤᠯᠪᠤᠨ 《ᠵᠢᠭ᠋ᠠᠬᠤ ᠰᠤᠷᠬᠤ ᠰᠣᠳᠤᠯᠬᠤ ᠵᠢᠨ ᠣᠴᠢᠷᠯᠠᠯ》 ᠬᠡᠮᠡᠪᠡᠢ᠃ 《ᠣᠯᠵᠠ ᠵᠢ ᠣᠯᠠᠨ ᠵᠶ᠋ᠠᠷ ᠵᠶ᠋ᠠᠨ》 ᠭᠡᠳᠡᠭ᠃ ᠦᠵᠡᠬᠦ ᠮᠡᠷᠭᠡᠳ ᠰᠢᠭᠦᠮᠵᠢᠯᠡᠮᠦ！
ᠬᠠᠶᠢᠭ᠄ ᠣᠩᠨᠢᠭᠤᠳ ᠬᠤᠰᠢᠭᠤᠨᠤ ᠪᠣᠷᠤᠬᠤᠲᠠ ᠮᠣᠩᠭᠤᠯ ᠳᠤᠮᠳᠠᠳᠤ ᠰᠤᠷᠭ᠋ᠠᠭᠤᠯᠢ
（ᠾᠥᠩ ᠮᠸᠢ ᠨᠠᠢ᠍ᠢ᠍ᠷᠠᠭᠤᠯᠪᠠ）
2018 ᠣᠨᠤ 2 ᠳ᠋ᠤᠭ᠋ᠠᠷ ᠬᠤᠭᠤᠴᠠᠭᠠ