ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠨᠣᠲᠠᠯᠠᠯᠲᠠ᠄ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ
ᠮᠢᠨᠨᠠ ᠨᠤᠳᠤᠭᠤᠴᠢᠨ ᠲᠡᠭᠦᠰᠪᠠᠶᠠᠷ ᠵᠣᠬᠢᠶᠠᠪᠠ
ᠰᠢᠯᠢ ᠵᠢᠨ ᠭᠣᠣᠯ ᠠᠢ᠌ᠮᠠᠭᠤᠨ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠳᠤ ᠠᠳᠠᠯᠢ ᠨᠡᠷᠡᠲᠠᠢ 《ᠵᠢᠭ᠋ᠠᠰᠤᠲᠠᠢ》 ᠭᠡᠭᠴᠢ ᠬᠣᠶᠠᠷ ᠨᠠᠭᠤᠷ ᠪᠠᠢ᠌ᠳᠠᠭ᠃ ᠮᠠᠨᠵᠤ ᠴᠢᠩ ᠤᠯᠤᠰᠤᠨ ᠦᠶᠡ ᠠᠴᠠ ᠡᠨᠡ ᠬᠤᠶᠠᠷ ᠨᠠᠭᠤᠷᠢ ᠢᠯᠭ᠋ᠠᠬᠤ ᠵᠢᠨ ᠲᠤᠯᠠᠲᠠ ᠭᠠᠵᠠᠷ ᠵᠦᠢ ᠵᠢᠨ ᠪᠠᠢ᠌ᠷᠢᠰᠢᠯ ᠵᠶ᠋ᠠᠷᠨᠢ ᠲᠡᠭᠡᠳᠦ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢ ᠬᠡᠮᠡᠨ ᠢᠯᠭ᠋ᠠᠪᠤᠷᠢᠯᠠᠨ ᠳᠠᠭᠤᠳᠠᠬᠰᠠᠭ᠋ᠠᠷ ᠢᠷᠡᠵᠡᠢ᠃ ᠲᠡᠷᠡᠨᠢ ᠮᠣᠩᠭᠤᠯᠴᠤᠳᠤᠨ ᠭᠠᠵᠠᠷ ᠵᠦᠢ ᠵᠢᠨ ᠪᠠᠢ᠌ᠷᠢᠰᠢᠯ ᠵᠶ᠋ᠠᠷ ᠬᠤᠢ᠌ᠳᠤ ᠵᠦᠭᠲᠤ ᠤᠷᠤᠰᠢᠬᠤ ᠭᠠᠵᠠᠷᠢ ᠳᠡᠭᠡᠳᠦ ᠬᠡᠮᠡᠵᠦ᠂ ᠡᠮᠦᠨᠡ ᠵᠦᠭᠲᠤ ᠤᠷᠤᠰᠢᠬᠤ ᠭᠠᠵᠠᠷᠢ ᠲᠤᠤᠷᠠᠳᠤ ᠬᠡᠮᠡᠳᠡᠭ ᠵᠠᠩ ᠳᠠᠳᠬᠠᠯᠠᠴᠠ ᠢᠷᠡᠯᠳᠡᠢ ᠶᠤᠮ᠃
ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢᠨᠢ ᠦᠨᠦ ᠵᠢᠨ ᠰᠢᠯᠢ ᠵᠢᠨ ᠭᠣᠣᠯ ᠠᠢ᠌ᠮᠠᠭᠤᠨ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠵᠢᠭ᠋ᠠᠰᠤᠲᠠᠢ ᠰᠤᠮᠤᠨᠤ ᠰᠤᠮᠤᠨ ᠲᠦᠪ ᠪᠠᠢ᠌ᠷᠢᠯᠠᠬᠤ ᠭᠠᠵᠠᠷ ᠲᠠᠷᠤᠢ ᠵᠡᠭᠦᠨ ᠤᠷᠲᠤᠷᠢᠭᠤᠨ 42 ° 56 ′᠂ ᠤᠮᠠᠷᠠᠳᠤ ᠦᠷᠭᠡᠷᠢᠭᠤᠨ115° 26′ᠳᠤ ᠪᠤᠢ᠃ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢᠨᠢ ᠦᠨᠦ ᠵᠢᠨ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠰᠠᠩᠤᠨ ᠳᠠᠯᠠᠢ ᠪᠠᠯᠭ᠋ᠠᠰᠤᠨᠤ ᠲᠠᠪᠤᠨ ᠣᠳᠣ ᠭᠠᠴᠠᠭ᠋ᠠᠨᠤ ᠵᠤᠰᠠᠯᠠᠩᠤᠨ ᠭᠠᠵᠠᠷ ᠲᠠᠷᠤᠢ ᠵᠡᠭᠦᠨ ᠤᠷᠲᠤᠷᠢᠭᠤᠨ 42 ° 61′᠂ ᠤᠮᠠᠷᠠᠳᠤ ᠦᠷᠭᠡᠷᠢᠭᠤᠨ116° 25′ᠳᠤ ᠪᠠᠢ᠌ᠷᠢᠰᠢᠵᠦ ᠪᠠᠢ᠌ᠳᠠᠭ᠃ ᠲᠤᠰ ᠬᠤᠶᠠᠷ ᠠᠳᠠᠯᠢᠬᠠᠨ ᠨᠡᠷᠡᠲᠡᠢ ᠨᠠᠭᠤᠷᠨᠢ ᠠᠯᠢ ᠡᠷᠲᠡᠨᠠᠴᠠ ᠨᠤᠲᠤᠭᠤᠨ ᠬᠦᠮᠦᠨ ᠮᠠᠯᠢ ᠤᠮᠳᠠᠯᠠᠨ ᠴᠡᠩᠬᠡᠷᠯᠡᠵᠦ᠂ ᠲᠤᠮᠤᠭ ᠲᠡᠦᠬᠡ ᠵᠢ ᠬᠠᠳᠠᠭ᠋ᠠᠯᠠᠬᠰᠠᠭ᠋ᠠᠷ ᠢᠷᠡᠭᠰᠡᠨ ᠪᠢᠯᠡ᠃
ᠨᠢᠭᠡ᠂ ᠲᠡᠭᠡᠳᠦ ᠵᠢᠭ᠋ᠠᠰᠤᠳᠠᠢ ᠨᠠᠭᠤᠷ ᠭᠡᠳᠡᠭᠤᠨ ᠲᠤᠬᠠᠢ
ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠢ ᠶᠡᠷᠦᠳᠡᠭᠡᠨ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠬᠡᠮᠡᠨ ᠪᠢᠴᠢᠵᠦ ᠲᠡᠮᠳᠡᠭᠯᠡᠭᠰᠡᠭᠡᠷ ᠢᠷᠡᠵᠡᠢ᠃ ᠬᠠᠷᠢᠨ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢᠠᠴᠠ ᠢᠯᠭ᠋ᠠᠬᠤ ᠵᠢᠨ ᠲᠤᠯᠠᠳᠠ ᠵᠠᠷᠢᠮᠳᠠᠭᠠᠨ ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠭᠡᠵᠦ ᠲᠡᠮᠳᠡᠭᠯᠡᠳᠡᠭ᠃ ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠨᠢ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤ ᠲᠥᠪᠯᠡᠨ ᠨᠤᠲᠤᠬᠯᠠᠵᠤ ᠪᠠᠢ᠌ᠬᠰᠠᠨ ᠭᠠᠵᠠᠷ ᠪᠠᠢ᠌ᠵᠠᠢ᠃ 《ᠲᠠᠢ᠌ᠴᠢᠩ ᠤᠯᠤᠰᠤᠨ ᠨᠢᠭᠡᠨ ᠵᠶ᠋ᠡᠷ ᠨᠡᠢ᠌ᠰᠯᠡᠭᠰᠡᠨ ᠤᠢ᠌ᠯᠠᠯᠭᠠ》ᠳᠤ᠄ 《ᠰᠢᠯᠤᠭᠤᠨ ᠬᠦᠬᠡ ᠵᠢᠨ ᠴᠠᠬᠠᠷᠤᠨ ᠨᠤᠲᠤᠬᠯᠠᠬᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ（扎哈蘇台泊） ᠠᠨᠤ ᠥᠷᠦᠭᠡᠰᠦᠨ ᠴᠢᠯᠠᠭᠤᠳᠤ ᠬᠠᠭ᠋ᠠᠯᠭᠠᠠᠴᠠ ᠵᠡᠭᠦᠨ ᠬᠤᠢ᠌ᠰᠢ ᠭᠤᠷᠪᠠᠨ ᠵᠠᠭᠤ ᠵᠢᠷᠠᠨ ᠭᠠᠵᠠᠷᠤᠨ ᠦᠵᠦᠭᠦᠷᠲᠤᠷ ᠠᠮᠤᠢ᠃ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠤᠶᠠᠷ ᠵᠠᠭᠤᠨ ᠵᠢᠷᠠᠨ ᠲᠠᠪᠤᠨ ᠭᠠᠵᠠᠷ᠂ ᠡᠮᠦᠨᠡᠰᠢ ᠤᠮᠠᠷᠠᠰᠢ ᠶᠡᠷᠡᠨ ᠲᠠᠪᠤᠨ ᠭᠠᠵᠠᠷ᠂ ᠵᠡᠭᠦᠨᠰᠢ ᠬᠡᠰᠢᠭᠳᠡᠨᠤ ᠵᠠᠭ᠋ᠠᠭ ᠵᠠᠭᠤ ᠶᠡᠷᠡᠨ ᠭᠠᠵᠠᠷ᠂ ᠪᠠᠷᠠᠭᠤᠨᠰᠢ ᠬᠦᠪᠡᠭᠡᠳᠦ ᠴᠠᠭ᠋ᠠᠨᠤ ᠴᠠᠬᠠᠷᠤᠨ ᠵᠠᠭ᠋ᠠᠭ ᠲᠠᠯᠠᠨ ᠲᠠᠪᠤᠨ ᠭᠠᠵᠠᠷ᠂ ᠡᠮᠦᠨᠡᠰᠢ ᠬᠠᠭ᠋ᠠᠨᠤ ᠠᠳᠤᠭᠤᠨ ᠰᠦᠷᠦᠭ ᠠᠯᠪᠠᠨᠤ ᠬᠤᠨᠢᠨ ᠰᠦᠷᠦᠭᠤᠨ ᠵᠠᠭ᠋ᠠᠭ ᠲᠤᠯᠲᠠᠯᠠ ᠭᠤᠴᠢᠨ ᠲᠠᠪᠤᠨ ᠭᠠᠵᠠᠷ᠂ ᠤᠮᠠᠷᠠᠰᠢ ᠠᠪᠠᠭᠠ ᠵᠡᠭᠦᠨ ᠭᠠᠷᠤᠨ ᠵᠠᠭ᠋ᠠᠭ ᠬᠦᠷᠲᠡᠯᠡ ᠵᠢᠷᠠᠨ ᠭᠠᠵᠠᠷ᠂ ᠵᠡᠭᠦᠨ ᠡᠮᠦᠨᠡᠰᠢ ᠬᠠᠭ᠋ᠠᠨᠤ ᠠᠳᠤᠭᠤᠨ ᠰᠦᠷᠦᠭᠤᠨ ᠵᠠᠭ᠋ᠠᠭ ᠲᠦᠴᠢᠨ ᠭᠠᠵᠠᠷ᠂ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠬᠦᠪᠡᠭᠡᠳᠦ ᠴᠠᠭ᠋ᠠᠨᠤ ᠴᠠᠬᠠᠷᠤᠨ ᠵᠠᠭ᠋ᠠᠭ ᠲᠠᠪᠢᠨ ᠭᠠᠵᠠᠷ᠂ ᠵᠡᠭᠦᠨ ᠬᠤᠢ᠌ᠰᠢ ᠠᠪᠠᠭᠠ ᠵᠡᠭᠦᠨ ᠭᠠᠷᠤᠨ ᠵᠠᠭ᠋ᠠᠭ ᠵᠠᠭᠤ ᠪᠦᠭᠡᠳ ᠬᠤᠶᠠᠷ ᠭᠠᠵᠠᠷ᠂ ᠪᠠᠷᠠᠭᠤᠨ ᠬᠤᠢ᠌ᠰᠢ ᠠᠪᠠᠭᠠ ᠪᠠᠷᠠᠭᠤᠨ ᠭᠠᠷᠤᠨ ᠵᠠᠭ᠋ᠠᠭ ᠲᠠᠪᠢᠨ ᠲᠠᠪᠤᠨ ᠭᠠᠵᠠᠷ᠂ ᠥᠷᠦᠭᠡᠰᠦᠨ ᠴᠢᠯᠠᠭᠤᠲᠤ ᠬᠠᠭ᠋ᠠᠯᠭᠠ ᠵᠢ ᠲᠠᠮᠵᠢᠵᠦ ᠨᠡᠢ᠌ᠰᠯᠡᠯ ᠬᠦᠷᠬᠦ ᠵᠠᠢᠨᠢ ᠨᠠᠢ᠍ᠮᠠᠨ ᠵᠠᠭᠤ ᠶᠡᠷᠡᠨ ᠭᠠᠵᠠᠷ》[1] ᠬᠡᠮᠡᠨ ᠲᠡᠮᠳᠡᠭᠯᠡᠵᠦ᠂ 《ᠪᠤᠭᠤᠮᠲᠠ ᠵᠢᠨ ᠭᠠᠳᠠᠨᠠᠬᠢ ᠭᠤᠷᠪᠠᠨ ᠲᠠᠩᠬᠢᠮᠤᠨ ᠤᠢ᠌ᠯᠠᠯᠭᠠ》ᠳᠤ᠄ 《ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠢ ᠦᠷᠦᠭᠡᠰᠦᠨ ᠴᠢᠯᠠᠭᠤᠳᠤ ᠬᠠᠭ᠋ᠠᠯᠭᠠᠠᠴᠠ ᠵᠡᠭᠦᠨ ᠬᠤᠢ᠌ᠰᠢ ᠭᠤᠷᠪᠠᠨ ᠵᠠᠭᠤ ᠵᠢᠷᠠᠨ ᠭᠠᠵᠠᠷᠲᠤ ᠠᠮᠤᠢ᠂ ᠨᠡᠢ᠌ᠲᠡ ᠵᠢᠨ ᠳᠠᠷᠤᠭᠠᠨᠢ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠲᠤ ᠰᠠᠭᠤᠮᠤᠢ᠃ （ᠬᠠᠮᠳᠤ ᠮᠠᠳᠡᠭᠴᠢ ᠵᠢᠨ ᠤᠭ ᠡᠷᠭᠦᠳᠡᠯ）ᠳᠤ ᠭᠦᠨ ᠪᠦᠷᠢᠳᠦ（昆布力圖）ᠳᠤ ᠰᠠᠭᠤᠮᠤᠢ᠂ ᠵᠡᠭᠦᠨᠰᠢ ᠬᠡᠰᠢᠭᠳᠡᠨᠤ ᠵᠠᠭ᠋ᠠᠭ ᠪᠣᠯᠬᠤ ᠵᠠᠯᠠᠭᠠ ᠨᠠᠷᠠᠰᠤᠲᠤ ᠬᠦᠷᠬᠦ ᠵᠠᠭᠤ ᠶᠡᠷᠡᠨ ᠭᠠᠵᠠᠷ᠂ ᠪᠠᠷᠠᠭᠤᠨᠰᠢ ᠬᠦᠪᠡᠭᠡᠳᠦ ᠴᠠᠭ᠋ᠠᠨᠤ ᠴᠠᠬᠠᠷᠤᠨ ᠵᠠᠭ᠋ᠠᠭ ᠪᠣᠯᠬᠤ ᠮᠤᠤ ᠬᠤᠵᠢᠷ ᠬᠦᠷᠬᠦ ᠳᠠᠯᠠᠨ ᠲᠠᠪᠤᠨ ᠭᠠᠵᠠᠷ᠂ ᠡᠮᠦᠨᠡᠰᠢ ᠰᠡᠨᠵᠢᠲᠦ ᠲᠠᠪᠠᠭᠠᠪᠠᠷ ᠰᠡᠨᠵᠢᠳᠦ （土城子） ᠬᠦᠷᠬᠦ ᠳᠠᠯᠠᠨ ᠭᠠᠵᠠᠷ᠂ ᠤᠮᠠᠷᠠᠰᠢ ᠠᠪᠠᠭᠠ ᠵᠡᠭᠦᠨ ᠭᠠᠷᠤᠨ ᠬᠤᠰᠢᠭᠤᠨᠤ ᠵᠠᠭ᠋ᠠᠭ ᠪᠤᠷᠤ ᠦᠨᠳᠦᠷ ᠬᠦᠷᠬᠦ ᠵᠢᠷᠠᠨ ᠭᠠᠵᠠᠷ᠂ ᠵᠡᠭᠦᠨ ᠡᠮᠦᠨᠡᠰᠢ ᠠᠪᠠ ᠵᠢᠨ ᠠᠭᠤᠯᠠ ᠵᠢᠨ ᠵᠠᠭ᠋ᠠᠭ ᠤᠯᠠᠭ᠋ᠠᠨ ᠬᠠᠭ᠋ᠠᠯᠭᠠ ᠬᠦᠷᠬᠦ ᠭᠠᠵᠠᠷᠨᠢ ᠲᠤᠳᠤ ᠦᠭᠡᠢ ᠁》 ᠬᠡᠮᠡᠨ ᠲᠡᠮᠳᠡᠭᠯᠡᠵᠦ ᠵᠠᠯᠭ᠋ᠠᠭ᠋ᠠᠳ ᠳᠣᠯᠣᠨᠨᠠᠭᠤᠷᠤᠨ ᠬᠠᠮᠳᠦ ᠮᠡᠳᠡᠭᠴᠢ ᠹᠦ᠋ ᠳ᠋ᠧ ᠵᠢᠨ ᠲᠤᠳᠤᠷᠬᠠᠢ᠌ᠯᠠᠨ ᠪᠠᠢ᠌ᠴᠠᠭ᠋ᠠᠬᠰᠠᠨ ᠠᠢ᠌ᠯᠠᠳᠬᠠᠯᠢ ᠳᠠᠭ᠋ᠠᠯᠳᠤᠭᠤᠯᠵᠠᠢ᠃ ᠡᠭᠦᠨᠳᠤ 《ᠲᠤᠰ ᠬᠤᠰᠢᠭᠤᠨᠤ ᠬᠢᠵᠠᠭ᠋ᠠᠷᠤᠨ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠠᠴᠠ ᠪᠠᠷᠠᠭᠤᠨᠰᠢ ᠠᠷᠪᠠᠨ ᠭᠠᠵᠠᠷᠲᠤ ᠬᠤᠶᠠᠷ ᠨᠠᠭᠤᠷ ᠪᠤᠢ ᠬᠤᠰᠢᠮᠠᠭ ᠨᠠᠭᠤᠷ ᠬᠡᠮᠡᠮᠦᠢ᠂ ᠬᠤᠰᠢᠮᠠᠭ ᠨᠠᠭᠤᠷᠠᠴᠠ ᠪᠠᠷᠠᠭᠤᠨᠰᠢ ᠠᠷᠪᠠᠨ ᠲᠠᠪᠤᠨ ᠭᠠᠵᠠᠷᠲᠤ ᠪᠠᠢ᠌ᠳᠤ ᠨᠠᠭᠤᠷ ᠠᠮᠤᠢ᠃ ᠪᠠᠢ᠌ᠳᠤ ᠨᠠᠭᠤᠷᠠᠴᠠ ᠪᠠᠷᠠᠭᠤᠨᠰᠢ ᠬᠤᠷᠢᠨ ᠭᠠᠵᠠᠷᠲᠤ ᠰᠠᠢ᠌ᠬᠠᠨ ᠨᠠᠭᠤᠷ ᠪᠠᠢ᠌ᠮᠤᠢ᠃ ᠰᠠᠢ᠌ᠬᠠᠨ ᠭᠡᠭᠴᠢᠨᠢ ᠭᠤᠶᠤ ᠭᠡᠰᠡᠨ ᠤᠳᠬᠠᠲᠠᠢ᠃ ᠰᠠᠢ᠌ᠬᠠᠨ ᠨᠠᠭᠤᠷᠠᠴᠠ ᠭᠤᠴᠢᠨ ᠭᠠᠵᠠᠷᠤᠨ ᠦᠵᠦᠭᠦᠷᠲᠤ ᠭᠤᠷᠪᠠᠨ ᠨᠠᠭᠤᠷ ᠪᠠᠢ᠌ᠮᠤᠢ᠂ ᠨᠡᠷᠡ ᠵᠢ ᠠᠨᠤ ᠪᠠᠶᠠᠨ ᠨᠠᠭᠤᠷ ᠬᠡᠮᠡᠮᠤᠢ᠃ ᠪᠠᠶᠠᠨ ᠨᠠᠭᠤᠷᠠᠴᠠ ᠪᠠᠷᠠᠭᠤᠨᠰᠢ ᠬᠤᠷᠢᠨ ᠭᠠᠵᠠᠷᠤᠨ ᠦᠵᠦᠭᠦᠷᠲᠤ ᠱᠦᠦᠲᠦ ᠨᠠᠭᠤᠷ ᠠᠮᠤᠢ᠃ ᠱᠦᠦᠲᠦ ᠨᠠᠭᠤᠷᠠᠴᠠ ᠵᠡᠭᠦᠨᠰᠢ ᠬᠤᠶᠠᠷ ᠨᠠᠭᠤᠷ ᠠᠮᠤᠢ ᠁》 ᠭᠡᠵᠦ ᠲᠡᠮᠳᠡᠭᠯᠡᠵᠡᠢ[2]᠃ᠡᠳᠡᠭᠡᠷ ᠲᠡᠮᠳᠡᠭᠯᠡᠯᠢ ᠪᠤᠳᠠᠲᠠᠢ ᠭᠠᠵᠠᠷ ᠵᠦᠢ ᠵᠢᠨ ᠪᠠᠢ᠌ᠷᠢᠰᠢᠯᠲᠠᠢ ᠬᠠᠷᠭᠤᠭᠤᠯᠵᠤ ᠦᠵᠡᠪᠡᠯ ᠡᠨᠡ ᠬᠦ᠌ ᠬᠤᠰᠢᠭᠤ ᠶᠠᠮᠤᠨ ᠪᠠᠢ᠌ᠬᠰᠠᠨ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠪᠣᠯ ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠪᠣᠯᠬᠤᠨᠢ ᠲᠤᠳᠤᠷᠬᠠᠢ ᠪᠢᠯᠡ᠃
ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠲᠤ ᠬᠤᠰᠢᠭᠤ ᠶᠠᠮᠤᠨ ᠪᠠᠢ᠌ᠬᠰᠠᠨᠠᠴᠠ ᠭᠠᠳᠠᠨᠠ ᠪᠠᠰᠠ ᠵᠢᠭ᠋ᠠᠰᠤᠲᠠᠢ ᠵᠢᠨ ᠰᠦᠮᠡ ᠪᠠᠢ᠌ᠬᠰᠠᠨ ᠶᠤᠮ᠃ ᠡᠨᠡ ᠲᠤᠬᠠᠢ ᠦᠵᠢᠶᠡᠳ᠂ ᠭ᠋ᠸᠩᠳᠦᠨ 《ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠰᠦᠮᠡ ᠬᠡᠢ᠌ᠳᠤᠨ ᠲᠤᠢ᠌ᠮᠦ》 ᠭᠡᠬᠦ ᠨᠤᠮᠳᠤ᠄ 《ᠭᠤᠷᠪᠠᠨ ᠲᠠᠯᠠ ᠵᠢᠨ ᠰᠦᠮᠡ ᠪᠣᠯ ᠤᠤᠯᠤᠨ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠲᠡᠷᠢᠭᠦᠨ᠂ ᠬᠤᠶᠠᠳᠤᠭ᠋ᠠᠷ ᠬᠤᠶᠠᠷ ᠰᠤᠮᠤᠨᠤ ᠰᠦᠮᠡ ᠪᠤᠯᠤᠨᠠ᠃ ᠡᠨᠡ ᠰᠦᠮᠡ ᠵᠢ ᠬᠤᠶᠠᠳᠤᠭ᠋ᠠᠷ ᠰᠣᠮᠤᠨᠤ ᠵᠡᠭᠦᠨ ᠲᠠᠯᠠ ᠵᠢᠨ ᠬᠦᠯ （ᠣᠳᠤ ᠵᠢᠨ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠰᠤᠮᠤᠨᠤ ᠪᠠᠶᠠᠠᠬᠠᠩᠭ᠋ᠠᠢ ᠭᠠᠴᠠᠭ᠋ᠠᠨᠤ ᠨᠢᠴᠠᠩ）ᠳᠤ ᠪᠠᠷᠢᠬᠰᠠᠨ ᠲᠤᠯᠠ ᠭᠠᠵᠠᠷ ᠣᠷᠤᠨᠤ ᠨᠡᠷᠡᠪᠠᠷ 〈ᠭᠤᠷᠪᠠᠨ ᠲᠠᠯᠠ ᠵᠢᠨ ᠰᠦᠮᠡ〉 ᠭᠡᠵᠦ ᠳᠠᠭᠤᠳᠠᠳᠠᠭ ᠪᠠ 〈ᠨᠠᠢ᠍ᠮᠠᠨ ᠬᠦᠷᠢᠶᠡ ᠰᠦᠮᠡ〉 ᠵᠢᠨ ᠳᠠᠩᠰᠠ᠂ ᠰᠤᠮᠤ᠂ ᠬᠤᠰᠢᠭᠤᠨᠤ ᠳᠠᠩᠰᠠᠨᠳᠤ ᠴᠦᠮ 〈ᠭᠤᠷᠪᠠᠨ ᠲᠠᠯᠠ ᠵᠢᠨ ᠰᠦᠮᠡ〉 ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠭᠡᠷ ᠢᠷᠡᠵᠡᠢ᠃ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠲᠤᠰ ᠬᠤᠶᠠᠷ ᠰᠣᠮᠤᠨᠤ ᠬᠦᠮᠦᠨ ᠠᠮᠠᠨᠢ ᠦᠰᠴᠦ᠂ ᠠᠢ᠌ᠯ ᠡᠷᠦᠬᠡᠨᠢ ᠤᠯᠠᠰᠢᠷᠠᠬᠰᠠᠨᠠᠴᠠ ᠲᠡᠷᠢᠭᠦᠨ ᠰᠣᠮᠤᠨᠠᠴᠠ ᠲᠠᠪᠤᠳᠤᠭ᠋ᠠᠷ ᠰᠤᠮᠤ᠂ ᠬᠤᠶᠠᠳᠤᠭ᠋ᠠᠷ ᠰᠣᠮᠤᠨᠠᠴᠠ ᠵᠢᠷᠭᠤᠳᠤᠭ᠋ᠠᠷ ᠰᠤᠮᠤ ᠰᠠᠯᠵᠤ ᠭᠠᠷᠤᠬᠰᠠᠨ ᠲᠤᠯᠠ ᠲᠤᠰ ᠰᠦᠮᠡᠨᠢ ᠠᠶᠠᠨᠳᠠᠭ᠋ᠠᠨ ᠲᠡᠷᠢᠭᠦᠨ᠂ ᠬᠤᠶᠠᠷ᠂ ᠲᠠᠪᠤ᠂ ᠵᠢᠷᠭᠤᠭᠠ ᠲᠦᠷᠪᠡᠨ ᠰᠤᠮᠤᠨᠤ ᠰᠦᠮᠡ ᠪᠣᠯᠵᠠᠢ᠃ ᠭᠤᠷᠪᠠᠨ ᠲᠠᠯᠠᠠᠴᠠ ᠰᠦᠮᠡᠪᠠᠨ ᠨᠡᠭᠦᠯᠭᠡᠵᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠤᠨ ᠵᠡᠭᠦᠨ ᠬᠤᠢ᠌ᠲᠦ ᠡᠬᠢᠨᠳᠤ ᠠᠪᠴᠢᠷᠠᠵᠤ ᠪᠠᠷᠢᠬᠰᠠᠨᠠᠴᠠ ᠬᠤᠢ᠌ᠰᠢ ᠰᠠᠶᠢ 〈ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠤᠨ ᠰᠦᠮᠡ〉 ᠭᠡᠵᠦ ᠳᠠᠭᠤᠳᠠᠵᠤ᠂ ᠲᠦᠭᠦᠮᠴᠢᠯᠡᠨ 〈ᠵᠢᠭ᠋ᠠᠰᠤᠲᠠᠢ ᠵᠢᠨ ᠰᠦᠮᠡ〉 ᠭᠡᠵᠦ ᠨᠡᠷᠡᠰᠢᠭᠰᠡᠨ ᠪᠠᠢ᠌ᠨᠠ》᠂ 《᠁ ᠡᠭᠦᠪᠡᠷ ᠲᠦᠯᠬᠢᠨ ᠪᠤᠳᠤᠪᠠᠯ ᠭᠤᠷᠪᠠᠨ ᠲᠠᠯᠠ ᠵᠢᠨ ᠰᠦᠮᠡ ᠵᠢ ᠳᠠᠢ᠌ᠴᠢᠩ ᠤᠯᠤᠰᠤᠨ ᠡᠩᠬᠡ ᠠᠮᠤᠭᠤᠯᠠᠩᠤᠨ ᠭᠤᠴᠢᠨ ᠭᠤᠷᠪᠠᠳᠤᠭ᠋ᠠᠷ ᠣᠨ ᠪᠤᠶᠤ ᠨᠡᠢ᠌ᠲᠡ ᠵᠢᠨ ᠣᠨ ᠲᠤᠭ᠋ᠠᠯᠠᠯᠤᠨ1694 ᠣᠨᠳᠤ ᠪᠠᠢ᠌ᠭᠤᠯᠤᠬᠰᠠᠨ ᠪᠠᠢ᠌ᠵᠤ ᠲᠠᠭ᠋ᠠᠷᠠᠨᠠ᠃ ᠡᠨᠡᠨᠢ ᠡᠩᠬᠡ ᠠᠮᠤᠭᠤᠯᠠᠩᠤᠨ ᠦᠶᠡᠳᠤ ᠪᠠᠢ᠌ᠭᠤᠯᠤᠬᠰᠠᠨ ᠭᠡᠳᠡᠭ ᠤᠯᠠᠮᠵᠢᠯᠠᠯ ᠶᠠᠷᠢᠶᠠᠲᠠᠢ ᠨᠡᠢ᠌ᠴᠡᠵᠦ ᠪᠠᠢ᠌ᠨᠠ᠃ ᠭᠤᠷᠪᠠᠨ ᠲᠠᠯᠠ ᠵᠢᠨ ᠰᠦᠮᠡ ᠵᠢᠨ ᠰᠦᠮᠡᠳᠤ ᠱᠸᠩᠽᠦ ᠬᠤᠸᠠᠩᠳᠢ ᠵᠢᠨ ᠰᠤᠶᠤᠷᠬᠠᠬᠰᠠᠨ ᠰᠦᠮᠡ ᠵᠢᠨ ᠡᠭᠦᠳᠡᠨᠤ ᠢᠯᠡᠷᠬᠡᠢ᠌ᠯᠡᠯ 〈ᠪᠢᠨᠲᠤ〉ᠨᠢ 〈ᠳ᠋ᠸᠴᠢᠩᠴᠤᠢ᠌ᠩᠬᠤᠷᠯᠢᠨ〉 ᠭᠡᠳᠡᠭ᠂ ᠡᠨᠡᠬᠦ ᠪᠢᠨᠳᠤ ᠵᠢ ᠮᠠᠨᠵᠤ᠂ ᠮᠤᠩᠭᠤᠯ᠂ ᠲᠦᠪᠡᠳ᠂ ᠬᠢᠲᠠᠳ ᠲᠦᠷᠪᠡᠨ ᠵᠦᠢ᠍ᠯᠤᠨ ᠦᠰᠦᠭ ᠵᠶ᠋ᠡᠷ ᠰᠡᠢ᠌ᠯᠪᠦᠷᠢᠯᠡᠨ᠂ ᠠᠯᠲᠠᠨ ᠨᠤᠨᠳᠠᠭ ᠵᠶ᠋ᠠᠷ ᠪᠤᠳᠤᠵᠤ ᠶᠢᠰᠤᠨ ᠯᠤᠤ ᠤᠷᠢᠶᠠᠬᠰᠠᠨ ᠬᠦᠷᠢᠶᠠ ᠰᠠᠷᠠᠪᠴᠢᠲᠠᠢ ᠪᠤᠰᠤᠭᠠ ᠲᠦᠷᠪᠡᠯᠵᠢᠨ ᠵᠢᠶᠠᠵᠠᠨᠳᠤ ᠬᠢᠵᠦ ᠰᠤᠬ᠍ᠴᠢᠨ ᠲᠤᠭ᠋ᠠᠩᠤᠨ ᠡᠭᠦᠳᠡᠨᠳᠤ ᠡᠯᠭᠦᠭᠰᠡᠨ ᠪᠠᠢ᠌ᠳᠠᠭ᠃ ᠮᠤᠩᠭᠤᠯ ᠵᠶ᠋ᠠᠷ 〈ᠶᠡᠬᠡ ᠠᠮᠤᠭᠤᠯᠠᠩᠳᠤ ᠨᠤᠮᠤᠨ ᠬᠦᠷᠢᠶᠠ ᠬᠡᠢ᠌ᠳ〉 ᠭᠡᠨᠡ᠃ ᠮᠠᠨᠵᠤ ᠬᠢᠲᠠᠳ ᠬᠤᠶᠠᠷ ᠨᠡᠷᠡᠢ᠌ᠳᠦᠯᠢᠨᠢ ᠮᠡᠳᠡᠬᠦ ᠬᠦᠮᠦᠨ ᠦᠭᠡᠢ ᠪᠣᠯᠵᠠᠢ ᠁》 [3] ᠭᠡᠵᠦ ᠲᠡᠮᠳᠡᠭᠯᠡᠵᠡᠢ᠃ ᠵᠢᠭ᠋ᠠᠰᠤᠲᠠᠢ ᠵᠢᠨ ᠰᠦᠮᠡᠨᠢ 1966 ᠤᠨᠳᠤ ᠲᠠᠮᠲᠤᠬᠯᠠᠬᠳᠠᠨ ᠰᠦᠢ᠍ᠳᠴᠦ᠂ ᠭᠠᠬ᠍ᠴᠠ ᠰᠣᠬ᠍ᠴᠢᠨ ᠲᠤᠭ᠋ᠠᠩ ᠦᠯᠡᠳᠡᠭᠡᠳ ᠪᠠᠢ᠌ᠬᠰᠠᠨᠢ 2014 ᠤᠨᠠᠴᠠ ᠡᠬᠢᠯᠡᠨ ᠵᠠᠰᠠᠵᠤ ᠰᠢᠨᠡᠳᠭᠡᠵᠦ᠂ 2015 ᠤᠨᠠᠴᠠ ᠬᠤᠷᠠᠯ ᠨᠤᠮ ᠵᠶ᠋ᠠᠨ ᠡᠬᠢᠯᠡᠭᠦᠯᠵᠡᠢ᠃
ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠨᠢ ᠡᠢ᠌ᠮᠦᠷᠬᠦᠦ ᠵᠠᠰᠠᠭ ᠵᠠᠬᠢᠷᠭ᠋ᠠᠨ ᠱᠠᠰᠢᠨ ᠨᠣᠮᠤᠨ ᠲᠦᠪ ᠤᠷᠤᠨ ᠪᠠᠢ᠌ᠬᠰᠠᠨ ᠪᠤᠯᠬᠤᠷ 1949 ᠤᠨᠳᠤ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠠᠷᠠᠳᠴᠢᠯᠠᠬᠰᠠᠨ ᠵᠠᠰᠠᠭᠤᠨ ᠣᠷᠳᠣᠨᠨᠢ ᠪᠦᠬᠦ ᠬᠤᠰᠢᠭᠤᠪᠠᠨ ᠭᠤᠷᠪᠠᠨ ᠬᠤᠯᠪᠤᠭ᠋ᠠᠳᠤ ᠰᠤᠮᠤ ᠪᠤᠯᠭ᠋ᠠᠨ ᠬᠤᠪᠢᠶᠠᠷᠢᠯᠠᠬᠤᠳᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠨᠢ ᠨᠢᠭᠡᠳᠦᠭᠡᠷ ᠬᠤᠯᠪᠤᠭ᠋ᠠᠳᠤ ᠰᠤᠮᠤ （ᠲᠡᠷᠢᠭᠦᠨ᠂ ᠬᠤᠶᠠᠷ ᠬᠤᠯᠪᠤᠭ᠋ᠠᠳᠤ ᠰᠤᠮᠤ） ᠪᠣᠯᠵᠤ᠂1950 ᠤᠨᠳᠤ ᠲᠡᠷᠢᠭᠦᠨ ᠰᠤᠮᠤ ᠪᠤᠯᠪᠠ᠃ 1954 ᠤᠨᠳᠤ ᠰᠤᠮᠤᠨᠤ ᠨᠡᠷᠡ ᠵᠢ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠰᠤᠮᠤ ᠭᠡᠵᠦ ᠨᠡᠷᠡᠯᠡᠪᠡ᠃ 1961 ᠣᠨᠳᠤ ᠨᠠᠷᠠᠳᠤ᠂ ᠵᠢᠭ᠋ᠠᠰᠤᠲᠠᠢ ᠬᠤᠶᠠᠷ ᠨᠢᠭᠡᠳᠦᠯ ᠰᠠᠯᠵᠤ᠂ ᠵᠢᠭ᠋ᠠᠰᠤᠲᠠᠢ ᠨᠢᠭᠡᠳᠦᠯᠤᠨ ᠲᠦᠪᠢ ᠵᠢᠭ᠋ᠠᠰᠤᠲᠠᠢ ᠰᠦᠮᠡ ᠳᠡᠭᠡᠷᠡ ᠪᠠᠢ᠌ᠭᠤᠯᠵᠠᠢ᠃ 2006 ᠤᠨᠳᠤ ᠰᠣᠮᠤ ᠪᠠᠯᠭ᠋ᠠᠰᠤ ᠵᠢ ᠴᠤᠮᠬᠠᠳᠬᠠᠬᠤᠳᠤ ᠵᠢᠭ᠋ᠠᠰᠤᠲᠠᠢ ᠰᠤᠮᠤ ᠵᠢ ᠨᠠᠷᠠᠳᠤ ᠰᠤᠮᠤᠨᠳᠤ ᠨᠡᠢ᠌ᠯᠡᠭᠦᠯᠵᠦ᠂ 2012 ᠣᠨᠳᠤ ᠲᠠᠬᠢᠨ ᠨᠠᠷᠠᠳᠤ ᠰᠤᠮᠤᠠᠴᠠ ᠰᠠᠯᠵᠤ ᠵᠠᠰᠠᠭ ᠵᠠᠬᠢᠷᠭᠠᠪᠠᠨ ᠰᠡᠷᠭᠦᠭᠡᠵᠡᠢ᠃
ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠨᠢ ᠮᠦᠨᠴᠤ ᠠᠯᠳᠠᠷᠳᠦ ᠰᠢᠯᠦᠭᠴᠢ ᠨᠠ᠊᠂ ᠰᠠᠢ᠌ᠨᠴᠤᠬᠳᠤ ᠵᠢᠨ ᠲᠦᠷᠦᠭᠰᠡᠨ ᠨᠤᠲᠤᠭ ᠪᠠᠢ᠌ᠵᠤ᠂ ᠶᠡᠬᠡ ᠰᠢᠯᠦᠭᠴᠢ ᠴᠦ᠍ ᠡᠨᠡ ᠬᠦ᠌ ᠡᠯᠡᠰᠦ ᠮᠠᠩᠬᠠᠨᠤ ᠡᠬᠡ ᠨᠤᠲᠤᠭᠤᠨ ᠵᠶ᠋ᠠᠨ ᠦᠵᠡᠮᠵᠢ ᠪᠦᠷᠢᠳᠦᠭᠰᠡᠨ ᠨᠠᠭᠤᠷ ᠵᠶ᠋ᠠᠨ ᠴᠦ᠍ ᠰᠢᠯᠦᠭᠯᠡᠨ ᠮᠠᠬᠳᠠᠵᠤ ᠠᠯᠳᠠᠷᠰᠢᠭᠤᠯᠤᠬᠰᠠᠨ ᠪᠢᠯᠡ᠃ ᠲᠡᠭᠦᠨᠤ 《ᠰᠢᠯᠤᠭᠤᠨ ᠬᠦᠬᠡ ᠵᠢᠨ ᠲᠡᠮᠳᠡᠭᠯᠡᠯ ᠰᠢᠯᠦᠭ》 ᠬᠡᠮᠡᠬᠦ ᠮᠦᠴᠡᠯᠭᠡ ᠰᠢᠯᠦᠭᠤᠨ 《ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ》 ᠬᠡᠬᠦ ᠰᠢᠯᠦᠭᠯᠡᠯᠤᠨ 《ᠵᠢᠭ᠋ᠠᠰᠤ》 ᠬᠡᠮᠡᠬᠦ ᠬᠡᠰᠡᠭᠲᠤ᠄
《 ᠮᠠᠨᠠᠨ ᠰᠤᠭᠤᠨᠠᠭᠯᠠᠭᠰᠠᠨ ᠬᠦᠪᠡᠭᠡ ᠵᠢᠨᠢ ᠬᠠᠷᠠᠪᠠᠯ
ᠮᠠᠩᠬᠠᠨ ᠭᠠᠵᠠᠷᠤᠨ ᠳᠠᠯᠠᠢ ᠬᠡᠮᠡᠷ᠃
ᠮᠡᠯᠡᠯᠵᠡᠨ ᠨᠡᠯᠦᠢ᠌ᠭᠰᠡᠨ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠪᠤᠯ
ᠮᠡᠳᠡᠭᠡᠵᠢ ᠨᠡᠷᠡᠲᠡᠢ ᠰᠠᠢ᠌ᠬᠠᠨ ᠭᠠᠵᠠᠷ᠃
ᠮᠦᠷᠡᠨ ᠳᠠᠯᠠᠢ ᠵᠢᠨ ᠪᠠᠶᠠᠯᠢᠭ ᠵᠢᠭ᠋ᠠᠰᠤ ᠵᠢ
ᠮᠦᠯᠢᠭᠡᠷ ᠴᠡᠭᠡᠯᠳᠡᠭᠡᠨ ᠬᠠᠳᠠᠭ᠋ᠠᠯᠠᠬᠰᠠᠨ ᠨᠠᠭᠤᠷ᠃
ᠮᠦᠩᠭᠡ ᠤᠨᠳᠤᠷᠤᠯᠳᠤ ᠬᠠᠯᠢᠮᠠᠭ ᠤᠰᠤ ᠵᠢᠨᠢ
ᠮᠦᠩᠭᠦᠨ ᠲᠡᠮᠡᠭᠡᠪᠠᠷ ᠬᠠᠰᠢᠬᠰᠠᠨ ᠭᠠᠵᠠᠷ》
《ᠦᠵᠡᠮᠵᠢ》 ᠭᠡᠬᠦ ᠬᠡᠰᠡᠭᠲᠤ᠄
《ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠤᠨ ᠤᠰᠤᠨ ᠳᠡᠭᠡᠭᠦᠷ
ᠵᠠᠪᠢᠨᠳᠤ ᠰᠠᠭᠤᠭ᠋ᠠᠳ ᠵᠤᠭ᠋ᠠᠯᠠᠵᠤ ᠦᠵᠡ
ᠵᠢᠶᠠᠩᠨᠠᠨ ᠭᠠᠵᠠᠷᠤᠨ ᠵᠢᠷᠤᠬᠰᠠᠨ ᠦᠵᠡᠮᠵᠢ
ᠵᠠᠪᠠᠯ ᠨᠢᠳᠤᠨᠳᠤ ᠴᠢᠨᠢ ᠲᠤᠰᠬᠠᠬᠳᠠᠨ ᠤᠷᠤᠨᠠ
᠁
ᠪᠤᠬᠠ ᠰᠢᠪᠠᠭᠤ ᠮᠦᠭᠡᠷᠡᠨ ᠲᠤᠩᠭᠤᠳᠤᠬᠰᠠᠨ
ᠲᠦᠭᠦᠷᠢᠭ ᠪᠤᠯᠠᠭᠤᠨ ᠤᠰᠤᠨᠢ ᠴᠡᠯᠡᠭᠡᠷ
ᠪᠤᠳᠠᠭ᠋ᠠᠨ ᠰᠢᠷᠠ ᠵᠢᠨ ᠡᠩᠭᠡᠷ ᠲᠤᠯᠤᠬᠰᠠᠨ
ᠪᠠᠷᠠᠭᠤᠨ ᠨᠠᠭᠤᠷᠤᠨ ᠵᠠᠮᠠᠭᠨᠢ ᠨᠤᠭᠤᠭ᠋ᠠᠨ》[4] ᠬᠡᠮᠡᠨ ᠲᠡᠦᠬᠡ ᠳᠤᠮᠤᠭᠲᠠᠢᠨᠢ ᠬᠦᠦᠷᠨᠢᠨ ᠮᠠᠬᠲᠠᠵᠠᠢ᠃
ᠲᠡᠭᠡᠬᠦᠯᠡᠷ ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢᠨᠢ ᠡᠢ᠌ᠮᠦᠷᠬᠦᠦ ᠰᠤᠶᠤᠯ ᠲᠡᠦᠬᠡ ᠵᠢᠨ ᠤᠯᠪᠠᠭᠠᠲᠠᠢ ᠪᠦᠭᠡᠳ ᠤᠳᠤ ᠴᠤ᠌ ᠵᠢᠭ᠋ᠠᠰᠤᠲᠠᠢ ᠰᠤᠮᠤᠨᠤ ᠰᠤᠮᠤᠨ ᠲᠦᠪ ᠪᠤᠯᠵᠤ ᠪᠠᠢ᠌ᠭᠠ ᠴᠢᠬᠤᠯᠠ ᠭᠠᠵᠠᠷ ᠪᠢᠯᠡ᠃
ᠬᠣᠶᠠᠷ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠳᠠᠢ ᠨᠠᠭᠤᠷ ᠭᠡᠳᠡᠭᠤᠨ ᠲᠤᠬᠠᠢ
ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠢ ᠴᠦ᠍ ᠶᠡᠷᠦ ᠵᠢᠨ ᠪᠠᠢ᠌ᠳᠠᠯᠳᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠬᠡᠮᠡᠨ ᠳᠠᠭᠤᠳᠠᠵᠤ᠂ ᠲᠡᠭᠡᠳᠦ ᠵᠢᠭ᠋ᠠᠰᠤᠲᠠᠢᠠᠴᠠ ᠢᠯᠭ᠋ᠠᠪᠤᠷᠢᠯᠠᠬᠤ ᠵᠢᠨ ᠲᠦᠯᠦᠭᠡ ᠲᠤᠤᠷᠠᠳᠦ ᠵᠢᠭ᠋ᠠᠰᠤᠲᠠᠢ ᠬᠡᠮᠡᠨ ᠲᠡᠮᠳᠡᠭᠯᠡᠨ ᠨᠡᠷᠡᠯᠡᠳᠡᠭ᠃ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠨᠢ ᠴᠦ᠍ ᠤᠮᠠᠷᠠᠳᠤ ᠶᠤᠸᠠᠨ ᠤᠯᠤᠰᠤᠨ ᠰᠡᠭᠦᠯᠴᠢ ᠵᠢᠨ ᠦᠶᠡ ᠵᠢᠨ ᠬᠠᠷᠠᠴᠢᠨ ᠲᠦᠮᠡᠨᠤ ᠭᠤᠤᠯ ᠨᠤᠲᠤᠭᠤᠨ ᠨᠢᠭᠡ ᠪᠠᠢ᠌ᠵᠤ᠂ ᠡᠨᠳᠡ ᠬᠠᠷᠠᠴᠢᠨᠢ ᠨᠤᠶᠠᠯᠠᠬ᠍ᠴᠢ ᠪᠠᠶᠠᠰᠬᠠᠯ ᠬᠦᠨᠳᠡᠯᠡᠨ ᠬᠠᠭ᠋ᠠᠨ ᠵᠢᠴᠢ ᠲᠡᠭᠦᠨᠤ ᠠᠬᠠᠮᠠᠳ ᠬᠦᠪᠡᠭᠦᠨ ᠪᠠᠢ᠌ᠰᠠᠩᠬᠤᠷ ᠦᠢ᠍ᠵᠠᠩ 〈黄把都儿〉᠂ ᠤᠳᠠᠭ᠋ᠠᠬᠢ ᠬᠦᠪᠡᠭᠦᠨ ᠠᠢ᠌ᠰᠠᠩᠬᠤᠷ ᠴᠢᠩ ᠪᠠᠭ᠋ᠠᠳᠤᠷ （青把都儿）᠂ ᠪᠠᠢ᠌ᠰᠠᠩᠬᠤᠷᠤᠨ ᠬᠦᠪᠡᠭᠦᠨ ᠪᠠᠢ᠌ᠬᠤᠨᠳᠠᠢ （白洪大）᠂ ᠪᠠᠢ᠌ᠬᠤᠨᠳᠠᠢ ᠵᠢᠨ ᠬᠦᠪᠡᠭᠦᠨ ᠯᠠᠰᠬᠢᠪ （打利） ᠲᠠᠢ᠌ᠵᠢ ᠨᠠᠷ ᠨᠤᠲᠤᠬᠯᠠᠵᠤ ᠪᠠᠢ᠌ᠪᠠ᠃
ᠲᠡᠭᠡᠷᠡ ᠵᠠᠭᠤᠨᠤ ᠶᠡᠷᠡᠭᠡᠳ ᠣᠨᠠᠴᠠ ᠬᠦᠮᠦᠰ ᠠᠵᠢᠯᠤᠨ ᠴᠢᠯᠦᠭᠡᠪᠠᠷ ᠰᠠᠯᠬᠢ ᠦᠵᠡᠬᠦ ᠵᠢᠨ ᠲᠦᠯᠦᠭᠡ ᠵᠤᠨᠤ ᠳᠡᠯᠭᠡᠷ ᠴᠠᠭᠲᠤ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠪᠡ ᠬᠡᠢ᠌ᠪᠤᠩ ᠭᠤᠤᠯᠤᠨ ᠵᠤᠰᠠᠯᠠᠩ ᠵᠡᠷᠭᠡ ᠭᠠᠵᠠᠷ ᠵᠶ᠋ᠠᠷ ᠪᠠᠢ᠌ᠩᠭᠤ ᠵᠤᠭ᠋ᠠᠯᠠᠳᠠᠭ ᠪᠣᠯᠪᠠ᠃ ᠡᠨᠡ ᠦᠶᠡᠰᠲᠤ ᠬᠦᠮᠦᠰ ᠵᠢᠭ᠋ᠠᠰᠤᠲᠠᠢ ᠰᠣᠮᠤᠨᠤ ᠵᠢᠭ᠋ᠠᠰᠤᠲᠠᠢ ᠪᠡ ᠲᠠᠪᠤᠨ ᠤᠳᠤ ᠭᠠᠴᠠᠭᠠ ᠵᠢᠨ ᠵᠤᠰᠠᠯᠠᠩ ᠵᠢᠭ᠋ᠠᠰᠤᠲᠠᠢ ᠵᠢ ᠢᠯᠭ᠋ᠠᠬᠤ ᠵᠢᠨ ᠲᠤᠯᠠᠲᠠ 《ᠶᠡᠬᠡ᠂ ᠪᠠᠭᠠ》 ᠵᠢᠭ᠋ᠠᠰᠤᠲᠠᠢ ᠬᠡᠮᠡᠨ ᠢᠯᠭ᠋ᠠᠪᠤᠷᠢᠯᠠᠨ ᠬᠡᠯᠡᠳᠡᠭ ᠪᠣᠯᠵᠠᠢ᠃ ᠢᠩᠭᠢᠭᠡᠳ ᠲᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢ ᠵᠢᠨ ᠨᠡᠷᠡᠨᠢ 《ᠪᠠᠭᠠ ᠵᠢᠭ᠋ᠠᠰᠤᠲᠠᠢ》 ᠬᠡᠮᠡᠨ ᠨᠡᠷᠡᠯᠡᠭᠳᠡᠬᠦ ᠪᠣᠯᠵᠤ᠂ ᠤᠯᠠᠮ ᠵᠶ᠋ᠠᠷ ᠬᠢᠲᠠᠳ ᠮᠤᠩᠭᠤᠯ ᠬᠤᠯᠢᠬᠰᠠᠨ ᠨᠡᠷᠡ 《ᠰᠢᠶᠤᠤ ᠵᠢᠭ᠋ᠠᠰᠤᠲᠠᠢ》 ᠬᠡᠮᠡᠭᠳᠡᠬᠦ ᠪᠣᠯᠪᠠ᠃
ᠲᠡᠷᠡᠴᠢᠯᠡᠨ 2009 ᠣᠨᠳᠤ ᠭᠠᠳᠠᠨᠠ ᠵᠢᠨ ᠺᠣᠮᠫᠠᠨᠢ ᠲᠤᠰ ᠭᠠᠵᠠᠷᠲᠤ 《ᠱᠠᠩᠳᠤ ᠨᠠᠭᠤᠷ ᠵᠢᠭᠤᠯᠴᠢᠯᠠᠯᠤᠨ ᠮᠠᠯᠵᠢᠯᠤᠨ ᠲᠠᠯᠠᠪᠠᠢ （上都湖旅游牧场）》 ᠬᠡᠮᠡᠭᠴᠢ ᠵᠢ ᠪᠠᠢ᠌ᠭᠤᠯᠵᠤ ᠠᠶᠠᠯᠠᠯ ᠵᠢᠭᠤᠯᠴᠢᠯᠠᠯᠤᠨ ᠦᠢ᠍ᠯᠡᠰ ᠡᠵᠡᠩᠨᠡᠭᠰᠡᠨᠠᠴᠠ ᠲ᠋ᠤᠤᠷᠠᠳᠤ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠢ 《上都湖 》 ᠪᠠᠷ ᠥᠬᠡᠷᠡᠴᠢᠯᠡᠨ ᠨᠡᠷᠡᠯᠡᠵᠦ᠂ ᠴᠢᠨᠠᠬᠰᠢᠯᠠᠭ᠋ᠠᠳ ᠪᠠᠢ ᠳ᠋ᠦ᠋ ᠰᠦᠯᠵᠢᠶᠡᠨ （百度网） ᠲᠡᠭᠡᠷᠡ ᠴᠤ᠌ ᠱᠠᠩᠳᠤ ᠨᠠᠭᠤᠷ （上都湖） ᠬᠡᠮᠡᠨ ᠲᠠᠰᠢᠶᠠᠷᠠᠬᠤ ᠪᠣᠯᠪᠠ᠃
ᠭᠤᠷᠪᠠ᠂ ᠳᠦᠷᠢᠮᠵᠢᠭᠦᠯᠦᠨ ᠪᠢᠴᠢᠬᠦ ᠰᠠᠨᠠᠭᠤᠯᠭᠠ
《ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠪᠢᠴᠢᠯᠭᠡ᠂ ᠭᠠᠯᠢᠭᠨᠢ ᠴᠢᠩᠭᠠ ᠨᠢᠮᠪᠠᠢ ᠤᠯᠤᠰ ᠲᠦᠷᠦᠴᠢ ᠴᠢᠨᠠᠷᠲᠠᠢ᠃ ᠲᠡᠷᠡᠨᠢ ᠲᠥᠷᠥ ᠵᠢᠨ ᠡᠷᠬᠡ ᠮᠡᠳᠡᠯ ᠪᠠ ᠨᠡᠷᠡ ᠬᠦᠨᠳᠦ᠂ ᠦᠨᠳᠦᠰᠦᠲᠡᠨᠤ ᠲᠥᠷᠥ ᠵᠢᠨ ᠪᠣᠳᠣᠯᠭᠠᠲᠠᠢ ᠬᠣᠯᠪᠤᠭᠳᠠᠵᠤ᠂ ᠬᠠᠤᠯᠢ ᠶᠣᠰᠤᠭ᠋ᠠᠷ ᠳᠥᠷᠢᠮᠵᠢᠬᠦᠯᠬᠦ ᠬᠡᠷᠡᠭᠳᠡᠢ》 [6]᠃
ᠰᠢᠯᠢ ᠵᠢᠨ ᠭᠣᠣᠯ ᠠᠢ᠌ᠮᠠᠭᠤᠨ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠳᠤ ᠠᠳᠠᠯᠢ ᠨᠡᠷᠡᠲᠠᠢ 《ᠵᠢᠭ᠋ᠠᠰᠤᠲᠠᠢ》 ᠨᠠᠭᠤᠷᠢ ᠮᠠᠨᠵᠤ ᠴᠢᠩ ᠤᠯᠤᠰᠤᠨ ᠦᠶᠡ ᠠᠴᠠ 《ᠲᠡᠭᠡᠳᠦ ᠂ ᠲᠤᠤᠷᠠᠳᠤ 》 ᠵᠢᠭ᠋ᠠᠰᠤᠲᠠᠢ ᠬᠡᠮᠡᠨ ᠢᠯᠭ᠋ᠠᠪᠤᠷᠢᠯᠠᠨ ᠳᠠᠭᠤᠳᠠᠬᠰᠠᠭ᠋ᠠᠷ ᠢᠷᠡᠭᠰᠡᠨ ᠵᠶ᠋ᠡᠨ ᠲᠡᠭᠡᠷᠡ ᠵᠠᠭᠤᠨᠤ ᠶᠡᠷᠡᠭᠡᠳ ᠣᠨᠠᠴᠠ 《ᠶᠡᠬᠡ᠂ ᠪᠠᠭᠠ》 ᠵᠢᠭ᠋ᠠᠰᠤᠲᠠᠢ ᠬᠡᠮᠡᠨ ᠢᠯᠭ᠋ᠠᠪᠤᠷᠢᠯᠠᠨ ᠬᠡᠯᠡᠳᠡᠭ ᠪᠣᠯᠵᠤ᠂ ᠡᠭᠦᠨᠤ ᠤᠯᠠᠮ ᠵᠶ᠋ᠠᠷ ᠬᠢᠲᠠᠳ ᠮᠤᠩᠭᠤᠯ ᠬᠤᠯᠢᠬᠰᠠᠨ ᠨᠡᠷᠡ 《ᠳ᠋ᠠ ᠂ ᠰᠢᠶᠤᠤ》 ᠵᠢᠭ᠋ᠠᠰᠤᠲᠠᠢ ᠬᠡᠮᠡᠭᠳᠡᠬᠦ ᠪᠣᠯᠪᠠ᠃
ᠲᠤᠰ ᠬᠣᠶᠠᠷ ᠠᠳᠠᠯᠢ ᠨᠡᠷᠡᠲᠦ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷᠢ ᠠᠵᠢᠪᠠᠯ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠳᠦᠷᠢᠮᠵᠢᠯ ᠪᠠᠷᠢᠮᠵᠢᠶᠠᠵᠢᠯᠤᠨ ᠬᠣᠪᠢᠳᠤ᠂ ᠨᠢᠭᠡ ᠨᠡᠷᠡ ᠣᠯᠠᠨ ᠬᠤᠪᠢᠯᠪᠤᠷᠢᠲᠠᠢ ᠪᠣᠯᠤᠬᠰᠠᠨ᠂ ᠣᠯᠠᠨ ᠬᠤᠪᠢᠯᠪᠤᠷᠢ ᠨᠡᠷᠡ ᠵᠢ ᠨᠢᠭᠡ ᠨᠡᠷᠡᠳᠤ ᠳᠦᠷᠢᠮᠵᠢᠭᠦᠯᠦᠨ ᠲ᠋ᠡᠮᠳᠡᠭᠯᠡᠬᠦ ᠪᠠ ᠮᠣᠩᠭᠣᠯ ᠬᠢᠲᠠᠳ ᠦᠰᠦᠭ ᠵᠶ᠋ᠡᠷ ᠠᠯᠪᠠᠨ ᠶᠣᠰᠤᠭ᠋ᠠᠷ ᠬᠡᠷᠬᠢᠨ ᠲᠡᠮᠳᠡᠭᠯᠡᠪᠡᠯ ᠵᠣᠬᠢᠬᠤ ᠵᠡᠷᠬᠡ ᠠᠰᠠᠭᠤᠳᠠᠯ ᠬᠣᠯᠪᠤᠬᠳᠠᠨᠠ᠃ ᠡᠨᠡ ᠲᠣᠬᠠᠢ ᠬᠠᠮᠢᠶᠠ ᠪᠦᠬᠦᠢ ᠬᠠᠤᠯᠢ ᠳᠦᠷᠢᠮᠠᠴᠠ ᠬᠠᠢ᠌ᠪᠠᠯ ᠄
1986 ᠣᠨᠤ 《ᠪᠥᠬᠦᠲᠡ ᠨᠠᠢ᠌ᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰᠤᠨ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠬᠠᠮᠢᠶᠠᠷᠤᠯᠲᠠ ᠵᠢᠨ ᠳᠦᠷᠢᠮ》ᠤᠨ ᠲᠠᠪᠤᠳᠤᠭ᠋ᠠᠷ ᠵᠤᠷᠪᠤᠰᠤᠨ ᠭᠤᠷᠪᠠᠳᠤᠭ᠋ᠠᠷ ᠵᠦᠢ᠍ᠯ ᠳᠤ 《ᠨᠢᠭᠡ ᠭᠠᠵᠠᠷ ᠣᠯᠠᠨ ᠨᠡᠷᠡᠲᠠᠢ ᠪᠤᠶᠤ ᠨᠢᠭᠡᠡ ᠨᠡᠷᠡ ᠵᠢ ᠣᠯᠠᠨ ᠶᠠᠩᠵᠤᠪᠠᠷ ᠪᠢᠴᠢᠪᠡᠯ᠂ ᠨᠢᠭᠡᠳᠦᠯᠲᠡᠢ ᠨᠡᠷᠡ ᠪᠠ ᠦᠰᠦᠭᠢ ᠬᠡᠷᠡᠭᠯᠡᠨᠡ》 [7] ᠭᠡᠵᠦ ᠲᠣᠭᠲᠠᠭ᠋ᠠᠪᠠ᠃
1996 ᠣᠨᠤ 《ᠪᠦᠭᠦᠲᠡ ᠨᠠᠢ᠌ᠷᠠᠮᠳᠠᠬᠤ ᠲᠤᠮᠳᠠᠳᠤ ᠠᠷᠠᠳ ᠤᠯᠤᠰᠤᠨ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠬᠠᠮᠢᠶᠠᠷᠤᠯᠲᠠ ᠵᠢᠨ ᠳᠥᠷᠢᠮᠤᠨ ᠨᠠᠷᠢᠨ ᠬᠡᠷᠡᠭᠵᠢᠭᠦᠯᠬᠦ ᠳᠦᠷᠢᠮ》ᠤᠨ ᠭᠤᠷᠪᠠᠳᠤᠭ᠋ᠠᠷ ᠪᠦᠯᠦᠭ 《ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠪᠠᠷᠢᠮᠵᠢᠶᠠᠳᠤ ᠰᠢᠢ᠍ᠳᠪᠦᠷᠢᠯᠡᠯᠲᠡ》 ᠵᠢᠨ ᠠᠷᠪᠠᠨ ᠲᠣᠯᠤᠳᠤᠭ᠋ᠠᠷ ᠵᠤᠷᠪᠤᠰᠤᠨ ᠨᠢᠭᠡᠳᠦᠬᠡᠷ ᠵᠦᠢ᠍ᠯᠳᠤ 《ᠴᠦᠬᠡᠨ ᠲᠣᠭ᠋ᠠᠲᠤ ᠦᠨᠳᠦᠰᠦᠲᠡᠨᠤ ᠭᠠᠵᠠᠷᠤᠨ ᠨᠡᠷᠡ ᠵᠢ ᠡᠯᠡ ᠦᠨᠳᠦᠰᠦᠲᠡᠨᠤ ᠦᠭᠡ ᠬᠡᠯᠡ᠂ ᠦᠰᠦᠭ ᠪᠢᠴᠢᠭᠤᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠪᠠᠷᠢᠮᠵᠢᠶᠠ （ᠨᠡᠢ᠌ᠲᠡ ᠵᠢᠨ） ᠠᠪᠢᠶᠠᠯᠠᠭᠠ ᠵᠢ ᠦᠨᠳᠦᠰᠦᠯᠡᠵᠦ᠂ ᠬᠢᠲᠠᠳ ᠬᠡᠯᠡᠨᠤ ᠨᠡᠢ᠌ᠲᠡ ᠵᠢᠨ ᠠᠪᠢᠶᠠᠪᠠᠷ ᠬᠦᠷᠪᠡᠭᠦᠯᠦᠨ ᠪᠠᠭᠤᠯᠭ᠋ᠠᠨᠠ᠃ ᠨᠢᠭᠡᠨᠲᠡ ᠵᠠᠩᠰᠢᠬᠰᠠᠨ ᠬᠢᠲᠠᠳ ᠦᠰᠦᠭᠤᠨ ᠠᠪᠢᠶᠠᠯᠠᠭᠠ ᠵᠢᠨ ᠨᠡᠷᠡ ᠵᠢ ᠬᠣᠪᠢᠷᠠᠭᠤᠯᠬᠤ ᠦᠭᠡᠢ》 [8] ᠭᠡᠵᠦ ᠲᠣᠭᠳᠠᠭ᠋ᠠᠪᠠ᠃
2014 ᠣᠨᠤ 《ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠬᠠᠮᠢᠶᠠᠷᠤᠯᠲᠠ ᠵᠢᠨ ᠳᠦᠷᠢᠮ》ᠳᠠᠬᠢ ᠬᠣᠶᠠᠳᠤᠭ᠋ᠠᠷ ᠪᠦᠯᠦᠭ 《ᠭᠠᠵᠠᠷᠤᠨ ᠨᠡᠷᠡ ᠵᠢ ᠨᠡᠷᠡᠢ᠌ᠳᠬᠦ᠂ ᠰᠣᠯᠢᠬᠤ ᠪᠠ ᠬᠠᠰᠤᠬᠤ》 ᠵᠢᠨ ᠨᠠᠢ᠍ᠮᠠᠳᠤᠭ᠋ᠠᠷ ᠵᠤᠷᠪᠤᠰᠲᠤ ᠭᠠᠵᠠᠷᠤᠨ ᠨᠡᠷᠡ ᠵᠢ ᠨᠡᠷᠡᠢ᠌ᠳᠬᠦ᠂ ᠰᠣᠯᠢᠬᠤ ᠪᠠ ᠬᠠᠰᠤᠬᠤᠳᠤ ᠲᠣᠣᠷᠠᠬᠢ ᠮᠡᠲᠦ ᠵᠠᠷᠴᠢᠮᠢ ᠦᠨᠳᠦᠰᠦᠯᠡᠨᠠ᠂ ᠲᠤᠬᠠᠢ᠌ᠯᠠᠪᠠᠯ 《ᠨᠢᠭᠡᠳᠤ᠂ ᠤᠯᠤᠰᠤᠨ ᠨᠢᠬᠡᠳᠦᠯ ᠪᠠ ᠨᠤᠲᠤᠭ ᠲᠡᠪᠢᠰᠬᠡᠷᠤᠨ ᠪᠦᠷᠢᠨ ᠪᠦᠳᠦᠨ ᠪᠠᠢ᠌ᠬᠤᠳᠤ ᠠᠰᠢᠬᠳᠠᠢ ᠪᠠᠢ᠌ᠬᠤ᠃ ᠬᠣᠶᠠᠷᠲᠤ᠂ ᠦᠨᠳᠦᠰᠦᠲᠡᠨᠤ ᠪᠦᠯᠬᠦᠮᠳᠡᠯ ᠪᠠ ᠨᠡᠢ᠌ᠭᠡᠮᠤᠨ ᠡᠶᠡ ᠵᠣᠬᠢᠴᠠᠯᠢ ᠬᠠᠮᠠᠭ᠋ᠠᠯᠠᠬᠤᠳᠤ ᠠᠰᠢᠬᠳᠠᠢ ᠪᠠᠢ᠌ᠬᠤ᠃ ᠭᠤᠷᠪᠠᠳᠤ᠂ ᠲᠤᠬᠠᠢ ᠵᠢᠨ ᠭᠠᠵᠠᠷᠤᠨ ᠲᠡᠦᠬᠡ᠂ ᠰᠣᠶᠤᠯ ᠪᠠ ᠭᠠᠵᠠᠷ ᠵᠦᠢ ᠵᠢᠨ ᠣᠨᠴᠠᠯᠢᠭᠢ ᠬᠠᠷᠠᠭᠤᠯᠤᠬᠰᠠᠨ ᠪᠠᠢ᠌ᠬᠤ᠃ ᠳᠥᠷᠪᠡᠳᠤ᠂ ᠴᠦᠭᠡᠨ ᠲᠣᠭ᠋ᠠᠲᠤ ᠦᠨᠳᠦᠰᠦᠲᠡᠨᠤ ᠵᠠᠩ ᠳᠠᠳᠬᠠᠯ ᠪᠠ ᠠᠷᠠᠳ ᠲᠦᠮᠡᠨᠤ ᠬᠦᠰᠡᠯ ᠱᠠᠭ᠋ᠠᠷᠳᠠᠯᠭᠠ ᠵᠢ ᠬᠦᠨᠳᠦᠳᠭᠡᠭᠰᠡᠨ ᠪᠠᠢ᠌ᠬᠤ᠃ ᠲᠠᠪᠤᠳᠤ᠂ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠬᠠᠷᠢᠴᠠᠩᠭᠤᠢ ᠲᠣᠭᠳᠠᠪᠤᠷᠢᠳᠠᠢ ᠪᠠᠢ᠌ᠬᠤ ᠵᠢ ᠪᠠᠳᠤᠯᠠᠬᠰᠠᠨ ᠪᠠᠢ᠌ᠬᠤ》[9] ᠭᠡᠵᠦ ᠲᠣᠭᠳᠠᠭ᠋ᠠᠪᠠ᠃
ᠲᠡᠭᠡᠬᠦᠯᠡᠷ ᠰᠢᠯᠤᠭᠤᠨ ᠬᠦᠬᠡ ᠵᠢᠨ ᠨᠤᠲᠤᠭᠲᠠᠬᠢ ᠢᠬᠢᠷᠠ ᠬᠤᠶᠠᠷ ᠵᠢᠭ᠋ᠠᠰᠤᠲᠠᠢ ᠨᠠᠭᠤᠷ ᠢ 2014 ᠣᠨᠤ 《ᠥᠪᠥᠷ ᠮᠣᠩᠭᠣᠯᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠭᠠᠵᠠᠷᠤᠨ ᠨᠡᠷᠡ ᠵᠢᠨ ᠬᠠᠮᠢᠶᠠᠷᠤᠯᠲᠠ ᠵᠢᠨ ᠳᠦᠷᠢᠮ》ᠳᠠᠬᠢ ᠬᠣᠶᠠᠳᠤᠭ᠋ᠠᠷ ᠪᠦᠯᠦᠭ 《ᠭᠠᠵᠠᠷᠤᠨ ᠨᠡᠷᠡ ᠵᠢ ᠨᠡᠷᠡᠢ᠌ᠳᠬᠦ᠂ ᠰᠣᠯᠢᠬᠤ ᠪᠠ ᠬᠠᠰᠤᠬᠤ》 ᠵᠢᠨ ᠨᠠᠢ᠍ᠮᠠᠳᠤᠭ᠋ᠠᠷ ᠵᠤᠷᠪᠤᠰ ᠤᠨ ᠭᠤᠷᠪᠠᠳᠤᠭ᠋ᠠᠷ ᠵᠦᠢ᠍ᠯᠤᠨ ᠲᠡᠦᠬᠡᠨ ᠤᠯᠠᠮᠵᠢᠯᠠᠯᠲᠤ ᠵᠠᠷᠴᠢᠮᠢ ᠦᠨᠳᠦᠰᠦᠯᠡᠵᠦ ᠬᠠᠭᠤᠴᠢᠨ ᠤᠯᠠᠮᠵᠢᠯᠠᠯᠢ ᠮᠦᠷᠳᠡᠨ 《ᠲᠡᠭᠡᠳᠦ ᠂ ᠲᠤᠤᠷᠠᠳᠤ》 ᠵᠢᠭ᠋ᠠᠰᠤᠲᠠᠢ ᠬᠡᠮᠡᠨ ᠨᠡᠷᠡᠯᠡᠵᠦ᠂ 《ᠶᠡᠬᠡ᠂ ᠪᠠᠭᠠ᠂ ᠳ᠋ᠠ᠂ ᠰᠢᠶᠤᠤ》 ᠵᠢᠭ᠋ᠠᠰᠤᠲᠠᠢ ᠂ 《ᠱᠠᠩᠳᠤ ᠨᠠᠭᠤᠷ》 ᠵᠡᠷᠭᠡ ᠰᠡᠬᠦᠯᠤᠨ ᠦᠶᠡ ᠵᠢᠨ ᠲᠠᠰᠢᠶᠠᠷᠠᠬᠰᠠᠨ ᠨᠡᠷᠡᠢ᠌ᠳᠦᠯᠢ ᠲᠠᠶᠠᠭᠳᠠᠪᠠᠯ ᠵᠤᠬᠢᠨᠠ᠃ ᠳᠠᠬᠢᠪᠠᠯ 《ᠮᠣᠩᠭᠣᠯ ᠭᠠᠵᠠᠷᠤᠨ ᠨᠡᠷᠡ ᠵᠢ ᠬᠦᠷᠪᠡᠭᠦᠯᠦᠨ ᠪᠠᠭᠤᠯᠭ᠋ᠠᠬᠤ ᠲᠦᠷᠢᠮᠵᠢᠯ》 （1986） [10]ᠢ ᠦᠨᠳᠦᠰᠦᠯᠤᠨ᠂ 《ᠳᠡᠭᠡᠳᠦ ᠵᠢᠭ᠋ᠠᠰᠤᠲᠠᠢ》ᠢ 《德都扎格斯台》 ᠭᠡᠵᠦ᠂ 《ᠳᠣᠣᠷᠠᠳᠤ ᠵᠢᠭ᠋ᠠᠰᠤᠲᠠᠢ》ᠢ 《道都扎格斯台》 ᠭᠡᠵᠦ ᠲᠡᠮᠳᠡᠭᠯᠡᠪᠡᠯ ᠵᠣᠬᠢᠨᠠ᠃
ᠵᠡᠭᠦᠯᠲᠡ᠄
[1]《钦定四库全书》钦定大清一统志 卷四百十
[2]（清）金志節 黄可潤纂《口北三厅志》卷之七 番衛 八和九
[3] ᠦᠵᠢᠶᠡᠳ᠂ ᠭ᠋ᠸᠩᠳᠦᠨ 《ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠰᠦᠮᠡ ᠬᠡᠢ᠌ᠳᠤᠨ ᠲᠤᠢ᠌ᠮᠦ》 ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨᠤ ᠤᠯᠤᠰ ᠲᠦᠷᠦ ᠵᠢᠨ ᠵᠦᠪᠯᠡᠯᠭᠡᠨᠤ ᠲᠤᠳᠤᠭ᠋ᠠᠳᠤ ᠮᠠᠲᠸᠷᠢᠶᠠᠯ᠂ 4—6 ᠳ᠋ᠤᠭ᠋ᠠᠷ ᠬᠠᠭᠤᠳᠠᠰᠤ ᠃
[4]《ᠨᠠ᠊᠂ ᠰᠠᠢ᠌ᠨᠴᠤᠬᠳᠤ ᠵᠢᠨ ᠪᠦᠷᠢᠨ ᠵᠤᠬᠢᠶᠠᠯ》᠂ ᠦᠪᠦᠷ ᠮᠣᠩᠭᠤᠯᠤᠨ ᠠᠷᠠᠳᠤᠨ ᠬᠡᠪᠯᠡᠯᠤᠨ ᠬᠤᠷᠢᠶᠠ᠂1999 ᠤᠨ᠂107.111.112 ᠳ᠋ᠤᠭ᠋ᠠᠷ ᠬᠠᠭᠤᠳᠠᠰᠤ᠃
[5] ᠰᠠᠷᠠᠨᠴᠢᠮᠡᠭ ᠨᠠᠢ᠌ᠷᠠᠭᠤᠯᠪᠠ ᠂ 《 ᠭᠡᠭᠡᠨ ᠱᠦᠭᠦᠮᠡᠭ 》 （ ᠶᠤᠸᠠᠨᠤ ᠳᠡᠭᠡᠳᠦ ᠨᠡᠢ᠌ᠰᠯᠡᠯᠤᠨ ᠪᠠᠭᠤᠷᠢ ᠬᠢᠭᠡᠳ ᠮᠣᠩᠭᠣᠯ ᠲᠡᠦᠬᠡ ᠰᠣᠶᠣᠯ） ᠰᠢᠯᠤᠭᠤᠨ ᠬᠥᠬᠡ ᠂ ᠵᠢᠭ᠋ᠠᠰᠤᠳᠠᠢ ᠰᠤᠷᠭ᠋ᠠᠭᠤᠯᠢ ᠨᠣᠮᠢ ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯᠤᠨ ᠢᠯᠡᠳᠬᠡᠯ ᠦᠭᠦᠯᠡᠯ ᠂ ᠥᠪᠥᠷ ᠮᠣᠩᠭᠣᠯᠤᠨ ᠬᠡᠪᠯᠡᠯᠤᠨ ᠪᠦᠯᠦᠭᠯᠡᠯ ᠂ ᠥᠪᠥᠷ ᠮᠣᠩᠭᠣᠯᠤᠨ ᠰᠤᠶᠤᠯᠤᠨ ᠬᠡᠪᠯᠡᠯᠤᠨ ᠬᠤᠷᠢᠶᠠ ᠂ 2014 ᠣᠨ ᠂11—19 ᠳ᠋ᠤᠭᠡᠷ ᠬᠠᠭᠤᠳᠠᠰᠤ᠃
[6]张弓长,内蒙古地名拼写要符合国家规定,《内蒙古地名文化研究》（汉文版）,2015年4月。
[7]《中华人民共和国地名管理条例》,1986年1月23日,中华人民共和国国务院发布。
[8] 《地名管理条例实施细则》,1996年6月18日,中华人民共和国民政部发布。
[9] 《内蒙古自治区地名管理规定》,2014年11月13日,内蒙古自治区人民政府第207号政府令公布。
[10]国家测绘局、总参谋部测绘局制:《蒙古语地名译音规则》,测绘出版社,1986年。
ᠵᠣᠬᠢᠶᠠᠬ᠍ᠴᠢ ᠵᠢᠨ ᠬᠠᠶᠢᠭ ᠄
ᠥᠪᠥᠷ ᠮᠣᠩᠭᠣᠯᠤᠨ ᠪᠠᠭᠰᠢ ᠵᠢᠨ ᠶᠡᠬᠡ ᠰᠤᠷᠭ᠋ᠠᠭᠤᠯᠢ
ᠰᠢᠯᠤᠭᠤᠨ ᠬᠥᠬᠡ ᠬᠤᠰᠢᠭᠤᠨᠤ ᠠᠷᠠᠳᠤᠨ ᠤᠷᠠᠯᠢᠭᠴᠢᠳᠤᠨ ᠨᠡᠢ᠌ᠭᠡᠮᠯᠢᠭ