1985 ᠤᠨᠤ 12 ᠳ᠋ᠤᠭ᠋ᠠᠷ ᠰᠠᠷᠠ ᠵᠢᠨ 25ᠤ ᠡᠳᠤᠷᠤᠨ 《ᠵᠢᠷᠢᠮᠤᠨ ᠰᠤᠨᠢᠨ》ᠤ ᠬᠡᠦᠬᠡᠳ ᠪᠠᠭ᠋ᠠᠴᠤᠳᠲᠤ ᠵᠤᠷᠢᠭᠤᠯᠤᠭᠰᠠᠨ 《ᠨᠢᠯᠬᠠ ᠴᠢᠬᠢ》 ᠪᠤᠯᠤᠩᠳᠤ 《ᠰᠢᠯᠦᠭ ᠭᠤᠷᠪᠠᠨ ᠪᠠᠳᠠᠭ》 ᠬᠡᠬᠦ ᠰᠢᠯᠦᠭ ᠵᠶ᠋ᠠᠨ ᠨᠡᠢ᠌ᠲᠡᠯᠡᠭᠦᠯᠦᠭᠰᠡᠨᠠᠴᠠ 2023 ᠤᠨᠤ 8 ᠳ᠋ᠤᠭ᠋ᠠᠷ ᠰᠠᠷᠠ ᠵᠢᠨ 26ᠤ ᠡᠳᠤᠷᠤᠨ 《 ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠤ 《ᠬᠤᠤᠯᠢᠨ ᠭᠤᠤᠯ》 ᠤᠷᠠᠨ ᠵᠤᠬᠢᠶᠠᠯᠤᠨ ᠨᠢᠭᠤᠷᠲᠤ 《ᠡᠢ᠌ᠮᠤ ᠤᠯᠠᠨ ᠴᠠᠭᠲᠤ》 ᠭᠡᠬᠦ ᠰᠢᠯᠦᠭ ᠵᠶ᠋ᠠᠨ ᠨᠡᠢ᠌ᠲᠡᠯᠡᠭᠦᠯᠬᠦ ᠪᠣᠯᠲᠠᠯᠠᠬᠢ 38 ᠵᠢᠯᠤᠨ ᠲᠤᠷᠰᠢ ᠪᠢ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠳᠤ 483 ᠰᠢᠯᠦᠭ ᠨᠡᠢ᠌ᠷᠠᠭᠤᠯᠤᠯ ᠨᠡᠢ᠌ᠲᠡᠯᠡᠭᠦᠯᠵᠤ ᠪᠠᠢ᠌ᠨᠠ᠃ ᠨᠢᠭᠡ ᠰᠤᠨᠢᠨ ᠨᠢᠭᠡ ᠰᠢᠯᠦᠭᠴᠢ ᠵᠢᠨ ᠪᠦᠲᠦᠭᠡᠯᠢ ᠢᠩᠭᠢᠵᠤ ᠤᠯᠠᠨ ᠨᠡᠢ᠌ᠲᠡᠯᠡᠨᠡ ᠭᠡᠳᠡᠭ ᠨᠢᠭᠡ ᠪᠤᠳᠤᠪᠠᠯ ᠬᠤᠪᠤᠷᠬᠠᠨ ᠶᠠᠪᠤᠲᠠᠯ᠂ ᠨᠢᠭᠡ ᠰᠢᠯᠦᠭᠴᠢ ᠨᠢᠭᠡ ᠰᠤᠨᠢᠨᠳᠤ ᠡᠢ᠌ᠮᠤ ᠤᠯᠠᠨ ᠰᠢᠯᠦᠭ ᠦᠭᠭᠦᠨᠠ ᠭᠡᠳᠡᠭ ᠪᠠᠰᠠ ᠰᠤᠨᠢᠬᠠᠨ ᠤᠴᠢᠷ᠃ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠲᠠᠢ ᠪᠢ ᠢᠩᠭᠢᠵᠤ ᠭᠤᠴᠢ ᠭᠠᠷᠤᠢ ᠵᠢᠯᠤᠨ ᠢᠷᠦᠭᠡᠯ ᠲᠤᠭᠳᠠᠵᠤ᠂ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠤ ᠬᠡᠳᠦᠨ ᠦᠶᠡ ᠵᠢᠨ ᠤᠳᠤᠷᠢᠳᠤᠯᠭᠠ ᠪᠤᠯᠤᠨ ᠨᠠᠢ᠌ᠷᠠᠭᠤᠯᠤᠭᠴᠢ ᠪᠠᠭᠰᠢ ᠨᠠᠷᠲᠠᠢ ᠲᠡᠭᠡᠵᠤ ᠭᠤᠢ᠌ᠪᠢᠰᠢ ᠦᠭᠡᠢ ᠢᠲᠡᠭᠡᠯ ᠵᠢᠷᠦᠮᠤᠨ ᠪᠠᠷᠢᠯᠳᠤᠯᠭᠠᠲᠠᠢ ᠪᠤᠯᠤᠭᠰᠠᠨ ᠶᠤᠮ᠃
ᠬᠤᠶᠠᠷ
ᠨᠠᠮᠠ ᠵᠢ ᠦᠨᠳᠤᠷ ᠲᠤᠮᠳᠠᠳᠤ ᠵᠢᠨ ᠬᠤᠶᠠᠳᠤᠭ᠋ᠠᠷ ᠤᠨᠤ ᠰᠤᠷᠤᠭᠴᠢ ᠪᠠᠢ᠌ᠬᠤᠳᠤ ᠵᠠᠷᠤᠳ ᠬᠤᠰᠢᠭᠤᠨᠤ ᠨᠤᠮᠤᠨ ᠰᠠᠩᠠᠴᠠ ᠰᠢᠯᠦᠭ ᠤᠩᠰᠢᠯᠭᠠ ᠵᠢᠨ ᠤᠷᠤᠯᠳᠤᠭ᠋ᠠᠨ ᠡᠷᠬᠢᠯᠡᠵᠡᠢ᠃ ᠰᠢᠯᠦᠭ ᠵᠤᠬᠢᠶᠠᠯ ᠭᠡᠪᠡᠯ ᠰᠦᠨᠡᠰᠤ ᠵᠢ ᠲᠠᠭᠤᠲᠠᠵᠤ ᠪᠠᠢ᠌ᠭᠰᠠᠨ ᠴᠠᠭ᠂ ᠡᠢ᠌ᠮᠤ ᠰᠠᠢ᠌ᠬᠠᠨ ᠲᠤᠬᠢᠶᠠᠯ ᠨᠠᠳᠠᠳᠤ ᠬᠠᠨᠠᠰᠠ ᠤᠯᠳᠠᠨᠠ！ ᠪᠢ ᠪᠠᠭᠰᠢᠪᠠᠨ ᠭᠤᠶᠤᠵᠤ ᠪᠠᠢ᠌ᠭ᠋ᠠᠳ ᠲᠡᠷᠡ ᠤᠷᠤᠯᠳᠤᠭ᠋ᠠᠨ ᠳᠤᠨᠢ ᠠᠵᠠᠪᠠᠷ ᠤᠯᠵᠤ ᠤᠷᠤᠯᠴᠠᠭᠰᠠᠨ ᠶᠤᠮ᠃ ᠮᠠᠨᠤ ᠬᠤᠰᠢᠭᠤᠨᠤ ᠬᠡᠳᠦᠨ ᠦᠶᠡ ᠵᠢᠨ ᠰᠢᠯᠦᠭᠴᠢ ᠵᠤᠬᠢᠶᠠᠯᠴᠢ ᠨᠢᠭᠡ ᠲᠢᠩᠬᠢᠮᠳᠤ ᠴᠤᠭᠯᠠᠷᠠᠭᠰᠠᠨ ᠨᠢᠵᠢᠭᠢᠷ ᠰᠠᠢ᠌ᠬᠠᠨ ᠨᠠᠢ᠌ᠷ ᠪᠠᠢ᠌ᠭᠰᠠᠨ ᠶᠤᠮ᠃ ᠬᠢᠨᠠᠭᠴᠢ ᠵᠢᠨ ᠲᠤᠳᠤᠷᠠ᠂ ᠭᠡᠵᠢᠭᠡᠪᠠᠨ ᠮᠦᠯᠢ᠌ᠲᠡᠯᠡ ᠰᠠᠢ᠌ᠬᠠᠨ ᠰᠠᠮᠨᠠᠵᠤ᠂ ᠱᠠᠬᠠᠢᠪᠠᠨ ᠭᠢᠯᠠᠯᠵᠠᠲᠠᠯᠠ ᠰᠠᠢ᠌ᠬᠠᠨ ᠲᠤᠰᠤᠯᠠᠭᠰᠠᠨ ᠬᠦᠮᠦᠰᠬᠡ ᠠᠷᠢᠭᠤᠨ ᠨᠢᠳᠤ ᠲᠤᠩᠭ᠋ᠠᠯᠠᠭ᠂ ᠪᠠᠶᠠ ᠭᠠᠳᠠᠷ ᠲᠡᠷᠢ ᠲᠡᠭᠰᠢ ᠨᠢᠭᠡᠨ ᠵᠠᠯᠠᠭᠤ ᠪᠠᠭᠰᠢᠲᠠᠨ ᠮᠢᠨᠤ ᠠᠩᠬᠠᠷᠤᠯᠢ ᠰᠤᠷᠢᠨᠵᠢᠨ ᠮᠡᠳᠤ ᠲᠠᠲᠠᠯᠠ᠃ ᠡᠨᠡ ᠬᠦᠮᠦᠨ ᠬᠡᠨ ᠪᠤᠯᠴᠢᠬᠠᠪᠠ ᠳ᠋ᠠ ᠬᠡᠵᠤ ᠪᠢ ᠶᠡᠬᠡ ᠭᠠᠢ᠌ᠬᠠᠵᠤ ᠪᠠᠢ᠌ᠲᠠᠯᠠ ᠬᠦᠲᠦᠯᠦᠭᠴᠢᠠᠴᠠ 《 ᠵᠢᠷᠢᠮᠤᠨ ᠰᠤᠨᠢᠨ》ᠤ ᠰᠤᠷᠪᠤᠯᠵᠢᠯᠠᠭᠴᠢ ᠬᠦᠷᠡᠯᠵᠢᠷᠦᠬᠡ ᠭᠡᠵᠤ ᠲᠠᠨᠢᠯᠴᠠᠭᠤᠯᠬᠤᠪᠠᠷ ᠲᠡᠷᠡ ᠬᠦᠮᠦᠨ ᠦᠨᠲᠡᠢ᠌ᠨ ᠪᠤᠰᠴᠤ ᠤᠯᠠᠨᠲᠠᠢ ᠮᠡᠨᠳᠤᠴᠢᠯᠡᠵᠤ ᠪᠠᠢ᠌ᠭᠰᠠᠨ ᠶᠤᠮ᠃ ᠲᠤᠬᠠᠢ ᠵᠢᠨ ᠦᠶᠡᠳᠤ ᠪᠢ ᠲᠡᠭᠦᠨᠢ ᠮᠠᠨᠤ ᠵᠠᠷᠤᠳᠤᠨ ᠬᠦᠮᠦᠨ ᠭᠡᠵᠤ ᠮᠡᠳᠡᠬᠦ ᠦᠭᠡᠢ᠃ ᠲᠡᠷᠡ ᠲᠠᠯᠠᠪᠠᠢᠳᠤ ᠪᠢ ᠲᠡᠭᠦᠨᠲᠠᠢ ᠬᠡᠳᠦᠢ ᠲᠠᠨᠢᠯᠴᠠᠶᠠ ᠭᠡᠵᠤ ᠵᠤᠷᠢᠭᠯᠠᠭᠰᠠᠨ ᠪᠤᠯᠪᠠᠴᠤ ᠠᠶᠤᠮᠰᠢᠭ ᠦᠭᠡᠢ ᠣᠢ᠌ᠷᠠᠳᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠤᠶᠠᠷ ᠵᠢᠯᠤᠨ ᠲᠠᠷᠠᠭᠠ ᠪᠢ ᠵᠤᠤ ᠤᠳᠠ ᠵᠢᠨ ᠪᠠᠭᠰᠢ ᠵᠢᠨ ᠲᠤᠰᠬᠠᠢ ᠮᠡᠷᠭᠡᠵᠢᠯᠤᠨ ᠰᠤᠷᠭ᠋ᠠᠭᠤᠯᠢᠳᠤ ᠰᠢᠯᠭ᠋ᠠᠵᠤ ᠤᠷᠤᠭ᠋ᠠᠳ ᠬᠦᠷᠡᠯᠵᠢᠷᠦᠬᠡ᠂ ᠮᠠᠨᠵᠢᠯᠠ ᠭᠡᠭᠴᠢᠨᠢ ᠮᠠᠨᠤ ᠵᠠᠷᠤᠳᠤᠨ ᠭᠡᠷᠴᠢᠯᠠᠭᠤ ᠰᠤᠮᠤ ᠵᠢᠨ ᠬᠦᠮᠦᠨ᠂ ᠬᠤᠶᠠᠭᠤᠯᠠᠪᠠᠨ ᠨᠢᠭᠡ ᠯᠡ ᠵᠢᠯ ᠲᠦᠪᠤᠨ ᠦᠨᠳᠤᠰᠤᠲᠡᠨᠤ ᠲᠡᠭᠡᠳᠤ ᠰᠤᠷᠭ᠋ᠠᠭᠤᠯᠢᠳᠤ ᠰᠢᠯᠭ᠋ᠠᠵᠤ ᠤᠷᠤᠭ᠋ᠠᠳ ᠲᠡᠭᠦᠰᠦᠭᠰᠡᠨᠤ ᠬᠤᠢ᠌ᠨᠠ ᠨᠢᠭᠡᠨᠢ ᠰᠤᠨᠢᠨᠤ ᠬᠤᠷᠢᠶᠠ᠂ ᠨᠢᠭᠡᠨᠢ ᠷᠠᠳᠢᠤ᠋ ᠬᠤᠷᠢᠶᠠᠳᠤ ᠠᠵᠢᠯᠤᠨ ᠭᠠᠷᠤᠭᠠ ᠠᠪᠤᠭᠰᠠᠨᠢ ᠤᠯᠵᠤ ᠮᠡᠳᠡᠭᠰᠡᠨ ᠶᠤᠮ᠃1986 ᠤᠨᠤ ᠡᠪᠦᠯᠤᠨ ᠠᠮᠠᠷᠠᠯᠲᠠᠪᠠᠷ ᠭᠡᠷ ᠲᠤᠪᠠᠨ ᠢᠷᠡᠬᠦ ᠳᠤᠪᠠᠨ ᠪᠢ ᠲᠦᠩᠯᠢᠶᠤᠤᠳᠤ ᠪᠠᠭᠤᠵᠤ 《ᠵᠢᠷᠢᠮᠤᠨ ᠰᠤᠨᠢᠨ》ᠤ ᠨᠠᠢ᠌ᠷᠠᠭᠤᠯᠤᠭᠴᠢ ᠪᠠᠢ᠌ᠭᠰᠠᠨ ᠬᠦᠷᠡᠯᠵᠢᠷᠦᠬᠡ ᠠᠬᠠ ᠵᠢ ᠲᠤᠰᠬᠠᠢ᠌ᠯᠠᠨ ᠡᠷᠢᠵᠤ ᠤᠴᠢᠯᠠ᠃ ᠲᠤᠬᠠᠢ ᠵᠢᠨ ᠦᠶᠡᠳᠤ 《ᠵᠢᠷᠢᠮᠤᠨ ᠰᠤᠨᠢᠨᠤ ᠬᠤᠷᠢᠶᠠ》 ᠵᠢᠨ ᠡᠭᠦᠲᠡᠨ ᠬᠠᠷᠠᠭᠤᠯᠤᠨ ᠴᠢᠩᠭᠠ ᠭᠡᠳᠡᠭᠨᠢ ᠬᠡᠷᠡᠭ᠂ ᠵᠢᠰᠤ ᠪᠤᠷᠤᠭᠤ ᠬᠦᠮᠦᠨ ᠤᠷᠤᠨᠠ ᠭᠡᠭᠴᠢ ᠰᠠᠨᠠᠭᠠᠪᠠᠨ ᠬᠤᠷᠢᠶᠠ ᠭᠡᠪᠡᠯ ᠨᠢᠭᠡ ᠯᠡ ᠦᠭᠡ᠃ ᠪᠢ ᠡᠭᠦᠲᠡᠨ ᠬᠠᠷᠠᠭᠤᠯᠳᠤ ᠬᠦᠷᠡᠯᠵᠢᠷᠦᠭᠡ ᠪᠠᠭᠰᠢ ᠵᠢ ᠡᠷᠢᠨᠡ ᠭᠡᠪᠡᠯ ᠲᠡᠷᠡ ᠰᠠᠶᠢ ᠦᠢ᠍ᠰᠢᠶᠠᠬᠤ ᠬᠦᠮᠦᠨ ᠪᠢᠰᠢ᠂ ᠬᠤᠶᠠᠷ ᠬᠡᠯᠡᠭᠡᠳ ᠪᠠᠰᠠ ᠲᠤᠰᠠ ᠭᠠᠷᠤᠭᠰᠠᠨ ᠦᠭᠡᠢ ᠲᠤᠯᠠ ᠶᠠᠪᠤᠬᠤ ᠤᠤ ᠬᠦᠯᠢᠶᠡᠬᠦ ᠤᠤ ᠭᠡᠵᠤ ᠲᠦᠲᠡᠭᠡᠯᠵᠡᠵᠤ ᠪᠠᠢ᠌ᠲᠠᠯᠠ 《ᠵᠠᠶᠠᠭᠠᠲᠠᠢ ᠬᠦᠮᠦᠨ ᠵᠠᠮ ᠲᠡᠭᠡᠷᠡ》 ᠭᠡᠭᠴᠢᠪᠠᠷ ᠬᠦᠷᠡᠯᠵᠢᠷᠦᠬᠡ ᠪᠠᠭᠰᠢ ᠶᠠᠭ ᠭᠠᠷᠴᠤ ᠢᠷᠡᠬᠦ ᠲᠠᠢ ᠲᠤᠬᠢᠶᠠᠯᠳᠤᠯᠠ᠃ ᠲᠡᠭᠡᠭᠡᠳ ᠰᠠᠶᠢ ᠪᠢ ᠡᠨᠡ ᠬᠦ᠌ ᠠᠷᠢᠭᠤᠨ ᠲᠠᠭᠰᠢᠨ ᠬᠦᠷᠢᠶᠡᠨᠳᠤ ᠠᠩᠬᠠ ᠤᠳᠠᠭᠠ ᠠᠯᠬᠤᠵᠤ ᠤᠷᠤᠵᠤ ᠴᠢᠳᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠤᠳᠠᠭᠠ ᠬᠦᠷᠡᠯᠵᠢᠷᠦᠬᠡ ᠠᠬᠠ ᠮᠢᠨᠤ ᠵᠠᠷᠤᠳᠤᠨ ᠰᠢᠯᠦᠭ ᠤᠩᠰᠢᠯᠭᠠ ᠵᠢᠨ ᠤᠷᠤᠯᠳᠤᠭ᠋ᠠᠨᠳᠤ ᠬᠤᠶᠠᠳᠤᠭ᠋ᠠᠷ ᠲᠡᠰᠲᠤ ᠤᠷᠤᠭᠰᠠᠨᠢ ᠴᠡᠭᠡᠵᠢᠯᠡᠵᠤ ᠪᠠᠢ᠌ᠭᠰᠠᠨ ᠮᠦᠷᠲᠡᠭᠡᠨ ᠮᠢᠨᠤ ᠢᠯᠡᠭᠡᠭᠰᠡᠨ ᠰᠢᠯᠦᠭᠢ ᠬᠡᠳᠤ ᠵᠢ ᠨᠡᠢ᠌ᠲᠡᠯᠡᠴᠢᠬᠡᠭᠡᠳ ᠪᠠᠢ᠌ᠵᠠᠢ᠃ ᠬᠦᠷᠡᠯᠵᠢᠷᠦᠬᠡ ᠠᠬᠠ ᠨᠠᠳᠠᠳᠤ 《ᠲᠠᠰᠤᠷᠠᠯᠳᠠ ᠦᠭᠡᠢ ᠪᠢᠴᠢᠭᠡᠳ ᠪᠠᠢ᠂ ᠰᠢᠯᠦᠭ ᠵᠤᠬᠢᠶᠠᠯ ᠵᠶ᠋ᠠᠨ ᠮᠠᠨᠤ ᠰᠤᠨᠢᠨᠳᠤ ᠢᠯᠡᠭᠦᠬᠡᠨ ᠦᠭᠭᠦᠭᠡᠷᠡᠢ》 ᠭᠡᠵᠤ ᠡᠩᠤᠨ ᠬᠡᠳᠦᠬᠡᠨ ᠦᠬᠡᠪᠠᠷ ᠵᠤᠷᠢᠭᠵᠢᠭᠤᠯᠵᠤ ᠪᠠᠢ᠌ᠭᠰᠠᠨ ᠶᠤᠮ᠃ ᠲᠡᠷᠡ ᠵᠤᠷᠢᠭᠵᠢᠭᠤᠯᠤᠯᠤᠨ ᠠᠴᠢᠪᠠᠷ ᠪᠢ ᠦᠨᠦᠳᠦᠷᠲᠤ ᠲᠤᠯᠲᠠᠯᠠ ᠪᠢᠯᠢᠭ ᠮᠤᠬᠤᠭᠠ ᠦᠭᠡᠢ ᠰᠢᠯᠦᠭ ᠵᠶ᠋ᠠᠨ ᠪᠢᠴᠢᠭᠰᠡᠭᠡᠷ᠂ ᠪᠢᠷ ᠵᠢᠪᠡᠷᠡᠭᠡ ᠦᠭᠡᠢ ᠨᠠᠢ᠌ᠷᠠᠭ ᠵᠶ᠋ᠠᠨ ᠲᠠᠲᠠᠯᠠᠭᠰᠠᠭ᠋ᠠᠷ ᠡ！
ᠭᠤᠷᠪᠠ
ᠮᠢᠨᠤ ᠰᠢᠯᠦᠭ ᠪᠦᠲᠦᠭᠡᠯᠢ ᠨᠢᠭᠡ ᠪᠢᠴᠢᠬᠠᠨ ᠭᠤᠷᠤᠬᠠ ᠭᠡᠵᠤ ᠪᠤᠳᠤᠪᠠᠯ 《ᠵᠢᠷᠢᠮᠤᠨ ᠰᠤᠨᠢᠨ》 ᠪᠤᠯ ᠡᠨᠡ ᠭᠤᠷᠤᠬᠠ ᠵᠢᠨ ᠡᠬᠢ ᠠᠪᠤᠭᠰᠠᠨ ᠭᠠᠵᠠᠷ ᠭᠡᠯᠲᠠᠢ᠃ ᠭᠤᠴᠢ ᠭᠠᠷᠤᠢ ᠵᠢᠯ ᠮᠡᠯᠮᠡᠯᠵᠡᠨ ᠲᠤᠨᠤᠯᠵᠠᠬᠤ ᠡᠨᠡ ᠪᠤᠯᠠᠭᠤᠨ ᠡᠬᠢᠨ ᠲᠡᠭᠡᠷᠡ ᠪᠢ ᠰ᠊ · ᠨᠠᠨᠳᠢᠨ᠂ ᠬᠦᠷᠡᠯᠵᠢᠷᠦᠬᠡ᠂ ᠲᠡᠮᠴᠢᠭ ᠵᠡᠷᠭᠡ 《ᠬᠤᠤᠯᠢᠨ ᠭᠤᠤᠯ》 ᠤᠷᠠᠨ ᠵᠤᠬᠢᠶᠠᠯᠤᠨ ᠨᠢᠭᠤᠷᠤᠨ ᠨᠠᠢ᠌ᠷᠠᠭᠤᠯᠤᠭᠴᠢ ᠠᠬᠠ ᠨᠠᠷᠤᠨ ᠬᠠᠷᠠᠮ ᠦᠭᠡᠢ ᠬᠠᠪᠰᠤᠷᠤᠯᠭᠠ ᠵᠢ ᠬᠦᠷᠲᠡᠵᠤ ᠶᠠᠪᠤᠭᠰᠠᠨ ᠮᠦᠷᠲᠡᠭᠡᠨ ᠤᠳᠤ ᠴᠦ᠍ ᠭᠡᠰᠡᠨ ᠠᠯᠲᠠᠷᠳᠤ᠂ ᠭ᠊ · ᠬᠢᠩᠭ᠋ᠠᠨ ᠵᠡᠷᠭᠡ ᠳᠡᠭᠦᠦ ᠨᠠᠷᠤᠨ ᠬᠤᠢ᠌ᠰᠢ ᠦᠭᠡᠢ ᠲᠡᠮᠵᠢᠯᠭᠡ ᠵᠢ ᠬᠦᠷᠲᠡᠵᠤ ᠶᠠᠪᠤᠨᠠ᠃ ᠵᠠᠷᠢᠮ ᠬᠦᠮᠦᠨ ᠨᠠᠳᠠᠳᠤ ᠡᠷᠡᠭᠡ ᠦᠭᠡᠢᠪᠠᠷ 《ᠲᠠ ᠴᠢᠨᠢ ᠨᠡᠷᠡᠳᠤ ᠰᠢᠯᠦᠭᠴᠢ ᠪᠤᠯᠴᠢᠬᠠᠭ᠋ᠠᠳ ᠶᠠᠭᠤᠨᠳᠤ ᠪᠠᠰᠠ ᠰᠤᠨᠢᠨᠳᠤ ᠪᠠᠰᠠ ᠰᠢᠯᠦᠭ ᠵᠶ᠋ᠠᠨ ᠦᠭᠭᠦᠭᠡᠳ ᠪᠠᠢ᠌ᠬᠤ ᠪᠤᠢ》 ᠭᠡᠵᠤ ᠰᠠᠨᠠᠭᠤᠯᠬᠤ ᠬᠤᠷᠢᠭᠯᠠᠬᠤ ᠵᠢᠨ ᠤᠷᠤᠨᠳᠤ ᠬᠡᠯᠡᠬᠦᠳᠤ᠂ ᠪᠢ ᠨᠢᠭᠡ ᠶᠤᠰᠤᠨᠳᠤᠪᠠᠨ ᠪᠢ 《ᠵᠢᠷᠢᠮᠤᠨ ᠰᠤᠨᠢᠨ》ᠠᠴᠠ ᠰᠢᠯᠦᠭᠴᠢ ᠪᠤᠯᠤᠭᠰᠠᠨ ᠬᠦᠮᠦᠨ᠃ ᠤᠷᠠᠨ ᠵᠤᠬᠢᠶᠠᠯ ᠡᠬᠢᠯᠡᠨ ᠤᠷᠤᠯᠳᠤᠵᠤ ᠪᠠᠢ᠌ᠭᠰᠠᠨ ᠦᠶᠡᠳᠤ 《ᠵᠢᠷᠢᠮᠤᠨ ᠰᠤᠨᠢᠨ》ᠳᠤᠪᠠᠨ ᠨᠢᠭᠡ ᠪᠦᠲᠦᠭᠡᠯ ᠤᠯᠤᠭ᠋ᠠᠳ ᠨᠠᠢ᠌ᠲᠡᠯᠡᠪᠡᠯ ᠬᠦᠯ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠪᠠᠶᠠᠷᠯᠠᠵᠤ᠂ ᠲᠡᠷᠡ ᠡᠳᠦᠷᠤᠨ ᠰᠡᠳᠬᠢᠯᠭᠡ ᠬᠠᠮᠤᠭᠤᠨ ᠪᠠᠶᠠᠰᠤᠩᠭᠤᠢ ᠰᠠᠨᠠᠭᠲᠠᠵᠤ᠂ ᠲᠡᠷᠡ ᠡᠳᠦᠷᠤᠨ ᠬᠡᠢ ᠮᠤᠷᠢ ᠬᠠᠮᠤᠭ ᠲᠡᠭᠳᠡᠭᠰᠡᠨ ᠰᠢᠭ ᠪᠤᠳᠤᠭᠳᠠᠳᠠᠭᠢ ᠶᠠᠭᠤ ᠭᠡᠬᠦ ᠪᠤᠢ᠃ 《ᠬᠤᠤᠯᠢᠨ ᠭᠤᠤᠯ》 ᠭᠡᠬᠦ ᠤᠷᠠᠨ ᠵᠤᠬᠢᠶᠠᠯᠤᠨ ᠨᠢᠭᠤᠷ ᠨᠠᠮᠠ ᠵᠢ ᠬᠦᠮᠦᠵᠢᠭᠦᠯᠦᠭᠰᠡᠨ ᠦᠭᠡᠢ ᠪᠤᠯ ᠮᠢᠨᠤ ᠦᠨᠦᠳᠦᠷᠤᠨ ᠦᠴᠦᠬᠡᠨ ᠠᠮᠵᠢᠯᠲᠠ ᠪᠠᠢ᠌ᠵᠤ ᠴᠢᠲᠠᠬᠤ ᠦᠭᠡᠢ ᠂ ᠬᠡᠵᠢᠶᠡ ᠬᠠᠮᠢᠭᠠ ᠴᠦ᠍ ᠭᠡᠰᠡᠨ ᠪᠢ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠵᠶ᠋ᠠᠨ ᠮᠠᠷᠲᠠᠵᠤ ᠴᠢᠲᠠᠬᠤ ᠦᠭᠡᠢ᠂ ᠮᠠᠷᠲᠠᠵᠤ ᠴᠦ᠍ ᠪᠤᠯᠬᠤ ᠦᠭᠡᠢ ᠡ᠃ ᠦᠨᠡᠨᠳᠤᠪᠠᠨ ᠴᠦ᠍ ᠲᠡᠢ᠌ᠮᠤ᠃ ᠡᠴᠢᠨᠡᠬᠡᠨ ᠵᠢᠯᠤᠨ ᠲᠤᠷᠰᠢ ᠡᠬᠡ ᠪᠢᠴᠢᠭᠤᠨ ᠬᠠᠷᠠᠮᠵᠢᠲᠠᠢ ᠴᠦ᠍ ᠪᠤᠯᠤᠭ᠂ ᠬᠠᠷᠠᠮᠵᠢ ᠦᠭᠡᠢ ᠴᠦ᠍ ᠪᠤᠯᠤᠭ᠂ ᠡᠳᠦᠢ ᠳᠤ ᠲᠤᠯᠳᠠᠯᠠ ᠪᠢ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠳᠤᠪᠠᠨ ᠡᠬᠡ ᠪᠢᠴᠢᠭ ᠵᠶ᠋ᠠᠨ ᠦᠭᠭᠦᠭᠰᠡᠭᠡᠷ᠂ ᠮᠦᠨ ᠴᠤ᠌ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠵᠶ᠋ᠠᠨ ᠵᠢᠯ ᠪᠤᠯᠭ᠋ᠠᠨ ᠵᠠᠬᠢᠶᠠᠯᠠᠨ ᠡᠳᠦᠷ ᠪᠤᠯᠭ᠋ᠠᠨ ᠤᠩᠰᠢᠭᠰᠠᠭ᠋ᠠᠷ᠃ ᠵᠠᠷᠢᠮ ᠳᠤᠪᠠᠨ ᠰᠢᠦᠲᠠᠨ ᠬᠦᠷᠭᠡᠭᠴᠢ ᠵᠢᠨ ᠬᠠᠯᠭᠤᠤ ᠶᠤᠮ ᠤᠤ ᠡᠰᠡᠬᠦᠯᠡ ᠶᠠᠮᠠᠷ ᠨᠢᠭᠡ ᠰᠢᠯᠲᠠᠭ᠋ᠠᠨ ᠵᠶ᠋ᠠᠷ ᠭᠠᠷᠠᠭ ᠲᠤᠵᠢ ᠬᠦᠰᠡᠵᠤ ᠬᠦᠯᠢᠶᠡᠵᠤ ᠪᠠᠢ᠌ᠭᠰᠠᠨ ᠭᠠᠷᠠᠭᠤᠨ ᠵᠢᠷᠭᠤᠭ᠋ᠠᠨᠤ ᠰᠤᠨᠢᠨ ᠭᠡᠭᠡᠭᠳᠡᠬᠦ ᠶᠠᠪᠤᠲᠠᠯ ᠭᠠᠷᠲᠠᠭ᠃ ᠲᠡᠭᠡᠪᠡᠯ ᠪᠢ ᠶᠠᠮᠠᠷ ᠨᠢᠭᠡ ᠦᠨᠡᠳᠤ ᠶᠠᠭᠤᠮᠠᠪᠠᠨ ᠭᠡᠭᠡᠴᠢᠭᠰᠡᠨ ᠶᠤᠮ ᠰᠢᠭ ᠰᠠᠭᠤᠲᠠᠯ ᠦᠭᠡᠢ ᠪᠤᠯᠵᠤ ᠬᠠᠵᠠᠭᠤ ᠬᠠᠪᠢ ᠵᠢᠨ ᠪᠠᠢ᠌ᠭᠤᠯᠭᠠᠪᠠᠷ ᠲᠤᠰ ᠰᠤᠨᠢᠨ ᠢᠷᠡᠭᠰᠡᠨ ᠡᠰᠡᠬᠦ ᠵᠢᠨᠢ ᠡᠷᠢᠵᠤ ᠭᠠᠷᠲᠠᠭ᠃ ᠨᠠᠰᠤ ᠶᠠᠪᠤᠲᠠᠯᠳᠤᠪᠠᠨ ᠵᠤᠬᠢᠴᠠᠮᠠ ᠦᠭᠡᠢ ᠡᠨᠡ ᠬᠦ᠌ ᠬᠦᠲᠡᠯᠦᠯ ᠵᠶ᠋ᠠᠨ ᠶᠡᠬᠡ ᠭᠠᠢ᠌ᠬᠠᠲᠠᠭ ᠪᠢᠯᠡ᠃ ᠲᠦᠷᠦᠭᠦᠬᠡᠨ ᠨᠠᠢ᠌ᠷᠠᠭᠤᠯᠤᠭᠴᠢ ᠲᠡᠭᠦᠦ ᠭ᠊ · ᠬᠢᠩᠭ᠋ᠠᠨ ᠮᠢᠨᠤ ᠤᠯᠵᠤ ᠤᠩᠰᠢᠭᠰᠠᠨ ᠦᠭᠡᠢ ᠭᠠᠷᠠᠭᠤᠨ ᠵᠢᠷᠭᠤᠭ᠋ᠠᠨᠤ ᠰᠤᠨᠢᠨᠢ ᠨᠠᠳᠠᠳᠤ ᠭᠤᠪᠢᠭᠤᠯᠵᠤ ᠦᠭᠭᠦᠭᠡᠳ ᠮᠢᠨᠤ ᠰᠡᠳᠬᠢᠯᠢ ᠲᠤᠭᠳᠤᠯᠤᠭᠤᠯᠵᠤ ᠪᠠᠢ᠌ᠭᠰᠠᠨ ᠳ᠋ᠠ᠃
ᠲᠦᠷᠪᠡ
《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠤ ᠮᠤᠩᠭᠤᠯ ᠬᠡᠪᠯᠡᠯ ᠮᠢᠨᠢ ᠤᠳᠤ 67 ᠨᠠᠰᠤᠯᠠᠴᠢᠬᠠᠯᠠ᠃ 67 ᠨᠠᠰᠤ ᠭᠡᠵᠤ ᠨᠢᠭᠡ ᠬᠦᠮᠦᠨᠳᠤ ᠠᠪᠴᠤ ᠬᠡᠯᠡᠪᠡᠯ ᠨᠡᠯᠢᠶᠡᠳ ᠤᠷᠳᠤ ᠬᠤᠭᠤᠴᠠᠭᠠ᠂ ᠭᠡᠳᠡᠯᠡ ᠲᠡᠦᠬᠡ ᠵᠢᠨ ᠲᠤᠮᠤ ᠤᠷᠤᠰᠬᠠᠯᠳᠤ ᠠᠪᠴᠤ ᠬᠡᠯᠡᠪᠡᠯ ᠬᠤᠷᠤᠭᠤ ᠢᠨᠴᠢᠳᠬᠦ ᠵᠢᠨ ᠬᠤᠷᠤᠮᠬᠠᠨ ᠵᠠᠭᠤᠷᠠ ᠡ！ ᠵᠢᠷᠠᠨ ᠵᠢᠯᠢ ᠮᠠᠨᠤ ᠮᠤᠩᠭᠤᠯᠴᠤᠳ ᠨᠢᠭᠡ ᠶᠡᠬᠡ ᠡᠷᠬᠢᠯᠲᠠ ᠭᠡᠵᠤ ᠮᠠᠰᠢ ᠪᠡᠯᠭᠡᠰᠢᠶᠡᠵᠤ ᠦᠵᠡᠳᠡᠭ ᠰᠠᠨ᠃ ᠤᠨ ᠵᠢᠯᠤᠨ ᠤᠷᠤᠰᠬᠠᠯᠳᠤ ᠪᠢ ᠪᠠᠰᠠ ᠵᠢᠷᠠᠪᠠᠨ ᠰᠢᠬᠠᠵᠤ ᠲᠠᠷ ᠵᠶ᠋ᠠᠨ ᠬᠡᠮᠡᠯᠢᠭᠰᠡᠨ ᠨᠠᠰᠤᠨ ᠳᠤᠪᠠᠨ ᠤᠷᠤᠬᠤᠳᠤ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠤ ᠵᠢᠷᠠ ᠭᠠᠷᠤᠢ ᠵᠢᠯ ᠬᠠᠷᠢᠨ ᠴᠠᠭ ᠦᠶᠡ ᠵᠢᠨ ᠤᠷᠤᠰᠬᠠᠯᠢ ᠲᠠᠭ᠋ᠠᠵᠤ ᠂ ᠴᠠᠯ ᠵᠠᠯᠠᠭᠤᠪᠠᠷ ᠵᠶ᠋ᠠᠨ ᠪᠢᠲᠡᠨᠤ ᠬᠠᠷᠠᠭ᠋ᠠᠨᠳᠤ ᠨᠤᠭᠤᠭ᠋ᠠᠷᠠᠭᠰᠠᠭ᠋ᠠᠷ ᠪᠠᠢ᠌ᠨᠠᠮ᠃
《ᠦᠴᠦᠭᠡᠳᠦᠷ ᠰᠠᠶᠢ ᠦᠴᠠᠩᠤᠨ ᠵᠢᠭ᠋ᠠᠰᠤ ᠵᠢ ᠠᠮᠳᠠᠯᠠᠲᠠᠯᠠ᠂ ᠦᠨᠦᠳᠦᠷ ᠠᠬᠢᠨ ᠴᠠᠩᠱ᠌ᠠ ᠵᠢᠨ ᠤᠰᠤ ᠵᠢ ᠤᠤᠭᠤᠯᠤᠭᠠ》 ᠭᠡᠵᠤ ᠠᠭᠤᠤ ᠶᠡᠬᠡ ᠤᠳᠤᠷᠢᠳᠤᠭᠴᠢ ᠮᠠᠦ ᠽᠸ ᠳ᠋ᠦᠡᠭ ᠨᠦᠬᠦᠷᠤᠨ ᠰᠢᠯᠦᠭᠲᠤ ᠦᠭᠦᠯᠡᠭᠰᠡᠨ ᠰᠢᠭ ᠵᠶ᠋ᠡᠷ ᠂ ᠡᠤ ᠵᠢᠨ ᠭᠠᠩ ᠠᠬᠠ ᠵᠢᠨᠳᠤ ᠪᠤᠷᠴᠠᠭᠤᠨ ᠱᠦᠯᠦ ᠤᠤᠭᠤᠵᠤ ᠪᠠᠢ᠌ᠭᠰᠠᠨ ᠵᠠᠯᠠᠭᠤ ᠨᠠᠰᠤ ᠬᠠᠮᠢᠭ᠋ᠠᠰᠢ ᠤᠳᠤᠭᠰᠠᠨᠢ ᠮᠡᠳᠡᠬᠦ ᠦᠭᠡᠢ ᠂ ᠦᠨᠡᠨᠴᠢ ᠭᠤᠸᠠᠢᠲᠠᠢ ᠠᠷᠤ ᠬᠦᠨᠲᠡᠯᠡᠨ᠂ ᠬᠤᠤᠯᠢᠨ ᠭᠤᠤᠯᠳᠤ ᠰᠤᠷᠪᠤᠯᠵᠢᠯᠠᠵᠤ ᠶᠠᠪᠤᠭᠰᠠᠨ ᠤᠨ ᠰᠠᠷᠠ ᠬᠠᠮᠢᠭᠠ ᠡᠴᠢᠭᠰᠡᠨᠢ ᠮᠡᠳᠡᠬᠦ ᠦᠭᠡᠢ᠃ ᠨᠢᠭᠡ ᠮᠡᠳᠡᠬᠦᠳᠤ ᠮᠢᠨᠤ ᠬᠠᠢ᠌ᠷᠠ ᠬᠠᠢ᠌ᠷᠠ ᠵᠢᠨ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠮᠢᠨᠢ ᠬᠡᠪᠯᠡᠯ ᠡᠬᠢᠯᠡᠭᠰᠡᠨ 67 ᠵᠢᠯᠤᠨ ᠤᠢᠪᠠᠨ ᠤᠭᠳᠤᠵᠤ ᠪᠠᠢ᠌ᠨᠠ᠃
ᠠᠯᠬᠤᠵᠤ ᠶᠠᠪᠤᠭᠰᠠᠨ ᠮᠦᠷᠠᠴᠠ ᠲᠤᠷᠠᠢ᠌ᠵᠤ ᠭᠠᠷᠤᠭᠰᠠᠨ ᠵᠠᠮ᠃
ᠠᠲᠠᠯ ᠪᠤᠰᠬᠠᠭᠰᠠᠨ ᠲᠡᠦᠬᠡᠠᠴᠠ ᠠᠮᠵᠢᠯᠲᠠ ᠰᠤᠯᠤᠩᠭ᠋ᠠᠷᠠᠭᠰᠠᠨ ᠦᠢ᠍ᠯᠡᠰ᠃
《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》ᠤ ᠮᠤᠩᠭᠤᠯ ᠬᠡᠪᠯᠡᠯᠢ ᠬᠠᠷᠢᠭᠤᠴᠠᠵᠤ ᠪᠠᠢ᠌ᠭᠰᠠᠨ ᠴᠤᠭ ᠪᠠᠭᠰᠢᠲᠠᠨ （ᠮᠢᠨᠤ ᠶᠡᠬᠡ ᠨᠠᠭ᠋ᠠᠴᠤ）᠂ ᠨᠤᠮᠢᠨ ᠪᠠᠭᠰᠢᠲᠠᠨ᠂ ᠲᠡᠭᠰᠢ ᠪᠠᠭᠰᠢᠲᠠᠨ᠂ ᠤᠷᠳᠤᠨᠠᠰᠤᠳᠤ ᠪᠠᠭᠰᠢᠲᠠᠨ᠂ ᠲᠠᠯᠠᠢ ᠪᠠᠭᠰᠢᠲᠠᠨ ᠵᠢᠴᠢ ᠤᠳᠤ ᠵᠢᠨ ᠬᠠᠷᠢᠭᠤᠴᠠᠯᠭ᠋ᠠᠲᠠᠨ ᠡᠤ ᠵᠢᠨ ᠭᠠᠩ ᠠᠬᠠ ᠵᠡᠷᠭᠡ ᠤᠳᠤᠷᠢᠳᠤᠯᠭᠠ ᠨᠠᠷ ᠰᠤᠨᠢᠨᠤᠪᠠᠨ ᠤᠨᠢ ᠵᠢ ᠡᠷᠭᠦᠵᠤ ᠲᠤᠭᠤᠷᠭᠠ ᠵᠢ ᠲᠤᠯᠵᠤ ᠶᠠᠪᠤᠭᠰᠠᠨ ᠡᠷᠡᠮᠡᠬᠡᠢ ᠵᠢᠳᠬᠦᠯ ᠢ ᠶᠠᠭ᠋ᠠᠬᠢᠬᠤ ᠵᠢᠨ ᠠᠷᠭᠠ ᠦᠭᠡᠢ ᠪᠢᠰᠢᠷᠡᠨᠡᠮ ᠪᠢ᠃
ᠤᠷᠠᠢ ᠵᠠᠯᠠᠭᠤ ᠨᠠᠰᠤᠪᠠᠨ ᠰᠤᠨᠢᠨᠤ ᠦᠢ᠍ᠯᠡᠰᠲᠤ ᠵᠤᠷᠢᠭᠤᠯᠵᠤ᠂ ᠤᠨᠲᠠᠵᠤ ᠠᠮᠠᠷᠠᠬᠤ ᠴᠠᠭ ᠵᠶ᠋ᠠᠨ ᠰᠤᠷᠪᠤᠯᠵᠢᠯᠠᠵᠤ ᠨᠠᠢ᠌ᠷᠠᠭᠤᠯᠬᠤᠳᠤ ᠵᠠᠷᠤᠴᠠᠭᠤᠯᠤᠭᠰᠠᠨ᠂ ᠠᠵᠢᠯ ᠦᠢ᠍ᠯᠡᠰᠤᠨ ᠠᠷᠠᠯᠤᠨ ᠱᠠᠷ ᠰᠢᠭ᠋᠂ ᠠᠯᠲᠠᠨ ᠵᠢᠷᠢᠮᠤᠨ ᠵᠶ᠋ᠠᠨ ᠲᠠᠢ᠌ᠴᠢᠨ ᠬᠤᠰᠢᠭᠤᠴᠢ ᠰᠢᠭ᠋ ᠠᠬᠠᠮᠠᠳ ᠰᠤᠷᠪᠤᠯᠵᠢᠯᠠᠭᠴᠢ᠂ ᠭᠠᠪᠢᠶᠠᠳᠤ ᠨᠠᠢ᠌ᠷᠠᠭᠤᠯᠤᠭᠴᠢ᠂ ᠦᠰᠦᠭ ᠬᠠᠷᠭᠤᠭᠤᠯᠤᠭᠴᠢ᠂ ᠪᠠᠷᠯᠠᠭᠴᠢ ᠨᠠᠷ ᠤᠨ ᠰᠢᠨᠠ ᠵᠢ ᠲᠠᠭ᠋ᠠᠵᠤ ᠤᠷᠤᠰᠤᠭᠰᠠᠨ ᠬᠦᠯᠦᠰᠤ ᠪᠤᠯᠤᠨ ᠰᠢᠷᠡᠭᠡᠨ ᠢᠷᠮᠡᠭ ᠵᠶ᠋ᠠᠷ ᠡᠯᠡᠭᠲᠡᠵᠤ ᠶᠠᠪᠤᠭᠰᠠᠨ ᠵᠠᠯᠠᠭᠤ ᠨᠠᠰᠤ ᠵᠢᠨᠢ ᠪᠢ ᠰᠢᠳᠦᠨ ᠬᠦᠨᠳᠤᠳᠬᠡᠨᠡᠮ᠃
ᠴᠠᠭ ᠦᠶᠡ ᠵᠢᠨ ᠲᠠᠭᠤᠨ ᠬᠤᠭᠤᠯᠠᠢ ᠪᠤᠯᠵᠤ᠂ ᠴᠠᠳᠢᠭ ᠲᠡᠦᠬᠡ ᠵᠢᠨ ᠤᠯᠪᠠᠭᠠ ᠮᠦᠷᠢ ᠲᠡᠮᠳᠡᠭᠯᠡᠭᠰᠡᠨ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠮᠢᠨᠢ ᠡᠷᠢᠨ ᠴᠠᠭᠤᠨ ᠬᠦᠭ ᠠᠶᠠᠯᠭᠤ ᠵᠢ ᠴᠤᠤᠷᠢᠶᠠᠲᠤᠭᠤᠯᠤᠨ᠂ ᠬᠡᠯᠡᠨᠤ ᠲᠠᠩᠰᠤᠭ ᠭᠠᠢ᠌ᠬᠠᠮᠰᠢᠭᠢ ᠬᠠᠷᠠᠭᠤᠯᠤᠨ ᠲᠡᠦᠬᠡᠠᠴᠠ ᠤᠳᠤᠳᠤ ᠲᠤᠯᠳᠠᠯᠠ᠂ ᠤᠳᠤᠠᠴᠠ ᠢᠷᠡᠭᠡᠳᠦᠢᠳᠤ ᠬᠦᠷᠲᠡᠯᠡ ᠮᠢᠷᠠᠯᠵᠠᠨ ᠰᠤᠯᠤᠩᠭ᠋ᠠᠷᠠᠵᠤ ᠶᠠᠪᠤᠭᠠᠳᠤ ᠪᠢ ᠤᠮᠤᠭᠰᠢᠨᠠᠮ᠃
ᠲᠠᠪᠤ
67 ᠵᠢᠯᠤᠨ ᠲᠤᠷᠰᠢ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠮᠢᠨᠢ ᠪᠠᠭᠠ ᠪᠠᠢ᠌ᠭᠰᠠᠨᠠᠴᠠᠪᠠᠨ ᠶᠡᠬᠡ ᠪᠤᠯᠵᠤ᠂ ᠪᠠᠭᠤᠷᠠᠢ ᠪᠠᠢ᠌ᠭᠰᠠᠨᠠᠴᠠᠪᠠᠨ ᠬᠦᠴᠦᠷᠬᠡᠭ ᠪᠤᠯᠵᠤ᠂ ᠲᠦᠩᠯᠢᠶᠤᠤ ᠬᠤᠲᠠ ᠵᠢᠨ ᠨᠠᠮᠤᠨ ᠬᠤᠷᠢᠶᠠ᠂ ᠵᠠᠰᠠᠭᠤᠨ ᠤᠷᠳᠤᠨᠤ ᠰᠤᠨᠢᠨ ᠮᠡᠳᠡᠭᠡ ᠶᠠᠷᠢᠶᠠ ᠬᠡᠯᠡᠯᠴᠡᠭᠡᠨᠤ ᠭᠤᠤᠯ ᠪᠤᠯᠬᠤ ᠵᠠᠭᠤᠴᠢᠯᠠᠭᠤᠷ ᠪᠤᠯᠵᠤ᠂ ᠤᠩᠰᠢᠭᠴᠢ ᠲᠦᠮᠡᠨᠤ ᠤᠶᠤᠨ ᠲᠠᠷᠢᠬᠢᠨᠳᠤ ᠤᠶᠤᠨ ᠮᠡᠳᠡᠯᠭᠡ ᠵᠢᠨ ᠰᠢᠮᠠ ᠵᠢ ᠡᠳᠦᠷ ᠡᠳᠦᠷ ᠴᠣ᠋ ᠰᠢᠨᠠᠪᠠᠷ ᠬᠠᠩᠭ᠋ᠠᠭᠰᠠᠭ᠋ᠠᠷ ᠪᠠᠢ᠌ᠨᠠ᠃
ᠠᠯᠠᠭ᠋ᠠᠨ ᠲᠡᠭᠡᠷᠡ ᠮᠢᠨᠢ ᠠᠵᠠ ᠵᠢᠨ ᠴᠡᠩᠭᠡᠷ ᠲᠠᠭᠲᠠᠭᠠ ᠰᠢᠭ᠋ ᠡᠳᠦᠷ ᠡᠳᠦᠷ ᠲᠡᠪᠬᠡᠷᠤᠨ ᠪᠠᠭᠤᠬᠤ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠵᠶ᠋ᠠᠨ ᠪᠢ ᠬᠠᠢ᠌ᠷᠠᠯᠠᠬᠤ ᠦᠭᠡᠢ ᠪᠠᠢ᠌ᠬᠤ ᠵᠢᠨ ᠤᠴᠢᠷ ᠦᠭᠡᠢ᠃ ᠰᠢᠷᠡᠭᠡᠨ ᠲᠡᠭᠡᠷᠡ ᠮᠢᠨᠢ ᠰᠢᠨᠠ ᠬᠠᠪᠤᠷᠤᠨ ᠴᠠᠰᠤ ᠰᠢᠭ᠋ ᠴᠠᠭᠤᠨ ᠴᠠᠭ ᠲᠤᠪᠠᠨ ᠨᠠᠮᠢᠷᠠᠨ ᠪᠠᠭᠤᠬᠤ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠵᠶ᠋ᠠᠨ ᠪᠢ ᠲᠡᠭᠡᠵᠢᠯᠡᠬᠦ ᠦᠭᠡᠢ ᠪᠠᠢ᠌ᠬᠤ ᠵᠢᠨ ᠠᠷᠭᠠ ᠦᠭᠡᠢ᠃
ᠵᠢᠷᠠᠨ ᠵᠢᠯ᠂ ᠵᠠᠭᠤᠨ ᠵᠢᠯ᠂ ᠮᠢᠩᠭ᠋ᠠᠨ ᠵᠢᠯ ᠵᠶ᠋ᠠᠷ ᠮᠢᠨᠤ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠤᠩᠰᠢᠭᠴᠢ ᠵᠢᠨ ᠵᠶ᠋ᠠᠨ ᠰᠡᠳᠬᠢᠯᠳᠤ ᠤᠶᠤᠨᠤ ᠵᠤᠯᠠ ᠪᠤᠯᠵᠤ ᠪᠠᠳᠮᠠᠯᠠᠨ ᠭᠡᠷᠡᠯᠳᠦᠬᠦ ᠵᠢ ᠪᠢ ᠢᠲᠡᠭᠡᠨᠡ᠃
ᠬᠤᠷᠴᠢᠨ ᠨᠤᠳᠤᠭᠠᠴᠠ ᠬᠤᠷᠸᠠ ᠲᠡᠯᠡᠬᠡᠢᠳᠤ᠂ ᠬᠤᠨᠤᠭᠤᠨ ᠭᠠᠵᠠᠷᠠᠴᠠ ᠬᠤᠯᠠ ᠵᠢᠨ ᠲᠢᠪ ᠬᠦᠷᠲᠡᠯᠡ ᠮᠠᠨᠤ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ᠬᠦᠮᠦᠨ ᠵᠤᠨᠤ ᠰᠡᠳᠬᠢᠯᠳᠤ ᠪᠤᠳᠤᠯᠤᠨ ᠴᠠᠮᠬᠠᠭ ᠪᠤᠯᠵᠤ ᠲᠤᠶᠠᠭ᠋ᠠᠷᠠᠨ ᠰᠠᠴᠤᠷᠠᠬᠤ ᠵᠢ ᠪᠢᠲᠡ ᠢᠲᠡᠭᠡᠨᠡ！
ᠮᠢᠨᠤ 《ᠲᠦᠩᠯᠢᠶᠤᠤ ᠡᠳᠤᠷᠤᠨ ᠰᠤᠨᠢᠨ》 ——
ᠮᠢᠨᠤ ᠠᠮᠢ ᠠᠮᠢᠳᠤᠷᠠᠯ᠂ ᠤᠷᠠᠨ ᠪᠦᠲᠦᠭᠡᠯᠤᠨ ᠮᠢᠨᠢ ᠤᠨᠠᠭ᠋ᠠᠨ ᠪᠠᠭᠤᠴᠠ ᠡ！
《ᠶᠠᠭᠷᠠᠢ ᠬᠤᠳᠤᠭᠤᠷ》 ᠬᠡᠮᠡᠬᠦ ᠢᠷᠠᠭᠤ ᠨᠠᠢ᠌ᠷᠠᠭᠤᠨ ᠦᠷᠦᠭᠡᠨᠡ