ᠮᠢᠬᠠᠨᠤ ᠤᠬᠤᠷ ᠡᠪᠡᠷᠲᠦ ᠦᠬᠡᠷ ᠪᠣᠯ ᠢᠩᠭ᠍ᠯᠠᠨᠳ᠋ᠤᠨ ᠬᠣᠢ᠌ᠲᠤ ᠬᠡᠰᠡᠭᠠᠴᠠ ᠤᠭ ᠭᠠᠷᠣᠯᠲᠠᠢ᠃ ᠤᠬᠤᠷ ᠡᠪᠡᠷᠲᠦ ᠦᠬᠡᠷ ᠪᠣᠯ ᠲᠤᠰ ᠭᠠᠵᠠᠷᠤᠨ ᠨᠤᠲᠤᠭᠤᠨ ᠡᠭᠦᠯᠳᠡᠷᠢ ᠡᠷᠯᠢᠰᠡᠵᠢᠭᠦᠯᠦᠭᠡᠳ ᠪᠣᠢ᠌ᠵᠢᠭᠤᠯᠤᠭᠰᠠᠨ ᠡᠷᠲᠡᠨᠤ ᠡᠭᠦᠯᠳᠡᠷ ᠪᠣᠯᠣᠨᠠ᠂ 18 ᠳ᠋ᠣᠭ᠋ᠠᠷ ᠵᠠᠭᠤᠨᠤ ᠡᠬᠢᠨᠤ ᠦᠶᠡᠳᠤ᠂ ᠢᠳᠡᠰᠢᠨᠤ ᠦᠬᠡᠷ ᠪᠣᠯᠭ᠋ᠠᠨ ᠡᠭᠦᠯᠳᠡᠷ ᠰᠠᠢ᠌ᠵᠢᠷᠠᠭᠤᠯᠵᠤ ᠡᠬᠢᠯᠡᠨ᠂ ᠴᠢᠩᠭᠠ ᠨᠢᠮᠪᠠᠢᠪᠠᠷ ᠡᠭᠦᠯᠳᠡᠷ ᠰᠣᠩᠭᠣᠬᠣ ᠪᠠ ᠦᠢ᠍ᠷᠠ ᠡᠭᠦᠯᠳᠡᠷ ᠵᠶ᠋ᠡᠷ ᠦᠷᠡᠵᠢᠭᠦᠯᠦᠨ ᠪᠣᠢ᠌ᠵᠢᠭᠣᠯᠬᠣ ᠠᠷᠭᠠ ᠵᠢ ᠠᠪᠴᠤ᠂ ᠠᠷᠪᠠ ᠭᠠᠷᠣᠢ ᠵᠢᠯ ᠪᠣᠯᠣᠭ᠋ᠠᠳ ᠰᠠᠶᠢ ᠪᠡᠶᠡᠪᠠᠷ ᠨᠡᠯᠢᠶᠡᠳ ᠪᠦᠳᠦᠭᠦᠨ ᠢᠳᠡᠰᠢᠨᠤ ᠤᠬᠤᠷ ᠡᠪᠡᠷᠲᠦ ᠦᠬᠡᠷᠢ ᠪᠣᠢ᠌ᠵᠢᠭᠣᠯᠣᠨ ᠭᠠᠷᠭ᠋ᠠᠭᠰᠠᠨ ᠪᠠᠢ᠌ᠨᠠ᠂ ᠤᠳᠣ ᠳᠡᠯᠡᠬᠡᠢ ᠵᠢᠨ ᠡᠯᠡ ᠣᠯᠣᠰᠲᠤ ᠪᠦᠷ ᠲᠠᠷᠬᠠᠵᠤ ᠪᠣᠢ᠃ ᠳᠣᠮᠳᠠᠳᠣ ᠣᠯᠣᠰ 1913 ᠣᠨᠠᠴᠠ ᠤᠬᠤᠷ ᠡᠪᠡᠷᠲᠦ ᠦᠬᠡᠷᠢ ᠤᠷᠤᠭᠤᠯᠤᠨ ᠠᠪᠴᠢᠷᠠᠵᠠᠢ᠂ ᠤᠳᠣ ᠭᠤᠤᠯᠳᠠᠭᠤ ᠦᠪᠦᠷ ᠮᠣᠩᠭᠣᠯ᠂ ᠭᠢᠷᠢᠨ᠂ ᠾᠧᠪᠧᠢ ᠵᠡᠷᠭᠡ ᠮᠣᠵᠢ ᠤᠷᠤᠨᠳᠤ ᠮᠠᠯᠵᠢᠵᠤ ᠪᠠᠢ᠌ᠨᠠ᠃
ᠮᠢᠬᠠᠨᠤ ᠤᠬᠤᠷ ᠡᠪᠡᠷᠲᠦ ᠦᠬᠡᠷᠤᠨ ᠪᠡᠶᠡᠨᠢ ᠤᠷᠲᠤ ᠪᠦᠭᠡᠳ ᠦᠷᠭᠡᠨ᠂ ᠪᠤᠯᠴᠢᠩ ᠮᠢᠬᠠᠨᠢ ᠠᠷᠪᠢᠨ ᠮᠦᠷᠲᠡᠭᠡᠨ ᠮᠢᠬᠠᠨᠤ ᠦᠬᠡᠷᠤᠨ ᠨᠡᠢ᠌ᠲᠡᠯᠢᠭ ᠤᠨᠴᠠᠯᠢᠭ ᠪᠦᠬᠦᠢ ᠤᠷᠲᠤ ᠳᠦᠷᠪᠡᠯᠵᠢᠨ ᠪᠡᠶᠡᠲᠠᠢ ᠦᠬᠡᠷ ᠪᠣᠯᠣᠨᠠ᠃ ᠲᠤᠯᠤᠭ᠋ᠠᠢᠨᠢ ᠪᠤᠭᠤᠨᠢ᠂ ᠮᠠᠩᠨᠠᠢᠨᠢ ᠦᠷᠭᠡᠨ᠂ ᠡᠪᠡᠷᠨᠢ ᠨᠠᠷᠢᠨ ᠪᠦᠭᠡᠳ ᠤᠬᠤᠷ᠂ ᠬᠦᠵᠦᠭᠦᠦᠨᠢ ᠤᠬᠤᠷ ᠮᠦᠷᠲᠡᠭᠡᠨ ᠮᠢᠬᠠ ᠶᠡᠬᠡᠲᠡᠢ᠂ ᠴᠡᠭᠡᠵᠢᠨ ᠬᠡᠰᠡᠭᠤᠨ ᠪᠣᠢ᠌ᠵᠢᠯᠲᠠᠨᠢ ᠰᠠᠢ᠌ᠨ᠃ ᠮᠦᠴᠢᠨᠢ ᠤᠬᠤᠷ᠂ ᠬᠤᠭᠤᠷᠤᠨᠳᠣᠬᠢ ᠵᠠᠢᠨᠢ ᠦᠷᠭᠡᠨ᠂ ᠪᠦᠭᠰᠡᠨ ᠪᠡᠶᠡᠨᠢ ᠪᠦᠳᠦᠭᠦᠨ᠃ ᠤᠯᠠᠩᠬᠢᠨᠢ ᠬᠦᠷᠡᠩ ᠤᠯᠠᠭ᠋ᠠᠨ ᠵᠢᠰᠦᠮᠲᠠᠢ᠂ ᠴᠦᠬᠡᠨ ᠲᠤᠭ᠋ᠠᠨᠤ ᠬᠢᠨᠢ ᠪᠠᠰᠠ ᠠᠯᠠᠭ ᠪᠤᠯᠠᠭ ᠪᠣᠢ᠃
ᠨᠠᠰᠤ ᠭᠦᠢ᠍ᠴᠡᠭᠰᠡᠨ ᠡᠷᠡ ᠦᠬᠡᠷᠤᠨ ᠪᠡᠶᠡ ᠵᠢᠨ ᠬᠦᠨᠳᠦᠨᠢ 800～1200kg᠂ ᠦᠨᠢᠶᠡ ᠵᠢᠨ ᠬᠢᠨᠢ 500～800kg᠃ ᠰᠠᠶᠢ ᠭᠠᠷᠤᠭᠰᠠᠨ ᠲᠤᠭᠤᠯᠤᠨ ᠪᠡᠶᠡ ᠵᠢᠨ ᠬᠦᠨᠳᠦᠨᠢ 30～40kg᠂ ᠵᠢᠯᠤᠨ ᠰᠦ ᠭᠠᠷᠬᠤ ᠳᠣᠮᠳᠠᠴᠢ ᠬᠡᠮᠵᠢᠶᠡᠨᠢ 3000～4000kg᠂ ᠰᠦᠨᠤ ᠨᠦᠮᠵᠦᠭᠤᠨ ᠨᠤᠷᠮᠠᠨᠢ
3.5％～3.7％ ᠪᠣᠯᠣᠨᠠ᠃
ᠣᠬᠣᠷ ᠡᠪᠡᠷᠲᠦ ᠦᠬᠡᠷᠤᠨ ᠪᠡᠶᠡ ᠵᠢᠨ ᠬᠦᠨᠳᠦ ᠵᠢᠨ ᠨᠡᠮᠡᠭᠳᠡᠬᠦᠨᠢ ᠲᠦᠷᠭᠡᠨ᠂ ᠲᠤᠷᠨᠢᠬᠤᠨᠢ ᠡᠷᠲᠡ᠂ ᠨᠤᠮᠤᠬᠠᠨ᠂ ᠲᠤᠭᠲᠠᠭᠤᠨ ᠵᠠᠩ ᠠᠷᠠᠨᠰᠢᠨᠲᠠᠢ ᠪᠦᠭᠡᠳ ᠠᠮᠠᠷᠬᠠᠨ ᠲᠠᠷᠭᠤᠯᠠᠳᠠᠭ᠃ ᠪᠡᠶᠡ ᠵᠢᠨ ᠬᠦᠨᠳᠦᠨᠢ 400 ᠬᠤᠨᠤᠭᠲᠤ 410kgᠳᠤ ᠬᠦᠷᠴᠦ ᠳᠡᠢ᠌ᠯᠦᠨᠡ᠂ ᠨᠢᠲᠤᠯᠭ᠋ᠠᠨᠤ ᠨᠤᠷᠮᠠᠨᠢ 60％～65％᠂ ᠪᠤᠷᠳᠤᠵᠤ ᠲᠡᠷᠭᠤᠯᠠᠭᠤᠯᠤᠭᠰᠠᠨᠤ ᠳᠠᠷᠠᠭᠠ 72％ᠲᠤ ᠬᠦᠷᠴᠦ ᠳᠡᠢ᠌ᠯᠦᠨᠡ᠃ ᠮᠢᠬᠠᠨᠤ ᠰᠢᠷᠬᠡᠭᠨᠢ ᠨᠠᠷᠢᠨ ᠪᠦᠭᠡᠳ ᠮᠢᠬᠠᠨᠢ ᠵᠦᠭᠡᠯᠡᠨ᠂ ᠦᠭᠡᠬᠦᠯᠡᠵᠦ ᠲᠠᠷᠭᠤᠯᠠᠬᠤᠨᠢ ᠵᠢᠭᠲᠡ ᠲᠡᠩᠴᠡᠭᠦᠷᠢᠲᠡᠢ᠂ 《ᠭᠠᠨᠳᠢᠭ ᠴᠢᠯᠠᠭᠤ》 ᠵᠢᠨ ᠬᠡᠯᠪᠡᠷᠢ ᠮᠠᠶᠢᠭᠲᠠᠢ᠃
ᠤᠬᠤᠷ ᠡᠪᠡᠷᠲᠦ ᠦᠬᠡᠷᠤᠨ ᠤᠳᠤᠮᠯᠠᠬᠤᠨᠢ ᠲᠤᠭᠲᠠᠭᠤᠨ᠂ ᠮᠣᠩᠭᠣᠯ ᠦᠬᠡᠷᠤᠨ ᠡᠭᠦᠯᠳᠡᠷᠢ ᠰᠠᠢ᠌ᠵᠢᠷᠠᠭᠤᠯᠬᠤᠳᠤ ᠬᠡᠷᠡᠭᠯᠡᠭᠡᠳ ᠲᠠᠯᠠ ᠨᠤᠲᠤᠭᠤᠨ ᠤᠯᠠᠭ᠋ᠠᠨ ᠦᠬᠡᠷᠢ ᠪᠤᠢ᠌ᠵᠢᠭᠤᠯᠤᠨ ᠭᠠᠷᠭ᠋ᠠᠪᠠ᠂ ᠦᠪᠴᠢ ᠪᠡᠶᠡ ᠵᠢᠨ ᠦᠰᠦᠨᠢ ᠬᠦᠷᠡᠩ ᠤᠯᠠᠭ᠋ᠠᠨ ᠦᠩᠭᠡᠲᠡᠢ᠃ ᠴᠢᠨ ᠴᠤᠸᠠᠨᠤ ᠦᠬᠡᠷᠲᠤ ᠤᠬᠤᠷ ᠡᠪᠡᠷᠲᠦ ᠦᠬᠡᠷᠤᠨ ᠴᠢᠰᠦ ᠵᠢ ᠰᠡᠯᠪᠢᠵᠦ ᠡᠷᠯᠢᠰᠡᠵᠢᠭᠦᠯᠦᠭᠡᠳ ᠲᠤᠩ ᠰᠠᠢ᠌ᠨ ᠦᠷᠡ ᠪᠦᠲᠦᠮᠵᠢ ᠤᠯᠵᠠᠢ᠃ ᠲᠤᠰ ᠦᠬᠡᠷᠢ ᠪᠦᠳᠦᠭᠦᠯᠢᠭ ᠵᠶ᠋ᠡᠷ ᠠᠷᠠᠴᠢᠯᠠᠬᠤᠳᠤ ᠲᠡᠰᠪᠦᠷᠢᠲᠡᠢ᠂ ᠤᠷᠴᠢᠨ ᠠᠬᠤᠢᠳᠠᠭᠠᠨ ᠵᠤᠬᠢᠴᠠᠬᠤᠨᠢ ᠰᠠᠢ᠌ᠨ᠂ ᠪᠠᠷᠤᠭᠲᠠᠢᠳᠤ ᠡᠪᠡᠳᠴᠢᠨ ᠭᠡᠮ ᠣᠯᠬᠣ ᠦᠭᠡᠢ᠂ ᠲᠠᠷᠢᠮᠠᠯᠤᠨ ᠡᠰᠢ ᠰᠦᠷᠡᠯᠢ ᠠᠰᠢᠭᠯᠠᠨ ᠮᠠᠯᠵᠢᠬᠤᠳᠤ ᠴᠤ᠌ ᠰᠠᠢ᠌ᠨ ᠪᠠᠢ᠌ᠳᠠᠭ᠃
（ᠢᠷᠡᠯᠲᠡ᠄ ᠰᠤᠳᠤᠭᠡᠷᠡᠯ᠂ ᠪᠠᠪᠤᠯᠠᠢ᠂ ᠬᠦᠭᠵᠢᠯᠲᠦ ᠵᠢᠨ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠮᠠᠯᠤᠨ ᠲᠡᠵᠢᠭᠡᠯᠭᠡ ᠪᠤᠷᠳᠤᠯᠭᠠ ᠪᠠ ᠠᠰᠢᠭ ᠰᠢᠮᠡ ᠵᠢᠨ ᠪᠤᠯᠪᠠᠰᠤᠷᠠᠭᠤᠯᠭᠠ》 ᠭᠡᠬᠦ ᠨᠤᠮᠠᠴᠠ ᠰᠤᠩᠭᠤᠨ ᠰᠡᠢ᠌ᠷᠡᠭᠦᠯᠪᠡ᠃）