ᠤᠷᠤᠨ᠎ᠤ ᠭᠠᠬᠠᠢ ᠵᠢᠨ ᠡᠭᠦᠯᠳᠡᠷ
      ᠨᠧᠢ ᠵᠢᠶᠠᠩ ᠭᠠᠬᠠᠢ （内江猪）
      1. ᠪᠡᠶ᠎ᠡ ᠵᠢᠨ ᠬᠡᠯᠪᠡᠷᠢ ᠪᠠ ᠭᠠᠳᠠᠷ ᠳᠦᠷᠰᠦ
      ᠨᠧᠢ ᠵᠢᠶᠠᠩ ᠭᠠᠬᠠᠢ ᠪᠣᠯ ᠪᠠᠷᠠᠭᠤᠨ ᠡᠮᠦᠨᠡᠲᠦ ᠤᠷᠤᠨ᠎ᠤ ᠬᠡᠯᠪᠡᠷᠢ ᠵᠢᠨ ᠭᠠᠬᠠᠢ ᠵᠢᠨ ᠡᠭᠦᠯᠳᠡᠷ ᠪᠣᠯᠣᠨ᠎ᠠ᠃ ᠪᠡᠶ᠎ᠡ᠎ᠨᠢ ᠲᠤᠮᠤ᠂ ᠪᠦᠷᠬᠦᠭᠦᠯ ᠦᠰᠦ᠎ᠨᠢ ᠬᠠᠷ᠎ᠠ᠂ ᠵᠤᠭᠳᠤᠷ᠎ᠨᠢ ᠪᠦᠳᠦᠭᠦᠨ ᠤᠷᠲᠤ᠂ ᠲᠤᠯᠤᠭ᠋ᠠᠢ᠎ᠨᠢ ᠲᠤᠮᠤ᠂ ᠮᠠᠩᠨᠠᠢ᠎ᠨᠢ ᠭᠦᠨ ᠠᠲᠤᠷᠢᠶᠠᠰᠤ᠎ᠲᠠᠢ᠂ ᠮᠠᠩᠨᠠᠢ ᠵᠢᠨ ᠠᠷᠠᠰᠤᠨ᠎ᠤ ᠳᠤᠮᠳᠠᠬᠢ᠎ᠨᠢ ᠭᠦᠳᠦᠢ᠌ᠭᠡᠳ ᠲᠤᠯᠤᠭ᠋ᠠᠢ ᠵᠢᠨ ᠠᠲᠤᠷᠢᠶᠠᠰᠤ ᠪᠤᠯᠵᠠᠢ᠃ ᠴᠢᠬᠢ᠎ᠨᠢ ᠳᠤᠮᠳᠠ ᠵᠢᠨ᠂ ᠳᠤᠷᠤᠭᠰᠢ ᠤᠨᠵᠢᠢ᠍ᠨ᠎ᠠ᠃ ᠬᠦᠵᠦᠭᠦᠨ᠎ᠤ ᠤᠷᠲᠤ᠎ᠨᠢ ᠳᠤᠮᠳᠠ ᠵᠡᠷᠭᠡ᠂ ᠶᠡᠬᠡ ᠪᠡᠶ᠎ᠡ᠎ᠨᠢ ᠦᠷᠭᠡᠨ ᠭᠦᠨ᠂ ᠶᠡᠬᠡ ᠪᠡᠶ᠎ᠡ ᠵᠢᠨ ᠡᠮᠦᠨ᠎ᠡ ᠬᠡᠰᠡᠭ᠎ᠨᠢ ᠤᠨᠴᠠᠭ᠋ᠠᠢ ᠬᠦᠭᠵᠢᠯᠲᠡᠢ᠃ ᠵᠤ ᠨᠢᠷᠤᠭᠤ᠎ᠨᠢ ᠵᠢᠭ᠋ᠠᠬᠠᠨ ᠮᠢᠳᠠᠭ᠋ᠠᠷ᠂ ᠬᠡᠪᠡᠯᠢ᠎ᠨᠢ ᠲᠤᠮᠤ ᠭᠡᠪᠡᠴᠦ ᠳᠡᠭᠦᠵᠢᠯᠡᠭᠳᠡᠬᠦ ᠦᠭᠡᠢ᠂ ᠬᠤᠳᠤᠯᠠᠢ᠎ᠨᠢ ᠦᠷᠭᠡᠨ᠂ ᠬᠤᠢ᠌ᠰᠢ᠎ᠪᠠᠨ ᠵᠢᠭ᠋ᠠᠬᠠᠨ ᠲᠠᠰᠢᠭᠤ᠂ ᠳᠦᠷᠪᠡᠨ ᠮᠦᠴᠢ᠎ᠨᠢ ᠨᠡᠯᠢᠶᠡᠳ ᠪᠦᠳᠦᠭᠦᠨ ᠪᠦᠬᠡᠯᠢᠭ ᠪᠠᠢ᠌ᠳᠠᠭ᠃ ᠨᠠᠰᠤ ᠭᠦᠢ᠍ᠴᠡᠭᠰᠡᠨ ᠨᠧᠢ ᠵᠢᠶᠠᠩ ᠭᠠᠬᠠᠢ ᠵᠢᠨ ᠠᠷᠠᠰᠤ᠎ᠨᠢ ᠵᠤᠵᠠᠭ᠋ᠠᠨ᠂ ᠪᠡᠶ᠎ᠡ ᠵᠢᠨ ᠬᠠᠵᠠᠭᠤ ᠲᠠᠯ᠎ᠠ ᠪᠠ ᠭᠤᠶ᠎ᠠ ᠵᠢᠨ ᠠᠷᠠᠰᠤ᠎ᠨᠢ ᠭᠦᠨ ᠠᠲᠤᠷᠢᠶᠠᠰᠤ᠎ᠲᠠᠢ ᠶᠣᠮ᠃ ᠮᠡᠭᠡᠵᠢ ᠵᠢᠨ ᠬᠦᠬᠦᠨ ᠲᠤᠪᠴᠢ᠎ᠨᠢ ᠲᠤᠮᠤ᠂ ᠶᠡᠷᠦᠳᠡᠭᠡᠨ 6～7 ᠬᠤᠤᠰ ᠪᠠᠢ᠌ᠳᠠᠭ᠃
     2. ᠦᠢ᠍ᠯᠡᠳᠪᠦᠷᠢᠯᠡᠯ᠎ᠤᠨ ᠴᠢᠳᠠᠪᠤᠷᠢ
      ᠲᠠᠷᠢᠶᠠᠯᠠᠬᠤ ᠤᠷᠤᠨ ᠰᠣᠯᠠ ᠲᠡᠵᠢᠭᠡᠵᠦ ᠪᠠᠢ᠌ᠭ᠎ᠠ ᠠᠵᠢᠷᠭ᠋ᠠᠨ ᠭᠠᠬᠠᠢ ᠵᠢ ᠶᠡᠷᠦ᠎ᠳᠡᠭᠡᠨ 5～6 ᠰᠠᠷ᠎ᠠ ᠵᠢᠨ ᠨᠠᠰᠤᠨ ᠳᠡᠭᠡᠷ᠎ᠡ᠎ᠨᠢ᠂ ᠭᠠᠬᠠᠢ ᠵᠢᠨ ᠲᠠᠯᠠᠪᠠᠢ ᠵᠢᠨ ᠠᠵᠢᠷᠭ᠋ᠠᠨ ᠭᠠᠬᠠᠢ ᠵᠢ 7～8 ᠰᠠᠷ᠎ᠠ ᠵᠢᠨ ᠨᠠᠰᠤᠨ ᠳᠡᠭᠡᠷ᠎ᠡ᠎ᠨᠢ ᠠᠩᠬ᠎ᠠ ᠤᠳᠠᠭ᠎ᠠ ᠬᠡᠬᠡᠯᠳᠦᠭᠦᠯᠦᠨ᠎ᠡ᠃ ᠲᠠᠷᠢᠶᠠᠯᠠᠬᠤ ᠤᠷᠤᠨ᠎ᠤ ᠰᠤᠯᠠ ᠲᠡᠵᠢᠭᠡᠵᠦ ᠪᠠᠢ᠌ᠭ᠎ᠠ ᠠᠵᠢᠷᠭ᠋ᠠᠨ ᠭᠠᠬᠠᠢ ᠵᠢᠨ ᠠᠰᠢᠭᠯᠠᠯᠲᠠ ᠵᠢᠨ ᠵᠢᠯ᠎ᠨᠢ ᠤᠬᠤᠷ᠂ 2 ᠨᠠᠰᠤ ᠪᠣᠯᠪᠠᠯ ᠰᠢᠭ᠋ᠠᠷᠤᠯᠠᠳᠠᠭ᠃ ᠭᠠᠬᠠᠢ ᠵᠢᠨ ᠲᠠᠯᠠᠪᠠᠢ ᠵᠢᠨ ᠠᠵᠢᠷᠭ᠋ᠠᠨ ᠭᠠᠬᠠᠢ ᠵᠢ 3～5 ᠵᠢᠯ ᠦᠷᠡᠵᠢᠭᠦᠯᠦᠯᠭᠡ᠎ᠳᠤ ᠬᠡᠷᠡᠭᠯᠡᠳᠡᠭ ᠶᠣᠮ᠃
      ᠮᠡᠭᠡᠵᠢ᠎ᠨᠢ ᠲᠡᠭᠰᠢᠳᠭᠡᠭᠡᠳ 113 （74～166） ᠡᠳᠦᠷ᠎ᠤᠨ ᠨᠠᠰᠤᠨ ᠳᠡᠭᠡᠷ᠎ᠡ᠎ᠪᠠᠨ ᠠᠩᠬ᠎ᠠ ᠤᠷᠤᠭ᠎ᠠ ᠤᠷᠤᠨ᠎ᠠ᠃ ᠲᠠᠷᠢᠶᠠᠯᠠᠬᠤ ᠤᠷᠤᠨ᠎ᠳᠤ ᠮᠡᠭᠡᠵᠢ ᠵᠢ 6 ᠰᠠᠷ᠎ᠠ ᠵᠢᠨ ᠨᠡᠰᠤᠨ ᠳᠡᠭᠡᠷ᠎ᠡ᠎ᠨᠢ᠂ ᠭᠠᠬᠠᠢ ᠵᠢᠨ ᠲᠠᠯᠠᠪᠠᠢ ᠵᠢᠨ ᠮᠡᠭᠡᠵᠢ ᠵᠢ 8～10 ᠰᠠᠷ᠎ᠠ ᠵᠢᠨ ᠨᠠᠰᠤᠨ ᠳᠡᠭᠡᠷ᠎ᠡ᠎ᠨᠢ ᠠᠩᠬ᠎ᠠ ᠤᠳᠠᠭ᠎ᠠ ᠬᠡᠭᠡᠯᠳᠦᠭᠦᠯᠳᠡᠭ᠃ ᠮᠡᠭᠡᠵᠢ ᠵᠢᠨ ᠠᠰᠢᠭᠯᠠᠯᠲᠠ ᠵᠢᠨ ᠵᠢᠯ᠎ᠨᠢ ᠨᠡᠯᠢᠶᠡᠳ ᠤᠷᠲᠤ᠂ ᠦᠷᠡᠵᠢᠭᠦᠯᠦᠯᠭᠡ ᠬᠢᠬᠦ᠎ᠳᠤ ᠲᠤᠬᠢᠷᠠᠬᠤ ᠨᠠᠰᠤ᠎ᠨᠢ 2～7 ᠨᠠᠰᠤ ᠪᠣᠯᠣᠨ᠎ᠠ᠃ ᠨᠧᠢ ᠵᠢᠶᠠᠩ ᠭᠠᠬᠠᠢ ᠵᠢᠨ ᠲᠤᠷᠤᠢ᠌ᠯᠠᠬᠤ ᠲᠤᠭ᠎ᠠ᠎ᠨᠢ ᠳᠤᠮᠳᠠ ᠵᠡᠷᠭᠡ᠂ ᠮᠡᠭᠡᠵᠢ 1～2 ᠡᠭᠦᠷ ᠳᠡᠭᠡᠷ᠎ᠡ᠎ᠪᠠᠨ 9～10 ᠲᠤᠷᠤᠢ᠌ᠯᠠᠨ᠎ᠠ᠃ 3 ᠳ᠋ᠤᠭ᠋ᠠᠷ ᠡᠭᠦᠷ᠎ᠠᠴᠠ ᠡᠬᠢᠯᠡᠭᠡᠳ 1～1.5 ᠲᠤᠯᠤᠭ᠋ᠠᠢ ᠢᠯᠡᠭᠦᠦ ᠲᠤᠷᠤᠢ᠌ᠯᠠᠳᠠᠭ᠃
      ᠲᠠᠷᠢᠶᠠᠯᠠᠬᠤ ᠤᠷᠤᠨ᠎ᠤ ᠵᠠᠩᠰᠢᠯ ᠵᠶ᠋ᠠᠷ 《ᠵᠢᠶᠠᠰᠠ》 ᠵᠢ᠎ᠨᠢ ᠦᠰᠭᠡᠬᠦ ᠠᠷᠭ᠎ᠠ᠎ᠪᠠᠷ ᠪᠤᠷᠳᠤᠭ᠋ᠠᠨ ᠭᠠᠬᠠᠢ ᠲᠡᠵᠢᠭᠡᠳᠡᠭ ᠶᠤᠮ᠃ ᠭᠠᠷᠭ᠋ᠠᠯᠲᠠ᠎ᠳᠤ ᠭᠠᠷᠭ᠋ᠠᠬᠤ ᠪᠡᠶ᠎ᠡ ᠵᠢᠨ ᠬᠦᠨᠳᠦ᠎ᠨᠢ 150 ᠺᠢᠯᠦᠭᠷᠡᠮ ᠣᠷᠴᠢᠮ᠂ ᠪᠤᠷᠳᠤᠯᠭ᠎ᠠ ᠵᠢᠨ ᠬᠤᠭᠤᠴᠠᠭ᠎ᠠ᠎ᠨᠢ 1.5～2 ᠵᠢᠯ ᠪᠠᠢ᠌ᠳᠠᠭ᠃
      ᠰᠢᠮ᠎ᠡ ᠲᠡᠵᠢᠭᠡᠯ᠎ᠤᠨ ᠬᠠᠩᠭ᠋ᠠᠯᠭ᠎ᠠ᠎ᠨᠢ ᠳᠤᠮᠳᠠ ᠵᠡᠷᠭᠡ ᠵᠢᠨ ᠦᠶᠡᠰ᠎ᠲᠤ᠂ ᠰᠦᠨ᠎ᠠᠴᠠ ᠰᠠᠯᠭ᠋ᠠᠭᠰᠠᠨ᠎ᠠᠴᠠ 90 ᠺᠢᠯᠦᠭᠷᠡᠮ ᠪᠡᠶ᠎ᠡ ᠵᠢᠨ ᠬᠦᠨᠳᠦ᠎ᠲᠠᠢ ᠪᠣᠯᠲᠠᠯ᠎ᠠ 193 ᠡᠳᠦᠷ ᠬᠡᠷᠡᠭᠰᠡᠨ᠎ᠡ᠃ ᠡᠳᠦᠷ᠎ᠤᠨ ᠨᠡᠮᠡᠭᠳᠡᠬᠦ ᠬᠦᠨᠳᠦ᠎ᠨᠢ 400 ᠭ᠋ᠷᠡᠮ ᠤᠷᠴᠢᠮ᠂ ᠨᠡᠯᠢᠶᠡᠳ ᠰᠠᠢ᠌ᠨ ᠰᠢᠮ᠎ᠡ ᠲᠡᠵᠢᠭᠡᠯ᠎ᠤᠨ ᠪᠠᠲᠤᠯᠠᠭ᠎ᠠ᠎ᠲᠠᠢ ᠦᠶᠡᠰ᠎ᠲᠤ᠂ ᠰᠦᠨ᠎ᠠᠴᠠ ᠰᠠᠯᠭ᠋ᠠᠭᠰᠠᠨ᠎ᠠᠴᠠ 90 ᠺᠢᠯᠦᠭᠷᠡᠮ ᠪᠣᠯᠲᠠᠯ᠎ᠠ 179 ᠡᠳᠦᠷ ᠬᠡᠷᠡᠭᠰᠡᠵᠦ᠂ ᠡᠳᠦᠷ᠎ᠤᠨ ᠨᠡᠮᠡᠭᠳᠡᠬᠦ ᠬᠦᠨᠳᠦ᠎ᠨᠢ 660 ᠭ᠋ᠷᠡᠮ᠎ᠳᠤ ᠬᠦᠷᠳᠡᠭ ᠪᠠᠢ᠌ᠨ᠎ᠠ᠃ ᠨᠧᠢ ᠵᠢᠶᠠᠩ ᠭᠠᠬᠠᠢ ᠵᠢ ᠤᠷᠤᠭᠤᠯᠵᠤ ᠢᠷᠡᠭᠰᠡᠨ ᠬᠠᠷ᠎ᠠ ᠮᠢᠬᠠᠨ᠎ᠤ ᠬᠡᠷᠡᠭᠴᠡᠭᠡᠲᠦ ᠭᠠᠬᠠᠢ᠎ᠪᠠᠷ ᠡᠷᠯᠢᠰᠡᠵᠢᠭᠦᠯᠦᠭᠡᠳ᠂ ᠨᠢᠭᠡᠳᠦᠭᠡᠷ ᠡᠷᠯᠢᠰᠡ ᠦᠶ᠎ᠡ ᠵᠢᠨ ᠪᠤᠷᠳᠤᠭ᠋ᠠᠨ ᠭᠠᠬᠠᠢ ᠵᠢᠨ ᠡᠳᠦᠷ᠎ᠤᠨ ᠨᠡᠮᠡᠭᠳᠡᠬᠦ ᠬᠦᠨᠳᠦ᠂ ᠲᠡᠵᠢᠭᠡᠯ᠎ᠤᠨ ᠠᠰᠢᠭᠯᠠᠯᠲᠠ ᠵᠢᠨ ᠨᠤᠷᠮ᠎ᠠ᠎ᠨᠢ ᠮᠠᠰᠢ ᠰᠠᠢ᠌ᠵᠢᠷᠠᠵᠠᠢ᠃

     （ᠢᠷᠡᠯᠲᠡ᠄ ᠦ᠊· ᠪᠤᠶᠠᠨᠳᠡᠯᠭᠡᠷ ᠨᠠᠷ᠎ᠤᠨ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠭᠠᠬᠠᠢ ᠵᠢᠨ ᠰᠠᠢ᠌ᠨ ᠡᠭᠦᠯᠳᠡᠷ ᠰᠤᠩᠭᠤᠬᠤ ᠮᠡᠷᠭᠡᠵᠢᠯ》 ᠭᠡᠬᠦ ᠨᠤᠮ᠎ᠠᠴᠠ ᠰᠤᠩᠭᠤᠨ ᠰᠡᠢ᠌ᠷᠡᠭᠦᠯᠪᠡ᠃）