ᠲᠤᠷᠭᠤᠳ ᠪᠦᠬᠡ

    ᠲᠤᠷᠭᠤᠳ ᠪᠦᠬᠡ ᠵᠢ ᠭᠤᠤᠯᠳᠠᠭᠤ ᠦᠷᠡᠰ ᠨᠠᠶ᠋ᠢᠷ᠂ ᠵᠡᠷᠭᠡ ᠰᠢᠷᠠᠬᠤ （ᠵᠡᠷᠬᠡ ᠲᠡᠪᠰᠢᠬᠦ） ᠨᠠᠶ᠋ᠢᠷ᠂ ᠠᠬᠢ ᠬᠤᠩᠭᠤᠷ᠎ᠤᠨ ᠲᠠᠭ᠋ᠠᠬᠢ᠂ ᠡᠵᠡᠢ ᠯᠠᠮᠠ ᠵᠢᠨ ᠨᠠᠰᠤᠨ᠎ᠤ ᠪᠠᠶᠠᠷ᠂ ᠰᠢᠳᠦᠭᠡᠨ ᠯᠠᠮᠠ᠎ᠪᠠᠨ ᠰᠢᠷᠡᠭᠡᠨ᠎ᠳᠤ ᠵᠠᠯᠠᠬᠤ ᠪᠠᠶᠠᠷ᠂ ᠰᠦᠮ᠎ᠡ ᠬᠡᠶ᠋ᠢᠳ᠎ᠤᠨ ᠪᠠᠶᠠᠷ᠂ ᠴᠠᠭ᠋ᠠᠨ ᠰᠠᠷ᠎ᠠ ᠵᠢᠨ ᠰᠢᠨ᠎ᠡ ᠵᠢᠨ ᠨᠢᠭᠡᠨ᠎ᠤ ᠨᠤᠶᠠᠨ᠎ᠤ ᠦᠷᠭᠦᠭᠡ ᠵᠢᠨ ᠴᠠᠭ᠎ᠠ᠂ ᠤᠪᠤᠭ᠋ᠠᠨ ᠲᠠᠬᠢᠯᠭ᠎ᠠ ᠲᠡᠭᠡᠷ᠎ᠡ ᠪᠠᠷᠢᠯᠳᠤᠵᠤ ᠪᠠᠶ᠋ᠢᠵᠠᠢ᠂ ᠡᠳᠡᠭᠡᠷ ᠨᠠᠶ᠋ᠢᠷ ᠲᠠᠬᠢᠯᠭ᠎ᠠ ᠵᠢ ᠬᠤᠰᠢᠭᠤ ᠲᠠᠮᠠᠭ᠋ᠠᠨ ᠭᠠᠵᠠᠷ᠎ᠠᠴᠠ ᠡᠷᠬᠢᠯᠡᠵᠦ᠂ ᠪᠦᠬᠡ ᠵᠢᠨ ᠪᠦᠬᠦ ᠶᠠᠪᠤᠳᠠᠯ᠎ᠢ ᠪᠦᠬᠡ ᠵᠢᠨ ᠶᠡᠷᠦᠩᠭᠡᠢ ᠲᠠᠭ᠋ᠠᠭ᠋ᠠᠮᠠᠯ᠂ ᠲᠠᠷᠤᠢ ᠲᠠᠮᠠᠭ᠋ᠠᠨ ᠰᠠᠶ᠋ᠢᠳ᠎ᠠᠴᠠ ᠬᠠᠷᠢᠭᠤᠴᠠᠨ ᠬᠢᠵᠦ᠂ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ ᠪᠤᠳᠠᠳᠠᠢ ᠠᠵᠢᠯ᠎ᠢ ᠭᠠᠷᠳᠠᠨ ᠭᠦᠢ᠍ᠴᠡᠳᠭᠡᠨ᠎ᠡ᠂ ᠪᠦᠬᠡ ᠵᠢᠨ ᠶᠡᠷᠦᠩᠭᠡᠢ ᠲᠠᠭ᠋ᠠᠭ᠋ᠠᠮᠠᠯ ᠪᠠ ᠵᠠᠰᠠᠭᠤᠯᠴᠢᠨ᠎ᠳᠤ ᠲᠤᠰᠬᠠᠢ ᠬᠤᠪᠴᠠᠰᠤ ᠦᠭᠡᠢ᠂ ᠦᠪᠡᠷᠰᠡᠳ᠎ᠤᠨ ᠲᠡᠪᠡᠯ ᠵᠶ᠋ᠠᠨ ᠡᠮᠦᠰᠦᠨ ᠠᠵᠢᠯᠯᠠᠨ᠎ᠠ᠃
    ᠨᠠᠶ᠋ᠢᠷ᠎ᠤᠨ ᠲᠠᠯᠠᠪᠠᠢ ᠵᠢᠨ ᠭᠤᠤᠯ ᠬᠡᠰᠡᠭ᠎ᠲᠤ ᠠᠷᠪᠠᠨ ᠬᠠᠨ᠎ᠠ᠎ᠲᠠᠢ ᠮᠤᠩᠭᠤᠯ ᠭᠡᠷ ᠪᠤᠶᠤ ᠲᠤᠮᠤ ᠴᠠᠴᠠᠷ ᠮᠠᠶ᠋ᠢᠬᠠᠨ ᠪᠠᠷᠢᠵᠤ᠂ ᠸᠠᠩ ᠨᠤᠶᠠᠳ᠂ ᠲᠠᠮᠠᠭ᠎ᠠ ᠵᠢᠨ ᠲᠦᠰᠢᠮᠡᠳ᠂ ᠰᠦᠮ᠎ᠡ ᠬᠡᠶ᠋ᠢᠳ᠎ᠤᠨ ᠮᠡᠳᠡᠭᠡᠴᠢᠨ᠎ᠢ ᠰᠠᠭᠤᠯᠭ᠋ᠠᠨ᠂ ᠲᠡᠭᠦᠨ᠎ᠤ ᠬᠤᠶᠠᠷ ᠲᠠᠯ᠎ᠠ᠎ᠳᠤ ᠲᠤᠰᠪᠤᠷᠢ ᠨᠢᠭᠡ ᠪᠤᠶᠤ ᠬᠤᠶᠠᠷ ᠮᠤᠩᠭᠤᠯ ᠭᠡᠷ ᠪᠠᠷᠢᠵᠤ᠂ ᠪᠦᠬᠡᠴᠦᠳ᠎ᠢ ᠴᠤᠭᠯᠠᠭᠤᠯᠵᠤ ᠬᠤᠪᠴᠠᠰᠤᠯᠠᠬᠤ ᠤᠷᠤᠨ ᠪᠠᠶ᠋ᠢᠷᠢ ᠪᠤᠯᠭ᠋ᠠᠳᠠᠭ᠂ ᠲᠡᠭᠡᠬᠦ᠎ᠳᠡᠭᠡᠨ ᠪᠦᠬᠡᠴᠦᠳ ᠵᠶ᠋ᠠᠨ ᠬᠠᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠢᠨ᠂ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠢᠨ （ᠰᠦᠮ᠎ᠡ ᠬᠡᠶ᠋ᠢᠳ᠎ᠤᠨ ᠯᠠᠮᠠ ᠪᠦᠬᠡᠴᠢᠨ） ᠭᠡᠮᠡᠨ ᠬᠤᠶᠠᠷ ᠬᠤᠪᠢᠶᠠᠵᠤ᠂ ᠬᠠᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠢᠨ᠎ᠢ ᠪᠠᠷᠠᠭᠤᠨ ᠪᠡᠶ᠎ᠡ᠎ᠳᠤ᠂ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠢᠨ᠎ᠢ ᠵᠡᠬᠦᠨ ᠪᠡᠶ᠎ᠡ᠎ᠳᠤ ᠪᠠᠶ᠋ᠢᠷᠢᠰᠢᠭᠤᠯᠬᠤ ᠶᠤᠰᠤ᠎ᠲᠠᠢ ᠪᠦᠭᠡᠳ ᠬᠠᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ᠎ᠢ ᠪᠠᠰᠠ ᠨᠤᠶᠠᠨ᠎ᠤ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ᠂ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ᠎ᠢ ᠯᠠᠮᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ᠂ ᠵᠠᠮ᠎ᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡᠴᠦᠳ ᠭᠡᠳᠡᠭ ᠪᠠᠶ᠋ᠢᠵᠠᠢ᠃ ᠯᠠᠮᠠ ᠵᠢᠨ ᠲᠠᠯ᠎ᠠ ᠵᠢᠨ᠎ᠬᠢᠨ ᠬᠤᠷᠠᠯ᠎ᠤᠨ ᠮᠤᠩᠭᠤᠯ ᠭᠡᠷ ᠵᠶ᠋ᠠᠨ ᠠᠪᠴᠢᠷᠠᠵᠤ ᠪᠠᠷᠢᠭ᠋ᠠᠳ ᠪᠦᠬᠡᠴᠢᠨ ᠯᠠᠮᠠ ᠨᠠᠷ ᠵᠶ᠋ᠠᠨ ᠰᠠᠭᠤᠯᠭ᠋ᠠᠳᠠᠭ ᠪᠠᠶ᠋ᠢᠭᠰᠠᠨ ᠶᠤᠮ ᠪᠠᠶ᠋ᠢᠨ᠎ᠠ᠃
    ᠲᠤᠷᠭᠤᠳ ᠪᠦᠬᠡ ᠵᠢ ᠲᠡᠭᠡᠳᠦ ᠪᠡᠶ᠎ᠡ ᠨᠢᠴᠦᠭᠦᠨ᠂ ᠬᠦᠯ ᠨᠢᠴᠦᠭᠦᠨ᠂ ᠱᠤᠳᠠᠭ ᠡᠮᠦᠰᠭᠡᠵᠦ ᠪᠠᠷᠢᠯᠳᠤᠭᠤᠯᠳᠠᠭ᠂ ᠲᠡᠭᠡᠬᠦ᠎ᠳᠡᠭᠡᠨ ᠱᠤᠳᠠᠭ᠎ᠢ ᠤᠭ᠎ᠲᠠᠭᠠᠨ ᠱᠤᠳᠠᠭ ᠭᠡᠳᠡᠭ ᠦᠭᠡᠢ᠂ ᠪᠦᠬᠡ ᠵᠢᠨ ᠡᠮᠦᠰᠭᠡᠯ ᠭᠡᠳᠡᠭ ᠪᠠᠶ᠋ᠢᠭᠰᠠᠨ ᠪᠦᠭᠡᠳ ᠲᠡᠭᠦᠨ ᠵᠶ᠋ᠠᠨ   ᠨᠢᠮᠭᠡᠨ   ᠢᠰᠡᠭᠡᠢ ᠵᠢ   ᠨᠤᠤᠰᠤᠨ   ᠤᠳᠠᠰᠤ ᠪᠠ᠊ ᠊ᠷ ᠰᠢᠷᠢᠵᠦ   ᠬᠦᠬᠡ   ᠪᠦᠰ ᠵᠶ᠋ᠠᠷ   ᠭᠠᠳᠠᠷᠯᠠᠵᠤ ᠬᠢᠳᠡᠭ ᠪᠠᠶ᠋ᠢᠵᠠᠢ᠂ ᠡᠪᠦᠳᠦᠭ᠎ᠠᠴᠠ ᠲᠡᠭᠡᠭᠦᠷ ᠲᠠᠳᠠᠭᠰᠠᠨ ᠦᠷᠭᠡᠨ ᠬᠦᠯᠬᠦᠭᠡᠷ ᠡᠮᠦᠰᠭᠡᠯ᠂ ᠨᠡᠶ᠋ᠢᠳᠡ ᠮᠤᠩᠭᠤᠯ ᠬᠡᠯᠡᠨ᠎ᠳᠤ ᠱᠤᠳᠠᠭ ᠭᠡᠳᠡᠭ᠃ ᠵᠠᠬ᠎ᠠ ᠵᠢᠨ ᠬᠡᠰᠡᠭ᠎ᠢ ᠲᠠᠪᠬᠤᠷᠯᠠᠵᠤ ᠤᠶᠤᠬᠤ ᠦᠭᠡᠢ᠂ ᠲᠥᠳᠡᠭᠡ ᠵᠢᠨ ᠤᠷᠤᠨ᠎ᠳᠤ ᠠᠳᠡ ᠲᠡᠨᠳᠡ ᠬᠡᠳᠦ ᠨᠦᠬᠡᠯᠡᠵᠦ ᠨᠦᠬᠡ᠎ᠪᠠᠷ᠎ᠨᠢ ᠰᠢᠷᠢᠨ ᠦᠯᠬᠡ ᠭᠦᠶᠦᠯᠭᠡᠨ ᠡᠮᠦᠨ᠎ᠡ᠎ᠪᠠᠨ ᠠᠪᠴᠢᠷᠠᠵᠤ ᠴᠢᠩᠭ᠎ᠠ ᠵᠠᠩᠭᠢᠳᠤᠨ᠎ᠠ᠃ ᠡᠮᠦᠰᠭᠡᠯ᠎ᠤᠨ ᠵᠠᠬ᠎ᠠ ᠵᠢᠨ ᠠᠷᠤ ᠡᠮᠦᠨ᠎ᠡ ᠲᠠᠯ᠎ᠠ᠎ᠳᠤᠨᠢ ᠲᠤᠰᠪᠤᠷᠢ ᠲᠦᠷᠪᠡᠨ ᠬᠤᠷᠤᠭᠤ ᠪᠠᠭᠳᠠᠬᠤ ᠨᠦᠬᠡ （ᠭᠤᠭᠴᠤᠭ᠎ᠠ） ᠭᠠᠷᠭ᠋ᠠᠵᠤ ᠪᠠᠷᠢᠴᠠ ᠪᠤᠯᠭ᠋ᠠᠨ᠎ᠠ᠂ ᠲᠡᠭᠦᠨ᠎ᠢ ᠪᠦᠬᠡ ᠵᠢᠨ ᠪᠠᠷᠢᠴᠠ ᠭᠡᠳᠡᠭ᠂ ᠪᠠᠷᠢᠴᠠ᠎ᠨᠢ ᠪᠦᠬᠡᠴᠦᠳ᠎ᠤᠨ ᠪᠠᠷᠢᠭ᠎ᠠ ᠠᠪᠬᠤ ᠭᠤᠤᠯ ᠭᠠᠵᠠᠷ ᠤᠴᠢᠷ ᠲᠡᠭᠦᠨ᠎ᠳᠤ ᠪᠤᠯᠢᠭ᠋ᠠᠷᠢ ᠬᠠᠳᠠᠨ᠂ ᠮᠢᠨᠳᠠᠰᠤᠨ ᠤᠳᠠᠰᠤ᠂ ᠬᠠᠳᠠᠭ ᠮᠡᠳᠦ ᠵᠢᠨ ᠪᠦᠬᠡ ᠶᠠᠭᠤᠮ᠎ᠠ᠎ᠪᠠᠷ ᠤᠶᠤᠵᠤ ᠪᠦᠬᠡᠯᠡᠵᠦ ᠦᠭᠳᠡᠭ᠃ ᠪᠦᠬᠡ ᠵᠢᠨ ᠡᠮᠦᠰᠭᠡᠯ᠎ᠢ ᠲᠠᠮᠠᠭ᠋ᠠᠨ ᠭᠠᠵᠠᠷ᠎ᠠᠴᠠ ᠨᠢᠭᠡᠳᠦᠯᠳᠡᠢ ᠬᠢᠵᠦ᠂ ᠨᠠᠶ᠋ᠢᠷ᠎ᠤᠨ ᠴᠠᠭ᠎ᠲᠤ ᠭᠠᠷᠭ᠋ᠠᠨ ᠪᠦᠬᠡᠴᠦᠳ᠎ᠲᠡᠭᠡᠨ ᠡᠮᠦᠰᠭᠡᠵᠦ ᠪᠤᠰᠤᠳ ᠴᠠᠭ᠎ᠲᠤ ᠬᠠᠳᠠᠭ᠋ᠠᠯᠠᠵᠤ ᠲᠠᠯᠪᠢᠳᠠᠭ ᠪᠠᠶ᠋ᠢᠵᠠᠢ᠂ ᠬᠤᠷᠠᠯ ᠰᠦᠮ᠎ᠡ᠎ᠳᠤ ᠪᠠᠰᠠ ᠪᠦᠬᠡ ᠵᠢᠨ ᠡᠮᠦᠰᠭᠡᠯ᠎ᠲᠠᠢ ᠪᠠᠶ᠋ᠢᠭᠰᠠᠨ ᠭᠡᠵᠦ ᠪᠤᠢ᠃
    ᠪᠦᠬᠡ ᠵᠢᠨ ᠲᠠᠯᠠᠪᠠᠢ ᠵᠢ ᠤᠨᠴᠠ ᠠᠩᠬᠠᠷᠤᠨ ᠵᠦᠭᠡᠯᠡᠨ ᠡᠯᠡᠰᠦᠷᠭᠡᠭ ᠭᠠᠵᠠᠷ ᠰᠤᠩᠭᠤᠵᠤ ᠲᠡᠭᠰᠢᠯᠡᠨ ᠴᠡᠪᠡᠷᠯᠡᠨ᠎ᠡ᠃ ᠬᠤᠶᠠᠷ ᠲᠠᠯ᠎ᠠ ᠵᠢᠨ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ᠎ᠠᠴᠠ ᠲᠤᠰ ᠲᠤᠰ᠎ᠤᠨ ᠮᠤᠩᠭᠤᠯ ᠭᠡᠷ᠎ᠤᠨ ᠡᠭᠦᠳᠡᠨ᠎ᠳᠤ ᠵᠤᠭᠰᠤᠭ᠋ᠠᠳ ᠪᠦᠬᠡᠴᠢᠨ᠎ᠤ᠎ᠪᠠᠨ ᠨᠡᠷ᠎ᠡ ᠲᠠᠭᠤᠳᠠᠵᠤ ᠴᠤᠭᠯᠠᠭᠤᠯᠤᠨ᠎ᠠ᠂ ᠠᠯᠢ ᠪᠦᠬᠡᠴᠢᠨ᠎ᠢ ᠠᠯᠢ ᠪᠦᠬᠡᠴᠢᠨ᠎ᠲᠠᠢ ᠲᠤᠯᠭ᠋ᠠᠵᠤ ᠪᠠᠷᠢᠯᠳᠤᠭᠤᠯᠬᠤ ᠶᠠᠪᠣᠳᠠᠯ᠎ᠢ ᠪᠦᠬᠡ ᠵᠢᠨ ᠶᠡᠷᠦᠩᠭᠡᠢ ᠲᠠᠭ᠋ᠠᠭ᠋ᠠᠮᠠᠯ᠎ᠠᠴᠠ ᠬᠠᠮᠢᠶᠠᠷᠴᠤ ᠲᠤᠭᠳᠠᠭ᠋ᠠᠨ᠎ᠠ᠃ ᠪᠦᠬᠡᠴᠦᠳ᠎ᠤᠨ ᠵᠶ᠋ᠠᠨ ᠶᠡᠷᠦᠩᠭᠡᠢ ᠪᠠᠶ᠋ᠢᠳᠠᠯ᠎ᠢ ᠮᠡᠳᠡᠬᠦ ᠪᠤᠯᠬᠤᠷ ᠲᠠᠭ᠋ᠠᠷᠠᠭᠤᠯᠵᠤ ᠤᠨᠤᠭ᠋ᠠᠵᠤ ᠪᠠᠷᠢᠯᠳᠤᠭᠤᠯᠤᠨ᠎ᠠ᠂ ᠱᠤ ᠤᠷᠬᠢᠬᠤ ᠪᠤᠶᠤ ᠰᠢᠪᠠᠭ᠎ᠠ ᠰᠤᠭᠤᠯᠬᠤ ᠠᠷᠭ᠎ᠠ ᠬᠡᠷᠡᠭᠯᠡᠬᠦ ᠦᠭᠡᠢ᠃ ᠲᠡᠭᠡᠬᠦ᠎ᠳᠡᠭᠡᠨ ᠬᠤᠶᠠᠷ ᠲᠠᠯ᠎ᠠ ᠵᠢᠨ ᠬᠦᠴᠦ ᠴᠢᠳᠠᠯ ᠤᠪᠰᠤ ᠮᠡᠭᠡ ᠲᠡᠩᠴᠡᠮᠡᠷ ᠭᠡᠰᠡᠨ ᠬᠤᠶᠠᠷ ᠪᠦᠬᠡᠴᠢᠨ ᠵᠶ᠋ᠠᠨ ᠬᠠᠮᠤᠭ ᠲᠡᠷᠢᠭᠦᠨ᠎ᠳᠤ ᠲᠤᠯᠭ᠋ᠠᠵᠤ ᠪᠠᠷᠢᠯᠳᠤᠭᠤᠯᠤᠨ᠎ᠠ᠂ ᠲᠤᠰ ᠬᠤᠶᠠᠷ ᠪᠦᠬᠡ ᠤᠳᠠᠳᠠᠯ᠎ᠠ ᠪᠠᠷᠢᠯᠳᠤᠭ᠋ᠠᠳ ᠬᠡᠨ ᠠᠯᠢᠨ ᠵᠶ᠋ᠠᠨ ᠲᠡᠶ᠋ᠢᠯᠬᠦ ᠦᠭᠡᠢ᠂ ᠰᠢᠭᠦᠯᠳᠡ ᠭᠠᠷᠬᠤ ᠦᠭᠡᠢ ᠪᠠᠶ᠋ᠢᠳᠠᠯ ᠲᠤᠤᠷ᠎ᠠ ᠬᠤᠶᠠᠳᠤᠭ᠋ᠠᠷ᠎ᠲᠤ ᠲᠠᠯᠪᠢᠬᠤ ᠬᠤᠶᠠᠷ ᠪᠦᠬᠡᠴᠢᠨ᠎ᠢ ᠲᠠᠯᠪᠢᠨ ᠪᠠᠷᠢᠯᠳᠤᠭᠤᠯᠵᠤ᠂ ᠠᠯᠢ ᠲᠠᠯ᠎ᠠ ᠵᠢᠨ ᠪᠦᠬᠡ ᠤᠯᠠᠨ ᠲᠡᠶ᠋ᠢᠯᠦᠭᠰᠡᠨ ᠪᠤᠯ ᠲᠡᠷᠡ ᠲᠠᠯ᠎ᠠ ᠵᠢ ᠰᠢᠭᠦᠭᠰᠡᠨ ᠵᠶ᠋ᠠᠷ ᠪᠤᠳᠤᠳᠠᠭ ᠪᠠᠶ᠋ᠢᠵᠠᠢ᠃ ᠪᠦᠬᠡ ᠵᠢᠨ ᠶᠤᠰᠤᠨ᠎ᠳᠤ ᠨᠢᠭᠡ ᠪᠦᠬᠡ ᠨᠢᠭᠡᠯᠡ ᠤᠳᠠᠭ᠎ᠠ ᠪᠠᠷᠢᠯᠳᠤᠬᠤ ᠡᠷᠬᠡ᠎ᠲᠠᠢ ᠪᠦᠭᠡᠳ ᠪᠦᠬᠡᠴᠦᠳ ᠵᠶ᠋ᠠᠨ ᠨᠢᠭᠡ ᠲᠤᠤᠷ᠎ᠠ ᠬᠡᠳᠦ ᠬᠡᠳᠦᠨ ᠬᠤᠤᠰ ᠵᠶ᠋ᠠᠷ ᠲᠠᠯᠪᠢᠬᠤ ᠪᠢᠰᠢ᠂ ᠤᠯᠠᠩᠬᠢ᠎ᠳᠠᠭᠠᠨ ᠨᠢᠬᠡ ᠬᠤᠤᠰ ᠪᠦᠬᠡ ᠪᠠᠷᠢᠯᠳᠤᠵᠤ ᠪᠠᠷᠠᠭᠰᠠᠨ ᠲᠠᠷᠠᠭ᠋ᠠᠪᠠᠷ ᠰᠠᠶᠢ ᠲᠠᠷᠠᠭ᠋ᠠᠬᠢ ᠪᠦᠬᠡ ᠵᠢ ᠲᠠᠯᠪᠢᠳᠠᠭ ᠶᠤᠰᠤ᠎ᠲᠠᠢ᠃
    ᠪᠦᠬᠡ ᠵᠢᠨ ᠲᠠᠭ᠋ᠠᠭ᠋ᠠᠮᠠᠯ᠎ᠠᠴᠠ 《ᠪᠦᠬᠡ᠎ᠪᠠᠨ ᠲᠠᠯᠪᠢ ᠡ》 ᠭᠡᠭᠰᠡᠭᠡᠷ ᠬᠤᠶᠠᠷ ᠲᠠᠯ᠎ᠠ ᠵᠢᠨ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ᠎ᠠᠴᠠ ᠲᠤᠰ ᠲᠤᠰ᠎ᠤᠨ ᠪᠦᠬᠡ᠎ᠪᠠᠨ ᠲᠠᠯᠪᠢᠨ᠎ᠠ᠂ ᠪᠦᠬᠡᠴᠦᠳ （ᠮᠠᠯᠠᠭ᠋ᠠᠢ ᠡᠮᠦᠰᠬᠦ ᠦᠭᠡᠢ） ᠲᠠᠮᠢᠷ᠎ᠤᠨ ᠲᠠᠯᠠᠪᠠᠢ᠎ᠳᠤ ᠤᠳᠤᠬᠢ ᠰᠢᠭ᠋ ᠦᠰᠦᠷᠴᠦ ᠲᠡᠪᠢᠵᠦ ᠭᠠᠷᠬᠤ ᠪᠢᠰᠢ᠂ ᠭᠤᠤᠯ ᠭᠡᠷ ᠮᠠᠶ᠋ᠢᠬᠠᠨ᠎ᠤ ᠡᠭᠦᠳᠡᠨ᠎ᠳᠤ ᠬᠦᠶᠦᠵᠦ ᠬᠦᠷᠦᠭᠡᠳ （ᠵᠡᠭᠦᠨ ᠲᠠᠯ᠎ᠠ ᠵᠢᠨ ᠪᠦᠬᠡ ᠵᠡᠭᠦᠨ ᠲᠠᠯ᠎ᠠ᠎ᠳᠤ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠵᠢᠨ ᠪᠦᠬᠡ ᠪᠠᠷᠠᠭᠤᠨ ᠲᠠᠯ᠎ᠠ᠎ᠳᠤ） ᠸᠠᠩ ᠨᠤᠶᠠᠨ᠎ᠤ ᠵᠦᠭ ᠬᠠᠨᠳᠤᠵᠤ ᠪᠠᠷᠠᠭᠤᠨ ᠡᠪᠦᠳᠦᠭ ᠵᠶ᠋ᠠᠨ ᠨᠤᠭᠤᠯᠤᠨ ᠰᠦᠭᠦᠳᠴᠦ᠂ ᠪᠠᠷᠠᠭᠤᠨ   ᠭᠠᠷ ᠎ᠤᠨ   ᠡᠷᠡᠬᠡᠢ   ᠬᠤᠷᠤᠭᠤ ᠎ᠪᠠᠨ   ᠮᠠᠩᠨᠠᠢ ᠎ᠳᠠᠭᠠᠨ   ᠬᠦᠷᠭᠡᠨ   ᠮᠦᠷᠭᠦᠬᠦ   ᠶᠤᠰᠤ   ᠭᠦᠢ᠍ᠴᠡᠳᠬᠡᠨ᠎ᠡ （ᠲᠠᠯᠠᠪᠤᠷ᠎ᠠᠴᠠ ᠪᠠᠭᠤᠬᠤ᠎ᠳᠠᠭᠠᠨ ᠴᠤ᠌ ᠲᠡᠭᠡᠨ᠎ᠡ）᠃ ᠲᠡᠭᠦᠨ᠎ᠤ ᠲᠠᠷᠠᠭ᠎ᠠ ᠬᠤᠶᠠᠷ ᠲᠠᠯ᠎ᠠ ᠵᠢᠨ ᠪᠦᠬᠡ ᠵᠢᠨ ᠵᠠᠰᠠᠭᠤᠯᠴᠢᠨ᠎ᠠᠴᠠ ᠪᠦᠬᠡᠴᠢᠨ᠎ᠤ ᠪᠠᠷᠠᠭᠤᠨ ᠡᠪᠦᠳᠦᠭ᠎ᠢ᠎ᠨᠢ ᠰᠦᠭᠦᠳᠭᠡᠨ ᠰᠠᠭᠤᠯᠭ᠋ᠠᠵᠤ ᠪᠠᠶ᠋ᠢᠭ᠋ᠠᠳ ᠪᠠᠷᠢᠴᠠ᠎ᠠᠴᠠ᠎ᠨᠢ ᠬᠠᠷᠢᠯᠴᠠᠨ ᠪᠠᠷᠢᠭᠤᠯᠵᠤ ᠪᠠᠷᠢᠯᠳᠤᠭᠤᠯᠬᠤ᠎ᠪᠠᠷ ᠪᠡᠯᠡᠳᠬᠡᠨ᠎ᠡ᠃ ᠪᠠᠷᠢᠴᠠ ᠠᠪᠬᠤ᠎ᠳᠤ᠂ ᠨᠢᠭᠡ᠎ᠨᠢ ᠵᠡᠭᠦᠨ ᠭᠠᠷ ᠵᠶ᠋ᠠᠷ ᠵᠶ᠋ᠠᠨ ᠨᠦᠭᠦᠭᠡ ᠡᠳᠡᠭᠡᠳ᠎ᠤᠨ ᠱᠤᠳᠠᠭ᠎ᠤᠨ ᠡᠮᠦᠨ᠎ᠡ ᠲᠠᠯ᠎ᠠ ᠵᠢᠨ ᠪᠠᠷᠢᠴᠠ᠎ᠠᠴᠠ ᠪᠠᠷᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠵᠶ᠋ᠠᠷ ᠵᠶ᠋ᠠᠨ ᠨᠦᠭᠦᠭᠡ ᠡᠳᠡᠭᠡᠳ᠎ᠤᠨ ᠱᠤᠳᠠᠭ᠎ᠤᠨ ᠠᠷᠤ ᠲᠠᠯ᠎ᠠ ᠵᠢᠨ ᠪᠠᠷᠢᠴᠠ᠎ᠠᠴᠠ ᠪᠠᠷᠢᠵᠤ ᠪᠠᠷᠢᠯᠳᠤᠨ᠎ᠠ᠂ ᠢᠩᠭᠢᠬᠦᠯᠡᠷ ᠶᠠᠭ ᠬᠠᠶ᠋ᠢᠴᠢᠯᠠᠵᠤ ᠪᠠᠷᠢᠵᠤ ᠪᠠᠶ᠋ᠢᠬᠤ ᠮᠠᠶᠢᠭᠳᠠᠢ ᠪᠤᠯᠬᠤ ᠤᠴᠢᠷ ᠬᠠᠶ᠋ᠢᠴᠢᠨ ᠪᠠᠷᠢᠯᠳᠤᠯᠭ᠎ᠠ ᠴᠤ᠌ ᠭᠡᠳᠡᠭ᠃ ᠬᠤᠶᠠᠷ ᠡᠳᠡᠭᠡᠳ᠎ᠤᠨ ᠪᠠᠷᠠᠭᠤᠨ ᠭᠠᠷ ᠪᠦᠷ ᠨᠦᠭᠦᠭᠡ ᠡᠳᠡᠬᠡᠳ᠎ᠤᠨ ᠵᠶ᠋ᠠᠨ ᠪᠠᠷᠠᠭᠤᠨ ᠮᠦᠷᠦ ᠲᠡᠭᠡᠭᠦᠷ ᠵᠦᠷᠢᠵᠦ ᠪᠠᠷᠢᠴᠠ ᠤᠯᠤᠨ᠎ᠠ᠂ ᠪᠠᠷᠢᠴᠠ᠎ᠪᠠᠨ ᠭᠠᠳᠠᠨ᠎ᠠ᠎ᠠᠴᠠ᠎ᠨᠢ ᠡᠮᠬᠦᠭᠦᠯᠵᠦ ᠪᠠᠷᠢᠬᠤ ᠶᠤᠰᠤ ᠎ᠲᠠᠢ᠃ ᠬᠤᠶᠠᠷ   ᠪᠦᠬᠡᠴᠢᠨ   ᠪᠠᠷᠢᠴᠠ ᠎ᠪᠠᠨ   ᠪᠠᠷᠢᠵᠤ   ᠪᠤᠯᠤᠯ᠎ᠠ   ᠭᠡᠭᠰᠡᠭᠡᠷ   ᠵᠠᠰᠠᠭᠤᠯᠴᠢᠨ ᠎ᠠᠴᠠ᠄ 《ᠵᠠ᠂ ᠤᠳᠤ ᠪᠠᠷᠢᠯᠳᠤᠵᠤ ᠡᠬᠢᠯᠡ！》 ᠬᠡᠬᠦ᠎ᠳᠤ ᠪᠦᠬᠡᠴᠢᠨ ᠰᠠᠭᠤᠭ᠎ᠠ᠎ᠪᠠᠷ ᠵᠶ᠋ᠠᠨ ᠪᠤᠶᠤ ᠪᠤᠰᠴᠤ ᠵᠤᠭᠰᠤᠭ᠋ᠠᠳ ᠪᠠᠷᠢᠯᠳᠤᠵᠤ ᠡᠬᠢᠯᠡᠨ᠎ᠡ᠂ ᠪᠠᠷᠢᠯᠳᠤᠬᠤ ᠶᠠᠪᠤᠴᠠ᠎ᠳᠤ ᠬᠤᠶᠠᠭᠤᠯᠠ ᠭᠠᠵᠠᠷ ᠤᠨᠠᠵᠤ ᠬᠡᠪᠳᠡᠭᠡ ᠪᠠᠷᠢᠯᠳᠤᠯᠭ᠎ᠠ᠎ᠳᠤ ᠤᠷᠤᠬᠤ᠎ᠠᠴᠠ ᠡᠮᠦᠨ᠎ᠡ ᠪᠠᠷᠢᠴᠠ ᠲᠠᠯᠪᠢᠵᠤ ᠪᠤᠯᠬᠤ ᠦᠭᠡᠢ᠂ ᠲᠠᠯᠪᠢᠪᠠᠯ ᠲᠡᠶ᠋ᠢᠯᠦᠭᠳᠡᠭᠰᠡᠨ ᠵᠶ᠋ᠠᠷ ᠪᠤᠳᠤᠨ᠎ᠠ᠃
    ᠲᠤᠷᠭᠤᠳ ᠪᠦᠬᠡ ᠵᠢᠨ ᠪᠠᠷᠢᠯᠳᠤᠯᠭ᠎ᠠ᠎ᠨᠢ ᠲᠡᠯᠡᠬᠡᠢ ᠵᠢᠨ ᠡᠷᠳᠡᠨ᠎ᠤ ᠰᠤᠩᠭᠤᠳᠠᠭ ᠪᠦᠬᠡ ᠪᠠ ᠴᠢᠯᠦᠭᠡᠳᠦ ᠪᠦᠬᠡ ᠎ᠲᠠᠢ   ᠨᠡᠯᠢᠶᠡᠳ   ᠲᠦᠰᠳᠡᠢ᠂   ᠲᠠᠯᠤ   ᠮᠦᠷᠦ   ᠰᠢᠷᠤᠶ᠋ᠢᠳᠠᠭᠰᠠᠨ   ᠡᠰᠡᠬᠦ ᠎ᠪᠠᠷ ᠰᠢᠭᠦᠵᠦ ᠰᠢᠭᠦᠭᠳᠡᠬᠦ ᠪᠠᠷᠢᠮᠵᠢᠶ᠎ᠠ （ᠵᠠᠪᠠᠯ ᠬᠤᠶᠠᠷ ᠲᠠᠯᠤ ᠵᠢ ᠵᠡᠷᠭᠡᠪᠡᠷ ᠰᠢᠷᠤᠶ᠋ᠢᠳᠠᠭᠰᠠᠨ ᠪᠠᠶ᠋ᠢᠬᠤ ᠬᠡᠷᠡᠭ᠎ᠲᠠᠢ） ᠪᠤᠯᠭ᠋ᠠᠨ᠎ᠠ᠃ ᠪᠦᠬᠡ ᠪᠠᠷᠢᠯᠳᠤᠬᠤ ᠶᠠᠪᠤᠴᠠ᠎ᠳᠤ ᠬᠡᠪᠳᠡᠨ ᠴᠤᠬᠢᠬᠤ （ᠪᠠᠰᠠ ᠲᠠᠰᠢᠶᠠᠯᠳᠤᠨ ᠴᠤᠬᠢᠬᠤ）᠂ ᠠᠴᠢᠬᠤ᠂ ᠲᠡᠭᠡᠭᠡᠳᠡᠬᠦ᠂ ᠭᠤᠬᠠᠳᠠᠬᠤ᠂ ᠨᠤᠮᠤᠳᠠᠬᠤ᠂ ᠰᠢᠯᠢᠳᠡᠬᠦ᠂ ᠡᠷᠭᠦᠬᠦ᠂ ᠬᠦᠷᠪᠡᠭᠦᠯᠬᠦ ᠵᠡᠷᠭᠡ ᠤᠯᠠᠨ ᠵᠦᠢ᠍ᠯ᠎ᠤᠨ ᠤᠪᠰᠤ ᠮᠡᠭᠡ ᠵᠢ ᠬᠡᠷᠡᠭᠯᠡᠵᠦ ᠪᠤᠯᠳᠠᠭ ᠪᠠᠶ᠋ᠢᠵᠠᠢ᠂ ᠬᠡᠬᠦ᠎ᠳᠡᠭᠡᠨ ᠬᠠᠪᠰᠤᠷᠬᠤ ᠮᠡᠭᠡ ᠬᠡᠷᠡᠭᠯᠡᠵᠦ ᠪᠤᠯᠳᠠᠭ ᠦᠭᠡᠢ᠂ ᠪᠦᠰᠡᠯᠡᠭᠦᠷ᠎ᠠᠴᠠ ᠲᠤᠷᠤᠭᠰᠢ ᠭᠠᠷ ᠬᠦᠷᠴᠦ ᠪᠤᠯᠬᠤ ᠦᠭᠡᠢ ᠶᠤᠰᠤ᠎ᠲᠠᠢ᠃ ᠲᠤᠬᠤᠶ᠋ᠢᠯᠠᠳᠠᠬᠤ᠂ ᠠᠷᠠᠰᠤ ᠮᠢᠬ᠎ᠠ᠎ᠠᠴᠠ᠎ᠨᠢ ᠪᠠᠵᠠᠬᠤ᠂ ᠬᠦᠵᠦᠭᠦᠦ ᠲᠤᠯᠤᠭ᠋ᠠᠢ ᠭᠠᠷ ᠬᠦᠯ᠎ᠢ᠎ᠨᠢ ᠮᠤᠰᠭᠢᠬᠤ᠂ ᠡᠪᠦᠳᠦᠭᠯᠡᠬᠦ᠂ ᠢᠰᠭᠦᠯᠬᠦ᠂ ᠲᠡᠪᠢᠰᠬᠦ ᠵᠡᠷᠭᠡ ᠴᠠᠭ᠋ᠠᠵᠠᠳᠠᠢ ᠬᠦᠳᠡᠯᠭᠡᠭᠡᠨ᠎ᠢ ᠬᠢᠵᠦ ᠦᠯᠦ ᠪᠤᠯᠬᠤ ᠴᠢᠩᠭ᠎ᠠ ᠲᠦᠷᠢᠮ᠎ᠲᠠᠢ᠃ ᠬᠡᠪᠳᠡᠨ ᠴᠤᠬᠢᠬᠤ ᠭᠡᠵᠦ ᠦᠪᠡᠷ ᠵᠶ᠋ᠠᠨ ᠬᠡᠪᠳᠡᠩᠭᠦᠳᠡ ᠨᠦᠭᠦᠭᠡ ᠡᠳᠡᠭᠡᠳ ᠵᠶ᠋ᠠᠨ ᠲᠡᠭᠡᠭᠦᠷ ᠵᠶ᠋ᠠᠨ ᠭᠠᠷᠭ᠋ᠠᠵᠤ ᠬᠠᠶᠠᠭ᠋ᠠᠳ ᠲᠠᠯᠤ ᠮᠦᠷᠦ ᠵᠢ᠎ᠨᠢ ᠰᠢᠷᠤᠶ᠋ᠢᠳᠠᠬᠤ ᠵᠢ ᠬᠡᠯᠡᠵᠦ᠂ ᠡᠷᠭᠦᠨ ᠲᠠᠷᠤᠬᠤ ᠭᠡᠵᠦ ᠨᠦᠭᠦᠭᠡ ᠡᠳᠡᠭᠡᠳ ᠵᠶ᠋ᠠᠨ ᠭᠡᠢ ᠡᠷᠭᠢᠭᠦᠯᠵᠦ ᠪᠠᠶ᠋ᠢᠭ᠋ᠠᠳ ᠲᠠᠷᠤᠨ ᠤᠨᠠᠭ᠋ᠠᠵᠤ ᠲᠠᠯᠤ ᠵᠢ᠎ᠨᠢ ᠰᠢᠷᠤᠶ᠋ᠢᠳᠠᠬᠤ ᠵᠢ； ᠲᠡᠭᠡᠭᠡᠳᠡᠨ ᠲᠠᠷᠤᠬᠤ ᠭᠡᠵᠦ ᠤᠷᠢᠳ ᠵᠶ᠋ᠠᠷ ᠨᠦᠭᠦᠭᠡ ᠡᠳᠡᠭᠡᠳ ᠵᠶ᠋ᠠᠨ ᠲᠡᠭᠡᠭᠡᠳᠡᠵᠦ᠂ ᠲᠡᠭᠡᠭᠡᠳᠡᠭᠰᠡᠨ ᠬᠦᠴᠦᠨ᠎ᠳᠡᠭᠡᠨ ᠲᠠᠷᠤᠨ ᠤᠨᠠᠭ᠋ᠠᠵᠤ ᠲᠠᠯᠤ ᠮᠦᠷᠦ ᠵᠢ᠎ᠨᠢ ᠰᠢᠷᠤᠶ᠋ᠢᠳᠠᠬᠤ ᠵᠢ ᠬᠡᠯᠡᠳᠡᠭ ᠪᠠᠶ᠋ᠢᠵᠠᠢ᠃ ᠬᠤᠶᠠᠷ ᠲᠠᠯᠤ ᠰᠢᠷᠤᠶ᠋ᠢᠳᠠᠬᠤ᠎ᠪᠠᠷ ᠪᠦᠬᠡ ᠵᠢᠨ ᠰᠢᠭᠦᠯᠳᠡ ᠪᠤᠯᠭ᠋ᠠᠳᠠᠭ ᠪᠠᠶ᠋ᠢᠭᠰᠠᠨ ᠤᠴᠢᠷ᠎ᠠᠴᠠ ᠬᠤᠶᠠᠷ ᠪᠦᠬᠡᠴᠢᠨ ᠠᠯᠢ ᠨᠢᠭᠡ᠎ᠪᠠᠨ ᠲᠡᠶ᠋ᠢᠮᠦ ᠠᠮᠠᠷᠬᠠᠨ ᠰᠢᠷᠤᠶ᠋ᠢᠳᠠᠵᠤ ᠡᠰᠡ ᠴᠢᠳᠠᠵᠤ᠂ ᠶᠡᠭᠡ ᠬᠡᠮᠵᠢᠶᠡᠨ᠎ᠤ ᠴᠠᠭ ᠪᠠ ᠬᠦᠴᠦ ᠵᠠᠷᠤᠴᠠᠭᠤᠯᠵᠤ ᠤᠷ᠎ᠠ ᠮᠡᠭᠡ ᠬᠡᠷᠡᠭᠰᠡᠳᠡᠭ ᠪᠠᠶ᠋ᠢᠵᠠᠢ᠃ ᠪᠦᠬᠡᠴᠦᠳ ᠬᠦᠮᠦᠨ ᠪᠤᠯᠭ᠋ᠠᠨ ᠨᠢᠭᠡ ᠤᠳᠠᠭ᠎ᠠ ᠪᠠᠷᠢᠯᠳᠤᠭ᠋ᠠᠳ ᠰᠢᠭᠦᠯᠳᠡ ᠭᠠᠷᠤᠨ᠎ᠠ᠂ ᠰᠢᠭᠦᠯᠳᠡ ᠵᠢᠨ ᠶᠡᠷᠦᠩᠭᠡᠢ ᠳ᠋ᠦᠩ ᠭᠠᠷᠤᠭᠰᠠᠭ᠋ᠠᠷ ᠪᠦᠬᠡ ᠵᠢᠨ ᠶᠡᠷᠦᠩᠬᠡᠢ ᠲᠠᠭ᠋ᠠᠭ᠋ᠠᠮᠠᠯ᠎ᠠᠴᠠ ᠨᠤᠶᠠᠨ᠎ᠤ ᠲᠠᠯ᠎ᠠ ᠵᠢᠨ ᠪᠦᠬᠡᠴᠢᠨ ᠮᠠᠩᠨᠠᠢ ᠵᠢᠨ ᠪᠦᠬᠡ ᠪᠤᠯᠪᠠ ᠭᠡᠬᠦ ᠪᠤᠶᠤ ᠯᠠᠮᠠ ᠵᠢᠨ ᠲᠠᠯ᠎ᠠ ᠵᠢᠨ ᠪᠦᠬᠡ ᠲᠡᠳ᠋ ᠪᠦᠬᠡ ᠪᠤᠯᠪᠠ ᠭᠡᠮᠡᠨ ᠤᠯᠠᠨ᠎ᠳᠤ ᠵᠠᠷᠯᠠᠵᠤ᠂ ᠲᠡᠷᠢᠭᠦᠨ ᠪᠦᠬᠡ ᠵᠢ ᠲᠡᠪᠡᠯ᠎ᠤᠨ ᠲᠤᠷᠭ᠎ᠠ᠂ ᠪᠦᠳᠦᠨ ᠴᠠᠢ ᠬᠠᠳᠠᠭ ᠵᠶ᠋ᠠᠷ ᠱᠠᠩᠨᠠᠵᠤ （ᠮᠤᠷᠢ᠎ᠪᠠᠷ ᠱᠠᠩᠨᠠᠬᠤ ᠲᠤᠬᠢᠶᠠᠯᠳᠤᠯ ᠴᠤ᠌ ᠪᠠᠶ᠋ᠢᠵᠠᠢ）᠂ ᠲᠡᠳ᠋ ᠪᠦᠬᠡ ᠵᠢ ᠲᠡᠪᠡᠯ᠎ᠤᠨ ᠴᠢᠰᠴᠠᠤ᠂ ᠲᠠᠯ᠎ᠠ ᠴᠠᠢ ᠬᠠᠳᠠᠭ᠎ᠲᠠᠢ ᠱᠠᠩᠨᠠᠵᠤ᠂ ᠪᠤᠰᠤᠳ ᠪᠦᠬᠡ ᠵᠢ ᠢᠵᠢᠯ ᠶᠠᠭᠤᠮ᠎ᠠ᠎ᠪᠠᠷ ᠱᠠᠩᠨᠠᠨ᠎ᠠ᠂ ᠲᠡᠭᠡᠬᠦ᠎ᠳᠡᠭᠡᠨ ᠬᠠᠷ᠎ᠠ ᠰᠢᠷ᠎ᠠ ᠵᠢᠨ ᠲᠠᠯ᠎ᠠ ᠠᠳᠠᠯᠢᠬᠠᠨ ᠵᠶ᠋ᠠᠷ ᠲᠠᠪᠬᠤᠷ ᠱᠠᠩ ᠦᠭᠳᠡᠭ ᠪᠠᠶ᠋ᠢᠵᠠᠢ᠃
    ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠤᠨ᠎ᠤ ᠡᠴᠦᠰ᠂ ᠬᠤᠷᠢᠳᠤᠭ᠋ᠠᠷ ᠵᠠᠭᠤᠨ᠎ᠤ ᠡᠬᠢ᠎ᠪᠠᠷ ᠨᠡᠯᠢᠶᠡᠳ ᠨᠡᠷᠡᠳᠡᠢ ᠪᠠᠷᠢᠯᠳᠤᠵᠤ ᠪᠠᠶ᠋ᠢᠭᠰᠠᠨ   ᠪᠦᠬᠡᠴᠢᠨ ᠎ᠳᠤ   ᠠᠮᠠᠨ᠋ᠧᠴᠢᠷ᠂ ᠪᠦᠳᠦᠭᠦᠨ   ᠭᠤᠩᠴᠤᠭ᠂ ᠪᠦᠳᠦᠭᠦᠨ   ᠭᠤᠩᠭᠤᠷ᠂ ᠵᠠᠮᠰᠦ᠋ᠷᠦᠩ        （ᠪᠠᠨᠳᠤ ᠵᠢᠨ ᠠᠪᠤ）᠂ ᠲᠠᠮᠳᠢᠨ （ᠭᠤᠩᠴᠤᠭᠯᠤᠳᠤᠢ ᠵᠢᠨ ᠠᠪᠤ）᠂ ᠨᠠᠮᠰᠠᠷᠠᠢ （ᠲᠠᠪᠤᠨᠠᠩ）᠂ ᠬᠠᠩᠬᠠᠷ ᠲᠤᠷᠵᠢ᠂ ᠲᠥᠵᠢᠩ᠂ ᠲᠡᠯᠢᠭᠳᠦᠷᠵᠢ᠂ ᠲᠦᠮᠡᠨᠪᠤᠷᠤ ᠨᠠᠷ ᠲᠡᠦᠬᠡᠨ ᠲᠡᠩᠰᠡᠨ᠎ᠡ ᠲᠡᠮᠳᠡᠭᠯᠡᠭᠳᠡᠬᠦ ᠶᠤᠰᠤ᠎ᠲᠠᠢ᠃ ᠲᠤᠷᠭᠤᠳ ᠪᠦᠬᠡ ᠵᠢ ᠬᠤᠷᠢᠳᠤᠭ᠋ᠠᠷ ᠵᠠᠭᠤᠨ᠎ᠤ ᠭᠤᠴᠢᠭ᠋ᠠᠳ ᠤᠨ ᠪᠤᠯᠳᠠᠯ᠎ᠠ ᠪᠠᠷᠢᠯᠳᠤᠵᠤ ᠪᠠᠶ᠋ᠢᠭ᠋ᠠᠳ ᠵᠠᠯᠭ᠋ᠠᠭ᠋ᠠᠳ ᠬᠠᠯᠬ᠎ᠠ ᠮᠠᠶᠢᠭ᠎ᠤᠨ ᠪᠦᠬᠡ᠎ᠪᠠᠷ ᠤᠷᠤᠯᠠᠭᠳᠠᠵᠤ᠂ ᠲᠤᠷᠭᠤᠳ ᠪᠦᠬᠡ ᠶᠠᠪᠤᠭ᠋ᠠᠨ᠎ᠳᠠᠭᠠᠨ ᠬᠠᠶᠠᠭᠳᠠᠵᠠᠢ᠃